مرت لحظات من الصمت مكتفين بتبادل النظرات لكن صدمة دون ماركيز كانت تقيلة على ديال جبل لأنه من الأول كان شاك فيه ، لكن لي صدمو كثر هو التهمة ديال روعة وفكر ... هاد البنت شنو مازالة مخبية تحت راسها من مصائب !!
تنهد عصام بتعب وقال:
-مكانش من السهل الحصول على المعلومات عليه ،... بمشقة الأنفس وحتى حطيت فالمقابل 5000 يورو عاد خديت هاد شوية ديال المعلومات والباقي الله أعلم .
هز جبل عينيه فعصام وقال بلهجة جليدية :
-غير هادشي كافي
ثم ناض من على الكرسي وكمل :
-فين هو دابا؟
رد عليه عصام وهو كايحط الملف فوق المكتب:
-إحتجزتو فالقبو لي تحت هذا .
مد جبل يديك كايعوط سمطة سروالو بخيلاء ثم خدا نفس وقال :
-إذن خلينا نديروليه شي زيارة قصيرة ونحطو النقط على الحروف مع المحقق ديالنا.
حرك رجليه باش يخرج من المكتب لكن إستوقفو الدون ماركيز وهو كايقول :
-والباقين شنو غانديرو معاهوم كانقصد دوك لبنات وداك الدكتور !!
وقف جبل ولتافت عند دون ماركيز بتثاقل وضيق عينيه بتفكير وشوية من الحيرة . ثم همهم وقال:
-هممم ... الدكتور ياسين ...قتارح عليه يخدم معانا وفالمقابل غادي طلع ليه هوية جديدة .... حنا محتاجين لشي دكتور ثقة اواحد بحال ياسين مقطع بيه لحبل وهارب من جريمة قتل ماغاديش يتردد فخدمتنا .
-واخا .
قالها الدون ماركيز ثم كمل:
- ودوك لبنات ؟
تنهد جبل وغمض عينيه بحيرة ثم قال:
-ماعرفتش !!...، تاليا تعلقات بيهوم وكانضن انها كاتحسبهوم صديقاتها ... يعني التخلص منهم فخطرة شوية صعيب ....
سكت شويا ثم كمل برزانة :
-اوكي... أسية عطيها شوية ديال لفلوس ومشيها من هنا
شاف فيه عصام وقال :
-وروعة ؟
إلتفت جبل شاف فعصام وقال بعدما إبتسم بمكر :
- الأنسة روعة .... عندي ليها صفقة إلا رفضتها غادي تكون غبية... وخصوصا وهي مبحوث عنها من طرف الشرطة وغريبة فهاد لبلاد وماعندها لا ورقة لا جوج .
إلتفت لعند دون ماركيز وكمل بعد صمت :
-عطيها حتى هي فلوس اداوود ،.... عطيها بززززاف ديال لفلوس ...، ولا نقولك ،... شريلها دار وطلع ليها هوية جديدة وإسم جديد ،... عاونها بكل الطرق حتى توقف على رجليها .... وفالمقابل غرقها فالديون ومضيها على مستندات بمبالغ خيالية لي ماتقدرش تخلصهوم على مئة عام .
عقد عصام حوابجو بإستنكار وقال:
-وعلاش زعما .... ؟
شاف فيه جبل بحدة وماجاوبوش ثم حرك رجليه و خرج من الغرفة ، فتبعوه عصام وداوود ... نغز الدون ماركيز عصام فجنبو وقال :
-شوف شغادي ندير ليه .
وكمل بصوت عالي باش يسمعو جبل :
- عصام يمكن داك لقليب لي حابسو جبل فداك القفص الصدري قرر يتحرك اخيرا ونبض لهاد البنت لي سميتها روعة . لكن بانلي انها غادي تعاني معاه مسكينة.
ابتسم عصام بسخرية ورد عليه :
-ااااه سعداتو .
ضحك داوود ورد عليه وهو كايغمز ليه بعينيه بمعنى "سمع وشوف" وكمل :
-اااااخ كون شفتيها يا صاحبي .... قصيرة وعندها لاطاي ديال كيم كارديشن وشعرها كحل وطوييل وعينيها عسلين كايدوخو ياصاحبي ، عرفتي فاش كاتوقف حداها كاتولي بحال شي طفلة صغيرة تشهى غير تهزها وتبوسها من دوك....
