بقا غيث كايتعالج و هو كايرفضو حيتاش نفسيتو متضررة و واليجيه ماعارفين مايديرو حيتاش ماعارفينش لمشكل منين و هو براصو معارفش لاش نفسيتو مريضة و ليث و قمر كايشوفوه غير من بعيد ماتجرأوش يدخلو عندو خوفا لايكملو عليه... زيد عرف اش واقع و جا عند صاحبو يوميافهاد الأبوع لي جالس فيه فالكلينيك و كايحاول معاه و باغيه يهضر و هو والو غير ساكت و ناعس على ضهرو كايفكر.... اما فجهة أخرى ياسمين من نهار شاف غيث و هي فدارها لمدة تلاتة ايام منقاطعة على لعالم لخارجي و غير ناعسة و كاتاكل و كاتنسا من غيث يعيط حيت ماعندهاش الجرأة تتاصل بيه هي و ضنات بلي مشا لدبي و رجعات لخدمتها و روتينها ليومي لي هو الدار و الخدمة و شي كلوب تجلس فيه بوحدها تشوف بنادم مع كاس ديال شامبانيا حتا تلحق 12 ديال ليل و ترجع لدارها و سليم كايحاول يرجع علاقتو مع ياسمين و كايلقا تجاوب معاها و لكن قليل و فعلا حسات بداكشي لي حاس هو.
كعادتهم مشاو طلو على غيث و هبطو للكافيتيريا و لقاو ليث و قمر جالسين شادين كافي عاصرين عليها تما و هوما يجلسو حداهوم
زيد: مؤخرا راكوم عارفين كان كايتلاقا غير مع ياسمين لنا و مابقاش كايشوفني بزاف
شهاب: شفتو مقرب منها بزاف و فاش كانلوح ليه لهضرة كايقول لا غير ديزامي
زيد: داكشي لي كايقوليا و كانضن بلي هضرتو صحيحة حيتاش باغي متعلق بزمرد
قمر: اجي بعجا كاع مابانت ليا هي مازارتوش كااع!
شهاب: راه ماعارفاش
ليث: غير حنا لي عارفين صافي جمعنا و طوينا لخبار قبل ماتوصل لجورنال
جوري: ياكما باغي يشوفها !
زيد: ممكن راه تقربو من بعضباتهوم بزاف
شهاب: ماعمر غيث جاب شي بنت عرفنا عليها من غير زمرد حتى جابها هي
ليث:خويا و عارفو سييغ غادي تكون مهمة عندو
جوري: اوا فينها هي نمشيو نهضرو معاها
زيد: ماعارفهاش فاش خدامة
ليث: سميتها ياسمين التازي ولا العمراني
زيد:باش عرفتي !
ليث: هي قالت لينا بلي خدامة فشركة التازي و العمراني نسيتو
قمر: نتا لوحيد لي عاقل سبحان الله 😒
ليث:(بهمس) ماتغيريش راه نتي لي فالقلب 😉
جبد زيد تيلي ديالو و قلب فجوجل و جبد المعلومات على الشركة و العنوان ديالها
زيد: كاينة ف.......
جوري: اوا زيد ا ولدي نمشيو نجيبوها لعل و عسى توقع شي حاجة و يتبدل
مشات جوري مع زيد و ركبو فلوطو و اتاجهو للشركة بعد ربع ساعة وصلو و بلاصاو لوطو و هبطو جوري لابسة مونطو باج حد الركبة مع ليبة وموس و صباط طالون باج و طالقة شعرها و هازة صاك بيج كاتبان أنيقة و شخصية و زيد لابس سروال جينز و تريكو أسود بالكم و جاكيط من لفوق كحلة و فرجليه صبرديلة كحلة و ساعة فيديه و شعرو واقف كيف القنفود... دار الطريق لجوري و بقات غادة سابقاه كاتمشا بالعبار دخلات لشركة و مشات للإستقبال و بدات كاتهضر معاها بلونكلي
جوري: سلام.. فين جا لبيرو ديال مادموزيل ياسمين
....: آخر إيطاج ا مدام
جوري: تانكيو
مشات جوري و موراها زيد حتا طلعو فلاسنسور
زيد: خالتي لاش هضرتي معاها بلونكلي
جوري: الإدارات ديال المغرب ماشي بحال ديال الخارج ا ولدي هنا الى عرفوك ولد لبلاد يحقروك و الى عرفوك اجنبي يهزوك فوق راسهوم ماشفتيش كيفاش سمحات فالناس و جاوباتني
زيد: همممم ماعندي مايتسالك مطورة ا خالتي
وصلو لآخر إطاج و خرجو مشاو للسكريتيرة ديال ياسمين
جوري: سلام هنا لبيرو ديال ياسمين!
حياة: وي هنا شكون نتي ا مدام!
جوري: قولي ليها جوري راييس
حياة: عندك موعد!
جوري: نو غير عيطي عليها و قولي ليها شكون انا
حياة:اوكي مدام تسناي
هزات حياة تيليفون و عيطات لياسمين
ياسمين: وي حياة
حياة: مادموزيل واحد لمرا بغات تشوفك
ياسمين:عندها موعد
حياة: لاا
ياسمين: حددي معاها موعد انا مامسالياش دابا
حياة: قالت ليا سميتها جوري راييس
ياسمين: شنووو! جوري راييس
حياة: وي مادموزيل هاهيا هنا
ياسمين: دخليها ويلي اش كاتسناي
قطعات ياسمين و ناضت حياة حلات لباب و دخلاتهوم عندها و لقاوها جاية باش تحل لباب لابسة صاية رمادية حد الركبة فيها شق من الجنب مع تريكو رمادي فوق ج جاكيط مسدودة و فرجليها سبرديلة بالغوز و طالقة شعرها و دايرة مكياج كاتبان كيف فالفريزة
ياسمين: مدام سمحي ليا ماعرفتكش جاية (سلمات عليها بالوجه)
جوري: هانية ا حبيبة انا لي درت لفوط و ماخديتش موعد
ياسمين: ويلي على موعد غاتقلقيني منك ا خالتي تفضلي جلسي (شافت زيد) زيد مرحبا دخل
زيد: (دخل) ميغسي
ياسمين: (جلسات) تشربو شي حاجة
زيد:نو ميغسي
جوري: لا شكرا حبيبة... جيت ا بنتي باش ندوي معاك فحاجة مهمة
ياسمين: لي هي ا خالتي !
جوري: غيث
ياسمين:(بلهفة) مالو!
جوري: دار كسيدة
ياسمين: شنووو 😨
جوري: سيمانة لي فاتت
ياسمين: ياكما طرات فيه شي حاجة ياكما ضربة خايبة !!! 😨😨
جوري: راه فايق و عايش و لكن ماكايتجاوبش مع لعلاج و فاش كانسولوه ماكايجاوبانش ماعرفناش مالو (شدات ليها فيديها) ولدي كايضيع مني ا ياسمين عافاك اجي معانا يقدر يتحسن فاش يشوفك
ياسمين:(مصدومة) اش طرا و كيفاش !
جوري: سيمانة لي فاتت خرج تعشا برا اصلا هو هاد الأشهر الأخيرة مابقاش نورمال غير كاعي و مقلق خرج مابيهش رجع كاعي و مامبينش طرا موشكيل عائلي و نفاجر على خوه و دابز معاه و دار كسيدة
ياسمين: كان معايا داك النهار انا السباب ناري يا ربي
جوري: كيفاش نتي السباب!
ياسمين: قلت ليه شي حاجة قلقاتو... ف اينا صبيطار كاين هو !
جوري: فكلينيك.....
