صوفيا : (كنغوت باعلا صوت ) بابااااااا هئ هئ هئ (بقا صلاح كيهدني تا خرج طبيب ) بابا كي بقا بابا
طبيب :للاسف باباك دخل فرحمة الله الله يصبركوم (ومشا)
صوفيا : بابا (دموعي حبسو ودني كيصفرو ) بابا لا ميمكنش (من بعد معقلت على والو حليت عيني على صوت لبكا كانت ماما ومروان ومعاهوم تا صارة واحسان كولشي كيبكي بقيت كنشوف فيهوم وساكتا )
بقيت كنشوف فيهوم كيفاش كيبكيو وانا بحالا جالسا فعالم اخور دازو ساعات وساعات مشينا لدار وناس شي غدي شي جاي ماما لابسا لبيض وانا غي جالسا كنشوف لي هدر معايا مكانجاوبوش غي كنشوف وحدايا سارة واحسان كيبكيو وكيصبروني دازت لكنازة ودازت سبعيام على موت بابا وانا مرفوعة خويا رجع لخدمتو صحاباتي رجعو لحياتهوم كيجيو مرا مرا وانا جالسا فبيتي او فجردة، جالسة فعالمي الخاص و فالليل كنحلم ببابا و نوض نبكي و نشهق حتى كيفيقو كاملين مخلوعين و يبقاو يهدنو فيا، دوزت أيام و انا فظلام، مكانكل مكنعس مزيان تمنيت الموت شحال من مرة، بابا كان كلشي بالنسبة ليا هو نور حياتي و دبا حاسة بلي هداك النور مشا، حاتم علم بالي وقع و جا كيعزي من داك النهار مشتوش، عكس صلاح الي كل نهار كيحيد ساعة من وقتو و يجي يطل علينا كبر فعيني بزاف و حسيت بقيمتو
دازت 4 أشهر و نص ماما حيدت البيض و رجعت الحياة كيما كانت بالنسبة ليهم اما انا مزال مصدومة و ممتيقاش بلي بابا مات، كنسمع صوتو فالدار كاملة و كنشوفو ديما قدامي بابتسامتو المألوفة الي كترد ليا الروح، واحد النهار كنت حابسة على راسي البيت كيما العادة حتى دخلت عندي إحسان و سارة، سلمو عليا و جلسو: صوفيا حبيبتي براكة عليك قهرتي راسك
انا جامدة مكنتحركش
سارة: اهئ اهئ هدري معانا عفاك توحشنا صوتك و هدرتك توحشنا بسالتك و ضحكك
صوفيا ( لا رد)
إحسان: نوضي نخرجو شوية يضرب فيك البرد
صوفيا: لا ما بغيتش
احسان: عفاك على خاطري عفاك
بعد صمت طويل انفجرت بالبكا: اهئ اهئ واش مكتفهموش لا هي لا اهئ اهئ بابا مات و حتى حاجة مكتهمني
إحسان بالغوات: باباك الله يرحمو دازت 5 اشهر على وفاتو دعي ليه بالرحمة و الغفران راه هدشي إلي كديري حرام ماماك محتاجاك جنبها حتى هي مخلوعة عليك
صوفيا: مقدرتش ننساه
سارة: حنا مقلناش ليك نسايه و لكن متقتليش راسك راه الموت علينا حق شوفي حالتك كي ولات صفرة و ضعيفة باباك ما يبغيش ليك هاد الحالة اصوفيا
عنقتهم و جلست كنبكي
احسان: بكي و فشي قلبك اللهم تبكي و لا تقتلي راسك
سارة: حنا معك احبيبة حتى تخطاي هاد الأزمة كوني قوية و خلي ايمانك كبير
مسحت دموعي و قررت نخرج من العزلة ديالي، هبطت عند ماما غير شافتني ناضت كتبكي عنقتها جابت دادا الماكلة و جلسنا كناكلو، حسيت شوية براحة هدرة البنات عاونتني فعلا خاصني نكون قوية على قبل ماما
