عروس الملك السابعة الجزء السادس

بزاف دالاسرار غادي يبداو يتكشفو وحدة تلوى الاخرى .علاش الملك صدر داك الحكم على شعبو؟ علاش روح الندى فرقبتها داك الوشام بسميتها ؟ هادو اولة الاسرار غادي تكشف فالاجزاء الاولى..

سالات الشريفة كلامها وناضت الوصيفة شادة لروح الندى فدارعها مخرجاها من تما غادا كدور بيها بين دروب القصر و تشرح لروح الندى وكتهضر

- الشريفة اللي دابا عاد وصاتك هي اللي مكلفة بجاريات الملك ... حكيمة ولبيبة داكشي علاش شدات جناح النسى حيت عارفة كيافش تسيرهم وطفي النيران اللي كتنوض بيناتهم ... لبنات كاملين حاسباهم بحال بناتها والى شي نهار حرتي قصديها هي توريك الطريق.

حركات روح الندى دارسها ومن الفرحة بغات طير .. وصلو لباب كبير قدامو عبيد رجال لابسين الابيض.. الباب كان مفتوح كامل ومن لداخل كيتسمع صوت البنات بحال الواد حامل . وقفو فالباب حتى خرجات عندهم وصيفة اخرى سمراء وطويلة مكيبانش على وجهها المزاح . على راسها شد مزيراه ولابسة تكشيطة خفيفة ومورة الشمار على كتافها . قالت بصوت تقيل كتبرك على الحروف 

-سميتك ؟

قالت روح الندى وراسها فالارض : روح الندى 

شداتها المرى من كتفها دوراتها كطلع وتعبط فيها بعينيها . وفنفس الوقت كتهضر معاها الوصيفة الاخرى وتغمز فيها . دارت روح الندى على راسها بحال النجمة ... طالقة زينها وتسرح فقفطانها مبسمة ... دارت ليها الوصيفة الطريق ومشات لخرى اللي جات معاها ، دخلات روح الندى للمحرم الواسع ... كبير مبهج وسقفو عالي منقوش نازلة منو ثرية من الخشب منقوشة وهي كتسمع الحان مخلطة حيوطو مزليجن بزليج بلدي متقون ...والزرابي مغطيين اريضتو وزاهي بصوت الملحون ... بصوت كل وحدة من البنات وحدة كتغرد فجهة ولخرى كتلعب العود فجهة .. هزات راسها وفنفسها كتقول مكاينش فالزين بحالها .. ساعة مع هزة عينيها وهي داخلة كتشوف نسى مستفات مع جناب الحيط على مخاد الريش جالسات ... وحدة تنسيها فلخرى ... ها الشهبة مولات العينين كبار... ها السمراء ها الزين المسرار .. كاع زين الدنيا والدين تجمع فداك القصر . كل وحدة تمايل فجهة وناشرة زينها وطالقة رجليها .. متبعين روح الندى اللي داخلة كدور من ليمن ليسر وتشوف هاكدا وهاكدا .. كان يحساب ليها بوحدها اللي كاينة ... صدقات وسط الزين دايخة . هيا غايرة منهم وحتى هما غايرين منها . .. كل وحدة تشوف فيها ودور فعينيها محاملينها مقابلينها .. ميزتها هوا سالفها اللي ماعندش لمخيرة فقراناتها . هوا فالحقيقة مكايناش االلي فالزين فايتاها .. ولاكن كاينين اللي معادلات معاها .. فارق بيناتهم السالف الكحل اللي غادية وتجر من موراها ، عقدات روح الندى حجبانها وكمشات فمها كي النقطة .. بدات تسوط من مناخرها وتشوف فكل وحدة فيهم عليها حاطة ... مشات لراس الحيط فين كاينة مخدة حمراء وجلسات عليها .. وعينين البنات مزالين يتغامزو ويشوفو فيها . كتشوف فجلايل قفاطنهم وكتمنضر فرجليهم . هاللي دايرة لخلخال وها اللي ناقشة الحنة ، طلعات عينيها مع لباسهم وهي كتشوف صدوراتهم مدليين وبالعقيق والسناسل مزينين .. قفاطنهم من العنق واسعين ومن الرجلين معريين . ، بقات ساهية فيهم واخا حتى فالزين والقد حنتاتهم . شوية نزلات واحد لاللة خيتي مع دروج الخشب لابسة اللي ما لابساه حتى وحدة فيهم .. قفطان مزير من الصدر واسع من لتحت .. الصدر مبندر والشعر زعر كيبري .. مكحلة العيون ومزينة بالحلي .. مرى ونص وعلى راسها خيط الجوهر وسط الفرقة دالشعر.، شافتها عين روح الندى وهي تكفر .. ماحملاتها ماقبلاتها ومنها الغيرة كتقطر . شكو هاديك وشكون تكون وعلاش بوحدها من غير البنات اللي لابسة بحال داك اللباس.. دايرين بيه الوصفيات وهي هازة راسها فالسماء وحتى من البنات متبعينها بعينيهم . خرجوها كيجرو فجلايلها ويقادو فحوايجها والبنات موراها حاضيينها . 

