لاتضيعي وقتك مع المراهقين ... احبيه اربعيني او خمسيني ، شعر ابيض .. وقار وجاذبية وذو ابتسامة و نضرة تجذبانك الى الجنون.
من ديما كيعجبوني الشخصيات بحال كاضم السهار .. او وائل كفوري ... عمري انجاذبت لشي شاب فالعشرينات او فالثلاتينات ... كيعجبوني لاكن ماشي بقدر ما كيجبي الراجل الاربعيني ... تباتو وضحكاتو الثقيلة وحتى نضراتو الجذابة وكلامو الموزون ... عمرني تعرفت عليهم ولاكن كنشوف شخصية وائل كفوري الهادئة وكاريزمة كاضم الساهر فكنولي ليا الغشاوة على عيني ميبقاوش معمرين عيني الشباب . من ديما كتقول ليا ماما نتي اخرتك تاخديه شارف ههه... حيت عارفني دوقي فالرجال كي داير ... لاكن اللي معارفينش ان فهاد السن اللي انا عاجبني واللي هوا الاربعين كيكونو فيه بعض الرجال اكثر جاذبية بكثير على الشباب ... تما كتحسو كمل رجولتو وكتزاد وسامتو ... شحال من واحد حتى كيكبر عاد كيزيان .. اما الى الى كان زوين صافي كملات ... واكثر ما كيعجبني العقل الناضج ... اللي كيزيد يعطي للرجل جاذبية فالكلام والحركات اكثر ، ماتستغربوش ... هادي اللي كتحكي ليكم قصتها يالاه عندها 27 سنة .. او بالاحرى يالاه ولات كتبان امرى وكيبانو عليها علامات الاكتمال باش تولي امرأة كاملة ... جسم متناسق ومضعيفاش .. طويلة وفمشيتها كتمايل تارة يمين وتارة شمال ... تقدرو تشوفو مني بزاف وتقولو ليها سعداتك فورمتك زوينة ... وي فرمتي جذابة وانا اللي خدامة عليها باش تبقى جذابة... الريجيم والرياضة داءما وابدا ... شعري اسود ناعم ومتوج كالليل .. فبداية العشرينات ديالي كتن قصري ... ااكن فاش شفت جمال المرأة فالشعر الطويل حلفت حتى نطولو وتهليت فيه حتا رجعو اطرافو كيضربو مأخرتي ... طولتي كتلفت الانضار ونهار كنطلق شعري كتجيني عين صحيحة مباشرة فصحتي حتى وليت كنجمعو ... حروفي كوحل وعيني بنية بحال بزاف دالبنات ... متميزة بكثافة الشفار اللي ورتها من االاب ديالي وغير كنرمش بشوية ونهز عيني ضاروري منلقى شي واحد حاط عليا العين بالاخص الى كنت فبلاصة عمومية وهادي نضرتي الجذابة اللي مرة مرة كنديرها فاش كترشق ليا . بشرتي بيضاء تميل للسمورية بحال النصارة فاش كيطولو فالشمس وكيتخدو لون برونز متميز ... كنتمي لطبقة متوسطة فالمجتمع ومحافضة ... بقيت انا اللي بنت وسط جوج دراري واحد كبر مني بعمين والثاني كبر مني بخمس سنوات ... كنتشابهو اللي شافنت كيعرنت خوت ... اخت وحدة عندي هي الكبيرة متزوجة وانا اللي جا كنردو حتى ولاو يشكو فيا ... بما انني البنت الوحيدة اللي بقيت عند ماما فكتجي من جيهتي وعارفاني مابغيتش نتزوج ونرمي راسي حتى يجي اللي ترتاح ليه خاطري .
