الظابط الصارم و الجريئة الجزء السابع

من تأليف Zaghma mayara
2018

محتوى القصة

رواية الظابط الصارم و الجريئة

دق دق 
صلاح: دخل 
صوفيا: سلام 
صلاح ناض من بلاصتو: اهلا صوفيا تفضلي 
او هدا مالو اول مرة كينوض من بلاصتو، و اول مرة يقولي تفضلي هه 
جلست و هو يقول: تشربي شي حاجة؟
قرصوني واقيلة كنحلم: اه لا شكرا 
صلاح: اوك، كيبقيتي شوية 
صوفيا: اه الحمدلله شكرا 
صلاح: مزيان، يلاه نبداو الخدمة، بغيتك تعاودي ليا ماشي بحالاش تعرفتي على حسن كيما مسمي راسو؟
عاودت ليه كلشي و هاد المرة كنت صريحة معاه 
صلاح: يعني هو كان غدي يخطبك كاع 
صوفيا: اه 
صلاح: هههه نتي زهرك غير فرجال المخدرات 
صوفيا: هوما الي تابعيني ماشي انا 😑
صلاح: المهم عاود ليا أكثر عليه 
صوفيا: هو اصلا مكيهدرش بزاف على حياتو الشخصية، الي عارفة عليه هو سميتو حسن عائلتو متوفية و هو اصلو من مكناس 
صلاح: اممم اصلا المعلومات الي عطاك خاطئة، هو سميتو جمال، المهم شكرا على المساعدة 
صوفيا: ماشي مشكل، هي نمشي دبا؟
صلاح: اه انا خارج اصلا يلاه نوصلك بعدا للباب 
صوفيا: اوك، خرجنا شوية وقفني صلاح: انا بغيت نقولك سمحيلي حيت ظنيتك معاهم 
صوفيا: ماشي مشكل اصلا نسيت، اه كي بقا كتفك بعدا؟
صلاح: اه شوية الحمد لله المهم تهلاي فراسك والا هدر معك حسن قوليها ليا باش نديرو لتلفونك جهاز تصنت 
صوفيا: اوك كون هاني، بسلامة 
صلاح: باي

رجعت للدار نيشان، لقيت بابا سلمت عليه و بقيت كنهدر معاه، درنا الكوتي، من بعد طلعت لبيتي هدرت مع البنات و جلست نتكونيكطا 
مدام سعاد عمرت اتاي و جلست حدا سي يوسف الي كان كيقرا فالجريدة: احم الحاج هاك كأس ديال اتاي 
سي يوسف: بسم الله 
سعاد: اليوم جات عندي صوفيا قالت ليك بغات تخرج قلت مع رأسي نخليها تمشي نشوفو فين غادية، و قلت لمحمد يتبعها بلا ما تعيق، عرفتي فين مشات؟
سي يوسف: فين؟!
سعاد: مشات اسيدي عند للكوميسارية 
سي يوسف: و علاش؟! ياكما دارت شي مونتيف اخر؟
سعاد: لا بالعكس مشات عند صلاح، و قالك محمد شافهم حدا الباب كيهدرو و هي كضحك ليه و هو كيضحك ليها، ههه بنتنا كتبغي صلاح و حتى هو كيبغيها و حنا كاع ما جايبين خبار
سي يوسف: وايلي، واش متأكدة من هدشي؟
سعاد: مليون فالمية، اصلا انا لاحظتها هاد الأيام غير كتخمم و هادية، الحمد لله لقات الي غدي يغيرها لأحسن انشاء الله 
سي يوسف: اه بصح و حتى صلاح شاب مزيان من عائلة محترمة و الله يعمرها دار 
سعاد: اه الحمد لله ايوا دبا سير هدر معاها نتا هو الي كتعاود ليك كلشي
سي يوسف: لا البنت غدي تحشم إلا هدرت معاها، هداك شغل العيالات 
سعاد: شنو؟! صوفيا تحشم؟! ههه هديك تخاف ما تحشم؛ انا مغديش تبغي تقولي سير نتا هدر معاها كتعرف ليها 
سي يوسف: امري لله فين هي دبا؟
سعاد: طلعت لبيتها 
ناض سي يوسف و طلع عند صوفيا، دق الباب و حلت ليه: بابا مالك؟
بابا: بغيت نهدر مع بنتي العزيزة من أب لبنتو 
صوفيا: ههه اوك تفضل