ياسمين: زيد نمشيو دابا
هزات لكاشكول ديالها فالغوز مفتوح و صاكها فالشيبي كيوت و تيلي و خرجات هبطات معاهوم و عيونها الرماديين كايلمعو بالخوف و كاتلوم فراسها و كاتفكر فكل لحضة دوزاتها بعيدة عليه كانضن بلي هو فدبي و هو مابين الحياة و الموت... ركبات معاهوم فلوطو و بعد مسافة الطريق وصلو هبطات جوري و ياسمين و مشا زيد باش يسطاسيوني لوطو و دخلو هوما بجوجات كايديرو خطوات سريعة و لي كارد كايضورو فالكلينيك مؤمنين لحماية لآل راييس... وراتها لبيت دياالو فين كاين و وصلو ليه
جوري: دخلي نتي بعدا شوفي اش غايقولك
شافت فيها ياسمين و بعيون مليئة بالحزن شافت فالباب و حطات يديها على لبوانيي و قلبها كايضرب بحال الى كانت فكورس ضورات لبوانيي و حلات لباب و رسمات ابتسامة زائفة على وجهها و دخلات لقاتو ناعس على ضهرو كايتفرج و لبيت مضلم ماداخلش ليه حس الضو و رجلو مهزوزة حيتاش باقي مهرس و راسو فيه فاصمة كبيرة و شعرو زاد طوال و ليحتو زادت كترات... شاف جيهة لباب و تصدم ماعرف مايقول و هي بوجه بشوش كاتشوف قيه و كاتحاول تخبي داك الخوف و الشوق لي كاتحس جيهتو
ياسمين: غبرت سيمانة و جيت لقيتك فكلينيك كون غبرت شهر غانلقاك فالقبر ههههه هاد لبيت غامل مسكين ماكاتضربش فيه الشمس
مشات جيهة الشرجم و حيدات الريدو و دخلات أشعة الشمس الذهبية مخلطة مع رياح موسمية... هز غيث يديه دارها على عينيه طاكا بيها الشمس لي ضرباتو على وجهو على ما ولفها و هي تبان لي ياسمين جاية جيهتو و جلسات حداه و دارت رجل فوق رجل و كاتشوف فيه كاتفرنس
ياسمين: ماتوحشتينيش ! (طلعات حواجبها و هبطاتهوم)
غيث:(الصمت)
ياسمين: مالك ساكت ياكما تزيزنتي ههههههه
غيث: كيفاش قادرة تضحكي !
ياسمين: وعلاش مانضحكش !
غيث: مانعرف واقلة خاص دابا تكوني مكتائبة و مريضة و قلبك مجروح
ياسمين: دزت من داكشي و لي ماكاتقتلك كاتقويك ا غيث
غيث: عارفة بلي الخطأ ديالك هاداك
ياسمين: عارفة بلي الخطأ ديالي أنني بغيتك
غيث: و انا رفضتك
ياسمين: عارفة رفضتيني بإحترام و بلى ماتجرح مشاعري..غيث سيلتو بلي بلا ماندويو على هادشي نسا هادشي صفحة و طويناها خلينا ديزامي و الأهم من هادشي خلينا نخرجوك من الصبيطار
بقا غيث كايشوف فياسمين و كايتأمل ملامحها و كايشوفها شحال زيانت و ماعارف باش يحس و باش بالفرحة و لا لحزن
مشات جوري و جلسات ياسمين فوق لكرسي مصدومة باغة تبكي و لكن حابسة راسها توحشاتو توحشات كلشي فيه قلبها كان كايبكي الدم ماكرهاتش تتلاح عليه و تعنقو و تقوليه كانبغيك باقة كانبغيك و غانبقا ديما كانبغيك مي ماقدراتش مابغاتش تعاود نفس الغلط جوج خطرات و ها نتيجة المرة ل أولى لقات غيث فالكلينيك و الثانية تقدر تلقاه فالقبر و قررات باش ماتهضرش معاه فهاد الموضوع و تنساه فخطرة واخا صعيبة عليك و لكن الحالة فاش لقاتو أصعب من حالتها.
لبنات راه ماكاتخلصونيش اوكي يعني غادي نحط فالوقت لي يناسبني انا و نكون مسالية فيه ماشي نتي ماعندك مايتدار راه حتا انا ماعندي مايتدار تلاتة ديال الاجزاء كانحطهوم يوميا هوما علاش قديت نكتب اوكي لي قالت ليا باقي راه كاتعطلي و لا حطلينا سربي ولا ولا .... غادي نبلوكيها و ماتطلعش ليها لقصة هادا ميساج لدوك لي فيهوم لفارة
ناضت و هي كاتداعي لقوة و دخلات عندو تاني و هو بحال الا كان كايتسناها ترجع... جلسات حداه و بقات كاتشوف فيه و هو يهز يديه لي مامهرساش و جر خصلة من شعرها و دارها مور ودنيها
غيث: نتي زوينة و مرحة و ذكية و بشوشة غادي تلقاي لي يستاهلك غادي تعذبي راسك معايا ا جاس (حط يديه على وجهها)
ياسمين:(حطات يديها على يديه لي فوجهها) ماجيتش هنا باش ندويو فهادشي ا غيث صحتك هي الأهم عائلتك مشطونة عليك برا هي لولا عاد نقلبوها كومبا تاني
غيث: الا بريت غادي نرجع لدبي عندنا غير هاد الأيام ديال لعلاج
ياسمين: ماشي موشكيل لمهم تتعالج راه سامحة فخدمتي و جاية عندك
غيث: كون كنتي فحياتي قبل كون خطفتك و تزوجت بيك ماكاينش بحالك ا جاسمن
ياسمين: علاش كاتقوليا جاسمن سميتي ياسمينة ولا مينة
غيث: كانبغي نكون متميز عندك كولشي كايقولك ياسمين ولا مينة انا بغيت نقولك حاجة نتميز بيها عندك
ياسمين: راك اصلا متميز عندي
غيث: باش (طلع حواجبو)
ياسمين: نتا لوحيد لي كانعرفو عينيه خضرين
غيث: نتي لوحيدة لي كانعرف عينيها رماديين
ياسمين: ههههههه
غيث: ضحكتك زوينة
ياسمين: كاتغازلني عاين باين
غيث: تستاهلي يتقال شعر فجمالك (دخل الطبيب)
طبيب: مسيو غيث صافا ! باش كاتحس
غيث: نورمال
ياسمين: انا غانخرج (وقفات)
غيث: خليك (شدها من يدها) بغيتك حدايا
ياسمين طلعات معاها الصهدة و قلبها بدا كايضرب و تزنكو حناكها و كاتحس بمعدتها ماشي نورمال بحال الى شي حاجة كاتحرك فيها... بقات جالسة حداه و يديها مشبوكة مع يديه و الطبيب كايقلب فيه
طبيب: الحمد لله مابقيتيش كيف لول الجرح ديال الراس بدا كايبرا و ما أثراتش الضربة على دماغك عند الزهر و صافي
غيث: الحمد لله
طبيب: كتب ليك ربي عمر جديد
غيث: نحمدوه و نشكروه
طبيب: واحد شوية غادي تجي لممرضة تبدل ليك سيروم الى ضراتك شي حاجة قولها ليها
غيث: ان شاء الله... ايمتا يمكن ليا نخرج
طبيب: مازال حتا تبرا لكسور لي فيك و الجرح ديال راسك يبرا و يتجمع و نتأكدو بلي ماعندكش شي حاجة داخلية اهم حاجة هي النفسية ديالك ماخاصهاش تبقا مريضة و تجاوب مع لعلاج ماشي ترفضو
ياسمين:كون متأكد من هادي انا غادي نخليه يتعالج بزز منو
طبيب:ان شاء الله... بالشفاء (خرج)
مشات ياسمين لدارها جابت لبيسي ديالها و داكشي لي غادي تحتاج خلال الإقامة ديالها معاه حيتاش تافقت مع واليديه باش تقابلو لوقت كامل.... هزات صاك دارت فيه لحوايج لي غادي تحتاج و مستحضرات ديولها و رجعات عندو فليل بعدما توادع مع عائلتو و مشاو فحالهوم.... دخلات عندو للبيت لقاتو كايتفرج و لماكلة حداه مامسوقش ليها حيتاش كولشي مصلوق و صحي... حطات صاكها و هزات بيجامة عبارة عن شورط حد الركبة و بديباردور ديالها فيها وريدات فالقهوي و لبيجامة بالباج كاتبين جزء من لملابس الداخلية ديالها ماسوقاتش للبرد حيتاش لغرفة مكيفة و سخونة هزات بانطوفة ديالها سخونة و دخلات لدوش لبسات حوايجها و هزات لكريمات الليلية دهناتهوم و مشطات شعرها و طلقاتو على راحتو زاد طوال و وقرب يوصل لخصرها حيتاش مهلية فيه و زادها أنوثة و جمال... خرجات لقات لماكلة باقة كيفما هي ماقاصهاش و جالس كايتفرج و يشوف فيها بنص عين حتا جات حداه جلسات كاتشوف فيه و شعرها مدلي مغطي صدرها من لقدام
ياسمين: ماغاديش تاكل
غيث: علاش هاديك ماكلة
ياسمين: اوا هاديك هي لماكلة الصحية ليك
غيث: مابغيتهاش ميغسي
ياسمين: عافاك كول شوية عافاااااك (كاتمسكن)
غيث: لا مابغيتش (خنزر و شاف فالتلفازة)
ياسمين:(تحلوين) عافااااك غيوشي
شاف فيها غيث بقلة حيلة و غلباتو بنضراتها و وجها لبرئ
غيث: وكليني
ياسمين: واخا 😄
بدات كاتعطيه ياكل بحال شي دري صغير كاتدللو و هو كايستقبل لماكلة بكل فرح و كاع داك لحزن لي كان كايحس بيه مشا كأن الحياة بتاسمت ليه من جديد.