قبل مايكملها ضار عندو جبل وغوت:
-نتا فتي الحدود ديالك ،....
تنهد جبل فاش شافهوم حالين فمهوم فيه بصدمة وكمل وهو كايقول بغيظ:
-إلا كان كايحسابلك بهاد الهضرة غاتخليني نغير زعما كيف كايتصور داك لغرام دلعقل لي عندك فراك غالط .. اوكي ...، مانعاودش نسمعك كاتهضر على روعة بهاد الطريقة الوقحة ومانصحكش تحط عليها عينيك ،... حيت عندي معاها مصلحة ، وهاد الهضرة ليك حتى نتا اعصام.... البنت ضريفا ودغيا كادخل لخاطر ، ولكن إلا قرر فيكم شي واحد يدخلها فقلبو .
شاف فيهوم بغضب وكمل:
- غادي نطيرلكم داك القلب من جدر ونوكلو لكلابي
قلب الضورا ومشا بغضب وخلاهوم مصدومين من طريقة تهديداتو ليهم بجوج .
-كحلتيها
قالها عصام بسخرية فارد عليه دون ماركيز وهو كايقلد طريقة كلام جبل بشكل مضحك:
وقف دون ماركيز وضار عند عصام ثم قال وهو كايشوف فيه بتحدي:
-والله وعجباتني يا سي عصام ودخلتلي لقلبي يحتى نطيرها ليه ونخليه ينش دبان مورايا ، قال مصلحة قال ...!!
ضحك عصام بسخرية وقال بتسائل :
-اجي بعدا... علاش جاب سي جبل الطبيب لديك البنت هاد صبح واش مريضة؟
قلب دون ماركيز عينيه بملل وقال :
-قالك أسيدي تجرحات فجنبها ولا مانعرف طاحت فاش جات نازلا من اليخت ... أنا فاش شفتها قبل لفجر كانت بيخير اواقفا على رجليها واخا كان كايبان عليها صفرا ومريضا ... كيفاش وقاعلها حتى ضربات جنبها مع اليخت مانعرف؟
همهم عصام بتفهم وقال :
-هممم ... ايوا زيد راه كايتسنانا فلاسانسور شوف كيفاش كايشوف فينا بحالي كلينالو رزقو اربي سالامة
رد عليه دون ماركيز بسخرية وهو كايشوف فجبل :
-يتبقى ستر ، زيد قبل مايقلعليك قلبك من جدر راه مكايضحكش هاهاها
ضحك عصام بسخرية وتبع دون ماركيز للمصعد وهو كايحاول يتحكم فراسو .... نزل بيهوم المصعد للقبو الثاني وتفتح وسط عالم أخر ... مجموعة من الممرات مفرشة بزرابي على طول الممرات فاللون الأحمر وفكل ممر صف من الغرف لي كايسكنو فيهوم رجال جبل.
كان قرابة العشرين غرفة ونصفهم خاوي...وقفو بثلاثة بيهوم أمام باب غرفة فاللون الأبيض وقال جبل :
- حل الباب اعصام
تقدم عصام باش يحل لباب لكن الدون ماركيز وقفو وهو كايقول :
-بلاتي بعدا ... واعدني أنك ماغاديش تأديه .
شاف فيه جبل وإبتسم بمكر ثم شاف فيه بنظرة بريئة وقال :
-علاه واش حنا نقدرو نأديو الأبطال الخارقين ديال الشرطة الدولية ... ماتخافش غير غادي نسلم ونطبطب عليه شويا ...
رجع شاف فعصام وكمل بصوت حاد:
-عصام حل الباب .
تقدم عصام باش يحل الباب لكن مع الحلة نزلت عليه ضربة على راسو من حيث لا يحتسب حتى طاح للأرض وغوت .
بسرعة تدخل الدون ماركيز وشد مراد لي كان هاز فيديه رجل من كرسي خشبي هرسو فتنهد جبل بغضب وغوت :
-ياااااك اسي مراد
جمع جبل القبضة ديال يديه و عطاه ضربة قوية للمعدة خلاتو يغوت و يلوح العصا من يدو من شدة الألم ...
طلق منو دون ماركيز لي كان شادليه يديه من الخلف فطاح مراد على الأرض وشد فمعدتو بألم .
