الظابط الصارم و الجريئة الجزء التاسع

من تأليف Zaghma mayara
2018

محتوى القصة

رواية الظابط الصارم و الجريئة

دخلنا للدار و انا مرفوعة كاع ما كاينة فهاد العالم، شاف فيا صلاح: مرحبا بيك فدارك الجديدة 
انا خنزرت فيه😡😡😡: كداب 
صلاح: يلاه نوريك بيت النعاس 😉
صوفيا: لا غير خليني هنا غدي ننعس فالصالون 
صلاح: وعلاش؟! 😑 يلاه دخلي 
صوفيا: لا اهئ اهئ نتا كدبتي عليا قلت ليا غدي نعيشك اميرة و الي بغيتي نديرو ليك
صلاح: اه غدي نعيشك اميرة بطريقتي الخاصة و اشياء تافهة بحال هدي مخصهاش تقلقك 
صوفيا: هي بالنسبة ليك تافهة و لكن انا بغيتها حيت كبرت فيها 
صلاح: ايوا انا كبرت على حاجة أخرى و غدي نعلمك كيفاش تعيشي فيها 
صوفيا: ما بغيتش هاد الحياة
صلاح: مغديش يخصك معايا خير، يلاه ندخلو للبيت 
بعد صمت طويل فوضت أمري و دخلت، كان بيت سامبل فالبيض فيه بلاكار و كوافوز و ناموسية كبيرة الوسط، دخل صلاح يدوش، و انا حيدت الغوب دغية و لبست بيجامة طويلة ديال الدار و تكمشت الناموسية درت رأسي ناعسة، صلاح جاي معول مي انا غفلتو طل عليا باس حنكي و تخشى حدايا، فتحت عيني لقيتو محاوطني بايديه، او كاع ما دار حتى ردة فعل غريب، بقاو الأفكار كيدوني و يجيبوني حتى نعست 
الغد ليه فقت على ريحة الطياب، كانت 1 ديال النهار دخلت دوشت لبست بيجامة ديال الدار نشفت شعري جمعتو و خرجت لقيت صلاح طيب طاجين و شلاظة، شاف فيا ابتسم و مد ليا كأس ديال الليمون، شفت فيه باستغراب: كون كنا فالاوطيل كاع متحتاج تطيب، كو راك دبا جالس مرتاح و كتاكل أفخر الماكلة 
صلاح لا رد غير كيوجد فالطبلة، تبعتو: هدرت معك لاش مسرمكني؟
صلاح: شبغيتيني تقول انا مكنحملش ماكلة الزنقة، اصلا ما مزيناش، جاية نوبتك حتى نتي من غدا غدي تبداي توجدي الماكلة، غير اليوم خاص 
صوفيا: مكنعرفش نطيب و ما تحلمش نطيب ليك 
صلاح: ماشي مشكل نعلمك حتى تولي تعرفي الإنسان مخلقش متعلم
صوفيا: مالك على هاد الحالة ساهلة تجيب خدامة تدير الشغال و الطياب ياك نتا قلتي ليا انا واخدك مولات الدار ماشي خدامة 
صلاح: ياك قلت ليك ما تديش على هدرتي راه غير كدوب، و لكن ما كدبتش فواحد القضية و هي اني كنبغيك 
حطيت كأس العصير: و انا كنهرهك، مشيت لبيت النعاس سديتو و جلست بقيت كنفكر شنو ندير انا منقدرش نعيش هاد الحياة انا مموالفاش هكا، و المشكلة إلا جيت نمشي للدار غدي يهدرو فيا الناس و يقولو هدي عندها شي حاجة، دبا شنو يا ربي، بقيت كنهدر مع رأسي حتى دق الباب: صوفيا يلاه الغدا واجد 
صوفيا: ما واكلاش 
صلاح فتح الباب انا استغربت: كيفاش فتحتيه و انا سديتو 
صلاح: كنت عارف غدي ديري ليا بحال هكا و درت جوج نسخ من السوارت 
صوفيا: تبارك الله عليك ذكي بزاف يا ربي صبرني 
صلاح: زيدي تاكلي، من الصباح و انا نوجد و فالاخر ما تاكليش جرني من ايدي حاولت نقاومو مي كان مزير على ايدي: بعد مني إصلاح ايدي قصحتيني 
صلاح جلسني فالطبلة: نشركو الطعام 
بقيت كنشوف فيه و هو كياكل كاع محطيت ايدي فيه: كولي و لا نوكلك بزز 
هزيت كتافي، جر كرسيه حدايا و بقا كيوكلني بزز و انا كندفل الي حطها ففمي، شوية قرصني: أي 
صلاح حمر فيا عينيه: كولي 
صوفيا: كتقرص بحال العيالات 
صلاح: خفت إلا ضربتك يديوك فالارجونس 
صوفيا: و ضربني و شوف 
صلاح قرصني مرة اخرى: شغديري؟! 
