عشق و كبرياء الجزء الرابع

ريم : OMG 😍😍😍 متقولش ليا غادي تعاقدو معاه .. و ولي موديل لسويفت !! 

آدم : وي .. الى وافق على العرض ديالنا .. 

ريم : وااااو احسن خبر سمعتو هاد النهار .. 

آدم : ههه حمقة .. يالاه انا ساليت .. زيدي نمشيو نتغداو باش نرجع لخدمتي .. 

ريم : هههه واخا 😉 .. Workaholic 

خرجو بجوج و هبطو فالالفايتور .. و هما خارجين من الشركة آدم جاه اتصال .. هز الفون لقاه زياد .. 

آدم : وي زياد ! 

زياد : فينك اصاحبي باقي فالشركة ؟ 

آدم : نو انا غادي نتغدا معيا ريم .. 

زياد : معاك ريم ! فين غادين نخلط عليكم ..

آدم : هههه و شكون عرض عليك !! 

زياد : مك هههه .. 😂

آدم : تقود لا .. راه كتجبدني و مكنبغيش نخصر الهدرة .. 

زياد : اوا نطق خلاص .. فين غادي تغداو ؟ 

آدم : في الريسطو ديال ديما .. حنا قربنا نوصلو .. 

زياد : اوكي .. نص ساعة نكون عندكم .. 

آدم : يالاه تلاح .. 

عند اسراء ⬅

جالسة اسراء وجهاد في الصالة كيتناقشو في موضوع العقد .. 

جهاد : اوا أش بان ليك ؟ 

إسراء : اوا الصراحة العقد هو هداك .. تهلاو فيك .. ميسحابليش نتا مهم لهاد الدرجة 😂

جهاد : آش كتعرفي على خوك 😂 المهم بغيتك تكوني فالاجتماعات الرسمية .. نتي مولفة و عارفاني معنديش مع هاد تخربيق .. 

إسراء : ههه عارفاك .. غير كضربهم على شعا .. شي نهار يقولك راسك دير معايا شي فالطة نحطك بوجهك معاهم 😂

جهاد : ههه التهديد .. واخة ألالة 😂 

إسراء : أنا غنعلم موسيو آدم بلي الاجتماع غيكون من هنا يوماين . 

جهاد : اوكي .. (تم خارج و رجع) .. أجي .. نتي السي الإدريسي كتعرفيه شخصيا ؟ 

إسراء : اه ؟ لا .. علاش ؟ 

جهاد : لا غير شفتكم جمعتو فالحفلة .. 

إسراء : آااه هضرنا غير فالخدمة .. آش غنقولو مثلا ؟ هه 

جهاد : .. اوكي... أنا مشيت .. ✌

إسراء : بااي ( اووف مكيفلت والو هاد النزق ) ..

في الريسطو جالس ادم و ريم كيتغداو .. حتى دخل زياد واتاجه للطبلة عندهم ..

زياد : زعما نتوما ماتسناو حد !

ريم : هاي زياد ..

زياد : هااي الزين سافا ؟

ريم : سوبير فاين ههه 

زياد : ( جلس حداهم ) شتك ناشطة .. ما سبب هاد الابتسامة ؟

ريم : هههه nothing special ..

آدم : مالك جاي بعجاجتك .. جلس و هنينا .. 

زياد : مالي جاي عندك .. انا جيت غير على ود ريم 😉 ..

ادم : اوى دومندي وسربي .. راه باقي تابعني شلا مايدار .. 

زياد : صافي فهمنا .. you're a busy man .. هههه

آدم : مالي بحالك .. مخلي شغالك و عاطيها للدوران و النزاهة فلي كلوب .. واحد السي مجد منهار جا كيضل سهران و يصبح يشخر .. تلاقيتو ..

زياد : اه شتك باغي تخصر لينا ضواسا .. ريم عنداك تيقيه !

ريم : ههههه .. حياتك هاديك .. حتى حد معندو الحق يدخل فيها و لا يحاسبك ..

زياد : ( بهمس ) أودي غير دخلي ..

ريم : نعاام !!

زياد : هههه لا والو .. آدم هالعار لما حط هاداك البيسي شوية .. 

آدم : قلب عليا .. مامساليش ليك ..

كملو غداهم .. آدم رجع للشركة و زياد وريم مشاو اتقهواو من بعد ما عرض عليها زياد ..

يوم الاجتماع ⬅

إسراء و جهاد .. فاللوطو متاجهين لسويفت 

جهاد : قولي ليا .. 

إسراء : وي ؟ 

جهاد : أشمن ايتاج فيه المكتب بعدا ؟ 

إسراء : 10 

جهاد : 😱 كطلعي حتال تما فدروج ؟ 

إسراء : معندي حتا حل آخر .. و اليوم خويا حبيبي غيطلع حتا هو فالدرووج ياك ؟ 😂

جهاد : ههه كنولي خوك حبيبك غير فالأوقات الزوينة .. 

وصلو .. حطو طوموبيل و دخلو للشركة .. كلشي كيتلفت ليهم بحكم جهاد وجه معروف .. مشاو لاستقبال قالو ليهم آدم كيتسناهم .. مشاو طلعو فالدروج حيت جهاد أكيد مبغاش يخلي ختو معذبة بوحدها .. طلعو مسابقين بحال الولاد الصغار .. حتا وصلو .. 

إسراء : أودي على المحترف قاليك .. غلبوك هاد الدريجات 

جهاد : ههه غير غفلتيني .. را نهزك نجري بيك فيهم .. 😏

إسراء : مهزيتي حتا راسك 😂😂

هاجر :(قاطعاتهم ) موسيو جهاد اليوسفي 😍 مرحبا بيك عندنا 

جهاد : مغسي .. 

هاجر : الآنسة ؟ (كتشوف فإسراء و تخنزر ماحاملاهاش ) 

إسراء : 😒الماناجر ديالو .. ممكن نشوفو موسيو الإدريسي؟ 

هاجر : وي كيتسناكم .. تفضلو معايا 

تبعناها .. داتنا لقاعة الاجتماعات .. دخلنا و خرجات هي و سدات الباب . 

تلفت لينا آدم بابتسامة .. وقف و جا سلم علينا 

آدم : مرحبا بسي جهاد عندنا 

جهاد : مغسي 

آدم : (مد ايديه يسلم عليا بابتسامة ) ميس إسراء .. جمعاتنا الصدف مرة أخرى .

أنا : هه وي .. نتمنى تكون خدمتي عند حسن ظنكم 😊

آدم : معلوم .. تفضلو جلسو .. باش ندخلو ديريكت فالموضوع .. جهاد اليوسفي اسم معروف و عندو فانز مساندينو كثار من غير أنه رياضي محترف و هادشي بصراحة غينفع البراند ديالنا و كنضن حتا نتا غتنفعك هاد الشراكة بحيث الوجه ديالك غيتعرف كثر فالساحة الوطنية و العربية .

