آلاء و المنحوس الجزء العاشر

نفات الاء دغيا كلامها و قالت :"" زيااااد ؟!! *علاات صوتها و كاتعبر بيديها و تسبل بعينيها * زياااد رااه الظراافاات القلب الكبيير و الحنيييين .. الحداكة و الرجووولة ..سعداااات لي غاتزوج بيييه راااجل ديااال الزمااان ... "" 

ضحك زياد كايلعب برجليه و قال :"" ااااح على برهوشتييي ...يتوووب علييك الخواادرية .. ""

دارت شيماء يد على يد و قالت :"" و شكوون؟ .. الاستااد ؟!.. كايبان بعقلو ماشي ديال يضربك على كسكسو "" 

جاوبتها الاء بهمس و قالت :"" هاذاك راه بساايكو اختي كايتسيف كيف الجن منين كايتعلق الامر بكسكسو .. العااار عتقيني و وريني كيفاش نطيبو قبل ماتوصل ال12 "" 

شافت فيها شيماء شوية و قالت :"" دخلي نكتب ليك الطريقة و نفهمك "" 

جاوبتها و قالت :"" ماكاينش الوقت .. ياك خالتي عائشة كاينة .. قوليها ليها و احي انت معايا عاافااك "" 

تنهدات شيماء و قالت :"" صافي واخا .. سيري سبقيني .. انا نلحق عليك "" 

تبسمات الاء و قالت :"" شكرا بزااااف "" 

مشات رجعات و دخلات شيماء تعلم خالتها .. 

دخلات الاء و شقمها و قال :"" كنتي غاتخرجي عليا حظي فمك اش كايخرج .. "" 

عوجات فمها و قالت :"" شوف ااه بلا ماتبقا تأمر عليا انا راه ناعسة غير ساعة و نايضة نكسكس باش نتصاحب مع الكراش ديالك .. ورخف عليا الله يرحم باك "" 

ربت على كتافها ب2 و قاد شعرها و قال :"" عاارف اختي غاتقضي ليا الغرض... نعول علييك "" 

جاوباتو و هي كاتفوه و قالت :"" واخا ... وا سير غبر كاتبقاش دور حدانا باش البنت تاخد راحتها "" 

جاوبها و قال :"" ماتخافيش ماغانبانش .. *قرص حنكها و خرج كايقول * وا عندااك .. 

جرات قنت شفاهها كاتعوج و قالت :"" سير ..سييير غباارة تغبرك .. اخر يامي وليت دايرة عقلي فعنااب لاعب ليا دور روميو هنايا .. *سمعات السرسار * هااه ها جولييت كاتدق .. *تمات غادية تحل * الله يحرقكم ب2 ""

حلات الباب و تبسمات فوجهها و قالت شيماء:"" اوى ها انا جيت .. كاينة عير بوحدك ؟"" 

جاوبتها الاء و قالت :"" اه اه ... خويا يمكن خرج و لاخر فالليسي .. يعني ماغايبرزطنا حد ""

تبسمات ليها شيماء و قالت :"" واخا .. "" و دخلو ..

دخلو للكوزينة .. و شافت شيماء فالاء و قالت :"" ياله جبدي الخضرة نقيوها هي الاولى .. و من بعد نصبوها .. 

قالت الاء :"" واخا "" 

جرات القفة و بدات تجبد و تعطيها .. غسلوهم و الاء كاتشوف .. 

حتى قالت الاء:"" اويلي كانشريو القرعة هكا مترعة ""

ضحكات شيماء و قالت :"" اش كايسحاب ليك كايشريو قرعة كاملة يجيبوها للظار .. كلها كايشري قياسو و زايدون راك كاتغسليها و كاتضربي الجناب تحيديهم .. اكيد ماغاتحطيهاش بلا غسيل .. *شافت فيها بالحنب ضاحكة و قالت * ماكاتعرفي ميين تجي لاكوزينة يااك ؟!" 

شافت فيها الاء و قالت :"" كايعجبني نطيب و لكن بخاطري .. بلي مشهياه ماشي بزز مني .. و انا هادشي ديال الكسكسو و الرفيسة و الويل كايعصبني حيت كتير و ماكانعرغش ليه .."" 

