شاءت الأقدار ان تجمع بين غيث الشاب الحزين الواثق في نفسه المسالم بياسمين فتاة جامحة طائشة و ماعندهاش حشومة فقاموسها و تتبعنا قصتهوم فالجزء الأول لي كان مراحل تعارفهم على بعض و انتهى بزواجهم و الجزء الثاني لي بصح كان فيه العذاب و التكرفيص و انتهى بفراقهم و دابا الجزء الثالث لي غادي يعاودو يتلاقاو فيه كيفاش و فين و اش غايطرا غاتكتاشفوه فالقصة...
#بعد سنتين#
امرأة جالسة فوق كرسي اسود من الجلد فمكتب كبير و واسع ماكايبانو غير يديها من جناب الكرسي كاتشوف الشرجم الزجاجي الكبير الضاباة كاتبان و لبيرو عامر وراق و متوسطو بيسي و فالأمام إسمها مكتوب على بطاقة كبيرة و بجانبو صورة ياسمين مع أنيس و أناييس... ضارت بالكرسي و تقادات مع لبيرو و هزات وجهها نفس الوجه الطفولي كما هو ماتبدل فيه والو بنفس الجمالية و الشعر طوال ليها طالقاه لابسة شوميزة فالشيبي مع سروال ديال توب اسود و لافيست محطوطة بجانب الكرسي ديالها... تحنات على لوراق كاتقرا فيهوم حتى تحل عليها لباب و دخل شاب مألوف أبيض لبشرة، طويل عيونو سوداء و لابس سروال جينز و قميجة بيضاء جات لاصقة على لبنية ديالو حادر راسو و هاز مجلة فيديه
سامي: لك شو هاد يا ياسمين مجلة فوربز الأمريكية
هزات راسها فيه بإبتسامة ثقة و ب بقات كاتشوف فيه و هو جاي جيهتها حتى جلس قدامها و حل المجلة و حطها ليها قدامها
سامي: أقوى 100 إمرأة في العالم !!! و الرتبة الخامسة ! لك تحية و الف تحية
ياسمين: (ضحكة انثوية) هههههه قرا كاع نشوف اش كتبو
سامي: (حل المجلة)من رحم المعاناة ولدت سيدة أعمال تعرف بأميرة العطور من هي ! السؤال الذي يطرح على أذهان جميع الناس. هي إمرأة سهرت و عملت بجهد لكي تصل إلى ما عليه الآن... في فترة سنة و نصف اُفتتحت شركة "جاس" للعطور و أصبحت الشركة المسيطرة في هذا المجال و استحوذت على السوق.
خلال مقابلتنا مع هذه المرأة المغربية قالت بإن حزنها و كئابتها هي السبب في وصلت له من نجاح حيث تعرضت لصدمة في حياتها حطمتها و أدخلتها في اكتئاب شديد و لكن ما لا يقتلنا يقوينا و حين نكون في الأسفل لا يبقا اي طريق آخر غير الصعود للأعلى ها كذا اختزلت قصتها في بضعة كلمات معبرة... هذه المرأة التي لم تشأ الشركات أن تتعامل معها بسبب سمعتها السيئة من قبل حيث قبل سنتين و نصف كانت متهمة بتهريب المخدرات و هذا أثر في عملها و سمعتها و لكن بعد إصرار و جهد كبير أصبحت حسب الإحصائيات خامس أقوى إمرأة في العالم.
ياسمين: خليها لوقت آخر ليوم لعرس و شوية خاصني نمشي باش نوجد راسي
سامي: بلغي تحياتي... بتركك هلا يا خامس أقوى مرأة في العالم ههههه
ياسمين: غادي تتلاقة مع غزلان
سامي: ايوا عندي موعد معها... بشوفك بكرا
مشا و خلاها جالسة فوق الكرسي فرحانة و هزات المجلة كاتشوف المقالة و ناشطة
هزات المجلة حطاتها على جنب و طاحت على لوراق كاتقرا و بدا تيليفون ديالها كايصوني و كاتلقا رسائل تهنئة من كاع المعارف ديولها... شافت الساعة لقاتها الربعة ديال لعشية و هزات ليوسبي لي فيه كاع المعلومات و حطاتو فصاكها الأسود المربع من برادا و لبسات لفيست و هزات الصاك بطريقة أنثوية و غادة ضهرها مقاد و هازة راسها لفوق و كاتمشا بكل رشاقة... خرجات من لبيرو ديالها و تبعوها جوج من لي كارد ديول غيث لي ماكايتفرقوش معاها فينما مشات رجليها على رجليهوم... هبطات للأسفل و الموضفين فالشركة كايهنؤوها على المقال و على الرتبة لي عطاوها... خرجات برا الشركة دارت نضاضرها الشمسية من نوع رايبن و لقات طوموبيلة كحلة بورش كاتسناها قدام شركة مع شيفور... حلو ليها لباب و دخلات جلسات و ديمارا الشيفور و هو عارف الوجهة ديالو بلا ماتهضر معاه... بعد مسافة الطريق دخلات لوطو مع باب لفيلا لي شرا ليها غيث كصداقها و وقفات قدام لباب الرئيسي و هبطات كاتمشا و الطالون كايقرقب... حلات لباب و دخلات طلعات نيشان للفوق لقات صوفيا كاتلعب و هي تمشي عندها ياسمين
ياسمين: حبيبة فينها ماماك
صوفيا: كاينة فبيت التوينز
ياسمين:(باستها) ميغسي حبيبة... يالاه جيتي من المدرسة!
