عشق و كبرياء الجزء 15

رجاء : مكيجاوبش ؟

إسراء : لاء .. ( عاودات صونات و نفس الشيء )

رجاء : و شنو المعمول .. ماموالفاش ليه تقوليلو على تحراكتك ..

إسراء : فاش رجعنا من السفر .. كيوصي و اعاود .. و مبغاش اقول ليا السبب ..

رجاء : لعجب .. و دبا شنو المعمول ..

إسراء : يالاه نمشيو دبا .. شوية نعاود نصوني ليه ..

مشات إسراء لبسات عليها و خدات الفون عاود صونات عليه مجاوبش خرجات لقات رجاء واجدة و هوما اهبطو .. خدات اللوطو ديالها و ركبات رجاء حداها و خرجو مع الباب ديال الفيلا إسراء كسيرات و ممنتبهاش للوطو الي كانت حدا الفيلا و تحركات من وراها ..

كان رياض واقف و حاضي الباب على امل تبان ليه إسراء غير شاف اللوطو ديالها خارجة من الفيلا فرح .. و تبعها بلا متحس بقا غادي من وراها حتا بانت ليه وقفات حدا شي صالون التجميل .. شوية بانت ليه هابطة بقا كيشوف فيها بحب كبير عنيه مركزين عليها كيشوفها غير هي .. خرجو جوج بنات من الصالون و دازو من حدا اللوطو ديال رياض شافوه و بقاو كيتغامزو عجبهم بوسامتو .. كان لابس تيشورت كحل و داير كاسكيط و هما مباقيش بغاو ازيدو مع الطريق واقفين كيتعوجو على امل اشوف فيهم .. و لكن شكون شافهم كتبان ليه غير اسراء كتناكر و تضحك هي و رجاء و مشادين عاد دخلو .. دور وجهو و بانو ليه دوك جوج منيكات خنزر فيهم و هما اقلبو الطريق و زادو فحالهم هز الفون و دوز مكالمة ..

رياض : مادموزيل سلوى ..

سلوى : وي ميستر العثماني ..

رياض : امم .. مستاعدة للحفل ؟

سلوى : وي مستاعدة .. غير متوترة شوية ..

رياض : مكاين لاش و انا متاكد غادي دي الجائزة ..

سلوى : انشالله ..

رياض : غادي تجي إسراء ياك ؟

سلوى : آه .. راه عيطت ليها و اكدت عليها تجي كيف قلتي ليا ..

رياض : ( بفرحة ) مزيان .. نخليك تكملي الاستعداد ديالك ..

سلوى : اوكي .. مغسي موسيو ..

رياض : مكاين لاش ( قطع )

دخلات إسراء هي ورجاء و دارو بالحالة قادو الشعر و الميكاب خلصو و تمو خارجين .. إسراء هزات راسها و هي تبان ليها سيارة مألوفة و بقات كتحقق .. رياض هبط الكاسكيط على و جهو و كسيرا فرحان حينت شافها و حينت غادي تكون فالحفل .. منين تحركات اللوطو إسراء دورات و جها قالت مع راسها غير تشبهات ليها طلعو و مشاو ديريكت للدار ..

وصلات العشية و إسراء مرة مرة كتسوني على آدم و مكيجاوبش و فالاخير لقاتو طافي استسلمات و ناضت كتوجد راسها .. لبسات غوب فالزيتي محلولة من الصدر و واصلة حد الركبة جاتها لاصقة على الطاي ديالها .. دارت اكسسوارات فيدها و لبسات كعب عالي فضي سميطات دارت اللمسات الأخيرة .. تحل الباب و دخلات رجاء حتا هي محلقة على الحالة لابسة غوب كحلا دونتيل مزيرة من جيهت الصدر .. و مرخوفة حتال التحت و فيها فتحة فالجنب و كعب عالي بيج ..

رجاء : هاي هاي على التيتيز ..

إسراء : ميغسي بيب حتا نتي جيتي زوينة ..

رجاء : ( ضربات بشعرها اللور ) عارفة ..

إسراء : اللهم زيدنا تواضعا ..

رجاء : التقة فالنفس هي كلشي .. اه قلتي آدم غادي اجي ليك .. هضرتي معاه باقي ؟

إسراء : عييت نصوني عليه و والو الفون طافي .. تبرزط عليه مامولفاش ليه ..

رجاء : ياك قلتي عندو اجتماع .. و راه غادي اكون طفاه على حسابو ..

إسراء : امكن ..

رجاء : فراسك معطلين بنص ساعة ..

إسراء : كنتسناه علا و عسى اكون كمل و اتاصل بيا ..

رجاء : يالاه نمشيو .. و منين اعيط ليك قولي ليه اخلط علينا ..

إسراء : افف .. يالاه ..

إسراء قلبها مقبوط عليها معرفاش علاش خافت تكون واقعة شي حاجة لآدم حينت مامولفاش ليه اتعطل عليها الى دار معاها .. و لكان معطل كيعلمها باش متشوش عليه و دبا حتا الفون ديالو طافي .. خدات اللوطو و ركبات هي و رجاء و اتاجهو للحفل بعد 20 دقيقة .. وصلو كانت الصحافة تماك هي دارت و دخلا من الباب الخلفي نزلات و ورات بطاقة ديالها للكارد و دخلو .. لقات الحفل بدا و كيوزعو الجوائز على الفائزين مشات جلسات هي و رجاء فالمقاعد الأمامية مخصصينها ليهم .. تلفتات كتقلب بعنيها على سلوى بانت ليها فالجانب الآخر و حداها هشام و حداهم رياض .. الي هز عنيه شافها و وساعو عنيه مبقاش حيد عنيه عليها هي دغيا دورات و جها للجهة لاخرة .. جات فئة احسن ألبوم و هي الجائزة الكبرى تعلنو على المرشحين فالشاشة و بعدها المقدم حل الضرف و علن على إسم الفائز الي هي 'سلوى' ..

سلوى تصدمات مكانتش متوقعة تفوز حطات يدها على فمها من هول الصدمة هشام ناض عنقها و هي باقة مصدومة .. حركها و هضر معاها باش تمشي توجة للمنصة تسلم الجائزة ديالها طلعات و هي كترعد و الفرحة و الدموع فعنيها .. خدات الجائزة و عطات خطاب الفوز الي كتشكر فيه الناس الي ساندوها و أولهم إسراء قلبات عليها بعنيها حتا بانت ليها .. و وجهات ليها الشكر و الامتنان و شكرات هشام و رياض العثماني نزلات من المنصة و توجهات عند إسراء تلاحت عليها عنقاتها .. 

إسراء بادلاتها العناق و هنآتها على الفوز و رجعات سلوى لمكانها حتا سالا الحفل .. الناس ناضو متوجهين للاوطيل الي فيه 'After party' الي كتكون بعد اي حفل جوائز .. إسراء كانت باغا تمشي عند سلوى مي شافت رياض واقف معاها و دارت بناقص حتا تمات سلوى جايا عندها هي و هشام ..

إسراء : مبروك عليك .. كنت عارفة نتي الي غادي تديها ..

سلوى : معرفتش باش نجازيك على وقفتك معايا .. وخا نبقا نشكرك حتا لغدا منوفيكش حقك ..

إسراء : متقوليش هكاك .. هادشي بفضل جهودك .. و حنا غير ساعدناك و هشام حتا هو ليه فضل كبير ..

هشام : ( باس إسراء فخدها ) شتي الزين الي عارف بحقي ..

.. ( شاف فسلوى ) ماشي بحال شي ناس نكروني ..

سلوى : ( ببرائة ) منسيتكش .. حتا نتا ليك دور كبير فنجاحي ..

رجاء : و أنا ميشكرني حد ..

هشام : فليفلة شتك مدخلة راسك صحة ..

رجاء : واقلة توحشتي النتيف ديالي ..

هشام : اف عاد تهنيت .. كندعي مع جهاد صباح و عشية حينت داك و بعد علينا بلاك ..

رجاء : و الله يامك حتا حتا نشتف عليك هنا نوريك بلايا ..

إسراء : تلاقيتو تاني .. هشام فرقها عليك ممزيانش ليها تعصب (حطات يدها على كرشها ) راه عندها ببي هنا ..

هشام : ( بدهشة ) واااات .. حاملة ! ههههه .. لا ميمكنش .. نتي غادي تولي ام صافي كملات ..

رجاء : ( عنيها غرغرو ) و علاه مالي كي جيتك . 

هشام : ( عنقها ) ناري .. غير كنضحك معاك الصحيبة و نتي دغيا دمعتي .. مبروك عليك الزين ..

سلوى : ( عنقاتها ) مبروك عليك ..

رجاء : الله ابارك فيك .. ( شافت فهشام و خنزرات )

إسراء : ههه راه مع الحمل ولات حساسة بزاف .. غير فوت ساحتها ..

هشام : وينو رجاء غادي تولي ام ههه .. و انا خال دغيا شرفتينا ..

رجاء : نتا خلوق شارف و باير و حتا وحدة مغادي تقبل عليك ..

هشام : ههه ( شاف فسلوى ) كاينة الي قابلة عليا و موتي بالسم ..

إسراء : ( كتشوف فيهم ) لا لا متقولهاش ..

هشام : ( حاوط سلوى من خصرها ) وييه طحت على زنافري و اعتارفت .. و دابا كنقدم ليكم حبيبتي سلوى .. ( باسها فخدها )

رجاء : يخ مكتفلت حتا وحدة .. سلوى معارفاش معامن طحتي كازانوفا ..

هشام : عفا الله و دبا ناوي المعقول ..

إسراء : اوى مبروك .. فرحت ليكم .. حافظ عليها تقلقها نخرج فيك انا و رجاء ..

هشام : متخافيش هادي الحب ..

