عروس الملك السابعة الجزء الثاني

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

بقات غير روح الندى واقفة بجنب الواد حاللة فمها .. دارت شافت بجنابها بان ليها غير الخلا الريح كيدور حداها ... فين هي ومنين جات وكي دير ترجع .. تزايد معاها الزايد ورجعات اللور كتفكر الطريق اللي جات منها . شعرها تقل عليها .. ماحليتها ليه ماخيلتها لرجليها ... فين بلغتها وفين لحافها .. بقا غير قفطان هوا اللي ساتر لحمها .. وهي غادية بين النخل متبعة الطريق حتى كتسمع صوت عبدية وطامو كل واحد منين جاي كيقلبو عليها 
عبدية : لاللة روح النداااا ... لاللة روح الندااااا
طامو : لاللة روح النداااااا... واااا لاللة روح الندااااا
جرات روح الندى بالخلعة متبعة الصوت... ورجليها كل وحدة فين كتزطم تقول ماشي خوت .. سروالها مكفض وقفطانها مطوي على نصها جامعة فيه سالفها .. 
روح الندى : عبديااا.... طاااااموووو هنننهننن... طااااموووو هنهننن
روح الندى ماطلعات النفس حتى شافت طامو وعبدية جايين جيهتها .. غير شافتهم وهي تهز الحجر وبدات ضرب فالسماء تشير ... حجرة فطامو وحجرة فعبدية ... بدات كتلهت وجلسات ربعات فالارض كطلع النفس .. دارو بيها كل وحدة من جهة وهي كتفتف بيدها على شي عمود تبرد فيهم جنونها ..
روح الندى : عاااد جاييين كتقلبو عليا ... فاش سمحتو فيا ماخفتوش عليااا. ولا عقلتو على كمارتي يام اعبدية ! .. حيدي عليا يديك ولا نكرضها ليك .... هادي هي لاللة روح النداااا ... هادي لااالاك قطراان ... غير بلاتي .. والله لاخليتها فيكم .. هزوووني .. هزووني ديوني لداري ... كن قتلوني تما مكاين اللي يجيب خباري ... هزوني الله يهزكم ربي ونتهنا منكم 
قالت عبدية كتمتم وفجلايلها كتزطم : والله الاللة غير الخلعة هاديك .. كن ما هاد بنت الحرام اللي هربات اللولة مانسمح فيك 
روح الندا : والله مانهضر دابا ... حتى نوصولو للدار ونفديها فيك يا الكداابة 
وقفوها وهي تلفت شافت فطامو ونزلات عليها بضربة للكتف حتى مشات وجات كتفتف .. جراتها روح الندا من شمارها وعضاتها بالغدايد حتى حلات فمها 
روح الندى : مشيييت نموووت وكان غايفوت فيا الفووووت ... ودابا جالسين عليا بالتبوحيط والبهوووت ... هااا.. خليتوني غير انا ويديا والريح كيسوط حدايا ...كن دا مول الامانة امانتو كن رااكم كضربو عليا كسكسو بالتفااااية ... (هزات صبعها فالسما) طووول ليا ربي فالعمررر ... باش نبيتك نتي وهاد النعجة مع البكر ... ياااا البكر ... يا بنااات الحرااام ... الله يعطيكم موصيبة تصيبكم قبل ماتوصلو لزريبتكم . . . هزي ليا شعري وبشوية على ضهري راه حردو ليا النخل وصدري كامل عمر بالنمل . 