الغد ليه جا المحامي باش يقسم دكشي الي عند بابا، المحامي: الله يرحمو مسكين و نعم الرجل، المهم انا جيت باش نهدرو على أملاك السي يوسف، السي يوسف كان عندو هاد الفيلا و شقة فمراكش زائد شي مكازات فدرب عمر و 20 مليون فالبنك
مروان: سي عبد الجليل، عفاك حنا ما بغيناش نهدرو فهاد الموضوع أملاك بابا ماشي ديال البيع غدي تبقى تحت اسمنا مغديش نقسمو حتى حاجة حنا واحد و غدي نبقاو واحد
المحامي: نتا كتعرف اولدي
ماما: مروان عندو الحق المرحوم كان باغينا ديما مجموعين و حنا غدي نبقاو مجموعين
المحامي: و انسة صوفيا شنو رايها فهاد الموضوع؟
مروان: كيفاش صوفيا؟ انا قلت ليك الي كاين و رأي صوفيا بحال رأينا
المحامي: انا من واجبي نسولها كتبقى من الورثة و هي ماشي قاصر
مروان: صوفيا تحت امرتي و كلامي هو الي غدي يمشي فهاد الدار هي معندهاش الحق تهدر و لا تعبر عن رأيها فحضوري
صوفيا: غير تهدن اخويا انا ما بغيت والو و ما كتهمني حتى حاجة فين ما كانت ماما انا معاها
المحامي: صافي يعني نخلي كلشي فبلاصتو المهم فرصة سعيدة تهلاو فراسكم
مشا المحامي و جا صلاح من وراه: السلام عليكم
ماما: وعليكم السلام اولدي مرحبا
مروان: اهلا بسي الكوميسير و غبرتي اصاحبي
صلاح: غير مع الوقت
صوفيا: انا غدي نطلع لبيتي
صلاح: صوفيا غير خليك بغيت نهدر معكم
كلشي شاف فيه: عارف ماشي الوقت المناسب و لكن، انا جاي طالب إيد صوفيا
كلشي تصدم و ماما فرحت: مرحبا اولدي و حتى حنا مغديش نلقاو احسن منك
انا غمزت ماما و ما داتهاش فيا
مروان: مرحبا خويا و لكن خاصنا نسولو صوفيا واش موافقة
صلاح: اه عارف دكشي علاش قلت ليها تجلس
ماما: صوفيا موافقة ياك ابنتي؟
كلشي تلفت عندي تحطيت فموقف صعب، و ما كان قدامي إلا نوافق: انا موافقة
ماما فرحت و صلاح حتى هو: و دبا انا غدي نجيب والديا السيمانة الجاية الخطبة
ماما: مرحبا اولدي بيكم كاملين
صلاح: الله يحفظك اخالتي، خليت ليكم الراحة
مشا صلاح و انا جلست حدا ماما: ماما حطيتوني فموقف خايب اضطريت نقبل
ماما: و علاش ابنتي صلاح راجل مزيان و محترم و طول هاد الفترة و هو معانا
صوفيا: اه و لكن تراب بابا مزال ما جفت و انا ما مستعداش
ماما: بنتي الله يرضي عليك انا لو ما كنت شايفاه مناسب ليك ما نوافقكش، خليني نطمئن عليك بلي نتي فأمان معاه حتى حد ما بقا ضامن راسو واش يعيش غدا، باباك كان بخير و غادي على رجليه حتى داه الله و انا الله أعلم امتى نتبعو
ماما: و إلا كنتي كتبغيني ديري دكشي الي قلت ليك انا شايفة الصح و باغية غير مصلحتك
صوفيا: امم وخا الله يكمل بالخير
الغد ليه جاو عندي البنات و عاودت ليهم شنو وقع و فرحو بزاف: و ها نتي صدق السيد حاط عليك العين مبروك عليكم
صوفيا: البنات انا ما بغيتش نتزوج راه غير على قبل ماما
احسان: والله يستر مالك ما بغيتيش؟ مغديش تلقاي احسن من صلاح هو الي
كيبغيك من نيتو و غدي يتهلا فيك
سارة: اه هو إنسان مزيان