جهاد : حتا أنا قريت العقد و معندي حتا اعتراض نسني معاكم .. ان شاء الله تكون شراكة ناجحة ..

أنا : كنضن دابا خاص غير ناخدو مخطط ديالكم نطالعو عليه باش نسقوه مع التداريب ديالو و نستأنفو الخدمة فأقرب وقت. 

آدم : أكيد .. هاهو الملف مفصل .. يمكن ليك تراجعيه و إلا عندك شي استفسار أنا موجود .. 

أنا : (بتاسمت ليه و خديت الملف كنقراه) بون ماناخدوش من وقتك بزاف .. نسنيو دابا العقد و إلا كانت شي حاجة دابا ناخد موعد من السكريتير ديالك و نرجع عندك 

آدم : متحتاجيش موعد .. رجعي فأي وقت أنا موجود 

أنا : اوكي نايس .. 😊

آدم : سي جهاد .. تفضل (عطاه العقد و ستيلو ) 

سنا جهاد العقد و حتا آدم .. و ناضو وقفو خارجين .. 

جهاد : نخليوك دابا .. نتشاوفو عما قريب إن شاء الله.. 

آدم : انشاءالله .. المهم حنا غنبقاو على تواصل واي مستجدات غادي توصل بهم ميس اسراء .. 

إسراء : اوكي .. مع السلامة .

تميت خارجة وهي تبان ليا ديك خيتي تاع قبيلا كتحنزز كدير فيا شي شوفات تقول غنقسم معها الورث .. بتاسمات لخويا ودخلات عند آدم .. يخ كي كتعوج محملتها مقبلتها .. توادعت مع جهاد هو مشا للتداريب ديالو وانا هزيت الفون تاصلت بهشام ..

هشام : عندكم ولا عندي ؟ 

أنا : ههههه ناري يا خويا باقي منطقتش عرفيتيني علاش معيطة 

هشام : ههه حافظك ... اوا واجدة لخسارة ؟ 

أنا : تا هاديك فرقة فرحان بيها .. شوف أجي عندي لدار .. غنتجمعو كاملين .. باش ملي تبكي نمسحو ليك دميعاتك 😈😂😂😂

هشام : ههه دابا نشوفو .. دابا غير ضحكي ... الماتش مع 7 6:30 نكون عندكم 

أنا : يالاه تلاح ألفرك .. 

هشام : الفركة هي صاحبتك .. باي 😂

أنا : باي 😂😂😂

مشيت لدار لقيت ماما جالسة فالصالون .. 

أنا : الزين دالعالم آش كديري ؟ 

سعيدة : كنشوف فهاد الموديلات ديال كسيوات .. شوفي كيحمقو .. 

أنا : خلي هادشي و ركزي معايا .. العصابة جايين هاد العشية 

سعيدة : هي ناويين تخربوها تاني على شي ماتش .. مكتهناو حتا تقلبو دار سفاها على علاها 

أنا : ههه باز نتي براسك كديري الحيحة معانا 😂

سعيدة : ههه دابا بغيتو تخاصموني مع باكم بحال كل ماتش و صافي 

أنا : هههه حنا مور الماتش كنرجعو عادي و نتوما ضروري تبقاو منوضينها شي يوماين 😂

سعيدة : باك لي مكيرضاش يخسر أبنيتي 😂😂

أنا : هههه أنا غنطلع لبيتي نقرا واحد الملف .. 

سعيدة : اوكي .. سيري شوية نعيط ليك تغداي. . 

أنا : اوووكي 😘

طالعة فالدروج حتا صونا الفون .. كانت رجاء 

أنا : الحب 😍

رجاء : الزيونات .. الليلة زاهية 😉

أنا : ههه وا فينك .. شفتك تعطلتي اليوم ؟ 

رجاء : أختي ماشي لخاطري شاداني الحكومة .. 

أمينة (أم رجاء) : الله يمسخك أبنيتي .. را معطلينها غير سوالفها 

أنا : ههه سلمي ليا على خالتي .. و نتي مالكي كتزيزي را ماشايفك حد غريب 

رجاء : تلاحي تلاحي .. شوية و نجي 

أنا : ههه واخة .. باي 

قطعت و دخلت لبيتي يالاه بغيت نحط الفون حتا عاود صونا ... 

أنا : مغنساليوش اليوم من تيليفونات ... هاد النمرة غريبة عليا .. جاوبت .. 

أنا : أللو ؟ 

... : إسراء ؟ 

أنا : وي .. شكون معايا ؟ 

... : أنا ريم .. 😊

أنا : اه ريم لاباس عليك ؟ 

ريم : حمد لله و نتيا ؟ 

أنا : حتا أنا .. تسنيتك تعيطي قبل معيطيش 

ريم : الصراحة حشمت 😶 

أنا : وايلي .. عادي حنا دابا صحاب .. 

ريم : وي .. خاصنا نتلاقاو شي مرة 

أنا : ضروري .. عرفتي شنو ؟

ريم : وي ؟ 

أنا : اليوم كلشي مجموع عندنا غنتفرجو فالماتش ديال ريال و البارصا ... أجي حتا نتي .. 

ريم : بصح ؟ مبغيتش نتقل عليكم .. 

أنا : متقوليش هاد الهدرة .. را قلت لك حنا صحاب دابا 

ريم : مغسي .. اه واخا نجيب معايا شي ضياف ؟ 

أنا : مرحبا بيكم .. أنا غنصيفت ليك العنوان ف ميساج 

ريم : اوكي .. سي يوووو 😘

أنا : باي 😊

قطعت و مشيت جبدت الملف و جلست فالمكتب ديالي كنقرا فيه .. 

عند ريم ⬅ 

دخلات للصالون .. جالس آدم مع مجد و زياد 

ريم : هاد العشية غير خويوها .. غتمشيو معايا لواحد البلاصة 

آدم : فين بالسلامة ؟ 

زياد : ياكما شي كارثة من الكوارث دياولك ؟ 

مجد : شي كلوب زاهي ؟ 

ريم : (شافت فآدم ) منقولش ليك surprise (شافت فزياد) و نتا بزاف عليك ألحلوف 😝 (شافت فمجد) أما نتا حالتك صعيبة .. غتموت سكران أصكع 😂

مجد : ههه متخافيش شاد قياسي 

زياد : دابا أنا حلوف أشنيولة ؟ 😂

ريم : مكتشوفش فالمرايا ؟ 

آدم : عايريه دابا لمك و من بعد بداي تبوحطي علينا 

ريم : يخخ .. كلكم بحال بحال 😒 

زياد : ههه الحقيقة مكتعجبكمش .. 

ريم : (تلفتات ليه كتعوج فيه) (وشوشات ليه) سكت يا الوحش .. 

زياد ناض غادي ليها و هي تهرب فالدروج ... 

ريم : (كتغوت) 6:30 كونو واجدييين ... 

