قدري أن أحبك الجزء 54

كانت جهينة شادا بنتها و معاهم اشراق و حتى ايناس مجموعين فوحدة من لي كافي ... 

ايناس : اجي للهنا عطيني بوووسة اديك العفيريتة .. 

جهينة : هضري معاها بالتركية راه السيدة تركية ..

ايناس عنقاتها و باستها : الله شحااال غزااالة عندك هااد البنت .. مصاااب تجيني شي بنييتة بحالها .. 

جهينة شدات يديها و قالت : دااابا يجيييب ليك الله احبيبة..غيير صبري .. 

اشراق : كان عليك تشوفي الطبيبة شحاال هااذي .. علاش تعطلتي ..

ايناس: اختي كنت خاايفة .. و شحاال و انا نتهرب .. حتى بزز عليا عتمان .. احنا دابا متبعين التريتموون عالله يجيب التيسير من عندو .. 

جهينة و اشراق : ان شاااء الله .. 

ايناس: اوى قولي ليا انت .. اش خلارك انت و بونغ بونغ ديلك .. اشنو غاديري مع امك و عمك .. 

جهينة : ماعرفتش باقي ماقلت ليهم وااالو .. خايفة من ردة فعل ماما .. 

ايناس: كانظن ماغاديش تاخد موقف .. لانه مظلوووم .. اما داكشي ديال شحال هادي راه بردات قضيتو و ماماك راه نساات .. 

اشراق : بالصح .. راكم تظلمتو .. و انت باقية مزوجة بيه .. يعني ماتهزي ليها هم .. هزيه غير لراجلك و مصيبتو مع باه .. 

جهينة : و الله الى بالصح .. انا خايفة لا تقلب القضية تاني كيف شحااال هاذي .. 

اشراق : الوضع مختاالف هااذ المرة .. 

جهينة : ما بغاو يقولو لينا وااالو .. بغيت غير نعرف اش غايديرو .. حتى من بابا ايدين جا .. القضية حااامضة و مااااشي ساااهل يدخلو حصوون داك الرااجل .. 

اشراق : انا بعدا بااالي هااااني ...و عندي احساااس فروم ذ بااتم ... هذاك الحنش قربات نهايتو .. 

كان ايرتان بمرافقة عز .. مد ليه قريعة بيها كابسةلات سائلة .. 

عز : ها الامانة .. راه فوق داكشي لي طلبتي .. من اول مرة غادي يبانو الاعرااض ... 

ايرتان : ههههه شحااال زوييينة تطيح راسك براسك .. 

عز : كاانت فكرة زويينة صراحة .. خليه يدمر راسو بيديه ..و يطيح و هو كايشووف بعينيه و ماقادر يدير والو .. 

ايرتان : كيفما تحكم فمصيري لمدة 4 سنين .. غادي نتحكم فمصيرو لمدى الحياة .. 

عز : عمر لقينا حلو .. و الشارفة ؟ 

ايرتان : ماعرفت ماندير مع هاذيك .. مابقاوش هازينها رجليها .. و تقريبا ماكاتخرجش من بيتها .. بان ليا غانلوحها فشي مصح للامراض العقلية .. يربطوها تما و تموت تما بوحدها شوية بشوية ..

عز : اوووه شفتك راعييييييتي ليها ... 

ايرتان : و كاين اصعب من هادشي بالنسبة للسنها .. و كيف كاتقووول رااه رااعيت ليها .. كون ماسنها كون كان ليها حساب اعسر من هذا .. مهم .. انا عندي خدمة .. غادي ندي هذا للخدامة و هي تبالي بيه .. حيت مابقيتش قاادر نصبر.. 

عز : واش هي تقة بعدا .. ايرتان مابغينا حتى غلطة .. 

ايرتان : ماتخاافش .. 

مشا ايرتان .. و بقا عز جالس .. كايلعب بشفايفو بصباع يديه و هو ساارح كايفكر ... نيسرين .. داز طيف اسمها قدامو للحظة ... اشنو احوالها و اشنو دارت مزاال ... اسئلة ماقدرش يطرحها على ايظين فاش تقابلو معاه ... و مالقاش حتى السبب لي يخليه يعيط ليها و لا يتواصل معاها .. خدا تيلي شعلو قدامو .. متردد يتاصل و لا الا .. 

فهاد الاتناء .. 

كانت نيسرين فالجريدة ... شادا تيليها ديالها كاتصنت للموسيقى .. دازت للميساجات و هي كاتفكر فكلام امها .. كانت نصحاتها باش تقرب منو و على الاقل هكا ممكن تعرف شنو نوايا ديالو .. 

كتبات ميساج : صباح الخير عز .. 

رجعات مسحاتو و كتبات : سلام عز اشنو خبارك .. 