صوفيا: شفت كلشي كيشكرو
إحسان: حيت رجولة ماشي بحال هدوك الي كنتي معاهم و وقف معاك فاصعب أيام حياتك ماشي بحال حاتم الي غير عزا نهار واحد و غبر و لا حسن إلي ما بقاش هدر معك و خلاك بلا وداع و زاد، هو عاونك حفظ أسرارك و كيبغيك بصدق و جا حتى لداركم و خطبك ماشي تلاقى بيك بالتخبية على والديك، انا كنصحك ما ضيعيهش من ايدك
سارة: اصلا سمعت بلي زواج كزوين، جربي شنو خاسرة يقدر يكون مغامرة جديدة
صوفيا: اممم ما عرفت
دازت سيمانة فالتحضيرات، مشيت مع ماما شرات ليا قفطان فالاخضر و القهوي، اليوم يوم الخطبة و الناس غدي يجو العشية نضت بكري داوني البنات للحمام التركي تحمحمنا درنا سونا و من بعد مشينا للبيوتي سونتر درت سوان فيزاج و قاديت حواجبي و سشورت شعري و طلقتو درت مكياج خفيف، تغدينا و رجعنا للدار لبست قفطاني لقيت ماما موجدة كلشي الحلويات العصير و البساطل و الشلايظ و الدجاج، بقيت جالسة فالبيت و معايا البنات كيطلو من البالكون، سارة: وصلو وصلو
طليت بان ليا صلاح و معاه مرة و راجل كبار شوية و جوج بنات زوينات وحدة دايرة نظاظر الشوف؛ و الأخرى هازة وليد زعير كيشبه لصلاح، و معاهم جوج عيلات و وشاب كان سايق بيهم هازين الورد ووالكادوات، استقبلتهم ماما و مروان و إيناس و دادا، دخلو جلسو شحال كيهدرو، طلعت عندي إيناس و هبطت انا و البنات عطاتني دادا صينية ديال اتاي هزيتها و دخلت و البنات ورايا، سلمت عليهم و جلست بين ماما و مامات صلاح سميتها جميلة، اسم على مسمى زعرة و عينيها خضرين و كتبان ظريفة بزاف الوقت كلها و هي كتشكر فيا و تمدح، شوية هدر باه: ايوا لالة سعاد، حنا جينا طالبين راغبين ايد بنتكم المصونة صوفيا لولدنا على سنة الله و رسوله
ماما: و حنا مغديش نلقاو احسن منكم فالنسب، الاولاد قابلين على بعضياتهم و حنا ما نزيدوهم غير الخير
خالتي جميلة: دكشي الي كاين حنا مكناش عارفين بلي ولدنا كان باغي شي بنت للزواج حتى قالها لينا نهار السبت الفايت و غير فالتلفون، صراحة فرحت بزاف حيت شحال هدي و انا نلح عليه يتزوج و الحمد لله لقاه الله ببنت الناس
ماما: الحمد لله حتى بنتي عارفة بلي مغديش يخصها خير معاه
مروان: ايوا نقراو الفاتحة
عمي ابراهيم: يا بسم الله، قراو الفاتحة و لبسني صلاح الخاتم، انا غير ساكتة و حادرة رأسي وخا مزال مترددة من هاد الخطوة، تعلات الزغاريد ووالتبريكات، تعشينا و مشاو الناس بحالهم بعدما وافقو على العقد و العرس فنفس النهار الشهر الجاي، علمت ماما العائلة و بقاو كيلوموها علاش ما قالتها، مشاو البنات و انا طلعت لبيتي بدلت لباسي و غسلت وجهي، شوية صونا التلفون معرفتش هاد النمرة، جاوبت لقيتو صلاح: صوفيا صفا؟
صوفيا: صفا الحمد لله
صلاح: شفتك ساكتة الليلة و حادرة راسك
صوفيا: شبغيتي نقول
صلاح: اممم زعمة حشمانة ههه