زياد : ههه تخافي متحشمي 😂 ... يعلم الله فين غاديا بينا 

🌟🌟🌟🌟🌟

ف فيلا اليوسفي ⬅

إسراء و جهاد و سعيدة و يعقوب جالسين فالصالون .. 

جهاد : قريتي داكشي ؟ 

إسراء : معلوم قريتو .. را فلوسي حلال أنا 😂

جهاد : ههه إوا ؟ 

إسراء : داكشي 5/5 .. خاص شي تعديلات بسيييطة .. حتا ناقشهم أنا معاهم .. غير كون هاني 

جهاد : (لعب ليها فشعرها) عااارف نقدر نعول عليك 

إسراء : هي لا خلصتيني خلاص 😂

يعقوب : خلص ليا بنتي أسي الكويري .. باغي تخدمها فابور ؟ 

جهاد : ههه عندك محامي صحيح .. 

إسراء : (عنقات باباها) واييه الله يخليه ليا 

تسمعات الصونيت .. حلات الخدامة الباب و دخلو رجاء و هشام بعجاجتهم .. 

أنا : ههه مازال مسخنتو حتا بلاصتكم 

رجاء : واش أنا منحوسة لدرجة نتلاقا معاه فالباب ؟ 😒

هشام : را غير المحبة هاديك 😂

جهاد : ألمحبة مغتسلموش ؟ 

هشام : فين ألكويري .. اليوم تعتازل الكورة أحبيبي 

جهاد : زيد .. زيد .. راس مالك غا هضرة ألموسيقار ديالنا 😂

(تسالمو .. و جر رجاء سلم عليها بجهالة مرمدها عاد طلقها) رجاء : وااع مال مك جاهل .. شدي خوك نتي 

أنا : ههه بيناتكم أبيضاوة 

جهاد : ههه آش هاد تفركيس .. كنتي غاديا لشي قنت ؟ 

رجاء : أنا دييييما مفركسة 😎😏 

أنا: و تكعدي الله يمسخك .. نضل أنا وياك مجبدين بالبيجامات .. طلعي هزي وحدة من عندي .. 

رجاء : تي ديها فجيها ضاراك .. العار لما نوضي نتي لمرايا .. شوفي تشعكيكتك ...

أنا : ههه عادي جالسة غير فدارنا .. 

سمعو الصونيت تاني .. تمات غادية الخدامة تحل 

أنا : غير خليك أنا لي غنحل 

رجاء : كتسناي شي حد ؟ 

أنا : يس .. اليوم جاية عندنا واحد الضيفة

مشيت نحل ... غير حليت الباب و أنا نتصدم 

🌟🌟🌟🌟🌟🌟

ريم جاية فاللوطو مع آدم لي صايك و زياد و مجد 

آدم : دابا مغتنطقيش تقولي فين غاديين ؟ 

ريم : تبع gps و سكت ... صافي وصلنا .. وقف وقف.. هنا قالت ليا .. 

زياد : شكون هادي ؟ 

مجد : فخبارك الاختطاف را جريمة ألمحامية ؟ 

ريم : سكت نتا درتي دراما ... نزلو .. 

نزلو كاملين و تبعو ريم جيهة الباب .. 

آدم : ديالمن هاد الفيلا ؟ 

ريم : إلا بغيتي تعرف .. سير صوني .. 

تقدم آدم صونا فالباب و وقفات حداه ريم و زياد و مجد موراهم .. 

حتا تحل الباب و بانت ليهم إسراء مشعككة .. 

آدم : إسراء ؟ 😱

إسراء : آدم ؟ 😱😱😱 (تفكرات هدرة رجاء فاش قالت ليها مشعكة و حطات ايديها على شعرها ) 

ريم : هاااي .. 😊

إسراء : رييم .. هه .. هاي .. هادو هما ضياف لي قلتي لي ؟ 😮 

ريم : ويي .. 

زياد : شنو غنبقاو فالباب ؟ 😂

إسراء : اه ؟ لا سمحوليا تفضلو دخلو ... 

مشات كتجري و هي كتقاد فحوايجها .. وقفات عينيها خارجيين .. 

رجاء : مالكي شفتي شي جن ؟ (شافت آدم داخل ) 😱😱 ... مسخوطة شاف مك هاكا ؟ 😂😂😂 

أنا : كنحلم واقيلا ياك ؟ سرفقيني بليزز 

رجاء : البنت تشيرات 😂😂😂

ريم : هااي 😊 .. سمحولينا غنزاحموكم ليوما 

سعيدة : مرحبا بيكم أبنتي .. (سلمات عليها ) تفضلو جلسو .. 

تسالمو كاملين و جلسو .. 

جهاد : دابا صافي غتحضرو معانا لهاد الماتش .. مابقات رسميات بيناتنا 😂

زياد : أنا محيدهم من شحال هادي 

ريم : نتا را بوحدك ألكارثة 

رجاء : زيدي عليه هاد راس الحفرة (شافت فهشام) 

ريم : هههه هي حتا نتي كتعاني .. 

هشام : ههه راه أنا لي كنعاني هادي مكيقد عليها حد .. 

أنا : سمحوليا واحد الدقيقة .. (طلعت كنجري فالدروج لبيتي ..وقفت قدام المرايا ) ويلي ويلي على حالة ..

مشيت جبدت sweater فالغوز مع سروال كحل و درت ليبستيك و سرحت شعري و طلقتو .. 

أنا : ياكما هادشي معيق ؟ .. لا أنا ديما كنلبس هكا .. اوف يعيق ولا يجلس أنا مالي .. مشيت نزلت جات عيني فعين آدم و ابتاسم ليا .. توترت و مشيت لصقت حدا رجاء 

رجاء : هاي هاي .. كون زدتي شي طالون و درتي المشطة نيت 😂😂

أنا : سكتي ولا غنفرع والديك .. 

رجاء : ههه هاهيا ساكتة .. 

أنا : آش كنتو كتقولو ؟ 

يعقوب : غير عرفنا جهاد على صحابكم .. 

أنا : اه .. الماتش بقات ليه غير 5دقايق و يبدا .. 

رجاء : من هنا نقول ليكم لي برصاوي يمشي لهيييه يعطيني تيساع 

هشام : كيف شتي حنا غير كنموتو عليك 😂

رجاء : را غنتفك ... عرفتو شنو نتجمعو حنا رياليين هنا و نتوما تما .. 

يلاه .. وقفات ريم و جهاد جاو حدا رجاء و إسراء و سعيدة و فالجهة الاخرى بقا يعقوب و آدم و هشام و زياد و مجد 

ريم : تجمعتو ألحلالف تما ... (شافت يعقوب ) 😱 سمحليا أعمي مشفتكش 😶

سعيدة : لا أبنيتي حتا هو غير حسبيه معاهم .. دابا تشوفي شوهة لي غيدير فاش يبدا الماتش .