مسحاتو و رجعات كتبات : سلام عز .. كيف داير .. انا بغيت غير نيولك على اخبار خويا .. 

مسحاتو من جديد و هي مترددة و مستنكرة غباءها .. 

نيسرين : اوووف اش هادشي كانكتب .. الى بغيت خويا غادي ناخد نمرتو و نهضر معاه نيشاان .. اكيد ... غايفهما طايرة .. بلاتي غانسول عاادي .. 

رجعات كاتكتب و جاها ميساج .. 

عز : اشنو كاتحاولي تكتبي من الصبااح .. 

خرجو عينيها ووقفات كاتشوف بدهشة و صدمة ... دارت يظيها عبر فمها .. كاتقرا الميساج و تعاود .. 

نيسرين : كيفاش عرف ؟ .. اش هاادشي يااربي .. 

رجع وصلها ميساج : اكيد غباءك غايخليك تسولي كيفاش عرفت .. و لكن راه غير طلع ليا ...typing ... 

قرات الميساج من جديد و رجعات جلسات كاتشوف فيه ... 

رجع جاها ميساج قال : غاتخلي الميسااج معلق اقليلة الترابي .. 

استافزها بمعيورتو و جاوبت : انا ماشي قليلة الترابي .. 

عز : ااه دابا عااد جاوبتي .. اشنو كنتي كاتكتبي .. 

نيسرين : والو .. غير شفتك غبرتي قلت نسول فييك .. 

عز : اوى الى كان هكا .. كانسحب كلامي لي قلت بخصوص قليلة الترابي .. 

تبسمات نيسرين و رجع سيفط ميساج اخر : درتي بكلامي و لا باقية معندة .. حيت الى وصلاتني خبارك .. غانخلي كولشي تاني و نرجع ليك .. 

كان ميساجو مهدد و لاشيء منو مفرح ... الا انها فرحات بيه .. حسات بيه مهتم بيها .. غير بمجرد ما قال : نخلي كولشي تاني و نرجع ليك .. جملة كم من المشاعر منهم الاهتمام .. الاهتمام .. لي طالما قلبات عليه و مالقاتوش .. و دابا جا فمرة وحدة .. 

جاوبات ميساجو و قالت : لا .. ماتخافش .. ديك نيسرين الضغيفة خليتها في فرانسا .. دابا كاندير خطط لمستقبلي ...واخا باقي ماعرفت شنو بغيت .. 

تبسم عز و رجع كتب : مزيان .. هادشي لي كنت باغي نسمع .. مهم نخليك دابا .. 

بانت ليها بلي ديكونيكطا .. حطات تيلي فجنبها و رجعات راسها لوور كاتفكر و على بسمة لقات كيف ترسم على محياها .. 

وصل الليل ... كانت جهينة كاتنعس هيفين ... و كاتوجد فراشها باش تنعس .. حتى سمعات الدقان فالغرفة ...توجهات تحل الباب و كاتبرغم ..

جهينة : هاد الحمقة .. ماصدقات تفارقت مع داك راس الطنغ .. مابقاوش يتفاارقو .. 

خلات الباب و تحل فمها ببسمة على وجهها .. سندات يدها على الباب و اليد الاخرى على خصرها و قالت : اش دااكشي ؟ 

دفعها ايرتان و هو كايشوف يمين و يسار .. مسك بخصرها بين كفيه و خشا وجهو فعنقها و دفع الباب برجلو .. 

ايرتان : توحشتك .. 

جهينة : اوى تشاوفنا غير البارح ... 

ايرتان شاف فيها هاز حاجبو : و نتشاوفو حتى اليوم .. كاتحاسبي معايا لمك .. 

تبسمات جهينة و قالت : لا .. خوود راحتك .. 

ايرتان : فين بنتي ؟ 

جهينة : بنتك نااعسة .. على ماعرفتيش شحال فالساعة .. 

ايرتان جرها لعندو و قال : وااا هي نااخدو راحتنا .. 

جهينة : تولااي غاتجي فاي وقت .. نسيتي بلي هي مشاركة معايا البيت .. 

ايرتان : مصييييبة هااذي .. 

جهينة : هههه .. 

جراتو جلساتو و جلسات فوق رجليه .. عنقاتو و باست راسو و قالت : كيف دايرة اموورك .. 

ايرتان : كيف غااتكون .. 

جهينة : قول ليا اشنو غاديرو .. 

ايرتان : و انت ماالك ... علاش كاتسولي .. 

جهينة : اويلي مالك داخلني طول و عرض غير سولتك .. 

ايرتان : خرجي سوق داكشي .. شحال من مرة قلتها ليك .. ديها غير فبنتك و فشعرك لي حرمتيني منو .. 

جهينة :اووووف و رجعنا لسييرة الشعر تااني .. 

