عروس الملك السابعة الجزء الثالث

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

طامو وعبدية ة القصر !!!!!°°°
تقادات فالجلسة : ايييه القصر .. ونتوما بجوج اللي غتعاونين ندخل ليه ... ياك انا حبيبتكم .. غادي تعاونوني فيه؟
قالت طامو كتمتم: كي نديرو ليه ومنين بغيتي دخلي ليه ؟ هادا راه القصر الاللة ماشي ساحة ديال الدلالة 
عبدية : راه قصر هادا يالاللة روح الندا !
خرجات فيهم روح الندا عينيها ومسحات فيهم يديها وقالت 
روح الندا : ايوا من داك القصر نخلاق .. وعلى داك الملك نموت وماعليه فراق ... نوضو دابا فكرو كفاش ديرو ليا وغدا نصبح فيه قبل ماتعاشى العشية 
حطات عبدية يدها على خدها وقالت : نعلي الشيطان الاللة روح الندا... وشربي ليك كاس دلويزة بحال العادا .. ونوضي رتاحي وخلي هاد الهضرة حتى لغدا .
بدات روح الندا تمسح فيديها ودارت بناقص من شي حنة هي كاع . جمعات النفس حتى جمعاتها وهزات راسها وطلقاتها 
روح الندا : ايوا وزغبتي اللي خدا ليا .. شكون اللي قادر يمشي للقصر ويرجعها ليا ... انا زغبتي عزيزة عليا و مانرتاح حتى ترجع ليا ونشوفها بين يديها 
طامو : اااشمن زغبة يا لاللة .. وعلاش ديري عليها هاد الحالة .. ياك قلتي مشات ليك فالواد وغير وحلات للعود فلسانو حتا كانت غتقتلو .. مالو نتفها ليك من راسك ؟
روح الندا : الاللة ماشي شغلك .. زغبتي عندو وغانمشي نجيبها ... مامولفاش انا بشعري يبات فديور الناس يسحرو ليا فيه 
دارت عبدية يدها على خدها كتسوط : شكون اللي غيسحر ليك فيها .. الملك بطولو وقامتو يربع رجليه ويجلس يبخر ليها ! .... وعلاش؟ 
روح الندى : باش يقتل شعر هادي اللي خنقات ليه عودو ... (ناضت وقفات ) نوضو تنعسو حيدو عليا .. وغدا مع الفجر شوفو كي ديرو ليا .. مانزيدش نبات هنا شي ليلة مع داك الخطية 
هزات جلايلها وخشات رجلها فبلغتها .طلعات لبيتها لقات الشيباني كيشخر حال فمو ويحلم بيها 
السي دريس : ندي.ديتي ... نديي ديتي .. عنقيني 
شافت فيه نافراه ودارت يدها على جنبها كارهاه : تعنقك لفعة .. تفو 
طلعات فوق فراشها ولاحت ليه رجلو للجنب .. تقلبات على جنبها وغمضات عينيها كتسنا الفجر يطلع

