عروس الملك السابعة الجزء الرابع

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

تحل باب القصر مع جوايه الضهر... كانو شلا رجال وشلا عبيد مستفين حدى الصور .. ومن بينهم واقفة روح الندى وهي القصيرة فيهم فالتقادة ومعاهم الصف شادة ... شافت عضمة الباب الكبير اللي تحل قدام عينيها .. واخا سخفانة بالمشية ومتبقاتش قادة تهز لا يديها ولا رجليها ...ضربات معاهم طلعة لاكبر جبل اللي على راسو مبني اكبر القصر ... زاعما ومحزمة وحالفة حتى دخل لتما .. واخا نشف دمها وتشقق فمهها . قالت على سلامتنا مللي وصلنا .. ساعة مع الدخلة ديالها من الصور العضيم تصدمات وخرجو عينيها وطاح عليها الضيم ، قالت غيبان ليها القصر ويبانو ليها العبيد وتشوف الملك مع حطة رجلها وتزيد .. صدقات فطريق اخرى وقدامها غير الشجر بحال الى دخلات للغابة ماعندها لا اول ولا اخر .. تنهدات وقالت ... ماعندي ماندير... جيت جيت و بحالي بحال هاد القوم .. هما مني وانا منهم ، كملات على رجليها طالعة كتنهج وسطهم وماقالتش عييت ولا اش دان ولاش جيت ، زيرات راسها حتى وقفو حدا بني كبير وهزات فيه عينيها .. شافت رجال كل جوج فجهة .. شي هاز السيف وشي هاز العصى يضرب بيها .. كل واحد فين كيسرح يديه ويعلمها . . . تبهطات روح الندى وبدات دور فعينيها .. هزات راسها شافت بعيييد بان ليها القصر مزال بعيد على راس الجبل .. تلف فيه العين ماعساك الرجل الى خطات فيه .. كبير وعالي ماعمرها ضناتو يكون على هاد القد. بلاتي! وعلاش مداوهمش لتما ؟ علاش جابهم لهاد البلاصة ؟
نخزها واحد من الحرس بيدو وقال 

- تحرك لداخل ... وهز داك السيف وسير تقاتل 

دخلات كتفتف حتى لداخل وهي تلقا الصور داير بيها والباب تسد عليها ... ماعندها منين تخرج ... تما تبقا حتى يتكشف سرها ويطرو ليها راسها ومايجيب حد خبارها .. .. روح الندى تزاد معاها الزايد فاش لقات راسها بوحدها وسط الرجال وغواتهم كتعاند . مالقات مادير وخافت يدفعها شي حد لشي حاجة ديرها وهي مقادة عليها ماعندها صحة ليها .. عندها غير لسانها السليط اللي مكرهاتش تجبدو وتقطع باباه من الجدر على هاد الزوبية اللي طيحها فيها ، هزات واحد العصية بحالها بحال غيرها وبدات تشير بيها فالسماء ودير فراسها كتطلق يديها ، قرب منها واحد من الولاد وقال 

- سميتي جعفر... وماشي هاكاك كيشدو السيف ... قصدي العصى 

شافت فيه ويالاه جات تهضر وتفكرات باللي راه صوتها صوت لعيلات وقلباتها بتحنحين والاشارات 

روح الندى : اابا.. اب .. باا ه 

جعفر : علاه مكتهضر مكتنطق ! 

حركات ليه راسها وخرجات من باب واسع ... دارت فيها مجهدة وجلسات تشير بالعصى وضرب هنا وهنا وعينيها كيقلبو على شي باب تفلت منو 

بقات هاكاك روح الندى حتى تعاشات عليها العشية ... وهي كتضرب وتشير بحال الرجال ونساات راسها باللي ولية ... وقبل ماتغرب الشمس تسمع صوت النفار فوق الصوار ... كيعلن على نهاية هاد النهار وكل واحد يدخل ياكل اللي قسم الله وينعس باش يصبح فايق مع آدان الفجر .

دارت روح الندى داكشي اللي دار كلشي .. واخا قلبها غيسكت ورجليها فشلو مابقات قادرة تمشي . 
واحلة مع زغب البغلة اللي للاسق فوجها وكتقلب كفاش دير تخرج راسها من هاد الوحلة الكحلة زحلة 

تمشات مع واحد المجموعة من الرجال وجلسات بيناتهم فوق اللحاف مربعة رجليها كتسنى العشى وتسكت الجوع اللي فكرشها . 

