كيف تصطادين عريسا الجزء الخامس

من تأليف ساريتا
2018

محتوى القصة

رواية كيف تصطادين عريسا

حياة:ميستر سفيان(كتهضر بكل ادب ورقة)
سفيان:(دار لعندها)كاينة شي مشكل؟؟
حياة:احم بغيت غير نعتذر ليك على الشي لي وقع فعلا كان تصرف غير مقبول مني..معرفتش شنو وقع ليا مقدرتش نتحكم فراسي كنعتادر
سفيان:(كيشوف فيها )
حياة:(طلعات عويناتها فيه)سمحلي مستر سفيان
سفيان:ملي عتادرتي فانا قابل اعتذارك
حياة:(تبسمات ليه بشوية ّ..تقول ملاك نازل من السما)
سفيان:باينة فيك شيريرة؟
حياة:لا والله الى ضريفة والحي كلو كيشهد بهادشي ..غير هو انا عصبية شوية ...
سفيان:(تبسم)امم كلشي باين..على العموم نتمنى تكون الحصص رياضية عجباتك...؟؟
حياة:اكيد عاجاباني..وبزاااف 
سفيان:لتازمي بالحركات سكواط كيحتاج لالتزام
حياة:عندك الحق فالحقيقة انا بغيت نزيد حصص فالسكواط ومكرهتش تزيدني حصص...
سفيان:معرفتش الى لقيت عندي شي وقت غادي نعلمك
حياة:واخا 
سمية:واحياة...وهاديك البايرة..والهايجة طلقينا خلاص
حياة:(ضارت عندها كتغمزها وسمية غير مزايدة فيه)
سمية؛تي مال مك كتغمزي..تحركي طلقينا راك عارفة مك فاطمة الى تعطلتي شنو كدير ليك
حياة(كتهضر بشوية)سكتي بغيتلك لقوة سكتي
سفيان:نشوفكم غدا ...وتمرنو فالدار باش توصلو لنتيجة لي بغيتو
حياة:هه واخا بسلامة(خلاتو حتى مشا وجراتها بقرصة فدراعها حتى غوتات)يحرق طواسلك البقرة..فضحتيني قدامو
سمية:بصاح كتعرفي غير نتي.. تفضحيني جربي لمك الإحساس ديال الشوهة.
حياة:يعطيك ضربة فراس الخرية...تقعدي قدامي.

(هادا اسبوع داز على حياة وسمية فلاصال...كما العادة كلها شادا فدراع لوخرا ومشاو فاتجاه لاصال..حياة ضاربة عكر حمر وريسي فلعينين وايلاينر مجبد ...طول هاد الفترة مهدنة راسها وكتبين الجانب الانثوي الهادئ الملائكي لسفيان لي بدات تعجبو...حطو سيكانهم ولبسو حوايجهم ودخلو يتمرنو...ويقومو باحماءات
سمية:حياة!
حياة:شنو؟
سمية:كتكوني زوينة ملي كتكوني مهدنة...سبحان الله كتنزل عليك السكينة
حياة:وراه انا اصلا مهدنة غير نتوما كتبغو تشوفو الجانب المضلم ديالي.
سمية:قلبيها ليالي لحلمية...ياربي السلامة
حياة:ايوة سكتي عليا..اجي طيطيز تعطل اليوم؟
سمية:معرفتش ..
حياة:(كتشمشم بنيفها)ريحتو جا...
سمية:تي هادا نيف لي عندك اولا شفااااط...انا شامة غير ريحة لعرق الخانز
حياة:احح ضارب لكحل اليوم...نااري غادي يقتلني شي نهار
سفيان:(شعل موسيقى وبدا يدربهم..سالات الحصة وبداو لبنات يخرجو..هزات حياة صاكها وجات تخرج حتى سمعات صوتو كيعيط ليها..)
حياة:(دارت عندو بزربة ومشات لعندو)وي ميستر
سفيان:ا..الى بغيتي نجيك ندربك هاد لعشية مع 7
حياة:'(حلات عينيها من الفرحة..تفكرات الحي وعائلتها لمسطية لي مغاديش يصبر يجلس معاهم جوج دقايق)ا..ولكين اسي سفيان انا عندي واحد لمشكل صغير
سفيان:شنو هو؟؟
حياة:الواليدة ديالي مقعدة ومتقدرش تحرك والى مشيت حتى جيتي عندي لدار مغاديش نقدر نركز حيت بالي كلو غادي يكون مشغول معاها(ياربي سمحلي..كلشي فداءا لزواج)
سفيان:ا..صافي ماشي مشكل جي عندي لدار اصلا غادي ندرب شي بنات ويمكن ليك تجي حتى نتي هكا نضربو عصفورين بحجر واحد
حياة:اشمن حجر ولا جرف(بعصبية)
سفيان:شنو؟؟
حياة:ا...صافي صافي...عطيني لعنوان
سفيان:عمارة •••حدا سوق لخميس
حياة:صافي عرفتها...شكرا مستر(جرات صاكها وخرجات طالع ليها الدم..كانت معولة تتفرد بيه ساعا غادي تلقى قدامها لبنات..دارت صاكها على كتفها ومشات لدارهم.)