فهاد الايام بالضبط راحنا مرونين ... عرس خويا الكبير قريب وانا وماما كنطلعو ونزلو بحال الى عمرو داز فدارنا شي عرس ... تقول اول مرة .. تلفنا واخا ديجا زوجنا اختي الكبيرة لاكن تدركنا مع خويا ماعرفنا منقدمو ولا منوخرو مع العلم ان العرس تكلفو بيه صحاب العروسة وواخا هاكاك دخنا حيت حتى حنا كنوجدو معاهم .. قلنا زعما نخليوهم يتكلفو هما وعطينا الفلوس ونتهناو حنا ساعة ماشفت هنا .. غير مع الحوايج دخت كل شوية راجعة نجري للقصارية ... زعما راني وجدت كلشي مافهمتش علاش تدركت بحال الى مدرت والو ... تالفة غير مع شراوطي فين هادي فين هادي فين مشات هادي فين حطيت هادي ... اففففف ياربي كيدريها الحماس كيدرييييها ... متحمسة زيادة وسامعة باللي العروسة عندها عاءلتها فالخارج غيحضدرو وبغيت نكون فأبهى حلة تقول انا هي العروسة .. جالسة نتسابق ها الكوافورة ها الحمام الله يعفو عليا ... كاين اللي ميتوسقش ومعاطيش اهمية للعراسات بزاف... و كاين انا اللي فين ما كنت معروضة خاصني نولي بحال كايلي وكلشي مقاد فيا على حقو وطريقو.. هء!! معلوم عرس خويا هادا وختو خصها تباان! وييلي ! نخلي البراني يبان ؟ لا ماجاتش
اليوم عرس خويا ... حضرت فالحنة دازت غير بالبنات فالدار ومشيت بقفطان مبرى خفيف ... لاكن دابا ليلة دالعرس وغنضرب التكشيطة نعااام اااس تحتية والشبكة منبتة وايييفازي والحمر ااسي .. مالنا حنى زورق ولا خوضر تا منلبسوش الاحمر ! ... بيتي مقلوب سفاه على علاه .. بنات عمي وخالي مكركرين عليا شوانطهم تاهما بغيت سوتيامات ماعرفتش فين حطيتهم ... افف .. حاضية مع المكياج اللي درت فالصالون لا يمشي مع شي حكة ديال شي كتف وخايفة شعري اللي ساعة وانا جالسة صابرة كيلويو فيه حتى طبت بالجلاس . فين هادي فين هادي فين صباطي فون بوشيطتي .. نوضي نتي على لاترو دالماكياج عفستي عليها .. سدي نتي البلاكار .. خويا عاوتاني داخل خارج تالف على حوايجو كيدخل علينا كل وحدة فين مقنتة كتلبس وماراضش البال ليهم اش كيديرو بكترت ما تالف وبابا كل مرة يعطي عليه ... الكوستيم نعاام السي ! هاد العرس كتارين فيه البنات والدراري غير الله يخرجو على خير .
اخيييرا سالات جينيفر لوبيز ولبسات وقادات ... التكاااشط والطالون وهازة جلايلي لا تفركع التكشيطة و انا مخيطاها بالتمن ... لايحة عليا شال واللي دزت من حداها كنهز فيا عينيها .. مع الطولة التجريدة وزايدة بالطالون .. المهم لا خسرات شي بولة انا واجدة نركب ليكم وحدة اخرى بلا سلوم . ايوا نمشيو لهاد العرس اللي عام وجنا نوجدو ليه تا طبنا .
