عروس الملك السابعة الجزء العاشر

وقف الملك كيشوف فيها ويبخ السم ... ووقفو ولاد عمو مخلوعين على الأمير قاسم .. جراو العبيد وجراو الخدم .. والامير قاسم غيسخف فبلاصتو مشا ليه اللسان وبدا يتمتم . 

وقفات روح الندى كتفتف مخلوعة .. ودور بجنابها تشوف العبيد والخدم كيجريو ويتجراو قدامها وهي مفزوعة .. خرج فيها سيد الملك عينيه وشار بصبعو عندها 

سيد الملك : راسها يتقطع داااابا قدام عينيا . 

هزات عينيها فيه كترجف و والعافية شاعلة فيها ماباغة توقف .. الروح فحلقها وقفات ورجليها خواو بيها بغات تسخف .. دموعها عماو عينيها مقادراتش تشوف العبيد اللي دارو بيها بالخف .. نترات يديها من يديهم وطاحت لسيد المالك على رجليه كتبكي و تحلف 

روح الندى : والله مادرتها بلعاني امولاي سمح ليا ... كن حساب ليا يوقع هادشي قبل مانقي نقطع رجلي بيديااا ... عافاك امولاي ... عاقبني بالي بغيتي مانستاهلش يتقطع راسي .. واعدتيني امولاي كل ليلة تعلمني . الا قطعتي راسي غتكون خلفتي وعدك ليا ... عاافاك امولاي سمح ليا اهىء اهىء اهىء 

بعد رجلو اللي طايحة عليها وقبل متكمل كلامها ورغيبها شدوها العبيد وبعدوها وهي راكعة على رجليها قدامو و صدرها كيتنفض بالخلعة 

خرج عينيه فيها بحال الى عمرو شافها ولا عرفها .. خلع اللي دايرين بيه بصوتو وشوفاتو وهوا كيزعف عليها 

سيد الملك : وزني كلامك لايحساب اكبر شانك ... اشمن شان بعدا وريني ولا نوريه ليك ؟ .... جنيتي على راسك ودارتها ليك خفة اقدامك ... و وصيتك قبل على الخفة وقلت تبتي رجليك . 

نترات يديها ورجعات طاحت ليه على قدامو كتبي .. قبل ماتشوف السيف دخلاتها الموت بالخلعة ... صفار وجهها وفزك بالدموع وعرفات راسهة لجناح النسى مكاينة رجعة ... قدام غضب الملك ماغينفعها معاه لا لسان ولا دمعة . تقطعات فيها النفس وبزز باش قدرات تنطق راكعة 

روح الندى : جلدني 100 جلدة وماتقطعش راسي وماتخلفش وعدك ليا امولاي ... حرقني بالماء .. بالعافية وخليني حية .. انا مزاوكة فيك امولاي اااااهىء اهىء اهىء 

هز راسو وهي راكعة قدامو وقال 

سيد الملك : راسك مقطوع مافيها شك .. بقا ليك قليل من الايام اللي دوزي تحت سيفي من العداب .. من دابا جمعي العدة ... هزوها عليا من هنا و جلدوها ليا 100 جلدة

هزوها كتبكي وتغوت الموت تابعاها وهي كضرب فراسها وتنوح .. شعرها تابعها غادي وكيشطب الارض .. عارفة الملك شنو كان يعني بكلامو ... وعارفة راسها غيتقطع ويطيح تحت قدامو ... داكشي علاش حكم عليها ب 100 جلدة وراسها مقطوع من بعد ماتسالي العدة اللي كدوز ديال السيف على يدو .... 