حياة:(دخلات لدارهم عيانة مشات نيشان لدوش ...شلات جسمها من العرق ولبساات حوايجها دخلات لكوزينة كتقلب على شنو تاكل..جبدات لوبيا سخناتها وطحنات عصير البنان ...حطات كلشي فبلاطو وخرجاات لصالة كتاكل لوبيا بلمعلقة ودوز بعصير لبنان:
حياة:مي..اليوم غادي نمشي مع 7 عند صاحبتي مروى
فاطمة:شنو مديك لعندها؟؟
حياة:وراه صونات ليا..عارضة عليا
فاطمة:امم ايوة متعطليش...
حياة:اجي ...الحاجة شتها غبرات ياك مواقعة ليها شي حاجة؟؟
فاطمة:دزت عليها ليوم..قالت ليا متقدرش تخلي صالح بوحدو..
حياة:وباااااز ليها قولي مقدراش تخلي الحلوة...اما صويلح مغلوب على امرو مسيكين
فاطمة:اشجالسة تبرقمي تماك...اشهاد الحلوة لي كل ساعة كتهضري عليها...؟؟
حياة:والو امي..احح كان فيا جوع..انا نمشي ننعس شوية بينما توصل 7(جرات رجليها لبيتها..لوات عليها لحاف وطاحت على فراشها دودة...بعد ساعات من النوم فاقت حياة على صوت ريفاي فتيلي ديالها طفاتو بصبعها...وناضت من فراشها ...جرات بوشيط ديال لمكياج وبدات تمااااكي...تقول ماشية لعرس...لبسات دجينز وجارت معاه تيشورت كحل دخلات رجليها فسبيبيط كحل وهزات صاكها دارت فيه سورفيت ديالها وجمعات شعرها لفوق رشات ريحتها وخرجات تجري قبل مفات عليها طوبيس.وايدها على كرشها كتحس باعصار ارما نايض فيها)