كمل ماكلتو تحت اصرارها و مسحات ليه فمو و ناضت عيطات على لممرضة الخاصة بالغرفة ديالو دات الماكلة و هي تنعس فالفراش لي دارو ليها حداه و تكات و جرات مانطة من لبايير و جبدات لبيسي و بقات خدامة كاتكمل داكشي لي خلات من لبيرو ... طفا غيث تلفازة و غمض عينيه و بقا كايتسمع صوت التقاء اصابعها بالكلافيي ديال لبيسي حتا بدا كايداعب النوم جفونها و هي تنوض حطات لبيسي فوق لفراش وهزات لفلوس و خرجات كاتقلب على لماكنة ديال لقهوة فالكولوارات دياال لكلينيك حتا لقاتها و ختارت قهوة قاصحة و هو يجي حداها طبيب باقي شاب و زعر طويل كايفتن بالزين عينيه مايلين لزروقية
طبيب: فخبار طبيب ديالك بلي غادي تشربي قهوة
ياسمين:(ضورات وجهها شافتو) نو انا ماشي مريضة انا غير جالسة هنا مع واحد الصديق
تصدم الطبيب مني شاف وجهها البرئ الجميل و مني سمع صوتها الرقيق الرنان و بلا مايعيق شاف الآلة و خدا لكافي لي بغا
طبيب: اه اوكي سي بون سمحي ليا
ياسمين: ماشي موشكيل 😊
مشات ياسمين هازة لقهوة سخونة فيديها و شعرها غادي جاي كايضرب فضهرها و هو يلحق عليها الطبيب
طبيب: سمحي ليا على ديرونجمون فين جات لغرفة ديالك
ياسمين: فديك الجيهة
طبيب: تسمحي ليا نمشي معاك حتا توصلي تما
ياسمين: ماشي موشكيل
بقات غادة معاه و هو كايهضر و هي كذلك و لكن اهم حاجة ماداروهاش ماعرفوش على ريوسهوم لبعضهوم لبعض. وصلات للغرفة و وقفات برا ضورات لبوانيي و تحل جزء من لباب
ياسمين: ميغسي
طبيب: ماشي موشكيل يالاه بسلامة عليك و تهلاي فراسك
ياسمين: طوا اوسي...بااااي
دخلات و سدات لباب و هو يحل غيث عينيه
غيث:فين كنتي!
ياسمين: باقي فايق!! مشيت جبت قهوة علاش
غيث: شكون هاداك لي كان معاك
ياسمين: واحد الطبيب جا معايا حتا لشومبر ديالك
غيث:(طلعها من راسها تال رجليها) خرجتي برا هاكداك
ياسمين: (كاتشوف راسها) و مالها!
غيث: غير سليب لي لابسة كايبان لاطراس ديالو و سوتيام كذالك عادي عندك
ياسمين:اوا حتا نتا راه ماشافني حد
غيث: شافك داك الطبيب (عاقد حجبانو) جاسمن طول مانتي معايا هنا مانبغيكش تخرجي هاكداك لبسي شي مونطو و خرجي اوكي
ياسمين: اوكي ماشي موشكيل... يالاه نعس باراكة من السهير
غيث: تصبحي على خير
ياسمين: تصبح على خير
شرقات شميسة ذهبية مغطياها غيوم رمادية كاتعلن عن بداية يوم جديد.
ناضت ياسمين كاتكسل و تحك فعويناتها و جامعة فمها مكمشاه و شعرها مليوح موراها و تحل عينيها مويان و شافت غيث كايشوف فيها كايفرنس و هي تبتاسم ابتسامة فرح
غيث: صباح لخير
ياسمين: صباح النوووور
غيث:نعستي مزيان
ياسمين: وي 😊 منيمتا و نتا فايق
غيث: من قبيلة كانشوف فيك كيفاش ناعسة
ياسمين:(تزنكات) و كيفاش كانبان
غيث: بحال شي بنت صغيرة عندك نعسة طفولية
ياسمين:(ناضت) ههههه اصلا انا كيوت
غيث: و بزااف
بقات غادة قدامو و هو حاضي تحركاتها و حاضي رجيلاتها لبيضين الطوال المطبزين حتا غبرات و دخلات لطواليط
غيث: غيث رلاكس وااه شد راسك ا صاحبي
بعد برهة خرجات ياسمين من طواليط و شيتة ديال السنان فيديها و سينيال خباتهوم و جلسات حدا غيث وركات على الزر و جات الممرضة
ياسمين: فطور الله يخليك
ممرضة: واخا ا مادموزيل
خرجات الممرضة و تقابلات ياسمين مع غيث
غيث: بدلي ليا تيشورت
ياسمين: فينو تيشورت ديالك
غيث: فلبلاكار حليه و غاتلقاي حوايجي
ناضت حلات لبلاكار و لقات حوايجو مستفين تما قلال غير باش يبدل... هزات تيشورت رمادي سامبل بالكول v و سدات لبلاكار و جلسات حداه
غيث: ستفي حتا حوايجك
ياسمين: لا بلاش غير خليهوم هاكداك... جلس باش نقدر نحيدو ليك
قربات ليه و جلس هو و بدات كاتهز ليه فالتيشورت لي لابس حتا تحررات واحد ليد و بقات اليد لي فيها الكبص حاصلة
ياسمين: دابا اش نديرو
غيث: قطعيه
ناضت جابت مقص و قطعاتو و بقا عريان و الجسد ديالو سخون حطات يديها على صدرو كاتحسس ليزاب ديالو
ياسمين: عندك واعرين 😍
غيث: ههههههه حتا نتي واعرة (حاوط يديه على خصرها)اححح كون كنت مزوج بيك
ياسمين:اش غاتدير (بدلع)
غيث: (قربها ليه) غاناكلك ههههه و دايزة فيك لماكلة حيتاش حلوة بحال لبوسة لي عطيتيني (غمزة)
تزنكات و تفكرات نهار باستو ففمو و هي ترجع بلور و هو بقا كايضحك عليها و يديها باقة فوق صدرو كاتحسس فيه
غيث: كاتحرشي بيا
ياسمين: انا 😳
غيث: شوفي يديك اش كاتدير
ياسمين:(شافتها) عادي داكشي 😅 تقاد باش نلبسك تيشورت
خشا راسو فتيشورت و هي مقربة ليه و هي تدخل ممرضة و جارة طابلة فيها لفطور شافتهوم و تحرجات كيصحاب ليها كايديرو شي حاجة
ممرضة: سمحو ليا 😳😳
ياسمين: دخلي دخلي راه غير كانلبس ليه تيشورت
بقات مضاربة مع تيشورت حتا لبساتو ليه و جاه لاصق مع الجسد ديالو و جلسو كايفطرو بجوج
فطرو بجوج و جات الممرضة دات الطابلة و جات عائلة غيث زارتو غير جوري و شهاب و زيد اما قمر و ليث باقي ماتجرؤوش يجيو حيتاش كايلومو راسهوم.... بقاو مجمعين حتا جا طبيب قلب غيث و و حيد ليه لكبص ديال يديه و بقا غير ديال رجليه و جابو ليه لعكاز.
بقات ياسمين معاه و خدامة فالبيسي و هو كايتفرج حتى تعاشت لعشية و حس بالملل
غيث: بغيت نخرج
ياسمين: فين غاتخرج
غيث: لجردة يضرب فيا شوية دياال لبرد
ياسمين: بديك لحالة
غيث: و مالها !
جلس غيث و جر لعكاكز حداه و تكا عليهوم و وقف على رجل و لوخرا بقات مهزوزة لور و كايتمشا و هي تنوض ياسمين بغات تمشي معاه
غيث: (خنزر فيها) لبسي شي حاجة شنو غاتخرجي هاكدا و السترينغ كايبان
ياسمين: اوفففف
مشات كاتأفف و كاتنفخ هزات مونطو كحل حد الركبة زوين لبساتو و بانطوفة فرجليها و جامعة شعرها كو دو شوفال و هي تعاون غيث و خرجو من شومبر و خرجو برا لجريدة جلس كايشوف فالربيع و لبرد خفيف كايضرب فيهوم
ياسمين: دابا مزيان
غيث: وي توحشت نجلس هههه ضهري دخل بكترة النعاس
ياسمين: لا لا باقي مفورمي هههه
غيث:(جرها عندو) ياكما فيك لبرد
ياسمين: لا راه لابسة ! و نتا !