سلوى تزنكات و حادرة عنيها باركو ليهم إسراء و رجاء و مشاو خداو سياراتهم باش اتوجهو للاوطيل هشام ركبات معاه سلوى و إسراء معها رجاء .. 

وصلو و كانت الدنيا عامرة دخلو للقاعة الي فيها الحفل عامرة بالمشاهير و رجال الأعمال و الشخصيات المهمة .. إسراء كلا ساعة تصوني لآدم و كتلقا الفون طافي شدات طبلة هي و الاخرين و ملا مرة اجي شي حد اسلم عليهم و كيهنئو سلوى ..

عند آدم الي كان مشا للشركة كيوجد للاجتماع جا المساعد علمو بلي الشركاء جاو و مشا خالا الفون فالمكتب .. الإجتماع كان شاحن حينت كانو شي مشاكل فالصفقة و دام كتر من اربع ساعات فحين إسراء كانت كتصوني على آدم و الفون فالمكتب حتا ديشارجا و طفا .. منين سالا الاجتماع مشا آدم بسرعة للمكتب باش اصوني على إسراء يالاه هز الفون و هو ادخل المساعد ديالو عطاه الفون .. كانت أم آدم ..

فتيحة : آدم ولدي ..

آدم : الواليدة مالكي .. شنو واقع ؟

فتيحة : ريم ..

آدم : ( بخوف ) ريم .. مالها ريم ؟

فتيحة : ( كتبكي ) لقيتها فاقدة الوعي .. بنتي معرفتش مالها ..

آدم : تهدني الواليدة .. هاني جاي ..

فتيحة : سربي دغيا اولدي ..

رد آدم الفون للمساعد و هز ديالو قلبو لقاه طافي خشاه فجيب هز الكونتاكت و خرج طاير .. خدا اللوطو و كسيرا لدار خايف على ختو بزاف خاف اكون الشجار الي دار ببناتهم هو السبب .. معرفش كيف دار لديك الطريق و صل و دخل كيجري لبيتها لقاها فوق ناموسيتها و حداها فتيحة .. كتبكي و شادة ليها فيدها كتحاول تفيقها قرب آدم و هزها بين يديه و تم خارج بيها تبعاتو ماماه .. حطها فاللور و طلعات حداها فتيحة طلع آدم و مشا طاير للكلينيك .. هبط هزها دخل بيها كيغوط جاو جابو باياص و دخلوها افحصوها و بقا آدم و مو فالكولوار كيتسناو .. آدم غادي جاي معصب كيلوم راسو على الي واقع ليها مشا حدا مو و هو كيدوز يدو على راسو ..

آدم : كيف وقع ليها ؟

فتيحة : الصباح طلعت عندها حينت مهبطاتش تفطر .. لقيتها باقا ناعسة فيقتها و قالت لي بلي عيانة شوية مافيها الي فطر .. خليتها على خاطرها و خرجت مشيت الجمعية و تغديت مع شي ناس رجعت هاد العشية .. سولتهم واش تغدات قالو لا مهبطاتش طلعت عندها لقيتها مغمى عليها حدا الدوش .. باينة مكلاتش النهار كاملو و هي عندها فقر الدم هئ هئ ..

آدم : ( عنق مو ) صافي الواليدة .. مغادي اوقع ليها والو ..

شوية خرج الطبيب مشا عندو آدم ..

آدم : كيف ولات ؟

الطبيب : معندك علاش تخاف .. المريضة عندها فقر الدم و كانت هاملة راسها و ماشرباتش الدوا ديالها .. راه فاقت علقنا ليها السيروم تكملو و امكن ليها تخرج ..

آدم : ( بارتياح ) شكراً ليك ..

الطبيب : هدا واجب ..

فتيحة : الحمدلله و الشكر لله ..

آدم : اجي ندخلو عندها ..

مشاو للغرفة الي فيها ريم دخلو و لقاوها متكيا و حالة عنيها كانت شاحبة و فمها بيض .. شافت فآدم و تغرغرو عنيها و آدم شاف فيها بحسرة و ندم .. مشات عندها فتيحة عنقاتها و كتبوس فيها ..

فتيحة : خرجتيها مني خلعة .. على سلامتك اكبيدتي ..

ريم : الله اسلمك اماما .. متخافيش راه مابيا والو ..

فتيحة : كيف وقع ليك حتا سخفتي .. و علاش مكلتيش النهار كاملو ؟

ريم : لا راه مكانش فيا الجوع .. مدريش فبالك اماما .. هاني موقع ليا والو ..

فتيحة : اوى بنتي ديها فصحتك و متنسايش تاخدي دواك .. نتي هي نوارت الدار .. آدم ولدي عاون ختك توقف باش نمشيو ..

ريم : لا لا بلاش راه نقدر نمشي على رجلي ..

آدم مدهاش فيها هزها بين يديه و هي تحط يدها على عنقو و خرج غادي بها و فتيحة تابعاهم .. خرجو و حطها اللور و ركبات حداها مها و آدم طلع و ديمارا للفيلا وصلو و خرج هز ريم و طلعها لبيتها .. حطها فوق الناموسية و باس راسها ..

آدم : ديها فصحتك ..

قال هاد جوج كلمات و خرج مشا دخل لبيتو كيمسح على وجهو شوية توقف على الحركة و تفكر إسراء .. هز الفون لقاه طافي دارو فشارج و شعلو لقا شحال من ابيل من عند إسراء و دوز المكالمة ديك الساع ..

كانت إسراء مجمعة مع هشام حسات بالفون كيصوني شافتو آدم استأدنات منهم و خرجات من واحد الباب .. لقات بلاصة خاوية مافيهاش بنادم و الصداع جاوبات ..

إسراء : آدم علاش مكتجاوبش ؟

آدم : سمحي ليا حبيبة من بعد و نشرح ليك .. فينك دبا ؟

إسراء : انا فالحفل .. تسنيتك و صونيت عليك و مكتجاوبش ..

آدم : كيفاااااش .. اش قلت انا .. قلت ليك ماتمشي فين بلا بيا ..

إسراء : تسنيت فيك حتا عيت .. و جيت انا و رجاء لقينا لحفل بادي ..

آدم : (بالغوات ) إسراء .. علاش مكتسمعيش لهضرة .. زعما اكدت عليك ..

إسراء : دبا كتلومني و نتا معطل و طافي الفون ديالك .. شكون خاصو اتعصب على لاخر ..

آدم : دبا نتي فين كاينة ؟

إسراء : فالاوطيل الي دايرين فيه الحفل ..

آدم : اوكي .. بقاي حدا الناس و متوقفيش وحدك ..

إسراء : علاش مالي باقا صغيرة .. خايف نتوضر ..

آدم : متعصبنيش ا إسراء و ديري آش قلت ليك .. شوي و تلقايني عندك ..

إسراء بغات تجاوب حسات بيد تحطات على كتفها تلفتات و هي تشهق و الفون طاح من يدها ..

عند رجاء و هشام و معاهم سلوى مجمعين شادين الستون فاسراء ..

هشام : عرسها مابقا ليه والو .. و من بعد تجي نوبتنا حتا حنا ( شاف فسلوى و غمزها )

رجاء : مالك زربان .. كلكم مسكيين بمغرفة وحدة يخخ ..

هشام : رولاكس بيب .. نتي دقتي الحلوة و شبعتيها مع راسك حتا دار ليك قنبلة .. و باركة تفلسفي علينا حنا الي محرومين ..

رجاء : مكابيت .. نتا و جهاد و زيد عليكم آدم حتا هو ..

هشام : ههه .. اوا آدم مابقا ليه والو .. انا الي باقي مطول و محال نقدر نزيد نصبر ..

سلوى : ( تزنكااات ) مالك مكتحشمش ..

هشام : هادشي مافيهش حشومة ازين ديالى ..

رجاء : باز .. اوى الله اعفو .. و نزيدك آدم داق الحلوة .. على مفراسكش هو و لالة إسراء سبقو شهر العسل على العرس ..

هشام : وايلي .. ههه راجل ماعليهش ..

هشام : وايلي .. ههه راجل ماعليهش ..

كانو كيهضرو غافلين على الشخص الي موراهم الي سمع الحديث كلو و مزير على يديه وجهو ولا حمر و عروقو بغاو اطرطقو .. تمشا بسرعة و كيقلب بعنيه و هو شاعل كيدفع فبنادم و ممسوقش لشي حد .. خرج من الباب الي كيدي للمطبخ و هي تبان ليه عاطية بضهرها عرفها بلا ميشوف وجها .. ولا حافض كل تفصيل فيها كتر ماولا مهووس بها توجه لعندها و حط يديه على كتفها تلفتات ليه شافتو وهي تخلع .. كان مخنزر و كيشوف فيها شوفات ممفهومينش الشيء الي فزعها حتا طاح ليها الفون من يدها .. استوعبات شنو واقع و تحدرات بغات تهز الفون من الأرض كان حدا رجليه زف رياض الفون برجليه حتا طار .. و قرب لعندها بسرعة البرق شد دراعها بقوة و كيصوط ..

رياض : ( كيحرك راسو يمين شمال ) ميمكنش هادشي الي سمعت .. لا ميمكنش .. سلمتي راسك لهداك اا ؟!

إسراء : ( بخوف ) اي رياض طلق مني .. راك كتوجعني فيدي ..

رياض : راني سولتك .. واش سلمتي نفسك لداك الزامل .. هضريييي ..

إسراء : آش كتخربق .. طلق مني ..

رياض : نتي ديالي .. ميمكنش تكوني نعستي معاه .. لااا ميمكنش ..

إسراء : ( حابسة دموعها ) ماشي شغلك .. هداك الي كتهضر عليه .. راه راجلي و انا كنبغيه و عمري نكون لشي واحد من غيرو .. كتفهم ..

رياض : سكتييييي .. نتي غادي تبغيني انا .. انا و نتي مكتابين لبعضياتنا ..