حياة:(وصلات للحي وبدات دور وجها...شافت اسم العمارة ومشات تجري..كرشها غير مازايدة فلالم...وقفات عند العمارة وجات طلع حتى سمعت صوت مرأة وراها:
مرأة:عندمن جاية الالة؟
حياة:(طلعات فيها وهبطات)ونتي مالك؟؟
مرأة:سولتك جاوبيني؟؟ياك متكوني جاية عند سفيان؟
حياة:اه جاية عند سفيان
المرأة:وشنو كتجيه؟؟
حياة:( هادي باينة غادي تكون شي وحدة حاطة عليه العين ..والله لاكان ليك)سفيان عشيقي..وبعد سيمانة غادي يكون خطيبي..وبعد شهر راجلي...
المرأة:اهااااه مزيان تبارك الله...واخا سيري طلعي لعندو
حياة:وعلاش غادي نتسناك تقوليها ليا ..انا طالعة لعندو(رجعات شعرها ورا ضهرها وطلعات لدار سفيان كتسرسر بشوية)
سفيان:مرحبا حياة دخلي..
حياة:سمحلي تعطلت..
سفيان:لا بلعكس يلاه غادي نبداو
حياة:واخا انا نبدل حوايجي...
سفيان:اه هاهو طواليط هنا دخلي بدلي..
حياة:(كتبسم)شكرا(دخلات حياة لطواليط كتبدل حوايجها...بينما لمراة لي لقاتها لتحت ركبات رقم فتيلي وحطاتو على ودنها:
هي:الو لبوليس!!
هو:تفضلي الالة..
هي:عندي واحد وكر ديال الدعارة فدار ديالي...عفاكم إلى مجو بزربة
هو:عطينا العنوان.
هي:عمارة••••رقم الدار 10(قطعات الخط وجلسات فالدروج كتسنى لبوليس يجو)
حياة:(لبسات سورفيت ديالها وخرجات لعندهم...كانو ربعة دلبنات كيقومو بالتسخينات...وقفات حداهم وبدات طلع وتهبط فكل وحدة وحدها...بدات كدير الاحماءات..وكرشها كتزيد تزيرها كلما دارت حركات رياضية....حسات براسها غادي طلقها فأي

حياة:اه...اييي..الله على راحة...(ناضت من على الكرسي ديال طواليط وتصدمات من الاشكال الزخرفية لي حطات...)ييع هادشي كلو خرج مني...تقول كانت فيا خرية عام....(ضغطات على زر وحلف لماء ميهبط)لا لا لا مديرهياش يرحم باباك...ويلي على فضيحة...ويلي على شوهة...الله اربي الله انا شنو درت...(بدات تضغط على زر الماء وتورك عليه...وحلف مينزل ليها داكشي لي دارت...ريحة كانت مجهدة تقول واكلة جمل....سمعات شي حد كيدق)
لبوليس:خرجي..
حياة:و.واخا دابا نخرج
لبوليسي:خرجي اولا غادي نهرسو الباب...
حياة:ه...هانا خارجة(ويلي على فضيحتي...ويلي احياة شنو درتي خنزتي على الراجل طواليط...بورشت ليه لقادوس باينة...حلات لباب وخرجات عينيها على جهدهم ملي شافت لبوليس كلها ساد نيفو بيدو)
حياة:اويلي اسفيان..عيطيتي على لبوليس..وراه غير خرية لي درت ...
لبوليس:(جرها من دراعها)زيدي قدامي...
حياة:شاااف واشااااف....والله مدرت شي حاجة...غير خريت وحق الله...
هو:زيدي تحركي...
حياة:هئ هئ هئ والله غير خريت...غير خريت هئ هئ شداني نديرها ياربي نحبس جد بوها حتى نرجع لدارنا...(دخلوها لصطافيط وجمعو ليها ايديها بمينوط..ولبنات معاهمعاها كيبكو...وحياة طول طريق لسانها لاصق على كلمة«غير خريت»...خايبة حتى لمعاودة)