بابا: ايوا بنتي انا و إياك شحال هادي ما هدرنا، قليل فين نلقاوك مكتعطيناش وقت نتعرفو على حياتك الشخصية 
صوفيا: حيت نتوما عمركم سولتوني على حياتي، اصلا حياتي بنسبة ليكم تافهة 
بابا: ايوا بنتي حنا عشنا زمان و نتوما عايشين زمان اخر، هدشي إلي كنشوفو هاد الأيام معاجبناش الصراحة، ولا شي يتفلا على شي حتى حد مكيبغي من نيتو و الصداقة ما بقاتش كيما كانت ولا الغدر كتير و هدشي كيخلع، دكشي علاش ولينا كنخافو عليك بزاف 
صوفيا: عندك الحق فكلشي قلتيه إلا واحد الحاجة هي الصداقة بالعكس انا عندي صديقات بحال خواتات و أكثر 
بابا: اه سارة و إحسان صديقات مزيانات و لكن انا كنهدر بصفة عامة، و خصوصا من ناحية رجالات اليوم، قلال الي تلقايهم تقة اما الشي الآخر غير كيتفلا 
صوفيا: بابا ما تخافش عليا من هديك الناحية ماشي انا الي يلعب عليا ولد مرة 
بابا: اه و لكن ابنتي نتي مكاين حتى ولد الناس فحياتك، الي نتي باغياه و حاسة بلي تقة و تقدري تكملي معاه حياتك؟
صوفيا بعد صمت: اممم صراحة لا 
بابا باستغراب: لا؟!! واش متأكدة ابنتي؟
صوفيا: اه متأكدة ابابا 
بابا: او كيفاش زعمة؟ 
صوفيا: بابا واش هدرتي؟
بابا: لا المهم ابنتي إلي بغيت نقولك إلا كنتي معجبة بشي حد قوليها ليا ما تحشميش 
عنقتو: اوك كانت الهدرة معك مفيدة صراحة 
بابا: ايوا مزيان يلاه انا هبطت 
نمشو عند صلاح الي مبتسم بوحدو، دخل عليه حميد: اووو من شحال هدي ما شفت هاد الابتسامة، سيدي نطلبك طلب و مترفضوش 
صلاح: شناهوا؟
حميد: بقا ديما مبتسم و الله إلا كتجي معك الضحيكة 
صلاح: ههه و الله إلا نتا مصرفق احميد 
حميد: ههه قلت غير الحقيقة الشاف 
صلاح: كي بقا سعيد؟
حميد: خرج اليوم الحمد لله 
صلاح: مزيان على سلامتو
حميد: مي انا ما جيتش على هاد الموضوع 
صلاح: اممم قول شنو كاين 
حميد: ههه كيما قلت ليك اسيدي الضحيكة كتجي معك ههه كتجي زوين بزاف 
صلاح: حميد!!! 
حميد: ياسين خرج من البلاد مشا لسويسرا 
صلاح تعصب: هادي هي غدي نلقاه اسيدي غدي نجبدو من تحت الأرض كون هاني!!! 
حميد: دارها بيا هاد المرة اسيدي 
صلاح: مسكين دارها بيك، نتا ديما كيديروها بيك، واش منقدرش نعول عليكم شي حاجة ديروها ليا خرج احميد قبل ما ندير فيك شرع ايدي، حتى الابتسامة تبعتوني فيها ضروري تحرمو عليا النهار ياك؟!!