جهاد : آدم بارصاوي ؟ وااايلي أصاحبي يسحابلي غير بعقلك 😂

آدم : دابا نشوفو باش غينفعك العقل 😉😂 

هشام : يالاه سكتونا ها الماتش بدا .. 

بدا الشوط الاول و كلشي مركز .. كيتفرجو ومقصرين بالسناكس هالي شاد بابكورن هالي شاد تشيبس ها لي كيخشي فوجهو شكلاط .. مطرطقين عينيهم فالبلازمة و فامهم خدامين .. منين كتزكل الريال شي بيت كينوضو الرياليين اغوطو ويتعصبو و البرصاويين اضحكو عليهم و افقصوهم .. و العكس صحيح .. سالات لميطا اللولى بالتعادل السلبي 0 - 0 ..

رجاء : تفو العصاب شحال من محاولة ضيعو .. ولكن لعبو مزيان .. واحد البارصة مساكن شتهوم غي كيتسركلو في التيران الكرة كاع مقاصوها هههه ..

هشام : مسكينة كتحللي وتناقشي .. تكولي كضلي تلعبي الكرة .. نتي كن راه تا التسلل معرفاه شناهوا ههه !!

رجاء : حاشاك .. التسلل هو المساند الرسمي ديال ميسي هههه .. كيبغي يدير فيها واعر .. ساع مسكين مات ليه الحوت ..

زياد : هادي راك غالطة فيها .. ميسي كيلعب .. غير مازال ماجاتو الفرصة وافرجك في اللعب الصحيح ههه ..

جهاد : مخصوش اتسنى الفرصة .. هو الي خاصو اقلب عليها .. راه الكرة ' Team Work ' يعني لعب جماعي .. ماشي تلعب بانانية وتبغي تبان غير بوحدك ..

اسراء : عندك الصح .. ماشي الى سجلتي الهدف صافي راك نتا الواعر .. حينت قبل مايتماركة الهدف .. اللعابة اللي تقاتلو و دارو مجهود باش .. اوصلوها للمهاجم .. ديك الساعة هو كيترجمها لهدف او لا على حسب شطارتو .. (كملات هدرتها وشافت جيهت آدم اللي غير ساكت و كيشوف فيها ومركز مع كل كلمة قالتها ) ..

مجد : اوووه .. معندي منقول .. طلعتي كتفهمي فهادشي كتر منا حنى الدراري !

إسراء : ههه نو ماشي هكاك غير هو .. انا من محبي هاد الرياضة من صغري .. و هادشي كيرجع لخويا الي خلاني نتعلق بها بزز مني .. 

جهاد : ههه كنعقل فاش كنا صغار كنت كنلعب مع الدراري و كتجي تقولي بغيت نلعب معاكم و ...

إسراء : (قاطعاتو ) صافي سكتنا بلا فضايح ..

زياد : اهاه كمل كمل ..

جهاد : كنكول ليها لا راه صعيب عليك .. لعب الدراري قاصح .. مي هيا مكتبغيش تكرع .. صافي كندخلها تلعب معانا .. ههه ومنين كيفانتيها شي واحد ههه و ..

إسراء : (طارت عليه سدات ليه فمو ) (بهمس) هالعار لما سكت فضحتينا ..

رجاء : (حنقزات ) ههه انا نكمل ليكم .. ومنين كيكلع ليها شي واحد الكورة .. ههه مكترضاش وكدير بحال الى بغات تضرب الكورة وكتضرب رجل هاداك الي دار ليها خاويا فعامرة ههههههههه ..

الكل : ههههههههههه .. 

إسراء : ( تحرجات ) اللقوة انشالله ..

زياد : طلعتي مسهلاش مع راسك هههه

ناضت لكوزينة كتجري خاصة منين شافت جيهت آدم و لقاتو كيضحك ..

آدم : ( مع راسو .. ههه شحال كتبان كيييوت .. خاصة فاش تزنكات ههه)

جهاد : موسيو آدم .. من قبيلا وانت ساكت !

زياد : هادي طبيعتو .. كلشي كيهدر هو تلقاه ضارب الطم متعرف ااش كيضورليه فداك الراس هه ..

رجاء : صافي سكتو ها لميطا الثانية بدات .. شي حد اعيط على اسراء شتها سكنات تماك ..

جهاد : انا نمشي نعيط عليها ..

آدم : غير خليك انا نيت بغيت نمشي نشرب ونقولها ليها ..

جهاد : اوكي .. الي بان ليك

ناض آدم اتاجه جيهت الكوزينة .. اما البقية كلشي مركز مع الماتش .. دخل ادم كيقلب بعنيه على اسراء .. مبانتش ليه يلاه غادي ادور ارجع .. وهي تبان ليه من الزاج ديال باب الكوزينة .. جالسة في الجردة و كتعض فدفارها .. حل الباب بشوية وتم غادي جيهتها ..

إسراء : اويلي على شوها دابا غادي اشدوها عليا .. معمرهم انسوها .. سيري يارجاء بغيت ليك الباسر .. افف .. تاهو جالس كيفرنس .. عاجبو الحال .. هئ هئ ولي تشوهت مشات ليا image ديالي ..

آدم : ( واقف موراها حابس الضحكة ) شكون هادا الي كيفرنس ها !؟

إسراء : ( قفزات ) افف خلعتيني .. اش كدير هنا ؟ امتى جيتي ؟ وعلاش مدرتيش الحس ؟

آدم ( بابتسامة ساحرة ) بشويا عليك .. جيت نشرب و نتي تباني ليا كتهدري بوحدك ههه .. هانية !؟

إسراء ( سهات في الابتسامة ديالو ) ها .. لا هانية ..

آدم : مزيان .. اوى يلاه نرجعو راه بدا الشوط الثاني ..

إسراء : ( مزال مكملها ) دخلات كتجري .. و قولها من قبيلا ..

آدم : ( تبعها كيضحك ) حمقة ههه ..

إسراء مع الدخلة كتسمع الحيحة والغوات .. لقات خوتها الرياليين فارحانين .. حنت ماركات الريال البيت الأول .. هي بالفرحة تلاحت على آدم الي كان واقف حداها عنقاتو بلاما تشعر ..

.. هو تبلوكا معرف ميدير .. هي عاقت براسها ااش دارت دغيا سحبات اديها ومشات كتجري جلسات حدى خوها وتعانقو .. مشا آدم رجع بلاصتو وبقا مرفوع .. معرفش باش تبلا .. هي كانت حركة عفوية منها .. ولكن هو حس بشي شعور غريب .. معرفش باش افسرو .. كملو على فراجتهم .. شوية ماركات الريال البيت الثاني .. ناضو تاني الرياليين اغوتو واحنقزو مقاداهم فرحة .. و البرصاويين ساكتين كيتكرددو .. سالا الماتش بفوز الريال ..

رجاء : هالا مدريد .. هالا مدريد .. 

