العشية تجمعو العائلة فالصالون و هبطت نقوليهم الخبر الي غدي يفرحهم، جلسو عمرو اتاي و انا نهدر: بابا ماما انا تعرفت على واحد السيد الله يعمرها دار و هو قالي باغي يتعرف عليكم
ماما: و فين تلاقيتي معاه؟
صوفيا: صراحة تلاقينا عن طريق الفيس تعرفنا على بعضياتنا و هو قالي ناوي المعقول و انا صراحة عاجبني
ماما: بنتي علاقات الفيسبوك مكيصدقوش شكون قالك بلي دكشي الي كيقول حقيقي و بلي صريح معك
صوفيا: لا حسن ماشي من داك النوع هو إنسان صادق و اصلا باينة
ماما: اممم ما عرفت شنو قلتي الحاج
بابا: انا معندي منقول إلا كنتي نتي شايفاه مزيان و تقة مرحبا بيه نتعرفو بعدا عليه و نقرروا
ماما: وحتى هذا نظر، يلاه عيطي ليه غدا يتعشا معانا
صوفيا: اوك، تعشينا و طلعت صونيت لحسن قلتها ليه و جلست كنصبغ فظفاري و دايرة الكيت، شوية صونات ليا احسان: الو
صوفيا: سوري بيب كنت دايرة الكيت صفا عليكم شهاد الغبورات، كاع ما بقيتوا جيتو عندي من داك النهار
سارة: ختي إلا المجية عندك خاصها بزاف ديال التخطيط و المجهودات الجسدية واش مزال هاد العقوبة ما غتساليش
صوفيا: قريب احبيباتي
إحسان : اممم عرفت هديك النظرة الشريرة ديال اش، ههه باينة شي خطة جديدة
صوفيا: نتي إلي كتفهميني الحب
سارة: ههه عاودي شنو كاين فداك الرأس
عاودت ليهم كلشي من طقطق حتى السلام عليكم، احسان: ختي الزواج ماشي ساهل راه شي حاجة كبيرة هداك
صوفيا: حتى نتي جمافو
سارة: و علاش حسن بالضبط؟
صوفيا: حيت هو الوحيد إلي كنعرف احسن ما يوحلو فيا شي لصقة ما عارفة عليه والو
إحسان: و برايك حسن يستاهل تلعبي عليه هاد اللعبة
صوفيا: مكيستاهلش مي ما فيها باس إلا ضحيت بيه حتى هو مع الوقت غدي ينسى
سارة: و شنو هي هاد الخطة الي غدي تطلقي بيها معاه
صوفيا: حتى نتزوجو بعدا ديك الساعة نشوف كيفاش نطلقو
سارة: ايوا إلا كان هكاك مبروك ما درتي ههه
صوفيا: الله يبارك فيك بيب ههه
احسان: يلاه نمشو حنا تعطل الوقت؛ باش مكان ردي علينا اوك بيب
صوفيا: وخا تصبحو على خير
مشاو البنات و كملت انا سهرتي نعست مع 4
فالصباح جا صلاح للكوميسارية، دخل عندو حميد: سيدي جاتنا اخبارية بلي الليلة كاينة صفقة مخدرات كبيرة و بحال والو يظهر فيها البوس براسو حيت كاينين فيها أجانب
صلاح: يعني صفقة حشيش هدي حيت الأجانب كياخدو غير الحشيش من المغرب
حميد: يمكن
صلاح: هاد المرة خاصنا نكونو حذرين بزاف شوف بغيتك تختار رجال قد المسؤولية و وجدو راسكم اشمن ساعة بعدا؟
حميد: تقريبا مع 9 ديال الليل فالغابة
صلاح: تأكد من المعلومات مزيان و وجد الشباب و بغيت كلشي يكون هو هداك
حميد: كون هاني الشاف
صلاح فخاطرو: الليلة بيا و لا بيك السي البوس قريب نكشفك
