فاقت إيناس و دخلو عندها جيت باش ندخل و هو يوقفني مروان: نتي معندك فين دخلي براكة الي درتي
صوفيا: مروان للمرة المليون انا ما قصدتش نضربها اوك؟
مروان: نتي اصلا مكتحمليهاش و ديما محلفاها فيها مي من بعد و تشوفي
صوفيا: غير نتا الي باغي تخلق المشاكل و صافي
دخل و أنا جلست سيفطت مساج للبنات و عاودت ليهم شنو وقع بقاو كيضحكو، و حتى انا نضت كنضحك بوحدي، و مع ضحكتي خرج مروان و بابا شافني و هو يجي عندي شاعل: و كضحكي الالة نص رأسها مفتوح و نتي جالسة كتكركري هنا عرفت إلا حيدت السمطة شغدي يوقع
صوفيا: غدي يطيح ليك السروال
مروان: و كتفلاي باز لدمك شحال بارد مي بلاتي حتى للدار و نوريك شنو غدي يوقع ليك إلا حيدت السمطة
صوفيا: اه الدار احسن حيت هنا غدي تشوه و كلشي يضحك عليك
مروان تعصب و خرج، جا بابا عندي: بنتي دخلي اعتذري من إيناس و حمدي ليها على السلامة
صوفيا: مخلانيش مروان ندخل عندها قبيلة
بابا: غير دخلي مروان خرج
دخلت عندها لقيتها كتبكي، أوف مكنحملش بحال هكا غدي نولي انا هي الشريرة دبا، جلست حداها غير شافتني زادت بكات و ضارت للجيهة الأخرى،حطيت ايدي على كتفها: إيناس انا مقصدتش اختي كنت كنسحابك شفار
إيناس دارت عندي: واش كضحكي عليا؟ الشفار شغدي يدير فالكوزينة ها؟ خلا الصالون و بيوت النعاس و جاي للكوزينة لاش؟
صوفيا: ختي معرفت انا معمري شفرت باش نعرف هدشي الي فكرت فيه فين سمعت التقرقيب تخلعت و تسرعت
إيناس: نتي اصلا محلفاها فيا أما باين الشفار من مولا الدار، باش تجي تفلاي عليا، عارفاك كتكرهيني مي شنو دخل هاد الروح الي فكرشي إلا سمح الله ماتت
خرجت عينيا فيها ناري شحال فيها ديال التبوحيط يلاه جيت نجاوبها و هي تهدر ماما: سيري مع باباك للدار انا و مروان غدي نباتو معاها الليلة
صوفيا: اوك تصبحو على خير، خرجت حاقدة على الوضعية دبا انا وليت خايبة و كلشي ما حامل يشوف فيا من غير بابا هو الوحيد الي كيفهمني و كيتيق فيا، خرجت عندو و قلت ليه شنو قالت ماما، حتى هو ما اعترض، خرجنا من السبيطار ركبنا للوطو و رجعنا للدار
صبح الصباح فقت على الصداع التحت، نضت دغية هبطت، لقيت بابا و مروان و معاهم صلاح أو هذا شكيدير هنا؟سي يوسف: بنتي ما دارت والو هي البارح كامل معانا
مروان: لا البارح ما جات حتى2 ديال الليل
بابا: مروان!!!! 😡
مروان: علاش كذبت ابابا
صلاح: دبا فين هي؟
صوفيا: ها انا، ياك لاباس شنو واقع؟
صلاح: تفضلي معايا للكوميساريا عندك شكاية
صوفيا: شكاية؟! شكون شكا بيا و علاش؟
صلاح: حتى الكوميسارية و تعرفي
سي يوسف: بنتي ما غادة فين إصلاح صافي هدرنا