شعر جبل بالغدر والغضب فتقدم عند مراد وجمع معاه بركلة للوجه حتى طاح مراد وأغمى عليه لكن جبل مابرداتلوش وبدا كايركل فيه برجليه فينما جات الضربة وخعو كرشو صدرو ..ماطلقش منو حتى تدخل الدون ماركيز وجر جبل من دراعو غير بزز وهو كايغوت
-صافي باراكا راك غادي تقتلو .
كان جبل كايتنفس بسرعة وهو كايشوف فمراد لي مرمي على الأرض وسخفان ، غمض عينيه بقوة ونتر دراعو من يد الدون ماركيز و قال بغضب لعصام لي كان شاد فراسو بألم ...
-واش نتا بيخير؟
شاف عصام فيدو لي تحسس بيها راسو وكانت ملطخة بالدم وقال :
-انا بيخير معليم غير شويا ديال الدم وصافي
تحولات الدنيا فعينين جبل للسواد ... براكين الغضب كانت كاتفور من عينيه فخرج لباب الغرفة ونادى بصوتو الخشن بأعلى صوت:
- دانيااااااااااااااااااال
بينما تكلف دون ماركيز بتفقد وعي مراد لي كان فمو وأنفو كايسيلو بالدم بغزارة ، ثواني ووصل رجل ضخم البنية وقال باللغة الإسبانية
- نعم سيدي
قرب لعندو جبل وقال بغضب وهو كايبرك على أسنانو:
-دانيال ، غاتمشي لعند داك ولد العاهرة لي سميتو مرزوق ،... وبغيتك ضربو ضرب ديال لكلاب علاما نسالي مع هاد لـكلب لي هنا ونجي نكمل عليه
غير سمعو دون ماركيز ناض بسرعة و قرب لعنو وقال بخوف :
- بارون نتا راك معصب دابا ، هداك ولد الكلب خليه عليا انا لي غادي نتكلف بيه .
إلتفت جبل لعند دانيال بعناد مخلط مع العضب وقال:
-سير دير داكشي لي قلتليك
-امرك سيدي
إمتثل دانيال لأمر جبل ومشا كايجري و ضار جبل عند الدون ماركيز وعصام وقال بصوت غاضب بحال الجحيم:
-خرجو ، خليونا بوحدنا
بغا دون ماركيز يتكلم لكن جبل قاطعو فاش قال بصراخ :
-ماااااغانعاااااودش هضرتي جوج دلمراااااات ...دي عصام لعند ياسين باش يخيطليه الجرحة لي فراسو . وغبرو من قدام كمارتي بجوج بيكوم .
أومأ دون ماركيز براسو بسخط ووشد فعصام من يديه باش يخرجو لكن عصام سحب يدو بغضب وخرج وهو كايشعر بالشمتة حيت غدرو مراد وجاه على غفلة فتنهد دون ماركيز بغيظ وخرج وهو كايتمتم بإستياء وغلق موراه الباب .
غمض جبل عينيه في محاولة السيطرة على غضبو ثم قرب من مراد مشنق عليه من التيشرت لي كان لابس وهزو بغضب ولاحو على السرير .
بقا كايشوف فيه لواحد المدة بغضب ثم قال بإستهزاء باللهجة السورية :
-تقبرني يا كربوج ..نايم مثل الملاك ماشالله ...
وكمل وهو كايبرك على سنانو:
-وحياة خالقك ماني مفارقك اليوم يا مراد الكلب
بعد مرور نصف ساعة
فتح مراد عينية ببطئ وألم ورمش عدت مرات علاما توضحلو معالم الغرفة وظهر السقف المزخرف بشكل أفضل ، شعر بالألم فراسو فحرك يديه باش يتلمسو لكن تفاجئ بالمينوط لي كان رابطليه يديه مع رأس السرير حرك راسو بسرعة فاش حس بالحركة قدامو وتفاجئ فاش تشعل ضوء المصباح وظهر جبل لي كان چالس على كرسي مخملي أسود وداير رجل على رجل بخيلاء وكايشوف فيه بهدوء ...