فيقاتني ماما بزز اليوم، لبست لباسي و خرجنا للسوق، تقدينا لي خاص و شرات ليا قفطان فالكرونة من الفوق فيه العقيق و تحت ستان، مشينا للبيوتي سونتر درت سوات فيزاج و بوكليت شعري: ماما لاش هدشي كامل ماشي خطبة غير عشا عادي
ماما: بغيتك تباني زوينة الليلة شنو فيها
صوفيا: علاش انا ما زويناش؟
ماما: لا زوينة، غير الليلة خاصة و راه زمانك هداك ماشي اي واحد
صوفيا فخاطرها( و ما اقصره زمان)
رجعنا للدار بداو هما بتحضيرات العشا و انا طلعت لبيتي درت مكياج خفيف لبست قفطاني وصلت 8 صونيت لحسن مي مكيجاوبش، صونيت شي 10 الخطرات والو اوف فين مشا هدا مالو مكيجاوب، هبطت التحت نطل على دكشي، وصلت 9 و هي تقولي ماما: بنتي اتصلي بالسيد
صوفيا: اتصلت بيه شحال مكيجاوبش
ماما: و راه كلشي واجد كنتسناوه غير هو
صوفيا: انا نسيفط ليه مساج
البوليس متخبية فالغابة كيتسناو إشارة من صلاح، كلشي مترقب البوس الي حيرهم كاملين بهويتو، شوية بداو طوموبيلات كحلين كيجو مي مع الظلام مكايبانوش الوجوه، بقاو مراقبينهم حتى جاو الأجانب و بدأت الصفقة
صلاح: خليو ليا البوس يلاه عند اشارتي
البوليس: وي الشاف
صلاح: دبا!!! البوليس سلمو نفسكم
العصابات جبدو اسلحتهم و بدات المواجهة مع البوليس، البوس شاف القضية ما مسلكاش جروه رجالو و هربو لللوطو، شافهم صلاح عرف بلي هداك هو البوس و تبعهم: وقفو!!! ضرب واحد فرجلو و بقا تابع التانيين، قرب ليهم و هو يبان ليه البوس، ضرب الي معاه بقرطاسة و بقا غير البوس، جا صلاح بغا يشدو، و هو يضربو بقرطاسة طلع للوطو: زيد تحرك!!!
الشيفور: و التانيين البوس؟
البوس: هدوك ماتوا تحرك
الشيفور: ياكما وقع ليك والو؟!!
البوس: لا مي شافني الكوميسير، خاصنا نخرجو من هاد البلاد، تفو خسرو عليا الصفقة اوف إلا ما ماتش غدي نرجع نقتلو بايدي
الشيفور: و دبا فين غدي نمشو؟!!
البوس: المخبأ السري ديالنا من بعد نشوف شي حل
حميد جا كيجري عند صلاح: الشاف نتا بخير؟
صلاح: انا بخير غير ضربة فالكتف
حميد: نزفتي بزاف، يلاه نمشو
صلاح: شوية كنت غدي نشدو احميد، ولد الحرام هرب، شنو درتو مع الآخرين
حميد: شي شديناه و شي هرب، مي ماشي وقتو دبا خاصنا ندوك للمستعجلات، سيدي حتى سعيد تضرب
صراح: ياك ماشي شي حاجة خطيرة؟
حميد: ايوا خطيرة شوية، يلاه سند عليا
صلاح: لا قادر نوض رأسي
ناض صلاح و ايدو عامرة دم، طلعو اللوطو و مشاو للمستعجلات، حيدو ليه الرصاصة، و ضمدو ليه الجرحة، شد الجاكيط ديالو لبسها و ناض
الطبيب: سي صلاح فين غادي، خاصك ترتاح نزفتي بزاف ديال الدم
مروان: ههه باينة فيه آخر لحظة تراجع حيت كان غدي يرتكب غلطة حياتو
ايناس: هههه والله إلا ههه
بابا: واش صونيت ليه ابنتي
