عروس الملك السابعة الجزء الخامس

على ارض حرشة نايمة ودوز على رجليها بيدياتها الحنان .. وفمنامها تشهق وتنزلهم دموع من عينيها لثنان ... تلف باللحاف جنابها وتحلم راسها بين واليديها ناعسة فالأحضان .... شكون ليها من بعدهم من غيرك يا رحمان ... الناس طغات ومابقا فقلبهم لا رحمة ولا أيمان ... خلاوها ثمنيام وسط الضلمة مكمشة ف ركان ... يديها تقشرو ورجليها نشفو وشعرها تخبل مابقا عندها شان ولا مرشان .. فينك يا قرة العيان يا الحنينة يا ينبوع الحنان .. طلي على بنتك فين مرمية وفين تلات بيها الايام من بعد ماكانت وردة مفتحة فجنان ... تقطع بيها الحبل ومن دار لدار كتقلب على لامان.... شي يطمع فيها ويبات الليل كامل يتغزل فيها سهران ... وردة بجذورها تجدب وماتوزن بثمان ... ما تقارن بغيرها ماتزون معاهم فميزان ... لاللة روح الندى الطامعة فحضن مول التاج وفقلبها دارتو سللطان ... خلى قلبها يرقص ويغني بالفرحة الحان .. تسقى بماء الحب ونبض ليه وماتقدر تحط سلاحها وتسلم حتى للنهار اللي يلويوها فأكفان

تقرقب المفتاح على باب الحديد وتفتح عليها .. هزات راسها تقيل من الارض وهي كتغطي رجليها وكتحل عينيها بزز منها . 

تكلم العبد لسمر للون وطويل القامة لابس سوال مفضفض وجيلي على لحمو وعلى راسو عمامة . 

العبد: يامك سالات هنا .. غاتنوضي طلعي والى عاود راسك سخن عليك غترجعي وهنا مابقاك حتى يفنا ليك العمر ... يالاه زيدي قدامي 

نوضها من دراعها وهي بزز باش كتوقف على رجليها .. خرجها طالع بيها فدروج ديقين مضوي فيهم القنديل وطرقانو مضلمين . طلعها فوق الارض ومع الهزة دراسها دمعو عينيها هزات يدها على وجهها مضرقة الشمس اللي ضاربة فيها . 

دخلها من باب صغير مطرف والدموع من عينيها كتدرف ... حالتها حالة كن يحساب ليها غتشوف الويل ماكانتش تخرج من قصبة السي دريس ... ولاكن اللي طالبها كبيرة ماعليه غير يوجد راسو لطريق مشوكة ومريرة . 

وقفها عند رجلين المرة اللي سبق وهضرات معاها وهي للي لاحتها فالحبس تكمد فيه عضامها ، روح الندى رجليها خانوها وطاحت فالارض جالسة... هزات لحاف كتخبى فيه و بالدوخة فراسها حاسة . 

تكلمات المرة السمراء و عينيها خارجين حومر جمرة 

- الحكيمة دابا غاتجي تقلبك ... ويلى كدبتي وطلعتي مرى غير وجدي راسك ... اللي نديرو ليك مانعاودو ليك على كدوبك 

قالت روح الندا وراسها كيمشي ويجي و فيه شادة : عزباا.. عزبا 

عيطات المرة بالجهد لنسى اخرين طوال فالقامة بحالها وسومر فاللون وغلاض كتر منها . شارت ليهم بعينيها و هما يهزو روح الندا داوها لدار لوضوء تستنجا باش دوز على يد الحكيمة تقلبها . 

داكشي اللي دارو ... دخلوها لدار الوضوء كبيرة وبقاو واقفين عليها وهي مقردة على رجليها كتسنجا . عاودو ردوها لداك البيت نيت ونعسوها فوق اللحاف اللي نعسات عليه المرة الاولى ، مكانت لا خايفة ولا دعورة ، كاتسنى غير امتى يساليو شغلهم ويعطيوها تاكل باش تقدر تحل عينيها ، دخلات عليها مرى طويلة ورقيقة على راسها شد ولابسة لباس طويل . جلسات عند رجلين روح الندى وهي مساليا بزز باش كطلع النفس ، لاحت ليها غطا ابيض على رجليها وبدات خدمتها وكاع الوصيفات السمرات واقفين عساسين عليها . ناعسة حالة رجليها ومزيرة على عينيها صابرة ليدين لحكمية اللي كيقلبو فيا . 