هبطوها لغار مضلم مضوي بالعافية تحت القصر ... كبير وغارق حيوطو كانلين من الحجر .. علوقها من يديها وقطع ليها الجلاد قفطانها من مور ضهرها بقاو شادينو غير دراعها ومن لقدام ساترها .. جلاد غليض شمر وصلع .. الشوفة فيه تنشف الحلق وتخلع .. ماسمع لا لبكى روح الندى وغواتها وهز السوط وبدا عليها لضهرها كيحسب ف 100 جلدة

كلات روح الندى من يد الجلاد 100 جلدة .. ولاكن من هاد المية كاملين ماجات فضهرها حتى وحدة ! ... شعرها المدلي موراها توحد بحال شي زربية مجبدة ... هز عليها كاع الجلدات ووقف معاها فوقت الشدة .. طلقوها طاحت فالارض جالسة وكانت غتموت غير بالخلعة واخا ماحسات بحتى جبدة .. ضهرها صحيح فصيح واخا جهد الجلاد وصهد الجلدة وصلها و طيبو ليها ضهرها .. ولاكن اتار الجلدات حتى وحدة ماباينة فيها .. من غير حمورية فضهرها كامل بحال الى كانت عاطيا ضهرها للعافية . 

هزوها مشللة من يديها ورجليها عوجة .. بحال الى خرجات من شي بير ولا لاحتها شي موجة .. طلعوها للقصر وهي حاللة عينها نص حللة واللي شافها كيقول عليها مسكينة موحال تعيش ... مافراسهم باللي هاديك غير الخلعة ومادير ماشي حر السوط ولا ل مية جلدة 

لجناح النسا وصلوها . . وتما اللي ساق خبارها ناض يشوفها .. كاع النسى تجمعو كيطلو عليها .. ويشوفو فالوصيفات كيتجراو معرضين ليها .. شدوها من عنظ الغبيد اللي ممنوع عليهم يفوتو باب المحرم وطلعوها كيطيرو بيها والنسى موراها كتبركم وفيها تنمم 

- جلدها مولاي 100 جلدة ! 

- هي اللي صلقات لمولاي قاسم حجرو بأتاي .. اش داها لشغل لخدم ؟ 

- من نهار جات وهوما يدخلو فيها بحال هاكا سخفانة ... كل ليلة يتمو جا يبينها فهاد الحالة .

- وكل ليلة تجي ومنعرفوش شنو سبابها .. ليوم بعدا عرفنا علاش دخلوها هاكا .. سرها .. هي اللي بغات دير بلاصتها بالزربة 

قالت الشهبة اللي كانت مشات عروسة وهي كتعوج ففمها وتشفى 

- جات من طرف الدنيا وبعات دير راسها نية ... هادا جزاها باش تعلم تهز التفخة على لالياتها .. تحمد الله اللي مطيرش راسها و لا لاحها فالمطمورة ياكلها الدود وهي حية ... كما لاح اللي قبل منها مزال تجي نوبتها الى بقات على النفخة .

نعسوها على كرشها بشوية .. اللي شافها يقول ميتة واخا هي حاللة عينيها حية .. دوزات الوصيفة نجمة على ضهرها وقالت

- واش الحلاد جلدها بالسود ولا بيدو ؟ مابان ليا هنا بو 100 جلدة ! 

قالت الوصيفة اللي معاها المعروفة واللي بيتات روح الندى محبوسة النهار الاول 

- وحنا مالنا . ياك تجلدات .. ايوا ماعلينا غير نداويو ليها هاد الضهر الحمر .. اش دخلنا فشي شبوقات .. شوفي نتيجة اللي كيدخل الشبوق كي دايرة ... هاهيا خلات شغل جارية ومشات تقدشي شغل الخدم ... شكون عاطة الصينية حتى خوات البراد على مولاي قاسم . تحمد الله اللي باقا حية .... خليها تبرد وسدي عليها الباب.. ويالاه نشوفو شي عشوب يبردو ليها هاد الفضيحة .

ناضنو خلاوها هاكاك على كرشها مرمية .. تسد الباب وهي تهز راسها بزز من فوق المخدة وشدات شعرها بين يديها وبدات تبوس فيه وتعنف وتجر طرافو من جنابها فين ما كانو وتنزل عليهم بالبوسان . . . وهي كتقول وتلهت 

روح الندى : كتاب ليك عمر جديد يا بنت لحرام .. كاب ليك عمر جديد ... يرحم والديك اشعري ... يخليك ليلي يا شعري .. وانا للي كوالو يدي وماكهتش نقطعك .. بغيت ربي يقطعني قبل مانقيسك ... يخليك ليلي اشعري... اححح اضهري... حمدتك يااربي وشكرتك ... حمدتك يا ربي وشكرتك .