إسراء : راك غير كتخرف .. نتا واحد مريض .. سير تعالج و عطيني بالتيساع .. آدم الى ساق الخبار مغاديش ادوزها ليك ..

رياض : ( كينفض فيها ) متنطقيش بسميتو .. نسايه .. من اليوم مكاين غير انا و نتي ..

إسراء : طلق مني .. فرقني عليك الحمار .. كنت غالطة فيك طعتي شماتة تابع حاجة مديالاكش ..

رياض : ( هز يدو الفوق و هبط عليها بتصرفيقة حتا طاحت فالارض ) انا ماشي شماتة .. و نتي ديالي .. دخليها لراسك .. و رااااااجل و غادي تشوفي بعنيك ..

هبط عندها و هي كتكحاز باللور بيديها و رجليها شدها من دراعها و قفها و هزها على كتفو .. إسراء كتقاوم و دفع فيه و تضرب بيديها و رجليها و والو كان اقوى منها .. مشا دخل للكوزينة ديال الاوطيل و خرج حدا سانسور خاص بالخدم طلع فيه .. هي كانت كتقاوم مستسلماتش لكن غير دخلو لاسنسور و تسد تزيرات إسراء و حسات بالخنقة و روحها بغات تطلع و هي تفقد الوعي .. حس بها رياض زكات من الحركة مهتمش و ضغط على زر للطابق الي حاجز فيه سويت حينت كان ناوي ابات فالاوطيل بعدما اسالي الحفل .. وصل للطابق الأخير تحل الباب و خرج رياض وصل لسويت جبد الكارت من جيبو و حل بيها .. حط إسراء بكل هدوء فوق الناموسية و رجع جوج خطوات اللور كيتأمل فيها ..

عند آدم الي كان خارج ليه لعقل بعدما نقاطع الاتصال مع إسراء عرف بلي شي حاجة واقعة .. خرج كيجري خدا اللوطو و كسيرا بسرعة حتا تحكو الروايض مع لرض .. خايف لا يكون داكشي الي فبالو هو الي واقع ليها عمرو حس بحال هاد الخوف فحياتو .. ميمكنش استحمل الى وقع شي مكروه لاسراء اي حاجة استحملها الا انها تآدى ..

رياض بقا واقف مدة و هو كيشوف فاسراء الي مغيبة كيتفحص جسمها الي كيبان مثير فديك الغوب .. جذباتو بأنوثها و جسمها الممشوق شعرها مغطي نصف فوجها .. قرب بخطوات هادئة و تحنا على ركابيه حط يديه على شعرها كيبعدو على وجها و راسم ابتسامة على وجهو ..

شوية بدات كتحرك فعنيها حلاتهم كتشوف فالسقق كتستوعب فين هي حسات بيدين كيلعبو فشعرها دورات وجها غير شافتو .. و هي تهز و الخوف مرسوم فوجها بعدات عليه و كلها كترعد هو دغيا جمع الابتسامة محملش كيف بعدات عليه بحال الى فيه شي وباء ..

إسراء : فين انا .. شنو درتي ليا ؟

رياض : ( مخنزر ) متخافيش مدرت ليك والو .. غير فقدتي الوعي فاش طلعنا فلاسانسور ..

إسراء : هئ هئ .. بعد مني ..

رياض : ( قرب حداها و مسح الدموع الي على خدها ) متبكيش .. من اليوم غادي تكوني معايا و نعيشك ملكة .. و عمرني نبكيك ..

ضربات ليه يدو و ناضت غادة جيهت الباب تبعها بخطوات مسرعة و شدها قبل متوصل للباب .. كتنتر منو و هو حاكمها و زدحها مع الحيط ..

رياض : علاش كترفضيني .. انا كنعشقك و مستحيل نآديك ..

إسراء : ( الدموع فعنيها ) نتا دابا كتآديني .. خليني نمشي فحالي .. آدم غادي تخلع عليا ..

رياض : ( زير على دراعها حتا غوطات ) آدم عوتاني .. مباقيش تنطقي سميتو قدامي .. غادي نحاسبو على داكشي الي دار .. غير بلاتي ..

إسراء : سير تعالج راك مريض فعقلك .. آدم راجلييي و أنا مراتوووو .. دخلها لدماغك و عمرني نكون ليك ..

رياض : ( بعصبية ) ماشي لخاطرك .. نتي حبيبتي و غادي نملكك بالخاطر و لا بزز ..

دفعها و لاحها على الناموسية و تكا عليها حاكمها بجسمو مبقاش عاقل اش كيدير .. حاجة وحدة كضور فدماغو هي إسراء غادي تولي ليه قرب بغا ابوسها و هي كتبعد و جها يمين و شمال .. شدها من فكها يلاه غادي احط شفايفو على شفايفها و هو اتفرع الباب ..

آدم وصل للاوطيل و دخل كيف الرعدة كيقلب بين الناس على حبيبتو .. بغا احماق بانت ليه رجاء و مشا شدها من دراعها دورها بجهد حتا كانت غادي طيح ..

آدم : ( بركان شاعل ) فينها إسراء ؟

رجاء : ( شادة فدراعها كتحك فيها حينت توعطات ) هئ اي يدي ..

آدم : ( بصوت كيزعزع ) جاوبيييي .. فينها اسراااااء ..

رجاء : معرفتش .. غير شوية هدا كانت هنا ..

جا هشام كيجري و موراه سلوى كي شافو آدم شنق عليه من الكول ديال القاميجة ..

آدم : مبانتش ليك إسراء ..

هشام : لاا .. كانت غير هنا ..

آدم : ( طلق من هشام ) فين غادي تكون .. ( شاد فراسو ) مبانش ليكم داك الحمار ؟

هشام : علامن كتهضر ..

آدم : ( كيغزز سنيه ) المرض ديال العثماني ..

آدم : ( كيغزز سنيه ) المرض ديال العثماني ..

سلوى : بحرا كنت مع المساعدة ديالو اتاصلات به .. قال ليها طلع لسويت ديالو بغا ارتاح ..

مزال مكملاتش هضرتها مشا عند المساعدة كانت واقفة مع شي ناس شنق عليها بيد و حدة معرفات باش تبلات ..

آدم : فين رياض ؟؟

المساعدة : ( كتفتق ) اا ..

آدم : ( شدها من عنقها زير حتا خرجو عنيها ) فين داك الزامل .. نطقي خلااااااص ..

المساعدة : امم ..

طلق منها آدم و شدها من شعرها ..

آدم : معنديش ليك الوقت .. غادي تقولي ليا فينا سويت كاين و لا ودعي روحك ..

المساعدة : كح كح .. فالسويت الملكي كح .. الطابق الأخير ..

دفعها حتا طاحت و مشا كيجري داز من حدا رجاء و هشام الي مفاهمين والو ..

رجاء : ناري القضية حامضة .. منين آدم كيقلب على إسراء و سول على حتا رياض .. ياكمة واقعة شي حاجة لاسراء ..

هشام : آدم شاعل باينة ليوم طيح شي روح .. أنا غادي نتبعو .. رجاء تاصلي بالبوليس اقدر نحتاجو مساعدة ديالهم ..

مشا هشام تابع كيقلب على آدم .. الي هاد الأخير وصل للطابق الي فيه رياض .. خرج من المصعد و جا كيجري بكل قوتو ضرب الباب بكتفو حتا تفرع .. دخل و شاف أسوء مشهد ممكن اشوفو فحياتو رياض فوق إسراء و هي كتبكي و دفع فيه ..

آدم طار عليه و جرو كيضرب فيه و اعاود كيحس بالعافية شاعلة ليه فقلبو و الشياطين كينقزو ليه فوق راسو .. كيضرب فيه بحال الى كيضرب فكيس ديال البوكس ضربات متابعة و بقوة اكبر مكيخليش ليه حتا الفرصة فين استوعب الدقة او ادافع على راسو .. إسراء فوق الناموسية جامعة رجليها عندها و كتشهق بالبكا و كتشوف فآدم بسيفة آخرى منعس رياض فلرض كيضرب فيه بكل قوتو .. و وجهو ولى عامر دم و نفسو كطلع غير بزز دخل هشام لسويت و شاف فإسراء فديك الحالة .. باينة عليها كانت ضحية محاولة اغتصاب مشا عندها بجرا و عنقها و هي كلها كترعد و عنيها محبسوش من الدموع .. بعد هشام و تلفت عندهم ناض وقف و قرب عند آدم كيحاول ابعدو على رياض الي كان بحال شي شرويطة .. حاول حتا عيا مي آدم كانت قوتو مضاعفة بداك الغضب الي متملكو كيرجع ليه و اضرب حتا تجرحو ليه يديه و موقفش .. كيفضل اقيس ليه عنيه و ميقربش لاسراء و سعاك اتعدى عليها .. اقتلو و محال واش اشفي غليلو صورة وحدة الي كتبان لآدم بين عنيه هي رياض فوق إسراء كيحاول ابوسها .. مكيشوف والو و مكيسمع والو حتا بكاءها العالي و نداءها بسميتو مسمعوش ..

واحد اللحظة شد آدم يد رياض الي كان مزير بيها على فك اسراء لواها ليه حتا تسمعات طراق و رياض غوت من حر الألم .. هرسها و بقات مدليا و العضم خارج هشام جبدو بعدو عليه و إسراء مصدومة من داكشي الي شافت .. فهاد اللحظة دخلو البوليس و من وراهم رجاء و سلوى الي تصدمو من هول المنضر .. إسراء الي شعرها مشنتف و كتبكي و رياض الي كولو دمايات و هشام شانق على آدم باش ميرجعش ليه .. مشات رجاء لعند إسراء عنقاتها و إسراء حتا هي تخشات فيها و زادت فالبكا .. آدم شدوه تلاتة ديال البوليس حينت كان غادي ليه مازال و كيتحلف فيه و اعاود ..