صوفيا: صونيت ليه شي 30 مرة و فالاخر طفا التلفون
مروان: ههه قلتها ليه ما بقاش باغي يتزوج دار بناقص، العريس هرب العريس هرب ههه
صوفيا: بابا هدر مع ولدك انا خايفة على السيد لا يكون مات و لا وقعت ليه شي حاجة خايبة و هو جالس كيتفلى
بابا: اه البنت عندها الحق هدشي كيخلع
ماما: نوضو تركدو و كان طيبنا العشا هكاك، هاد الخير شكون غدي ياكلو دبا
ايناس: خالتي نتعشاو حنا و الباقي نعطوه لعائلة سي علي
ماما: اممم فكرة مزيانة، يلاه تعشاو
بابا: يلاه ابنتي تاكلي يكون خير انشاء الله
صوفيا: معندو فين يدوز غير بصحتكم انا نطلع لبيتي؛ طلعت لبيتي و سديت الباب حيدت لباسي بالاعصاب الي فيا خسرت العقيق الي كان فالقفطان، مسحت وجهي حتى ولا احمر و لبست بيجامة، شديت التلفون و بقيت جالسة نتسنا مكالمة من حسن، خفت عليه بزاف
صبح الحال فقت اليوم مع 10 لأول مرة، لقيت لايغيكل جاتني، درت الويز غسلت وجهي و هبطت لقيت ايناس و ماما كيفطرو: صباح الخير
ماما: بسم الله الرحمان الرحيم، واش هدي صوفيا الي واقفة قدامي اايناس
إيناس: اه اخالتي حتى انا ما متيقاش
ماما ناضت من بلاصتها و قاصت جبهتي بايدها: ياك ما مريضة ابنتي
صوفيا: و باز ليكم زدتو فيه، و إلا فقت بكري شنو فيها؟
ماما: والو ابنتي غير ماشي من عوايدك
جلست معاهم و بديت نفطر
ماما: بنتي مزال ما جاوبكش حسن
صوفيا بحزن: لا، حتى نتي إلا وقعت ليه شي حاجة كنت غدي نعلم
ماما: ايوا مالو ما جا؟
صوفيا: شعرفني بحالي بحالك، طافي تلفونو
ماما: اممم هدشي حيرني ما علينا انا و إيناس غاديين عند ختها بنتها مريضة
صوفيا: ماما ممكن نخرج حاسة بالخنقة
ماما: لا هدرنا اصوفيا
صوفيا: و إلا امتى غدي نبقى محبوسة؟!
ماما: حتى نبغي انا
صوفيا: انا عييت كرهتوني فحياتي!!!! طلعت للبيت و زدحت الباب، تلاحيت فوق الناموسية و بقيت كنبكي عارفة ماما راسها قاصح و مغديش تبغي وخا نطلب فيها، مي ماشي انا الي نستسلم بسهولة
صلاح جالس فبيروه كيتحرى على البوس الي طول الوقت شاغل تفكيرو: عندو غير 28 عام و أسس مافيا كبيرة فهاد السن الصغير، ههه و الي كيضحك هو الشهادات الي عندو، شهادة فالكيمياء، و الاقتصاد و المحاسبة اممم مجتهد زعمة
حميد: و ذكي قدر يلعب علينا هاد المدة كاملة 9 سنين و هو كيخطط و يعقد الصفقات و حتى حد ما عاق بيه
صلاح: خاصنا نلقاوه مكيهمونيش النتائج
حميد: حنا كنديرو أكثر من جهدنا الشاف، و انشاء الله نشدوه
وصلت العشية و ماما مزال ما جات، اتصلت باحسان: الو إحسان ختي انا بغيت نخرج قنطت من الدار جيبي سارة وقفي ورا الفيلا ديالنا و انا نهبط عندكم من البالكون
احسان: اوك كاينة واحد الحفلة دايراها مونيا فالفيلا ديالهم و عيطت ليا انا و سارة مكناش غدي نمشو حيت نتي ما معاناش
