فاطمة:هكا بغيتك ابنتي...يلاه نوضي نضربو تخميلة على الدار
حياة:(ناضت من بلاصتها ...ومشات في اتجاه بيتها جمعات شعرها بزويف...لبسات سروال ديال الدار طلعات رجليه لعند الركبة..ولبسات تيشورت ديال سي محمد لبسات صنادل لميكة فرجليها....وخرجات لعند فاطمة لي بدات تخمل الصالة..بداو ينقو ويسيقو من هنا ولهيه ..تقول لملك لي زايرهم...دخلات لكوزينة وبدات توجد فلحلوة والضحكة مرسومة على فمها...ناشطة ومقدها لفرحة..لعريس جاي وغادي تعيش الحياة لي شحال هادي باغية تجربها....جرات جبانية خلاطات فيها طين لخضر وشوية لحامض ودارتو على وجها ...وبدات طيب لحلوة وتستف فسطل لي حداها..بينما فاطمة دخلات ترتاح فبيتها....سمعات شي حد كيدق...غسلات ايديها...ومشات تحل الباب...طلعات وجها وخرجو عينيها من الشخص لي قدامها.
مروان:(مخرج عينيه فيها ومخلوع من المقنع الأخضر لي قدامو)س. ..سمحيلي يمكن غلطت فلعنوان..(جا يرجع ينزل وهي تنطق المصيبة ديالنا:
حياة:مروااااان متمشيش!!
مروان:(تلفت لعندها )
فاطمة:ولدي مروان جيتي!!(خرجات لعندو ودفعات حياة وراها بيدها باش تمشي تغسل حالتها)
فاطمة:نوضي ابنتي نوضي الله يرضي عليك...جيبي لولدي الحلوة لي صاوبتي...وهاداك لمسمن ولبغرير لي طيبتي...
حياة:واخا امي...
فاطمة:سيري الله يرضي عليك ابنتي ويعطيك على قد نيتك ويفرحك ابنيتي الغالية ...اه اولدي مروان شحال مربية عليها الكبد..بنتي حياة نسمة حياتي...مكنتخيلش يجي نهار وتمشي عليا...الله يرضي عليها ...خفيفة بحال ريشة على قلب...
حياة:(ماشية جاية على طول لبيت كتاكل فضفارها..)ياربي يكون باغيني لزواج...(سمعت صوت ميساج جاها..كان من عند سمية...صونات عليها :
حياة:مالك ازمر
سمية:حياةّّ..قفطانك لبيج..جيبيه ليا على حساب الخطبة
حياة:ممسلياش دابا...حتى لمن بعد
سمية:وازمر راه غدا عندي الخطبة..
حياة:والخرا قلنا ليك ماشي دابا...ممسلياش حتى نسالي..(سمعت شي حد كيدق عليها..رمات تيلي وحلات لباب كان مروان:
مروان:واخا ندخل
حياة:(رجعات شعرها بشوية ورا ضهرها)تفضل..
مروان:(دور عينيه فلبيت)بيتك زوين...
حياة؛ههه الله يهديك..راه كيلقفص ..
مروان:هه...جلسي نهضر معاك
حياة:(قلبها غادي يخرج من بلاصتو..جلسات حداه وكتسناها بفارغ الصبر ينطق بكلمة زواج)
مروان:شوفي احياة...نتي بنت خالتي وعلى عيني وراسي لي ضرك يضرني...ولي يفرحك يفرحني...انا كيفما تعرفي جيت على قبل زواج...وهضرت مع خالتي فاطمة على هادشي...أنا بغيتك لزواج احياة
حياة:(كتسد وتحل عينيها..ممسدقاش الشي لي كتمسع...صرطات ريقها وشافت فيه يلاه جات تنطق بكلمة موافقة...قاطعها)
مروان:انا بغيتك لزواج...ولكين...كلشي غادي يكون شكلي...انا مقادرش نشوفك من غير بنت خالتي والخدمة ديالي كتفرض علينا نتزوجو فضرف شهر... غادي يعطوني دار فاسبانيا بسميتي ويخلوني فخدمتي...شنو قلتي احياة!!