كلشي خرج من الدار العريس بالبوكي دالورد .. اااح على خويا الزين الزين خمسة خميس عليه . طلعت معاه فالطوموبيل انا وخويا لاخر عادل وماما وبابا وعاءلتنا كل واحد ركب فطوموبيلتو ومشينا ... ماما جالسة حدايا بالتكشيطة مرفوعة .. بسيف ماترفع مال العرس ساهل! وصلنا للقاعة دعلاء الدين بمكناس ومااا اجملها قااعة الدخلة ديالها كيعاودو عليها راااءعة بحال شي قصر ولاكن دابا شفت بيعيني ... مضوية بنياب كبار فالجناب وعيساوة فالباب واقفين لاستقبالنا وعاءلت العروسة خرجو كيرحبو .. المصور شافني بقا حاط عليا غير انا ... وناااري رااه مشموم النوار عازو خويا صورو وتا تابعني كتعبر فيا غنبقا نبان ليهم فالسيدية ميبقاوش يحملوني ... جابوك تصور العرس ولا تصورني انا وتكشيطتي !! العين غطيحني مزال تا مادخلت لداخل نشوف الضوء . وصلنا للباب وانا نجر التوب اللي ظرت على راسي حيدتو ورديت سالفي اللور ... كنرو روايح على نيفي كلشي راش ريحة فشكل ها دالرجال ها دالعيالات خاصني قهوة جاتني الدوخة كيبان ليا الجوق من الباب واقف كيهتهت ويرحب بينا ويغني علينا .. حباب العريس جاو ها حباب العريس ... اول مرة ندخل مع شي عريس ...
... هوا القدام هاز الورد حداه ماما وبابا وانا اللور كل مرة كنميل ونشد فاللي حدايا قبل مندشن شي طيحة الله يخليه بالخلى هاد اللي خرج الطالون تفووو .العين العين خاااايبة .
دخلو كيشبرو فالخليب والتمر ودخلت حتا انا هزيت تمرة والكاميرا شاداني تشدك البولة فهاد اللحضة و ماتلقا تا شكون يشد ليه الكاميرا يا المصور يا ولد الحرام كنكره يصورتي شي واحد كناكل ولا كندغ يخخ .. دخلت هزيت عيني بانو ليا الانضار كااملة تتجه الينا ... مقدرتش نبركك فكلشي هلي حتى نجلس عاد نحسب . دخلنا جلسنا فالطبلات المخصصة لينا وانا حدا ماما فالطبلة الاولى جيهت البرزة ... مقابلة مع كلشي كنشوف واخا الدنيا مرونة والعرس شي كيشطح شي غادي جاي ... ناض خويا عند العروسة دخلوها بالزغارت والنكافات وحطوها بلاصتها .. سخنا بلايصنا وبداو البنات كينوضو يشطحو ... وقفت ندير حقي حتى انا ودخلت مع خويا عادل كنشطحو مع البنات ... غير بشوية عليا معنديش مع داكشي دالزربة والهيت عزيز عليا نشر يدي بشوية غير نبان ونمشي نجلس .. وداكشي نيييييت اللي كااين ... مع الدورة جيت ندور مع اغنية جيبو ليااا ولد عمييي اهاااه ولد عميي ... تا كطيح عيني على واحد الطبلة فيها عيالات بعقلهم ورجال معهم .. فيهم واحد جالس داير رجل على رجل لابس لكلاص وكيدير فيا شي شوفة مرافقاها ابتسامة خفيفة حسيت بمومو ديعينه كيقراني ... ياامي عاد حسيت بشوفتي الجدابة اللي كندير فالناس واشنو كدير فيهم ... غير لمحتو ودرت كملت على شطيحي لاكن تصور ليا فعينيها هوا والجلسة اللي داير وظيك الشوفة وديك النضرة تلفاتني ماعرفت الريتيم دالشطحة منين نعاود نشدو ... بحال شكل وااءل كفوري فالبنية ديالو سبحان الله وعندو كاريزمة بحال الى خرجتو من احلامي وحطيتو فالطبلة نشوفو مباشرة ... شعرو اسود ناعم ماشطو اللور فيه بعض الشيبات فالابيض ولحية سوداء