حياة:(نزلوها كتبكي..ولبنات وراها...دخلوهم للحبس عامر بالنساء..وسدو وراهم لباب...بدات دور وجها يمين وشمال فلاشكال لي قدامهاّ..وقفات قدامها وحدة كتمدغ لمسكة دايرة عكر حمر ولابسة كسيوة لاصقىة مخلية شحوماتها مدليين من كل اتجاه...حاطة مكياج ديال بنات لحال...طلعات وهبطات فحياة:
هي:تووت شكيدير عندنا هنا...
حياة:وانتي مالك...
هي:مسمعتش مزيان...انا شنو؟؟
حياة:وانتي مالك..نغنيها ليك!
هي:معدورت احبيبة مكتعرفيش حاجيبة...صاحبة اكبر بزول واضخم طب••...هههههه
حياة:(طلعات فيها وهبطات)وهو على لبزول خيرك مدفق نعيشو منو حينا كلو ويشيط الخير نصدقوه(بدا كلشي يضحك)
حاجيبة:طلعي طلعي بهادشي لي لابسة
حياة:شنو مسمعتش؟؟
حاجيبة:اري حوايجك من لكرسون حتى لستيام...
حياة:يمكن نتي لي مكتعرفي انا شكون..
حاجيبة:(طلعت حاجبها فيها)
حياة:قدامك الالة البايرة حياة ومن لا يعرفها...حسن ليك شري السلامة من عندي وسيري تكمشي
حاجيبة:شتك كتهديني..
بوليسي:حياة منصور ..امينة لعارف...خديجة مرابط..اكرام جيلالي...اميرة علي...زيدو قدامي
حياة:عندك زهر احاجيبة...كنت غادي نوريك ضفيراتي.مرة اخرى اتيتزة...(خرجات مع لبنات ..ودخلهم لبوليسي على الضابط..شافت مها ومليكة والحاجة جالسين يبكو)
فاطمة:(شافتها ناضت من بلاصتها)جيتي جيتي ابنت الحرام والله منخلي فيك غير لي نسيت
حياة:هئ هئ والله امي مدرت شي حاجة...عئ هئ والله غير خريت...
الحاجة:اسكتي البايرة سكتي بقات ليك غير الدعارة الله ينعل ترابيك
حياة:هئ هئ والله مدرت شي حاجة هئ هئ هئ
الظابط:جلسي هنا..
حياة:(جرات كرسي وجلسات)
الضابط:هضري عاودي شنو وقع!!
حياة:هاانتا اسيدي... سي سفيان المدرب ديالنا قلنا ليه يزيدنا حصص على حساب سكواط..رياضة ديال الترمة...المهم مشيت لعند دارو مع هاديك 7 حيت غادي يدربني انا وشي بنات...صافي مشيت لعندو يلاه جيت نبدا التدريبات حسيت حشاك بخرية...حيت كنت ضاربة البنان ولوبيا... دخلت لطواليط وبديت كنصفي دهني ونخوي كرشي...ملي نضت ندوز الماء على الشكل المقرف لي درت مبغاش الماء يدوز ..شنو ديري احياة شنو ديري احياة..ملقيتش حل...حتى سمعت شي حد كيدق..ملي حليت لقيت لبوليس ويلي ميمتي..ياك ميكون سفيان عيط البوليس حيت درتها قد راسي فالطواليط ديالو....مهم جرني لبو...
ضابط:(قاطعها)صاااافي صااااافي..تقدري تمشي ..مخليين مشاكل الوطن وجالسين نسمعو لخريتك..وقعي هنا وغبري من خليقتي.

حياة:(رجعات لدارهم كتجر رجليها وفاطمة طول الطريق كتنقر)
فاطمة:الله اربي الله انا شنو درت باش تجازيني بهاد المصيبة
الحاجة:اويلي على اخر ايامي نخرج بنت بنتي من لحباسات والسبب دعارة
مليكة:ونتي اخالتي لي طلقتي ليها لحبل..
حياة:ولي سمعكم يقول كنت هازا رجليا...
فاطمة:(جمعات معاها بقرصة)سكتي سكتي بغيتليك ابنتي لي يجي ويفكني منك
حياة:ونتوما لي مكبرين الموضوع...رااااه عاااادي كلنا كنتزيرو ..وشنو زعمة نديرها فحوايجي..
فاطمة:دخلي لبيتك..غبري كمارتك عليا منشوفش وجهك قدامي....
حياة:هااااهي غادية ياربي السلامة تقولي خدامة مع داعش
فاطمة:واااااغبري يغبر ليك الشقف(جلسات على صوفا شادا راسها ومليكة كتدهن ليها رجليها...اما الحاجة هزات صاكها ومشات لعند صالح لي من الصباح كيصوني ليها)
حياة:(بدلات حوايجها..وشدات تيلي بين ايديها...هزات عينيها لسقف وحطات تيلي رفعات ايديها لسما وطلبات من اعماق قلبها)
حياة:ياربي بجاااه حبيبك المصطفى زوجني...راني عييت اسيدي ربي..كل ماحطيت عينيا على شي حد كيطير...علاش اربي علاش...انا شنو درت..اكرام البعلوكة تزوجات...مروى المنحوسة تزوجات...هبة لمسمومة تخطبات...وانا ماعلياش الله علاش؟....ياربي زوجني خلاص ...خليني نكتر نسل الامة...ياربي زوجني يارب...(جمعات شعرها باتشا...وحطات راسها على لمخدة كمحاولة منها تنعس خصوصا بعد هاد النهار لمخري لي داز عليها)