دازت أيام و انا غير الدار قرب عرس شيماء بنت عمتي، و ماما ديما كتمشي عندهم فالعشية تعاونهم، فهاد الفترة انا ولفت الجلسة فالدار ولات كتجيني عادي، جا نهار العرس، فيقاتني ماما بكري مشينا لحمام بلدي تحمحمنا مزيان و درنا سوان فيزاج و الخلطات، إيناس حتى هي مشات معانا من بعد مشينا للبيوتي سونتر انا درت مشطة ديال الحفلات و مكياج خفيف ركزت على عينيا، كملنا مع شي 2 مشينا للدار انا لبست قفطاني فالسومو( غدي نلوح ليكم التصويرة) درت الاكسسوارات ديالي، هزيت الكونطاكط مشات معايا ماما و بابا و إيناس مشات مع مروان، وصلنا للقاعة الي كانت عامرة بالناس هدو غير عائلاتنا خلي الي غدي يجي فالدفوع، انا حنوكي طابو بالسلام على العائلة و شي ناس معمري ما شفتهم صدقو من عائلتي، المهم كملنا السلام و جلسنا فالطبلة ديالنا: ماما انا نمشي نطلع عند شيماء 
ماما: وخا 
طلعت عندها لقيتها كدير اللمسات الأخيرة و بنات العائلة معاها، سلمت عليهم و جلست بقينا مجمعين و نضحكو، حتى كنسمعو عيساوة، هبطنا استقبلناهم بنت الحرام دبرت على التيتيز، دخلو و بداو الدقايقية و عيساوة، انا جاوني الهوايش بقيت كندردك و ماما كتغمزني ههه مديتهاش فيا، شاف فيا واحد الشاب جا مع الدفوع و حتى هو ناض كيدردك معايا ههه نوضناها و كلشي انضم لينا، حيحنا مزيان و جاو الفرقة المملة قالك الطرب الأندلسي، انا جاني الملل شوية هبطت العروسة و العريس بالزغاريد و الصلاة، نضنا كنتصورو معاهم، و كل ساعة كتبدل و حنا نتصوروا معاها، من بعد تعشينا البساطل و الشوا، كملنا بابا و مروان مشاو بحالهم و خلاونا حنا، لبست العروسة الكسوة البيضة و جابو الطارطة، قطعوها و ناضو كيرقصو على أنغام على بالي حبيبي ديال اليسا، انا بقيت غير كنشوف فيهم، ناضت ماما مع عمتي و العيالات الكبار، بقيت غير انا و إيناس الرأس فالراس، شوية جا هداك الي ناض يدردك معايا: سلام تسمحي ليا بهاد الرقصة امدموزيل 
صوفيا: اوك 
نضت معاه و بقينا كنتمايلو على ديك الموسيقى الهادية، شوية هدر: شنو سميتك بعدا 
صوفيا: سميتي صوفيا و انت؟
هو: حاتم 
صوفيا: متشرفين شنو كتجي للعريس؟
حاتم: خويا و نتي شنو كتجي العروسة 
صوفيا: بنت خالها، هي بنت عمتي 
حاتم: اممم مشرفين الالة 
صوفيا: كتعرف دردك ههه
حاتم: ههه اه صراحة انا كنت باغي غير الي يحفزني، قلت مع رأسي تبت احاتم الناس كلاس و هدشي ماشي ديالنا حتى نضتي نتي قلت مع رأسي الي ليها ليها 
صوفيا: ههه حتى نتا متسوقكش لبنادم دير بحالي 
حاتم: ههه دكشي الي كاين 
سالات الموسيقى، طليت نشوف الساعة بانت ليا 4: اوف 4 هه الوقت دازت دغية 
حاتم: اه واقيلة العرسان غدي يمشو دبا 
صوفيا: اه يمكن 
حاتم: مسخيتش بيك صراحة دخلتي لخاطري 
صوفيا: حتى نتا الحق يتقال
حاتم: ممكن تعطيني نمرتك نبقاو نتواصلو 
صوفيا: اممم اوك قيد عندك 
حاتم: يلاه بسلامة انا هو الشيفور ديال العرسان هه خاصني نمشي نفتح ليهم الباب 
صوفيا: وايلي داروك نتا الشيفور 
حاتم: شتي حاكرين عليا، مغديش توادعي مع بنت عمك
صوفيا: مكنحملش الدراما و الوداع
حاتم: ok a tout à l'heure 
صوفيا: بسلامة 
سالاو الوداع و حنا رجعنا بحالنا للدار بدلت لباسي مسحت الميكب و تلاحيت ننعس