خفيفة مزينة بشعريات فالابيض .. يالاه بدا كيبان الشييب .. مافيهش التجاعيد بلعس وجهو زوين وعطاه واحد الهبة غير لمحتو وترني ... رجعت كندور مرة اخرى ودايرة راسي ولا على بالي كنشطح وهزيت فيه عينيه ليقتو مزال كما هوا ... بلعكس زاد حبد ابتاسمتو شوية حتى جاتني الضحكة وشديتها وقلبت وجهي بلا منعيق .. زودت واحد جوج شطحات خفاف وميشت رجعت كنلوح شعري اللور لبلاصتي .. جلست دايرة رجل على رجل ومشات عينيه ليه مرة اخرى مع جالس مقابل معايا ... شفتو كيهضر بطريقة جذابة وتابتة مع اللي حداه ... هزيتو من راسو حتى لرجليه وهوا كيهضر وغير بشوية ويحرك واخد اليد فيها ساعة كحلو ومرة مرة يدوز صبعو حدا نيفو ويكمل الهضرة ... قميجة بيضاء وصدرو عريض ولافيست حداه .محطوطة . سروال ازرق كلاص وتقاشر رقاق فالاسود وصبط اسود نشوف فيه وجهي بالنقى ... باين ميسور الحال لا هوا لا اللي جالسين معاه ... يكون جاي مع عاءلتو يمكن ... شنو كيجي لسارة (مرت خويا ) ؟ اول مرة نشوف هاد النوع دالتبوكيصة عندهم ؟! بقيت كنبركك وهوا يقلب وجهو وكيهضر مع اللي حداه بالشوية كيهضر ليه على شي حاجة .. رجع دور وجهو جيهتي مباشرة قشعني كنشوف فيه وانا نشتت عيني فجهة اخرى حشمت .. العمى... فين كتشوفي فييين غيقول عاءلة ممربينيش بناتهم البرهوشة تبتي للارض ... اجي فين دوك الشوفات ديالي اللي كطيح الزرزور من فوق الصور ... شفتها غبرات . بلاتي والله حتى نديرها عاودت رمشت بشيو مطلعة حاجبي بكبرياء وقلبت عيني دوز شوفة حداه ديتها للبرزة فين جالسين العرسان لقيتو مزال حاضيني... هنا بقينا حضيني نحضيك .. عودت رجعت الشوفة مرة اخرى للجهة دالباب دوزتها عليه وهوا يدير شقة ابتاسمة على شفايفو ... بلا ميلفت الانضار دالناس ليه ... ناااري عا علاش انا كنموت على هاد النوع هاهوا جاب ليا التمام غير بالشوفة وافكها يامن وحليتها .. العرس مزال طويل كي غندير دابا وانا عقلي ركز جيهتو ... الى بغيت نمشي خصني نتقاد والى بغيت نهضر خصني نمثل والى بغيت نضحك خصني وخصني وخصني وخصني وانا فبالي حاضيني وحاط عينو عليا ... الضحكة كتجيني غير بوحدها ماعرفتش علاش واخا مانكونش كنشوف فيها وغير كنحس براسي باغا نضحك كتمشي عيني عندو ... مرة نلقاه كيشوف فيها مرة نلقاه كيشوف فجهة اخرى ونبقا حاضياه تا كيرجع يشوف فيا ويحصلني ونبدا نتلف كي دبانة اللي كتمشي وتجي ناسيا على بلاصتها و مرة تجي عيني فعينو دقة وحدة ... اححح شحال زوين العرس بالخصوص تلقاي اللي تحضي ويحضيك ... غنشوفو هاد الحضية فين غتوصلنا
داز النص فالعرس وعينو مهزهاش عليا فين ما ندور نلقاه كيشوف فيا ، وليت خايفة نعتر ونجي على فمي وندير فراسي الضحك وكاع داكشي اللي عاجبو فيا وجمالي يمشي هباءا منتورا و500 درهم دالكافورة يضربها تران ... زدت تبت كتر وكتر ووليت كنتمشى بالعبار ... بغيتو غير يتحرك من بلاصتو نشوف مشيتو مابغاش... الطولة باين طويل بقات غير المشية نشوفوها هي اللي تعطيني شخصيتو كي دايرة .. ونزيد نسمع صوتو حتى هوا الى كان زوين صاافي انا الله يرحمني كنت بنت صالحة.