ليلى: هههههههه راه بحال ولادي دوك جوج لخوينزين ديال لماكلة كايحمقوني تبارك الله عليهوم
ياسمين: (سمعات الدقان) هاهوما جاو... دخل
تحل لباب و دخل ولد صغير أبيض شعرو أسود و عيونو رمادية كايجري و كايضحك نايضين ليه شي سنينات لابس شورط شيبي مع تيشورت ديالو فيه ميكي ماوس و مع ليكوش كايبان شورط غليض و صبرديلة بيضاء فرجليه مع تقيشرات... ناضت ياسمين و تلقات لولدها بالأحضان و عنقها حتى هو و الضحكة واصلة ليه حتى لودن... هزاتو معنقاه و جلسات حطاتو فوق رجليها و ليلى كاتشوف فيها و مبتاسمة
جا أنيس جار ختو من حوايجها و هي معصبة و كاتخاصم عليه و لكن هو كانت متحكم فيها و المربية معاوناه فيها بلا مايحس داكشي علاش ماقدراتش تغلب خوها... افت فياسمين مقلقة و ربعات يديها هازة طابليت لابسة سروال أسود و تريكو دياال صوف أبيض و صباط أسود و شعرها كحل بحال خوها و وجهها أبيض مضور و عيونها رماديين و لكن مغلوقين مايلين للأسود لي يشوفهوم يقول كحلين و لكن فالشمس كايبان لونهوم الأصلي... ناضت ياسمين عندها هزاتها عندها و بدات كاتبوس فيها و كاتعنقها و أناييس غضبانة
ياسمين: و شنو مابغيتش تشوفي مامي ماتوحشتينيش (غوبشات)
أناييس: اوف انا وحشك بلا بلا يلعب طابليت
ياسمين: واخا واخا صافي مخاصمة معاك
أناييس: مامي بوثك (نبوسك)
ياسمين:مخاصمة معاك
أناييس: أوف افاك (عافاك)
ياسمين: واخا 😍
ضارت عندها و شبعاتها بوسان و هران أما أنيس فجلس حدا ماماه مركن حيتاش هو كالم ماعندوش مع الصداعات و الغوات كايلعب بالسكات و ياكل بالسكات ماكايحسوش كاع بوجودو
ياسمين: فين مشيتو!
أنيس: بابا
ياسمين: عرفت مع باباك و لكن فين مشيتو لبحر لغابة لآش
أناييس: مسينا لأعاب و و و وحس السعر فوجو سفنا طويل و بخوسة ويينة (مشينا للألعاب و عند وحش فيه الشعر فوجهو (السبع) و شفنا الطوير و بخوشة زوينة)
ياسمين: هممم مزيان مزيان ماسولكش بابا عليا
أناييس: بابا قال ماما ويينة و سمع هضلة و ديلش بسالة (بابا قال ماما زوينة و نسمعو لهضرة و مانديروش لبسالة)
ياسمين: صافي!
أناييس: فيييي (صافي)
ياسمين: واخا ا حبيبة انا نخرج حتى نجي و نلعب اوكي (حطاتها فالأرض)
أناييس:(كاتسفق) ويي
ياسمين: ليلى ردي ليهوم لبال انا معروضة لعرس
ليلى: ماتخافيش راهوم بحال ولادي
خرجات ياسمين من بيت التوينز و مشات لبيتها لي كان سابقا بيتها هي و غيث... دخلات ليه و سدات لباب... دخلات لدوش و وجدات الجاكوزي و عمراتو بالبروديوات ديولها... دارت ماسك لوجهها و حيدات حوايجها و جمعات شعرها سفنجة و تخشات فالجاكوزي و حطات راسها على جنب و غمضات عينيها و ترخات و لما كايبقبق و حسات بالراحة و بعضامها كايزدحو... تفكرات لحظة من اللحضات فاش كانت كاتدوش مع غيث و قلبات وجهها لجنب كأنها كاتفادا تفكر فأي حاجة كاتعلق بيه و لكن ماكاتقدرش هو سكن فذاتها و عشش فدماغها عايشة عاماين كلها على صورو لقديمة معاها و على جوج طروفة منو خلاهوم معاها... هبطات من عينها دمعة سخونة و حلات عينيها و خرجات من الجاكوزي بسرعة و حيدات لماسك من وجهها و لبسات بينوارها و خرجات للبيت ببشرة نضرة و رطبة حريرية... حلات لماريو و جبدات من العلاقة تكشيطة باقة فميكتها حطاتها فوق الفراش و جبدات من لمجر دو بياس بيضين مشبكين... نشفات الجسم ديالها و لبسات دو بياس و تبعات ليهوم التكشيطة... ذهبية مزوقة من القدام و محجرة مهرسة باللون الأسود و لفوق ديالها مشبك بالذهبي كامل و كاشفة ليها على جزء من صدرها و دايرة ليها حزام ذهبي رقيق.... لبسات معاها صباط عالي اسود كلاص و جلسات قدام لمرايا دارت مكياج سموكي مغلوق مع عكر احمر مغلوق برز ليها شفافها اكتر... طلقات شعرها و مشطاتو و دارت ليه بوكلي و من الأسفل جاها خطير... دالات سنيلة كان جابها ليها غيث من الذهب الأبيض و ساعة شيك سوداء فيديها و خاتم فصبعها هزات بوشيط سوداء فيها بورطابلها و بعض من لمكياج و خرجات من لبيت كاتبختر عاجبها زينها... هبطات لتحت و حلات لباب و خرجات لقات طوموبيل كاتسناها بالشيفور رجل شارف لابس سروال اسود و فيست سوداء قميجة بيضاء و ليكات فيديه بيضين و طربوش... حل ليها لباب و دخلات و ديمارا و لي جوج من لي كارد تابعينها.. بعد مسافة الطريق وصلات لقاعة مزينة بالكامل و الموسيقى مسموعة بجهد...