تحطات الماكلة الوسط بين الرجلين ومجات فين تمد يديها حتى تسرط كلشي وخلاوها بعينيها كتبرق ... تشوف فيهم واحد واحد ومكارهاتش تنوض تنقز عليهم وتدضربها ليهم بشي شنقة . 

تكات مكمشة رجليها فواحد القنت حاطة حداها القنديل وعينيها خارجين مابغاش النعاس يدوز عليها . لاااالا لا مايمكنش تبقا فهاد الحالة .... ماشي هادشي اللي بغات وماايمكنتش تصبر على هاد التبهديلة . ااااش عندها مادير ... تصبر ... تصبر بعدا هاد الليلة واخا مزال قدامها طريق طوييييييلة


كلشي ناض مع اذان الفجر ..ولاللة روح الندى باااقا مكمشة كتشخر ... وكرشها بالجوع كتغرغر ، اللي فاق بكري راه فطر .. واللي صبح ناعس يكب على كرشو الماء ويقول الجوع كافر ، باش يتعلم يفيق الصباح الى بغا ياكل .

نخزاتها من رجليها عصية وهي تحل عينها قالبة وجهها ... مع الحلة بان ليها واحد العضمة لونو سمر واقف عليها بواحد السوط كحل .. هزو تا للمساء خبط بيه فالارض وهي تجي روح الندا بالخلعة واقفة مبندة .
زعزها صوت العزوة من بلاصتها بحال الرعدة وقال 

- فالحرب مكينعسوش الرجااااال ...ونهار تصبح ناعس عرف راسك غتعلق من كراعك ... تحرك قاااادمي ولا ليوم نرضك بهاد السوط مدمي .

خرجات روح الندى كتجري وتفتف ... .. البوط تقيل على رجليها وبيه ماقدراش تخلف ، دخلات وسط الرجال كتجري هزات واحد السيف صغير وبدات تبورد بيه باش ماتبقاش عين العزوة حاطة عليها . كتنقز من قنت لقنت حتى تطلق صوت النفار وبدا كلشي كيجري ويقا الصف ... من زهرها العوج جات هي اللولة فصف من الصفوفا كتفتف . كلشي خوا الطريق وحنا الراس الا روح الندا اللي بقا راسها مرفوع وشلاقمها مدليين كل شوية تعطس . 
دخلو مقدمين 4 د خيول على ضهرهم رجال باينة عليهم الهمة والشان .. موراهم الخيل الكحل كيتمشا بخطوات رزينة و على ضهرو الملك بشحمو ولحمو وهيبتو خلى روح الندى حاللة فيه فمها مسكينة . على راسو تاج من الذهب وعينيه كوحل كبار كتجذب ... لحيتو كحلة وعبايتو حمرة نازلة بالهدب .. جالس دافع صدرو العريض وعينيه فالصفوف كتحسب ... وقف بيه عودو الكحل قدامهم وهنا تحنى كبير الفرسان وهو القدام وحط ركبتو على الارض حاني راسو .، ومن فوق الصور صوت فبوق كبير كيتكلم ويعمم ويفهم اللي مافافاهم 

- حااكم البلاد .. الملك محمد اصيل المرتضي بالله 

كلشي هبط الراس ... الا روح الندى بقات هازة عينيها كتحفض فالسمية وتستفها .. جاب الله كاين الله وما رد ليها حد البال وسط التفعفيعة اللي دار ليهم الملك على غفلة . 