آدم : طلقو مني الحبس ..

آدم : طلقو مني الحبس ..

هشام : الله اهديك ا آدم .. راه غادي اموت ليك فيديك ..

الشرطي : عيطو على الاسعاف تجي تهز هاد السيد .. ممكن شي واحد اشرح ليا شنو واقع هنا ..

هشام : هاد بنادم حاول اتعدى على البنت كون مجاش راجلها فالوقت المناسب ..

آدم : ( سمع تعدى و هو ازير على يديه الي كيقطرو بالدم ) ولد القح** مزال مخلاق هدا الي اقيس شعرة من مرتي .. ( كيتنطر ليهم باش اطلقوه )

الشرطي : اسي راه مكايناش السيبة فالبلاد .. باش دير شرع يديك عيط البوليس اتكلفو ..

آدم : سير تقود انعلبوك نتا وياه .. طلق الخرا ..

الشرطي : باغي تزيد تغرق راسك .. ديرو ليه المينوط و جروه لكوميسارية ..

الضابط : ( قاطعو ) مالنا آش كاين ؟

الشرطي : مون شاف هدا ..

الضابط : صافي سكتنا .. ( مشا اتجاه آدم ) طلقو منو .. موسيو الادريسي تكالما .. ولا عاليك انا غادي نتكلف .. نتا سير دي المدام و غدا دوز عندي للكوميسارية ناخد اقوالك ..

الشرطي : ولكن اسيدي راه تعدى على ..

الضابط : ديها فمك و سير دير خدمتك ..

حنى الشرطي راسو و خرج هو و الاخرين جات الاسعاف و هزو رياض الي كان فاقد الوعي .. آدم خرج كيقلب على إسراء الي داتها رجاء للطواليت تغسل ليها وجها إلي تجخلط بالمايكاب ..

غادي فالكلوار حتا كتبان ليه رجاء و سلوى شادين فإسراء الي كتمشا بزز .. سرع فالخطوات ديالو و هي غير شافتو تخلعات حينت باقي مخنزر خافت اضربها و اغوط عليها .. زيرات على يدين رجاء وصل عندهم آدم و شدها من عندهم هزها بلا هضرة بلا جوج .. حس بها كترعد و بقات فيه داكشي الي دازت منو ماشي قليل لكن جزء من الي وقع كان الغلط ديالها حينت مسمعاتش ليه .. هبط فالدروج كيشوف غير لقدام و هي حاطة راسها على صدرو و كتبكي بصمت خرج من الباب الخلفي فين حاط اللوطو حل الباب و حطها دار ليها الصمطة و مشا ركب ..

ديمارا اللوطو و تمو غادين فصمت هو مركز فالطريق و غير كيسوط و إسراء تكات على الزاج و غمضات عنيها .. مسافة الطريق وصل آدم لدارو حلو ليه البوابة دخل وقف اللوطو و دار كيشوف فاسراء ناعسة و خدودها فيهم اطراس الدموع .. خرج و دار عندها هزها و تم داخل موقف حتال لبيتو حطها فوق الناموسية حيد ليها صباط و غطاها باس ليها راسها و خرج ..

مشا دخل للمكتب و هز قرعة حلها و بدا كيشرب بدون توقف و هو مزال كيغلي من لداخل .. فكرة انو لو مجاش فالوقت المناسب و لو تعطل دقيقة كان غادي اوقع الأسوء .. خرج من تفكيرو شاف القرعة خوات هزها حتا هزها و شخشخها مع الحيط و ناض الي لقاها قدامو كيخرج فيها المكتب ردو سفاه على علاه .. حتا حاجة مبقات صحيحة رجع هز قرعة اخرى و خرج مشا لبيتو دخل بشوية شاف إسراء كيف خلاها ..

ناعسة على جنب و مكمشة على وضعية الجنين و كتنين بحال الى كتبكي فنعاسها حس بالم فصدرو .. هاد الانسانة كتعني ليه كلشي فهاد الحياة واخا كيعاني بسباب حبو ليها لكن ميقدرش اعيش بعيد عليها .. جلس فوق الفوطوي مقابل معها كيشرب و اشوف فيها الليل كولو و هو على نفس الوضعية حتا طلعات الشمس .. هز جاكيطو و خرج قبل متفيق مشا نيشان للكوميسارية كي وصل حط اللوطو و دخل بكل هبة .. مشا لمكتب الضابط و دخل بعدما علموه بمجيئ آدم ..

الضابط : مرحبا موسيو الادريسي .. تفضل جلس ..

آدم : داكشي الي كنت خايف منو وقع .. و لكن لقح** مو مغاديش تبقا فيه ..

الضابط : موسيو الادريسي كالم .. فاش جيتي عندي آخر مرة كنتي درتي بلاغ بلي موسيو العثماني كيستوكي المدام ديالك .. و سجلنا محضر و كان خاص غير اقوال المدام و نديرو ليه حضر انه اقرب منها او من السكن ديالها ..

أدم : كنا بغينا نلتاجئو للقانون .. ساع الحيوان الي ولدو استاهل غير لقتيلة ..

الضابط : انا متفهم موقفك .. و راه شفتي البارح كن تعطلنا شوية كن قتلتيه و غادي تعاقب عليها .. نتا دبا مغاديش توجه ليك حتا تهمة و عندك شهود على انو كان غادي اتعدى على المدام ديالك ..

آدم : ( معصب ) يجوز فيه لقتيل و حتا الحبس ماشي خصارة .. غير نمحيه و نتهنى ..

الضابط : تهنا غادي نرفعو عليه دعوة الاختطاف و محاولة الاغتصاب .. وخا معارت اش اكون غادي امشي فيها لحبس .. الي غادي نقول ليك حاول تجنبو هو دبا فالمستشفى مهرس من يدو و عندو جروح خايبين بحال الى داز عليه تران .. هاد القضية خليها عليا و لا عليك ..

آدم : ( وقف ) نعول عليك .. الى مدخلش لحبس غادي نسيفطو لروضة ..

تصافحو و خرج آدم و هو مازال مبرد كان فاش يالاه رجع من السفر هو و إسراء مشا بلغ برياض و تبع نصيحة تاعت ماشي كلشي كيتحل بالعنف .. كان فقط كيتسنا الوقت المناسب افاتح فيه إسراء و اقول ليها على رياض و مطاردتو ليها .. و اقنعها تبلغ بيه و نيت ابعدها على طريقو و ميخليهش ادير حتا شي محاولة اوصل ليها .. ساع هادشي الي وقع مكانش فالحسبان طلع فاللوطو و مشا للدار دخل و طلع لبيتو كي دخل مبانتش ليه إسراء تخلع .. حتا سمع صوت الماء عاد ارتاح و تنهد بارتياح شوية تحل باب الدوش و خرجات إسراء لاوية عليها فوطة .. غير شافتو و قفزات باينة باقا فيها خلعة لبارح و كان عندها حتا تخوف من آدم .. تم غادي عندها و هي جمدات فبلاصتها مقدراتش تزيد خطوة وصل عندها و هو عاقد حجبانو .. تلاح عليها و عنقها حتا حسات بضلوعها غادي اطرطقو كيزير و اعاود حتا تاوهات من الألم .. خشاها فضلوعو هو اه كيعاتبها مسمعاتش ليه و لكن معندها حتا دنب ان واحد مريض دارها فراسو .. هي كانت مصدومة من ردة فعلو كانت متوقعة اغوط عليها اضربها ..

و منين عنقها اجهشت بالبكا كتبكي و هي معنقاه من كرشو الشخص الوحيد الي كتحس بالامان فحضنو بعد خوها .. سمع بكاها و بعدها عليه حدرات راسها مقدراتش تشوف فيه .. هز يدو و رفع ليها راسها بصباعو حتا تلقاو عنيهم كيشوف فعنيها الي كيلمعو بالدموع .. مسح ليها دموعها بحنية و تحنا حط شفايفو على شفايفها و بدا كيقبلها بحنان حتا تجاوبات معاه و نسات راسها .. حس بها ندامجات و عضها فمها حتا خرج الدم و غوتات بعد و هو كيشوف الدم كيسيل من شفتها لتحتانية .. هزات صبعها و قاستها و هي تلقا الدم فيدها ..

إسراء : هئ حشومة عليك ضرتيني ..

آدم : و نتي ماشي حشومة عليك .. نتي مضرتنيش و خرجتي ليا عقلي .. راه غير تاقيت فيك الله ا إسراء اما كنت غادي تاكلي سلخة عمركي تنسايها ..

إسراء : ( كتبكي ) س سمحل ليا ..

آدم : عمرني حطيت عليك يدي .. ضربي خايب و متقديش عليه .. سو بليز باش نبقاو مزيانين سمعي لهضرتي و متعاندنيش ..

إسراء : عمرني نعاود .. آدم بغيت نسولك ..

آدم : شنو ؟

إسراء : ( بتردد ) هداك آش طرا ليه ؟

آدم : ( هز حاجب و هبط لاخر ) بقا فيك ؟!

آدم : ( هز حاجب و هبط لاخر ) بقا فيك ؟!

إسراء : لااا ابدا .. خ خفت اتابعك قانونيا ..

آدم : معندكش علاش تخافي .. الى كان شي واحد غادي ادخل لحبس .. هو داك الزا**

إسراء : بالنسبة لبارح ..

آدم : صافي نسايه .. لبارح كانت نقطة كحلا حاولي تنسايه .. محدي عايش مستحيل نخلي شي واحد يقيس شعرة منك ..

إسراء : ( مشات تخشات فيه ) الله اخليك ليا ..

آدم : ( شدها من خصرها و زير ) غادي تولي تسمعي لهضرة ياك ..

إسراء : ااه ..

آدم : هكاك نبغيك .. سيري لبسي باش نديك للدار ..