الغد ليه فقت مع 3 ديال العشية، دوشت لبست كسوة صيفية قصيرة، هبطت تغديت: ماما انا خارجة 
ماما: فين غادة بالسلامة؟
صوفيا: درت مع البنات نتلاقا معاهم توحشتهم بزاف 
ماما: و لكن مع 9 ترجعي تزيدي عليها نتبعك فين مشيتي و نشوهك تماك 
صوفيا: اوف مشكلة معكم صافي 9 نكون هنا 
ركبت اللوطو و مشيت للكافي الي كنتلقا فيه مع البنات: هاي حبيباتي 
البنات: اهلين 
جلست و هما يبداو عليا بالاستجواب، عاودت ليهم التفاصيل و حتى على حاتم 
احسان: اوو ضحية جديدة ههه 😉
سارة: واقيلة، عندك تصويرتو 
صوفيا: نو حبيبة مي بلاتي نقلب على الفيس ديالو، درت سميتو فالفيس، لقيتو داير تصاورو وريتهم للبنات 
سارة: واو زوين بزاف 😍
احسان: بالعكس جاني زينو باسل 
سارة: تي سيري قالك زينو باسل
احسان: كلها و ذوق ديالو، ايوا فين نمشو دبا
صوفيا: صراحة تشهيت ندير شي مونتيف لشي حد، بغيت نحرم على شي حد نهارو
احسان: الله يستر خاصك تشوفي شي طبيب نفساني والله وليتي كتخلعيني 
صوفيا: ههه، بلاتي جاتني فكرة، الي بغا يتفرج يتبعني 
سارة: فين غادة اهديك المصيبة 
بان ليا واحد الراجل غادي مع مرتو و هي معنقاه، درت رأسي معصبة و جيت عندهم: ياك الكداب نتا مزوج و تفليتي عليا خديتي الي بغيتي ورميتيني، اهئ اهئ 
الراجل معرف فاش تبلى، و مرتو تعصبت و بقات تغوت عليه: ممكن تشرح ليا شنو هدشي انجيب؟!!! 
خليتهم مدابزين و هربت ههه مت بالضحك، شريتها ليه مع مرتو اليوم، رجعت عند البنات لقيتهم مصدومات شوية ناضو كيضحكو 
احسان: و ناري اصاحبتي حشومة عليك شنو دار ليك السيد
سارة: ناري مسكين تبلوكا ما حيتو لمرتو ما حيتو ليك نتيا رميتي عليه باطل و مسخوطة 
احسان: ههه شي نهار هدشي يرجع فيك 
صوفيا: ههه يلاه تكعدو ندورو و من بعد نمشو للسينما، راه 9 خاصني تكون فالدار 
احسان: اوك يلاه