حياة:(كلامو نزل عليها بحال الصاعقة...متوقعتهاش منو..معرفاتش باش تجاوب وشنو تقول...للحظة عرفت راسها منحوسة ..وزواج لي مخلات ودارت باش تعيشو..هادي هي نهايتو....صرطات ريقها وشافت فيه)
حياة:و...واخا تخليني نفكر
مروان:من حقك خودي وقتك...(خرج من عندها وخلاها ساكتة كتغبن حتى نزلو دموع عينيها بلما تحس.)
حياة:(لبسات جلابتها وهزات تيلي ديالها وخرجات...مشات لعند سمية وبدات دق عليها حتى حلات:
سمية:ومالكي على هاد الدقان...جبتي لقفطان
حياة:زيدي بغيت نهضر معاك
سمية:مالكي...شواقع؟؟
حياة:وخليني ندخل بعدا(توجهو لبيت سمية وسدو الباب)
سمية:شواقع؟
حياة:اوووف..
سمية:وهضري!!
حياة:جاني عرض زواج
سمية:لولولولولييييييي
حياة:وزبل سكتي...شكاديري
سمية:واش سمعتي شنو قلتي...غادي تزوجي ونتفكو منك
حياة:سمية سمعيني...
سمية:هانا شنو؟؟
حياة:مروان ولد خالتي لي كان فاسبانيا..جا اليوم....(بدات تعاود ليها الشي لي وقع وسمية كتسمع)
حياة:شنو رايك فهادشي؟؟
سمية:وهي لحقيقة صعيبة شوية...ولكين لو كنت انا منك نوافق
حياة:راه بغا زواجنا شكلي؟؟
سمية:وراه ريحة رجال مبقاتش ازبل...دخلت غليك بالله فين هاد الراجل لي باغي المعقول هاد الزمن..ياك مخلينا مدرنا احياة باش نصيدو شي،واحد...شنو صيدنا زبل....دابا غادي تمشي لعندو وتقولي ليه موافقة..وديري يالالة مولاتي عرس فلحومة ناس كلها تحل فمها فيه...سكتي لمسومات وهزي راسك لفوق راك جايبة سيد رجال مروان ولد الخاريج...اي وحدة تحلم تكون بلاصتك...وملي ديريه فصبعك خليه يبغيك...راك قويفزة مغ راسك ومنخافش عليك..وزايدون نتي مكتبغيهش..الى مصدق مخسرتي والو...بلعكس غادي تخرجي من هاد الحي لمدود وتمشي لصبانيول تفوجي...
مروان:(كيدور بعينيه على فاطمة...شافها كتسلم على شي ناس...صيفط واحد البرهوش وجات لعندهم)
حياة:ماما اجي نقول ليك...
فاطمة:(تحدرات عندها)
حياة:مي ورحمة با المحجوب...ومتخلي ليا حقي من الدجاج والحلوة والله منتحرك من هنا
فاطمة:الله اربي على مصيبة عطيتني...واش المسخوطة بالك غير فكرشك...تي من فين غادي دوز هاد اللقمة ومزال غادي تفرقعي...
حياة:والله الى عرفتك مغادي تفيديني بوالو عيطي غير على سمية تجي لعندي
فاطمة:خلي هاد ليلة دوز بيخير احياة
حياة:(خرجات عينيها فيها وجات تنوض...حبساتها فاطمة تدعي وتنقر....عيطاات لسيمة لي كانت واقفة مع حميزة كيتصورو)
سمية:مال لعروسة ديالنا...
حياة:سمية حقي من الدجاج راه مصارني كيضاربو...
سمية :متخافيش ازين...راني عزلت ليك من كل حاجة شوية..وكلشي درتو ليك فواحد طبسيل وحطيتو ليك فصاك لي غادي تدي لاوطيل....