غيث: لا داتي سخونة (غمزة)
بقا مضور يديه على خصرها و راسها على صدرو و هي مضورة يديها عليه بغات تمنعو و تحيد يديه و لكن ستحلاتها و عجبها لحال و كاتروي عطش قلبها الجريح ماكرهاتش يبقاو بجوج هاكداك كايدفيو بعضياتهوم حتا سمعو تنحنيحة من موراهوم و ضارو
ياسمين: اووه هادا نتا (ناضت)
غيث: شكون ( عاقد حجبانو)
طبيب: سلام(من يديه)
ياسمين: و عليكم سلام (سلمات عليه)
غيث: شكون هادا !
ياسمين: طبيب لي كنت معاه لبارح
غيث: هادا هو
طبيب: سميتك ياسمين التازي ياك
ياسمين: وي باس عرفتي !
طبيب: ماعقلتيش عليا
ياسمين: نو (بحيرة)
طبيب: دري داخل سوق راسو مكمش ديما عتارفتي ليه بإعجابك جيهتو فالحفلة ديال آخر السنة !
ياسمين: oh my god (حلات فمها) شَرَف الزايدي
شرف: وي هو انا
ياسمين: (عنقاتو) و الله ماعقلت عليك كبيرتي و تبدلتي و زيانيتي
شرف: حتا نتي كنتي زوينة و زدتي زيانيتي
وقف غيث متاكي على لعكاز عاقد حجبانو و هو يوقف حدا ياسمين
ياسمين: ههههه غيث هادا هو الدري لي عاودت ليك عليه شرف هاجا هو الصديق لي قلت ليك جالسة معاه غيث راييس
شرف: متشرفين مسيو غيث (مد يديه)
سلم عليه غيث و هو منفخ ماحملوش
شرف: نتا هو لي بسبابو كاينين هاد لي كارد كاملين و ديك لحيحة
غيث: غير بوحدي قاضي لغاراض مانحتاجش رجال
ياسمين:(قلبات لموضوع) مالك ماقلتيش ليا شكون نتا لبارح
شرف: كايصحاب ليا غاتعرفيني مي والو نسيتيني
ياسمين: نو راه تبدلتي بزاف عيونك لي باقيين كيفما هوما.... كيفاش عرفتيني
شدات ياسمين فغيث حتا رجعو لشومبر و نعساتو ففراشو و هو كاعي و حيدات لمونطو و جلسات فوق فراشها
ياسمين: مالك
غيث: والو
ياسمين: اوك
غيث: فاش شفتيه تحركات شي حاجة فيك ياك
ياسمين: بحالاش
غيث: مانعرف متلا قلبك ضرب حتا عنقتيه
ياسمين: من نيتك 😒 حمق نتا
غيث: اوا طريقة باش كاتشوفي فيه ماشي نورمال
ياسمين: ياكما غرتي 😁
غيث: بففف انا نغير عليك حمقة نتي
ياسمين: اوا خليني نخدم
بقات ياسمين خدامة و بدا كايجيها النعاس و الخدمة باقة ماكملاتش و ناضت باش تجيب قهوة و تسهر لبسات لمونطو ديالها و خرجات كاتسلت باش ماتفيقش غيث ... خرجات برا و بقات غادة لجيهة ماكينة ديال لقهوة حتا لقاتو حتا حداها واقف كايخرج قهوتو
ياسمين: شرف ☺
شرف: اوووه ياسمين
ياسمين: اش كاتدير هنا !
شرف: بغيت قهوة مازال سهران و نتي
ياسمين: بحالي بحالك عندي خدمة و شدني النعاس و بغيت شوية ديال لكافيين
مشا شرف و دخلات ياسمين بلا ماتدير لحس و غيث فايق حاس بيها و سمع لهضرة ديالها هي و شرف و بقا مغمض عينيه و حجبانو مقرونين و العافية شاعلة فيه معصب و مغدد ماكرهش ينوض يصعصع و يعرعر و لكن جسمو مامعاونوش رجلو مهرسة و راسو محلول و مهدود حيتاش دالا مجهود و خرج برا.... قربات حدا ياسمين و شافت عاقد حجبانو و كايسوط النار و هي تدوز صبعانها بين عينيه كاتسرحهم ليه
ياسمين: معصب حتا فالنعاس يعلم الله معامن مضارب تاني فأحلامو
ترخى غيث فاش حس فلمساتها فجبهتو و استحلاها حتا مشات هي طلعات فوق فراشها هزات لبيسي و كاتشرب قهيوتها.
جوايه تلاتة ديال ليل فاق غيث و ضار جيهة ياسمين شافها خدامة باقة فايقة و هو شداتو بولة و خاصو ينوض يديرها حيتا تجمعات فيه ديال نهار كامل... شافتو ياسمين و هي تحيد لبيسي من فوقها و تقادات معاه
ياسمين: خاصاك شي حاجة
غيث: (تفكر داكشي لي دارت) لا والو كملي شغلك
ناض و تكا على عكازو و بقا غادي و هي تنوض باش تعاونو
ياسمين: باغي طواليط
غيث: ماشي شغلك
خلاها و دخل لدوش و سد عليه و قضا غراضو و خرج لقاها واقفة كاتنساه
ياسمين: غيث مزيان دابا
ماجاوبهاش و زاد و خلاها و رجع فوق لفراش و غمض عينيه و جلسات حداه
ياسمين: غيوووش مالك اش بيك !
غيث: والو (بنفخة)
ياسمين: بلاش كاتنفخ عليا مالي اش دايرة ليك 😡
ناضت من حداه كاعيا و رجعات لبلاصتها كملات خدمتها فالبيسي حتا عيات و حطات لبيسي و نعسات
داز سيمانة فلمح لبصر و ياسمين و غيث الجو بيناتهوم مكهرب و ولات كاتلقا مع شرف كل ليلة تقريبا كاتخرج من لبيت فليل و كاتجلس تهضر معاه و يرجعو الذكريات و غيث كايتبعها بلا ماتحس و حيتاش حيدو ليه لجبص ديال رجليه ولات كاتجيه مزيانة كايتنقل بكل حرية شادو باقي فالصبيطار الضربة لي فراسو.
ليوم كسائر الأيام فاقت ياسمين و نضات مشات لطواليط حكات سنانها و قضات حاجتها و غسلات سنانها و خرجات لقات غيث فايق معمش مخنزر كايسوط كيفةالعافية... ناض و دخل لدوش وي عيطات على لممرضة باش تجيب لفطور كيف لعادة و بدلات حوايجها و لبسات سروال مزير فالزرق مغلوق مع تريكو بيض ديال الصوف و بوتيو ماطويلش فالأسود كاع مزغب... جلسات فوق الفراش و خرج هو لابس سروال ديال لكيطما رمادي و لفوق تيشورت أسود و كايشوف فيها بنص عين و هي كاتوجد فصاك ديال يجيها معولة تخرج... جلس هو فوق فراشو و كايشوف فيها
غيث: فين غادة!
ياسمين: خارجة
غيث:مزيان
ياسمين: لممرضة غاتجيب ليك لفطور فطر مزيان و ها تيليكوموند و هال لبيسي ديالك و ها تيلي حتاجيتي شي حاجة عيط ليا
خرجات و بقا غيث ضارو راسو بغا يعرفها فين مشات... بقا غادي جاي فبيتو و غير شاعل كلمة جوج كايسب و يعاير... بقا هاكداك حتا طاح الضلام و جات فيها ريحة ديال الشراب ماسكراتش غير شربات شوية باش تقاد لمورال... دخلات لشومبر و لقاتو عاطيها بالضهر و كايشوف فالشرجم مربع يديه و فارق رجليه و مخنزر حس بيها دخلات و سمع لباب تسد و بقات غادة جيهة حوايجها و هو يشم ريحة الشراب و ضار عندها مخنزر و عينيه خارجين
غيث: ماشي سوقي موتي نتي وياه غير ماتبقاش تديري بيا السبة و تباني قدام عائلتي مزيانة جاية باش تلاقاي مع حبيب لقلب سيري ديريكت عندو ماتديريش بيا الطريق
ياسمين:(كاتبكي) شرف راه خاطب 😭😭 كانجلسو كانبقاو غير كايعاود ليا عليها و ليوم داني تلاقيت معاها نتا لي عقلك ماعرفت مالو 😭😭 اهنتيني ا غيث و ماعمرني غادي ننسا هادشي فحياتي نسا بلي كنتي كاتعرف شي وحدة سميتها ياسمين... ندمت على النهار لي بغيتك فيه
خلاتو مصدوم ماعرف باش تبلا هزات صاكها و هي كاتبكي و جنعات حوايجها و هو يتبعها و قرب ليها
غيث: (بندم) ياسمين 😔
ياسمين:ماتقيسنيش بعد مني
ضربات فيه و زادت كاتبكي و قلبها مشدود عليها
مشات ديريكت لدارها و غير كاتبكي و قلبها كايضرها و ندمات على اىنهار لي عرفات فيه غيث أكثر واحد بغاتو من قلبها هو أكثر واحد جرح قلبها.... بدلاات حوايجها بالزعفة و الدموع هابطين و الخنونة حتا هي و كاتنخصص لبسات بيجامتها و سمعات الدقان فالباب مشات بوجهها لي حمر و حلات لباب لقات سليم واقف شافها هاكداك و تخلع عليها
سليم: مينة مالكي 😨
ياسمين: سليم 😭😭😭
تلاحت عليه عنقاتو و بقا كايدوز يديه على ضهرها و كايسكتها و هي خاشية راسها فصدرو و دموعها فحوايجو و كاتشهق... فهاد لوقت غيث تبعها باش يتصالح معاها حيت تنادم معاه لحال و خرج من لكلينيك و جابو واحد من لي كارد فلوطو و طلع للإطاج فاش ساكنة هي و هو يشوف داك لمنظر سليم معنقها و هي كاتبكي و شهقاتها كاتسمع حتا لعندو... بسرعة قلب وجهو و قلب طريق رجع لكلينيك و كايلوم فراسو و مابقاش عندو لوجه باش يمشي عندها بعد داكشي لي شاف.