حياة:(فاقت حياة على اصوات جارات مدابزات فلحي رمات لغطا وناضت كتحك راسها...دخلات دوش قضات حاجتها غسلات وجها وخرجات لعند فاطمة لي كانت كتبرد لحسوة فهاد الجو البارد)
حياة:صباح الخير
فاطمة:(ضرباتها ليها بتخنزيرة مزلزلة)
حياة:ياربي سلامة...قاتلة ليك روح شهاد التخنزيرات امي
فاطمة:وباااااز لوجهك ..والله معرفتش من فين والداك؟؟
حياة:من كرشك امي علاش فين كيولد الواحد
فاطمة:صبرك ياايوب....نوضي طيبي لغدا حسن منريشك على الصباح
حياة:ايوة نفطرو بعدا...عطيني شي جبانية ديال لحسوة
مليكة:(كتجر كرشها قدامها)خالتي انا خارجة مع سي محمد لعند لخياطة
فاطمة:ايوة متعطليش راه غادي يضربك البرد
مليكة:واخا اخالتي
حياة:(بعدما فطرات جمعات طبلة ودخلات لكوزينة دارت طاجين دجاج وزيتون...جمعات لكوزينة وبدلات حوايجها..)مي...وااااامي
فاطمة:شنو بغيتي؟؟
حياة:راه طفيت على غدا..انا نمشي لعند لحاجة معرفتش شنو بغاتني
فاطمة:ايوة متعطليش
حياة:واخا...(مشات لعند الحاجة لي صونات ليها...دقات عليها وخرجات ليها الحاجة لابسة روب حمر ديال الريش وطالقة شعرها المشيب..وزايداها بعكر حمر فاااااقع..)
الحاجة:دخلي
حياة:(كطلع فيها وتهبط)فاتن حمامة...شكادير فلمغريب؟
الحاجة:زيدي عليا حتى نتي راه لي فيا يكفيني
حياة:مالك الحاجة شواقع؟؟
الحاجة:زيدي لبيت
حياة:(تبعاتها لبيت نعاس وبدات دور وجها وحابسة الضحكة بزز...كان مزوق ومتوش ..مفرشاه بالحمر وعامر بنفيخااات حمرين..حاطة شمع ديال درهم فقراعي ديال سيدي علي صغيورين رومانسية زعمة وداكشي...)الله اجدة الله شواقع فهاد البيت مالو مرون...مصارعة صافي
الحاجة؛الحاج احياة...
حياة:مال صويلح؟؟
الحاجة:كيعدي غير بالحبوب
حياة:لا سمحيلي مفهمتش هادي شرحي ليا!!
الحاجة:وباااش يطلع ليه...باااش يولي عندو الارتفاااع كياكل لحبوب بتخبية
حياة:الله الله على صويلح كيعدي بلفياغرا...علاش شنو كنتي متوقعة غادي تلقااااي صاروخ قدامك!!
الحاجة:كان مبرعني لايام لولة كنشوف داك الخير كنسخف غير شوفة فيه كترجعني 10 سنين لور..نبات واكلة لحلوة صباح وعشية...قلت الله الله ازبيدة سعدك يفرح ..لمترياال عندو صحيح...صدق كادب عليا كيشرب لحبوب باش ينوض ليه...اليوم تصدمت صدمة عمري..
حياة:'(مخرجة عينيها على جهدهم كتسمع لفيلم بورنو لي قدامها)
الحاجة:اليوم عيد ميلادو..قلت بيني وبين راسي..نوضي الشارفة ديري لراجلك شي عيد ميلاد متوش..وجدت راسي ولبست كيفما كتشوفي..وجدت شمع وطيبت رفيسة ..فااااش دخل تصدم..انا صحبتو مصدوم من العيد ميلاد صدق تصدم حيت لحبوبات تقادو عليه ونسى مشراهم
حياة:ايوة؟؟
الحاجة:ايوة بديت لمسة من هنا بوسة من لهيه...حتى وصلنا لمعقول...بدل منخرج الصارووووخ لي ولفني بيه...خرجت جلدة لاوية متقتل متحي..
حياة:(حابسة الضحكة بزز)ايوة