ايرتان : باش نوريييك انا تقطعييه .. باش حسيتي و انت كاتقطعييه ... بغيت غير نعرف .. 

جهينة : وا بكيت علييه و ندمت سيير بلاااص .. بلا تفكرني صاافي .. 

ضيق ايرتان عينيه فيها و قال : مامسامحكش .. 

ضحكات جهينة و شنقات عليه بذراعها : غانبقااو على هااد السيرة .. زعما فغيابي مادرتي والو .. غاتكون زبلتيها ضرووووري .. خاصة و ظيك الصفرييطة فجنبك .. ديما لاصقااك .. 

ايرتان : اااااه .. شحال من مرة حاولات تغريني و كل مرة كاتدير حركات تلفت انتباهي .. و عاااد ..

جهينة : عااد اشنو .. كنتي كاتلعب وراااايا ا اييرتان .. 

ضحك ايرتان و قبل خدها : ماصورات مني وااالو .. القلب عاامر واخا ماكانش عارف بيمن ...

تبسمات جهينة و قالت : اوى احسن لييك .. اشنو درتي معاها ؟ 

ايرتان : تعاملي باقي هو هو .. راك عارفة ماخاسهمش يعيقو .. 

ربطات جهينة حواجبها و مطت شفايفها بحنق و قالت : انا ماعحبنيش تبقى لاصقة فيك و يسحاب رااسها مخطووبة براجلي و تاايقة فراسها . 

ايرتان : ههههه وييينو على الغيرة .. 

جهينة : و الى ماغرتش على راجلي على من غانغير .. دير مسافة بينك و بينها و بقا تقمعها باش ماتضسرش .. عقلتي اخر مرة اش وقع 

ايرتان : هههه ما غاديش نتسناك توصيني حيت اصلا هكاك كان تعاملي معاها .. غيير نعسي على جنب الراحة .. راجلك ماشي برهووش .. 

جهينة : رااجلي بونغ بونغ الحلاخة ديااالي .. 

ايرتان : هههه... امتى نتجمعو فدارنا و بنتنا بيناتنا .. 

جهينة : قريب ان شاء الله .. 

ايرتان : غادي يخصكم ترجعو انت و بنتنا و اشراق للعند الوالدة و بقاو تما .. 

جهينة : واخا ان شاء الله .. 

ايرتان : احنا غانساليو شغالنا هنا و غادي نرجعو .. و من تما نشوفو كيفاش نتلاقاو مع نسيبتي و نحييو الرحم معاها .. 

جهينة : واخا ان شاء الله .. هضرت معاها نيت غير قبايلة .. و ماقدرت نقول ليها والو ... حتى نعاود ليها فاص .. 

ايرتان : مزيان .. وا عنقيني دابا .. 

ضحكات جهينة و عنقاتو فحضنها بالحناان الاموومي كيف عاادتها ... 

بعد مروور 15 اليوم ... 

في غرفة الاجتمااعات ... كان ايرتان جالس وسط مجموعة من المدراء و المسؤولين و موظفين .. كانو فصدد عرض مشروع من مشاريع الشركة في محاولة لانقاذها من الافلاس بعد الخساارة الكبيرة لي كان سبابها عمر بسبب قرار غير صائب خداه ... 

كان ايرتان مراقبو بشماتة في صمت .. و هو جالس غير مركز .. كان كل شوية تصدر منو ضحكة او قفزة لا ارادية .. حركات غريبة و غمغمات .. الكل بداو كايلاحظو تصرفااتو الغريبة مؤخرا .. و كل واحد كيفاش كايفسرها .. جنون او خرف ... 

كان مقدم المشروع .. كايشرح .. قاطعو صوت عمر لي وقف كايضحك .. من بعد كايجمع ضحكتو و يشتم بكلام نااابي .. و يرجع يضحك .. و بعد المرات كايرجع لوعيو و يستغرب افعاالو .. الكل بدا مصدوووم من فعلو ... 

ناض ايرتان جرو معاه و خرجو وسط غمغمات الموجودين ... 

دخلو للمكتب و جلسو كايشوف فيه بنظرة تشفي و هو شااد راسو .. 

ايرتان : بابا .. مالك .. اش هادشي درتي .. 

عمر : ماعرفتش .. ماعرفتش اشنو كايوقع ليا .. هاد الايام ... 

ايرتان : بان ليا خاصك ترتااح .. يمكن غير عييتي ... و هادشي بدا كايأتر على خدمتك .. خلي ليا شغااالك .. و خوود ليك عطلة ارتااح فيها .. 

عمر : بان ليا عندك الحق .. الشركة اماانة عندك اولدي .. حاااول تصلح هاادشي .. خااصنا نخرجو من هااد الازمة ضرووري ... 