حطو للعشاء و مقدرتش نتعشا مقابلة معاه ... نخاف نضحك ولا نعطس وطير شي لقمة من فمي . المهم بكترت ما كنرد بالي كنطيح فمخاوفي داءما . جلست لخويا فبلاصتو قبل ما يجي باش نعطي لكاضم الساهر بضهري وناكل فخاطري .. من تما ماشفتو حتى سالا العشاء ورجع النشاط ونضت بلا منشوف جيهتو مشيت للطواليط وضربتها بتعكيرة من القنت للقنت وقاديت شعري وسمطة دالتكشيطة ورجعت خرجت هازاها من القدام وكنتمشى مشية الاميرة ... ودايزة فوق السجادة الحمراء والناس جالسين على الجناب ... شفت فكاضم الساهر الصغير اللي باين مزال ما وصل سن الشيخوخة .. كان كيهضر وتلفت شافني جايا وهوا يرجع راسو اللور تنهد وحل فمو شوية بحال الى بغا يضحك .. كيعبرني من راسي لرجليا وانا كلش شوية نسرق شوفة منو ... بين اعجابو بيا وخفت يلاحضها شي واحد حيت هنا فين كيكونو البنات كيبرككو وكيصيدو الرجال .. وهوا عاطي للعين باينة ماشي غير انا اللي حاضياه وانما مني بزاف . رجعت جلست وهزيت تيليفون كنلعب فيه وندير السيلفي وانباتسم بوحدي .. تلاحت حدايا بنت عمي عنقاتني وضحكات خديت انا وياها سلفي وبدينا كنتصورو ... شوية وهي تقلول ليا وكنشوف بنص عين فالجهة دكاضم الساهر
بنت عمي : صوفيا ...شوفي داك الراجل ... حاضينا من الصباح وهوا تابعني بعينو
سعقاتني للحضة نسيت كاع واش بنت عمي وخرجت فيها عيني بلا منشعر وقلت
حسدتها على ديك التعنيقة وديك التكميشة اللي دارت فيه وعلى يديه اللي دوروها وقال بابتسامة
_ تهلاي لي فراسك الزين دحبيبو
شد ليها راسها وباسها وعاودات عنقاتو ..بقيت انا دايبة سايحة مع القادوس اللي حدا الطروطوار حتى فيقني عاظل خويا وقال بعفوية
عادل: يالاه ... راه خواو البلايص دابا
شفت فكاضم الساهر ديالي شوف دة فيها نوع من الحزن حيت غنمشي بحالي وهوا غيمشي بحالو .. دار فيا نص شوفة وبنفس الابتسامة والنضرة الجذابة وببرودة ما مقلق حيت ميعاودشش يشوفني ما حتى حاجة .. صرباتني النفس وقلبت وجهي مشيت نيشان ركبت وخليتهم مزال كيتوادعو .. شفتو من البعيد وهوا غيركب دار فيا اخر شوفة بابتسامة وخز راسو بحال اشارة ليا مافهمتش جاتني بحال الى استفزني وطلع مشا
مشا وخلاني طايح عليا الضيم ... وا ضيييم واشمن ضيم هوا بحال الى سقطت فالباك . . . العرس زوين وخايب ... زوين حيت قبل كتكون محمس وكتوجد ونهار العرس كيكون هاداك هوا النهار الكبير خصوصا الى لقيتي التيتيز حاضر .. كيدوز احسن ليلة فحياتك ... ومباشرة من بعد العرس وغير كيصبح الحال كلشي كيتمحى بحال الى كنازة ... كلشي مبوق وكلشي ساكت ودايخ وحتى واحد ماعندو المورال ... كلشي خاصو 3 ايام ديال النعاس يالاه يرجع بنادم ويتأقلم مع الايام ... حيت كتحس براسك بحال الى حطيتي رجلك فشي بلاد اخرى مزال ماولفتي ... هادا هوا النهار التاني دالعرس واجواءو ... وهاكا فقت مع الستة دالعشية كولي خامجة بالمكياج مقدرتش حتى نغسل وجهي .. يالاه قدرت نحيد التكشيطة .. مع حليت عيني فدارنا فالبيت ديالي الصغير اللي كنعس فيه