هشام : اللقوة العسرية فضحتينا .. 

ريم : شتكم مرضيتوش ههه .. لهلا احوجكم .. Next time .. نتكايسو عليكم .. بلا ميبقا فيكم الحال ههه ..

رجاء : مساكن بقيتو فيا .. الله ارضي عليك ا 'كريستيانو' ديما محمر ليا وجهي .. واحد الكتكوت ديال 'اسينسيو' تبارك الله عليه .. خشى ليهم هدف ولى احلى ..

يعقوب : و صافي ربحتونا ب2 .. ماشي شي حاجة .. كنا كنعتيوكم 5 - 0 ..

سعيدة : هالي قلنا .. فينها الروح الرياضية السي يعقوب؟ !

إسراء : بابا غير تقبلها .. الى جينا نجبدو التاريخ .. راه الريال هي التاريخ .. الالقاب و الكؤوس والانجازات تتكلم ههه سو Just deal with it .. Good luck next time .. ههه

آدم : ريم يالاه .. الدراري تكعدو ..

سعيدة : فين غادي اولدي .. جلسو حتى تعشاو معنا !

آدم : لا مرة أخرى .. خاصنا نمشيو ..

سعيدة : كون غير جلستو تعشيتو معنا .. ديك الساعة سيرو ..

إسراء : ماما غير خليهم على خاطرهم .. كن راه موسيو آدم ممساليش ..

زياد : انا بعدا مغدي فين حتى نتعشى .. خالتي غير ديرو بحسابي ههه ..

سعيدة : ييه اولدي مرحبا ..

مجد : تا انا غنبقى

ريم : حتى انا ..

كلشي دار كيشوف فآدم .. شاف فيهم و رجع جلس .. بقاو مجمعين و كيضحكو شي كيشد فشي .. و رجاء مناكرة مع جهاد فجهة .. ريم و زياد تاهما منوضينها .. مجد و هشام مجمعين كيهدرو على الدريات .. تلاقاو مسكيين بمغرفة وحدة .. اما واحد جوج ضاربين الطم .. و غير كيتبادلو النضرات .. منين كتكون اسراء حادرا عينيها كيبقى آدم حاضيها بعنيه غير كتهز فيه عنيها كيضور وجهو ههه .. ونفس الشيء بالنسبة لآدم .. و مرة مرة كيتلاقاو الأعين .. 

من بعد ما حطات لالة سعيدة العشاء هي و الخدامة .. عيطات ليهم .. مشاو تجمعو على الأكل في جو كلو مرح .. دغيا ندامجو .. تقول كيعرفو بعضياتهم شحال هادا .. كملو العشاء .. آدم ريم زياد ومجد توادعو معاهم وشكروهم على الدعوة ومشاو فحالهم .. من بعد ناض هشام و رجاء حتى هما انصارفو .. طلعات إسراء وجهاد كلا لبيتو ..

عند إسراء ⬅ 

صبح الصباح .. فقت بكري .. درت روتيني العادي .. لبست و خرجت لخدمتي ... نهار كامل و أنا مع هند من استوديو لفوتوشوت ... وصلات 8 ديال الليل تفكرت خاصني نمشي لسويفت على قبل شغل ديال جهاد

أنا : ماشي مشكيل هو قال ليا نجي فأي وقت .. 

خديت اللوطو و مشيت .. دخلت للشركة سولتهم قالو ليا آدم مازال مخرج .. طلعت فالدروج بحال ديما .. وصلت لقيت دنيا خاوية 

أنا : أويلي فين هادو ؟ زعما يكونو خرجو ؟ أحسن حاجة مغنشوفش كمارة هاديك العقروشة ..

مشيت لمكتب ديال آدم لقيت الباب دفعتو و يا ريتني مدفعتو .. شفت آدم واقف و هاجر معنقاه و باغا تاكلو بعينيها .. مقدرتش نتحمل هاداك المنظر يالاه بغيت نرجع فحالي آدم هز فيا عينيه ... 

آدم : إسراء ؟ ( و دفع هاجر) 

ماجاوبتوش و مشيت كنجري مع الدروج ... علاش مقدرتش نشوفو معاها هو والو بنسبة ليا .. بقيت غادية كنجري حتا حسيت بايدين جروني و زيرو عليا .. 

آدم : إسراء .. وقفي نهضرو 

إسراء : (بالغوات ) طلق مني .. تفكرت شي حاجة نمشي نجيبها .. 

آدم : (كيشد فيها و هي كترطا ليه ف ايديه) وا وقفي غير نشرح ليك 

إسراء : (نترات منو ايديها و شافت فيه) متشرح ليا منشرح ليك .. نتا حر دير لي بغيتي .. حياتك ماشي شغلي 

آدم : (تحل الاصونصور حداه جرها بغا يركبها فيه ) آجي لهنا من الفهامات 

إسراء : (شافتو بغا يجرها تما و تخلعات) لا عفاك لا .. طلق مني (بدات كتبكي) لا مبغيتش نطلع هنا 😭😭

آدم : كيشد فيها مفهمش مالها .. تسد عليهم الباب ديال الاصونصور. . 

إسراء : (شدات فعنقها و عينيها تقلبو ) ... 😭😭 .. مكنقدرش ... نتنفس ... (كضرب لآدم فصدرو) ... 

آدم : (تخلع عليها ... أول مرة يشوفها ضعيفة هكا و كتبكي ... حيد ليها شعرها على وجهها .. ) إسراء .. مالكي ؟ تنفسي مزيان .. شوفي فيا .. إسراء شوفي فيا 

إسراء : (شافت فيه و هي كتبكي ) 

آدم : you're ok .. أنا معاك .. تيقي فيا .. اوكي ؟ 

إسراء : بدات كتهدن .. 

آدم : إسراء .. أنا حداك ماغاديش نخليك .. اوكي ؟ 

إسراء : حركات راسها ب آه .. 

تحل الباب ديال الاصونصور و عنقها ب ايديه خرجها .. غير خرجات و طاحت فالأرض .. نزل عندها .. عنقها و ايديه على شعرها .. بقات شوية طايحة .. شوية شافت فيه و هزات ايديها كضرب فيه .. 

إسراء : نتا سباب .. نتا .. علاش جريتيني تما ؟ 😢 حياتي كاملة و أنا مبعدة على الاصونصور. . و جيتي جريتيني ليه ... كنت هانية .. دخلتي لحياتي رونتيها ... منين تسلطتي عليا منين ؟ (وقفات بعدات عليه ) لاش تابعني ؟ كون بقيتي كملتي شغلك مع الآنسة لفوق .. 😒 

آدم : (تنهد) علاش مكتقدريش تطلعي فلاصونصور ؟ 

إسراء : ماشي شغلك .. 

آدم : (غوت عليها) سولتك جاوبيني 

إسراء : وا بلا غوات ... اووف .. عندي فوبيا من الأماكن المغلقة .. 