جمعات الكيمة وطوات .. وناضت كتمسح يدها وحدى الوصيفة وقفات . اما روح الندى غير متبعاها بنص العين معبسة ومع تقلابها مبروطة .. باغا تجلس وحاسة براسها مزيرة ، غمزات الحكيمة المرة السمراء وقالت 

الحكيمة : سلطان 

هزات السمراء راسها مطلعة حجبانها معجبة ولداك الحساب اللي طلع مع روح الندى مكانت ضاربة ، ودارت عند الوصيفات وبراسها شارت ليهم جيهتها ... تحركو فالحين دارو بيها ومن بلاصتها هزوها وهي كتغوت وتشوف فيهم مخلوعة وتغطي فرجليها

داوها كيطيرو بيها يغسلو ليها كل وحدة يا وحدة . . . يديهم غلاض حاكمينها فالشدة .. عراوها ونعسوها على كرشها فوق الجلدة ... عجبها الحال وخلاتهم كل وحدة فين شادة ، ها اللي كتسرح الشعر ومن طولو معجبين ... وها اللي شادة المحكة وكتفرك ف الرجلين ... اما لاللة روح الندا كانت ناقصاها غير هاد الفركة وعليها كتقلب ... عطاتهم راسها وخلاتهم يديرو مابغاو .. ماكتسول لا امشن عشوب كيدهنو ولا والو . 

فركوها فريييك مانساو لاضهر ولاصدر .. ودفرو ليها شعرها فالنص ودوره ليها على راسها يقطر ... غطاوها بغطاء رطب حرير فالحمر .. وخرجوها نيشان لبيت كبير وبداو يلبسوها ويرشو ليها فالعطر . ساكتة كتبسم فرحانة بلا متهضر .. واخا كيحولوها من لقنت معاقلة لا على الطريق اللي جابوها منها ولا اللي ردوها معاها وكلشي دايريرنو فالسر .. ماجايب حد خبارهم حيت اللي كيوقع من اسرار فالقصر .. مخاص حد يجيب ليه خبر باش يكملو شغلهم بحال العادة فالسر . 

طلقو ليها شعرها على طولو .. ولبسوها ققطان مرصع بالعقيق و فعنقها خيط الجوهر .. قفطانها مفصل عليها تقول كان يتسنا فيها غير هي وكن تشووف كي جا عليها .. محلول من جناب ومزوق بالسفيفة حتى لكرابيها .. صدرها وقاف هاز العلام وقفطامها مزير على كرشها مامحتاج حزام .. واقفة قدام المراية كدور وزيد خطوة للور خطوة القدام .. فايحة منها ريحة ترد روووح يا سلام .. دايريم بيها بربعة كيزيرو ليها الشدة على راسها بزيف حرير نازل بالهدب من القدام .. ومن مور ضهرها مسرح شعرها ونازل حتى الاقدام ، سلاو ليها وجمعو يديهم كيشوفو فيها .. وني قدام المراية كدور فرحتها الله اللي عالم بيها ... دخلات عندها المرى المعلومة متسول فيها .. وبجنابها كدور كتشوف شنو ناقص وشنو زايد عليها ، روح الندى تبدلات عليهم .. ماشي هادي اللي شافو النهار اللول وجابوها ليهم ، هادي وردة مفتحة .. عويناتها كبار مكحلين ... وشفيفها بحال التوت رطبين . عارفة راسها زوينة وعمرها شافت حسن منها هادشي علاش بالها مرتاح وضامنة بلاصتها فاقصر وفخاطرها كتقول .. غييير هيا اللي كاينة .

المرى : سمعي مزيان ... غتمشي معايا حانية الراس ... تشوفك الشريفة وعندها ليك كلام .. حلي ودنيك وراسك قدامها يبقا محني ماتهزيه فيها واللي قالت ليك قولي ليها نعام لاللة الشريفة . 

صدر روح الندى طالع هابط فالرحة .. مكتهزش العين حتى فالوصيفات اللي معاها واللي تقالت ليه كتحرك راسها وتقول 

روح الندى : نعام الاللة .