حياة:يخليك ليا احبي(رجعات لعندها النكافة من جديد و خرجوها تلبس اللبسة لاوخرا...كانت مهدنة وشادا لارض ....خرجات تلبس لبسة الفاسية ورحعات من جديد...كدور على الميدات ميدة ميدة حتى وصلات ميدة عويشة...طلبات من مروان يمشي لعند عائلتو حيت مبغاتوش يسمع المناقرة لي غادي توقع مع عويشة:
حياة:(هازة راسها لفوق وحاجبها طالع وصلت ميدة عويشة وهي تنطق:
حياة:(مشات لعند مروان ورجعو جلسو....دازت ليلة عرس مغربية بامتياز...حياة ماشية جاية هي و مروان ...كيلبسو ويبدلو....لحيحة نايضة فلقاعة شي يشطح شي ينقر شي مقابل التبرقيق...والحاجة زبيدة دايرة عرض ازياء تقول هي لعروسة...لعرس كلو تلبس وتبدل وعنينها على صويلح...سالا لعرس وخرجات حياة هي مروان من القاعة في اتجاه الاوطيل ...جرات الصاك من بين ايدين سمية وطلعات لوطو ..فاطمة تخلط عليها كلشي دموع الفرح والحزن... مليكة حاطة ايدها على كرشها وطبسيل لحلوة فيدها...اما الحاجة جبدات حياة من ايدها وبدات توشوش ليها فودنها:
مشات العروسة ديالنا لاوطيل....وهنا غادي يبداو مصائبها من جديد.
حياة:(وقفات بيهم لوطو قدام لاوطيل...نزلو منها وحياة هزاها صاكها بين ايديها كتسنى غير امتى يطلعو باش تعمر لكريشة..شدو جوج غرف وحدة مقابلة مع لاوخرا...
مروان:هاكي هادا كارت ديال لغرفة ديالك انا مقابل معاك الى حتجي لشي حاجة عيطيلي وغدا فيقي بكري شوية باش نخرجو لوراق ديالك
حياة:واخا...تصبح على خير
مروان:وانتي من اهل الخير(دخل مروان لغرفتو وحياة حتى هي...حطات صاكها...وخرجات الطبسيل لي خلات ليها سمية...مشات تجري بيه لكوزينة صغيرة فبيتها...شعلات لبوطة وحطات مقلة فوقها خوات داكشي لي فطبسيل من لحم ودجاج وخلاتو يسخن.وخرجت تبدل حوايجها....حيدات لكسوة لي لابسة وجبدات كسيوة حد ركبة لبساتها ودارت فوقها يينوار...جرات بوشيطة ديال المكياج وبدات تمسح وجها وتهضر مع راسها بصوت عالي:
حياة:دابا كيندير حتى نطيح هاد خينا...شي لي جربت فرجال من قبلو حتى طريقة منجحات..هادا كيندير حتى ندخل فعروق دمو....امم نجرب لافوكا...اولا نتبعكك عليه...اجي ياك منلعب على مصارنو اصلا الرجال همهم غير فكرشهم...(بدات تشمشم بنيفها ريحة شي حاجة محروقة ...تفكرات المقلة وناضت تجري لكوزينة لي لقات لعافية شاعلا فيها وزر الحرائق شعل فلاوطيل كلو:
حياة؛لا لا ياربي لا...دجاج مشا لا ميمكنش...(سمعات صداع برا والروينة مقلوبة فلاوطيل..وشي حد كيدق عليها بجهد وهي دموع تجمعو فعينيها كتشوف فلمقلة المحروقة ونااار لي طالعة...حلات لباب ودخلو شي وحدين هازين طفاية ديال الحريق...حسات بمروان جرها من دراعها وخرجها من البيت ...دورات عينيها فلاوطيل لي تقلب فرمشة عين وناس كيتجراو شي عريان وشي ناعس...كلشي خرج برا لاوطيل وحياة مخربقة معرفاش شنو دير ملي يسولها مروان على سبب لي خلا العافية تشعل)
مدير لاوطيل:الالة هادشي لي درتي ممنوع عندنا هنا...اولا حاجة زايدة البوطة على جهدها...ومخلية شمع حداها...شهاد الاهمال...واش عجبك الشي لي درتي فعباد الله
حياة:بلا قصد مني اخويا...وزايدون مالك كتغوت
مروان:صافي سكتينا(جر معاه المدير وهضرو بعيد شوية عليها...حنزز فيها راجل ودخل لاوطيل...بينما مروان رجع لعندها ربع ايديه وشاف فيها كيتسناه تعطيه مبرر مقنع)
حياة:هانتا شوف بلما تشوف فيا بهاد تخنزيرات راه غير ضرني جوع من العرس...وقلت نسخن شوية دجاج سعى تحرق وقع لي وقع..