صبح الصباح ولا هو شاف شي نعاس ليل كاملو و هو فايق كايتفكر لهضرة لي قاليها و كاتعاود فدماغو و الندم كاياكل فيك و نسا زمرد و لموت ديالها و شغلات بالو ياسمين... بداو الناس كايتحركو فالكلينيك و جات عندو جوري كيف ديما دخلات لقاتو جالس فوق فوطوي و سلمات عليه و جلسات حداه
جوري: مال حبيبي
غيث: لواليجة ما عندي مورال
جوري: فين ياسمين
غيث: ماعرفتش
جوري: كانت فالصباح!
غيث: مشات لبارح
جوري: غاتكون عندها شي حاجة داكشي علاش مشات... فطرتي
غيث: لاا
جوري: انا نمشي نجيب لحبيبي لفطور
خرجات جوري بالخف و خلات غيث جالس غادي يطرطق ماعارفش اش بيه و كايحاول مايبينش لموو... تحل لباب و دخلات ياسمين لابسة مونطو قهوي مع ليبة موس و صباط طالون عالي و طلقة شعرها و وجهها خالي من لماكياج و اي تعابير شافها و وقف
ياسمين: نسيت لبيسي
غيث: ياسمين انا
ياسمين:(هزات يديها فوجهو) نسيت غير لبيسي هو لي جابني نقطة نهاية
تحنات باش تهز لبيسي و هو يجرها من يدها و بان ليه خاتم الماس كبير فصبعها
غيث: اش هادا!
ياسمين:(نترات يديها) ماشي سوقك
غيث:(مزير على سنانو و مخرج عينيه) اش هادا 😡
ياسمين: تخطبت صافي يالاه حيد من قدامي
غيث:(بصدمة) ايمتا !
ياسمين: لبارح يالاه عطيني بالتيساع
خرجات هي و هو بقا مدهشر كايفكر ايمتا و كيفاش تخطبات و هي غير لبارح كانت معاه سيليباطير
#فلاش_باك
دخلات ياسمين هي و سليم لدار و هو معنقها و كاتبكي و تنخصص و راسها فوق صدرو حتا جلسو و بدا كايمسح ليها دموعها و يسكت فيها
سليم:(عنقها و زير عليها) بكي و خوي قلبك عليا ا مينة يا مينتي يا نوارتي (كايدوز يديه على ضهرها)
بقات كاتبكي حتا ضرها راسها و حسات بلي رتاحت و هي تنقص من لبكا تدريجيا حتا سكتات
سليم: عاودي ليا دابا مالك و فين كنتي هاد الأيام يوميا كانجي عندك و ماكانلقاكش حتا لدابا دزت من هنا و بان ليا ضو شاعل قلت غاتكوني فالدار
ياسمين: جيتي فوقتك 😢
سليم: احح ا مينة كيف كنتي و كيف وليتي شكون هاد لحمار لي بكاك
ياسمين: حتا واحد (مخشية فيه)
سليم: قلبي غادي تسكتيه ليا و الله
ياسمين: لاش كنتي كاتجي عندي بغيتي شي حاجة!
سليم: بغيتك نتي
ياسمين : كيفاش !
سليم: عييت مانلمح ليك باش تعيقي و نتي والو مكلخة (هز يديها حطها على قلبو) نتي هنا سكنتي و عششتي هنا من صغري كانبغيك و غانبقا كانبغيك ديما عييت مانخبي حتا مرضت و الحل لوحيد هو نقول ليك هادشي فاش كانشوفك مع داك خينا كانبغي نمووت الغيرة كاتاكلني ا ياسمينة بغيتك ليا و ليا بوحدي (جبد بواطة) هادشي لي كنت باغي نقولك هاد الأيام فاش كنت كانجي عندك (تحنا على ركبتو و تقابل معاها) ياسمين تقبلي تتزوجي بيا
ياسمين: 😳😳
تصدمات ياسمين ماعرفات ماتقدم ولا توخر و هي كاتشوف فسليم لي كاينهج و فعينيه نضرة خوف من انها ترفضو ممزوجة بنظرة جب و هيام تفكرات غيث و هضرتو و هي تحدر راسها
ياسمين:(فخاطرها) جابت فرصة باش تنسايه ا ياسمين غيث مايستاهلكش لي يستاهلك هاهوا قدامك حتال ايمتا غاتبقاي كاتبغي واحد ماكايبغيكش عقلو ديما مع وحدة ميتة و كلاها دود
ياسمين:(هزات راسها) موافقة ا سليم
سليم: بصح 😃
ياسمين:(بابتسامة) وي و لكن انا ماكانبغيكش
سليم: غاتبغيني مع لوقت
خدا يدها و لبس ليها لخاتم و طلع جلس حداها باس ليها يديها و هو غايطير بالفرحة و باسها فجبهتها و هبط باش يبوسها ففمها و قلبات وجهها
ياسمين: ماشي دابا ا سليم
سليم: واخا ا حبيبة نصبر ماشي موشكيل
ياسمين: ايمتا شريتي لخاتم
سليم: شحال هادي ديما كانبغي نهضر معاك و نعطيه ليك مي ماكانتجرأش.... غدا ان شاء الله نعلمو عائلاتنا باش كولشي يكون رسمي
ياسمين: ان شاء الله
سليم: اخيرا غاتكوني ديالي مامصدقش
ياسمين: 😊
عند غيث
جات جوري محملة بالببلاطو فيه الفطور من ذوقها هي و لقات غيث لابس سروال باج بصمطة كحلة و كايلبس قاميجة فالشيبي صدافيها فالأسهد و كايصد فالصدافي و عاقد حجبانو غير كايسوط و ينفخ و الغضب خارج من عينيه و الفاصمة باقة ملوية فراسو
جوري: حبيبي فين غادي
غيث: الصمت
جوري: غيث فين غادي !
غيث: غادي فحالي خارج من هاد الكلينيك ديال المرض
جوري: اويلي 😨 بقا حتا تبرا الله يهديك
غيث: لا انا بريت و بريت شحال هادا (هز جاكيط)
جوري: مالك شفتك هاد سيمامة ماشي نورمال
غيث: (بصراخ) لواليدة بعدي مني الله يرحم ليك لواليدين ماعندي مورال ليك و لأسئلتك مخلوعة عليا و عرفناها انا بيخير مابيا والو اوكي غير بغيت نخرج من هاد الزبل و نتهنا شوية
خرج و خلاها مصدومة حيتاش ماعمرو رفع صوتو عليها حتا لدابا... مشات بتثاقل جلسات فوق الفراش و جبدات تيلي و هي تعيط على شهاب
شهاب: الو حبيبة
جوري: ش..شهاب 😭😭
شهاب: مالك لاش كاتبكي
جوري: غيث 😭😭
شهاب: مالو ! اش طرا ليه
جوري: غوت عليا 😭😭 ولدي غوت عليا ا شهاب 😭😭
شهاب: حمار... نتي فالكلينيك !