إبتسم جبل بهدوء وقال بلهجة ساخرة بصوتو الرزين:
- لطالما كنت كانأمن بالمقولة لي كاتقول "الشرطة أكثر فسادا من المجرمين " ياااااا رافي ... اه بغيت نقول رافايلو ،... بلاتي اش كانت سميتك "رافايل ديمورو"
شعر رافايل (مراد) بغضب جامح وحرك يديه بعنف باش يحرر يديه وهو كايشوف بغضب فجبل لي قال بلهجة جليدية:
-أنا رجالي هوما نقطة ضعفي ، ولي كايحاول يمس شعرة منهم كاندبحو هذا علاش ضربتك ، حيت حكيتي على الضبرة يا رافي .
على رافايل (مراد)راسو فجبل وقال بغضب:
- علاش رابطني ؟
برك جبل على أنفو بصبعانو في محاولة السيطرة على نفسو وقال بسخرية :
-غير باش نثبت ليك أن ماشي غير الإنتربول لي عندهوم الأصفاد (المينوط) حتى حنا .
توتر رافاييل من الشئ لي قال جبل لكنو حاول ينكر الأومر وقال :
-مافهمتكش علاياش كاتهضر أنا سميتي مراد ماشي رافايل و..
لكن جبل قلطعو وقال :
-صافي صافي صافي ، فهمنا ... كان كايحسابلي أن الإنتربول أكثر ذكاء ،... لكن ياخسارة طلعتو أقل من توقعاتي .
إبتسم رافايل بخبث بعدما عرف أن أمرو صافي تكشف ومكاين لاش يكذب فقال بسخرية لاذغة :
-العود لي تحكر يعميك اسي البارون .
إبتسم جبل وردد موراه بصوت جليدي:
-بارووون ... فخبارك أن هاذ اللقب ديال جدي .
شاف فيه مراد بإستخفاف وقال وهو كايبرك على اسنانو :
-مكايهمنيش ديالمن ... لي نقدر نقولو ليك دابا البارون ،... أنه إلا ماقتلتينيش غادي تندم بزااااف.
تنهد جبل بمحاولة تهدأت أعصابو ثم قال بصوت حديدي وهو كايشوف ليه مباشرة فعينيه بثقة كبيرة:
-انا لو كنت عامل مقبرة للناس لي قتلتهم ... كانت عمرت المقبرة على الأخر ...، لكن ماعمر يدي تحطات على الناس لي كايحاولو يخلصو هاد العالم من حثالة المجتمع ،.. يعني اي شخص قتلتو كان داير علاش وخارج إطار البراءة صدقني .
رد عليه رافايل بصوت جامد و مستفز :
- غادي نعاودها لك ، وإلا ماقتلتنيش البارون داابا ... أنا لي غادي نقتلك بيدي المجرم .
حاول جبل مايضربوش وحاول مايقربلوش فغمض عينيه وإستجمع شتات أعصابو ثم حل عينيه و قرب بالكرسي وتحنى عندو وقال بصوت شيطاني :
-يحسابلك راسك غادي تعيش ديما ،...هممم نتا لدابا يمكن يالاه درتي سفرة وحدا مع عزرائيل ، لكن انا ... أنا مدوز عمري كولو معاه .
هز رافاييل (مراد) راسو وقال بلهجة صارمة .
-اااه يا ولاد لحرام ..... كلكم عندكم مصطلحات فوق وزنكم بمراااااات .....
وكمل وهو كايقول بغضب :
-إلا ماكنتيش عارف شكون أنا ،.. ربما أفضل وسيلة ليك هي الحذر ...
إبتسم جبل في محاولة بلع كلمة ولد لحرام لي قالها رافاييل وهو عاض على شفته السفلية ورد عليه ببرود متصنع :
-فعلا مكانعرفكش مزيان ...، لكن لي بغيت نأكد ليك أنني ماشي العدو ،... أنا الحليف السي رافايل ،.... هدفي وهدفك واحد هو القضاء على الكاريبي ،..
سكت شويا وكمل بصوت حازم:
-نتا غير كاضيع وقتك معايا ..... ولي وشاو بإسمي لمقركم الموقر غير باغين يغطيو أعمالهوم القذرة ، باغيني نكون كبش فداء باش ظنو أنكم قطعتو مشكل المخدرات من جدر... لكن أنا مجرد فرع من فروعو الكبيييرة.