الله واكبر .. الله اكبر ....
فبيتهم الصغير الثرابي ناعسة طامو وعبدية .. ناشرين يديهم ورجليهم على زربيتهم البلدية .. 
وقفات على راسهم روح الندا كتحرك فيهم برجليها .. الاذان كياذن وهي عند راسهم كتحنحن 
روح الندى : اااححننن.. انوضي .. طامو .. عبدية .. نوضي نتي وياها لحقو عليا .. راه الفجر هادا ونتوما مزالين ناعسين كتشخرو ليا !
حلات فيها عبدية عينيها منفوخين .. اما طامو حتى الهضرة مقادرة طلعها ورموشها بالعمش ملاسقين .. ناضو جلسو بزز منهم مضهشرين عارفين راسهم ماليهم سلاك مع روح الندى وخا يديرو راسهم ميتين . وقفات عبدية بزز منها كتمشي وتجي فبلاصتها .. النعاس شاد فيها وحتى من حلمتها مزال مافاقت منها 
عبدية : مسمن ولا بغرير ؟ 
روح الندى : واش كضحكي عليا ولا باغاني نربطك مع البهايم فهاد الصبحية ! اشمن مسمن ولا بغرير .. واش كتاكلو الخبز ولا الشعير ؟؟ يا المنونخين !!! (رطبات وقفات بيناتهم عنقاتهم كتسايس ) علاه نسيتو يا الغزالات علاياش تافقنا لبارح؟ ياك تافقنا تخرجوني من هاد الخربة ودخلوني للقصر ... السيك دريس راه مشا يصلي لفجر... وهادي هي الوجيبة باش باش تعاونو مع حبيبتكم روح الندا اللي كتموووت وتسطا عليكم 
قالت طامو كتعرنن : ولاكن الاللة روح الندا بزاف على هاد الزعامة! .. واش عارفة راسك فين باغا تمشي ولا غير لحتي لهضرة ومدرما ؟! 
عقدات روح الندا حجبانها وقلباتها صباط : زمي عليا داك الدلقوش وزيدي قدامي قلبي ليا على شي حل ... والله وما بت هاظ الليلة فالقصر حتى ندوز عليك نتي وهاد الغولة من الودن للودن ... تحركو قدامي .. ما تنفع معاكم حزارة ياربي السلامة .
داتهم قدامها دايخات بالنعاس . طلعاتهم للسطح وقدامهم وقفات . كان الليل بدا يخبي فهلالو . . . وبدا الصباح فبلاصتو يحط فرحالو . 
جو الصباح بارد على جو العشية .. كيسرح فشعر روح الندا ويكير فجلايل عبدية .
وقفات طامو كطل على سطح الجيران الملاسق مع سطحهم ... وروح الندا كطل على الزنقة .. شوية بان ليها الغاشي كيمشي .. دايزين قدام باب دارهم وهي تسرح عينيها فيهم .. عقلاتهم .. اييه هما .. .دارت عند عبدية جراتعا وقالت ليها فودنيها وهي كتشير بصبعها 
روح الندا : هادوك هما اللي شفت عند الواد .. بداك اللباس نييت !
ردات عليها عبدية بشوية: اييه هادوك من القصر .. هادوك اللي كيجمعو رجال القبيلة يجندوهم .. كيدقو دار بدار واللي لقاو عندهم شي ولد كيديوه معاهم 
هزات روح الندا حاجبها ودارت يدها على حنكها .. اياااه ... وكيدخلوهم للقصر؟
عبدية: ايييه .. تما كيتجمعو . . وتما يعلموهم يشظو السيف ويحاربو . 
حركات روح الندا عينيها ورجعات اللور كتخمم وتبني وتردم .. عقلها فالسماء طاير وماحسات براسها حتى لقات راسها متكية على الصور اللي كيطل على الجيران .. مكمشة عينيها وكتخمم . تقلبات ساهية كتفكر وهي طيح عينها على لباس الفراسان وهوا منشور فسطح الجيران ... فلبلاصة حلات عينيها و مكادوز حداها غير طامو وهي تجرها عندها وقفاتها قدامها وشيرات ليها بصبعها 
روح الندى : لحبيبة طامو .. الزين طامو .. ياك انا حبيبتك 
طامو حسات بشي حاجة ماشي هي هاديك وعارفة روح الندا وتبلحيسها .. شافت فيها وكطلبها بعينيها 
طامو : ها عار الله اشنو طاح ليك فبالك احبيبتي .. الصباح هادا بنت ليك غير انا ! ها عبدية دير منس عشرة وشوية 
تبسمات روح الندا وشداتها من كتفها : لااا .. هادي غليضة وزنها وزن عساس ... الى نقزات غطيح السقف على الناس ... نتي اللي خفيفة ونتي اللي غتنقزي تجيبي ليا داك السروال المزوق بالسفيفة 
خرجات طامو عينيها وشدات فحناكها : الله يا حبيبتي .. قولي باغا تقتليني وتهناي مني 
تبسنات روح الندا وقالت : نتي فيك سبعة دالرواح ... ماشي تنقيزة الي غتصفيها ليك هاد الصباح ... انا اللي غنخنقك بيديا الى ما هبطتيش جبتي ليا الحوايج وداك البوط حتى هوا نلبسو فرجليا