آدم : و علاش مقلتيهاش ؟ 

إسراء : نتا خليتيني نشرح ليك ؟ داير بحال تران ياربي السلامة .. 

آدم : امم و شنو نسيتي ؟ 

إسراء : كيفاش شنو نسيت ؟ 

آدم : قلتي ليا نسيتي شي حاجة بغيتي ترجعي تجيبيها .. 

إسراء : اه ؟ آه نسيت ساكي .. كنت غادة نجيبو .. 

آدم : متأكدة ؟ موالفة كتهزي جوج سيكان ؟ 

إسراء : اه ؟ 

آدم : (شير موراها )

إسراء : (تلفتات بان ليها ساكها موراها مشتت) .. هه كان هنا 😅😅😅 يمكن طاح فاش كنت طالعة هه .. (هزاتو) يالاه باي خاصني نمشي( و دازت من حداه بغات تهرب )

آدم :(شدها من ايدها و جرها قربها ليه ) (كيهدر بابتسامة) فين هربانة ؟ 

إسراء : (كتفادا تشوف فيه) علاش غنهرب مثلا ؟ .. 

آدم : سكت و بقا غير كيشوف فيها 

إسراء : وا طلقني باركة من تحنزيز ... وا داربيضا 

آدم : مالكي فيك صداع ؟ 

إسراء : طلق طلق نتا تنونختي .. حتال من بعد و نرجع نهدرو فالخدمة .. 

آدم : (طلق منها ) غدا فالصباح 

إسراء : إلاااا كنت مساليا .. 😏 باي 

آدم : ههه باي .. 

خرجت من تما كنجري ركبت فطوموبيلتي و مشيت لدار ديريكت لقيتهم جالسين فالصالون 

أنا : هااي 😊

جهاد : مال حالتك هكا ؟ ياكما كنتي مدابزة ؟ 

أنا : هههه لا غير فاش كنت جاية قلت نجري شوية 

سعيدة : إوا الله يستر أبنيتي .. سيري طلعي دوشي و نزلي غيكون فيك الجوع .. 

أنا : ههه واخا أماماتي 😍 .. 

جهاد : شفتك غير كتفرفري لاقيا بزطام ؟ 😂

أنا : لا غير ناشطة و صافي .. 

يعقوب : الله يخليك ديما ناشطة أبنتي 

أنا : آميييين أبابا حبيبي .. يالاه هاني مشيت .. ✌ 

طلعت لبيتي و دخلت دوشت و لبست عليا و تقابلت مع المرايا 

أنا : (عاد طلعات معايا الهضرة لي قلت ليه ) 😮 ديما مشوهة معاه تفو ... ولكن سرو هاديك الهضرة كاملة ههه .. حتا هوا بدا كيفرنس .. أصلا موحال يعقل علا شنو قلت ... نشفت شعري و نزلت تعشيت معاهم و بقيت سهرانة مع شي ايميلات ديال الخدمة .. و من بعد ضربتها بنعسة .

عند آدم ⬅ 

اليوم كيف العادة كان مشحون بالخدمة .. وصلات وقت المغادرة والموضفيين بداو اخرجو تدريجيا .. بقيت كنراجع اخر مستجدات الاصدار الجديد .. وصلات ديك 10 وانا مزال في المكتب .. شوية دخلات عندي هاجر مدات ليا شي ملفات سنيت فيهم .. و ادنت لها بالمغادرة .. لكن هي اصرات تبقى خدامة حتى نسالي انا .. انا عجباتني الخدمة ديالها متفانية فيها و لحد الآن عمرها دارت شي خطأ .. بعد 30 دقيقة دخلات ليا قهوة .. شربتها ونضت كنلبس الفيست ديالي .. شوية بقات كتقرب لعندي وهي تحط ادها على عنقي وعنيها فعنيا .. جريئة مع راسها باش تجرأ ودير هاد الخطوة .. انا بقيت غير كنشوف .. هي بقات كتقاد الكول ديال القميجة .. خليتها حتى نشوف فين بغات توصل .. بقات كتقرب شوية سمعت الباب تحل .. تلفت وشفت اخر شخص توقعت انو اجي عندي وفهاد الوقت .. كانت الصدمة باينة على وجها .. دفعت هاديك خيتي حينت مبغيتهاش تفهم غلط .. اعتدرات وتمات خارجة .. خنزرت فديك خيتنا وتبعتها .. كانت يلاه وصلات حدى الاسنسور .. جريتها من يدها حنت مبغاتش توقف بقات كتغوت ودخل وتخرج في الهدرة .. مبغاتش تسكت و انا نغوط عليها مكنحملش الي ارفع عليا صوتو كيما بغا اكون .. جريتها للسنسور و بقات كتجابد معيا .. منين دخلنا و تسد الباب بقات كتبكي و ترعد .. معرفتش مالها شديت فيها و بقيت كنهدن فيها .. الصراحة تخلعت عليها بزاف .. معمرني شفتها ضعيفة هاكا .. منين تحل شديت فيها كي خرجات انهارت فالأرض نزلت عندها وعنقتها حتى هدات شوية .. و هي تنوض بقات كضرب فيا وتلومني .. انا بغيت غير نفهم مالها علاش طرا ليها هاكا ؟ سولتها و قالت ليا بلي عندها فوبيا من الأماكن المغلقة .. تعصبت من راسي حينت انا الي تسببت ليها فهادشي .. ولكن انا مكنتش عارف .. من بعد ما هدات شوية بغات تمشي .. انا واحد اللحظة سهيت فعنيها .. هي بقات كتهرب من الموقف .. مشات من بعد ماتفقنا انها ترجع باش ناقشو داكشي علاش جات .. مشيت للمكتب ديالي خديت سوارت اللوطو ونزلت اتاجهت ديريكت للدار .. وانا فالطريق بقيت كنفكر فالموقف الي طرا قبيلا .. علاش كانت ردة الفعل ديالها هكاك ؟! زعما تكون غارت ههه !! .. اكيد لا علاش غادي تغير هي باينة مكتحس بوالو اتجاهي .. كتعامل معايا ديما فحدود ..

وصل ادم لدارو و هو كيفرنس غير بوحدو .. وصل طلع لبيتو ديريكت خدا دوش ومشا نعس .

صبح الصباح في فيلا اليوسفي ⬅ 

فاقت إسراء معطلة بحكم اليوم مخداماش .. هند واخدا إجازة لظروف عائلية .. غسلات وجهها و نزلات تفطر .. 

دخلات لصالون لقات سعيدة جالسة كتقرا مجلة 

إسراء : صباح الخييير 

سعيدة : علا سلامتك ملي فقتي 

إسراء : صباح النووور 😛

سعيدة : نوضي الله يمسخك .. را فطورك فوق الطبلة 

إسراء : (سرقات بوسة من ماماها و مشات تفطر حتا صونا ليها الفون) أللوو (كتهدر فمها عامر)

رجاء : سرطي عاد هدري الله يعطيك جوع 

إسراء : ياك لاباس .. صباح هدا 

رجاء : عاد فقتي ألخميرة ؟ الظهر هدا .. 