إسراء : ناريي .. فكرتيني غادي اكونو تخلعو عليا حينت مرجعتش ..

آدم : راه هضرت مع رجاء لبارح اتاصلات بيا و قلت ليها راك معايا و قلت ليها تقولها لدار ..

إسراء : اوكي .. نمشي نلبس ..

خدات إسراء حوايج ديالها الي حاطة فدار عند آدم دخلات للدوش لبسات عليها .. واخا داكشي الي وقع كان صعيب مي حمدات الله انو خرجات خفيفة و مطرا والو .. إسراء عندها شخصية قوية متبعا مقولة الي مقتلاتك كتزيد تقويك .. و هي مغاديش تضعف و دخل فكتئاب و تندب على الي وقع .. بالعكس هي عندها ناس الي فجنبها و كيحموها و على رأسهم راجلها و حبيبها .. لبسات و نشفات شعرها وقفات حدا لمرايا و هي كتقوي راسها و كتحاول تلوح الي وقع لبارح ورا ضهرها .. 

خرجات عند آدم طارت عليه بتعنيقة و باستو فخدو كتعبير على امتنان و شكر .. شبعاتو بوسان عاد خرجو داها لدارهم ودعاتو و دخلات طلعات لبيتها يالاه غادي تحل الباب حتا خرجات رجاء من بيت جهاد و تلاحت عليها عنقاتها ..

رجاء : ( كتقلب فيها ) حبيبتي آش وقع ليك .. تآديتي .. ياكما ضربك ؟؟

إسراء : متخافيش مابيا والو .. انا صحا سلام راه آدم جا فالوقت المناسب ..

رجاء : مكنهضرش على داك الخراي ديال رياض .. كنهضر على آدم .. واش مدار ليك والو ..

إسراء : علاش غيضربني ؟

رجاء : اختي انا شفت آدم واحد آخر لبارح .. خلعني شفتي آش دار لرياض كان غادي اقتلو .. و لكن عبر عليه ..

إسراء : هاد رياض خرج ليا من الجنب .. باغيني نبغيه صحا اخخ ..

رجاء : مريض فكرو .. ( حطات يدها على فمها ) سوري .. ( حطات يدها على كرشها ) خاصني نحضي فمي راه ولدي كيسمع .. المهم على سلامتك احبيبتي .. خرجات مني لبارح ..

إسراء : الله اسلمك .. غادي نمشي نتكا شوية .. ضرني راسي ..

رجاء : سيري ترتاحي .. منين اوجد الغدا نجي نفيقك ..

إسراء : ( شدات فيها ) رجاء بليز هادشي الي وقع مبغيتش والديا و جهاد اعرفو .. غادي اتخلعو على والو ..

رجاء : جهاد خاصو اعرف .. باش حتا هو اتفاهم مع داك رياض .. واخا كيبان ليا محال انوض من ورا القتلة الي عطاه آدم ..

إسراء : رياض منضنش كان باغي اتعدى عليا .. حينت لو كان بغا اديرها كن دارها فاش كنت فاقدة الوعي .. مي وخا هكاك عمرني نسامح ليه ..

رجاء : صافي مغاديش نقولها لجهاد غير تهناي ..

إسراء : شكرا ..

رجاء : شكرا كوليها .. الصواب زعما خخخ ..

دخلات إسراء لبيت لبسات حوايج مريحة و تلاحت ففراشها نعسات .. بعد ساعات طلعات عندها رجاء فيقاتها و هبطو تغداو مجموعين مع فتيحة و يعقوب ..

مرو تلات أيام إسراء رتاحت نفسيتها اكتر و رجعات لتوجاد لعرس و رجاء معاوناها .. جهاد رجع من السفر و بغا ارجع لدارو لكن رجاء حلفات لا مشات حتا ادوز لعرس .. ديما إسراء هي وآدم كيهضرو فالفون و عاود ليها على الي طرا ليه مع ريم و سبب تصرفو بديك الطريقة و باش كان كيحس زياد من جهتها .. إسراء بقا فيها زياد و بقات فيها حتا ريم الي معندها حتا دنب و قررات تعيط على ريم و تهضر معاها ..

دوزات إسراء نمرة ديال ريم و هضرات معها دارو اتلاقاو فشي كافي و اهضرو .. 

ناضت إسراء لبسات عليها سروال اسود توب و فيست فرمادي طويلة بالحزام مع كعب عالي بيج .. قادات شعرها شوية ويفي و دارت مايكاب خفيف هزات صاك بيج .. هبطات لقات ماماها و رجاء فالجردة تسالمات معاهم و خرجات بعدما قالت ليهم عندها شي غرض .. هزات اللوطو ديالها و ديمارات دارت كيت بلوتوذ و دارت اتصال شوية وصلات حدا الكافي .. 

حطات اللوطو و دخلات كتقلب بعنيها حتا بانت ليها ريم جالسة شافتها ريم بدورها و استقبلاتها بابتسامة خافتة .. تسالمو و جلسو جا السيرفور خدا طلبهم و مشا ..

إسراء : عولنا عليك بكري .. قلت غادي تعاونيني فتوجاد و توقفي معيا ..

ريم : سمحي ليا بزاف .. كنت مشغولة مع الخدمة عرفتي يالاه حليت لمكتب و باقا جديدة و شحال من حاجة تابعاني ..

إسراء : هانية احبيبة غير كنضحك معاك .. اوى كاين شي جديد ؟

ريم : والو هاد الساعة غير الخدمة و الدار .. رجعات حياتي مملة ..

إسراء : علاش بالسلامة .. نتي يالاه قلت باسمالله .. باقي غادي تلقاي شريك حياتك الي اكون فجنبك و تشاركي معاه افراحك و احزانك ..

ريم : ( بحزن ) انا مديال حب و علاقات ..

إسراء : مالكي على هاد الهضرة .. فينها ريم الي ديما ضاحكة و ممسوقا لحتا حاجة .. و حتا شي حد ميقدر اوقف فوجها ..

ريم : كاين شخص واحد الي منقدرش نعاند او نواجهو ..

إسراء : كتهدري على آدم ؟!

ريم : ( هزات راسها باه )

إسراء : منين جبدنا الموضوع .. اوى حكي ليا شنو كاين باغا نسمع منك ..

ريم : ( بحال الى كانت محتاجة الي عطيها الضو لخضر خرجات الي فقلبها و عاودات كلشي لاسراء )

إسراء : و دبا شنو المشكيل .. ياك كتبغيو بعضياتكم ..

ريم : ( غرغرو عنيها ) منقدرش نواجه آدم .. الى مموافقش على هاد العلاقة معندي مندير سوى نهيها ..

إسراء : و نتي عارفة السبب علاش رافض ؟

ريم : لا معرفتش .. و داكشي الي محيرني .. فين كيعرف معاذ و علاش مموافقش عليه معندي حتا فكرة ..

جاب السيرفور طلباتهم و انصارف خدات إسراء فنجان قهوة رشفات منو و شافت فريم ..

إسراء : ممم .. هادا الي نتي معاه .. مأكدة كيبغيك و ناوي المعقول ..

ريم : اه متأكدة ..

..... : عليها منخلاني و مكتجاوبيش على اتصالاتي ..

تلفتو بجوج بان ليهم معاذ واقف و داير يديه فجيابو ريم تصدمات و هي كتشوفو قدامها ..

ريم : معاااااذ !

ريم : معاااااذ !

إسراء : اهلا سي معاذ تفضل شرفتينا ..

معاذ قرب تسالم مع إسراء بلابيز و باس ريم من خدها و هي جامدة و باقي اثار الصدمة على وجها ..

إسراء : صدق معاذ الي كتعرفي هو معاذ ديالنا .. علاش مقلتي ليا والو ؟

ريم : ( حدرات راسها ) فلول مكنتش عارفة حتا تلاقينا فالعقد ديالك نتي وآدم .. و من تماك بدينا كنتواعدو و مقلناها لحد ..

إسراء : ( شدات معاذ من ودنيه ) و نتا .. ياك زعما مكتخبي عليا والو ها ..

معاذ : طلقي ابنادم .. راه كنت باغي نعاود ليك مي متاحتش ليا الفرصة .. كلا مرة خارج ليك بلان فشكل .. حياتك كشي فيلم اكشن ..

إسراء : الاكشن هو الي غادي تشوفو من عند آدم ..

معاذ : ( بجدية ) انا مخايفش منو .. غادي نهضر معاه باش اعرف بلي مكنتفلاش ( شاف فريم ) كنبغي ريم و باغي نكمل معاها حياتي ..

إسراء : بغيت نقول ليكم شي هضرة .. داكشي علاش جمعتكم بجوج حينت الموضوع كيخصكم .. ( شافت فريم ) ريم خوك كيبغيك و كيخاف عليك و باغي غير مصلاحتك .. السبب الي خلاه اتصرف هكاك هو ..

عاودات ليهم على زياد و باش كان كيحس اتجاه ريم و اعترافو لآدم و رد فعلو و شجارهم و حتا الحادثة و سفر آدم ..

ريم كتسمع و مقادراش تستوعب داكشي الي كيسمعو ودنيها الدموع كيطيحو شلال من عنيها آخر حاجة كانت متوقعاها هو ان زياد اكون كيبغيها .. و هي الي عند بالها بلي كيحسبها ختو لا اكتر و لا اقل و عمرو بين ليها العكس .. عاودات ليهم اسراء كلشي الي عاود ليها آدم و العذاب الي كان عايشو و لحد الآن مقادرش اتجاوز موت صاحبو .. معاذ حتا هو كان مصدوم شاف ريم زادت فالبكا ناض عندها و تحدر على ركابيه و عنقها تخشات فصدرو كتبكي حتا هدات شوية .. بعد معاذ و رجع لكرسيه و هو كيحك فجبهتو حتا نطقات إسراء ..