روح الندى مابغاتش تسكت من السبان والمعيور .. واقفة كتلهت ومع شعرها كتعرفت .. عبدية كتسرح ليها فالسروال المكفض وطامو فقفطانها الخضر كتنفض ... طيرات ليهم فردة فردة من رجليهم لبساتها وطيرات ليهم لحايفهم تسرات فيهم وزادت كتنفخ وتسوط مابغاتش تسكت ليهم

وصلات لباب دارها الكبير من الخشب والنقش القديم .. دفعو ليها ليها الباب الصغير اللي وسط الباب الكبير ودخلات كدعي و تلعن . . . حيدات لتامها ...وهزات عينيها قدامها ... مكاتلقا غير التاجر دريس بواحد السوط كيتسناها ... شهقات وفعنيها خرجات .. تصدمات.. ماعرفاتو منين بعت عليها ...ياك مشا يجيب التواب ؟ ...... ياكما رجع يديها ؟ 
التاجر كان كبير فالعمر .. قصير فالقامة وابيض الشعر ... لابس جلابة بيضاء وعلى راسو طربوش اخضر .. لحيتو بيضاء ومفعينيه باين الشر مقطر ... ناوي على خزيت .. السوط فيديه وكيقرب من روح الندى مخرج عينيه ، الخلعة سبقات .. اش دير مادير دفع الجبهة وفين ما بغات توصل تبات ... عطاتها لبكا والتبوحيط وعلى الشارف الهارف طلقات دموعها وعطاتتها للبكا والنحيط 
روح الندى : هما .. هما اسيدي دريس اللي خرجوني ... خرجوني يغسلو ليا وشوف كيفاش ردوني اهنهنننن.. قلت ليهم سيدي دريس حالف عليا ... ومن عتبة داري مانعتب قال ليا ... كلاو ليا مخي اسيدي دريس وضحكو عليا اهننهننن ... وانا غييير ولية ونية اللي جا يديرها بيا .. قلبي حنين دغيا كنتيق وتقت فهاد الحوج ساعة خرجات لينا الخرجة زغبية اهنننهن
قال التاجر بصوتو الغليض المدعدع : خليييتك فالدااااار ... وخارجة تساراي ليا بلا علم ولا شوااار؟ دوزي لهاد الجيه ... 
دازت قدامو ويديها موراها حاضية شي شحطة لا تجي فيها .. بعدات كتفتف وكتشوف فعبدية وطامو كيرجفو وفبعضياتهم كيخرجو ويدخلو ، كيشوفو فيها بعينهم ويزاوكو وهي هازة خنارفها فالسماء ومكمشة فمها 
قالت طامو كتبكي : عااافاك اسيدي دريس ... سمح لينا غير هاد المرة ... عمرها تعاود اسيدي دريس 
طامو : لاللة روح الندى هي اللي.. 
روح الندا : قطراااان .... سكتي اللقوة هممم (خرجات فيها عينيها)
كانت طامو غتفضحها ساعة زربات عليها روح ندى وقطعاتها فيها . 
تكمشات طامو وعبدية فقنت الباب والسي دريس بالسوط هاز يدو .. يالاه بغا ينزل عليهم وهي تشد ليه روح الندى يدو كضحك وترعد 
روح الندى : لوااه لوااه ... ماجاتش ضرب ولية .. الى سمعك شي حد من الجيران اش غيقول عليك ... حضر عقلك ا دريريستي (شافت فيهم بنص عين ) وخليهم يونسو البكر فالزريبة واحد الليلة ... حتى يرجع ليهم عقلهم ويتعلمو يهربو على للاهم بغيت نقول يضحكو على للاهم .. (حيدات ليه السوط) اجي معايا ... راك عياان وخاصك ترتاح ادريريستي وانا اللي غنريحك 
قال دريس غضبان : والله كن ما لالاكم روح الندى ... حتى نخليكم هاك الليلة كتعيطو يا عاطي ياستار باش نعلمكم خروج الدار بلا شوار .. هااي هاي .. نوضو .. نوضو لليلة تباتو كتحلبو البكر حتى يودن الفجر ...

تربطات طامو و عبدية ربطة البهايم فالعشية .. وسط التبن فالزريبة ومع البكر .. دارو الراس عند الراس و التور يدور يدور ويبدا يركل ... كيتباكاو وكل وحدة تشكي على لخرى .. اما روح الندى قادات الحالة ودفرات سالفها .. لبسات قفطان ابيض بلا حزام كما ديما وتعطرات بريحة الورد والخزامة ... من بعد التحميمة اللي دارت توردو خدودها ورجعات فيها النفس وريحت النقا منها فاحت . . . جالسة فبيت النعاس فالارض جامعة رجليها وحداها التاجر دريس متكي على واحد المخدة فوق زربية حمراء مطروزة .. حال فمو فيها بحال البغل .. غير كيضحك ويتسنا فيها تريحو كما واعداتو ... 
السي دريس: وريدتي ... اجي حدايا نشبع منك ... راه شوقي ليك كبر 
كمشات قنوفتها وقالت وهي كتعمر اتاي. .