خرجات نجمة مع باب المحرم وهوا يوقفها عبد مكلف بجناح الملك .. 

العبد : مولاي كيسول على الوغبية الكعبية واش باقا حية 

نجمة: باقا حية بحال الحية ... عندها سبع رواح ديك الجنية .

العبد: مولاي قال الى بقات حية وجدوها ليه فساحت السيف هاد العشية .

رجعو الوصيفات عند روح الندى لقاوها باااقا مجبدة كما خلاوها مصهدة .... حطو زلافة ديال الداوء معشب حداها وبدا يطلقو ويدهنو فضهرا .. وهي مسكينة ساكتة كتسنط لعضامها وتأنأن . طلاوها و خلاوها مجبدة ناعسة .. بزز باش كتحل فعينيها وتسدهم مسخسخة .. رجعات لوصيفة ومعاها طامو هازة صينية فيها ماكلة لروح الندى باش تقدر تحل عينيها وتمشي تقابل سيدها فالعشية . 

- نجمة : حطي الصينية حدا راسها و جلسي قابيلها تاكل بزز ... والى متبغاتش خركيها ليها على راسها 

خرجات الوصيفة مكشكشة هرجات البنات لجناح الطرب النغمات باش يتعلمو يشدو العود ويلقمو لكلام ويغنيو ويشدو الميزان . 

هزات روح الندى راسها فطومة وقالت : مشييت نموووت افطوش ... تقلبات عليا الايااااام وشفت اللي ماشفتو في عااام ... سيدي كاع ماهاز همي .. وانا على على قبلو كنسيل فدمي . 

روح الندى بدات تشكي على فطومة وتبكي ، و فطومة دايرة يدها خدها وسنط ليها 

فطومة : نتي يا الاللة روح الندى اللي كتقلبي على جوا منجل ... اش داك تعلقي فين تفلقي و ديري مقامك من مقام سيد المالك ؟ !!!

روح الندا : والله فطوووش مااا لخاااطري اهىء اهىء وكلن تجربي الغرام ديك الساعة تعذريني . . . بلا هوايا كنقلب على سيد المالك فين ما كان نشبع منو عويناتي .. ولاكن اللي دار فيا اليوم عمرو يتنسا ليا في حيااتي ... 

فطومة : هاكي شربي هاد زلافة دالحسوة .. باش توقفي على رجليك راه مولاي هاد العشية باااغيييك ههه

روح : الندى : باغيني !!!! ربي ربي . ياك ما تنادم معاه الحال وبغا يقطع راسي ؟ 

فطومة : ولاااا ... راه يمكن بغيك فالخلوة هنن (حطات يدها على نيفها كضحك )

روح الندى : ربي ربي ... واخا عضامي مدكدكين نوض نوجد ليه راسي 

فطومة : وجديه باش يطيرو ليك ... عا الله واش معيتيش ؟ 

روح الندى : من مولاي مانعيا يا الحبيبة ... يضربني .. يقتلني يدبحني ... كيبقى حبييييب قلبي ومالك روحي وعقلي . مسحي ليا ضهري نوض ناكل يالاه نقدر نوقف على رجلي . 