تلفتات روح الندى بلهلا يطريه ليها والفضول قاتلها وسولات وحدة جالسة كتغرد فالناي مبفمها 

روح الندى : شكون هاد الغزالة اللي مهبطينها فهاد الحالة ؟ 

قالت البنت وهي محاملاش تهضر واصلة فيها للجدر : هاديك عروسة... الي هي باتت فجناح الملك حتى للصباح غيتطلق صراح الشعب والزواج فالبلاد غيولي مباح ... والى هي رجعات قبل ماينعس كلشي ... ديك الساعة غيجي الدور على البنات ويشوفو شكون العروسة اللي تمشي . . . 

نسات راسها روح الندى وغوتات حتى سكتات كلشي 

روح الندى: عروووساااا !!!!

كلشي تلفت عند روح ندا وسكت .. اما هي صبنات البنت اللي حداها بالهضرة بحال الى قاتلة ليها باها

روح الندى : كفاااش عروووسة!!! وانا اللي بايتة فالحبس 8 ايام باش نجي نتلاقا مع هاد السوسة!!! ويييلي !!! (ضربات فخادها) ويلي على العروساااا ... 

وقفات كتهضر بوحدها وكلشي كيشوف فيها ويقول عليها يمكن حمقة .. روح الندا دارت بيها الدنيا وبقات غير كتبرق فجنابها .. مارداتش لبال للفضيحة اللي دارت والبنت اللي خلات حاللة فمها ماعرفات باش تبلات .. تزيرات روح الندى وبغاو يدمعو عينيها . من زهرها مكايناش الوصيفة اللي تنقي ليها ودنيها .. يعلم الله فين غطسات؟ هزات روح الندى جلايلها و خرجات من المحرم فقفطانها كتجر وتزطم . . . فين غاديا هاد الهبيلة تاني.. ترفع راسها وماعرفاش منين كدوز . . كاع تمارة اللي ضربات باش توصل مشات ليها مع الريح . بقات غاديا سارحا و العروسة مزال بين عينيها كتبان . بقات غاديا غاديا غاديا والدموع من عينيها كيتسابقو حتى خرجها واحد الباب لبرى .. لساحة واسعة مضوية بضو القمرة و القنديل المعلق فكل جهة . وقفات مصمرة ووجها حمر وسط الساحة كتلهت وقلبها غيسكت .. الغلط ديالها .. هي اللي عينها كبيرة ومالقات فيمن طمع غير فحاكم بلاد على قدها من شمالها لجنوبها ! سخن راسها ومابان ليها غير واحد الصف ديال السيوفة معلقين واحد حدا واحد فواحد الحيط مصافين .. ساحة باينة ديال السيوفة .. مزوقة ومقادة ومتكون غير ديال الشرفة فيها كيحيدو القنط ويبسطو شوية .

هزات سيف تقيل وبدات ضرب بيه فالارض هنا وهنا .. كتبرد على قلبها من ديك الفقصة ديال العروسة اللي واحلة ليها فالحلق ولصقات ليها فالضرسة بحال السوسة . . . 

كدور فديك الساحة وتهز يديها للسماء وضرب فالحيوط والشجر المنبت .. وكن هزات راسها غير شوية لفوق كان يبان ليها بيت المالك قلبها على الساحة كيطل .. بيت شاعل بالضواو وشرفتو كبيرة دايرة على الساحة كاملة .. بيبانو مفتوحين ومن داخله كيخرجو الحان العود وغنى صوت امرى . 

من دوك البيبان الكبار والخاميات البويض اللي كيدي فيهم الريح ويجيب خرجات يد مزينة بخيط كحل وخاتم رقيق من الذهب الحر . 