روح الندى : شوقك ليا شرف وكبر وبقات ليه خطوة للقبر .. (هزات يديها فالسماء) ياااربي .. ياااربي شمن موصيبة درت حتى طحت فهاد الكافر اللي بغا يغصبني فشبابي وانا شهوة مني .. حتى بنت لمرى متشبهني ولا شي وحدة فالزين تفوتني ... علاش يازهري قالب عليا وجهك علااش .. غير دور وشوف فيا والله حتى نعكرو ليك على هاد التكويزة اللي مكوز ليا 
قال الشارف كيفرنس وسنانو رايبين : علاش كديري فراسك هادشي يا الوريدة ديالي ... اجي حدايا وطلبي اللي بغيتي ... عويناتي نعطيهم ليكم يا نديديتي 
ضارت شافت فيه عايفة وقالت : نديديتي ! حتى الهضرة ماعندك مسكدة ... وهاد العوينات اللي غتعطيني فاش غينفعوني! نضوي بيهم بالليل! الشحمة اللي غطات عليهم متلقاهاش حتى فالحولي دالعيد لكبير ..
السي دريس : ههه نعطيك عويناتي ... ورجيلاتي ويديداتي هييهيييهي 
دورات وجهها ويدها على خدها كتسوط 
روح الندى : يااا ربي .. ياااربي تفكني منو .. ياربي تهزو عليا راه غير زايد فهاد الدنيا ... يخخخ رجيلاتي قالك .
هزات كاس داتاي فيديها ودارت عندو كتفرنس ليه 
روح الندى : هانا .. ها اتاااي اللي كيعجبك ادريريستي 
السي دريس : يخلي ليا هاد ليديات ...
شدهم بغا يبوسهم وهي تجمعهم كتفرنس 
روح الندى : شرب .. شرب اتاي راه كيطول فالعمر 
السي دريس : ايوا حتى نتعشا
هزات حاجبها: علاه اللي قدك باقين كيتعشااااو !! شرب اتاي باش تصغار ... سمع مني انا باغا ليك غييير الخييير 
السي دريس : نشربو ... واخا يكون كيقطع لمصارن نشربو ... 
دورات وجهها عايفة كتهضر بشوية : تشرب فيه السم ... كن ما كنت نخاف مني ربي كن درت ليك موتة دالكافر... يخخ 
شرب السي دريس الكاس وكيخضر عويناتو بيها . . . الجغمة لولة عفو .. التانية عفو .. التالتة بدا يغفو ... شد فيه عشوب روح الندى وبدا راسو يدلى .. وبصوت تقيل كيقول
السي دريس: بااقي باغي نن.. باا غييننن ..ننن
دوزات عليه روح الندى يديها بشوية كضحك ليه ضحكة صفرا 
روح الندى : رتاااح ... رتاااح وفحلامك كمل داكشي اللي تابع النون .. نعس .. نعس تنعس ماتنوض


سصهطاتو بالعشوب كما مولفة تسهطو .. نزالات مع الدروج هازة قفطانها ودفيرتها كتشالي موراها .. دارت للزريبة هازةقفطانها دالحرير ورجليها من جناب فتحاتو كيبريو .. دخلات فيديها قنديل مضوية بيه ضلام الليل ... كتسمع تأنين معرفتاتو ديال عبدية وطامو ولا ديال الحمير ... كتمشى بشوية وتقلب عليهم فين مخشيين .. يالاه قربات ليهم وبضو القنديل ضوات فيهم وهما يخرجو عينيهم وغوتو حتى فزعو البقر .. واش هادي جنية لابسة الابيض ؟ 
طامو : جنياااا ..بسم الله رحمان الرحيم .. سملحمرحيم سملحمرحيم
عبيدة : سملحمرحيم .. حنا معاك بالله وبالشرع ... تفف تففف تف 
خشاو وجههم فبعضايتهم ماقدروش يشوفو فيها حتى تكلمات هازة قفطانها ويدها على جنبها كتلوى 
روح الندى : تخافو ماتحشمو ... نتوما تخلعو الجنووون يالكافرات بالله ... سر باباكم اللي يخليكم بايتين هنا .. مايصبح عليكم الحال حتى تصبحو مشيرين .
دورو وجههم شافو فيها وقالو مبهوطين : لاللة روح الندااااا! 
روح الندى : قطراااان هادي .. 
حطات القنديل فوق واحد الصور قصير وتحنات فكات لعبدية يدها ورجعات وقفات دايرة يدها على جنبها 
روح الندى : فيك ديك النعجة تا هيا .. وزيدو قدامي 
بقات واقفة عليهم حتى فكو بعضياتهم وخرجات من الكوري كتخلف خايفة على شربيلها لا يتوسخ .. 