صوفيا: صلاح ممكن نتلقاو غدا بغيت نهدر معك اوك؟
صلاح: اوك غدا نتلقاو مع 5 فكافي ***
صوفيا: صافي مشات تصبح على خير
صلاح: و نتي من اهلو
قطعت معاه و نعست حيت عييت اليوم
عند صلاح:
قطع مع صوفيا و بقا ساهي حتى دخلت عليه ختو فدوى(مولات النظاظر هي الصغيرة عندها 20 عام كتقرا فالافاك دايرة الاقتصاد، طويلة و زوينة و هي القريبة لخوها) خويا كنت كتهدر مع حبيبة القلب😉 ياك؟
صلاح: سيري تنعسي افدوى هدشي كبير عليك
فدوى: ههه باينة بلي هدشي كبير عليك غير نتا، و ناري مكتعرفش تهدر مع البنات، قولها كليمة زوينة كون رومانسي ماشي بحال الكوميسير حسيتك كتهدر مع مجرمة ماشي خطيبتك مسكينة الله يكون فعوانها
صلاح: شفتك خرجو ليك الرجلين من الشواري، عارفة راسك شكتقولي
فدوى: كون لبق و لكن ماشي لدرجة التعناب؛ عارفة بلي نتا من داك النوع ديال الرجولة منذ الطفولة و لكن انا بنت و كل بنت كتبغي الراجل الي يقولها كلام زوين و رومانسي
صلاح: صراحة انا كنت باغي نقول ليها جيتي زوينة بزاف الليلة و لكن مقدرتش، اصلا بغيت نخلي افعالي هي الي تبين ليها ماشي غير الهدرة، حيت الهدرة كتبقى هدرة
فدوى: المهم غير الأسلوب شوية و صافي و حتى صوتك رققو شوية راك غدي تخلع البنت و تنفرها منك
صلاح ضرب فدوى بالوسادة: سيري العورة تنعسي راكي وليتي داسرة
فدوى: بزاف عليك انا البوعو
ضربها بالوسادة و هربت: نانا ما جاتش فيا ههه
الغد ليه فالعشية لبست كسوة حد الركبة معاها ميني بوط و مونطو مع كاين البرد، طلقت شعري، عطرت و هزيت الكونطاكط
وصلت للكافي الي اتافقنا عليها، لقيتو كيتسناني غير شافني غوبش: شنو هاد اللباس؟
صوفيا: مال لباسي؟ عادي
صلاح: لا ماشي عادي الكسوة قصيرة بزاف و رجليك باينين اصلا البرد كاين علاش متلبسي شي حاجة مستورة و دافية فنفس الوقت؟
صوفيا: هدا هو لباسي تعود عليه
صلاح: لا مغديش نتعود عليه مدام نتي فذمتي ودعي هاد اللباس
صوفيا: انا اصلا جاية باش نحط النقط على الحروف، انا عندي شروط
صلاح: بلاتي شنو بغيتي تشربي بعدا؟
صوفيا: كافي كريم
صلاح عيط السيرفور خدا لي كافي كريم و خدا لراسو كافي نواغ: و دبا شنو هوما هاد الشروط
صوفيا: أولا و قبل كل شيء حريتي مغديش تحرمني منها نلبس إلي بغيت ندير إلي بغيت و نمشي فين ما بغيت بلا اعتراض، تانيا انا كلمتي هي الي تمشي فالدار الي بغيتها تحضر بلا رفض و بلا تساؤل، نص خلصتك غدي تعطيها ليا ندير بيها إلي بغيت كل نهار فالعشية نخرجو ندور و نتعشاو برا بلا ما تنتظر مني تطيب ليك و لا نغسل لباسك حيت و بكل بساطة مكنعرفش، حياتي الشخصية مع صحاباتي و عائلتي مدخلش فيها، إلا وقع و تناقشنا و لا كاع دابزنا بشي حاجة نتا الي تجي و تعتذر مني وخا نكون مخطئة و انا عمري كنت مخطئة اصلا، أخيرا و ليس آخرا غدي تبقى تجيب ليا الورد كل صباح و تهلا فيا بالكلام الرومانسي و بغيتك تكون كلاس فكل anniversaire ديالنا غدي دير ليا مفاجأة و تجيب الكادو من الفوق، و عيد ميلادي دير ليا حفلة و نعيط فيها على الناس إلي بغيت، اه و كل صيف نسافرو لشي مدينة او دولة كاع، و بدل اللوطو ديالك معجبانيش، و بالنسبة للأولاد مغديش نولد على ربع سنين او حتى يقولها ليا رأسي