تقدم لكرسي العرش فوق منصة الملوك والعبيد دايرين بيه كيقادو ليه فين يحط رجليه... سرح عبايتو و جلس هاز راسو كيتبسم مخبيها بحال الى كيحشم .. ولاكن هادي هي تبسيمتو ماشي حشمان وعينيه كيبريو من نهار خلاق ومنهم كيبان باللي ماعزيز عليه بسالة ولا ملاغة ولا كترت اللغى والتبجاق ، جلس حداه شاب آخر بجنبو من ليمن وراجل على يدو ليسر و كلشي لتحت باقي يابس كيتسناو اشارة من يد الملك . 
لمح براسو ورجع كلشي كما كان كيتقاتل ... تخلطات الدعوة و بقات غير الندى اللي واقفة فبلاصتها كما هي يابسة حتى داز العزوة وشحط الارض قدامها عاد تبتات وبدات تجري من قنت لقنت هازة عصى وتشير وعينيها على الملك مابغات تحشم . المهم راه مشاركة حتى هي وخا غير كضرب وتزكل واللي طاح قدامها تجلس عليه بالضرب والركل . شوية ماحسات براسها حتى لقاتو لتحت ورجليها فالسماء وماعرفات شكون رفعها ولا هزها الماء. كتشوف راسها خارجة من ساحة السيوفة وغادية كتغوت حتى نتابهات ليها عين الملك وشافها على ضهر العزوة كتركل ، زغب وجها طاح فالارض وتكشف وبان ... سرها تفضح وزادت فضحات راسها بغواتها .. ناااهيك على الدم اللي هبطات مع رجليها بكترة الجرى والتحنقيز وهي ماحاسة بيها



حلات عينيها بزز وراسها كيتمايل .. بان ليها غير السقف منقوش بالخشب وصوت مرى كبيرة حدى راسها كيقول 

- الى كانت عزبة ... تمشي مع الجواري ... والى كانت مرى .. تمشي مع العبيد والخدم . . . ولاكن باش نعرفو وحدة من هاد الجوج خليوها فداك الحبس حتى تمشي عليها الدم ... منها نيت تعلم دخول لقصر بلا علم وتعرف راسخا فين كتحط رجليها وتزطم 

رطقلب روح الندا بدا يضرب بالجهد ومشات بعينها جيهت الصوت اللي كيهضر لقات مرة كبيرة فالسن لابسة قفطان محزن ودايرة الشمار ليديها وغيضة سمراء ماتعرف ضحك ماتعرف تقجم ، تخلعات روح الندى بالمعقول وهزات راسها شافت حوايجها مبدلين ورجليها عريانين مغطيها غير غطا خفيف ساترها . 

ماعرفت اش دارو فيها وكفاش حتى وصلات لداك البيت . . . اللي بقات عاقلة عليه هوا الهزة فوق ضهر العزوة والغوات بالجهد كتسنتجد . العيا والجوع وقلة النعاس تمعو عليها دقة وحدة حتى غيبات وماعرفات راسها فين تحطات .

قربات منها المرى الكبيرة كتهضر هازة نيفها وقالت

- دوي... تكلمي وقولي شكون جابك لهنا وعلاش لبستي لباس الرجال وشنو بغيتي منا حتى دخلتي عندا ؟ هضري .

شافت فيها روح الندى كتبكي بالخلعة .. ماشي تبوحيط ولا تزواق الهضرة ولاكن ديال بصح وقفات على الصح وحسات براسها حصلات ومكاين اللي يفكها واخا تبات فالحيط كتنطح .

روح الندى: يتيييمة .. يتييمة انا ماعندي لا والي لا تالي ولا من يخاف عليا ويسول على حالي ... الى قتلتوني ماعندكم ما تليطو مني .. اما الى خدمتوني غادي تنفعو مني . اهىء اهىء اهىء (هبطات وجهها كتبكي) دارتها ليا خفة رجلي وتحنقيزي اهىء اهىء اهىء

ربعات المرة يديها كتشوف فيها وهي كتبكي وتشكي عليها وعينيها حمارو بالبكا وخلعة ورحليها فشلو عليها ، دارت شافت فالمرة الثانية اللي معاها وحركات ليها راسها ورجعات شافت فروح الندى

- قولي لي بعدا ... علاش دخلتي وسط الرجال وهزيتي السيف وبغيتي دخلي لحروب وتعلمي القتال ؟

قالتليها روح الندى وهي مزالة مكسلة فالراش على ضهرها راكدة وفراسها كتعوج للجنب ومن فمها كتخرجة الهضرة مرعدة