مسحات ليها فطومة ضهرها ومدات ليها لحسوة ليديها .. شرباتها روح الندى كانلة وزادت فوق منها جبانية اخرى . كلات وشربات حتى عمرات كرشها وجات تكا على ضهرها وهي تغوت 

روح الندى : اااااح كيوزوز يا الصكعة كي ندير نقابل مولاي وانا فهاد الحالة ؟

فطومة : اااااه نسيت ما قلت لك ... راه ديت الغدا للسي دريس لقيتو فصل التواب وبدا فالخياطة .. شافمي وماكرهش يجبد ليا مصارني 

خرجات روح الندا عينيها فيها وقالت : انا مزاااوكة فيك ياك نتي مولفة دخلي عندو ... ها العار شركي ليه كلع داكشي اللي فصل باش يجريو عليه . راه واقف ليا شوكة فااحلق ماعرفت كي ندير ليه 

فطومة : ويييلي على نشروط ليه التواب بغيتي يشدني يشرروطني 

روح الندى : واباش غيرعرفك الهبيلة ؟ ديري هادشي اللي كنقول ليك .

دخلات عليهم الوصيفة لقاو روح الندى واكلة شابعة ويالاه تحلو عينيها وهما ينوضوها للمغسل يغسلو ليها ... كسلوها فلارض على كرشها وبداو يكمدو ليها وفحكو ليها

خرجات منو بحال الشمعة كضوي وهما حاللين فمهم فيها ويقولو 

- ويلي .. واش هادي اللي واكلة 100 جلدة ؟ اللي واكلاها راها كتكون بين الحيا والموت ! وهادي شادة فالحيا ما بغات ترخي منو ؟! 

دخلو روح الندى لبيت اللباس وبداو يلبسو ها ويعطروها .. لبسوها قميص فالاحمر فيه فتحات فالجنتب باليدين كيحمق .. مزير عليها ومطروز بالطرز جات فيه كتفتن ... ضفرو ليها شعرها للور على طولو وضفرو معاه خيط حمر حتى لرجليها ولبسوها بلغة دالصم ... بالعنبر ريحوعا وبالكحول كحلو ليها عينيها . يحلفو عليها حتى عروسة جديدة ماشي اللي واكلة شحال من جلدة . . . شافت راسها مسرحة يديها فالمراية وبدات دور فبلاصتها عاشقة راسها ومفتونة بنفسها .. كضحك بوحدها وتسناهم يخرجوها . 

خرجوها قدام عينين البنات كانلين وهي غادية كتمختر وتفقص فيهم بعينيها .. البنات مابقاو فاهمين والو ! و يلي مال هادي واش اللي واكل 100 جلدة كيكون هاكا !!! العجب ياربي 

خرجات روح الندى مع الوصيفات غاديين بيها قربو من باب الساحة ورجعو بحالهم كما موالفين وخلاو روح الندى تخرج عندو بوحدها من بعد ما قراوها تبت وترزن ونصحوها ، خرجات للساحة مالقات حد من غيرها .. بقات دور فبلاصتها تقلب عليه ومشات هزات سيفها وبدات ضرب فيه الهواء ... واحد الشوية حسات بالصوت موراها وهي تلفت لقات الامير سيف الدين كيقرب منها معجب ! وقفات قدامو مخرجة فيه عينيها بلا متحني الراس . كطلع وتهبط فيه وتاكد واش حتى هوا من السلالة الملكية . صفق عليها 3 دالمرات وقال 

- الامير سيف الدين : اول مرة تبان محاربة فتاريخنا ... اول مرة تهز السيف شي مرى 

هبطات راسها وقالت : اللي ماعندها اللي يحميها تهز السف و تحمي راسها .

ضحك الامير سيف الدين .. مان قصير شوية على الامراء لخرين وماعندو لحية .. غير الشعر كحل وباين فيه عينيه زايغة .. حط يدو على فكها مبسم وقال 

الامير سيف الدين : النسى بحالك خصهم امير اللي يحميهم .

جات عين الملك محمد اصيل عليهم وهوا واقف مربع يديه فالشرفة عاقدهم كيشوف فيهم ... هز راسو زفر من مناخرو ودار لدخل بيتو . 

هربات روح الندى وجهها خايفة ورادة بالها منو وسكتات كتشوف فيه بنص عين ... زاد قرب منها شوية مبسم وهي ترجع خطوة اللور كتشوف من موراه وعينيها محلولين على كبرهم وقلبها مهزوز غتوقف دقاتو .

يتبع