مروان:قوليها من لول..نديك تعشاي ومنصولوش لهاد الشوهة
حياة:(نزلات عينيها لارض وسكتات معندها باش تجاوب)
مروان:نوضي لبسي شي حاجة كنتسناك هنا...
حياة:علاش فين غاديين؟
مروان:ياك فيك جوع..يلاه طلعي متعطليش
حياة:(ضرباتها بجرية لبيت...لبسات سروال وتيشورت وهزات صاكها...ونزلات لعندو...ركبو فلوطو وتوجهو لمطعم بسيط كيصرع الدجاج...نزلات حياة وشدو طبلة...كتشوف فالدجاج لي كيطيب قدام عينيها وريوقوها سايلين..مروان مكتفي غير بلابتسام...كيشوف فهاد البلوة لي طاحت على راسو....وصلات طلبيتهم وبدات حياة كتنهش فهاديك الدجاجة حتى شوهاتها مهزات راسها حتى شبعات...غسلات ايديها ورجعو لوطو فاتجاه لاوطيل....دازت ليلة منحوسة عند حياة خصوصا بعد الحريق لي تسببات فيه...مع ساعات الاولى لصباح فاقت ختنا ..لبسات حوايجها وحطات مكياج بسيط هزات صاكها ونزلت لعند مروان لي كان كيتسناها بلفطور...عمرو كرشهم وتوجهو لقنصلية خرجو وراق حياة وتوجهو نيشان لمطار قطعو فاخر طيارة خارجة لإسبانيا...ورجعو لحومة بزغارت والتعارج....
حياة:'('سلمات على عائلتها ودخلات نيشان لبيتها كتجمع حوايجها ومعاها سمية...حابسة دموعها بزز مكتحملش حاجة سميتها الوداع)
سمية:كيدازة ليلة البارح؟
حياة:مقودة...غير خليها على الله وصافي بان ليا المصائب كيجرو غير ورايا انا من دون البشر
سمية:شنو درتي الزبل؟؟
حياة:حرقت لاوطيل!!
سمية:اويييييلي.....
حياة:سكتي لاتسمعك مي...والله وتعرف متخلني نمشي
سمية:لا اختي هادشي بزااااف شي عوينة هادي
حياة:ياختي خليها على الله وصافي(جمعات حوايجها وخرجات لعند عائلتها لي جالسة تبكي بصغيرهم وكبيرهم)
حياة:الله ياربي ..ياك نتوما لي بغيتو تهناو مني وهاني تزوجت وغادي نغبر من قدامكم
مليكة: هئ هئ هئ شكون غادي يتناقر معايا أنا هئ هئ
حياة:وصافي امليكة مغاديش نتعطل عليكم غير شهر ونجي نشوف هاد بوراس لي فكرشك
فاطمة: هئ هئ خئ الله ابنتي الله خئ هئ شكون غادي يبقى يدابز ليا مع عويشة وهنية...
حياة:ونااااري امي وباراكا..شهاد الحالة لي دايرين
الحاجة: هئ هئ هئ وشكون غادي نشكي عليه مشاكل ديالي مع صويلح
حياة:ياربي السلامة...وجع التراب فهاد الدار(طارت عليهم تنعقهم واحد واحد...وسمية تبكي وراها حالفة مدير عرسها بحمزة حتى ترجع حياة...خرجات حياة من دارهم وسط عيون الجيران لي كيطلو عليها من الشراجم...طلعات لوطو وتوجهو لمطار...وهنا غادي تبدا حكاية جديدة فقصة حياة المليئة بالكوارث لي غادي طيح على راس سي السلطان مروان ...)