صلاح: سي يوسف هدي خدمتي، صوفيا دارت جريمة و خاصها تعاقب عليها
سي يوسف: بنتي معمرها أذت دبانة
مروان ضحكت ضحكة استهزاء: ههه صلاح زيدها جريمة أخرى و هي محاولة القتل
صلاح: شنو؟!! شاف فيا باستغراب
سي يوسف: ديها فيه راه مريض هداك، انا غدي نمشي معاكم نشوف هاد الجريمة
صوفيا: بابا نتا غير خليك هنا إلا جات ماما تلقاك، انا متأكدة بلي كاين شي خطأ غدي نشوفو و نجي
سي يوسف: بنتي واش تسطيتي نخليك تمشي بوحدك؟
صوفيا: بابا عفاك بلاش ما تمشي واش كتيق فيا؟
سي يوسف: معلوم كنتيق فيك
صوفيا: ايوا بلاش ما تمشي معايا و كنواعدك مغديش يطلب مني نص ساعة و نرجع بخير و على خير
سي يوسف: أوف وخا سيري و الا شفت رأسك واحلة عيطي ليا نجي
صوفيا: اوك كنبغيك، سي صلاح يلاه نمشو
صلاح: زيدي
صوفيا: اه بلاتي نسيت راسي شنو لابسة نبدل و نرجع
صلاح: أوف يلاه دغية
لبست سورفيت و كونفيرس جمعت شعري و مشيت، خرجت لقيت صلاح واقف حدا واحد الداسيا: متقوليش غدي نركب فهدي 😝😲
صلاح: مال هدي؟ 😒
صوفيا: داسيا؟!! أقدم حاجة و رخيصة بزاف
صلاح: اه عندك الصح بلاتي نجي الاودي و لا كاط كاط و لا ليموزين كاع احسن ياك؟
صوفيا: صافي مقلنا والو 😑
ركبنا مشينا للكوميساريا، دخلنا كلشي كيلقي ليه التحية و هو غادي بحزم و تفاني بملامحو القاسية و النظاظر الي مكيفارقو عينيه، دخلنا لبيروه لقينا عمر حالتو حالة بالضرب ضحكت فخاطري، شاف فيا بتهديد انا مديتهاش فيه دخلنا للبيرو بقينا واقفين و السي سيد جلس حيد النظاظر و شد شي ملف كيقرا فيه، و كل ساعة كيشوف فيا ببرودة: سي الكوميسير طلقني عفاك راه مزال ما فطرت و خليت بابا مخلوع
ضرب البيرو بايدو: السكات؟!!، واحد الشوية حط الملف و حط رجل على رجل شاف فعمر: هدر شنو وقع ليك ديك الليلة بالتفصيل
عمر: كنت فالبار عادي بحال كل الليلة جات عندي واحد البنت جلست حدايا و قالت ليا يلاه نمشو لشي أوطيل يعني هي الي عرضت عليا ماشي انا، من بعد مشينا للأوطيل قالت ليا يلاه نلعبو قاش قاش غمضت ليا عينيا شوية حسيت بشي وحدين دخلو علينا و كتفوني و بقاو كيضربو فيا معرفت باش تبليت من بعد ما كملو مشاو، دخلو عندي الي خدامين فالاوطيل هوما الي عتقوني
انا بقيت حابسة الضحكة ههه مسخوط ما رضاش يقول الحقيقة
صلاح: اممم كنتو كتلعبو قاش قاش مزيان
عمر شاف فيا شوفة حقد: هادي هي الشاف هي الي ضرباتني هي و دوك الي معاها
صوفيا: واش شفتيني بعينيك؟ و لا سمعتيني بوذنيك سمعتي صوتي باش تقول انا
عمر: لا مي متأكد بلي نتي
صلاح: فين كنتي بين الساعة 10 و 11
صوفيا: كنت فريسطو *****
صلاح: شكون كان معك؟
صوفيا: كانو معايا سارة و إحسان
صلاح: حميد؟!!