وقفات لوطو و جا واحد من ليكارد حل ليها لباب و مد يديه ليها شدات فيه و خرجات كاتمشا و هازة جلايلها حتى دخلات لقاعة سلمات على اباء العرسان و دخلات باينة طاولة ديالها خاوية جات معزولة على الناس و قريبة من العرسان فنفس الوقت... تحت انضار و همسات الضيوف توجهات لبلاصتها و جلسات دايرة رجل فوق رجل و كاتسنا العرسان يجيو و بنادم حاضيها و كايتهامسو مامصدقينش بلي ياسمين معاهوم فنفس لمكان حيتاش كايسمعو خبارها غير فالتلفازة ولا فالسوشل ميديا... ضورات وجهها فالمكان و بانو ليها لي كوبل كايتهامسو و كايغزلو بعض و قلبات وجهها و قلبها مزير عليها
#ياسمين
انا ياسمين لي زهر مرة عطاني و مرة خورني، عطاني راجل كامل مكمول كايبغيني و كايخاف عليا و انا كيف الحمارة اهنتو فشرفو و حرقت قلبو اي حاجة كان يديرها نستاهلها و لكن هو فضل يبعد عليا على انه يمد يديه و انا مازال كانتسناه الله يجعلني نتسناه عمري كامل واخا ضغط لي كايمارسو عليا لواليدين ديولي باش نطلب الطلاق و لكن انا مابغيتش على الأقل نبقا على ذمتو و مراتو و نقولها و انا رافعة راسي... فاش مشا و خلاني دخلت فإكتآب و مرضت بغيتو غير يجي عندي و نشوفو و لكن سيفط ليا خاتمي و عرفتو بلي رجع لدبي... شوية بشوية حتى خرجت من ديك الحالة و قمر معاوناني مارجعاتش للبرازيل حتى شافتني بيخير شوية و بقيت انا وياها على اتصال و تصاحبنا اكتر و اكتر و من تما وقفت على رجلي و درت شركة عطور بفلوس من عند بابا و حد ماكان باغي يتعامل معايا و لكن يد خفية دخلات فالموضوع حتى قبلات واحد الشركة و نجحات شركتي و حاسة بلي غيث هو السباب و كايعاونني بلا مانعيق ... ماكرهتش نشوفو و لو غير مرة و حتى عائلتو ماعندها خبار عليه ولا خفي بحال الا ماكاينش و لكن انت عارفاه معاونني و انا غانبقا مخلصة ليه لآخر يوم في حياتي حيتاش فري كايبغيني ماشي بحال هادو لي هنا شي كايضحك علي شي و فأول فرصة تجيه ولا تجيها غايكركبها.
سمعات الزغاريت و الصلاة على النبي و فاقت من السهوة ديالها لي رجعاتها للماضي ديالها... ضورات وجهها لقات حلا لابسة تكشيطة باج و مكياج لعريسات دايرة مشيطة لشعرها و حداها كرم شاد فيها لابس كومبلي اسود و قميجة بيضة و جاي كايفرنس عاجبو لحال و موراهوم لبنى لابسة بحال حلا و سعد لابس بحال كرم و الجوق خدام كايغنيو منوضين حالة و النس كايشطحو... جلسو العرسان بربعة فالبرزة كل جوج معزولين و ناضو الناس كايتصورو معاهوم و كولشي ناشط و كايضحك و ياسمين جالسة بوحدها كل مرة كاتقلب وجهها و كاتشوف فالناس حتى سمعات صوت حلا كايعيط عليها ضورات وجهها و شافت فيها و شيرات ليها باش تجي عندها و دارت ياسمين ابتسامة على وجهها و ناضت مقدمة الصدر و موخرة الترمة كاتمشا بأنوثة و برشاقة حتى وصلات عندهوم سلمات عليهوم و باركات ليهوم و تصورات معاهوم و رجعات للبلاصة كايبان ليها شاب فمقتبل العمر جالس تما لابس سروال توب اسود و قميجة بيضة و كرافطة كحلة و كوستيم كحل داير رجل فوق رجل و هاز تيلي ... وقفات عليه ياسمين طالعة ليها عويشة حيتاش الطبلة ديالها بوحدها
ياسمين: احم
هز راسو فيها و شافيها عينيه كحلين عندو لحية كحلة خفيفة ابيض البشرة عيونو مرمشين و وسيم
....: !!!
ياسمين: (بأنوثة) سمح ليا مي هادي الطبلة ديالي
....: اه سوري مي كولشي عمر و جيت لهنا
ياسمين: (جلسات) قول ليهوم يشوفو ليك بلاصة
...: راه مالقاوش و هوما لي قالو ليا سير لهنا.. اطط نتي هي ياسمين!!
ياسمين: (ابتسامة ديال بزز) وي
....: متشرفين يالاه لقيتيني قريت لمقال لي دارت عليك مجلة فوربز تستاهلي
يونس: صحافي... الا ماكنش موشكيل راه غاتجي مراتي تنظم لينا
ياسمين: سي با كغاف
يونس: واش نتي من عائلة لعروسة ولا لعريس !
ياسمين: نو غير مي زامي و نتا !
يونس: ولد عمة لمدام لي غادي يتزوج
ياسمين: كرم ولا سعد !