حياة:(ركبات حداه فلوطو وتوجهو للمطار ...طول طريق كتعوج يمين وشمال...عويناته فلارض وصوتها مكيتسمعش...مروان مركز مع طريق...والصمت سيد الموقف...وصلو للمطار وجرو باليزات وراهم....بعد الاجراءات لي دامت ساعات...توجهو للطائرة...
حياة،:عااااافاك امروان خليني حدا الشرجم
مروان:واخا دوزي...
حياة:(جلسات فلكرسي لي حدا الشرجم على اساس غادي تستمع بالمناضر ونسااات بلي هادي اول مرة ليها فالطيارة..تبعات الشي لي كيديرو مروان ملي يلبس السمطة...دارت نفس الشي لي دار ....وبدات ترجع شعرها وراها بكل ثقة...مبينة راسها بلي عادي تركب الطيارة كيصحابلها بحالها بحال طوبيس جوج دراهم....بدات الطيارة تتحرك وتتهز وحياة كتحس بالخوف....الوقت لي بدات تطلع فيه لسماااء....غوتاااات بصوت الحاجة الحمداوية الرنااان:
حياة:واااااااهبطوني.....هبطووووووني...شبيني وبين شي صبنيول باراكا عليا غير براكتنا.....
مروان:(حط يدو على فمها كيسكتها حيت شوهاتو قدام الركااب....وقفات طيارة على الارتجاج وشدات توزان ديالها فسما...حيد مروان يدو من على فمها بعدما حس بيها تهدنات)
حياة:(حسات براسها تهدنات شافت فمروان لي ولا وجهو حمر محملش الموقف لي تلاح فيه...عرفات راسها كحلاتها معاااه شدات القنت وزمات دلقوشها حتى وقفات عليهم المضيفة...
المضيفة:بغيتو شي حاجة؟؟
حياة:ختي عندكم شي حاجة تكال؟؟
المضيفة:لي بغيتي كاين....
حياة:منلقاش عندكم طاجين بالبرقوق...
المضيفة:(شدها الضحك)لا ختي الى بغيتي نجيبو ليك على دوقنا
مروان:جيبي شي سلاد فروي وبسكوي معاه ..
المضيفة:واخا...(جات تمشي وهي تعيط ليها حياة)
حياة:ختي بغيت نمشي لطواليط..
المضيفة:واخا تفضلي معايا
حياة:(بدات مضاربة مع السمطة تحيدها وتقول واش بغات تحل...شاف فيها مروان..غمض عينيه من قوة الغضب حط صبعو على واحد الزر فسمطة وتحلات...خلاها حالة فمها من غبائها لي فات لحدود...ناضت من بلاصتها ومشات مع المضيفة لي وراتها الطواليط ...دخلات حياة لطواليط كانت مزيرة...سدات عليها...وجلسات على الكرسي وبدات تفرغ مصارنها:
حياة:اييه احياة وليتي تخراي وتبولي فسما....(كتلعب بخصلة من شعرها وكتهضر...ضغطات على واحد الزر ديال ريحة وحسات بالكرسي كيجرها بحال لبلان لي وقع لمحمد هنيدي ففيلم فصين ههههه..)ااااه ويلي ميمتي ....ويلي مصايبي...لمسعودة مشاااات احياة...الترمة تسرطات المنحوسة....الله اربي فكني...ويلي على فضيحتي....وعتقوني عتقوني اعباد الله ...المسعودة تسرطااات...والمضيفة...وامروااااااان...(حسات بشي حد كيدفع عليها لباب..طلعات السروال لي لابسة على فخادها ودخل عليها،واحد خينا داير ماسك على نيفو والمضيفات وراه ومروان معاهم كيمسح على وجهو بيدو...ضغط الراجل على زر اخر وخرج...سدو عليها الباب وخرجو...لبسات حوايجها...وبدات تعض فضفارها مقدراش تخرج حيت مروان كيتسناها برا.)
كيف تصطادين عريسا الجزء السادس
محتوى القصة
التنقل بين الأجزاء