كملنا دوران و دخلنا للسينما تفرجنا ففيلم، من بعد مشينا تعشينا فبيتزا هات، نضت باش نغسل ايديا و انا نحس بشي حد دوز ايدو على ظهري، جيت بغيت ندور و هو يبوسني صرفقتو: حمار كلب!!! كيفاش تجرأتي تقيسني الحيوان!! 
الشخص: مال الزين تعصب، شفتك عجبتيني 
صوفيا: واش السيبة هنا جمع راسك جيت باش نمشي و هو يشدني من دراعي: خلينا غير نهدرو بعدا، والله إلا حمقتيني من الساعة الي دخلتي للريسطو 
نترت أيدي منو: بعد مني ابنادم 
تلقا ليا و سد الباب و الله ما تخرجي حتى نقول دكشي الي بغيت 
صوفيا: عتقوني!!!!! 
دخلت بنت للطواليط: اشنو واقع هنا؟! 
خليتهم و خرجت، مشيت عندهم: يلاه البنات
سارة كتاكل: بلاتي نكمل ماكلتي 
صوفيا: صافي بقاو انا غادية 
احسان: مالك ياك لابأس؟
انا حسيت بالرعدة و نضت كنبكي: اهئ اهئ يلاه ااحسان 
شافني هداك و غمزني، خنزرت فيه و هي تعيق بيا إحسان: مالك؟ واش هداك قال لك شي حاجة؟! دوي اصوفيا 
حركت ليها رأسي باه: تحرش بيا الحيوان 
إحسان ناضت مشات عندو و انا كنجر فيها: ايه نتا شنو يسحاب ليك راسك عندنا السيبة هنا باش تحرش بصاحبتي 
الدري: اه تحرشت بيها حيت عجبتني و غدي نعاودها مرة أخرى نتي شحرق شطاطتك؟
إحسان: واش فايق على شنو كتقول؟
وقف تواجه معاها و ضحك ضحكة خبيثة: ياكما بغيتي حتى نتي تجربي بحالها 
إحسان صرفقاتو: حيوان!! 
الدري: غدي ندمك على هاد التصرفيقة غير بلاتي 
صوفيا: إحسان ما توسخيش ايدك فيه جريتها و خرجنا، بقينا واقفين كنهدرو: ناري على مريض موسخ تفو 
صوفيا: يلاه نمشو 
مشينا للبارك الي فيه اللوطو لقينا الزاج مكتوب ق***ات للح*** و رسائل تهديد حداها، شافتهم إحسان و تعصبت: تفو على تبرهيش كيداير
سارة ناضت كتبكي: اهئ اهئ يلاه خليونا نمشو دغية 
كان البارك خاوي شوية سمعنا الهدرة الخاسرة كتقال بالجهد، ركبنا اللوطو دغية، إحسان هي الي ساقت، شوية لقيتها مبارية اللوطو الكوميسارية شفت فيها باستغراب: حنا مغديش نسكتو هكاك غدي ناخدو حقنا، صلاح هو الي غدي يعاونا
صوفيا: واش تسطيتي يلاه نرجعو للدار اختي ما قادين على صداع حتى نتي تديها فبراهش مراض 
احسان: هاد البراهش يقدرو يدرو شي حاجة و باينة فيهم ناويين على اخزيت اصلا انا ما مشاورة معك نوضي دبا عاودي ليه كلشي يشوف لينا شي حل و عاودي ليه حتى على شنو دار ليك هداك الحمار 
صوفيا: اوف مشكلة

صلاح كان جالس فبيروه خدام على قضية، شوية تفكر صوفيا: امم شحال هدي ما بانت، وليت كنتوحش نشوفها، شكون كان يقول بلي حتى انا نولي نبغي شي وحدة و نسهر على قبلها، هههه دارتها بيك اصلاح، وليت كترطب فالهدرة و نتا صوتك كيخلع الدراري الصغار، بقا صلاح كيهدر مع رأسو حتى دخلت صوفيا غير شافها فرح مي ما بينش: ههه كون غير طلبت شي 100 مليار 
صوفيا: صلاح
صلاح: ياك لابأس شنو درتو عاود تاني؟
احسان: هاد المرة حنا الضحية 
صلاح: شنو وقع ليكم؟! 
إحسان كتغمزني باش نهدر، عاودت ليه كلشي بالتفصيل ما عدا فين تحرش بيا 
إحسان شافتني ما قلتها ليه و هي تغمزني: قوليها ليه اصاحبتي 
حركت ليها رأسي بلا 
شافنا كنتغامزو و نهدرو بشوية: مالكم كاين شي حاجة أخرى مقلتوهاش ليا 
إحسان: اه كاينة..
قرصتها: أي بعدي مني غدي نعاود ليه 
صلاح خنزر فيا: هدري ااحسان 
احسان عاودت ليه شنو دار انا مرضيتش 
صلاح تعصب: و لاش ساكتة حتى لدبا؟! 
صوفيا الصمت 
صلاح: معرفينش سميتو و لا حتى حاجة عليه؟
إحسان: لا، حنا مكنعرفوه إلا كنعرفو عليه هو انو حيوان مختل و معاه 2 آخرين 
صلاح: اممم و فين خليتوهم دبا؟
احسان: فبيتزا هات مي غيكونو مشاو 
صلاح: يلاه نمشو إلا لقيناهم مزيان إلا ملقيناهمش نسولو عليهم السيرفور تماك 
احسان: اوك 
خرجنا و هو يقول لينا نركبو معاه اللوطو، حتى حنا ما اعتارضناش، طلعو البنات اللور،. جيت بغيت نطلع حداهم و هي تنقز احسان: سيري طلعي القدام غدي تخلي السيد بحال الشيفور حشومة 
خنزرت فيها، شاف فيا صلاح: إحسان عندها الحق طلعي القدام 
طلعت حداه و مشينا للريسطو، لقيناهم مشاو، سول صلاح السيرفور عليهم قالو بلي كليان كيجو هنا بزاف عطاه سمياتهم و قالو بلي يمكن يكونو هنا غدا، رجعنا للكوميسارية 
صلاح: صافي نتوما دبا سيرو للدار ما تمشو هاك لا هاك و غدا اجيو عندي العشية 
إحسان: اوك شكرا بزاف 
صلاح: هدا واجب، صوفيا شفتك مهدرتيش و غير ساهية، متخافيش كلشي غدي يتحل 
صوفيا: اوك باي 
وصلتني إحسان للدار و لقيت ماما كتسناني: تعطلتي هدي 10 و انا درت معك 9 
صوفيا: سمحيلي آخر مرة، تصبحو على خير 
ماما: او البنت مالها