يونس: كرم
ياسمين: همم سي بون
ساد الصمت و بقات باسمين كاتقلب فعينيها و الجوق خدام جالسة مقادة ضهرها و دايرة رجل فوق رجل و حاط يديها على ركبتها حتى وقفات عليهوم مرا شابة زوينة طويلة عندها صدر عامر و وافي و المؤخرة كذالك لابسة قفطان أبيض محجر مع مضمة فضية و صباط فضي عالي و مكياج خفيف طالقة شعرها الأسود و دايرة ليه ليميش و وجهها واسع شوية و عوينتاتها خضرين و فمها صغير
....: هنا فين غانجلسو
يونس: جلسي و هنينا بزز باش لقاو لينا لبلاصة تكمشي ا لينا
لينا: واخا لوالديك لحساب من بعد (جلسات منفخة)
يونس: مزوج بخطية
لينا: هاد لخطية كنتي غاتحماق باش تتزوج بيها ماتنساش
يونس: ندمت راك غير بروسي متحرك و فيك كترة لهضرة
لينا: ياك ا يونس ياااك وليت دابا بروسي
يونس:(بهمس) شوهتينا الله يشوهك واش عرفتي شكون جالس حداك
لينا:(عوجات فمها و طلعات فياسمين و هبطات) شكون كااع 😒
يونس: هضري بشوية الله يعطيك لويل و نتي صوتك بحال الراجل حرش من ديالي
لينا: وا تا دوي شكووون هي
يونس: ياسمين التازي مولات شركة عطور جاس
لينا:(حلات عينيها بصدمة) هااااااا 😳 من نيتك
يونس: وايييه شوفي السيدة كيفاش جالسة و متبتة و الشوفة بالقياس و الهضرة بالقياس ماشي بحالك جحش طالقينو كايجدب
لينا: يضربك ان شاء الله بلا حشمة بلا حيا كاتسب فيا اوا فليل شوف علامن تتعنب نعس مع لحيط
ناضت من حداه و مشات حدا ياسمين لي كاتضحك فخاطرها عليهوم و قالبة وجهها باش ماتفرشش و تفكرات يماتها هي و غيث فاش كايدابزو بالهضرة
لينا: بصح نتي ياسمين 😍
ياسمين:(شافت فيها) وي علاش (ابتسامة)
لينا: يا ختي روايحك كايسطيوني 😍 واااعرين هانتي شمي راه دايرة وحدة دابا من ماركة The One
ياسمين: ميغسي (بخجل)
لينا: بوكوسة مع راسك
يونس: حشمي شوية الله يغبر ليك الشقف
ياسمين: غير خليها واخدة راحتها كايعجبني بنادم يكون مطلوق فالهضرة ماشي حشمان و مزير... غير هضري كيف بغيتي ماعنديش موشكيل
لينا: الله يخليهوم ليك.... و الله الا نتي واعرة (كاتشوف فيها بإعجاب)
يونس: شفتي العيالات علاش قادات نجحات تبارك الله غير بوحدها و جارت شركة مشهورة و كاتصنف من بين خامس اقوى امرأة فالعالم ا خماماج ماشي بحالك شادة لاليسونس و جالسة فالدار تاكلي و تنعسي
لينا:(يديها على جنابها) شكون بالسلامة لي جلس يتشرط عليا ماتخدميش قابلي دارك ماعندي ماندير بمرا خدامة و بلا بلا هم ! شنو جابا تسيفتي ياك كنت باغة نخجم فشي بمكة ولا ندير مشروع و درتي ليا لعقدة فالمنشار
يونس: شوهتينا الله يشوهك يعطيوك لميكرو هضري فيه حسن (ناض و مشا)
ياسمين: عنداك يكون تقلق ولا شي حاجة
لينا: لا هههههه مولفين هاكداك ديما شد ليا نعطع ليك و فالتالي كانتصالحو شوية تشوفيه جاي كايهضر عادي
ياسمين: الله يخليكوم لبعضياتكوم
لينا: امييين يا ربي.... نتي من عائلة لعروسات ولا لعريس لوخر !
ياسمين: لا كانو كايقراو معايا و حنا صحاب من شحال هادي
لينا: خسارة ماعمرنا ماتلاقينا انا لينا بنت عم كرم
ياسمين: متشرفين
لينا: فينو راجلك ! ماجاش معاك
ياسمين:(تقرصات) نو مسافر (قلبات وجهها بسرعة و غصة فقلبها)
لينا: الله يردو على خير .... انا غانمشي نتصور مع العرسان و نجي
مشات لينا و بقات ياسمين حابسة لبكية و قلبها كايضرها نفس الحاجة كاتوقع ليها كلما كايسولوها على راجلها و ماكاتلقا ماتقول و كاتحرج... شربات كاس ديال لما بردات فيه جوفها و شافت العرسان ناضو باش يبدلو لحوايج و هي عقلها مرفوع كاع ماكاين حتى بانت ليها لينا واقفة و جا ليها يونس همس بشي حاجة فودنها و بقات كاتضحك و ضارت عندو كاتقاد ليه لكرافاط و كايضحكو و كايتهامسو و تذكرات غيث فاش كايدير معاها نفس الحاجة لمساتو و همسو و قبلاتو الشيء الوحيد لي خلا ليها بعد هاد لغيبة ديال سنتين... حسات بغيرة منهوم و على السعادة لي عايشينها و لكن كاتقول هذا هو قدري و ربي بغاني نعيش هاكدا و غادي يجي لوقت لي غادي نتجازء فيه على صبري و يرجع ليا غيث حيتاش عندها احساس بلي حتى هو كايحس بحالها.... بلا ماتحس سالو دموعها و هي وسط ذكرياتها و هزات كلينيكس مسحت بيه الدموع و رجعو لعرسان الرجال باقيين بنفس اللبسة و البنات بتكشيطة فالأزرق ملكي و طاح عليهوم السر بانو زوينات.... ناضت تاني باش تتصور معاهوم و هي غير دايرة ليهوم الخاطر اما هي ماكرهاتش ترجع للفيلا و تبقا حدا صورو و تهضر معاهوم و تبكي و تفرغ داكشي لي فقلبها... رجعات لبلاصتها و رجع يونس و لينا كايهضرو معاها و كايضحكو معاها و حتى هي متجاوبة معاهوم و لقات الغفلة فاش تنسا لبضع دقائق همها و حزنها و عجبوها بجوج حيتاش واخا كل شوية مدابزين غير حتى واحد ماكايشد فخاطرو و من بعيد تعرفهوم كايبغيو بعضياتهوم و نفس النظرات لي كايدير يونس فلينا كان كايديرهوم غيث فيها و كايسرح فيها و هي كاتهضر و تعبر.