عقد رافايل (مراد) حواجبو بإستهجان وقال:
-شكون كاتقصد؟؟
رد عليه جبل بجدية :
- العدو ديالك ديال بصح هو العراب شاهين ، المعروف بالرجل الأعمال الشهير شاهين باشا صاحب اكبر الشركات الضخمة فإسبانية والعالم كامل ... نتا عارف مزيان أنه مكون مافيا تحت إسم "الكاريبي"... وهاد المافيا عندها فروع فعدة دول ومترأسينها شلا ريوس كبار لي مانجيش أنا حتى فجزء بسيط من داكشي لي كايديروه هوما ...
إعتدل جبل فچلستو وكمل بحزم:
-هذا علاش ، وشاو بيا أنا ولصقولي كولشي .... لكن فنفس الوقت اسي رافاييل... باش نعطيك غير نبذة بسيطة على الذكاء ديالهوم... شراو شرطة السواحل بالفلوسهوم ....، هذا علاش التعزيزات لي طلبتيها فوسط لبحر اسي رافايل ماستجابتش ليك ...، يعني رؤسائك ضحاو بيك وهداك السافل ديال شاهين ضحا بيا أنا ....، مابغاونيش نتشد ومابغاوكش تموت ... عرفتي علاش ..... باش نتا ورجالك غادي تبقاو تابعني غير انا .... وأنا غادي نبقا نهرب منكوم ونتخبع كيف الفار باش ماتشدونيش قبل مانسلمهوم أخر دفعة من البضاعة ،.... يعني بغاوكوم غير تبقاو مشغولين وصافي باش يخلالهوم الجو ويديرو مابغاو بما أنكم مشغولين فالقبض على الرجل الغلط .
إبتلع رافاييل ريقو بحيرة ودور القضية فراسو مزيان ... تذكر شحال من إشارة وشحال من إتصال دار مع شرطة السواحل فاش كان فاليخت وحتى شي حد مكان كايجاوبو ولا كايعبرو وكأنهم لاحوه وسط بير غارق بعمق 10 متر وعطاوه حبل فيه ميتر واحد وقالولو طلع ... كيفاش هادشي يقدر يوقاع فالإنتربول هادشي مستحيل .
شاف رافاييل فجبل وقال بغيظ:
- وحتى نتا كاتبقا مجرم ، ولا اشنو تبرر المخدرات لي كنتي هاز معاك فاليخت.
تكا جبل على ظهر الكرسي ودار رجل على رجل بخيلاء وقال :
- هادوك المخدرات دين الواليد الله يرحمو... كان شاد فلوسهوم من عند الكاريبي قبل مايموت ... وفاش مات ضطريت أنا نخلص الذين ديالو ونرجع البضاعة... وبما أنه أخر دفعة كانت لبارح وصفقة ديال الواليد تسالات ...، فامابقا عندهوم مايديرو بيا ،...هذا لاش فاش شميتو نتوما ريحة المؤامرة حولهم ...، باعو سميتي للإنتربول وللمخابرات فالمغرب ،....وفنظرك نتوما إلا شديتوني وديتوني الحبس أش غايوقاع ؟؟...أنا نقولك شغادي يوقاع ... غادي يهددوني بعائلتي باش نقتل راسي ولا غايسيفطو لي يقتلني وهاكدا الخاسر الوحيد فهادشي كامل هو أنا ... وأنا مستحيل نكون رويضة سكور ديال داك شاهين الكلب مهما كان ، حتى لو ضطريت نحاربو وندير يدي فيديكوم وماغانخليهش يوصل للشي لي هو باغيه .... ماغانخليهش يغطى ريحتو الخانزة بيا ...
بقا رافاييل ساكت وكايفكر فكلام جبل ثم قال بعد ثواني :
-وأنا شنو لي يتبتلي حسن نيتك ..، ونتا بفمك ذكرتي شحال قتلتي ، نتا كاتعتارف بجرائمك ديال القتل بلا ماتخاف .
همهم جبل وقال بهدوء :
-فاش كاتقبل عيوبك حتى شي واحد مكايقدر يستخدمها ضدك من بعد ...
سكت شويا وكمل:
- باش تقضي على وحش اسي رافاييل خصك تستعين بوحش ثاني ولي هو أنا .