الغد ليه فالعشية طرقاتني إحسان و مشينا للكوميسارية: السلام 
صلاح: وعليكم السلام واجدات نمشو؟
احسان: اه واجدات 
ركبنا حنا فاللوطو و هو تبعنا بديالو، وصلنا للريسطو دخلنا فبلاصة، بقينا كنقلبو عليهم مي مكاينيش، سولنا السيرفور قالك مزال ماجاو، جلسنا فطبلة كنتسناوهم، صونا تلفون صلاح و خرج يجاوب عليه، شوية دخلو هدوك: إحسان ها هوما جاو 
احسان: اه هوما خاصنا نقولوها لصلاح 
صوفيا: فينهوا حتى هو غبر 
إحسان: بلاتي ها هو دبا يجي 
بقينا جالسين حتى شافنا هداك و جا عندنا: هاي الزوينات صدفة زوينة هدي 
مديناهاش فيه خليناه كيهدر بوحدو، و لصقة صافي جاو صحابو حتى هوما و بقاو كيزعجو فينا: فينك اصلاح 
جلسو حدانا بلا حشمة، غوتت عليهم إحسان: وا الهمج سير لبلاصتك لا نضرب خويا دبا 
عماد( هداك الي تحرش بيا): نتي مالك غير بوحدك تبتي حنا مكنعضوش، شفتكم كاع مطلبتو شي حاجة ما جاكم الجوع؟ 
إحسان: ما سوقكش فينا 
صوفيا: إحسان ختي ديري عقلك خلي البراهش يهدرو حتى يعياو 
عماد: حنا براهش الق*** 
تعصبت: جمع فمك لا نكسرو ليك 
عماد مد ليا فمو: ها كسريه إلا كنتي مرة 
قاطعنا صلاح: ايه نتا مالك على هاد البسالة شبغيتي فالبنات؟
عماد تلفت عندو: و شنو دخلك نتا فينا 
صلاح شنق عليه: زيد تحرك معايا اليوم نوريك كيفاش تعدى على بنات الناس الشماتة
عماد: ما غادي معك فين و دبا طلق مني؟
صلاح: و ايلا مطلقتش شنو غدي دير؟! 
ناضو صحاب بغاو يدابزو معاه، شد اللول لوا ليه ايدو من ورا ظهرو و ضرب راسو مع الطبلة، شد الآخرين شبعهم عصا و حتى حد ما دخل عرفوه بوليسي، دار ليهم المينوط و لاحهم فاللوطو: نتوما غير سيرو للدار انا نربي هاد الكلاب
احسان: شكرا بزاف