جوري: اه اهئئئ اههههئئئئ اهههههئئئئ
شهاب: ششش... هاني جاي عندك
قطع معاها و ناض من لفراش لابس غير سروال ديال لكيطما و لفوق عريان لبس لفوق ديال لكيطما بالخف و لبس سبرديلة فرجليه و هز سوارتو و خرج مع لفيلا ركب فلوطو و مشا زاف ماحبس تال لكلينيك و تسمع فران سيك باللامبورغيني ديالو.... خرج منها و خلا لي كارد ديااو تما و مشا بالجرا لقاها جالسة كاتبكي لابسة مونطو مغطي غير الفخاض و تحت منو ليبة موس و صباط طالون اسود عالي و شعرها مطلوق و وجهها مجبد مابايناش فيها بلي كبيرة فالسن حيتاش مهلية فراسها بالماكلة الصحية و السبور
شهاب: باقة كاتبكي (عنقها) ششش عاودي ليا اش طرا و فينو هو
جوري: ماعرفت مالو 😭😭😭
شهاب: دابا مسحي دموعك و عاودي ليا اش طرا من لول يالاه ا حبيبة (مسح دموعها) شششش (باسها) يا صافي
ناض و هز جاكيط ديالو و مشا ركب فلوطو ديالو مشا زااف و رجلو موراه مخرج يد من الشرجم و لوخرا فوق الفولون وعاقد حجبانو عندو هو و غيث نفس التخنزيرة... وصل قدام لبواط و دخل لقا الدنيا محيحة كولشي كايشطح و الموسيقا مجهدة و الشراب كايتشاير تما دخل و جوج رجال موراه و كايقلب بعينيه حتا لقاه فواحد لكوان متكي فوق فوطوي لايح راسو لور و مسرح ييه و مغمض عينيه و حداه احدى الراقصات لي كايكونو فالبواط كاتحلون عليه و الشراب فوق الطابلة و داير رجل فوق رجل حتا وقف عليه شهاب و بقا كايشوف فيه مربع يديه
شهاب: بكيتي مك و جاي تقصر هنا
غيث:(هز راسو بتثاقل و عينيه معسلين) لواليد
شهاب: مضور بيك ق**** هنا و الشراب و الموسيقى و مك كاتبكي لهيه
غيث: نوضي تق*** نتي من حدايا (بلسان تقيل) لعفن
ناضت لبنت من حداه بعدما شافتو معصب و خافت على راسها
شهاب:(مع رجالو) خويو ليا هنا بغيت نبقا غير انا وياه فهاد لبواط
مشاو لرجال سمعو تعليماتو و هضرو مع مول لبواط و خرج كولشي بعدما خدا تعويض و بقا غير غيث و شهاب تما.
جلس حداه و دار رجل فوق رجل و كايفيبري بيها و كايشوف فولدو سكران معصب و باينة فيه مجروح و حزين
شهاب: (هز كاس) مالك نتا كبرتي و تفرعنتي
غيث: (نصف ابتسامة) لواليد كاتشرب!
شهاب: كانديرهوم بسطاش غير خلي داك الجمل راكد
غيث: هههه
شهاب: زيد قدامي نتا حالتك حالة
غيث: مافيا لي يتحرك (كايضور وجهو وكايقلب عينيه)
شهاب: بففف كبرناكوم باش تهزونا صدقنا حنا كانهزوكم
ناض شهاب و نزل على كاس ديال لفودكا دقة وحدة و شد ولدو و بقا غادي معاونو حتا خلاجو من لبواط و ركبو فلوطو مشاو باتجاه لفيلا... وصلو و دخلو تحت انضار الجميع و طلعو لبيتو و هو يحطو فوق فراشو و طاح دودة نعس
صبح الصباح و دخلات اشعة الشمس على وجه غيث و بقاا ناعس حتا برزطاتو و فاق من النعاس هز راسو لي كان خاشيه وسط لمخاد و شاد الفراش بالطول بالعرض لضخامة ديال البنية ديالو, تقلب على ضهرو و هو يضور عينيه فالبيت و تفكر اش طرا لبارح
غيث: فاااك 😠
هو لي ماكايبغيش عائلتو تسيق لع خبار لشي حاجة كايديرها حتا لكارو كان كايكميه بالتخبية و الشراب كان كايشرلا ماكايشوفو حد احتراما لهم ماشي خوف منهم و دابا تفرش قدامهم و باه لي جابو باقي تال الفيلا... ناض معصب حيد لفاصمة من على راسو و دخل لدوش ترش عليه لما كل الجهات و بقا هابط على جسمو الجذاب المكلضم و شعرو هابط على جبهتو حيتاش طوال ليه و لحيتو كبرات... بقا مغمض عينيه و ضار الما هابط من على صدرو و فيه الزغب من صرتو لتحت خط طويل مقاد... حل عينيه و شاف راسو فالمرايا لي قدامو و بقا كايشوف فراسو رجع كيف ما كان قبل مايعرف زمرد الحجبان غير معقودين و غير كايسوط و معصب و لكاس ديما فيديه و لسيكار ففمو, قلب وجهو بسرعة و دوش بالخف و خرج لاوي فوطة على نصو التحتاني و فوطة كايمسح فيها شعرو و هو يتقابل مع لمرايا شاف الضربة لي فراسو بدات كاتجمع و هو يحل لماريو جبد سروال ديال كيطمة كحل مع توني ديالو فالأسود و مسح شعرو من لما و خلاه طايح على عينيه بحال لافخونش و خرج من لبيت و يديه فجيب توجه لبيت شهاب و جوري, وصل ليه و دق فالباب دقات خفاف
شهاب: دخل
غيث: فاااك لواليد كاين
حل لباب و دخل و لقا شهاب جالس و جوري جالسة فوق رجليه كايتهزهز بيها و هي حاطة يديها على عنقو و هو محاوطها باش ماطيحش
شهاب: ها السبع جا صافي فقتي من الشراب شوف شحال الساعة راه لوحدة دابا
جوري:(بهمس) بشوية عليه
شهاب: ههههه غير لقيتي مك حنينة فيك اما كون درت فيك شرع يدي... وليتي كاتشرب القرعة و لكاس نعام ا سي و البنات قلنا كبرتي و قاد بشغلك و مشيتي شقيتي طريقك بوحدك فدبي قلت مزيان ولدي ولا راجل يعال عليه و لكن باين بلانك تما غير القرعة و لكاس و الدريات ياك باقي جرحك مابراش و مقابل السكرة برافو
غيث: الصمت (كايتغدد)
شهاب: لمهم موشكلتك مع مك هاهيا غضبانة عليك شوف اش تدير معاها(ناض و داز من حدا غيث و شدو من يديه)
غيث: نقولها بلي راه شربتي حتا نتا لبارح 😉
شهاب: غانتبرا منك ا لمسخوط ههههه
مشا شهاب كايضحك و جوري عاطية بالضهر لغيث و هو يتقدم جيهتهاو حط يديه فوق كتفها و حيداتها ليك
غيث: مقلقة مني ا نوال الزغبي
جوري: ماكانحملش نوال الزغبي 😠
غيث: واخا و هيفاء وهبي !
جوري: عامرة كولها تجميل
غيث: و لطيفة!
جوري: هاديك زوينة شوية
غيث: نتي زين منهوم كاملين (جلس حداها) اش هاد زين على الصباح 😉 طواليتي و زدتي صغاريتي 😉
جوري: لحب يقدر يجي فأي وقت و بلا مايعلمك حتا تلقاه عشش فداتك
غيث: حاليا براكة عليا غير حبك نتي (باسها من جبهتها) صافي تصالحنا!
جوري: مانقدرش اصلا نبقا مقلقة من ولدي حبيبي
غيث: (هزها) اوا زيدي نمشيو عند راجلك
بقا هازها بين ذراعو و هي لابسة كولون كحل و لفوق تريكو هابط من كتف فالشيبي و جامعة شعرها ذيل حصان و فرجليها بانطوفة شيبية و معلقة فيه فرحانة حيتاش كايدلعها.... هبطها لتحت و هو يبان ليه شهاب جالس مع ليث خداميين و مشتتين الوراق فوق طابلة زاجية و كل واحد و لبيسي ديالو, شافو ليث و حدر راسو و هو يحط جوري حدا شهاب و جرها عندو عنقها
شهاب: تصالحتو!
جوري:(كاتحلون) اصلا مانقدرش نبقا مقلقة من ولادي
شهاب: ههههه كاتلحوني عليا جات معاك (باسها)
جلس غيث حدا ليث و شهاب مراقبهم بنص عين و كايغازل جوري
غيث: جلست فالسبيطار جوج سيمانات و ماقدرتيش تطل على خوك حتا مرة
ليث:(شاف فيه) كنتي منرفز و مريض خفت نجي عندك و تموت لينا
غيث: (حط يديه على كتف ليث) هههههه راك خويا لكبير 😉 و عارفني كتر من راسي او لا !