روح الندى : قلت شي يا لاللة عوييينتي... قلة كترشي وهي اللي خلاتني نرجع ولد باش نتقاتل وفالحروب نشارك وليهم نمشي ... ماعندي لا حنين لا رحيم .. ربي بووحدو العالي على مابيا ... والى بقيت حيا حتى لدابا راه غير برضات واليديا اللي رضاو عليا قبل مايموتو ويخليوني وحدانيا كنتقاتل بوحدي ونجاهد فهاد الدنيا اهىء اهىء... الى بغيتو تقتلوني قتلوني غير قتلوني بلا مانحس وخليوني حتى نعس وخنقوني بلا منتكرفس اهىء اهىء اهىء 

- ايوا وشنو كتعرفي ديري يا مولات السالف الطويل ؟ 

كرمات فبلاصتها وقالت كتفتف : الشقا مبري مني .. ولاكن نعرف نشطح ونغني ... ونقول الشعر ولاليااتي نحني 

- اممممم..... قولي ليا بعدا ؟ نتي عزبة ولا مرى؟ 

روح الندى : عزبة والله العضيم عزبة وعمر شي واحد مد يدو عليا ولا شفت جيهتو وتفلا عليا ... من نهار عقلت على راسي ماشفت شي حد قرب ليا ... لا راجل ولا ولية 

- من بعد نشوفو هاد القضية .... وقبل كلشي غدوزي ياماتك فالحبس باش ترباي على خفة الرجل اللي جابت لهنا ... وتعلمي تفكري وترزني قبل ماتخطي خطواتك من هنا للقدم ... وديري فبالك ابنت باللي دخلات لهاد القصر مكتخرج منو حتى تلوى فكفن ... ومللي نتي رماتك شطارتك عندنا .. هنا بقاك حتى لاخر نهار فحياتك . يالاه تكعدي .. ياااالاه.. احيو هزوها عليا من هنا .. وماتجيبوها ليا حتى لنهار لخميس فلعشية . 

تكمشات روح النظى فالحاف كترجف ودخلو عليها شلا عيالات كبار كيخلعو سومر هزوها بالخف . هبطوها هاكاك عريانة لابسة غير توب خفيف قصير اللي بقا عليها من قصبة السي دريس .. ملوية عليها الغطاء ابيض وشعرها موراها كيتجرر . 
لاحوها بين القضبان فحبس مضلم مافيه لازربية ولا حتى معامن تكلم ... تكماشت فالقنت ملوية كتبكي وكارهة النهار اللي فكرات تحط فيه رجليها فالقصر .. فيينك يا طامو وعبدية .. فييينك يا القصبة العالية اللي كانت عايشة فيها بحال النخلة وكتسقى من يدين طومو وعبدية بحال الدالية .... اجي طلو عليها فين تلا بيها الزمان وفين ولات ... حالتها حالة وحياتها مشات . بكات روح الندا حتى طابو عينيها وعيات . والسخفة ديال الجوع منها مابغات تطلق وعليها حلفات . بقات كترعد بالخلعة ومن زهرها الناس مصيفة ومكاين البرد اللي يجمد عضامها .. الارض سخونة بحال الى شاعلة النار تحت منها . لاحو ليها طبسيل فيه شوية دالماكلة ونزلات عليه روح الندى بعينيها مغنضة .. كلات وشربات وتكات تفدي غدايدها فالنعاس . 

المرى اللي كنت واقفة على روح الندى بقات فبلاصتها فالبيت غير كتخمم واقفة ، و معاها وحدة اخرى كتفصل وتخيط هيا وياها حريرت روح الندى وسباب دخولها للقصر فهيأة ولد . 

- سميتها روح الندى! مكتوب على رقبتها بالخط العربي روح الندى . هاد خيتي لسانها سليط وكيتنغم بخال خيوط العود دغيا كيسحر .. بوحاطية وماشي بحال البحاطيات .. وو سلاحها هوا لسانها هوا سلاحها وعينيها يخليوك ترطاب واخا تكون حجر ، وياااك تيقي بيها ولاتعطيها ودنيك تلعب بيك ... عطيها التيساع راه لحلاحة كتر من القياس وتلحليحها هادا تقدر تشحر بيه كاع الناس . وهاد السلالة خاص ديما الواحد يرد منهم البال باش ميضحكوش عليا ورجعونا بين الناس هبال

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.