نزلات روح الندى فطومة على سعدها ووعدها كتعلق فالحيوط بحال تاتة . . . ماحطات رجليها فسطح الجيران حتى خرجاتها الروح . . . مشات كتسلت هازة قفطانها المكمش وسروالها المفضفض كيطل تحت جلايلها مزير على رجليها والبلغة خضراء مثنية من القدام بكثرة المشي والمجي .. طيرات السروال والجيلي من السلك ودازت على البوط ديال الجلد كتختل ...رجعات للصور منين جات باش طلع عند روح الندى اللي واقفة فبلاصتها كتغزل .. كتسنا فيها طلع بالزربة قبل مايرجع السي دريس ويقلب عليهم ديك الخربة .
جرو طامو طلعوها بزز ولاحوها فوق سطحهم شادة رجليها كتكمدها .. اما روح الندا شدات الحوايج عنقاتهم وهبطات كتجري لبيتها تلبسهم . 
عاوناتها عبدية وطامو فاللباس وضفرو ليها شعرها فالنص كل ضفرة بوحدها وسرحوهم مع ضهراها .. خشاو ل ليها كل ضفرة مع رجل تحت السروال واصلة حتا للقدام ومخشية فالبوط دالجلد مع رجيلها .. عمروها مزيان بالحوايج من لتحت باش يالاه تنفخ شوية ..وتبان عليها راجل ماشي ولية ... قادو ليها الحالة مزيان ... وبقا غير وجهها بوحدو اللي كيبان ، اللي شافها من اللور يقول راجل .. .. السروال مخشي فالبوط والجيلي فوق الفوقية حتى للركبة نازل ... العمامة على راسها ومعمرة كرشها باش يبان صدرها داخل . بقا ليها غير وجهها خصها تخبيه وكيفاش تغبرو حتى هوا وكيغادي دير ليه ؟ شدات المراية وبدات تشوف فيها .. كدوز يدها على فمها وتطلعهم بشوية لعينيها .. كي دير تفش شفايفها وتقشرهم مايبقاوش رطبين؟ كي دير تخبي عينيها ورموشها الساحرة للعين ؟ 
بقات كتشوف وتخمم ..واحد الشوية حطات المراية وتلفتات مخرجة عينيها ومبسمة عند عبدية
روح الندى : صافي طاااحت وصبناها .. غتمشي عند شي بغلة من دوك البغلات وطيري ليها شرابتها 
خرجات عبدية عينيها وقالت : ومابقاتش فيك البغلة مسكينة طيري ليها شرابتها وتخليها كدور بلاش؟
روح الندى : والااا.. راه غتقطعي ليها غير شي شوية .. شي زغيبات نغطيو بيهم هاد الكمارة وصااافي ... يالاه سيري الله يرضي عليك قبل لا يرجع السيك دريس ونحصلو هنا ... يالاه سيري طلقي راسك ماحد باقي مارجع داك الشيبة العصية .
خرجات عبدية وطامو كيجريو للزريبة .. فيديهم مقص وكطلبو الله يخرجهم من هد الموصيبة ..وقفو بجوج مور البغلة ... يالاه حطات عليها عبدية يديها وهي تهزها البغلة برجليها نفضاتها نفضة الدنيا ومافيها ... طار المقص فجهة وطارت عبدية فجهة .. اما طامو تسوخرات اللور وفجلايلها حاصلة طالبة سلة بلا عنب مع البغلة .. بدات تبكي وتهز كفوفها للسماء ودعي فروح الندى وفهايمها العوجة . بغات تهرب ماعرفات كي دير .. جلايها زاطمة فيهم البغلة وطامو مسكينة كتجر فيهم وختيفة البغلة تعطيها شي ركلة كما عطاتها لعبدية ولاحتها برا