إسراء : امم 

رجاء : شوفي غنكون عندك من هنا ساعة.. مشغليش اليوم بغيت نخرج نتغدا برا .. سيري سكني ليا تما تاني 

إسراء :(وحلات ليها) كح .. لا .. كح .. صافي كوني هانيا 

رجاء : يالاه تلاحي .. عنداك تموتي 😂

قطعات مع رجاء كملات ماكلتها و طلعات لغرفتها .. خدات دوش لبسات صاية دجين قصيرة مع توب كحل كول v و ساك فالبيض و لكحل .. شعرها خلاتو سامبل .. واقفة قدام المرايا حتا سمعات صوت لكلاكسون كاسر دنيا 

إسراء : هاهيا غتشدو تاني مطلقوش .. 

سعيدة : (كتعيط من لتحت) إسراااااء .. خرجي عند هاديك فليفلة قبل متسوطا ..

إسراء : (نزلات) ههه واخا أماما .. هانا مشيت 😘

خرجات و طلعات لطوموبيل 

رجاء : هاي هاي متيتزة مع راسك 

إسراء : باااز لوجهك .. بسبابك نتيا غيجريو علينا من الحي 😂

رجاء : ديري سمطة و سكتي ... (طلقات الموسيقى و ديمارات .. غاديا وكل مرة كتلفت لإسراء )

إسراء : غا قولي آش عندك .. من قبيلة و نتي تبربصي 

رجاء : اه ؟ لا والو .. 

إسراء : دابا غتقولي بخاطرك ولا نجبد منك الهدرة بزز .. 

رجاء : وا واالو غير بغيت نسولك و جوبيني بلا طنز .. 

إسراء : واخا غير نطقي 

رجاء : ملي البنت كتولي تغير على شي واحد .. متحملش تشوفو مع شي وحدا .. و تبغي تبان زوينة قدامو .. آش كيعني هادشي ؟ 

إسراء : (تفكرات آدم) اه ؟ علامن كتهضري ؟ 

رجاء : وا دابا جاوبيني أنا غير سولت ما على حتا واحد .. 

إسراء : (عند بالها رجاء كتهدر عليها) يقدر ميكون والو .. غير مرحلة و صافي .. حيت شحال ملفت انتباهها شي واحد .. 

رجاء : امم .. متأكدة ؟ 

إسراء : معلوم .. متأكدة .. وا دابا طلقينا را جاني جوع 

رجاء : يا لطيف عاد كنتي كطحني .. فين كيمشي هادشي ؟ 

إسراء : ههه نوريك فين كيمشي ؟ 

رجاء : لا تفلستي نتي .. غبرت عليك شوية وليتي تفرفري ..

إسراء : هههه 😂

رجاء : هااحنا وصلنا .. نزلو و دخلو .. دومونداو على الماكلة و بقاو جلسين شادين نميمة .. حتا جابولهم الغدا و طاحو فيه عميين .. 

إسراء : أنا غنمشي لحمام .. بقاي فبلاصتك .. 

رجاء : من نيتك ؟ مالي تربية ؟ سيري غنفلق ختي 

إسراء : ههه متوحشة .. 

مشات إسراء لحمام .. بقات رجاء جالسة كتاكل حتا صونا الفون ديال إسراء .. هزاتو 

رجاء : شكون هاد نمرة ممدخلاهاش ... ياكما عطاتها لشي تيتيز جنية ماقالت ليا والو .. جاوبت ... آلو ؟ 

.... : ألو .. ميس إسراء ؟ 

رجاء : شكون معايا ؟ 

آدم : آدم الإدريسي 

رجاء : 😱 الخطيب المرفح ؟ 

آدم : نعام ؟ 

رجاء : اه ؟ سمحليا .. أنا رجاء صاحبتها .. ديجا تلاقينا 

آدم : وي عقلت عليك .. 

رجاء : هه حلف ؟ .. اويلي على حلف .. بغيت نقول إسراء مشات لحمام و خلات الفون ديالها .. بغيتي نوصل ليها شي ميساج ؟ 

آدم : اه .. بون كنت غير بغيت ندير معاها موعد باش نهدرو فالخدمة .. و لكن ماشي مشكيل نأجلها لمن بعد .. 

رجاء : لا لا هي دابا أصلا مساليا معندها مدير هانتا ... حنا فريسطو ... آجي و هدرو فالخدمة .. ياك ماشي ضروري تكونو فالمكتب ؟ 

آدم : احمم .. اوكي ماشي مشكيل .. شوية و نكون عندكم 

رجاء : نحن فالانتظار ☺☺☺ باي (قطعات) 

رجاء : omg 😂😂😂 ناري قودتها عليها 😂😂 و أنا مالي هما لي مضبعين .. مازال مبغاو يطلقونا لفراجة .. 😈

إسراء : مالكي كتهدري بوحدك بحال لحمقة ؟ 😂

رجاء : كنت غير كنغني .. جلسي .. انشوف وجهك 

إسراء : علاش مال وجهي ؟ 

رجاء : صافي هو هاداك الميك اب . 

إسراء : ههه تي مالكي تنونختي ؟ 

رجاء : شوفي أنا عزيزة عليك ياك ؟ واخا معرت شنو ندير خاص تسامحيني سمعتي ؟ أي حاجة درتها را لمصلاحتك 

إسراء : واش كليتي شي حاجة ماشي هي هاديك ؟ آش كتخربقي عليا ؟ 

رجاء : هه والو .. تغداي .. كملو ماكلتهم و رجاء كل شوية تهز عينيها جيهة الباب .. حتا بان ليها داخل كيقلب 

رجاء : 😱 .. إسراء .. كولي مكليتي والو نتي .. 

إسراء : لا براكة عليا شبعت .. 

رجاء : شدي وسكتي (خشات ليها الفريت ففمها) 

آدم : بصحة .. 

إسراء : (هزات راسها تصدمات فاش شافتو وحلات ليها ) كح ... موسيو .. كح كح .. آدم 

آدم : غير بشوية عليك .. (هز كاس ديال الما عطاه ليها) هاكي .. 

إسراء : (خدات الكاس و عينيها خارجين فيه .. و شافت فرجاء) .. 😱

رجاء : هههه ديما كنقول ليك كولي بشوية ... موسيو آدم تفضل جلس معانا .. 

إسراء : (غير كدور فعينيها .. شربات الكاس و مسحات فمها و بقات غير كتشوف) 

آدم : ها هو الملف .. 

رجاء : خلي الخدمة دابا و خود شي حاجة تغدا بعدا .. ياك أ إسراء .. 