صوفيا رجعت ليه القرصة 
صلاح: واش هدي قرصة و لا هرة ههه، جبتي ليا الهر 
صوفيا: اوف منك عطيني بالتيساع 
صلاح: والله ما تحركي حتى تأكلي 
فوضت أمري و كليت عارفة رأسي مغديش يخليني نتهنا، جمع هو الماعن دارهم فلاماشين و شعل التلفازة

صلاح: حبيبتي اجي تفرجي كاين واحد الفيلم غدي يعجبك
صوفيا: ما تقوليش حبيبتي!!! 😠😠
انا جالسة فالبيت كنصوني على ماما و هي كاع مكتجاوب، عاودت صونيت عاد باش جاوبت: ماما مالك مكتجاوبي 
ماما: صباح الخير بلالة العروسة، غير ما ساليت ابنتي اليوم عندنا خوالاتك و عماتك، ايوا كي صبحتي؟
صوفيا: ماما علاش ما جيتو عندي 
ماما: لاش غدي نجو عندك؟ صافي نتي وليتي مولات الدار نساينا و ديها فراجلك 
صوفيا: ماما انا توحشتكم 😢
ماما: ويلي على الحمقة، نتي يلاه ماشي 6 سوايع باش مشيتي من عندنا 
صوفيا: وخا، توحشتكم، ماما صلاح ما بغاش يديني لشهر العسل قالك ما مساليش 
ماما: بنتي هداك راجلك و دكشي بينكم نصيحة مني ما تعاوديش اخباركم على حد وخا انا؛ و إلا كان على السفر نتي مخليتي قنط ما مشيتي ليه و زيدون الراجل خدام
صوفيا: وخا هكاك كيبقى شهر العسل
ماما: شحال من حد ما دار شهر العسل، داروه فدارهم و داز ما احسنه، المهم ابنتي بلا ما نوصيك تهلاي فراجلك و فراسك، بسلامة 
صوفيا: الو ماما الو، اوف قطعت 
خرجت عند السي سيد لقيتو مركز مع الفيلم: هادا هو الفيلم الي غدي يعجبني الأكشن و القتل و الضريب؟
صلاح: و مالو ما زوينش؟
صوفيا: لا انا مكنتفرجش فهاد النوع
صلاح: و فاش كتفرجي؟
صوفيا: فكلشي ما عدا الأكشن 
صلاح: و مالك كتقوليها منفخة؟
صوفيا: شوف نتا 
صلاح: اممم اجي البارح نعستي، شنو رايك نديروها دبا 
صوفيا: لا و الله لا خليتك تقيصني 
صلاح: كيفاش؟! و علاش الالة ما منحقيش؟
صوفيا: لا ما منحقكش 
صلاح: دبا غتكوني غير متوترة، نخليك حتى تكوني مستعدة بشوية علينا الي زربو ماتو 
ما جاوبتوش، شديت التلفون و جلست نتكونيكطا و هو كيتفرج فالفيلم، فالعشية ناض جاب البتي بان و دار قهوة، حط دكشي فالطبلة و جا جرني من ايدي و جلسني بزز، انا غير كنشوف فيه، ما بقا كاع كيهدر غير يجرني و يجلسني، درنا الكوتي و جمع الطبلة، رجع عندي: انا غادي عندي عملية الليلة راه غدي نسد عليك الباب حتى نرجع 
صوفيا: و لاش غدي تسد عليا الباب؟
صلاح: هكاك بغيت نسدو 
صوفيا: مالي انا فالحبس باش تسدو؟
صلاح: اوف انا غدي نتعطل دكشي علاش، باس جبهتي: تهلاي فراسك كنبغيك 
دخل للبيت لبس سروال كحل و كوير كحلة هز شي أوراق سورت الباب و مشا، انا تعصبت نضت نستكشف البارطما، كانت عبارة على صالون و تلاتة البيوت و جوج دوشات واحد داخل فبيت النعاس و التاني برا البيوت كبار فيهم ناموسيات و الصالون كبير مفرش مزيان و فيه بلازما و شي ديكورات، الكولوار كان كبير فيه صالة مونجي قريب للكوزينة، و جزء منو فيه جوج فوتايات فين نجلسو، كملت الاستكشاف و هدرت مع البنات سولوني شنو وقع، قلت ليهم مزيان و قطعت تفرجت فالتلفزة قريت مجلة وصلت 10 و مزال ما جا صلاح

عند صلاح 
بعد ما وصل الكوميسارية لقا البوليس مستعدين و كيتسناوه: السلام الشباب 
البوليس عطاوه التحية: على السلامة الشاف و مبروك ما درتي 
صلاح: الله يبار... بلاتي بحالاش عرفتوها؟
حميد: قالتها لينا العصفورة، وخا حنا مقلقين منك حيت معيطتيش لينا الشاف 