دخل عندو حميد و عطاه التحية: وي الشاف
صلاح: بغيتك تمشي دبا لريسطو **** سولهم على حجز باسم صوفيا البناني و سارة توفيق و إحسان الفيلالي البارح اشمن ساعة
حميد: اوك الشاف
بقينا حنا واقفين كنتسناو فحميد انا مصارني كيغوتو و عييت من الوقوف: السي الكوميسير ممكن نجلس
صوفيا: انا و انت عارفين شنو دار ليا و شنو كان غدي يدير ليا كون ما جيتي فالوقت مي وخا هكاك كمدتها و سكت و خليت ربي هو الي يعاقبو، شوف شكون دار فيه هاد الحالة اصلا بحال هاد النوع غدي يكونو اعدائو أكثر من طسيلتو
صلاح: مي أصابع الاتهام حاليا موجهة ليك نتي و انا نبهتك داك النهار بلي إلا درتي شي حاجة مغديش نخليها دوز
صوفيا: اه هو الجريمة الي دار تمر مرور الكرام عادي ياك مريضنا ما عندو باس، نتوما البوليس كدابين و منافقين و مكتوفوش بوعودكم
صلاح وقف: دبا نتي شنو خاصك؟ عارفة رأسك مع من تهدري؟!
صوفيا: اه مع منافق
صلاح تعصب جمع ايدو بغا يضربها مي تماك راسو فاخر لحظة و صوفيا واقفة بكل تقة و تحدي، قاطعهم حميد: سيدي
صلاح: وي حميد
عطاه ورقة ديال الريزيرفاسيون، قراها و شاف فيا باستغراب: اممم أوف جيب احسان و سارة دبا
صوفيا: عفاك ما بغيتش صحاباتي يدخلو فهدشي هو ما عندهم دخل
صلاح: نتي غدي تعلميني خدمتي ولا شنو؟! سير احميد جيبهم
حميد: وي الشاف
صوفيا: ياك شفت الريزيرفاسيون و تأكدتي بلي كنت تماك شنو دبا؟
صلاح تجاهلها و جلس كيخمم، واحد الشوية جاو البنات و الخلعة باينة فاوجاههم، سلمت عليهم هو يسولهم صلاح: فين كنتو بين الساعة 10 و 11؟
سارة و احسان: كنا فريسطو *** مع صوفيا
صلاح: و من بعد؟
احسان: من بعد مشينا لواحد السهرة فالبحر
صلاح: اممم و ما مشيتوش لبلاصة أخرى شي أوطيل مثلا، بقا كيشوف فيهم و ركز الشوفان على سارة أكثر حيت كان التوتر باين عليها، إحسان كانت واثقة من رأسها و تصرفت عادي: اوطيل؟! شنو غدي نديرو فيه، صلاح شاف فيها من بعد رجع شاف فسارة: سارة مالك ساكتة؟
سارة بتوتر: لا ما مشينا لحتى أوطيل دكشي الي قلنا ليك هو الي وقع
صلاح: أوف يا ربي، حميد؟!!!!
دخل حميد: نعم الشاف؟
صلاح: سير للأوطيل الي لقاو فيه عمر طلب منهم تسجيلات الكاميرا
ناري هادي مضربتش ليها الحساب تفو مشينا فيها
تخلعت و توترت، شافت فيا احسان و سارة شدت ايدي، أشارت ليا زعمة ما تخافيش حنا معك، زيرت على ايدها و طمنتها بعينيا، انا و البنات كنفهمو بعضياتنا من الإشارات و حركة العين، بقينا واقفين على الأعصاب، أول مرة فحياتي نخاف من ردة فعل شي حد، شكون كان يقول يجي شي نهار يطيح فيا صلاح النص و نولي خايفة من ردة فعلو، بعد مدة من الانتظار جا حميد و هو يقول: سيدي كاميرا ديال الاوطيل كانت خاسرة
تنفست الصعداء أوف الحمدلله، شفت فالبنات الي حتى هوما ارتاحو: ايوا شنو دبا باقي حاجة أخرى متاكدتيش منها؟