صلاح: ساليتي؟
صوفيا: oui c'est tout
صلاح: رديني حمار كاع و ركبي فوقي احسن
صوفيا: هادو هوما شروطي إلا قبلت بها و نعمة ما بغيتش الله يعاونا ويعاونك قبل ما نديرو فالطاجين ما يتحرق
صلاح عقد غوباشتو و بقا كيشوف فيا شحال، بعد صمت طويل نطق: و انا موافق الي بغيتي الالة
انا تصدمت، ما يمكنش يقبل: واش بصح قابل؟
صلاح: اه إلا جيتي تشوفي هدشي كلو الي قلتي من حقك اصلا انا ما باغيكش خدامة بغيتك مولات الدار المدام، و هدشي إلي طلبتي ما صعيبش عليا
بادلتو الابتسامة و كملنا هدرتنا، حتى جاه اتصال و مشا، حتى انا مشيت عند البنات
طول الطريق و انا كنفكر كيفاش قبل على شروطي؛ تقو الخطة ما نجحات، كنت باغية نعصبو باش يفسخ الخطوبة بالتي هي احسن و هكا نكون ما قلقت ماما، صدق السيد معندو سوق و دبا شنو يا ربي، وصلت عند إحسان لقيتها كتراجع: هاي بيب براكة من القراية يلاه نخرجو ندورو شوية
إحسان: الالة شبغيتيني سيري دوري مع خطيبك خليني نديها فقرايتي
صوفيا: خطيبي ما مساليش و زيدون انا بغيتكم نتوما تخرجو معايا
إحسان: اوف وخا نديرو ليك خاطرك
لبست إحسان و مشينا طرقنا سارة، مشينا للبحر درنا فالكورنيش و فالنواحي، تعشينا و كملنا دوران فاللوطو، وصلت البنات و رجعت بحالي للدار
و هكا دازت الأيام و انا مرة مرة كنخرج مع صلاح، و مرات مع البنات هو مخليني على خاطري، واحد العشية مشينا شرينا الخواتم، انا الي اخترتهم من الذهب و سامبل، ماما شرات ليا اللباس و الشوميز دو نوي بالتخبية و دارتهم فالفاليز بلا ما نعيق، كرينا القاعة بالتريتور و الفرقة و كلشي هو هداك،
صبح الصباح فقت غسلت وجهي و لبست سروال دجين و بودي جمعت شعري و هبطت، غير شافتني ماما و ناضت كتخاصم: اش هاد اللباس؟ سروال دجين و بودي و الليلة ليلة حنتك
صوفيا: شنو؟! ليلة حنا؟ لا انا ممحنياش و مكنحملش الحنة لاش غدي ديريها
ماما: ماما الله يجعل البركة درت العرس على قبلك اما كون جات عليا كاع ما نديرو و بابا مكاينش، فالله يخليك بلاش من الحنة
ماما: و هاد الناس الي عيطنا ليهم الليلة شنو نقول ليهم
صوفيا: ساهلة خليهم يجو ينشطو يضحكو ياكلو الي قسم الله و يمشو بحالهم
ماما: و لكن انا قلت ليهم غدي تحناي
صوفيا: ماما انا كيفاش غدي نتحنا و بابا مزال مكمل 6 أشهر باش توفى؟
ماما: الله يهديك ابنتي و صافي، وخا الي بغيتي غير دبا حيدي عليا هاد اللباس و لبسي شي جلابة راه شريتها ليك
صوفيا: انا هكا عاجبني لاش غدي نلبس جلابة؟