دخلات لداخل ومشات نيشان جلسات فوق واحد المخدة وسرحات رجليها ويديها وقالت 
روح الندى : سيري خلطي ديك الحنة واجي حني ليا يديا ورجليا .. على الله ربي يعفو عليا وندرق زلافتي من الخربة المدنية . 
قالت طامو وهيا سخفانة : هي اللولة الاللة ... نحطو ليك شي حاجة اخرى؟
روح الندى : حطي ليا لمبيخرة ... ولوحي فيها شوية دالعود ... داكشي اللي داز عليا هاد النهار عمرني ننساه .. سيري طلقي راسك حتى نتي معاها اعبيدة .
مشا كيجريو .. وجدو الحنة والمبيخرة وجلسو بجوج دايرين بيها .. ها اللي تنقش ليها يديها هالي شادة العود ودزوق رجليها ... ريحت العود عاطية خلات روح الندى تسهى ومايجي فبالها غير مول العباية الحمراء... شافت فيهم وقالت بصوتها المنغم 
روح الندى : اليوم شفت اللي عمري شافتو عينيا .
هزات عبدية عينيها : شنو اللي شفتي وماشفناهش الاللة .. كلنا شفنا الويل وعمرنا نساو هاد النهار 
عوجات روح الندى فمها للجنب وقالت : الويل شفتوه نتوما ... اما انا شفت الزييييين يا لاللة ... واخا شفت غير ضهرو ... وماااكرهتش نشوف وجههو 
طامو : شنو شفتي يالاللة !!!!
تبسمات روح الندى وسهاات مغمضة عينيها : شفت طولتو وهيبتو ... شفت لون شعرو وعبايتو .... شفت عودو .. وشفت الركبة ديالو فوقو ... ااااححححح ... شفت زغبة دشعري فيدو ... خباها فصنيديقتو ودارها فجيبو 
بقات طامو وعبدية غير كيشوفو فبعضياتهم ... مافهمو روح الندى اش كتهترس مغمضة عينيها ... شافت فيها عبدية وقالت 
عبدية: شفتي شي جن؟
حلات روح الندى عنيها وخرجاتهم فيها : الجن هوا اللي ضاربك ... حتى وليتي تشوفي غير الجنون ..... (رجعات تبسمات وسهات) اما اناااا .شفت الزييين ... شفت فاااارس احلامي .... وخا عطاني بضهرو ... المهم شفت فيه شي حاجة ... 
طامو: !!!! كي داير هادا اللي شفتي؟
روح الندى : اااه ياربي ... انا دفكت .. انا تزلعت .... اححح ... طوييييل ... وعرييييييض .. يدير مني 8 .... كتافو عراااض بحال صور المدينة .... وشعرو كحححححل بلا القطران .... اما يديييييه .. اااااه على يدييييه ... كفاااش نوصفهم . . . مكيتوصفوش ... غير عودو كيبهر ... اما عبايتو الحمرا كتسحر ... كانو معاه شلا رجال كبار .... فاش ركب على عودو ركبو حتى هما وتبعوه 
شافت عبدية فطامو وقالت مخرجة عينيها : شكون يكون ؟
طامو : هاد الوصف اللي عطات مايكون غير ديال الملك ... هوا اللي ديما كيدير عباية حمراء وعودو كحل !!! علاه نسيتي فاش توجوه وداز بالعود ديالو وسط الناس ... كيشير ليهم ... نسيتي ؟
عبدية: هييييه!!! هوااااا
حلات روح الندى عينيها فيهم وهي تهز رجلها تا كانت غتركلهم وقالت 
روح الندى : وهادشي عارفينو غير نتوما ومخبينو عليا ...حراام واش شي بنت الحرام فيكم جات عاودات ليا ... 
طامو : واش فيه مايتعاود الاللة ... الملك شكوون كيشوفو ! راه غير فداك النهار خرج وكان الشعب كامل مجمع بررا على القصر ... وعاد شفناه من البعيد ... كاع الفرسان دايرين بيه .
فرحات روح الندى وبقات تابتة فبلاصتها ناشرة يديها ورجليها .. شوية خرجات فيهم عينيها وقالت
روح الندى : بغيت ندخل للقصر ! 
طامو وعبدية : القصر !!!!!°°°

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.