بقاو العرسان غاديين جايين كايبدلو الموسيقى خدامة و الطايح كتر من النايض و ياسمين جالسة فبلاصتها ماشطحاتش و كاتتحاور مع يونس فمواضيع مختلفة و خرجات من جو الكآبة حتى تحط لعشا جابو ليهوم لبسطيلة بالدجاج و كل واحط طبسيلو قدامو و كايهزو بالفورشيط و المعلقة و كاياكلو و ياسمين فعادتها كاتاكل بشوية و باحترام و كاتمضغ بالمهل اما لينا فالعكس تماما كاتاكل بالزربة و مامسوقة لحد كاتاكل بيدها و يونس قابل ليها على هبالها و باغيها كيفما هي و بالعكس كايزيد يعطيها بحكم انهوم غير تلاتة فطبلة وحدة فالماكلة كانت كافياهوم و زيادة... تهزات لبسطيلة و تحط الدجاج محمر طاحت فيه لينا ماعقلات و ياسمين كاتضحك عليها و شادة فيها و ماشمزأتش ولا ناضت بالعكس كاتحط ليها الدجاج و كاتاكل .... حطو اللحم و زادت لينا دكسات اللحم حتى هو مع الدجاج و لبسطيلة و عمرات كرشها حتى تقخات و اضطرت تحد المضمة باش ترخف شوية كرشها و ياسمين كاتضحك بأعلى صوتها حتى دمعو عينيها و هي كاتسوف فلينا راجعة لور و كرشها منفوخة و كاتسوط و كاتنهج
لينا: اوفففف كليت بزاف كاتضرني كرشي
يونس: صبري شوية حتى تمشي لدارك.... مزيانة فيك راه ماكاتنضغيش غير كاتبلعي بحال لحنش
لينا: لحنش هو نتا لفعة كرطيطة
يونس: هاهوا غيجيبو لاكلاص شوفي منين تدوزيه
ياسمين: 😂😂😂😂
جابو ليهوم لاكلاص ديال لفاني و شوكولا مع سيكار ديال الشوكولا مخشي فواحدة من لي بول ديال لاكلاص و كلاتو ياسمين و لينا كاتاكل و كاتنكر كيف الشارفات و ياسمين كاتبرد عليها و يونس داير يدو على خدو كايشوف فالمرا لي عطاه ربي.
سالاو العشا و كملو لعرس و كملو لعرسان اللباس ديالهوم و كل شوية هابطين طالعين حتى ختموها بالفستان الأبيض و ناضو رقصو كل وحدة مع راجلها و قطعو لكيك تحت انضار الجميع و مشات ياسمين عاودت باركات ليهوم و تواجعت معاهوم و توادعت مع يونس و لينا و ركبات فلوطو ديالها و رجعات للفيلا مقلوبة بالنعاس حيتاش الوقت تعطل و هي كاتفيق بكري... وصلات للفيلا دخلات حيدات حوايحها و مسحات وجهها من لماكياج و لبسات شوميز دو نوي فالأسود قصير من ستان رطب و لبسات فوقو بينوار مشات لبيت ولادها لقاتهوم ناعسين باستهوم و رجعات لبيتها شدات مخدة رشاتها بالريحة لي كان موالف يدير غيث و تخشات فيها و نعسات
اشرقت شمس الصباح بعبير من التفاؤل و نسمة من النجاح و ريح من الفرح. حلات ياسمين عينيها بعدما برزطاتها اشعة الشمس و تفوهات و بقات حاكرة راسها فوق المخدة و كاتشوف من بين رموشها و مبوقة بالنعاس... ضارت قلبات الساعة لقاتها 12 ديال النهار... ناضت كاتأفف و باقي فيها النعاس... دخلا لدوش قضات حاجتها و غسلات وجهها و حكات سنانها و خرجات من دوش تكسلات مزيااان و حلات لماريو هزات سروال جينز مزير ازرق فيه تقاطع و شوميزة فالأبيض مخططة بالأسود و بانطوفة فرجليها و مشات لبيت التوينز دخلات لقات أناييس كاتلعب فالأرض هازة مونيكة كبيرة كاتهضر معاها و تعبر بيديها و شعرها الأسود دايرة ليه بانضة دايرة على راسها فيها وريداتفالغوز و الأحمر و لابسة كسوة حمرة معرية من ليدين حد الركابي مع صباط اسود فرجليها و لابسة ليكوش نافخين ليها الكسيوة و أنيس فوق الفراش جالس كايلعب بطوموبيل كبيرة لابس شورط ازرق مع تيشورت ابيض و صبرديلة فرجليه كيوت فالأزرق... المربيات جالسين مقابلينهوم وحدة مع أنيس و وحدة مع أناييس... دخلات ياسمين باست أناييس و باست أنيس و تشعبقو فيها كايعنقوها أنيس من الضهر و أناييس شادة ليها رجليها و عطاتهوم و قتهوم و لعباتهوم معاهوم شوية و خرجات مشات لكوزينة فطرات و رجعات لبيتها هزات لبوشيط لي دات معاها لعرس و خرجات تيلي و داك شوية ديال لماكياج و بدا كايصوني تيلي ديالها و هو مديور ليه سيلونس... هزاتو و لقات لابيل من عند قمر و جاوباتها
ياسمين: الو حبيبة
قمر: ياسمين مالكي ماكاتجاوبيش من لبارح و انا كانعيط ليك و ليوم فالصباح تاني
ياسمين: كنت فعرس و درت ليه سيلونس باش مانتبرزطش علاش اش كاين ياك لاباس
قمر: (تنهدات) جينا المغرب !