صوفيا: اوك نمشو ليها العز بيب، يلاه واحد الساعة نقاد حالتي
إحسان: اوك تهلاي
قطعت معاها بقيت كنقلب فالبلاكار على شي حاجة نلبسها، بانت ليا كسوة فالتيركوا سميطات فوق الركبة شوية، درت مكياج سموكي طالون فالكحل، تقاديت مزيان سورت باب بيتي باش إلا طلع حد ما يدخلش للبيت، حيدت الطالون رميتو هو اللول، و هبطت، هزيت الطالون لبستو، بانت ليا اللوطو ديال إحسان واقفة، مشيت عندهم بالخف، و طلعت: هاي حبيباتي توحشتكم
احسان: حتا حنا الحب
سارة: هي العريس ما جاش البارح للعشا؟
صوفيا: وي الله يأخذ فيه الحق
سارة: مسكين ما تدعيش عليه لا تكون وقعت ليه شي حاجة
صوفيا: ما واقع ليه والو، اوف بدلو الموضوع انا بغيت الليلة ننشط و ننسى العالم
احسان: وي بيب هدشي إلي بغينا كاملين
سارة: إلى منزل مونيا!!!
صوفيا: هيا ههههه
طلقنا الموسيقى و بقينا كنشطحو و ناشطين، وصلنا لفيلا ديال مونيا و الموسيقى كتسمع من برا، دخلنا و كانت عامرة بزاف هل الي يشطح ها الي يضحك مع صحابو ها الي يعوم فالابيسين، عالام، شافتنا مونيا و جات سلمت علينا: هاي بنات صوفيا معكم
صوفيا: مونيا صفا؟
مونيا: صفا الزين
بقينا كنهدرو، مشات و حنا نضنا كنشطحو، نشطنا مزيان و تعرفنا على ناس جداد و طبعا شباب جداد، انا تعرفت على واحد سميتو انس، بقينا كنهدرو انا و اياه، شوية جا عندنا سيرفور مد ليا عصير و مع شحفت من الهدرة مع انس، شربتو فدقة و كملت جماعتي مع انس، شوية وليت كنحس بالدوخة و بقيت كنضحك بلا سبب، أنس شافني هكا قال هدي تسطات، مشا و خلاني، نضت كنتمايل و ما لقيت حتى حد و لا كيبانو الناس على جوج، بانت ليا إحسان جاية مخلوعة: صوفيا؟!!
صوفيا: ههه إحسان عندك توأم و لا شنو ههه كاع معرفتيني عليها ههه شنو سميتها
إحسان باستغراب: صوفيا شنو شربتي، ياك ما عطاوك مخدرات؟!!
بقات إحسان كتقنع فيا و انا حلفت لا خرجت، حتى كنسمعو البوليس جاو، إحسان ما عرفت واش تهرب و لا تبقى معايا، جرتني من باب الكوزينة و هو يحصلنا واحد البوليسي و شدنا بجوج
هزونا فالسطافيط، داونا للكوميسارية و دخلونا عند الكوميسير، اوف كان صلاح هدا ديما كنتلاقا معاه غير فالكوميسارية، وقفت قدامو و عطيتو التحية: حيو الكوميسير، أي أي كابتن
شاف فيا و ما استغربش: انسة صوفيا ياكما بغيتي نديرو ليك شهادة السكنة هنا
صوفيا: هههه فكرة زوينة
شاف فاحسان: واش تعاطات شي حاجة؟
إحسان: معرفتش لقيتها هكا
صلاح: اممم و نتوما شكنتو كديرو فهديك الحفلة
قاطعتو مونيا كتغوت: انا كنت دايرة حفلة محترمة، ما عرفتش فين جابو المخدرات والله ما عندي حتى علاقة عفاك ما تتاصلش ببابا هو مسافر!!!