صلاح: جا دكشي على غفلة 
حميد: إلا ولدت المدام شي وليد عندك ما تعيطش لينا فالسبوع 
صلاح: حميد ماشي وقتو دبا، يلاه خاصنا نتحركو، مشاو لبلاصة العملية، كلها شد بلاصتو كيما العادة و هاد المرة خطة غير، جات العصابة و اجتمعو افرادها كاملين؛ عطا صلاح الإشارة و لاحو عليهم قنابل مسيلة للدموع، غفلوهم و شدوهم كاملين و صادرو المخدرات، من بعد داوهم للكوميسارية و بدا التحقيق معاهم، نسا صلاح راسو حتى شاف الساعة لقاها 11: اوف تعطلت على صوفيا؛ حميد حبسهم فلاكاب غدا نكملو معاهم التحقيق
حميد: وي الشاف كون هاني غير سير عند المدام بلا ما تخليها تسناك 
صلاح خنزر فيه: حميد؟! 😠
مشا صلاح و خلاهم كيهدرو عليه: ههه شكون يقول الشاف يخلي التحقيق و يرجع للدار و هو كان غير يشدهم يبقا معاهم حتى يخرج منهم الهدرة وخا يدوز ليلة كاملة هنا 
سعيد: وييه اخويا حميد ولكن هداك وقت و هدا وقت الشاف مبقاش عزري 
شرا صلاح العشا و رجع للدار لقا صوفيا ناعسة فوق الفوتاي بقا كيتأمل ملامحها و هي ناعسة كتبان مسالمة، فيقها: صوفيا نوضي تعشاي 
صوفيا: اممم يلاه جيتي؟
صلاح: مكانش يسحاب ليا كتنعسي بكري 
صوفيا: حيت مليت حاسة رأسي فحبس، بدل دبا ما نكون فباريس 
صلاح: نوضي تعشاي و من بعد يحن الله 
نوضني حط دكشي فالطباسل تعشينا، غسلت ايديا و دخلت نيشان نعست، حتى هو غير جمع الطبلة و جا نعس

الغد ليه مشا صلاح للكوميسارية و خلاني انا جالسة فالدار ما بقيت فاهمة والو، من بعد صيفط ليا مساج ديري الغدا هانا جاي، انا ندير الغدا ههه مسطي هدا، والله ما طليت كاع على الكوزينة بقيت نتكونيكطا حتى جا: سلام 
صوفيا: وعليكم بمثله 
صلاح: شتك كاع مدرتي الغدا 
صوفيا: راه قلت ليك ما تحلمش نطيب ليك 
صلاح: و شكون الي غدي يوجدو؟ انا؟ الي يلاه جاي من الخدمة 
صوفيا: ايوا معندي مندير ليك 
صلاح يلاه زيدي معايا نعلمك كيفاش طيبي
صوفيا: و انا مبغيتش نتعلم
صلاح: صوفيا بلا ما تعصبيني زيدي قدامي 
جرني للكوزينة جبد الخضرة و بقا كيوري ليا انا كاع ممسوقاش، دار كراتان خضرة و البروشيط: و هل نتا كتعرف طيب لاش مصدعني انا؟
صلاح: بغيتك حتى نتي تعلمي ماشي غير انا الي نبقى نطيب نتي هي المرة ماشي انا 
صوفيا: اوف اصلا انا بيضة ما عمري قليتها فدارنا نجي نطيب هنا 
صلاح: داركم نسايها ما بقيتيش انسة وليتي مدام و عندك مسؤولية و دبا كملي غسلي الماعن و طرفي الكوزينة و لا حتى هدي نعلمها ليك 
انا ضربت رجلي مع الأرض: اوففففف 
طرفت الكوزينة و الماعن و نصهم كسرتو، دوش صلاح و جا يطل على الفران بقا كيطلع و يهبط فالكوزينة: أودي أودي نقيتيها بكري، البوطاكي كاع ما مسحتيه مزيان الزبل نصو فالارض و الماعن نصهم كسرتيه، اوف حيدي تعلمي ديري الحاجة مزيان 
صوفيا: سبحان الله معمري شفت نوعك
جمع الكوزينة من جديد دوز شيفون على الأرض و انا غير واقفة نتفرج فيه و نضحك، سالا وجد الغدا و جلسنا نتغداو ولد اللذين كيصرع الطياب، من بعد ما كملنا، عمر اتاي و جلس حدايا حيد التلفون من ايدي و هو يهدر: اليوم غير لينا بجوج، خلينا نتعرفو على بعضياتنا أكثر نفهمك و تفهميني 
بقيت كنتصنت ليه بتعجب: أهاه نهدرو انا اصلا عندي شلا ما يتقال

صوفيا: انا بغيت غير نعرف واش هدا وجهك و لا كفاك 
صلاح: شنو؟! 