عماد: عفاك الشاف آخر مرة والله ما نبقاو نعاودو 
صلاح: وياكم و نسمع بلي تبسلتو عليهم مرة أخرى و الله حتى ندمكم 
عماد و صحابو: هادي و التوبة اشاف 
صلاح: يلاه تلاحو دبا 
هزو قلوعهم و خرجو
حميد: سيدي مالهم شنو دارو حتى ضربتيهم هاد الضرب كلو 
صلاح: الحمير يستاهلو، المهم جيب ليا الملف الي كنت خدام عليه البارح و شي قهوة كحلة
حميد: وخا الشاف
مشينا انا و إحسان عند سارة و جلسنا معاها شوية، عاودنا ليها كلشي يلاه ارتاحت: هي دبا معندنا مناش نخافو 
احسان: وي كوني هانية، صراحة صلاح وقف معانا شحال من مرة معمري ننسى خيرو 
سارة: اه فعلا، صوفيا مالك ساكتة؟
صوفيا: اممم اه والو غير جاني مساج من حاتم قالي نوجد رأسي غدا موجد ليا مفاجأة 
احسان: اممم مفاجأة و نتوما يلاه تعارفتو؟
صوفيا: خلينا نشوفو شنو موجد كاع، يلاه إحسان ختي وصليني 
إحسان: هه ما تبغيش ندورو شوية 
صوفيا: لا اختي انا وليت متبوعة على الخروج أو فين ما خرجت المشاكل تابعاني، خليني نجلس شي أيام فالدار 
سارة: وييه كلنا ماشي عبر نتي، اه البنات نسيت ما نقولكم حنا ماشيين ندوزو الصيف فاسبانيا نهار الاتنين عندنا الطيارة 
صوفيا: بصح؟ مزيان رحلة موفقة بيب 
احسان: حتى حنا بحال والو نمشو للشمال و نتي صوفيا ما مسافراش؟
صوفيا: والله ما عرفت نشوف العائلة الكريمة شنو مقررين، هي غدي تمشو، اوك نديرو الأحد نتلقاو ندوزو نهار كلو en semble 
احسان: اوك انشاء الله يلاه نوصلك 
وصلتني إحسان للدار لقيتهم مجمعين فالصالون سلمت عليهم و جلست

صوفيا: بابا واش حنا مغديش نسافرو؟ ياك سالا العرس شكنتسناو؟
بابا: لا مغديين فين حدنا مراكش ندوزو فيه شي سيمانة و نرجعو بحالنا 
صوفيا: و علاش؟
بابا: حيت انا و خوك خدامين 
صوفيا: اوف وانا من منحقيش نسافر 
ماما: دبا يجيك الي يديك فين ما بغيتي 
صوفيا: كيفاش زعمة؟ شكون هدا؟
ماما: ايوا هداك الي فبالك 😉
صوفيا: فبالي؟ ما فهمتش
ماما: صافي ما قلت والو، يلاه نوضو تعشاو 
الغد ليه فقت نفس الروتين غير الدار، فالعشية هدر معايا حاتم: الو صوفيا صفا؟
صوفيا: صفا الحمد لله و نتا؟
حاتم: انا بخير بغيت نقولك لبسي سروال دجين و شي جاكيط على حسب المفاجأة اليوم 
صوفيا( هدا مالو تسطى باش يدخل فلباسي) اوك باي 
قطعت معاه لبست دجين و تشيرت فوقو جاكيط ديال الكوير جمعت شعري كوب شوفال و هبطت قلتها لماما بالسيف خلاتني، خرجت و هو يبان ليا حاتم مسند على واحد السكوتر كبير سلم عليا بالابيز: كيجاتك المفاجأة؟
صوفيا: واو خطيرة 
حاتم جبد الكاسك لبسو ليا و طلع ركبت وراه شديت فيه، و انطلقنا طلق الموسيقى و تسارينا المدينة مزيان استمتعت بزاف شحال هدي ما ركبتو من ايامات أيوب( من صحابي القدماء) كملنا الجولة و وقفنا عند المطعم الياباني، خدينا السوشي و شبعنا ضحك، حاتم ضحوكي بزاف، عاود ليا على راسو و مغامراتو هو من النوع الي كيسافر بزاف، مزال كيقرا عامو الأخير فمدرسة الطيران، تعشينا و كملنا دوران، وصلني للدار و هو يهدر: ايوا كانت ليلة زوينة الصراحة نعاودوها مرة أخرى؟
صوفيا: اوك علاش لا يلاه تصبح على خير 
حاتم: و نتي من اهلو 
مشا حاتم و انا دخلت للدار نيشان لبيتي بدلت لباسي و نعست

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.