واقفة روح الندى فالبيت كتسنى وتسوط ... شافتهم تعطلو عليها وهي تزيد خلفة واحلة فراسها وكتجر فالبوط ... خلفة فليمن ..خلفة فالشمال .. نزلة مفرقة رجليها وزربانة خايفة يفوت عليها الحال وتحصل عند الشيباني وتما بقاها على دايم الدوام .
دخلات للزريبة مسبقة راسها زربانة وهي تبان ليها عبدية مكسلة كتدي وتجيب براسها سخفانة ، ومور البغلة جالسة فطومة كتجر فجلايلها ومن المحية للزريبة كتنظب ندمانة . مشات عندها روح الندى كتجري .. حطها قربات و هي تحرك البغلة من دايتها راسها للجنب فكات لفطومة جلايلها .. خرجات روح الندى عينيها مخلوعة حيت وقت رجوع السي دريس للقصبة هوا هادا 
روح الندى : ويييلي وييلي وحدي كرعة تحزمات بفقوسة وقالت ليها اجي نقطعو الواد !! واش بغيتو تخرجو عليا .. ولا دايرينها ليا بلعاني كنفقصو فيا ...(دارت شيرات على عبدية بواحد البيدو خاوي ) ااانوووضي .. نوضي واش انا سيفطتك تجيبي السخرة ولا سيفطتك تنعسي يا البقرة .. نوضي الله ينوض جلدك (هزات فطومة من كتفها ) نووضي نتي .. الى عولت عليكم هنا بقايا حتى نضفر الشيب حداكم ... طلقيني اااري ليا الموس نفك هاد الجرة قبل لايرجع داك المنحوس (دارت عند عبدية كتغوت) ااانوضي ينوض جلدك ... نوووضي حتى نمشي يانا وموتي نتي كاااع شكون شدك . 
عبدية ماقدراتش تهز الراس حتى تجاوب ... بقات مكسلة على ضهرهت ناشرة يديها ورجليها تقول هادي هي اللخرة ليها ... تنهدات روح الندى وقطعات لياس من عبدية .. بقات ليها غير فطومة اللي واقفة حداها كتشطح بالخلعة . شدات فيها روح الندى وبدات كدفعها وتخبا موراها مخلوعة 
روح الندى : قطعي ليها شرابتها دغيا ... سربي قطعي ليا غي شويييكيك 
هربات فطومة موراها كتزاوك فيها : لااالا هاكي قطعيها ليها نتي نيييت .. .كن شفتي الركلة اللي عطات لعبدية موحال كاع واش تعقل على سميتها ! 
جراتها روح الندى لقدام كتبوحط : انا حبيبتك .. قطعيها دغيا باش نلسقها ونمشي راه تعطلت ...غير نتزوج بالملك والله مانساك .. نزوجك بخوه الى لقيت عندو شي خوه .. نولي نعيط ليك لاااااااللة .. يالاه قطعيها بالزربة ..شوفي راااه سااااهلة .. تشدي ليها زنطيطها دوزي عليه بالمقص وطاح راح . نمشي انا ونبقا ندعي مع فطومتي حياتي كاملة .. يالاه احبينو قطعيها دغيا 
كمشات فطومة وجهها كتبكي وشادة المقص كتزاوك 
فطومة: انا مزاااوكة ... عضامي ضاريني و وزني فيه غا شوية ... والى مشات حتى ركلتني غا ترحمو عليا اهنننهننن 
روح الندى :كدفعها) والله حتى نترحم عليك من قلبي نتي عارفاني منساكش .. وندير ليك جنازة يهضرو عليها ولاد ولادي .. يالاه قطعي ليها شرابتها دغيا طلقني احبينو راه النهار بدا يطلع علينا 
فطومة: اهىء اهىء ياااكي ياااكي بغاني نسرح عجول لاخرا وانا فعز شبابي ماشي حرام عليك !!!
خرجات روح الندى عينيها وساطت فيها : وبغيتيني نموووت اناااا وانا شهوة مني!!!! هااا!! (بردات) اففف .. كتعصبيني افطوش ... (دوزات على ضهرها ) نتي بعدا الى ركلاتك غتجلسي تعطي الراحة راسك ... وترتاااااحي نتي كاع من الشقا ماتهزي ماتحطي ... ايوا شكون بحالك يالاللة؟! راه نتي خاصك تعطيها وجهك تركلو ليك باش تهناي من هاد الدرك اللي عليييك ... اما انا الى عطاتني بكراوعها للوجه ! باش غنقابل الملك ديك الساعة! راه خاصك تفكري بعقلك وتكوني فطيطنة ... وقولي مع راسك ... روح الندى غتمشي تقابل الملك . وخاص وجهها يبقا نقي بحال داك الطبسيل الابيض اللي كنشرب فيه الحسوة ... فهميني وعطيني عقلك شوية و غير زطمي على حسابي انا نحضيها لييييك 
قالت فطومة كترعد وتقرب : وحضيها ليا لا تركلني ...
دفعاتها روح الندى بالسياسة : غير سيري انا حاااضية مزيااان .. غير تهز رجليها نقولها ليك .
قربات فطومة من البغلة كتفتف والمقص فيديها كيتقرقب .. وكل شوية دور تشوف فروح الندى اللي مكيداها وتزعم فيها .. خطفات الطرف التحتاني بالنقص بالزربة قطعاتو ولروح الندى بالفرحة عطاتو ... لسقاتو ليها فوجهها بالزربة دارت ليها منو لحية ودارت لسقات ليها شوية فحجبانها باش تبان عينها مخبية ... قادات ليها الشغل مزيان .. ووسط داك اللباس والزغب مابقات تبان ... وقفو مور الحيط كيتسناو يدوزو العبيد وماهي غير رمشة عين حتى داز فرك ديال الحرس موراهم شلا ولاد ... تخبات روح الندى بيناتهم وشيرات بيدها من لتحت لتحت لفطومة ومشات تخلطات مع الرجال

التتمة غدا ان شاء الله 😘😘😘
ارا نشوفو هاد القصر واش غيبقا قصر ولا يرجع كوري زطم فيا نزطم فيك كي البقر


التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.