صوفيا: حنا يلاه يومين باش تزوجنا و نتا رجعتي دغية للخدمة و حابس عليا انا هنا، واش انا نستاهل منك هاد المعاملة؟ حشومة عليك مكانش يسحاب ليا غدي دير ليا هكا، انا هاد العيشة ما صالحاش ليا 
صلاح: نتي فيك الفشوش بزاف و انا غدي نحيدو منك انشاء الله، إلا كنتي عشتي فبيئة أخرى هذا مكيعنيش متوالفيش بيئة جديدة، حتا انا عائلتي كانو مفششيني بزاف و الي بغيتها تحضر و لكن كبرت و كبرت مسؤوليتي و وعيي بالحياة، حياة ماشي كلها ملذات، انا كنت طالب لمدة خمس سنين و من بعد خدمت لمدة 9 سنين يعني 14 عام و انا بوحدي بعيد على عائلتي تعلمت فيها كيفاش نصرف باعتدال كيفاش نعتمد على راسي كيفاش نكون جدي و نخلي الضحك و اللعب فوقتو، و مع الوقت حتى مني غدي تولي ديري هدشي اما إلا خليتك على هواك عمرك تصلحي و فالاخر غدي تجيبيها فراسك اما انا ما خاسر والو 
صوفيا: انا ماشي بحالك نتا ذكر و انا انثى 
صلاح: ها نتي قلتيها انا ذكر و نتي انثى يعني نتي إلي خاصك ديري هاد المهام ماشي انا، انا عليا غير المصروف 
صوفيا: و لكن....
صلاح: صوفيا لو كنت مكنبغيكش كاع منتزوجك و انا عارف بلي نتي مكديري والو و مخسرينك بزاف يعني انا و نتي عمرنا نتفاهمو و لكن وخا هكاك غدي نصبر معك حتى تتعلمي كيفاش تعيشي بناءا على قوانيني، و دبا يلاه وجدي راسك ندورو شوي و نتعشاو برا عشاء رومنسي
صوفيا: ما بغيتش 😒
صلاح: و علاش ياك غير دبا قلتي بلي باغة تخرجي و بلي مليتي ها هي جاتك فرصة
صوفيا: ما بغيتش و صافي 
صلاح: اوك على خاطرك، وفرتي عليا ميزانية 
ناض و مشا للبيت الاخر، انا بقيت جالسة فالصالون كنحاول نستوعب هدرتو
فالعشية ما لقيت ما ندير قررت نخرج معاه احسن من الجلسة فالدار، لبست سروال فالحكل بوضي فالكحل و الغوز و فوقو مونطو كحل و بوط، درت مكياج خفيف و خرجت عندو، لقيتو كيكتب شي حاجة، وقفت على راسو: انا واجدة يلاه نخرجو 
شاف فيا و رجع لخدمتو 
صوفيا: معك كنهدر 
صلاح: اممم اوك بلاتي نلبس لباسي 
دخل للبيت لبس دجين بودي القهوي فوقو جاكيط ديال الدجين، خرجنا ركبنا اللوطو، ديمارا و شعل السجالة فيها الشعبي، بدلتها درت موسيقى غربية، خنزر فيا و رجع بلال 
صوفيا: حيد علينا هاد الشي، معجبنيش 
صلاح: ايوا انا عاجبني 
صوفيا: اوف، ضربت الطم و تكيت على زاج، شوية وصلنا البحر، تساريناه كامل و انا غير ساهية فالناس ها الي معنق حبيبتو ها الي يضحك مع صحابو، توحشت هاد الحياة، شاف فيا صلاح ساهية فيهم، عنقني بايد وحدة، حيدتها ليه و مشيت جلست فواحد الكراسة تماك، جا جلس حدايا، الوقت كاملة و حنا ساكتين، حتى ظلام الحال: يلاه نمشو للريسطو دبا 9 