ليث: كاينة راه مني عقلت على راسي و نتا معايا، ماتبقاش تقهليا خويا لكبير راه بيناتنا غير شهورة اصاحبي كانحس براسي كبير هههههه
ليث: شوف ا خاي هادشي ماشي حرام انا وياها ماشي خوت غير مربيين مع بعضياتنا سي توو ماكايربطني بيها لا دم لا بزولة
غيث: اوا الله يسخر ليكوم و يوفقكوم و حددو نهار العرس بلاش من لخطبة حيتاش راكوم دوزتو عمركوم كامل و نتوما مخطوبين
ليث:هههههه عندك الحق، انا نكمل لخدمة لي سمح فيها لواليد و هاني معاك
غيث: اوا انا نخليك نمشي نخدم شوية راه ميكت على داكشي
ليث: على مولانا حتى نسالي و نطلع عندك
مشا غيث لبيتو و بقا ليث لتحت و هي تهبط عندو قمر لابسة كسوة حد الركبة بالكمام بالباج كيوت و طالقة شعرها و وجهها خالي من لمكياج و لابسة بانطوفة فرجليها و جلسات حدا ليث
ليث: حبيبة (باسها)
قمر: اش قالك غايث شفتكوم كاتهضرو و مازعمتش نهبط
ليث: والو غير بارك لينا انا وياك
قمر: من نيتك 😵
ليث: الى بغيتي
قمر:(عنقاتو) اخييرا غادي تولي ليا 😢😢
ليث: اصلا ا حبيبة انا ديالك من نهار تولدت
قمر: (حاوطاتو بيديها) اوففف على السلامة
ليث: (عينيه فالبيسي) الله يسلمك... (خدام) الواليد حتا هو خلا الخدمة و مشا مع لواليدة
قمر: فين مشاو!
ليث: لاعبين قاش قاش😉 ههههه
قمر: هههههه كاتخيلنا ولدنا و كبرنا غانبقاو بحالهوم زعما ! كل نهار كايبغيو بعضياتهوم كتر!
ليث:(شاف فيها) غادي يطيحو سنانك و غادي تعمري تجاعيد و غاتبقاي ديما فعيني أجمل وحدة و حبي ليك غادي و كايزيد
جرها لعندو و طبع قبلة على شفافها و تجاوبات معاه حتا سمعو صوت شي واحد جاي و هوما يبعدو.
جوري: اش كنتو كاتديرو !
قمر: والو 😇
جوري: غير gري ههههه راه كنت حتا انا قدكوم ههههه
ليث: كنت كانبوسها (باسها) شنو غير نتي لي يبوسك راجلك
جوري:(باستو) نتا هو ولدي لعزيز هههههه من صغرك و نتا اقرب واحد ليا
ليث: داكشي علاش كاتجي من جيهة غيث
جوري: راه كايمر فمرحلة صعيبة حاليا ماتت خطيبتو و تأزم حط راسك بلاصتو راه لاباس مني رجع كايضحك معانا دابا غير كانشد ليه لخاطر و راكوم كولكوم عزاز عندي بحال بحال حد مافايت حد راكوم ولادي و كبرتكوم و ربيتكوم و قريتكوم
ليث: عارف ا حبيبة (باس يديها) الله يخليك لينا
شهاب:(هابط من الدروج) بعد من مرتي كاتحرش بيها يا الزلال
ليث: ها هوا هههه زيد تخدم شفتك بغيتي تدير ليا هنا كانو
شهاب:(جلس حداه) علاش لواليدك شكون كبر ديك الشركة نتا متلا
ليث: اوا انا لي خدام فيها دابا
شهاب: ههههه الله يمسخك
تعاشت العشية و خرجت ياسمين مع سليم بعدما علمو العائلة بقرارهوم و فرحو ليهوم حيتاش اصلا الآباء صحاب و باغيين يزوجو ولادهوم مع بعضياتهوم و مع سليم زربان تافقو باش يديرو كولشب فالويكاند و زربو على داكشي و لكن ياسمين مابغاتش عرس و قررو يديرو غير حفلة صغيرة و يفرحو بيناتهوم، خرجو بجوج باش يمشيو عند الذهايبي و تختار ياسمين لي عجبها و كاترسم ابتسامة زائفة على وجهها باش ترضيهوم اما هي راه كاتعدب من لداخل ديالها و كاتحرق و لكن كاتصبر راسها بأن غيث مايستاهلش حبها ليه حيتاش دار معاها داك التصرف.
وصلو للقسارية ديال الذهايبية و هبطو و عنقها من جنب و بقاو غاديين فرحان هو الضحكة واصلة ليه حتا لودن و دخلو عند الذهايبي الأول
سليم: السلام عليكم
ذهايبي: و عليكم السلام مرحبا... اش حب الخاطر
سليم: شوفها هي اش بغات و عطيها داكشي ديال العريسات
ذهايبي: مرحبا ... عرسان! الله يكمل بالخير يا ربي
سليم: اميين
ذهايبي: (كايجبد و يوري لياسمين) هانتي ا بنتي كاين هاد السرتلة و كاينة هادي و كاينة هادي و ها لخواتم شوفي لي عجباتك
بقا كاتشوف ياسمين و ساهية و غير سىاكتة و هي تهز واحد السنيسلة رقيقة من الذهب مفتولة مزيان و شكلها زوين
ياسمين: عجباتني هادي
سليم: صافي ! ختاري ا حبيبة زيدي شي حاجة
ياسمين: لا باراكة ماعندي خاطر لذهب
سليم: شوف شحال فهاديك
عبرها الذهايبي و عطاها ليهوم و خلصو سليم و مشاو باش يشريو الحوايج
مشاو بجوج عند مالين لحوايج غير الماركات العالمية و الغالية دخلو و بدا كايجبد و يختار ليها و هي كاتجاوب غير بآه و لا و باين فيها لحزن و حتا هو لاحضها فيها... خرجو من تما محملين ببلاصتيكات عامرين بالحوايج و مشاو عند محل للكلابس الداخلية و لي شوميز دو نوي
ياسمين: اش كانديرو هنا!
سليم: من حقي نختار لمراتي اش تلبس ليا (غمزة)
مشا كايختار و كايجبد غير المشبك و المعري و هي كاتقول فبالها كيفاش غادي نلبس هادشي ليييه، شدات معاه لخاطر حتا ختار ليها داكشي لي بغا و خرجو و رجعو فحالهوم
صبح الصباح مضبب و مضلم و كئيب الشتا كاتصب و غيث بقا ليل كامل خدام ماغمضش عينيه او بالأحرى مابغاش يغمض عينيه، قلب وحهو جيهة الشرجم لقا الشتا كاتطيح و الجو مضبب و هو يتبورش فلحمو حيتاش ماعندوش مع هاد لجو و فدبي الأغلبية كاينة تما غير الشمس و الجو السخون. ناض من فراشو لابس غير سروال كيطما حيتاش الفيلا مكيفة و سخونة و لفوق عريان و كايبان صدرو المثير و كتافو العراض الواسعين و عاد الهضبات لي فضهرو و بنيتو صحيحة خارج فشهاب بلا بروتينات بلا لونتريما عاد مني بدا كايتريني زادت فورمتو عمرات أكثر، دخل لدوش نصل السروال و طلق عليه لما و و بدا كايدوش و كل شوية كايتنهد كل تنهيدة عامرة بالهم و كاتخرج من اعمااااق قلبو، خرج من الدوش لاوي عليه فوطة من لتحت و هو يخرج مشا للماريو حلو جبد توني فالرمادي اديداس مع سروالو فنفس اللون فيه خطوط من الجناب بالأبيض و نشف شعرو بالفوطة و لبس بانطوفة سخونة فرجليه و خرج من لبيت هبط لقا ليث جالس تما مع شهاب باينة فيهوم يالاه فاقو من النعاس
غيث: صباح لخير
ليث: صباح لخير
شهاب: صباح النور... مانعستيش!
غيث:(جلس) ااااااح لا مانعستش
ليث: اواااه و علاش !
غيث: خدام
شهاب: راه الخدمة ماغاديش تطير عطي الراحة لراسك راك باقي مريض
غيث: انا صحيح مافيا والو هانتا شوف
شهاب: كانشوف كانشوف (تنهد)
غيث: مازال ماحطو لفطور
شهاب: شوية و يحطوه
غيث: لواليدة فاقت!
شهاب: خليتها فالبيت كاتدوش
غيث: اش بان ليك!