ضحكات شيماء و قالت :" غير كايبان ليك .. ساهل هادشي .. مرة و 2 و من بعد تولي تعرفي .. "" 

جاوبتها الاء و قالت :"" اش غانعرف .. لي بغا شي حاجة ينووض ليها راسو .. خدامتهم انا "" 

انتابهت لطريقة كلامها و شافت فشيناء لقاتها حتى هي كاتشوف فيها باستغراب .. ضحكات الاء بهرج و قالت :" ها ها ها .. غير كانضحك .. خوتي مساكن ضروري نتعلم لشهيوات باش نبرعهم .. اكييد .. هما خووتي لي ماعندي غيرهم و ماعندهم غيري "" 

ضحكات شيماء و قالت :"" الله يخليكم لبعضكم .. و انا نبقا نعلم اختي .. ماعنديش مشكل "" 

تبسمات الاء و قالت :"" واش بالصح .. هي نعول عليك "" 

جاوبتها و قالت :"" بطبيعة الحال .. الله اودي انت بحال اختي الصغيرة "" 

شكراتها الاء و قالت :"" شكرا بزااف اختي .. بارك الله و فيك ..*تنهدت و هي ماتمسكن و تبوحط و قالت * ماكرهتش كون كانت عندي ماما و لا اختي تونسني .. نشكي عليها و نخرج معاها ... خسااارة "" و

جاوبتها شيماء باسف و قالت :"" ياك عندك صاحبتك .. البنت لي كاتسكن فالدرب الوراني .. مالها ظريفة و ديما كانشوفك معاها "" 

هزات عينيها فيها و قالت :" ا .. ااه .. هدى صاحبتي و لكن بعلوكة بحالي .. انا بغيت اخت اكبر مني .. لي تنبهني و تعلمني و تنصحني راك عاارفة "" 

تبسمات شيماء بشفقة و قلت :"" اوى صافي من اليوم فصاعدا اعتابريني اختك الكبيرة و باب دارنا مفتووح ليك .. غانعطيك نمرتي و نبرقاو نخرجو و ندوزو وقيت مع بعضياتنا "" 

خرجو عينين الاء و نقزت بالفرحة .. عنقاتها ضاحكة هي و ياها و قالت :"" شكرا بزاااف لهلا يخطيييك "" 

ضحكات شيماء و قالت :"" اوى شكرا ماكايناش بين الخواتات .. ياله خففي بديك باش ندركو الوقت "" 

و رجعت لخدمتها بوجه بشوش .. و دارت الاء لي قالت ليها و هي كاتشوف فيها بكرف عينها و كاتبسم .. ماكانتش كاتمتل منين هضرات على احتياجعا للام و الاخت فحياتها .. فهاذا نقص كاتكبتو فداخلها و كاتحاول تتجاهلو او على الاقل تتعايش معاه .. و لكن داك الجانب اللطيف من شيماء لي التامساتو عجبها .. و الف لييه قلبها ...

وقفات شيماء قدام الاء و قالت :"" اوى هحنا سالينا .. فاش يفور من هنا لشوية طفي عليه ..حتى يوصلو خوتك من الجامع و سغي ليهم كيف وريتك .. عنداك تنساي تطفي .. "" 

عنقاتها الاء ضاحكة و قالت :"" سيري لهلا يحرق فيك شي عظم .. دابا ماكاينش لي يفكك مني "" 

ضحكات شيماء مربتة عليها و قالت :"" هانية خوودي رااحتك ... ياله انا مشيت "" 

خرجات معاها الاء و هي مزال كاتشكرها .. 

بعدما مشات ..رجعات الاء دخلات للداار كاتفوه .. مشات لبيتها جلسات فسريرها كاتمسد عنقها .. 

الاء:"" عييت بغييت غير ننعس اعباد الله .. "" 

رجعات براسها لور كاتشوف فالسقف .. حتى غمضو عينيها و مشات .. 

دخل زين العابدين للدار مخنزر و طالعة ليه القردة .. جلس فالصالة و رحع راسو لور مغمض عينيه .. شافت شيماء فخالتها .. و رجعو شافو فيه و قالت عائشة :"" رجعتي من الجامع و لا من الخدمة ؟ " 

حل عينيه و بقا كايشوف قدامو و قال :"" الخدمة باااح "" 

ندبو ب2 و قالو فمرة وحدة :"" اويلي .. "" 

ضحك ضحكة ساخرة و دغية جمعها .. 