ماما حيدت الصندالة من رجلها و انا هربت: و الله يا مك ما تلبسيها يحتى نضربك بهاد الصندالة، ايوا مزيان تبارك الله البسالة ديال والو
طلعت لبيتي هزيت جلابة فالابيض زوينة، لبستها و هبطت، جاو العائلة بنات خالاتي و بنات عمتي و عمامي و إحسان و سارة، بقينا كنهدرو و نضحكو، سولني على عريس الغفلة قلت ليهم كولونيل، و إحسان و سارة كيضحكو، جات النكافة لبساتني اللبسة الخضرة و جاو اللعابات ناضت الحيحة و الشطيح و الرديح، انا هاد المرة ما نضتش حيت معنديش الخاطر، فرقو الحلوة و العصير، جات خالتي جميلة و البنات سلمى و فدوى، شافوني ما حنيت استغربو، قالت ليهم ماما مزال حازنة على باباها وتفهمو، جابو العشا تعشينا كملنا السهرة فالاخر فرقو الحنا وراق و الفنيد و الشكلاط و التمر معمر بالكركاع، وصلت 5 مشاو بحالهم بقاو معايا البنات، طلعنا لبيتي و نعسنا فبلاصة، هدي آخر ليلة ليا كعازبة، من الليلة غدي تسالي أيام المراهقة الحفلات المغامرات و السفريات فمجموعات و لا مع عائلة، غدي نولي مدام بنيس، نعست و انا متوترة من غدا
عند صلاح:
خدام على قضية جديدة و عندو عملية ورا العرس مباشرة، كيوجد خطة باش يقدر يشد بيها المافيا، شوية تفكر حسن و تهديدو
فلاش باك↔↔↔↔↔
قبل شهرين، كان صلاح يلاه خارج من دار صوفيا حتى جاه اتصال من رقم مجهول: الو؟
الشخص: الو سي الكوميسير شفتك غير غادي جاي على دار صوفيا
صلاح: شكون نتا؟! و بقا كيتلفت
الشخص: انا شخص قريب منها بزاف و كنبغيها كننصحك بعد عليها، انا غدي نديها معايا لبلاصة حتى حد ما يعرفها فيها، هي ديالي بوحدي
صلاح: واش حسن هدا؟!
الشخص: ههه تبارك الله عليك ذكي اه حسن إلي خربتي عليه العملية مي كون هاني غير سالي شي خدمة غدي نقتلك و ندي معايا صوفيا حبيبتي
صلاح: بعد من صوفيا و لا مغديش يعجبك حال، كتهددني أحسن و انا مخايفش منك و مغديش تقدر تاخد صوفيا محدي انا حي
قطع عليه و مشا للكوميسارية حط مراقبة سرية على دار صوفيا
قاطعت جميلة تفكيرو: ولدي مزال فايق؟ شكتكتب تماك
صلاح: ماما جيتو؟
جميلة: اه اولدي جينا
صلاح: ايوا كي داز دكشي؟
جميلة: مزيان غير هو صوفيا محناتش و قالت لينا ماماها مزال حازنة على المرحوم
صلاح: اه مزال متأثرة كانت قريبة منو بزاف، خليها على خاطرها
جميلة: غير نتا اولدي زربتي عليهم، خلي على الأقل دوز عام على وفاتو
جميلة: الي بغيتي اولدي احياني على العريس غدا عرسو و هو سهران على الخطط
صلاح: ههه ها هو ناعس، ناض باس راسها و ايديها تصبحي على خير
جميلة: الله يرضي عليك