مشيت معاه للوطو، وقفنا حدا مطاعم شعبية، شفت فيه باستغراب: فين حنا؟
صلاح ابتسم ليا: مفاجأة 
هبط و فتح ليا الباب: تفضلي احياتي 
دخلنا لواحد الريسطو شعبي، شافو واحد السيد: سي صلاح مرحبا فين هاد الغبورات 
صلاح: اهلا با ميلود، هادي المدام 
ميلود: اه هي تزوجتي الزغبي كاع معيطتيش لينا لعرسك وخا، مرحبا الالة

وصلنا للدار، دخلت للبيت هزيت دو بياس مشبك فالكحل سو سكسي، دخلت للطواليط دوشت لبستهم و درت شوية ديال المكياج، رشيت البارفان، و خرجت لقيتو متكي فالناموسية، غير شافني هتر، بقيت كنتعوج قدامو فالاخر تكيت حداه، جا بغا يقيصني حيدت ليه ايدو و درت ليه لا بصبعي 
صلاح: كيفاش زعمة؟
صوفيا: عيانة بغيت ننعس 
صلاح: و لاش لابسة هكا؟ 
صوفيا: جاني الصهد 
صلاح: صهد و حنا فشهر 1 و البرد 
صوفيا: ايوا انا جاني الصهد( انا كنقفقف بالبرد و لكن صبرت غير باش نربيه)
صلاح: صوفيا انا غدي نجيك نيشان، بغيت حقي صبرت عليك بزاف 
صوفيا: و باز حنا يلاه يومين باش تزوجنا، و وزيدون حتى نكون انا باغية يعني على خاطر خاطري( كنحلون فالهدرة) احح 
صلاح: شناهوا؟! 😡😡
صوفيا: و دبا طفي الضو حداك بغيت ننعس
صلاح: نوضي طفيه نتي نيت (و تكا 
نضت كنتمايل طفيتو و رجعت لبلاصتي 
صلاح: فراسك بلي الليلة غدي تبقى الملائكة
تلعنك 😑
صوفيا: و علاش؟
صلاح: حيت خليتي راجلك ينعس غضبان عليك، يا ويلك 
صوفيا: اممم تصبح على خير حبيبي 
الغد ليه فقت ناشطة، غسلت وجهي و خرجت لقيت صلاح جالس كيفطر: صباح الخير
صلاح: صباح الخير 
جلست كنفطر، ناض صلاح لبس جاكيطو و هز الكونطاكط: انا مشيت 
صوفيا: الله يعاونك 
فطرت بشوية عليا، جمعت الماعن درتهم فالماشين هدرت مع ماما و البنات، شوية صونا ليا صلاح: الو صوفيا انا غدي نتغدا مع واحد صاحبي بلا ما تسنايني 
صوفيا: شكون هاد صاحبك؟
صلاح: واحد مكتعرفيهش 
صوفيا: اوك باي، ههه بغا يرد ليا الصرف زعمة، نضت درت غوغل نقلب على شي اكلة ساهلة نديرها، لقيت الطورطية ديال البيض و بطاطا، قطعت بطاطا جلست فيها ساعتين قليتها خلطت معاها البيض المعدنوس و العطرية و حكيت عليها الفرماج من الفوق، كليتها، و درت فيلم نتفرج فيه

ما جا صلاح حتى العشية، دخل بدل لباسو توضأ و هو يشوف فيا: اجي نتي كاع ما شفتك صليتي لا اليوم لا البارح 
صوفيا: شكون قالها ليك غير نتا مكتردش البال( ناري على كذبة) 
صلاح بشك: المهم توضاي و يلاه نصلو المغرب جماعة 
صوفيا: معنديش باش نغطي رأسي 
صلاح: و باش كنتي كتصلي هاد يومين.
صوفيا عاد عقت براسي: لا غير هو انا..