سولاتو شيماء و قالت :"" كيفاش .. 3 الخدمات كلهم طارو مايمكنش او "" 

شاف فيها و قال :"" وحدة فيهم رفضتها حيت اختاريت احسن 2 .. مشيت للاولى .. دخلت كانخدم مابيا ماعليا حتى نزل عليا بااطل .. خسرات ماكينة سباها فيا واحد الشارف فمو فيه غير سنة كيف ساروت الحبس .. نضت نظافع على راسي جاو منو .. قلت ماكالعاش ماطالعاش خلطت بنادن و خليتها ليهم ... مشيت للاخرى لقيت العافية شاعلة ليهم فالبوونج .. رجعت فحالي للجامع بردت فقصتي ... 3 الخداامي اعبااد الله جاو فخطرة و طارو ب3 فدقة هذا راه مااشي غير نحس .. انا راااه عييت من هاادشي "" 

و ناض طلع كاينفخ .. 

شافت شيماء فعائشة باسى و لقات عائشة كاتحسر و دايرة راسها على يدها كاتتحسر عليه حتى هي .. 

دخل زيد و زياد من الجاااموعة .. 

اول حاجة دور زياد عينيه فالظار الصقيييل .. و ريحة .. ربحة الشياااط .. لقا خوه سبقو للكوزينة .. طفا على البرمة لي وكحات و خضرتها و لحمها لصقو .. و الكسكسو شم ريحة الحرااق ... شاف زيد فزياد و قال :"" دابا شناااهوا جايين معولين على كسكسو غانصدقو مغديين بالبيض بماطيييشة .. "" 

جاوبو زياد و قال :" ماعرفت فين دييك الحمااارة لي مخلية هاادشي شااعل .. آاااالاااااااء"" 

خرج من الكووزينة لغرفتها .. حل الباب لي كان غير مردود و لقاها كاتشخر فاردة يديها و كاتعوم وسط ريوغها .. دخل و عطاها للجبهة .. حلات عينيها حمرين مبوقين ماعارفاش اش واقع .. كاتشوف غير فمو كايتحرك بلا صوت ... استرجعات وعيها شوية بشوية و كان وقفها جارها وراه .. غير شافت البرمة كحلة و خرجو عينيها .. و دارت يدها على فمها .. 

دار عندها زيد لاح عليها سربيتة و عيبها بسخرية و قال :"" اشنو تصدمتي ؟!! شفتي البرمة كيف كحلة كي سعدك ؟!!"" 

قربات ليها كاطل و كتدوز يظها على خدها و قالت :"" اويلي كيفاش حتى وكحات و البرمة كانت عاامرة "" 

جاوبها زيد و قال :"" كون كنتي كاتديها فقرايتك كون عرغتي بلي الماء كايتبخر مع ارتفاع الحراارة .. "" 

شافت فيه و تفرغعات كاتغوت و قالت :"" تا كييفاش المووضوع لي هضرنا فبه تلقى شي دخاشش تخشي فيهم القرايا... و مالك كاتغوت .. الكسكسو درتو غير فضلا و ماشي امرا ..درتو غير ضحك على قبل هااد "" 

سد ليها فمها زياد و شاف فخوه كايضحك بتوتر .. جرها معاه و باقي كايضحك و قال :" ماعليش .. البرهووشة غاتبقا تحل في فمها .. اللهم نجرها .. انا غانمشي نجيب شي بانينيات "" 

جر معاه الاء خرجها ساد فمها و هي كاتعربط عليه .. ياله غايخاصم عليها و هما يسمعو الدقاان .. 

تقدم زياد للباب .. حلو و وقفات وراه الاء .. لقاو شيماء واقفة و هازة فيديها طويسة .. شافت فزياد لي تبششات ملامحو فورا .. و نقلات نظرها لالاء متجاهلة ليه و قالت مبتسمة :"" هذا سمن حر ديال خالتي .. سيفطاتو ليك ..عالله تكوني باقي ماسغيتي .. الكسكسو بلا سمن كايجي ناقص .. "" 

تبدلو ملامحها منين شمات الريحة لي كاتخنق و قالت :"" هااد الرييحة عندكم ؟!!" 