خرجو بجوجات كيتمشاو فدروب القصر .. روح الندى مبسمة حانية الراس كتخلف بقدامها والشربيل فرجلها كيبري .. داكشي اللي بغات هاهيا فيه . واخا بمشقة النفس وصلات ليه ، غاديين وكل مرة يدوز حداهم عبد من العبيد .. كيوقف ويحني راسو حتى يدوزو النسى الوالى عاد يكمل طريقو ، وصلو لباب كبير منقوش بالخشب وعلى بابو واقفين جوج رجال كبار .. كوال وعراض بلباس ابيض وهازين وهازين فيدهم عصا طويلة قدمهم فالطول فتحو ليهم لباب دخلو وهنا روح الندى هزات عينيها سرحاتهم فالبيت ... بيت ماكبير ما صغير مفرش بالزرابي وفالقنت جالسة مرى كبيرة واشمة فجبهتها ويديها رموز تمحات مع كبر سنها ... لافة زيف على راسها وكتشوف فيهم مبسمة .. قدمات المرى السمراء روح الندى وجلساتها مربعة رجليها قدام لالاها الشريفة . بقات الشريفة غير كشتوف فيها وتوزنها بعينيها من راسها رجليها وروح الندى مقادرة تهز العين فيها . 

- الشريفة : حضر عقلك عندي وصغالي نوصيك .... فتحلي قلبك و ماتسهالي هادشي يعنيك ... تفتح ليك باب قصر ويلا خدمتي عقلك يغنيك ... شدي حزام الصدق والصبر زيريه بين يديك ... خليك من لقيل ولقال والمزاح على المهم غادي يلهيك ... ماتغفلي على و صيتي ليك ديريها بين عينيك ... هنا تعيشي مابقا فعمرك الى كنتي مرى وتبتي رجليك ... حصني ورزني ... وردي بالك لاطيحي في بحر الغدر وتصدقي لا هادي لا هاديك ... مانتي عايشة بحال قرانك .. مانتي فضلك و راس مالك ..ويلا تعرض شي حد طريقك ويغير حالك ... شكي لساداتنا يسرحو ليك مسالك .. كوني ديما على بال وخبي سرارك .. وطيعي وصغري راسك تربحي ويتنور حالك ... صاحبي ناس الدين ولا تخالطي من والا يجليك ... عاشري بالمعروف والصبر وربي العالي يجاويك .. وحسني مع ناس القصر خلاقك ... هنا قراناتك من زمان ساعيين بحالك ... والى بغيتي توصلي ليه حلي لكلام وخفضي ليه جناحك .. ولا تشتمي مخلوق ادب لسانك لا يعيدك ... تعبان اللسان يلوحك فمهالك .... ماتحسدي حد واللي فالمكتاب تجي بين يديك ... لا تتكبري لا تعالي ولا تكدبي نفسك عليك .... ويااااك العجب يخطر ليك فبالك ...ولا تدخلي ما بين جوج بالشر يتقلب عليك . . وتنوضي فتنة بين الحباب بتزويق لسانك 

نفيدك ابنتي صفي سريرتك الحاكم يبغيك ... ويلا كحال قلبك راه يكره خيالك ... ولا ترفعي نفخة على اعباد الى فيوم من ليام رفع بيك ... كما هزك يلوحك وينزل شانك .. ترجعي تبوسي رجلين العبيد الى غضب عليك .. ماتعصي ماتعاندي مقامو من مقامك ... وكن تعرفي حال اللي عصاو قبلك غادي يبقاو فيك ... فبير مضلام حيين والى كنتي منهم نوصيك تما دود يمص عضامك ... وتشوفي دموع الدم فخدوك نازلين من عينيك ... والله ابنتي ماتصبري ولا يطيح ليك فبالك ... الهلاك اللي غترمي فيه نفسك الى عاندتي سيدك ... ونوصيك بالصمت وقللي لكلام فيه سر يقويك ... وياك يغرك الغرار ويركبك شيطانك . . . شيطان الانس بعدو لاتقربو لا يقرب ليك غير بتبسيمة يخرج عليك . . . هوا سبب هلاك اللي قبلك ولا تخليه ابنتي يكون سبب هلاكك 

والملك الى جا يحدث فتحلو ودينك.... كسبي قلبو بالنية يرتاح عليك .. تعيشي بجنبو بزينك وعيوبك .. والى شفتيه مخنوق سولو مالك ... وطلبي الله يوقف جنبك ويحن عليك . وصيتك لله ابنتي هاد الوصية تكفيك ... كما وصيتك نتي وصيت امثالك . 

وصية الشريفة دخلات مع روح الندى بخال السهام ... خلعاتها بكلامها وماعرافاش شنو كيتسناها من هنا لقدام .

يتبع