إسراء : نتوما ماعليكم والو .. و معندكم حتا دنب فهادشي كتبغيو بعضياتكم حاربو على قبل حبكم و متخليو حتا حاجة تجي فطريقكم .. انا غادي نهضر مع آدم واخا صعيبة عليه و لكن فالاخير غادي اتفهم و مغاديش ابغي لختو تحرم من حب حياتها ..

ريم : بقا فيا آدم بزاف كاع هادشي كان خازنو و هازو فقلبو .. زياد مرتبتو بحال آدم عندي عندو معزة كبيرة فقلبي عمري نساه .. كنتمنا آدم اسامح راسو حينت حتا هو معندو حتا شي دنب فلي جرا داكشي مكتاب ..

معاذ : فاش كنت كنتاصل بيك و كتقطعي عليا .. عرفت بلي شي حاجة تماك .. كنت غادي نحماق عمركي باقي ديري بحال هكا ( شد فيد ريم ) الى كانت واقعة شي حاجة قوليها ليا باش نقدرو نحلوها بجوج .. ماشي تهربي و تخليني كنتخبط فافكاري بوحدي ..

إسراء : انا اكيدة آدم مغاديش ابقا معارض على علاقتكم غير عطيوه وقت ..

معاذ : انشاء الله من بعد ميدوز عرسكم و ترجعو من لهانيمون .. غادي نمشي نطلب يد ريم من عند آدم و نبقا معاه حتا اوافق ..

إسراء : اكون خير ( و قفات ) انا خصني نمشي .. غادي نخليكم باينة عندكم شلا ميتقال .. ( شافت فمعاذ ) نتا رد البنت لدارهم بكري و حاول متحاكش مع آدم ..

معاذ : و نتي لاش نافعة .. تزوجو خلاص و شغليه علينا .. خلينا نترومانساو براحتنا ..

إسراء : اسمعك افرشخك مافيهاش .. حتا تزوج بيها و ترومانسا ديك الساع .. يالاه باي ..

خرجات إسراء هزات اللوطو و رجعات للدار .. اما لكوبل بقاو كيتعاودو موحشين بعضياتهم و من بعد وصل معاذ ريم لدارهم و مشا فحالو ..

يوم قبل الزفاف ←

كانت رجاء ناعسة بين يدين جهاد حلات عنيها و ناضت باستو فمو و مشات للطواليط دوشات و خرجات .. لقات جهاد فاق و كيحك فعنيه مشات لبلاكار خدات ماتلبس جهاد وقف و قرب عندها و تحنا كيبوس فشفايفها بطريقة حنينة .. تجاوبات معاه طاحو ليها لحوايج من بين يديها و دوراتهم على عنقو شوية حسات بردة و هي تدفعو ..

جهاد : مالكي ثاني ؟

رجاء : افف خنقاتني ريحتك ..

جهاد : عاوتاني .. مال مك معايا ..

رجاء : ماشي لخاطري .. ولدك الي دارها ..

جهاد : و دبا شنو المعمول و انا باغي ن***

رجاء : تفو عليك .. مكبوت ..

جهاد : آه مكبوت و ممفاكش الالة ..

رجاء : جيب ديك الريحة الي فلكوافوزة لكبيرة ..

جهاد : ( رجع شعرو اللور ) دبا انا وقتما بغيت نعس معاك خاصني ندوش بهادي ..

رجاء : إلى بغيتي ..

جهاد : هاد الوحم كيتحارب معايا .. العيالات كيتوحمو على رجالهم .. انا فليفلة الي سلط عليا سيدي ربي كتوحم على ريحت راجل ختي ..

رجاء : صافي بلاش مديرها .. بناقص كاع ..

جهاد : ( خدا القرعة و رش عليه ) نديرها وخا تكون تاعت العيالات .. المهم ناخد داكشي الي بغيت ..

توجه عندها و شدها من خصرها و رجع كيبوس فيها و حتا هي ممخلياش من حقها .. قادتهم رجليهم لناموسية و كملو الشغل مطلقها حتا شحفات بالطليب ..

رجاء : ( لاوية عليها ليزار و غادا جيهت الدوش ) افف خاصني ندوش عاوتاني .. الله القيها ليك فرعتيني ..

جهاد : ( ناض زبط و تابعها ) عاودي لمك آش قلتي ..

رجاء : ( مشات كتجري بغات تسد لباب و حبسو برجليه ) حيد من الباب ..

جهاد : غادي نوريك تدعي فيا باش غادي تخرج ليك ..

دفع الباب و دخل شدها و شنق عليها كيبوس فيها هزها دخلها تحت الرشاشة و طلق لما و هو خدام كيبوس و اعبز فيها و هي كتنكر .. بعدما دارو لبتيز دوشو و خرجات رجاء كتجري لتحصل تاني .. حتا كتقول تفكات و ارجع ليها تقول مكيعياش مشات لدريسينغ روم خدات حوايج لخروج و لبسات عليها .. خرجات كتنشف شعرها قدام لمرايا و هو اخرج جهاد من الدوش لاوي الفوطة على نصو كيضحك و راشقة ليه .. شافتو من المرايا و خنزرات فيه غمزها و دخل كيلبس حوايجو ..

قادات رجاء شعرها و دارت شوية ديال المايكاب و هزات صاكها و خرجات من البيت .. وقفات قدام بيت إسراء دقات و دخلات لقاتها واقفة قدام البلاكار حايرة اش غادي تلبس ..

رجاء : صباحو ..

إسراء : ( تلفتات عندها ) صباح النور ..

رجاء : مالك تالفة ؟

إسراء : معرفتش آش غادي نلبس ..

سمعو الدقان فالباب و دخلات سعيدة هازة بوكس فيدها ..

سعيدة : باقي كاع موجدتي .. سربي راسك راه البنات كيتسناو امشيو معاك .. هاكي بعدا لبسي هادي ..

إسراء : ( خداتها ) شنو كاين هنا ( فتحاتها ) جلابة ؟!!

سعيدة : آه جلابة .. من داكشي الي فصلت ليك ..

إسراء : ماما عارفاني مكنرتاحش فلباس التقليدي .. ممولفاهش و كيجيني فشي شكل ..

سعيدة : لبسي و سكتينا .. تبان عليك بعدا راك عروسة ..

إسراء : افف اوكي ..

خرجات سعيدة كتنكر إسراء حيدات بينوار الي كانت لابسة .. بقات بدوبياس فالاسود و هزات الجلابة كتلبس فيها ..

رجاء : شتك تزاديتي المسخوطة ..

إسراء : متقوليهاش .. جاني راسي باقا كيف كنت ..

رجاء : نو نو .. شي بلايص تزادو على قبل ..

إسراء : ناري خاصني نرجع ندير دايت .. و الى مقداتنيش لاغوب قفرتها ..

رجاء : معندك علاش تخافي راه ماشي غلاضيتي و لا خرجات ليك الكرش باش متقدكش لاغوب .. غير صدر و الطرمة زاد فيهم الخير خخ .. البركة فسي آدم ..

إسراء : فاك يو .. هادشي الي مقابلة ..

رجاء : معلوم .. حتا حاجة متفلت ..

إسراء : الله اعفو ..

لبسات إسراء الجلابة الي جاتها فنة كانت فالغوز و لبسات معها سندارة عالية فالبيج و هزات ساك فالبلو ..

خرجات هي و رجاء و تلقاو بجهاد خارج لابس كلاس و ريحة و شعر مرجعو اللور .. سلم على ختو و شد فرجاء من خصرها و هبطو مع الدروج .. بانت ليهم الدنيا عامرة و شي غادي شي جاي كاع العائلة تكبات القريب و البعيد .. 

دخلو بتلاتة للصالة لكبيرة مشات إسراء تسالمات مع خلاتها و عماتها الي مكتشوفهم غير فالمناسبات .. و دازت تسالمات مع بنات العائلة و هما غير كيضورو فعنيهم و احنزو فجهاد و اخنزرو فرجاء الي واقفة حداه .. جهاد سلم على العيالات و رما السلام كن بعيد على بنات عائلتو و هما بغاو اطرطقو مرضاوش .. رجاء تسالمات مع الكل و عاجبها الحال حينت محشهاش للبنات ..

إسراء : ماما هاحنا مشينا ..

سعيدة : نوضو البنات سيرو مع إسراء و رجاء للسبا ..

ناضو ربعة البنات الي باقين عزبات فاطمة الزهراء ، سارة ، مريم و ابتسام اما لاخرين الي مزوجين ممشاوش معاهم ..

خرجو تابعين إسراء و كيبجكو فيها إسراء مابينها و بينهم غير الخير و الإحسان عكسهم الي كيحسدوها على نجاحها و داكشي الي وصلات ليه .. و كملات دبا زائد نجاحها المهني لقات زوج لباس عليه كيف سمعو عليه متكرهين من الزهر الي عندها و واحلة ليهم .. حتا من خوها الي كانو كيضربو عليه و كلا وحدة طامعة فيه لراسها مشا تزوج بصاحبتها ..

وصلات إسراء حدا اللوطو ديالها و بان ليها جهاد جاي باللوطو ديالو و رجاء راكبة حداه ..

إسراء : جهاد غادي معنا ؟ 

جهاد : لا غير خرت اللوطو لرجاء من الباركينغ ..

نزل و نزلات حتا رجاء ..

جهاد : يالاه سيرو و صوكو بشوية ( شاف فرجاء ) فليفلة لتبقايش ترطاي ها ودني منك ..

غوبشات فيه رجاء خاصة فاش شافت دوك خياتي كيضحكو عليها .. عاق بها جهاد و جرها عنقها بيدو من خصرها ..

جهاد : ( باسها فخدها ) غير كنضحك معاك .. حبيبتي و مامات و لدي متبتة ..

رجاء : ( فرحات ) طلق مني خليني نمشي ..