وانا نلقى بنادم مجبد حدايا كي الموتى ... شي عند راسي شي عند رجلي شي مفرش فالباب متكي ... اييه بنات عمي وخالي وعمتي وخالتي ... وجههم كيتلسق بالعرق والمكياج رجع بحال الطلية دالحنة ، جلست سخفانة بحال الى جيت كنجري باش نفيق .. مع الصهد والموت ومكناس طايب كتشوف القط باغي يسلخ راسو باش يتنفس ... مع الجلسة طاح ليا ابو شيبات فراسي وانا نتنكد عاوتاني ... حسيت بقلبي طاح .. علاش تفكرتو علاش ... اش بيني وبينو حتى يوقع ليا هاكا ... ليلة وحدة تشاوفنا فيها وتبادلنا النضرات دير فيا هادشي كامل ... وحدة فعمرها 27 عشرين عام يوقع ليها بحال هاكا .. هادشي ماطراش ليا حتى فاش كنت فسن المراهقة ... افففف واللهيلا خصني العصى ... ايه لحمي خصو العصى ولاكن قلبي وعقلي اش ندير معاهم ... نسكرهم مثلا؟ ايه ايه عاارفة راسي كنموت على داك النوع دالرجال حيت كنحسو راجل بكل ما تحمله الكلمة من معنى ويحتاضنك و يدلعك ويعرف يتعامل مع النساء وحتى طريقتهم فالكلام كتكون مختلفة ورزينة .. رمنسيتهم كتكون فشكل ... كيعرفو يجبدو المرأة وعندهم خبرة ... ينعل النهار اللي تفرجت فيه فداك الفيلم ديال داك البطل اللي كبير فالسن وبطلة قدي وتزعطت فيه ومن تما وانا نقلب على واحد كبير .. حتى لقيتو وهوا يتبخر ... فين نلقى بحالو فديك الوقفة ديال البوليس والشخصية الرزينة .. الوقار والجاذبية والضحكة القتالة .. ااامي على ديك الشوفة الجارحة ... شفت تقليقتو وشفت ابتسامتو ونضرتو اللي جذباتني ليه .. بلعاني دار هاكاك باش يجذبني عندو ... عمرني نسى الدورة اللي درت ولقيتو كيشووووف فيا بديك الطريقة ... بلا الجلسة اللي شفتو داير فالطوموبيل وهضرتو التقيلة وصوتو ... اااه ... نوض نغسل وجهي وندوش من العرق على الله نرتاح شوية .. مكرهتش نخشي الرشااشة فودني نغسل بيها عقلي ... غا شاف فيا ولسق فدماغي اما كن غازلني هاداك كما درا لبنت ختو سارة اللي قالت ليه حبيبو ماعرفت اش كان غيطرى فيا .
خرجت من الدوش بالدباز .. كلشي باغي يدخل يبول مابان ليهم البول حتى دخلت انا ندوش تفو ... باراكة غير عقلي اللي معصب بوحدو مع هاداك اللي مهضرش معايا نزيد حتى نفيخ البشار .. العرس سالا اش مزالين مزاحمين معانا فالدار .عكزتو تمشيو حتى يدوز عرسي انا ولا شنو!! لبست فالدوش عاد خرجت حيت لا خرجت بالبينوار بحال الافلام غنلقى المشاهدين جالسين وسط الدار مركزين بحال لا جالسين فدار الاوبرا ... اش ندير واش منديرش..غادا جايا تالفة كي الحمقة باغا غير فوقاش نشوف سارة ونبحت فيها شوية على اخبارو .. ناض فيا الطيكوك مكرهتش نعيط ليها ولاكن خفت تكون كتمارس الرياضة ونقاطعها ولا يخرج ليا خويا بشي كروشي من تما .. اللهم خليني تابتة صابرة واخا انا ماشي من النوع اللي كيصبر فالحقيقة .. خليها حتى تمشي لدارها ونمشيو نديو ليها الفطور عاد نجر ليها لسانها ... حتى هاد خويا يعطيه الخلا والجلا سكن فالاوتيل .. مالو ميمشي لدارو ويكمل اليوكا تما .. مال الدار مافيهاش الحيوط !