صلاح: ياك لابأس شهاد الصداع
البوليسي: الشاف هدي هي الي مصدعة لينا راسنا بالغوات
شافت فيه مونيا: والله اشاف معنديش دخل بهدشي، شي وحدين جابو المخدرات بلا ما نعلم، اما انا درت حفلة محترمة،ها هوما قدامك سولهم
كلشي حرك راسو باه و بقاو يحلفو ليه
صلاح: صافي السكات، ناض من بلاصتو و تواجه معاهم كلشي غدي يدير كشف المخدرات بلا اعتراض،
رفعت أيدي: سيدي أريد التحدث
شاف فيا: نتي غير سكتي و نتي هي اللولة الي غدي ديري الكشف
قربت ليه و ضربتو لكتفو: احح عقد غوباشتو: راك قصحتيني الالة
صوفيا: ههه وايلي نتا قصحك صبعي الصغير الرقيق، براكة من التبوحيط
شدني من كتفي: وقفي مقادة و هدري مزيان
حسيت بالدوخة و بلا منشعر طحت عليه
فقت على أصوات كتردد فوذني، شوية سمعت صوت إحسان كتفيقني: صوفيا صوفيا فيقي عفاك متخلعينيش
فتحت عيني بصعوبة: فين انا؟!!
احسان: حنا فالسبيطار، الطبيب ها هو جاي غدي يشوفك
جيت باش نوض مي ضرني راسي: أي رأسي
احسان: غير نعسي اوف مشكلة دبا بالسيف باش اقنعت صلاح ما يقول والو لعائلاتنا
صوفيا: اممم فيا النعاس و حاسة بالتقية
احسان: صبري حبيبة ها هو الطبيب جاي
جا الطبيب فحصني و خرج، بقات معايا إحسان، انا مقديتش نزيد نحل عينيا، حسيت بالنعاس و نعست، شوية فيقاتني إحسان، كان الطبيب جا مرة أخرى و قال ليها بلي شربت مخدر و هو الي دار ليا هاد الحالة، دخل صلاح و سمع هدرة الطبيب، شاف فيا و هو يقول: على سلامتك صوفيا شوية دبا
صوتو كان حنين بزاف لأول مرة: اه شوية، شكرا حيت ما قلتيهاش لعائلتنا
صلاح: نتوما تتحملو مسؤوليتكم، عفاكم بعدو على المشاكل ما نبقاش نعاود
احسان: حنا كنا غير فحفلة عادية مكناش عارفين بلي كاينة مخدرات فيها
صلاح: ايوا انا علمتكم المهم على سلامتكم مرة أخرى اه و صوفيا المرة الجاية إلا عطاك شي حد شي حاجة تشربيها ما تاخديهاش منو اوك؟
صوفيا: اوك ميغسي
صلاح: اه بغيتكم دوزو عندي للكوميسارية باش تاخد اقوالكم
احسان: وخا الشاف
مشا صلاح و حنا مشينا جلسنا فشي اوطيل بينما يصبح الحال
صبح الحال فيقاتني إحسان بكري: نوضي اصاحبتي، خلينا نمشو للكوميسارية من بعد نوصلك لداركم
صوفيا: اجي بعدا فين مشات سارة؟
احسان: مشات للدار البارح قبل كاع ما يجو البوليس
صوفيا: بنت الحرام خلاتنا و مشات
احسان: و نتي عارفاها إلا خافت ما تعقل على حد، احم احم البارح صلاح هزك واحد الهزة ديال الأبطال ههه واو جيتو مواتيين مع بعضياتكم 😍😍
صوفيا: واش هو الي هزني؟
احسان: اه هو الالة و شحال كان مخلوع، مسكين كان مضروب فكتفو تحمل الألم على قبلك و نزف بزاف
صوفيا: شنو الي ضربو؟
احسان: على حسب ما عاود ليا حميد، رصاصة
صوفيا: اممم مسكين
هدرة إحسان حركت فيا شي حاجة، أو هدشي كامل وقع ابتسمت بوحدي، و هي تعيق بيا احسان: اوو مالك كضحكي بوحدك؟
صوفيا: اه لا والو يلاه نمشو للكوميسارية نعطو اقوالنا خليني نرجع للدار لا تعيق بيا ماما و نصدقو فشي طاب و شي ما طاب
مشينا للكوميسارية، دخلنا عند صلاح لقيناه كيهدر فالتلفون، أشار لينا باش نجلسو، جلسنا و انا بقيت كنتفرج فبيروه، ملفات أوراق مشتتين، شوية بانت ليا تصويرة مألوفة، هزيتها و انا نتصدم كانت تصويرة حسن، شنو جابها هنا
سالا صلاح المكالمة و هو يهدر: صوفيا واش كتعرفي هاد السيد؟
صوفيا: اه حسن مالو شنو دار؟!!