الحاجة:أيوة شنو بغيتي كتر من هادشي تقلقت وقلت ليه طلقني..
حياة:طلعتي هايجة اجدة!!
الحاجة:(جمعاتها معاها بقرصة)
حياة:ايييي ...وراه قلت غير لي كاين...واش مزوجة باش تقسي لحلوة اولا تشدي زمانك؟
الحاجة:وراه كدب عليا احياة...
حياة:وجدة الله يهديك راه لي دارو صويلح عااادي جدا هو اصلا معندو كيدير يقيم الى مكالش لفياغرا متكبريش الموضوع..
الحاجة:شنو دابا باش غادي نعدي انا؟؟
حياة:هادشي هضري فيه مع صويلح انا معندي مندير ليك..الى كنتي تسمعي ليا حيدي فكرة الطلاق من بالك اجدة وصويلح مغاديش تلقاي بحالو...
الحاجة:أيوة منعرف..
حياة:الله اربي الله شتي تحراميات نتي مولاتهم قالك منعرف..نوضي نوضي نعلي شيطان وصوني على راجلك
الحاجة:قلتيها ابنتي...
حياة:قلتها الحاجة..
الحاجة:ايوة صافي دابا نصوني ليه
حياة:انا واحد الحاجة لي مقدرش نفهمها...عيد ميلاد على صباح كيدرتو ليها؟؟
الحاجة:وراه الضو كيتقطع علينا فليل قلت نديرو فالنهار
حياة:اممم وهاد قراعي سيدي علي لي دايرة شمع فيهم فين شفتي هاد الخوزعبيلة؟؟
الحاجة:عرفتي شنو احياة
حياة:شنو؟؟
الحاجة:خرجي تقعدي ...يلاه 
حياة:ناكرة الجميل..هانا خارجة(جرات صاكها وخرجات ميت بالضحك)
سمية:ضحكينا معاك!
حياة:سويمية...نتي هنا..جاية لعند جدة؟؟
سمية:لا جاية لعندك!
حياة:شواقع ياك لاباس:؟
سمية:بغيتك تعاونيني!!
حياة:الله اربي الله ...شهاد النهار ...
سمية:مالكي كتغوتي ازمر؟؟
حياة:والو...شنو واقع هضري..
سمية:هئ هئ هئ 
حياة:قلت ليك هضري ماشي تبكي
سمية:هئ هئ كنبغيه هئ هئ 
حياة: ..حمزة مول الشفنج؟
سمية:هئ خئ قبيلة مشيت شريت من عندو خمسة شفنجات..طول الوقت كنتبسم ليه ..اوالو وتقول واش شاف فيا...هو عارف بلي انا كنبغيه ولكين معرفتش مالو ميهضر معايا...هئ هئ حتى من المعدة ولات كضرني من الشفج لي كنشريه من عندو كل نهار هئ هئ
حياة:مسحي دموعك...
سمية:هااااني مسحتهم..
حياة:زيدي قودي قدامي...
سمية:فين غادي نمشو...
حياة:عندو...زيدي قدامي
سمية:لا لا حياة متفضحينيش عااااافاااااك
حياة:تي زيدي قدامي.