صلاح شاف فيا بغضب: هاد المرة كان عندك الزهر؛ يمكن ليك تمشي نتي و صحاباتك مي atention
قربت حتى لعندو: معرفت علاش مزال متهمني مي خاصك تعرف واحد الحاجة بلي إلا كنت غدي ندير شي حاجة لشي حد غدي نتواجه معاه ماشي نغمض ليه عينيه😉
مشيت و خليتو كيتفقص، كان عمر كيكمي كارو برا، وقفت حداه بكل شجاعة: عرفتي نتا والله إلا حمار و ما عندك حس الرجولة داك النهار عمري ننساه و غدي نبقى ديما دايراك فبالي، لذلك رد البال لراسك باي
ركبت اللوطو ديال احسان: أوف الحمدلله دزنا منها بخير للحظة قلت مع رأسي مشينا فيها
سارة: اه ناري شحال خفت، و ختي هداك صلاح طيح فيا النص
صوفيا: سمحولي البنات دخلتكم فهاد المشكل
احسان: آخر مرة تعاودي هاد الهدرة، راه هدرت معك داك النهار حنا واحد
سارة: و دبا فين تبغي تمشي
صوفيا: نمشي للدار هي اللولة نطمن بابا عليا و نشوف هديك البوحاطة ديال إيناس
حسن: اوك باش مكان ردي عليا كنتسنا جوابك بفارغ الصبر
احسان: ايوا غدي تمشي
صوفيا: اكيد غدي نمشي، صراحة خاصني نقاد ظفاري و بغيت نبدل لون شعري
سارة: اه ديري اكاجو غدي يجي معك فن
احسان: اه ديريه
صوفيا: هي إلا مشيتو معايا
سارة: هي اللولة
غسلت ايديا بدلت لباسي و مشينا للبيوتي سونتر، تحمحمنا درنا السونا و المساج و الماسكات، من بعد درت منيكير و بديكير صبغتهم فالموف و صبغت شعري اكاجو، سارة قطعت شعرها شوية و سشوراتو و إحسان حيدت les points noir، المهم هدشي فاش ملهيين الوقت غير العناية فراسنا و الخروج و الحفلات، سالينا كل وحدة خلصت على رأسها، توادعت مع البنات و رجعت للدار باش نلبس و نتقاد، لبست غوب فالموف طويلة مفتوحة من الجنب و بلا سميطات معاها طالون فالكري و بوشيطة ديالو، درت مكياج خفيف و هبطت، شافتني ماما و بدأت بالاستجواب؛ بسيف تفكيت منها، ركبت اللوطو ديالي و توجهت للريسطو الي اتافقنا عليه، لقيتو حاجز لينا طبلة مي هو مكاينش، جلست فهديك الطبلة و جاب ليا السيرفور عصير بقيت كنبقشش فالتلفون بينما يجي، حتى حسيت بيه حيد شعري و ركب ليا سلسلة ديال الالماس درت عندو ابتسم ليا و باس ايدي: هاد الزين كلو غدي يتعشا معايا
صوفيا: زوينة بزاف لاش عذبتي راسك؟
حسن: هذا أول كادو كنهديه ليك
صوفيا: باينة فيها غالية بزاف
حسن: مغديش تكون أغلى منك
ابتسمت ليه: ميغسي بيب
حسن: ايوا هدري ليا على شنو درتي فغيابي
فخاطري وقع بزاف فغيابك: دوزت أوقات زوينة مع البنات كيما العادة
حسن: امم مزيان، انا صراحة هاد يومين دازو عليا طوال بلا بيك
صوفيا: و علاش؟
حسن: حيت انا، قاطعنا السيرفور جايب الموني، شديناها من عندو و انا بقيت كنقرا، طلبت شوربة ديال الحوت و حسن طلب بحالي: كيعجبني ذوقك