قرب جبل وهز ساروت صغير من فوق الطاولة لي محطوط عليها المصباح ثم فك يد رافاييل وقال:
-مانواعدكش بحتى حاجة اسي المحقق ، أنا إنسان معروف فإختراق القانون ،....ومكانأمنش بيه أساسا .. لأن القانون لي مكايطبقش على كولشي وكايتستثى منو واحد ولا جوج حسب وزنو ومقامو .... فمكايستاهلش مني الإحترام ....
إبتسم رافاييل بخبث وقال وهو كايدلك معصمو لي ولا حمر من قوة الشد :
-ماكدبوش فاش لقبوك بالبارون الحقير
رد عليه جبل بإبتسامة مماثلة وقال :
- شكرا على الإطراء ... كاين لي كايشوفني حقير ، وكاين لي كايشوفني أمير ،.... ماعرفتش كيفاش وعلاش؟ ؟! ،.... ولكن أنا واثق من نفسي بزاف ،... فمادمت أمشي مستقيم فنظري مكايهمنيش إلا بانليكم ظلي أعوج ،... فكل واحد كايشوف بعينو وتصورو الشخصي لا أكثر ...، نظرتك نتا لي رسمتيها وصدقتيها أما النوايا ،.... فوحده الخالق العالم بها .
وقف رافاييل ووقف جبل حتى هو ومد يديه باش يصافحو وقال :
- أصدقاء؟؟ ولا أعداء ...، حلفاء؟؟ ولا معارضين
شاف رفايل مطولا فيد جبل الممدودو بتردد ثم قال بسخرية :
- زعما إلا ختاريت نكون العدو اشنو غادي يوقاع؟؟
إبتسم جبل بخبث وقال :
-غادي تخرج غير الكسدة ديالك من ڤيلة كونتيسا لكن راسك غادي نحتفض بيه كذكرى سنوية للمغامرة لي عشت معاكوم على يخت الجوهرة .
ضحك رافاييل بسخرية وهو كايشوف فجبل لكن القلب ديالو كان عامر بالحقد تجاهو لكن مكانش عندو شي حل اخر وكيف قال هو باش يقضي على الوحش لكبير خصو يستعين بوحش أخر .
رفع رافاييل يديو وتمسك بيد جبل وقال بعد صمت.
-أصدقاء .... وحلفاء .
أومأ جبل براسو وإبتسم بعدما طبطب على كتف مراد بقوة وقال :
-أنت ضيف عندي ، الوقت لي بغيتيه ، خود راحتك ، وكانعتاذر على الضربة يا صديقي.
لمس رافاييل الجرح لي فشفايفو بألم وقال .
-ماشي مشكل ... الضربة لي مكاتقتلش كاتقوي ولكن قبل ... أنا مازال مكانتيقش فيك ... وباش تثبت لي حسن نيتك ... غادي ترجع معايا للمغرب .
عقد جبل حواجبو بإستنكار وقال :
-وعلاش .؟؟
تنهد رافاييل وقال بصوت حازم :
- غادي نعرفك تما على شي ناس ... ضاروري طلاقا بيهوم ... باش نتأكد من حسن نيتك .
علا جبل حواجبو بإستسلام فاش فكر فالرحلة ديالو لجنوب أفريقا ... لكن مافيهت باس يساير رافاييل حتى يوصل لغايتو . تنهد جبل وقال :
-واخا ... انا مستعد نمشي معاك فينما بغيتي وعندي ثقة أن الناس لي غادي تعرفني عليهوم تما غادي نعجبهوم . لكن عندي رحلة عمل صغيرة ضاروري نقضيها هي الأولى .
بقاو جبل ورافاييل فالغرفة كايتحدثو فأمور مهمة تقريبا نصف ساعة ... لكن الدون ماركيز فالخارج كان كالس على أعصابو لكن ماقدرش يصبر مازال و دخل عليهوم .
تصدم فاش شافهوم كايصافحو بعضياتهوم بهدوء ...هو كان متوقع أنه غادي يدخل غادي يلقى الدم فلحيوط وشي قاتل وشي مقتول لكن اشنو واقع بالضبط؟
قال جبل بكل هدوء وبصوت رزين وهو كايشوف فدون ماركيز :
- دون ماركيز ... تغيرلت الخطة .
شاف فيه دون ماركيز بإستفهام وقال:
-اشمن خطة؟؟
رد عليه جبل برزانة:
-غادي تسلم لرجال الكاريبي اخر دفعة من البطاعة وخلي مرزوق هو لي يسلمهالو.