صلاح: فين كتعرفيه؟
صوفيا: هو غير صديق
إحسان: اه والله إلا هو شتي قلتها ليك من النهار الأول مرتحتش ليه سبحان الله
صلاح: هي نتوما دبا بجوجكم كتعرفوه
احسان: اه و لكن شنو دار؟
صلاح بعد صمت طويل: هدا رئيس المافيا ديال المخدرات
صوفيا و إحسان: شنو؟!!!
صلاح: اه و حنا دبا كنقلبو عليه، صوفيا واش هدر معك و قالك فين مشا
صوفيا: لا من اول بارح ما بقيتش شفتو و لا هدرت معاه حتى تلفونو طافي
صلاح: اممم، هي اختفى نهار العملية بالضبط، عارفة فين ساكن؟
صوفيا: لا ابدا واش نتا متاكد بلي هو الرئيس ما متيقاش يقدر يديرها
صلاح: اه متاكد، المهم نتوما سيرو ارتاحو و غدا غدي تجي عندي اصوفيا تعاودي ليا كلشي كتعرفيه عليه؛ أي حاجة تقدر تساعدنا
صوفيا: وخا
احسان: بسلامة يلاه اصوفيا
وصلتني إحسان للدار طلعت من البالكون و دخلت، بدلت لباسي و هبطت
هبطت لقيتهم كيفطرو: صباح الخير
ماما: على السلامة البارح ندقو و ندقو حتى عيينا مالك ما فتحتيش
صوفيا: كنت ناعسة
ماما: اممم ناعسة و لا ما بغياش تفتحي، حيدي منك هاد القاعدة صافي إلا ما درنا ليك دكشي الي بغيتي تقلقي و تسدي الباب؟
بابا: بنتي ما تبقايش تعاوديها راه كتخلعينا عليك
صوفيا: وخا ابابا
كملت الفطور و جلست فالجردة شديت كتاب و بقيت كنقرا فيه شافتني إيناس و تعجبت مشات عيطت لمروان و ماما و بقاو كيتفرجو فيا
مروان: ماما البنت ما بقاتش عاجباني او ولات كتفيق بكري و دبا شادة كتاب كتقرا فيه
ايناس: هدا سميتو الهدوء قبل العاصفة
ماما: اشمن عاصفة حتى نتي راه غير زيرتها و استسلمت دبا غدي تشد الطريق المستقيم، البنت خاصها غير الزيار
مروان: برافو ماما، يلاه ندخلو
اليوم قررت نقرا شي كتاب و نعيش لحظة هادئة لأول مرة فحياتي، حيت كل مرة نبغي نستمتع بوقتي كتوقع ليا مشكلة، وجد الغدا تغديت و جلست كنتفرج فشي فيلم من شحال هادي ما اتفرجت فالأفلام، شوية تفكرت بلي خاصني نمشي للكوميسارية كيما دار معايا صلاح، لبست سروال دجين و شوميز، جمعت شعري و مشيت عند ماما: ماما انا خارجة عندي غرض نقديه ضروري
الظابط الصارم و الجريئة الجزء السادس
محتوى القصة
التنقل بين الأجزاء