ياسمين: ايمتا و علاش ! واش جا غيث (بلهفة)
قمر: (بحزن) جدة مريضة و حاسة براسها بلي (سكتات)
ياسمين: اويلي مالها جدة إلينا 😨
قمر: مريضة راه كبرات فالسن... هي لي قالت لينا نجيو هنا باش الا ماتت (بحزن) تدفن حدا جدي خالد... راه بغات تشوفك نتي و التوينز
ياسمين: واخا انا غانجي شوية و نكون تما خلعتيني و الله ماغايكون والو ان شاء الله
قمر: واخا حتا نتشاوفو
قطعات ياسمين و لبسات صبرديلة بيضاء سبورتيف و خلات شعرها مطلوق و من ناحية خايفة على إيلينا و من ناحية خايفة تشهف غيث و متوترة و قلبها كايضرب و معدتها كاتضرها و مخربقة كاتلقب على بورطابلها و هو فيديها و مضاربة مع دبان وجهها... خلات وجهها بلا ماكياج و رشات ريحة و شافت وجهها فالمرايا كاتحاول تهدن راسها
ياسمين: كالم داون ياسمين يقدر مايكونش و نتي متحمسة و نتوترة على والو شهيييق زفييير و حتى الا كان راه راجلك هاداك و عادي و ماشي اول خطرة تشوفيه
بقات كاتاخد نفس و تخرجو و قلبها كايترعد و خلاجات من بيتها مشات لبيت التوينز
ياسمين: هبطو ليا التوينز غانخرجو
هزو لمربيات التوينز و تبعوها و هي هابطة كاترعد و المشية تلفات عليها و غير كاتنهج و تسوط و معدتها كاتضرها بحال الى فيها وجع... جابو ليها طوموبيل و ركبات و المربيات حداها هازين التوينز و هي كاتشوف من الشرجم و مرعدة
ياسمين: فيلاا راييس (مع الشيفور)
تحطات طوموبيل قدام لفيلا و ياسمين قلبها كايخبط نفس المكان لي عاشت فيه اجمل ايام حياتها رجعات ليه و هو نفس المكان لي حطمها و كسر ليها قلبها... هبطات من طوموبيل و الرعدة شاداها طالعة من الدروج بزز و تفكرات فاش خرجات كيف الحمقة حالتها حالة و وجهها عامر دموع و حمر كاتبكي... تزاد قلبها تزير عليها فاش تذكرات داكشي و دخلات مع لباب لكبير و المربيات و التوينز سابقينها... بانليها خيالها هي و غيث جالسين كايتحابو و كايهمس فودنها و يبوسها و قلبها تزادو نبضاتو... فينما ضورات وجهها كايبان ليها غيث مرة جالس مرة واقف مرة كايضحك مرة مغوبش و هي غادة و شاداها السخفة هاد لفيلا لي شهدات على اجمل ايام حياتها معاه... شجات فالدرابزون و طلعات درجة بدرجة و كاتنهج و مزيرة بحال الا غاتخنق حتى طلعات لفوق و غادية فإتجاه بيت إيلينا و قلبها كايزيد يضرب خايفة تشوفو خايفة تضعف قدامو و حايفة يرفضها و يعاملها ببرود خايفة يكون مانساش و بشوفتو ليها يعاود يكرهها... وصلات للباب و حطات يديها على لبوانيي و كاتسمع اصوات فالغرفة و كرشها زادت زيراتها بحال الا فيها لوجع و حلقها نشف و قلبها غير كايضرب... تشجعات وحلات لباب و دخلات كاتمشا بشوية حتى وصلات لوسط لبيت و شافت فيهوم جوري جالسة فوق لفراش حدا إيلينا لي مجبدة فايقة كاتبتاسم و باين فيها لمرض و قمر حدا ماماها باقة كما هي انيقة و زوينة و شهاب جالس فوق فوطوي و ليث واقف متكي على حيط... قلبات بعينيها مابانش ليها غيث و حسات بإحباط و خيبة أمل بغات تشوفو كتر من أي حاجة...ضارو كاملين شافو فيها و هي صفرة واقفة و المربيات شاديين فالتوينز و ناضت عندها قمر كاتضحك
قمر: توحشتك 😄
عنقاتها و ياسمين مغيبة لعقل كاع ماكاين باقي مامتقبلاش بلي غيث ماكاينش... بتاسمت بزز و باجلاتها لعناق تحت انضارهوم و سلمات عليهوم كاملين و هوما كايشوفو فيها مالقاو مايقولو حيتاش عارفين غيث اش دار و لكن ماعارفينش السبب. جلسات ياسمين حدا إيلينا و شدات ليها فيديها و ابتاسمات
ياسمين: كيف بقيتي شوية ?
إيلينا: شوية الحمد لله فينهوم ولاد حفيدي
جابتهوم المربية عندها و جلساتهوم ياسمين حداها
إيلينا: (بصوت خافت) كايشبهو ليك بزاف.. تبارك الله عليهوم زوينين حسن كاع من لفيديوات
جوري:(كاتدوز يديها على أنيس) و لكن أنيس غير غيث محطوط كايشبه ليه بزاف من غير لعينين لي ديول ياسمين
ياسمين: اش بيك بعدا ا جدة اش دارك !
سمعات ياسمين صوت ماخافيش عليها خلاها تبلوكا فبلاصتها و قلبها رجع كايضرب و شمات لايحة فالهوا كاتحماق عليها و ضورات وجهها و جات عينها فعين غيث لي كان كايهضر فتيليفون فالبالكون... تبلوكات و حسات بالبرودية و مالقات ماتقول غير كاتبلع فريقها و هي كاتشوف فيه باقي كما هو غير زاد تفورما اكتر و زاد الحجم ديالو و شوفاتو ولاو قاصحين و حارين و لحيتو كبرات و شعرو كتير و غير عاقد حجبانو واخا دازو عماين ماتبدل فيه والو بلعكس ازداد وسامة.