شاف دون ماركيز فرافاييل ورجع شاف فجبل بمعنى راه لبوليس معانا ركز شوية ...ففهم جبل معنى النظرة ديالو وقال:
- الرقيب رافاييل ولا صاحبي ومكاين لاش نخبيو عليه شي حاجة .
أومأ دون ماركيز بتفهم وقال وهو كايحاول يغطي على الصدمة لي حس بيها :
-فهمت لكن علاش مرزوق بالضبط لي غادي يسلمهوم البضاعة ؟؟؟
-إحتمال غادي نغيب فترة طويلة ، وبما أن ختي تاليا غادي تبقا هنا فمابغيتش يأديوها بسبب بضاعة سخيفة ... ولكن هادشي غير علما نرجع إنشاء الله وعاد غادي نبداو اللعب ديال بصح .
شاف فرافاييل ثم رجع شاف فدون ماركيز وقال :
-عيط للدكتور ياسين يعالج جروح الرقيب رافاييل وتهلاو فيه راه ضيفنا .
خرج جبل من الغرفة وركب فالمصعد وهو كايحس بالراحة... وكأنه حيد جبل فوق كتافو ... وكيفما قال قبل أنه غادي يطلع راسو من هاد المشكل بحال الشعرة من لعجين وداكشي لي كان .... تحل المصعد فالطابق الثاني وكانت باب المصعد قبالتها نيشان الغرفة لي ناعسا فيها روعة ..
تقدم لعند الغرفة بخطوات رزينة حتى وصل وحط يديه على مقبض الباب باش يحلها ويدخل لكنه تفكر كلام الدكتور وبقا واقف كايشوف فالباب بحيرة ...
لكن في الأخير إبتسم بسخرية وهمس بصوتو الرجولي :
-مافيها باس ... مافيها باس ماغانطولش بزاف .
دفع الباب ودخل لكنه تفاجئ بالغرفة لي كانت مضلمة ومقناطة ... حرك رجليه لعند السرجم وبعد لخوامي حتى تسللت خيوط الشمس الذهبية حول زواية الغرفة وإستوطنت جنب الجميلة النائمة بهدوء .
إبتسم جبل بهدوء من شدة جمال منظرها وقرب منها بخطوات هادئة وكلس على جنب السرير لي كانت ناعسا عليه روعة ...
بقا ساكت و ساااهي كايشووف فملامحها الهادئة ورموشها المنسدلة وقدر يميز الفرق فملامحها بين البارح واليوم ... بحيث اصبحت بشرتها أكثر إشراقا وتحول لونها من الأصفر الباهث للأبيض الحليبي وشفايفها من اللون الباهت للوردي الفاتح .
تنهد بهدوء ثم مد يديه للدرج لي جنب السرير وخرج دفتر وقلم وخدا نفس ثم بدا كايكتب على الورقة ويختلس النظر لوجهها مرة مرة وفاش سالا قطع الورقة وطواها ثم وقفها جنب مزهرية ديال الورد ورجع القلم والدفتر لمكانهوم .
شاف فيها وإبتسم بهدوء ثم مد يديه وتمسك بيدها الصغيرة لي كانت موضوعة فوق بطنها وقال بصوت مبحوح :
- عجيب ... كيفاش بنت ضعيفة بحالك قدرت تضرب وتجرح وتتسبب فغيبوبة كاع ..
إبتسم بسخرية وكمل :
- أشنو لي مخبيا تحت داك الراس اروعتي ؟
مد يديه ببطئ و قرب يدها من شفايفو .... طبع قبلة هادئة وطويلة على ظهر يدها ثم ناض بهدوء وهمس بصوت ماكر :
- روعتي يا روعتي ... كانواعدك غادي نرجعو نطلاقاو وغادي تخلصي الدين ديالك كيف واعدتيني ...لكن دابا خصك تنوضي وتوقفي على رجليك وتكوني قوية ... و من هنا لتما كوني فتاة مطيعة وأنا كانواعدك بلي غادي نعطيك أي حاجة تتمنايها .. بشرط تمتعيني وتسمعي لهضرتي .
بارون الجزء التاسع أصدقاء أم أعداء
محتوى القصة
التنقل بين الأجزاء