الغد ليه هو اليوم الموعود، فقت انا و البنات فطرنا و مشينا للحمام العصري، تحمحنا درنا الخلطات و الماسكات، من بعد درت لاسيغ لداتي كاملة، لبست جلابة فالغوز و مشينا للقاعة فيها الفوق و التحت، الفوق كاينين بيوت، خليتهم كيقادو التحت و طلعت الفوق لواحد من البيوت جات عندي النكافة دارت ليا مشطة ديال العرايس و مكياج ثقيل شوية، لبست قفطان ابيض من الفوق ضيق و فيه المجوهرات و التحت ساتان عريض، درت الاكسسوارات، لبست الطالون، شوية جا الدفوع بعيساوة و الدقايقية، هبطو البنات و خلاوني غير انا و النكافة كدير ليا اللمسات الاخيرة، تفكرت بابا و نضت كنبكي و النكافة كتخاصم و تعاود فالمكياج، شوية طلع عندي صلاح لابس كوستيم فالكحل و مقاد الحالة، صراحة جا بوكوص: تبارك الله جيتي غزالة
بقيت حادرة رأسي و ساكتة، باس جبهتي و حط ايدي وسط ايدو، هبطنا بالزغاريد و الصلاة، عمرت القاعة و بداو العيساوة كيضربو نشطو الناس و البنات كيشطحو، ضحكتني إحسان مكتعرفش تشطح و لكن زعمت، جلسنا فبلاصتنا جا العدول، تكاتبنا لبسنا الخواتم، وكلني تمرة و شربني الحليب و انا بقيت كنشوف شوية غمزاتني ماما: بنتي ههه حتى نتي وكلي راجلك و شربيه
صراحة تلفت نسيتو ههه وكلتو تمرة و شربتو الحليب، سالينا واحد الشوية نضت لبست قفطان فالذهبي و زواقو فن، طلعت فوق العمارية و دوزت سبع لباسي كلهم قفاطين، من بعد تعشاو الناس و انا بقاو البنات كيتصورو معايا، شوية هدرت فوذن صلاح: انا راه قلت العائلة نتا كولونيل لربما يسولوك
صلاح جاوبني: مكاينش الكولونيل فالبوليس يا فهيمة، بقاي عرفي شكتقولي
وصلت وقت اللبسة البيضة، هي غوب بيضة طويلة بلا سميطات ضيقة من الفوق و منو تحت منفوخة، قطعنا الطارطة، قسمناها، سالات الحفلة و نضنا حنا غدي نمشو، توادعت مع ماما و خويا و البنات بالدموع الفراق صعيب بزاف، خسرت حالتي بالبكا، عائلة صلاح هديك الليلة شدو الطريق حيت فدوى عندها امتحان، ركبت مع صلاح اللوطو الي كانت مزوقة، الطريق كلها وانا نبكي و هو كيهدن فيا، شوية وقف حدا واحد العمارة: صلاح فين وقفنا؟ حنا خاصنا نمشو للاوطيل ياك اتافقنا على اوطيل سانك ايطوال
صلاح: و لاش غدي نمشو للاوطيل و البارطما خاوية
صوفيا: لا انا شرطت عليك من الأول نمشو للاوطيل ندوزو فيه 5 أيام بينما توجد الفيزا و نمشو لباريس
صلاح: للأسف حنا مغدي نمشو لا لاوطيل لا لباريس
صوفيا: و علاش؟!!
صلاح: حيت ما مساليش و زيدون لاش غدي نخسرو الفلوس على والو و حنا عندنا البارطما، من الاحسن ندشنوها
صوفيا: ندشنوها؟! مالي انا وليت حجر اساس باش تدشنها بيا؟
صلاح: نتي الأساس اعمري ماشي غير حجر
صوفيا: صلاح انا مكنضحكش، نتا واعدتيني الي بغيتها هي الي تكون، لاش كدبتي عليا
صلاح: ياك نتي الي قلتي بلي نتوما البوليس كدابين و منافقين و مكديروش بوعودكم ايوا ما كدبتي حبيبتي
تعصبت: فعلا ما كدبت و لكن هدشي مكيعطيكش الحق تكدب عليا لاش متزوجني إلا مكنتيش غدي تدير ليا دكشي الي بغيت!!!😡😠😠
صلاح: حيت كنبغيك tout simplement، و دبا يلاه احبيبة ندخلو لدارنا غدي تعجبك
الظابط الصارم و الجريئة الجزء الثامن
محتوى القصة
التنقل بين الأجزاء