تبلوكات ياسمين فيه و مالقات ماتقول و تعقد ليها لسان و عينيها فضحوها بالشوق لي كاتكنو ليه و عينيها تفيكساو عليه و طلعاتو و هبطاتو بسرعة و شافت يجيه لقات بلي باقي لابس خاتم زواجو و ضهر شبح ابتسامة على وجهها ماخرجها من سهوتها غير صوت أنيس لي هبط من لفراش غادي كيف البطريق كايضحك
أنيس:بابا 😄
ابتاسم غيث و تحنا عند أنيس و هزو بين يديه كايضحك معاه بسرعة حيد لتغوبيشة و رجعات بلاصتها ضحكة ساحرة
غيث: نونوس صافا صافا (حل يديه و ضربو أنيس بكفو)
أنيس: وحستك (توحشتك)
غيث: حتا انا (كايبوسو) اش درتي لبارح
أنيس:(كايعبر بيديه) لعب بيسي انا ليلي مامي بوسني مامي ويينة (لعبت فالبيسي و انا و ليلى و باستني ماما ماما زوينة)
غيث:(شاف فأناييس) أرنوبة ماغاديش تجي عند بابا
أناييس: ايي لعب طابليت (انا كانلعب فطابليت)
جوري: ههههههه ويتك على لخوينزة كاتلعب فالطابليط
قمر: تبارك الله دمهوم خفيف دغيا بداو لهضرة ديك لبعلوكة عندي يالاه دادا مضاربة معاها و نهار كامل و هي بلي بلي بلو بلو حتى كلمة ماتقولها زوينة
حدرات ياسمين راسها و كاتشوف فغيث بطرف عينها كايلعب مع أنيس و هو لابس سروال جينز و تيشورت أسود كول v و صبرديلة سوداء و مرجع شعرو لور داير ساعة فيديه... ضورات وجهها عند إيلينا كاتبتاسم ليها و هي حايرة واش تنوض عندو تعنقو ولا تجلس تتكمش حتى تشوف اش غايدير
غيث: لحاجة بان ليا بلي غير كاطنزي علينا مامريضا ماوالو شوف كيف موردة و مبوكصة
ليث: (جا حداه) داكشي لي بان ليا حتى انا (غمزها)
إيلينا: الله يمسخكوم حاسة براسي قريب نموت
جوري: الله يبعدها عليك (باست ليها يديها)
إيلينا: الموت علينا حق و انا عشت حياتي الحمد لله و جا لوقت باش نتبع راجلي... غيث اجي اوليدي حدايا
قرب غيث حداها و ولا قريب من ياسمين... جاب كرسي و جلس و شد ليها فيديها و مبتاسم و ولدو فوق رجليه و ياسمين قريبة ليه لدرجة ركابيهوم قربو يتلاصقو و هي قلبها كايشطح سامبا
إيلينا: فين كنتي ا غيث فين غبرتي
غيث: بغيت نخوي راسي ا جدة
إيلينا: خويتيه ولا باقي
غيث: شوية و صافي
إيلينا: ماشي حشومة عليك مخلي مراتك و ولادك بعاد عليك واخا يطرا لي يطرا ماكانش خاصك تدير هاكداك عاماين ا غيث و نتا غابر تهضر معانا جوج دقايق و تقطع
غيث: جدة عندي أسبابي و بليز ماتتدخلوش هادو خصوصياتي لي واقع بيني و بين ياسمين يبقا بيني و بينها (شاف فياسمين) واحد دقيقة بغيت نهضر معاك
هزات راسها فيه و عينيها مزيرين فيهوم الدموع وحابساهوم بزز و ناض حط أنيس و خرج من لبيت و تبعاتو ياسمين فرحانة و فنفس الوقت خايفة توقع شي حاجة لي تدمرها... شافتو دخل لبيتو و دخلات نفس لبيت لي طراو فيه بزاف ديال لحوايج دخلات ليه تاني باقي كما هو الفراش لي كايتبدل فقط ضورات عينها فيه و رجعات ليها كاع ذكرياتها فيه... سد لباب و جا حداها عاقد حجبانو و مربع يديه و لاحضت تاتواج فاليد ديالو من جيهة الشرايين و لكن ماقدراتش تقرا اش مكتوب فيه
غيث: غاتبقاي هاد لمدة هنا حتى تبرا جدة هادشي جيست على قبل توينز مابغيتش نحيدهوم ليك و نخليهوم هنا من الاحسن تبقاي معاهوم و تقابليهوم
ياسمين: غيث مازال مانسيتيش (بأسى)
غيث: لمهم جيبي لحوايج لي خاصينك لهاد لمدة و هاهوا لبيت الا بغيتيه ولا ختاري شي بيت اخر
ياسمين: (قربات منو) غيث بلييز ماكفاتكش عاماين باش تنسا عارفة راسي درت غلط و لكن راه تجازيت عافاك باراكة راه عييت
غيث: سدي هاد لموضوع مابغيت حد يعرف اش وقع و الى لقيتك خرجتي لهضرة لصحافة و ولا لعائلة ماتلومي غير راسك
طارت عليه بتعنيقة و زيرات عليه و هو تصدم ماتوقعش انها تعنقو و كاتبكي فوق صدرو و كاتنخصص و كاتهضر و هو مهبط يديه و كايسوط و قلبو كايضرب بجهد بحال الا كايجري... بادلها لعناق و كايدوز يديه عليها من ضهرها و و كايدوز يديه على شعرها.... حسات بلمساتو و تبورش لحمها و رتاح قلبها و فرحات و خدات راحتها فالعناق و طولات فيه كاتحيد جزء من الشوق بداك العناق... هزات راسها شافت فيه وجهها احمر و الدموع معمريين وجهها و حيد هو يديه من على ضهرها و حطات يديها فوق صدرو
ياسمين: و الله مانعاود سمح ليا باراكة من هاد العذاب (دوزات يديها على حناكو) واش ماعيتييش! ماضركش قلبك !ماتوحشتينيش !