حياة:حميزة...واحميزة
حمزة:ختي حياة مرحبا..شنو حب الخاطر
حياة:اربي احمزة واش كتصحاب راسك توم كروز؟؟
حمزة:مفهمتش اختي حياة؟؟
حياة:هاد البنت مال مك معاها؟
حمزة:سمية...مالي معاها(باستغراب).
حياة:هانتا شوف منقدرش نهضر قدام هاد الخلق لي مجمع على شفنجك لمسخ...المهم عندك واحد خمسة دقايق غادي تسد لمحل وتجي لعندنا لساحة لي حدا مزبلة بوشعيب عرفتيها؟؟
حمزة:عرفتها!!
حياة:ايوة جي تماك وجيب معاك لبشنة...خمس دقايق احميزة نلقاك عندنا
حمزة:واخا...
حياة:(جلسو لبنات فكرسي من كراسى الساحة لي ريحة لخنز كتعطي منها ودبااان كيضور بيها..دارت حياة رجل فوق رجل تقول جالسة فالساحة الملكية...)
سمية:شنو غادي تقولي ليه...لاش عيطيتي ليه...لاش جينا هنا؟؟
حياة:سدي دلقوشك اسمية...هاعريس لغفلة جا
حمزة:(هاز لبشنة بين ايديه ومقاد الحالة...لابسة سروال لفصالة قهوي وديار معاه قميجة صفرة..مرجع الشعر لور بجيل وجاي لعند لبنات كيفرنس)سلام
حياة:جلس احمزة..(جلس فنجب حياة وسمية فنجب لاخر)شوف احمزة نتي ولد الناس والله يعمر ليكم الدار عمرنا شفنا منكم العيب فلحي داخلين سوق راسكم..وكلشي كيعرف عليكم غير الخير
حمزة:الله يبارك فيه
حياة:شوف نجيك نيشان..سمية كتبغيك ..ومن شحال هادي
سمية:(حدرت راسها حشمانة)
حياة:من غدا تصيفط الواليدة وتجي تخطبها من دارهم
حمزة:ولكين احياة زربتو عليا...راه...
حياة:شوف ..جيتك طاي طاي...غدا جيب نجيبة وختك حنان وجو تخطبو البنت..راني عارفة بلي حتى نتا كتبغيها...تباااات متبعها بلعين صباح وعشية(ناضت من الكرسي)نخليك تشوف العروس...النضرة الشرعية من حقك
حمزة:ولكين...
حياة:شووووف احمزة راني صابرة وساكتة...ياك مشكرناك بغيتي تنفخ ريش...راني بحال مشكرتك نشوهك...والله احميزة وراس مي فاطيمة..ومتجي غدا تخطب..والله منخلي فيك غير لي نسيت...نشوه طاسيلت جد بوك فلحي. غادي نقول ليهم كتقلي شفنج بالبول...وكتعجنو بلحشيش...وكدخل لبنات لعمارة لفاسي....وكتحرض ختك حنان على السحت ...و...
حمزة:صافي صافي انا فعرضك احياة من غدا نجي نخطب...
حياة:ايوة هكاك...خلينا زوينين....نوضي نتي تهزي مكاين لانضرة شرعية لاختها.(رجعو لبنات للحي ناشطات طول طريق كيفرنسو....دخلات حياة لدارهم ولقاات فاطمة ماشية جاية هلى طول لمراح)
حياة:مي..ياااك لاباس!!
فاطمة:(شافت فيها وجراتها لعندها)واخيراا احياة....واخيرااا
حياة:وأخيرا شنو؟؟
فاطمة:ولد خالتك.مروان جاي غدا لمغريب..وغادي يجلس عندنا ...وقالي بغيتيك فموضوع ضروري...العريس جا احياة جااااا
حياة:ل...ل...لعررريس.

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.