بعدات الخامية من الطريق وخرج منها سيد الرجال .. الملك محمد اصيل المرتضي بالله بلابس النوم ... عليه قميص اخضر ملكي شفاف كيبين الصدر ... بارد كيحركو الهواء و قصير حتى للخصر .. واسع من العنق مثلت وفيه سفيفة رقيقة حتى هي فالخضر .. شعر صدرو رطب كيبان مع صدرو البندر. لابس سروال حرير طويل وبلغة فالصفر . خارج مهدن كيشم الهوى ويتسنط لصوت المرى للي لداخل .. كيدور من قنت لقنت ويلعب فشعرو الحل .. كل شوية يوقف فقنت هاز عينو فالنجوم كيتمنضر .. تحرك شوية داير كيتمشى حتى كيسمع صوت مرى كتعصر . وقف داير يدو على الحديد وهي تبان ليه روح الندى لتحت فالساحة مع السيف كي الحمقة كتهضر .. ضرب هنا ولهيه وتهزو بجوج يدين حتى طاح زيف اللي على راسها فوق الارض وبقات غير هي وسالفها منين مادازت ونقزات تابعها فالهوى كيطير

نزل حجبانو وبدا يتمعن فيها وهي كدور فبلاصتها ... شوية تلفتات عندو بوجهها وهوا هز حجبانو بخال الى فايت شايفها ... ملامحها ماغرابش عليه .. كفاش يقدر ينسى شي حاجة وعقلو عمرو قدر ينسى .. تفكر فابلاصة المنضر ديال البنت اللي تهزات فوق كتف العبد ... وقرنها مع روح الندى وتأكد ليه باللي هي... عمر شي بنت دخلات وسط الرجال تحارب ولا هزات السيف وسط القصر .. بقا كيتفرج فيها وهي كطير وتنزل ورجع دخل لبيتو الكبير .. بيت يعجز اللسان يوصف داك المنضر .. كبير بالسقف عالي مزين بالحجر... وفالراس سرير مذهب مفرش بالحرير .. قدامو زربية من الريش عليها مخاد كبار فالاحمر ... جالسة وسطهم لعروسة اللي جابو كتعزف وتلحن . مشا عندها بخطوات تقال و كتافو متوازيين ووقفتو شامخة كي لجبال . غير بشارة من عينيه حطات العود وناضت وقفات قدامو فالحال .. حادرة راسها كتسنى شنو المطلوب منها ، تبسم ليها وقال . 

- ليلتك هنا سلات ... واللي سولك قولي ليه جوهرتك للملك تهدات .

الشهبة اول مرة تسمع صوتو .. قلبها غيسكت وهادشي مزال حتى ما قرب ليها ولا حط يدو عليها .. غير صوتو رعدها حتى تصمكو ودنيها . 

كان كيعني بكلامو .. واخا مقربش ليها ... تقول باللي ولات مرى على يدو لكاع اللي سولوها . واخا مزالة عزبة شكون يقدر يقلبها وهي لبيت لماك دخلات ومعاه جلسات .. يكفي كلمة وحدة مافيها نقاش. والى خالفات ريو وقالت عكس كلامو ..عارفة شنو كيتسناها وعمرها تحلم توقف قدامو .

جمع تبسيمتو هاز راسو وشار ليها بعينيه جيهت الباب . رجعات باللور غادية حتى وصلات الباب وخرجات سداتو من موراها . خرج حتى هوا ووقف فباب بيتو بين عبيدو كيشوفو يمينو وشمالو وشد طريق ليمن بنفس الحوايج حيت عارف حتى واحد مكيوصل لجناحو ولا يدوز من الطريق اللي كيدوز منها من غيرو هوا واخا يكونو عمومو وخوالو . 

روح الندى مزالة كتشير .. مزال فقصتها مابغات تبرد .. لعروسة خرجات رجعات بحالها وروح الندى مزال عند بالها راها ففراشو مجبدة وعاجبها راسها . دقة هنا ودقة هنا حتى دارت بالجهد والسيف فيديها فالسماء لقات الملك واقف موراها كانت غتنزل عليه لو ماشدش يدها بيدو فالحين خلاها مخرجة عينيها فيه ماعرفاتو منين بعت عليها وكيفاش حتى جا بلا حس وتحط موراها كيشوف فيها

يتبع