تلفت مع ماما فالدار كنعاونها حيت عيات مسكينة . هاازة عليها انا الدار ومتغلبنيش حيت مولفة نعاونها ونقوم بكلشي ... مهم فاش ما جيتيني تلقاني ... جيتيني فالحداكة نقولك انا هي مولاتها .. جيتيني فالصواب والبريستيج نتسيف عليك تقول غير وءام الدحماني .. مع انا طويلة بحالها و بنفس فورمتها .. بفف .. تشوفني فالكوزينة واقفة بالبيجامة تحت الركبة مشدودة من الجناب مع السليب وكنطيب وشعري مجموع بالزيف تحلف عليا ما انا هاديك اللي كانت جالسة فالقاعة طالقة السوالف ودايرة رجل على رجل والدفار طوال فالكرونة دافعة سدرها وجالسة مستقيمة ، اودي من هادشي كاامل واخا يجيبو ليا ابكص واحد نفضل التيتيز الاربعيني اللي شفت لبارح ومنغيرو نخلاق والى حطيتو فراسي مانمشي حتى نجيب باباه ...صووفيا هادي واجرك على الله ماشي من هادوك اللي يتخباو وراء الستاءر .. من بعدما لقيت فارس احلامي مغنخليهش يطير بسهولة وانا مربعة يدي ولا نجلس نتسناه تا يجي يخطبني .. ايوا ويلا مجاش وخاب ضني نجلس واحد 3 سنين اخرى نتسنى حتى يبان شي واحد بحالو .. انا هادا رتاحيت ليه وعجبتو مافيهاش شك وفتح ليا باب بنضراتو اللي تخليني نجبدو عندي ومنو نخلاق سالات الهضرة .
دازت عليا 3 ايام ديال تمارة والتخمال والتصبين باش نرجع كل حاجة بلاصتها وترجع الدار تابتة كما كانت من قبل . وانا فعقلي كاضم ديالي كنخمم وتخايل راسي انا وياه غير بووحدي وكنضحك . عيط لينا خويا علمنا باللي رجع لدارو وانا نقز خليت ماما كتهضر معاه فالتيليفون فالكوزينة و مشيت كنجري نوجد راسي حيت عارفة غنمشيو عندهم .. زائد عرض علينا للعشاء فدارو حنا وعائلت مرتو .. فرحت مشيت للدوش رقدت راسي مزيان وخرجت شديت واحد المراية كنقاد حجباني المربعين غلاض شوية ونسطرهم باش يعطيو شوفة جدابة وانا كنتمنى تكون عارضة حتى على داك حبيبها ونشوفو تما عن قرب ... لويت شعري وجلست فيه 3 دسوايع بلحساب وانا كنلوي فالبابيليز .. ايوا شنو يحساب ليكم الشعر طويل سااهل هه!