ليث:(فهمو) يالاه طق امارش
ناضو بجوج و شهاب كايضحك عرفهوم غاديين ليها، مشاو طلعو مع الدروج و مشاو لشومبر ديالها هي و شهاب دخلو بلا مايدقو لقاوها جالسة قدام لمرايا لابسة ساية حد الركبة كحلة و الرجلين عريانين و لفوق قميجة بيضة سامبل خاشيها فالساية شعرها ناشف مصايب مطلوق كيف الحرير و طويل حيتاش مابقاتش قطعاتو من نهار عرفات شهاب، جالسة كاتدهن وجهها بالكريم المغذي الصباحي حتا شافتهوم
جوري: صباح لخير
ليث:صباح الجوري
جوري: هههههههه 😄
غيث: حبيبة (جا حداها) باراكة من الدهين راكي بوكوسة
دوزو نهارهوم عادي كايضحكو و يقشبو و الشتا برا حد ماخرج فيهوم بقاو غير فالفيلا و غيث خاشي راسو فالخدمة ملاهي فيها ماباغيش يجلس بلا مايدير شي حاجة حيتاش غادي يبدا يفكر و قلبو غايتزير عليه و غايمرض تاني و كاينسب هادشي لحزنو لموت زمرد حيتاش يالاه اشهر باش توفات.
تعشاو و طلعو لبيتهوم و بقا غيث جالس فوق فوطوي كبير مريح حدا شوميني كبيرة و العافية فيها مجهدة و برا الشتا كايتسمع صوت ارتطامها بالأرض و ريحة التراب داخلة عاطية حداه، هاز بيسي فوق رجليه و خدام حتا بان ليه شهاب هابط من الدروج داير يديه فجيب السروال ديال لكيطمة و جلس حداه
شهاب: واخا تعيا ماتخبي و تنكر نتا انورمال فيك شي حاجة مديرونجياك مخلياك ماحاسش بالراحة راك ولدي و اقرب واحد ليا فولادي كاملين و عارف الصغيرة و لكبيرة عليك و دابا بلا ضوران قوليا اش بيك
غيث: (تنهد) و الله ماعرفت قلبي مزير عليا بزاف و عقلي غادي يتفركع معصب بزاف غير كانخبي داك لغضب ديالي (تنهد)
شهاب: مي هادشي شنو السبب ديالو ! من ايمتا بديتي كاتحس بهادشي !
غيث: اش غانقوليك، عقلتي على جاسمن ديك لبنت لي جبت معايا
شهاب: وي
غيث: نهار لي درت كسيدة كنت معاها و عتارفت ليا بلي كاتبغيني و باستني و مامنعتهاش هي فاش جيت ساخط و عرفت بلي غادي نخسرها حيتاش ديك الصداقة ديالنا ماغاديش تبقا و انا كانرتاح معاها بزاف كاتجيني فشكل ضحوكية هبيلة و جدية فنفس الوقت زوينة و حنينة و ضريفة و مستمتعة بكل لحظة فحياتها و ماكاتحشمش هههه هادشي كولو خلاني نرتاح ليها و نديرها صديقة مقربة ليا و لكن كولشي تقلب فاش ولات كاتبغيني (تنهد)
شهاب: و جيتي تفركعتي على خوك و جرتي كسيدة
غيث: فاش درت كسيدة جات عندي و بقات معايا و رجعت الحيوية ديالي و لكن تلاقينا مع واحد الطبيب تما كانت كاتعرفو من صغرها و بقات كاتعمر معاه بزاف و حسيت بحال الا غادي يديها مني (سها) بغيتها تضحك معايا غير انا (شهاب داير نصف ابتسامة) بغيتها تعمر معايا غير و انا وقتها تعطيه ليا غير انا، طلع ليا دم و قلت ليها شي هضرة ماشي تال لهيه و كعات و مشات و لغد جات مخطوبة تصدمت بحال طرشاتني فاش قالت ديك لهضرة
شهاب: هي فاش كعيتي على ماماك، اش غانقولك ا ولدي نتا راك غارق فلاموغ و انا عرفتها شحال هادي غير قلت خليه حتا يعرفها راسو
غيث: ههههه كاتضحك عليا قلبي مات مع زمرد
شهاب: عمر الحب ماكان لشخص واحد صافي ا غيث عارفك دابا نتا كاتحاول ترفض مشاعرك تجاه ياسمين حيتاش كاتحس براسك بحال الا كاتخون زمرد مي نو زمرد ماتت ا غيث و نتا خاصك تعيش حياتك ماحد هاد لقلب كايضرب الا و نتا غاتبقا كاتبغي ياسمين
غيث: اش ندير ا لواليد! راه حرت و الله اش غاندييير
شهاب: غانقولك حاجة وحدة حنا ال راييس ماكانخليوش عيالاتنا لرجال وحداخرين (غمزة) تصبح على خير
غيث: هادشي بيناتنا
شهاب: سرك فبير حتا تدخل ياسمين عروسة هنا ههههه
غيث: ماضنيتش
شهاب: دابا نشوفو (مشا)
جاء اليوم الموعود يوم زفاف ياسمين و سليم، اليوم لي ماكرهاتوش ياسمين يزيد يبعد أكثر و ماعمرو مايلحق و لكن قد ما طوال الزمتن ولا قصار كان غايوصل، و فجهة أخرى سليم كايتصرف ببرودة و عادي و حتا الفرحة مابايناش عليه كايبتاسم غير لضرورة، تكلفات ام ياسمين سعيدة و ام سليم الباتول بالتحضيرات للزفاف من كل النواحي و عرضو على العائلة و الأصدقاء المقربيين ككرم و حلا و سعد و لبنى اصدقاء ياسمين و سليم.
فاقت ياسمين كاتكسل فالفيلا ديال عائلتها حيتاش تما فين غايكون الحفل، ناضت من فراشها عينيها شبه مسدودين كاتشوف غير من بين رموشها الكتاف و عينيها الرماديين كايلمعو شافت حداها لقات حلا ناعسة عاطياها بالضهر ناعسة على كرشها و لبنى من الجهة الثانية حالة فمها باتو معاها باش يمشيو يتقادو برا حيتاش ماغاديش يديرو عرس مغربي الحنة و لحمام... نو بغات تدير بحال النصارى غير حفلة كايتجمعو فيها لحباب و الصحاب و كاينشطو شوية و ياكلو و يمشيو.
ناضت حلات لريدو و دخلات اشعة الشميسة الساطعة و الضبابة قليلة و لجو شبه بارد، دخلات لدوش قضات حاجتها و غسلات وجهها و حكات سنانها و خرجات و لفرحة مابايناش عليها كأي عروس غادي تتزوج، مشات عند صحابتها و هبطات كاتقرص فيهوم
ياسمين: نوضو يا لبقرات نوضوووو
حلا: اي مرض تفو يخخخ (مبوقة)
لبنى: ينعل نهار لي عرفتك فيه يخخخخ تفو
ياسمين: انوضو تج كعدو و نتوما خامرات هنايا راه واقلة ليوم عرسي 😡
لبنى: تزوجي ولا بعري انا مالي
ياسمين: واخا لوالديك 😡
ناضو لبنات مبوقات بالنعاس دخلو لطواليط بزوجات و ياسمين حلات لماريو و جبدات سروال بيض سليم لاصق عليها مع تريكو سخون فالرمادي زوين و مشطات شعرها و طلقاتو على راحتو و دارت قصيصة فالفوق جاتها كيوت و خرجو صحاباتها من دوش بداو كايلبسو و قادات ياسمين مكياج جاها زوين و بين لون عيونها و ضارت عند لبنى لقاتها لابسة سروال جينز لاصق عليها فيها تقطيعات من جيهة الركبة و الفخاض و لفوق قميجة فالباج خاشياها فالسروال و لفوق جاكيط سخونة وفرجلها سبرديلة حكلة و حلا لابسة سروال فالرمادي و لفوق تريكو كم فالأبيض و مونطو من لفوق رمادي و فرجليها سباط رمادي كيوت و هزات ياسمين بوتيو ديالها مزغب و رطب فالرمادي و هبطو لتحت كاملات لقاو سعيدة كاتضور و واقفة على لخدم باش يديرو خدمتهم على اكمل وجه
سعيدة: (زغرتات) صباح الخير
ياسمين: صباح النور
سعيدة: بنتي كبرات و ولات عروسة (عنقاتها) يالاه سيرو فطرو و من بعد سيرو لصالون راه حجزت ليكوم تما
ياسمين: اوكي
مشات ياسمين و صحاباتها جلسو فالطابلة و لقاو الشهيوات موجودين محطوطين فوق الطبلة و بداو كايفطرو و ياسمين بزز كاتدوز داكشي حيتاش شهيتها مسدودة و مخلوعة و خايفة من هاد النهار، كملو فطورهوم و مشاو لوطو ركبو ف كاط كاط مع الشيفور.
عذابي الجزء الخامس
محتوى القصة
التنقل بين الأجزاء