غيث: كيفما عندي حقوق عندك حتى نتي حقوق و من حقك تعنقي راجلك و انا واجب عليا نبادلك لعناق سي تو ا ياسمين (حيد ليها يديها) نهار غانرجع ا ياسمين غانرجع مني لراسي ماشي حتى تقوليها ليا نتي ولا يقولها ليا شي واحد اوكي !
نهامرو دموعها و هي كاتسمع هضرتو و زاد قلبها تزير عليها و كاع ديك السعادة مشات بحال الا ماعمرها كانت و رجع وجهها صفر بحال الى مافيهش الدم، خرج غيث و خلاها فالبيت جلسات فوق لفراش كاتسوعب اش وقع
حرقاتها هضرتو فقلبها و جسات براسها مااتسوا والو و بدوك لفقايص ناضت تبعاتو كاتنهج و عينيها خارجين و حمرين.. حطات يديها على ضهرو و دوراتو و عطاتو طرشة لوجه
ياسمين: انا ياسمين التازي بنت لقاع و لباع اي واحد كايتمنا شوفة مني خامس اقوى امرأة فالعالم تجي نتا تقوليا هاد الهضرة شكون نتا بالسلامة كاتخرا دياموند... درت غلط اه مشيت لبواط و سكرت و هضرت مع راجل تاني و خليت ليك لوقت باش تنسا و كل نهار كانقول بلي غادي ترجع و كانتسناك و لكن بعد هاد الهضرة صافي مشا كولشي بااااح اشنو كايصحاب ليك دابا غانبقا كانتسناك حياتي كلها راه حتا انا باغة نعيش الا كنتي نتا عاجبك حالك هاكدا انا لااا حتى انا بغيت راجلي يكون معايا و من حقيي و يخرج معايا و يهتم بيا و يقابل ولادو و هادشي نتا ماغاديش تديرو حيتاش مازال ماغاديش ترجع من الأحسن طلقني و هني راسك و هنيني طلقني باش نلقا لي يستاهلني و نعيش معاه حياتي ننعس حدا راجل فليل و نولد ولاد باقي
بقا غيث واقف مربع يديه و عاقد حجبانو مصغر عينيه كايشوف فيها و فارق رجليه و صدرو كايطلع و يهبط
غيث: صافي ساليتي ! (دور يديه على عنقها و قرب وجهو من وجهها) حرقاتك هضرتي ياك اش نقول انا لي فينما نحل عيني كاتفكر دوك التصاور راجل اخر قرب ليك و قاصك راه كانبغي نتفرgع... باغة طلقي واخا غانطلقك و لكن حتى نكون كانحتاضر باش ماتسمايش أرملة فهمتي نتي غاتبقاي على ذمتي و حتى راجل اخر ماغاديش يقرب ليك سوا كنت حداك سوا كنت بعيد عليك الراجل لوحيد لي عندو لحق ينعس حداه و يولد معاك و يقيسك هو انا
ياسمين: غانرفع عليك دعوة طلاق و الى كان عندك عمر (الفلوس) حتى انا عندي عمر هاد لهضرة مابقاتش غاتحرك فيا شي حاجة حيتاش لقلب لي كايبغيك قتلتيه و برد من جيهتك و اصعب حاجة هي يبرد القلب على حاجة كان هابل عليها
وجهها قريب من وجهو و هي كاتهضر و معصبة و وجهها حمر مزنك بزاف و كايصحاب ليها بلي مني كاتخاصم و كاتشوف فيه بلي الجدية ضاهرة على وجهها و لكن لا غالبة على وجهها البراءة و غيث هو لي كايشوفها... بدون اشعار طاح على شفافها كايلتاهم فيهوم و ياسمين كاتدفعو و ماتجاوباتش معاه حيتاش هضرتو قاصتها فالوتر الحساس..عضها عضة خفيفة فالشفة السفلية و همس فودنيها
غيث: نتي ماعارفاش شحاال من حاجة ا ياسمين قد ما كاتعدبي نتي انا كانتعدب اضعاف و اضعاف الى كنتي نتي كاتشوفيني بعيد فهاد عاماين انا كنت كانشوفك قريبة و بزااف و ماكانقدرش نقيصك ولا نبوسك ولا حتى نعنقك.... كاتكوني زوينة فاش كاتعصبي (نصف ابتسامة)
ياسمين: بعد منييي معذب ولا لخراا ماشي سوقي انا سير فحالك و طلقني ولا غانطلقك انا و كاع لي جوغنال يحلو فمهوم فيك و تولي مسكة فلسان لي يسوا و لي مايسواش
غيث: يهضرو فيا نقطع على والديهوم البيترول و يحشيو الصبع (غمزة)
ياسمين:(حيدات ليه يديه من عنقها) هاك زمرك مابغيتش باقي شي حاجة منك (عطاتو لخاتم) فيلتك غادي نرجعها ليك و حتى ل أوطيل لي عطيتيني غانرجعو ليك و دوك لي كارد لي كايضلو تابعيني ليا نواشتي مابغيتهومش
غيث: (كايشوف فالخاتم) تاني خطرة اياسمين تاني خطرة 😡 باقي شاد اعصابي و مابغيتش نتهور و طرشة لي عطيتيني غادي ترجع ليك و لكن بطريقة ثانية
ياسمين: بلا بلا بلا بعد مني ا خويا (دفعاتو) ياك غابر هادي عاماين يا سير غبر تاني و فهم راسك و عطيني بالتيساع ياسمين لي كانت كاتسناك مابقاتش و ماتت
غيث: اوكي
خشا لخاتم فجيبو و هي كاتشوف فيه مخنزرة و دار يجيه فالجيب و مشا جيهة بيت إيلينا و رجعات ياسمين لبيتو دخلات لدوش كاتنهج
عذابي الجزء 14 (الفصل الثالث)
محتوى القصة
التنقل بين الأجزاء