صلاح: انا عارف بلي مكتصليش، و هدشي حرام، كاين واحد اللبسة ديال الصلاة فبلاكار واحد من البيوت ديال فدوى يمكن، هزيه و توضاي، كتعرفي توضاي؟
صوفيا: شهاد السؤال البليد؟ مالك بنت ليك كافرة؟ مقصرة اه و لكن ماشي لهاد الدرجة 😠
صلاح: انا غير سولتك بلا ما تعصبي 
دخلت للدوش توضيت، لبست هديك اللبسة فرش صلاح سجادة ليه و الأخرى ليا من وراه، كانت صلاة جهر، فالأول قرا السورة الهمزة، كملنا حيدت اللبسة و تواجهت معاه: اجي نتا كتمعني عليا و لا شنو؟
صلاح: كيفاش كنمعني عليك؟
صوفيا: ويل لكل همزة لمزة الذي جمع مالا و عدده ايحسب ان ماله اخلده كلا لا ينذرن فالحطمة" 
صلاح: هدي سورة فالقرآن كلام الله ماشي كلامي انا 
صوفيا: و لاش قاريها دبا بالضبط قاصد بيها شي حاجة عليا 
صلاح: نتي ديما كلشي عليك عليك و لا كيهدر عليك، الله يهديك هديك راه سورة قريتها فصلاتي ما قاصد بيها والو و إلا كنتي نتي باغياها تكون عليك معندك مشكل واه مالك كطيري من المقلة و نوضي تطيبي العشا 
صوفيا: بصفتك اش نطيب ليك العشا؟
صلاح: بصفتي راجلك 
صبعت ليه: ها هو راجلي 
صلاح تعصب و ناض ليا انا ضربتها بجرية حتى للبيت سديتو بالساروت، ناض كيدق: صوفيا حلي الباب و لا نكسرو ياك تصبعي ليا مزيان تبارك الله، صوفيا!!! حلي 
صوفيا: لا ما حالاش عارفك شنو غدي دير 
صلاح: مغدي ندير والو غير نهدر معك 
صوفيا: كداب نتا باغي تضربني 
صلاح: انا لاش مصدع رأسي بلاتي نجبد الساروت لآخر 
ناري كحالت عليا الليلة ياكلو عليا كسكسو 
شوية سمعت تلفونو صونا: الو حميد جا العميد؟ وخا ها انا جاي دبا؛ عندك الزهر اصوفيا و لكن بلاتي حتى نرجع و تشوفي 
تنفست الصعداء، و لكن مزال غدي نرجع شغدي ندير يا ربي، انا لساني كياكلني، صوفيا عرفي شكديري هدا ماشي ياسين الهبيل و لا حسن الهادي باش تلعبي عليه، هدا راه إلا شدك يكردك، حسيت بيه خرج، فتحت الباب و خرجت: شغدي ندير فكري اصوفيا، اه ندير العشا ربما يرطاب شوية، قلبت فغوغل على شي حاجة ساهلة نديرها، قلت ندير معكرونة، طحنت مطيشة فالخلاط و درتها طيب، درت المعكرونة تسلق، شلظت البصلة شي كبير شي صغير، درت معاها الكفتة، درت سلاد، وجد دكشي طرفت الكوزينة، ستفتو فالطبلة، لبست غوب دو نوي و جلست نتسناه

تفتح الباب جا داخل ناوي على اخزيت: اجي نتي مالك على هداك التبرهيش ديال قبيلة؟ 😡
زربت عليه: شوف شنو وجدت ليك 😅
صلاح شاف الطبلة و تعجب: شنو هدشي؟! و أخيرا تنازلتي و وجدتي شي حاجة 
بقيت كنتمسكن عليه: حبيبي سمحلي بزاف قبيلة كنت غير كنضحك معك و نتا فهمتيني غلط
صلاح طلع حاجبو( هدي ينفع معاها غير الترهيب): مزيان ايوا نذوقو طيابك كيداير 
صوفيا: اوك، حطيت ليه فطبسيلو و حطيت لراسي 
صلاح دار اللقمة ففمو: كح كح كح شهدشي كح كح كح 
صوفيا: بسم الله عليك هاك شرب الما 
خدا الما شربو: ناري شهدشي كترت البزار و الملحة، شم الماكلة: و ماطيشة خامرة و لا معرفت مالها 
صوفيا: بلاتي نذوق، خديت لقمة و يا ريتني ما خديتها، ناري شهدشي معرفت كيفاش نوصفو المهم ما فيه ما يتكال) مالو بنين؟
صلاح: واش كضحكي عليا؟ 
صوفيا: والله إلا بنين( يا ربي تسمحلي) 
صلاح: و إلا كان بنين كوليه كامل وعسك تخلي فيه شي حاجة، يلاه كولي 😬
صوفيا: لا انا اصلا شبعانة غير بغيت نونسك 
صلاح: لا حبيبة حشومة نعمة الله ضيع 😈 كوليها و لا تاكلي العصا اختاري وحدة فيهم 