إسراء : اه ؟ آه .. تغدا معانا 😁

آدم : هه واخا ☺ ... (عيط على سيرفور و طلب شنو بغا) 

آدم : (كيشوف فإسراء) كنتمنا منكونش صدعتكم بهاد المجيا .. 

رجاء : الله أودي .. خود راحتك .. آجي الوقت لي بغيتي .. (بانت ليها إسراء غير كتبرقق) .. إسراء ؟ 

إسراء : اه ؟ 

رجاء : امتا تعارفتو أول مرة ؟ 

إسراء : امم أول مرة كانت عندو فالمكتب .. (شافت فآدم ) ياك ؟ 

آدم : لا تلاقينا قبل من هداك نهار .. دوماج معقلتيش .. 

إسراء : قبل ؟ فين ؟ 

آدم : أول مرة تلاقينا كانت فلاسال دسبور .. 

رجاء : اهاه ؟ 

إسراء : (رجعات بيها ذاكرة و تفكرات) اااه وي بصح .. شفتك كنتي معصب شوية .. 

آدم : ههه وي .. 

قاطعهم سيرفور جاب ليه ماكلة ديالو .. شوية رجاء هزات الفون ديالها .. 

رجاء : اوووبس .. ماما بغاتني ضروري نمشي .. 

إسراء : أشنو غتبغيك خالتي دابا ؟ 

رجاء : شي حاجة و صافي .. موسيو آدم عافاك وصل معاك إسراء ماجابتش طوموبيل ديالها .. 

إسراء : 😱

آدم : اوكي ماشي مشكيل 

إسراء : رجااء .. فين .. 

رجاء : أنا مشيت باااي .. (هزات ساكها و مشات كتجري ) 

آدم : صاحبتك علام .. 

إسراء : نعام؟ 

آدم : البروتوكول حيدناه نهار الماتش .. نيسبا ؟ 

إسراء : ههه اه خود راحتك .. 

آدم : حتا نتي بغيتك تاخدي راحتك .. بلاش من هاديك موسيو ..

إسراء : هه اوكي .. أسي آدم .. جيتي غتحصل تخلص علينا اليوم .. 

آدم : ماشي مشكيل .. نبقا نتسالها ليك مرة خرى .. 

إسراء : هه واخا .. 

آدم : مشينا ؟ 

إسراء : يالاه .. 

مشا آدم خلص و إسراء سبقاتو برا .. تسناتو حتا جا عندها 

إسراء : سمحليا غنعدبك معايا .. 

آدم : (مشا حل ليها الباب) عذابك راحة ☺

إسراء : (ابتاسمات ليه و طلعات ) 

آدم : (ركب حداها و ديمارا) 

إسراء : الفيلا .. 

آدم : مازال عاقل 

إسراء : هه اوكي .. 

آدم ركز مع السياقة و مرة مرة كيتلفت جيهتها .. إسراء حسات بالاحراج. .

إسراء : احممم .. ريم لاباس عليها ؟ 

آدم : لاباس عليها .. عاطياها غير لشوبينغ .. 

إسراء : ههه صراحة نتوما واخة خوت مكتشابهوش

آدم : ناس كيقولو العكس

إسراء : قصدت شخصياتكم لي مختلفة .. هي ضحوكية و ديما نشيطة .. 

آدم : (كيبتسم)

إسراء : و نتا .. احمم .. غامض شوية .. 

آدم : (تلفت ليها) أنا كتجيني نتي لي غامضة .. 

بقاو كيشوفو فبعضياتهم .. آدم نسا راسو .. هزات إسراء عينيها بان ليها قط وسط طريق غوتات

إسراء : آااادم .. عنداااااك .. 

آدم : (خلعاتو .. تلفت لطريق و فرانا حتا كانو غيطيرو من بلاصتهم .. تلفت لإسراء لقاها شادا فوجهها ) 

آدم : إسراء ؟ (شد ليها وجهها بين ايديه ) إسراء ؟ لاباس ؟ تضربتي ؟ كضرك شي حاجة ؟ 

إسراء : (هزات فيه عينيها مغرغرين بدموع 😢) .. كنا غنقتلوه ..

تلفتو لجيهة شرجم بان ليهم القط كيجري .. 

آدم : هههه .. دابا أنا فين و نتي فين ..

إسراء : 😶

آدم : (عاد عاق براسو شاد ليها فوجهها و طلق منها بالخف) .. امم .. سمحي ليا كان خصني نرد بالي مع طريق 

إسراء : احم .. ماشي مشكيل .. موقع والو .. 😊

كمل طريق حتا قدام الفيلا .. 

إسراء : شكرا بزاف .. و سمحلي خلعتك 😂

آدم : ههه حسبي دابا شحال من مرة 

إسراء : ههه صافي نتسنا تخلعني حتا نتا .. (أويلي آش كنقول) 

آدم : تجربيها دابا ؟ 😂

إسراء : اه ؟ .. ههه بااي خاصني نمشي .. نزلات و سدات الباب 

آدم : هه إسراء ؟ 

إسراء : (تلفتات ليه ) وي ؟ 

آدم : (بقا كيشوف فيها ) تهلاي فراسك .. 

إسراء : (بابتسامة) حتا نتا .. 😶 باي (دارت و مشات كتجري دخلات لفيلا ) 

آدم : اوووف .. (حط ايدو على قلبو و ديمارا مشا فحالو)

🌟 🌟 🌟 🌟 🌟 

بعد شهر ← 

استأنفت العمل مع هند من بعد فترة الراحة الي خدات .. الي لحد الان معرفتش شنو سببها السيدة كتموت على الخدمة الي بالطبع كدخل مو راها الفلوس .. دابا خاصني نسق مابين ادارة اعمال هند و جهاد الي بجوج معاقدين مع سويفت ههه .. هاد البراند لاصقة فيا ولا انا الي لاصقة فيها .. علاقتي بآدم متحسنة بزاف ولكن في حدود الخدمة طبعا .. الى دعات الضرورة كنمشي للشركة نسق معاه جداول اعمال هند و جهاد .. ولكن غالب الاحيان كنتواصلو عن طريق الإيميل .. هاد الويكاند واعدت رجاء و هشام نسافرو للشمال واخا عندنا غير تلاث ايام .. الي بزز باش خويتها .. من بعد النكير ديالهم .. ولكن عندهوم الحق تابعة الخدمة وتا اعز الناس عندي معاطياهم وقت و مكنشوفهم على شحال .. 

من بعد يوم متعب رجعت للدار طلعت لبيتي حيدت حوايجي دوشت ولبست بيجاما .. خديت شانطة صغيرة درت فيها شي حوايج لبيسات صيفيين مع باقي سخون الحال والمستحضرات دياولي .. مكترتش حينت مغنبقاوش بزاف .. ومشيت ضربتها بنعسة .. في الصباح فقت درت روتيني الصباحي و خرجت .. كانت الوجهة شركة سويفت .. 

#يتبع