إسراء : و طلقونا خلاص ..

يالاه بغات طلع إسراء و هي تشوف اللوطو مرسيديس داخلة عرفاتها سلوى .. هبط الشيفور حل لسلوى لباب و مشات عندهم ..

سلوى : افف لحقتكم بعدا ..

إسراء : ديك ساع سيري ديريكت .. و نتلقاو تم ..

سلوى : نو .. باغا نمشي معاك و نعيش لاجواء اصاحبتي .. ( شافت فالشيفور ) غير سير ..

إسراء : زيدي ركبي معيا .. 

طلعات إسراء و حداها سلوى و ركبو معاهم سارة و فاتي اللور ..

إسراء : ( هبطات الزاجة ) رجاااء و طلقينا خلاص ..

رجاء كانت عايشة الرومانس مع جهاد الي ممسوقش لشي حد و لبنات كيخنزو فيها بغاو اطيروها .. سمعات إسراء كتعيط و هي تبعد من بين يدين جهاد ..

رجاء : هاني مشيت ..

جهاد : ( شاف فمريم و ابتسام الي واقفين عليهم كي ملاك الموت ) سيرو سبقو هاهي جاية ..

مشاو كينفخو طلعات ابتسام لقدام و مريم اللور كيتسناو فرجاء تجي و حاضينهم اش كيديرو ..

رجاء : و طلقني نمشي .. شنو بغيتي ؟

جهاد : عنداك تصبغي شعرك راك حاملة .. و تهلاي ليا فالمسائل ( غمزة )

رجاء : حاضر ..

جهاد : نموت فيك فاش كتسمعي لهضرة .. اري بوسة ..

رجاء تعلات و باستو فمو و بعدات توجهات للوطو و ركبات و دوك الجوج بقا ليهم شوي اتفركعو .. خاصة ملي حيدات شعرها على عنقها رداتو اللور و بان عنقها مطبع .. ديمارات إسراء و تبعاتها رجاء خارجين من الفيلا شدو الطريق لبيوتي سانتر ..

آدم فاق كي عادتو بكري نزل لاصال ترينا ساعتين و طلع خدا دوش لبس عليه سروال كحل و كابيتشو و جاكيط فلكحل و سبادري كري .. خدا اللوطو و اتاجه لدارهم مسافة الطريق و كان تم نزل و دخل لقا والديه و مجد و ريم مجموعين على طبلة الفطور .. تسالم معاهم و جلس كيفطر شوية ناضت ريم طلعات لفوق و تبعها آدم دق فبيتها حتا قالت دخل ..

آدم : بغيت نهضر معاك ..

ريم : وي خويا ؟

آدم : باقا مقلقة مني ..

ريم : لا ..

آدم : متأكدة ..

ريم : اه و الله ما مقلقة منك ..

آدم : ( عنقها ) سمحي ليا .. عمرني نحط عليك يدي .. معرفتش كيف طرا ليا ..

ريم : معندكش علاش تعتادر اخويا .. انا عارفة باغي مصلاحتي ..

آدم : ( باسها فجبهتها ) لكتكوتة ديالي قلبها بيض ..

ريم : ههه شحال هادي معيطي ليا هكا .. خاصني نمشي دايرة مع إسراء نتلقاو فبيوتي سنتير ..

آدم : اممم .. نوصلك ؟

ريم : هههه .. اش هاد المحبة و الاهتمام .. داير بيا السبة باش تشوفها ..

آدم : ( جبد ليها نيفها بصباعو ) دكية مع راسك .. معندي منسالك ..

ريم : راك كتهضر مع المحامية ريم الإدريسي ..

آدم : ههه .. ياله زيدي قدامي الالة المحامية .. خلينا نشوفو حبيبة القلب ..

ريما : ناس ولاو رومانسيين .. الي شافك شحال هدا ميتيقش نتا الي كتقول هاد الهضرة ..

آدم : شنيولة تحركي باركة من تفلسيف ..

ريم هزات صاكها و هبطات هي و آدم هز اللوطو و شدو الطريق ..

وصلات إسراء حدا السونتر و هي تبان ليها اللوطو ديال آدم قدامهم .. بان ليها هبط هو و ريم و حتا هي هبطات هي و سلوى و البنات مشات اتاجهات ناحيتهم .. جات عندها ريم عنقاتها و تسالمات مع لاخرين آدم قرب و قال السلام و تحدر باسها فخدها ..

إسراء : علاش جيتي ؟

إسراء : علاش جيتي ؟

ريم : قالك الالة نوصلك .. دزنا فوجهك ..

آدم : جيت نشوف مرتي ..

إسراء : ههه ..

وصلات رجاء و معاها لعقروشات لاخرين لمحوهم واقفين و معاهم آدم ..

سارة : ختي رجاء شكون داك البكوص الي واقف مع البنات ؟

رجاء : هداك البوكوص هو راجل إسراء ..

سارة : ( بصدمة ) هااا .. هداك هو الي غادي اتزوج باسراء !!

رجاء : ااه ..

هبطات و تبعوعا حتا سارة و فاتي كيتناغزو و اتفقصو و اويلو على الزهر المكوز الي عندهم ..

رجاء : سلام .. خويا آدم صافا ؟

آدم : بخيير .. و نتي لاباس ؟

رجاء : الحمدلله .. ( جرات سلوى ) يالاه البنات نسبقو حتا تخلط علينا إسراء ..

دخلات رجاء و سلوى و مشات حتا ريم و تابعينهم لاخرين بشوية و كل ساعة اتلفتو اشوفو فاسراء و آدم ..

ابتسام : شفتي ياختي الراجل كيف داير شهوة منو ..

مريم : ويييه الحروشية و القلدة كيف دايرة .. بغيت غير نعرف كيف كيديرو اضبرو على بحال هادو ..

فاتي : باينة القضية فيها تبخيرة .. او كاع هدا زهر ..

سارة : و مسلمش علينا و حتا العين مهزها فينا .. كيشوف غير فيها تقول كاينة غير هي ..

فاتي : اوى شفتي اش قلت ليك .. السيد دارت بيه و علم الله اش دايرة ليه ..

رجاء : و تحركو و نتوما سكنتو حدا الباب ..

خنزرو فيها و دخلو مغددين و كيألفو و البقو باش ابردو على راسهم شوية ..

إسراء : خاصني نمشي راه شادين موعد ..

آدم : دغيا سخيتي .. ( طلعها و هبطها ) جات معاك الجلابة ..

إسراء : هه ميغسي .. لا مسخيتش .. غير تابعاني شحال من حاجة .. و راه غادي نشوفك غدا ..

آدم : ( جرها عندو حتا تصاطحات مع صدرو ) امتى اجي غدا .. باش مباقيش تبعدي على عنيا .. و نشبع منك ..

إسراء : دبا نطلع ليك فراسك ..

آدم : اممم .. ديك الساع نزيد التانية .. اش بان ليك ..

إسراء : ( خبطاتو على صدرو ) يااك .. اوى سير زيدها نيت دابا و فوتني عليك .. طلقني و سير خودلك حنا ربعة دقة وحدة ..

آدم : ههه .. زعما كضني نديرها ..

إسراء : و مانعرف .. نتوما الرجال مافيكم ثيقة ..

آدم : ( خنزر ) يااك .. زعما بغينا نضحكو معاك .. قلبتيها علينا .. الالة معندي مندير بتانية و لا تالتة و لا رابعة .. نتي الي كاينة عمرك تفكي مني ..

إسراء : ( ابتاسمات ) و هكاااك ..

آدم : ( قرصها فخدها ) دبا عجبك الحال ..

إسراء : امم .. يالاه سير خليني نمشي نقضي شغلي .. العشية كاينة الحنة و الدنيا عامرة عندنا ..

آدم : متكتريش الحنة معنديش معاها ..

إسراء : غادي ندير غير صبيعات و صافي .. اش غادي دير هاد العشية ؟

آدم : ( بضحكة جانبية ) الدراري دايرين ليا Batchelor party ( حفلة توديع العزوبية )

إسراء : ( خرجات عنيها ) شنووووو ..

إسراء : ( خرجات عنيها ) شنووووو ..

آدم : ههه .. مالك .. راه ماشي داكشي الي فبالك .. غادي نكونو غير الدراري بيناتنا و غادين لفيرما تما نلعبو ماتش ديال الكورة و نقصرو .. راه مكاين لا بنات لا ستريبيرز غير تهناي ..

إسراء : اممم .. و دير هاه و لا هاه نتفاهم معاك .. غادي نعيط لجهاد و نشوفو ..

آدم : دبا متيقتنيش .. 

بعد عليها و مشا اتجاه طونوبيلتو و هي تبعو إسراء شدات ليه فيدو ..

إسراء : واش تقلقتي ..

آدم : الصمت 

إسراء : راه متيقاك و الله .. و صافي قول شي حاجة ..

آدم : الصمت ..

إسراء : مبغتيش واخة على خاطرك ..

طلقات منو و دارت بغات تمشي .. حتا حسات براسها تجرات و طاح على فمها كيبوس .. عصرها و مصمصها مزيان عاد طلق منها ..

إسراء : ( شادة فشفايفها ) ااي .. مالك جاهل ..

آدم : دابا حنا متعادلين .. و الجهل هو الي غادي تشوفي غدا .. يالاه سيري ..

طلق منها و مشات كتكمد فمها و دوز عليه بيديها بقا آدم واقف كيشوف فيها حتا دخلات عاد طلع للوطو و تحرك ..