بلعت ريقي: لا انا ناكولها دبا، بقيت كناكل دكشي على سعدي ووعدي، ما قديتش نكمل غير طبسيلي خلي الشي الآخر، كناكل و تبع الما لكل دغمة 
صلاح: خلي عليك دكشي، غدي يمرضك، المهم سيري ترتاحي انا نجمع هدشي 
صوفيا: واش بصح؟
صلاح شد ايديا: المهم هو المحاولة، بشوية بشوية تعلمي، وخا محروقة وخا مالحة وخا ما فيها ما يتاكل 
ابتسمت ليه: ههه وخا بلاتي نجمع معك هاد الروينة، جمعنا الماعن و طرفنا الكوزينة، شعل التلفزة و دار فيلم رومانسي، دازت لقطة فيها الأحباء كيتباوسو، شاف فيا صلاح: نديرو بحالهم؟ 😉
صوفيا: لا 
صلاح: انا كاع ما مشاور معك،
جا بغا يبوسني و انا نخوي بيه: صلاح انا مزال واخدة موقف منك 
صلاح: موقف ديال اش؟
صوفيا: نتا عارف ديال اش
صلاح: صوفيا نتي مرتي هدشي ما بقاش صالح ليا، حشومة هدشي إلي كديري 
صوفيا: انا ممستعداش 
صلاح: و نتي غدي تستعدي بالسلامة، اوف انا داخل ننعس 
دخل معصب و خلاني نتفقص

الغد ليه فقت، لقيت صلاح كيوجد الفطور: صباح الخير 
صلاح: صلي الصبح و اجي تفطري 
صوفيا: وخا، توضيت صليت و جلسنا كنفطرو فصمت، شوية نطق صلاح: وجدي راسك غدا غدي نمشو لقنيطرة
صوفيا: و علاش؟
صلاح: نتي الي قلت ليك تقولي ليا علاش، غدي نمشو نطلو على الواليد و الواليدة و تشوفي قنيطرة و نرجعو 
صوفيا: اوك 
صلاح: يلاه انا مشيت 
دوزت النهار عادي فالغدا درت سلاد ديال الخضرة و الروز و الطون، قليت بطاطا و البيض، المهم شي حاجة و صافي، جا صلاح تغدينا، رجع للخدمة و انا بقيت فالدار كيما العادة، اتاصلت بالبنات يجو عندي قالك قربو الامتحانات و هوما كيحفظو، صراحة مليت بزاف، فالليل جاتني فكرة، جمعت لباسي فالافاليز و كاع مسائلي خبيتهم تحت الناموسية، كتبت رسالة لصلاح، فيها صلاح انا و انت مستحيل نكونو فدار وحدة و انا مبغيتش هاد الحياة دكشي علاش قررت نمشي بحالي و مغديش نمشي عند عائلتي انا مسافرة لبلاصة ما يعرفني فيها حد تهلا فراسك كنتمنى تلقا بنت الناس الي طيب و تعجن و دير الشغال بسلامة 
حطيتها فوق الناموسية، تخبيت تحتها، شوية جا صلاح و بقا كيعيط بسميتي، دخل للبيت بان ليه البلاكار محلول و لباسي مكاينش 
صلاح: صوفيا!! هدي فين مشات، بقا كيقلب بحال الهبيل رجع للبيت و جلس كيصوني ليا و انا طايفاه،شاف الرسالة و جلس كيقراها كتب شي حاجة و حطها فوق الطبلة الي متقابلة معايا، بقيت حابسة الضحكة، شوية حيد لباسو و دخل دوش خرج برا جلس شحال ما عرفت فين غبر، او واش هدا مغديش يقلب، كنسمع التقرقيب فالكوزينة، شميت ريحة الطياب او السيد شكيدير، جاني الفضول طليت شوية بلا ما يشوفني لقيتو كيطيب، هدا كاع ممسوق ليا، جاتني البكية صراحة، شوية تفكرت بلي كتب شي حاجة مشيت هزيتها و تصدمت، لقيتو كاتب مكتعرفيش تخباي رجليك باينين من تحت الناموسية، ناري دارها بيا ولد اللذين، خرجت عندو غير شافني ناض كيضحك: ههه بغيتي ديريها بيا 
صوفيا: و ناري شحال فيك ديال قوة الملاحظة، هههه خطار صافي
صلاح: و باز ليك لهاد الدرجة جاك الملل 
صوفيا: قلت نضحك شوية، شنو كطيب؟
صلاح: لازانيا
صوفيا: اجي نتا فين تعلمتي تطيب؟
صلاح: الوقت علماتني؛ كتسحابيني بحالك
صوفيا: امم مزيان انا نمشي نرجع اللباس البلاكار و كان 
رجعت اللباس وجد العشا تعشينا و نضنا ننعسو، حيت غدا مسافرين بكري، لبست غوب دو نوي فالحمر، و تكيت ننعس 