ايرتان بنظرة ماكرة : ان شااء الله .. كووولشي غادي يتصلح .. 

في تركيا ... 

كانت جهينة جالسة كاتفرج هي و اشرااق .. 

هبطات نيسرين جلسات حدااهم ... 

جهينة: هيفين فين هي .. 

نيسرين : مع ماما الفووق .. 

جهينة : صافي .. 

اشراق : هااد البغل فين غابر كانعيط ليه ماكايجاوبش .. 

جهينة : قال ليا ايرتان عندهم شي مهمة لمح ليا بشي عملية تهريب غادي يوقفوها .. 

اشراق : الحمااار ما قال ليا وااالو .. 

جهينة : اش غاايقووول لييك حتى انت .. سيفطونا هنا تهنااو مننا .. غير على هاد كترة الاسئلة .. 

نيسرين : جهينة ؟! 

جهينة : نعام .. 

نيسرين : و.. واش .. عز حتى .. هو معاهم فالعملية .. 

تبسمات جهينة و غمزاتها اشراق .. حشمات و حدرات عينيها و قالت جهينة .. 

جهينة : اش هاادشي كاانسمع .. ملاحظتييش كلتسولي فييع بزاااف .. 

اشراق : ناس طايحين و ضاربين الطم .. يااك قلنا حنا خوااتااتك .. 

نيسرين : فهمتو غلط انا غير .. 

جعينة : لا لا .. بان ليا فهمنا صح .. 

اشراق : وا بصراحة ماعرفتش اش عجبك فداك الغوريلا .. 

دارت عندها نيسيرين و قالت : مالو .. زوين و الفورمة و الشخصية و.. 

ماكملاتش و دورات وجهها حشمانة من شوفاتهم.. 

اشراق : ههههه شوووف كيف ضرباتها النفس علييه .. 

جهينة : لا لا .. ضرووري تعاودي لينا كيفاش جرى .. عاودي ليا ماتحشميييش .. 

نيسرين : و بما انني تفرشت قداامكم .. غادي نعاود ليكم .. 

جهينة : ياله هضري .. 

نيسرين : انتوما عارفين اش وقع في فرانسا .. الوقت لي كان حابسني فالاوطيل .. قدرت نفهم شوية من شخصيتو و شوية عاداااتو .. لقيت راسي كانتجدب ليه .. من اول ما مد يديه و طرشني.. حسييت بيه قرييب .. 

اشراق : ههههعع اويييلي حي .. 

جهينة : لا لا بزااف .. قولي هااد العادة عندكم سلالة .. لي عصاكم كاتطيحو فيه ؟ 

نيسرين : مافهمتش 

جهينة : انا دخلت فخووك براااس .. و ماااشاء الله من داك النهار و هو تابعني .. 

نيسرين : هههههههههه اويلي .. 

جهينة : قصتنا من بعد و نعاودها ليك .. دابا حنا فقصتك .. علاش اختي عجباتك طرشتوووو .. 

نيسرين : هههه هوما طرشااات .. و لكن ماشي عجبااتني .. غير داك الاحساس ديال شي حد لي كايضربك على مصلاحتك و لا خايف عليك .. شي حد مهتم بييك و كايفكر ليك و لمستقبلك .. دوك التهديدات ديال غانربيك .. غانديير لييك .. حسيت بالانجذاب ليه من هاادشي .. كان ملازم ماكلتي و تهلا فيا فمرضي فواحد النهار .. بزاف ديال المواقف وقعات فديك 15 اليوم خلاتو يلفت انتباهي .. منين رجعنا و انا كانفكر فيه و متشوقة نرجع نشوفو .. 

اشراق : الله يااربي الله و فيمن طحتي .. 

نيسرين : علاش مالو ؟ 

اشراق : على منين كنتو في فرانسا .. ملاحظتيش بلي هو ابو بنات و كل نهار مع وحدة ؟ 

حنات راسها و قالت : لاحظتها .. 

جهينة خرجات عينيها فاشراق و قالت : هو راه عاازب .. يعني اكييد لا لقا بنت الناس غايحبس هادشي .. و زايدون هادشي قالو بفمو .. 

هزات نيسرين عينيها فيها و قالت : امتى قالها .. 

جعينة : هههه شحال هاذي .. مهم انت خاصك ديري مجهوود باش تجريه لعندك و تلفتي انتباهو .. 

اشراق : محااااال .. نسيتي بلي هي اخت ارتااان .. عشيرو رووح لرووح .. و مايقدرش يقرب لخت صااحبو .. 

جهينة : مصيييييبة هاااذي .. تي ماالك عشتي هااد جو النكد .. فينما نطلعو المورال تهبطيييه .. انت موحال واش تولدي عااادي .. 

يتبع