جات الشوربة شربناها و بقينا كنهدرو و نضحكو، من بعد طلبنا الطبق الرئيسي و نفس الي طلبتو طلبو حسن، كملنا العشا و جلسنا نكملو الأمسية، حسن: عرفتي صراحة من النهار الي شفت البروفايل ديالك فالفيس تعلقت بيك
صوفيا: بصح؟ وخا مكتعرفني؟ معناها غير الشكل ديالي هو الي جذبك
حسن: نو ماشي هكاك، انا ماشي من داك النوع الي كيتبع الجسد و الجمال
صوفيا: اممم صراحة انا كيجوني معشر الرجال همهم الوحيد هو المظهر الخارجي لا غير
صوفيا: هي ماشي غير فكرة هي واقع، البنت إلا مكانت زوينة و انيقة و متهلية فراسها حتى حد ما يحاشيها ليها
حسن: بالعكس شحال من وحدة زوينة مي الداخل ديالها خايب و حقودة و متكبرة
صوفيا: إلا مكانت البنت حقودة و متكبرة الذياب البشرية غدي تفترسها حيت زينها ديما شاري ليها الصداع أما ماشي طبيعة فيها
حسن: و لكن التكبر خايب و كيخلي الواحد يكره فيه الناس و يبعدهم عليه
صوفيا: و هكا احسن حيت البشر ما فيه خير خاصك تبان قوي قدامو باش ما يستغلش ضعفك، قاطعنا تلفون حسن كيصوني: سمحيلي مي ضروري نجاوب
صوفيا: ماشي مشكل خود راحتك
حسن: غير دقيقة
شفت الساعة لقيتها 12، دازت ربع ساعة عاد باش جا حسن و باينة فيه مقلق من شي حاجة: صوفيا يلاه غدي نمشو
صوفيا: فين؟
حسن: للدار غدا خدام بكري و تعطل الوقت سمحيلي
صوفيا: حسن؟ مالك كنت مزيان و دبا كتبان ماشي هو هداك
حسن: لا غير كيبان ليك
صوفيا: اوك يلاه
سلمت عليه و ركبت اللوطو، صراحة بقا بالي مشطون معاه، وصلت للدار لقيتهم نعسو، طلعت لبيتي بدلت لباسي شوية صونا التلفون، بانت ليا نمرة مجهولة اول مرة نشوفها؛ جاوبت و هو يجاوبني صوت مألوف: الو صوفيا
صوفيا: ياسين؟ ألا كنتي باغيني نرجع ليك بلاش ما تصدع رأسك
ياسين: لا اصوفيا انا نسيت هداك الموضوع عفاك بغيتك تعاونيني عفاك ما تقوليش لا نتي املي الوحيد
صوفيا: كيفاش نعاونك؟
باسين: سمعيني مزيان؛ بغيت تجيبي اللوطو ديالك و تجي للكوميساريا الي كاينة حدا أوطيل **** و توقفي تماك و انا غدي نجي عندك مي حاولي ما تخلي حد يشوفك
صوفيا: بلاتي بلاتي نتا شكدير فالكوميسارية و بنت ليك غير انا من بين الف واحد
ياسين: هادوك الف واحد ما دايرش فيهم التقة بحالك، و من بعد نشرح ليك كلشي عفاك غدي يقتلوني إلا مخرجت
لبست سروال دجين و بودي، هزيت الكونطاكط و خرجت بشوية، ركبت اللوطو و مشيت للكوميساريا و انا طول الطريق كنفكر واش نكمل طريقي و لا نرجع من فين جيت، فالأخر قلت نمشي، وصلت للكوميساريا و بقيت كنتسناه على أعصابي جربت نصوني ليه ساعة الخط مكيشدش، تسنيت شحال شوية سمعت الصداع و الكلاب كينبحو و الضو شعل، جيت باش نرجع و هو يبان ليا ياسين كيجري، ركب حدايا دغية: يلاه يلاه!!!!
ديماريت اللوطو و بقيت ضاغطة على
الفيتاس: شنو وقع؟!!