خلطات إسراء على لبنات و مشاو حيدو حوايجهم و دازو للصاونا و من بعدها المساج و لي سوان ودارو بالحالة خرجو كيشعلو .. كملو و رجو كاملين للدار جاو مع وقت لغدا تغداو مجموعين مع العائلة .. الرجال مكاينينش غير لعيالات ناضو الي عندها شي قفطان لبساتو و شي كيقاد لشي .. كيوجودو للحنة إسراء طلعات لبيتها معها البنات جات الكوافروة هي و المساعدات ديالها قادات ليها شعرها دارت ليها وايفي .. و جمعاتو ليها من الجناب و شداتو بحلي مشبك و دارت ليها لوجها مايكاب ترابي جاها فن .. عاد دازو قادو لرجاء و سلوى و ريم .. 

اما لاخرين مشاو للصالونات فين اقادو كلا وحدة بغا تعصر على لاخرة ..

لبسات إسراء قفطان أخضر جاها زوين على فصالتها و البنات حتا هما لبسو قفاطن جاو كيف الأميرات .. نزلوها و داوها للجليسة الي دايرين فالجردة تاعت الفيلا فين غادي تنقش .. 

دخلات بالزغاريت و الصلى و السلام و الديدجي طالق الشعبي .. و العائلة دايرين بالطبالي كيصفقو و شي ناض كيشطح كلشي متبع ليها العين جات زوينة بزاف و وتاها التقليدي و خا قليل فاش كتلبسو .. جلسوها و جات النقاشة كتنقش ليها و البنات حداها كيضحكو و ناشطين .. 

سعيدة غادا و جايا فرحانة بنتها و كترحب بعائلتها و تعاود .. الناس مقصرين شي فرحان من قلبو شي كينافق و الحسد و الغيرة دارت فيهم مابغات ..

كملات النقاشة لاسراء دارت ليها داكشي خفيف صبيعات فاليدين و الرجلين و دازت لبنات حتا هما نقشو صبيعات ..

نشفات ليهم الحناء و قشروها لاسراء حسب التقاليد و ناضو البنات كيشطحو و ناشطين .. دازت الامسية غير النشاط و الركيز بردو على هوايشهم خاصة مكاينينش الرجال خداو راحتهم .. رجاء كتشطح بجهالة حتا كيبداو اغوطو عليها إسراء و سعيدة تشطح بالقياس .. تعشاو الناس و كلا مشا فحالو باش ارتاحو و اكونو موكدين العرس الي غادي اكون فقاعة من أحسن القاعات فالمغرب .. الي حجزها آدم من عند صاحبو مالك الاوطيل و تم تزينها على دوق إسراء ..

طلعات إسراء لبيتها ترتاح و معها ريم و سلوى و رجاء .. هجمو عليها بغاو اباتو معها فاخر ليلة ليها فدارهم و حتا هي ما منعاتش .. دخلو لبيت بدلو حوايجهم كل و حدة لبسات بيجامتها كانو بربعة لابسينهم كيوت فيهم نونوسات ..

رجاء : ( مشبحة فوق الناموسية بوحدها ) الله على راحة .. عيت و رجليا قتلوني .. ( شافت فاسراء خارجة من الطواليت ) حتا نتي لابسة ميمي ( شافت فسلوى متكيا فالفوطوي ) و لاخرة هيلو كيتي ( و دارت شافت ريم جالسة فوق الزربية كتصبغ دفار رجليها ) و حتا نتي خخ ..

إسراء : و راه حتا نتي معنا ..

رجاء : انا بيجامتي مافيهاش مخيات .. غير برينت ديال النمر ..

إسراء : آش باغا تقولي ..

رجاء : اوى لهضرة ليك نتي الي عرسك غدا .. راه منين تمشي عند الراجل راه مكاين غير العرا ثم العرا ..

إسراء : ماشي ديما اصاحبتي ( تكات حداها ) راه مرة ابغي اشوفك سيكسي مرة كيوت .. ماشي تبقاي على حاجة وحدة راه غادي امل ..

رجاء : اوى على حسب تجربتي المتواضعة .. واحد خوك ميكرهش نضور حداه النهار و مطال صولو ..

إسراء : الله امسخك ..

ريم : هههه .. مسخوط هاد جهاد ..

رجاء : انا غير قلت ليك ..

إسراء : كل واحد واش كيعجبو و اذواق الرجال مختالفة .. غير الروتين راه ممل ..

ريم : اممم .. خويا دا و عرف اش دا .. الناس قاريين و حافضين ..

إسراء : هه ضروري ..

رجاء : سلوى شفتك غير ساكتة .. اوى عطينا رأيك ..

سلوى : ( بخجل ) معرفتش ههه ..

رجاء : مفهمتش .. كفاش نتي حشومية و طحتي فواحد مقزدر معنو لوجه علاش احشم .. نتي و هشام الشرق مع الغرب ..

ريم : حتا انا و معاذ مختالفين فبزاف ديال الحوايج ..

إسراء : هي من واحد الناحية زوين الاختلاف حينت كل واحد كيكمل لاخر ..

ريم : الدراري بايتين فالفيرمة .. معاذ و آدم كاينين فنفس البلاصة .. خايفة توقع شي حاجة ..

إسراء : معندك علاش تخافي .. آدم بدا كيتقبل الفكرة .. و مبقاش معارض على علاقتكم .. غير فالأول متقبلهاش حينت مكانش متوقعها ..

ريم : بالصح .. فرحتيني ..

رجاء : براكة من بلا بلا خلينا نعسو .. تصبحو على خير ..

الكل : تصبحي على خير ..

نعسات إسراء و رجاء فناموسية و ريم و سلوى فرشو حداهم و نعسو مبغاوش امشيو لبيت لاخر ..

عند الشباب الي دوزو العشية بماتش الكورة و الآباء و الاعمام و الخوال اكتفو اتفرجو فيهم .. من بعد دارو جلسة فالحديقة و دارو Barbecue ها الكفتة مشوية و الكوتليت و الشلايض و المشروبات .. طلعو الرجال الكبار انعسو و بقاو الشباب جالسين فالفوطويات و كلا شاد طبسيلو و كاس .. مقشبين بيناتهم و شادين الستون فالعريس ..

هشام : فنضركم شنو كيديرو البنات دبا ..

جهاد : عاطينها للشطيح .. باينة فليفلة محال شدات لرض ..

هشام : انا رزقني الله بملاك كيف الامانة فينما حطيتيها تبقا ..

معاذ : غير نتا الي عندك ملاك .. تنا حبيبتي.. 

شاف فيه آدم و جمعها نسا راه خوها جالس معاهم ..

هشام : مالك سكتي اا ..

هشام : مالك سكتي اا ..

معاذ : احم .. لمهم ماشي غير نتا الي عندك ملاك ..

جهاد : انا بعدا ديك الي عندي مرة ملاك مرة شيطان ..

هشام : هادي عارفينها .. اوى واحد سي آدم آش عندك نتا ؟

آدم : Mermaid ( حورية البحر ) خليت ليكم الملائكة ..

الدراري : ههههه ..

جهاد : باقي ماشفتي واحد الجانب عند إسراء .. ههه لهلا اعطيك ..

آدم : باغيها بكلشي فيها ..

هشام : عصرتي علينا فهادي .. اصلا إسراء مكاينش بحالها .. كنعقل فاش كنت طايح فيها ههه ..

آدم : ( بتخنزيرة ) شناهوااا ..

هشام : ( جمع الضحكة ) خويا آدم هادشي كان زمان .. يامات المراهقة ..

جهاد : علاه مكانش فخبارك إسراء الحب الأول ديال هشام .. اعتارف ليها و قمعاتو هههه ..

معاذ : لاواه ههههه .. معندي منسالها ..

كلشي كيضحك الا آدم مخنزر و كيشوف فهشام شي شوفات ..

هشام : مال هاد الفم عندي مكايسكت .. راه و الله اخويا آدم الى كنبغي سلوى .. إسراء صديقتي فقط ..

جهاد : حتا معاذ فاش اول مرة شاف إسراء فلندن عجباتو و جا بغا اخطبها من عندي ..

معاذ : انعل طواسل مك .. واش سكرتي نوض تنعس ازمر ..

آدم : اممم ..

معاذ : راه غير كيخربق و معارفش آش كيقول .. إسراء راه ختي .. بنت وحدة الي كنبغي و راك عارف شكون هيا ..

آدم : ( ناض ) و هكاك ..

مشا آدم مخنزر حتا فاتهم و هو اضحك بينو و بين راسو .. و لاخرين غير شافوه دخل و هما انوضو هشام و معاذ كيخبطو فجهاد بالمخاد .. من بعد كلا طلع انعس فبيت ..

أصبحنا و أصبح الملك لله

فاقت إسراء مفزوعة من بعد ما طاحو عليها لبنات فوق الناموسية دارو ليها عرام الدشيش .. فاقت مضهشرة و كتعاير من بعد المدابزة و الشتيف ناضو دخلو ادوشو كلا وحدة مشات لدوش .. 

لبسو عليهم و هبطو لقاو العائلة و الناس الي باتو بحكم بعاد كلشي مجموع على الفطور .. انضمو ليهم و فطرو مجموعين عاد ناضو كلشي كيجمع حوايجو باش اتوجهو للاوطيل .. كانت سعيدة واقفة على كلشي و كتعطي لأوامر دير هادي هز هادي ..

سبقو البنات بربعة مشاو للاوطيل ابداو فالتجهيزات و صلو و دخلو تفقدو القاعة الي كانت اكثر من رائعة .. مجهزا بكل تفاصيلها كانت قاعة و لا فالاحلام الي كتمناها اي فتاة يوم زفافها .. تبهرو البنات بالديكور و الديزاين الخلاب من بعد طلعو الفوق فين كاينة غرفة خاصة بالعروس و مقابلة معها غرفة تبديل الملابس ديال العريس ..

دخلات إسراء لقات الفستان الأبيض الي ختارت معلق و حداه تلاتة التكاشط مصممين ليها شخصيا .. و الاحدية الخاصة بكل تبديلة و البنات حتا هما جابو معاهم جوج تبديلات تكشيطة و غوب ..