صلاح: راك كتقلبي عليا 
صوفيا: ههه مالي شنو درت عوتاني؟
صلاح: لاش لابسة هاد العجب المعري 
صوفيا: والو قلت مع رأسي نلبسهم لا يديموداو حشومة يضيعو هكاك 
صلاح: ان لكيدهن عظيم 
صوفيا: هه تصبح على خير

الغد ليه فيقني صلاح مع 7 توضينا صلينا الصبح، لبست سروال دجين و شوميز فالبلو مارين فوقو مونطو ابيض و طالون فالبيض، ركبنا فاللوطو، و انطلقنا وصلت 9 وقفنا نفطرو، و كملنا الطريق، وصلنا مع 12، استقبلونا خالتي جميلة و عمي و البنات و راجل سلمى، سلمنا عليهم دخلنا، بقينا كنهدرو، من بعد تغدينا، كانو دايرين بسطيلة و اللحم، الرجال فبلاصة و العيالات فبلاصة،خالتي جميلة: بنتي نوضي لبيتكم ترتاحي 
صوفيا: وخا اخالتي 
وراتني فدوى البيت: هدا كان بيت صلاح ماما حتى لدبا محافظة عليه 
كان بيت زوين غالب عليه الأخضر و الكحل، فيه ناموسية بلاكار و بيرو و خزانة ديال الكتوب، بقيت كنقلب فيه حتى بان ليا كيتار، فهاد اللحظة دخل صلاح: هداك كان شراه ليا الواليد فين نجحت فالاعدادي، فرحت بيه بزاف 
صوفيا: كتعرف ليه؟
صلاح: معلوم، بغيتي نسمعك شي حاجة؟
صوفيا: اه 
خدا من عندي الكيتار و جلس حدايا، بقا كيعزف عليه، واو عزفو زوين، بقيت كنتصنط ليه عجبني بزاف، وقف العزف و حطو فبلاصتو: علاش ما بقيتي كتعزف عليه؟
صلاح: والو غير ما بقيتش ساليت، و لكن فين كنجي لهنا كنجبدو و نبقى نعزف عليه 
صوفيا: زوينة القنيطرة 
صلاح: بغيتي ندورك فيها العشية؟
صوفيا: وخا علاش لا 
خرج صلاح بدلت لباسي و تكيت ننعس واحد الساعة، فقت غسلت وجهي لبست لباسي، و خرجت عندهم لقيتهم حطو الكوتي، كلينا فجو عائلي زوين لا يخلو من الضحك، عائلة صلاح ظريفين بزاف و كيعرفو يضحكو، كتحس بالدفئ العائلي معاهم، كملنا الكوتي، و خرجنا انا و صلاح ندورو شوية فالمدينة، مشينا لبارك سكينة و البحر و تسارينا المدينة فاللوطو صلاح هو guide، من بعد تعشينا فريسطو على البحر، لأول مرة فالتاريخ صلاح يدير شي حاجة زوينة، فهاد النهار تقربنا بزاف من بعضياتنا، رجعنا للدار لقيناهم نعسو، تسلتنا للبيت بشوية، بدلت لباسي و تكيت ننعس
الغد ليه دوزناه فقصبة مهدية، فطرنا تماك و تغدينا، دوزت وقيت زوين مع فدوى، فالعشية رجعنا للدار دوشت و خرجت عند خالتي فالصالون بقات كتعاود ليا على حياتها و صلاح، شوية هي تعيط لفدوى: بنتي فدوى جيبي البوم تصاور نوروه لمرت خوك 
جابت فدوى الالبوم، بقات كتوريني تصاور العائلة و البنات محدهم صغار، شوية وراتني تصويرة مألوفة غير شفتها نضت كنضحك حيت معروف ما تبدل كاع، كان صلاح محدو صغير ويتك شحال فنيون و زعير، شوية وراتني تصويرة خريت بالضحك، كان عريان كامل كلشي باين و شاد فردي ديال الخشب و داير كسكيط: ههه بسلامتو من نهار الي حل عينيه على الدنيا و هو يحلم يكون بوليسي 
صوفيا: ههه هادي امتى شديتوها؟
جميلة: 1990 كانت عندو 5 سنين جيت بغيت ندوش ليه خلاني حتى حيدت لباسو كامل و هرب ليا جيت نشدو، هز فرديه و هددني بيه هه عيطت لباه يصورو هكا 
صوفيا: ههه صدق ما ساهلش 
جميلة: وييه، ايه نسيت الكميلة، تفرجي بينما نجي 
مشات خالتي للكوزينة و انا شديت التصويرة خبيتها فصاكي، ههه لربما نحتاجها فشي حاجة، وجد العشا تعشينا و كلها ناض لبيتو ينعس..

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.