ياسين كيحاول يلتقط انفاسو: البوليس عاقو بيا بسيف هربت منهم و دبا تابعينا زربي عفاك
شفت فالمراية بانو ليا 3 طوموبيلات ديال الأمن تابعينا زدت السرعة و بدأت المطاردة انا جاني شي حماس مخلط مع الخلعة، حسيت براسي بحال هدوك الافلام ديال الاكشن الي كيكونو فيهم البوليس تابعين المجرمين، بقيت مركزة على الطريق وخا ميتة بالخلعة سيطرت على أعصابي، بقاو البوليس تابعينا و الطريق مظلمة كتصفر حتى خرجنا من كازا و ياسين كل ساعة كيدور يشوف فين خلينا البوليس كيلقاوهم قربو لينا، بقاو كيهدرو فالبوق باش نوقفو، ياسين: ما تديهاش فيهم غير سيري
صوفيا: انا شداني لهدشي نتا باغي تخرج عليا ما فيهاش
شوية حسيت باللوطو وقفت رأسها:ناري مشينا فيها سالا المازوط
ياسين: تفو على زهر ما تقوليهاش
خفت بزاف و ما عرفت شنو ندير: دبا شنو
ياسين: سمحيلي بزاف، هبط و خلاني بوحدي انا جمدت فبلاصتي ما عرفت فين نمشي، جاو البوليس و خرجوني، كان صلاح واقف غير شافني تبلوكا، حط ليا واحد البوليسي المينوط و الآخرين مشاو يقلبو على ياسين، صلاح فاق من الصدمة و شدني من فكي: نتي عاود تاني، هاد المرة حريرتك حريرة، من الضرب المبرح إلى المخدرات
حليت عينيا فيه: المخدرات؟!!!!
وصلنا الكوميسارية و بدأ صلاح يحقق معايا: دبا نتي خدامة مع المافيا ديال المخدرات ههه صدفة غريبة هدي
صوفيا: لا انا ما خدامة مع مافيا لا والو، هداك الراجل هو الي دخلني فهاد المشكل
صلاح: زعمة ما عندك حتى علاقة بيهم، ايوا علاش عاونتيه يهرب؟
صوفيا: انا ما عاونتو و مكنعرفوش، انا كنت دايزة ما بيا ما عليا حتى وقفني بزز و ركب و قالي سيري دغية بلاما تسوليني و كان شاد فردي مهددني بيه و...و انا كنت خايفة
صلاح: اممم يعني هو الي ركب حداك و نتي ما عرفتي باش تبليتي؟ اوك حميد جيب البيسي
حميد: وي شاف
جاب حميد البيسي حطو صلاح فوق الطبلة و دورو عندي، كان فيديو فيه انا واقفة باللوطو نتسنا ياسين حتى جا عندي و مشينا، هنا طاحو ليا الما فالركابي حيت لقاو عليا دليل
صلاح: اممم مسكينة كنتي غير دايزة، دبا بلا كدوب و عاود ليا كلشي شكون رئيسكم و كيفاش حتى دخلتي نتي معاهم؟
صوفيا: انا معنديش دخل بالمافيا و مكنعرفش هاد السيد
صلاح ضرب الطبلة: براكة من الكدوب، لاش كتكدبي لاش؟! كتصحابي رأسك إلا كدبتي غدي تسلكي؟!! صافي لقينا أدلة مكاين لاش تبقاي تكدبي
صوفيا: انا مكنكدبش!!! و الله يا معندي حتى دخل بهاد المافيا و معارفة علاش كتهدر كاع، انا بنت عادية عايشة حياتي بخير لاش غدي ندخل للمافيا؟ ها؟!
صلاح: معارفش شناهيا دوافعك، مي عارف بلي عندك مصلحة فهدشي و دبا اعترفي بلاما تصعبيها عليا و عليك
صوفيا: واش بغيتيني نعترف بشي حاجة مدرتهاش؟!!
صلاح: أوف يا ربي الصبر، قاطعهم حميد: سيدي جاو عائلة الآنسة صوفيا
شفت فيه بصدمة: قلتيها ليهم؟!!