اخير وقفت واجدة من بعد ماتفقصات ماما معايا وهي غادا جايا كتغوت باش نسالي دغيا ... طلقت السالف التالف متموج وفكرت فشنو نلبس ولقيت احشن حاجة شي حاجة بلدية .. خلي الرومي للزنقة انا دابا غنتلاقاو النساب و كاضم ديالي اوييلي حتى شنو سميتو .. عنداك تكون سميتو العربي ولا قدور ولا موحا نطيح كااو .. واخا نبغي نخرج من هاد المصيدة اللي طحت فيها منقدرش حيت تزعاااطت واللي عطاه الله عطاه واخا تكون سميتو المسندر .. على الله تكون عندو شي سمية زوينة باش يكمل ليا الباقي ونتخيل راسي كنعيط ليه بسميتو . المهم اهم حاجة الخيال خخه
بواحد مولاتي جلابة ايفازي فالابيض مطروزة فالغوز والازرق فواحد الجهة من الصدر وفيها سفيفة بيضاء وبلغة فالازرق جيت كنهبل ... تقول انا هي العروسة مع الشعر والتكحيلة دالعينين وزدت جبدت الشفار بالريسيل وشوية دالمكياج وعكار بوردو نقصت منو حسن ما يرعفني خويا .. جست قرطاسة لدرجة ماما خرجات فيا عينيها وبغاتني نقص المكياج .. ايوا صافي غير اجي ونقص ! الحاجة الناقصة فين عمرها كتعجب الواحد .. ديري ليهم كعب غزال بلا لوز وشوفي كيطلع ! ساهلة يقولك نقص . ياك العكار اللي معيق وهوا اللي كيبين المكياج اوفر .. هاوا لاللة نحيد باباه غا هنيوني خليو ليا المورال طالع باش نركز مع الشويبة ديالي . مشيت طلعت اللور هازة تيليفونؤ الايفون كبير فيدي مع بوشيطة مكيتساعش ليا فيها ومشينا لدار خويا .. حنا نزلنا حدا العمارة وانا نشوف مرسيديس كحلة فالباب .. ماعرفت اش وقع ليا تا كنت غنسخف حدا ماما ودخت بقيت كنشوف فيها .. حسيت براسي كنصهد وانا نجبد الريحة رشيتها وتبعتهم كندعي تكون ديالو .. طالعين فالدروج شي مور شي وانا اخر وحدة .. ماما كتدور تقولي زيدي وانا كنقوليها غير سيري هانا موراك .. مع الدروة ديال دروج دق بابا وخرج ليه خويا كيتسالمو استاغليت الفرصة وجبت العكار ضربت واحد التسركيلة على فمي وقاديتو بالخف مع المرايا وطلعت مبتاسمة طالقة زيني وعويناتي .. سلمت ودخلت عيني سابقيني كيدورو ويقلبو بلهفة حتى قشعنو فالصالة جالس مع عاءلتو .. لابس دجين هاد المرة وتيشورط كحلة .. اييه راه مشارفش غير الشيب اللي بان فيه اما الفورمة كضهشر بنادم وداير واحد الجلسة مثيرة .. حاط يدو على المخدة اللي حداه والاخرى على فخدو وهاز رجل فوق رجل ... غير شفت فيه لقيتو كيشوف فيا بنفس النضرة اللي اللي شفتو بيها اول مرة .. دغيا قلبت وجهي .. عنداك يكون حس بيا كنقلب عليه .. باينة عينيا كانو كيقلبو وخايفين ميلقاوهش . توترت وخواو بيا ركابيا .. واخا هاكاك بقيت محافضة على بريستيج ديالي ودخلنا للصالة .. كانت عاءلت العروسة جالسين بيهم بزاف .. شحال خيابة دخل على شي ضياف للصالة وتلقاهم كتار كتحس براسك دايز بحال شي عارض ازياء يخ .. حتافضت على ابتسامتي وبدت كنسلم تابعة ماما وهما كيوقفو لينا يسلمو .. وصلت حتى لعندو ومدين ليه يدي ... شد فيها وهو عينو فيا بابتسامة جانبية ونضرة قتالة .. حتى انا ابتاسمت وحشمت وبان عليا الخجل .. حسيت بيدو حنينة وفاش بغا يجرها جرها بشوية بحال اىى كيحسس يدي .. تما حسيت بقلبي تزير معدتي عرقات .. مشيت جلست ومالقيت فين نجلس غير فالسداري اللي مقابلة معاه .. تما دارو ليا بلاصة حدا ماما ..
قصة أحببته أبيض الشعر
محتوى القصة
التنقل بين الأجزاء