صلاح: وي خاصهم يعرفو شنو دارت بنتهم
صوفيا: حشومة عليك
دخلت ماما و بابا و مروان، عنقني بابا و هو علامات الخوف باينة فيه، أما مروان كيشوف فيا برودة، ماما غير كتولول و تبكي، انا كنحاول نهديهم، شوية هدر بابا: صلاح واش متأكد من هاد الخبر؟
صلاح: هي عاونت المتهم يهرب و ما بغاتش توقف اللوطو كون ما سالا ليها المازوط
ماما: الله ياربي الله خرجتي على رأسك و علينا بفعايلك الي ما يتقاداوش، عجبك الحال اسي الحاج ها هي نتيجة الفشوش
بابا: صافي سكتينا، صلاح بنتي ما عندها علاقة بهدشي انا مربيها على أيدي، يمكن هو الي فورصا عليها تهربو
صلاح: سي يوسف للأسف حتى حد ما فورصا عليها هدشي ها نتا شوف، ورا ليه الفيديو، أوف مكرهتش نكسر هداك البيسي، الله ياخد فيك الحق اياسين خرجتي عليا
بقا بابا كيتناقش مع صلاح و يقنعو باش يطلقني مي صلاح مقصح راسو، شوية خرجهم و كمل معايا التحقيق، انا ما بقيتش هدرت حيت ما عندي ما نقول، دازت ساعتين و صلاح كيسول فيا و يوريني تصاور ديال شي ناس عمري شفتهم فحياتي، هو كيسول و انا كنحرك راسي بلا، حط التصاور و شاف فيا: فين مشا هداك اللسان الطويل الي عندك و الشجاعة الي كنتي كتحدايني بيها، دبا صافي تقداو ليك
شفت فيه بغيتي غير التحدي طلبتي غير الموجود: بدل ما ضيع الوقت هنا سير قلب على المجرم الحقيقي
صلاح: اووو و أخيرا نطقت على السلامة، متخافيش شريكك تابعينو البوليس و غدي يشدوه، دبا طلقيني خلاص هدري
صوفيا: انا مغديش نهدر حتى يجي المحامي ديالي
صلاح: علاش نتي عندك محامي؟
صوفيا: اه محامي العائلة قولها لبابا يجيبو
صلاح: خلي المحامي للمحكمة، أما هنا ما كاين لا محامي لا مدعي عام، كاين غير الزرواطة هي الي غدي تخليك تهدري
صوفيا: ايوا والله لا هدرت دير ما فجهدك
صلاح: وخا هي نبداو بالعصا ما عندك مشكل
ضحكت باستهزاء: هه خلعتيني، ما عندكش الحق تضربني
صلاح: جربيني
صوفيا: إلا ضربتني غدي نرفع عليك دعوى قضائية بتهمة الضرب بدون سبب
صلاح: اه كنسمع هاد الهدرة، مي البنت تبقى مجرمة إلا شفرت و لا قتلت و لا نصبت صافي ما نعاقبوهاش نخلوها على هواها و إلا ربيناها ما بقاتش عندنا رجولة، عرفت شنو درتي؟ ضيعتي عليا فرصة مهمة، شتي هداك شريكك و لا معرفت شنو كيجيك هو الوحيد إلي شاف البوس و هو الوحيد إلي كيعرفو و كان غدي يعترف كون ما هرب و طبعا كلشي بسببك
صوفيا: انا مكنتش كيسحاب ليا بلي خدام مع المافيا، ياسين صديقي شهرين و حنا كنعرفو بعضياتنا و هو طلب مساعدتي لأول مرة
صلاح: امم دبا ولا صديقك وليتي كتعرفيه دبا
صوفيا: انا كنعرفو اه و لكن مكنتش عارفة بلي خدام مع المافيا و لو كنت عارفة كاع ما نخاطر براسي و نعاونو
صلاح: لكن عاونتيه فكلا الحالتين
صوفيا: اه حيت كيبقى صديقي، و كيما كيقولو الصديق وقت الضيق
صلاح: هي دبا كتعترفي بلي نتي عاونتيه و بارادتك و بلي هو صديقك، ههه مكنتش متوقع تعترفي و نتي يلاه شفتي العصا، اما كون شحطتك بيها كنتي غدي تعترفي بافعالك كاملة
صوفيا: بلاتي انا اعترفت بلي عاونتو مي ما عترفت بلي خدامة مع المافيا
صلاح: نتي دبا قلتي الحقيقة و انا استنتجت كلشي منها، حميد!!
دخل حميد: وي سيدي
صلاح: دي الآنسة للكاب عيات غدا نكملو
صوفيا: شنو؟! لا و الله لا دخلت ليها انا ماشي مجرمة باش تدخلني الحبس
صلاح: حميد طلقني خلاص
حميد: زيدي معايا يلاه
بقيت كنقاومو: صلاح!!! راك ظلمتيني
جرني حميد و انا كنغوت: طلقني عفاك و الله يا مدرت والو بابا غدي يندمك كون متاكد
حميد: زيدي دخلي، وصلنا للكاب لاحني و سد الباب
بقيت كنضرب فالباب: فتحو الباب وا فتحو انا ما درت والو اوف
بنت: مال هاد خيتي ياك لاباس، فيقتيني من النعاس بصداعك
تلفت بانو ليا شي عشرة البنات شي متكي على شي، باينة فيهم بنات ليل ومدمنات، شافو فيا و وقفو، جات عندي هديك إلي هدرت قبيلة: تبارك الله شوفو الآنسة المحترمة لابسة غير المارك و الشعر يا سلام دوزت ايدها على شعري بعدت عليها: ما تخافيش مكنعضش هههه
بنت تانية: زوزو مكتعضش مي كتقمش هههه
خنزرت فيهم و مشيت جلست بعيد، مي شكون خلاك، جاو جلسو حدايا: مال الزين مقلق
شدتها زهيرة بغات تنتفها و هي تخوي بيها بقاو مضاربين ضربة فيا ضربة فيك و انا غير كندعي فخاطري على صلاح و نتحلف عليه والله لا بقات فيه دخلتي فقاءمتي السوداء أسي الكوميسير؛ فرقو الجوقة و هي تجي عندي البنت إلي كيقولو عليها مدمنة: و زعمة دافعت عليك و ما رديتيش ليا الجميل
شفت فيها و رجعت حدرت رأسي، و هي تقول: واش نتي زيزونة و لا شنو؟ انا سميتي هند و نتي؟
انا لا جواب، عاودت هدرت: تي مالك؟ عندك شي 100 درهم ختك حزقانة
جاتني فكرة جبدت بزطامي و عطيتها 300 درهم، هند: العز الساطة
صوفيا: غدي نعطيك ضعفهم فين ديري واحد الحاجة ليا
هند: قولي الزين انا فالخدمة
هند: فتحو الباب راه البنت غدي تموت فتحو
فتح البوليسي الباب: اشكاين ياك لابأس؟
هند: معرفتش كانت عادية دبا سخفات
البوليسي هزني و انا دايرة رأسي سخفانة: حتى نتي زيدي معايا نشوفو شنو وقع ليها
مزيان الخطة غادية كيما بغيت، بقيت كنشوف بنص عيني فين وصلنا، شوية حطني فوق واحد البياص و بقا كيسول هند شنو وقع ليا، مشا البوليسي و فتحت عينيا: فين مشا؟
هند: ما عرفتش بلاتي نطل نشوف ياكما كاين حد برا، مشات طلت و رجعت عاود: اوف كاينين شي جوج حدا الباب شغنديرو؟
صوفيا: قلبي على شي شرجم
جات بغات تقلب و هو يدخل البوليسي و معاه صوت مألوف ناري هذا صوت صلاح
بقيت جامدة فبلاصتي قرب ليا صلاح و بقا كيطرشني قصحني: جيبو الما
جابو الما و بقا كيرشني و والو بقيت جامدة، شوية ما بقيتش سمعت الحس، هدرت هند: حلي عينيك راه مشاو
حليت عيني: دغية قلبي إلا كان شي شرجم
قلبت هند لقات واحد الشرجم مي عالي بزاف: مشكلة و دبا شنو؟
هند: شوفي غدي طلعي فوقي باش توصليه مي قبل عطيني فلوسي
عطيتها الباقي سدت الباب و انا ركبت فوق ظهرها بقيت مضاربة مع الشرجم باش نوصلو و فهاد اللحظة جاو البوليس بقاو كيدقو فالباب و يضربوه، انا مع الخلعة هبطت دغية من الشرجم جيت طايحة على مؤخرتي تقصحت بزاف، نضت يلاه بغيت نمشي و هو يشدني شي حد من كتفي: فين غادية الالة
الظابط الصارم و الجريئة الجزء الرابع
محتوى القصة
التنقل بين الأجزاء