جاوبت الاء و هي كاتغبن و قالت :"" غفيت من هنا .. و خوراتني البرمة من هنا .. ممكن نرحل عنكم اختي .. حيت من هنا للعشية غانبقا نسمع غير مختلف الدروس على السهير و الاهمال و القرايا و قلة الحداغة .. و حتى على الشارجور لي كاننساه لاصق .. احمبااك تبناوني "" 

ضربها زياد على قلقولتها و خنزرات فيه كاتحكها .. قالت شيماء :"" و فين كان عقلك شحال و انا نوصيك ماتغفليش و غير شوية و طفي .. اصلا الوقت كولو و عينيك مشقلبين ماشابعااش نعااس .. راه نيت هاظشي علااش مامزيانش السهيير "" 

هزات الاء راسها لسماء و طاحو كتافها و قالت :"" لا ياربي عافاك ماشي حتى شيماء "" 

ضحكات شيماء و قالت :"" صافي ناعليش هادشي مايوقع .. اجيو احنا اليوم عارضينكم تتغداو معانا "" 

جالسين كلهم مجموعين على الطبلة فصالون دار زين العابدين .. 

زيد و زياد .. الاء و زين العابدين ... عائشة و شيماء كانو فالكوزينة كايوجدو الغذاء باش يتحط .. 

نطق زيد و قال :" غير سمحو لينا اخويا .. را"" 

ماكملش كلامو منين قاطعو زين العابدين و قال :"" اش كاتقول بالعكس مرحبا بيكم حنا غراب؟ الله يهدييك .. "" 

قال زياد :"" عولنا على هاد الحادكة زعما .. "" 

شاف فيها فجنبو حالا فمها و ناعسة على كتفو .. كايمشي راسها و ترجعو تاني .. 

مد زيد يدو و عطاها بقرفادة حتى رجع راسها للقدام و حلات عينيها و هزات راسها .. شافت فزين العابدين و كان على وجهو شبه ابتسامة .. ماشي لطيفة و ماشي ودودة .. ابتسامة تشفي و شماتة .. كايغيظها .. لوح راسو يمين و شمال .. غاظها و استفزها .. حتى ترعدات اعلى شفاتها العليا .. لمحها .. و هز حاجب مستغرب كايشوف فعينيها .. مالقات مادير .. حشمها بداك الحاجب المرفووع .. و غلبها .. و حدرات عينيها .. وتبسم و عجبو كيفاش هزمها بغرور رجولي .. 

حطات شيماء الكصعة .. و حطات عائشة اللبن و الديسير و جلسو كايرحبو بيهم ... 

بداو يتغداو و الدراري كايهضرو بدون توقف ..و الاء كاتغدا و ماشغلها غير اللقطة لي غادي تخرج نيشان لغرفتها و غاتنعس .. 

رحبات عائشة بالاء و الدراري .. و قالت لآلاء "" ماوقع بااس ابنتي .. مرة اخرى تتعلمي مزيان "" 

ضحكات ليها الاء و كملات ماكلتها .. 

بعد الانتهاء من الغذاء .. كانو مزال جالسين مونسين بالديسير .. 

كانت الاء مضاربة مع تفاحتها .. حتى زلق الموس و ضربات يدها .. خرج دم و توترت .. شافو فيها خوتها .. ناضت شيماء و عائشة .. 

شيماء:"" اجي .. اجي دغيا ها الحمام "" 

توترات اكتر و هي كاتجمع يدها و قالت :"" ا .. انا غانمشي نداويها فالدار .. "" 

جاوبها شيماء و قالت :"" تي غير اجي نداويها ليك علاش غاتمشي حتال داركم " 

ناض زيد و قال :"" ماعليش .. احنا نيت كنا غانمشيو تابعنا الخدمة ..غير سمحوو لينا و الله يخلف عليكم .. 

تمات الاء غادية باش تخرج من بين السداري و الطابلة .. كان زين العابظين جالس فاخر السداري .. تعكلات بشوية من الزربية لي كان مطوي .. و ماجات غير فيد زين العابدين لي دعمها بدون وعي منو .. و كانت شدات فدراعو بيدها المضروبة .. جمعاتها دغيا .. و قالت ليه:"" سمح ليا .. "" 

و جاوبها باماءة و قال :"" ردي بالك "" 

و خرجو بعدما شكروهم وودعوهم .. 

تكا زين العابدين فسريرو .. هز دراعو يديرو على عينيه ناوي يتصنت لعظامو .. حتى كايشم ريحة غريبة .. ريحة قوية و عمرو شمها .. بدا كايشمشم و يقلب مصدرها .. حل عينيه و بدا يشوف فكمو لي حاطو على وجهو .. و اذا بيه كايلمح نقطة دم متوسطة .. استغرب من وصولها لكمو .. و بدا يتفكر منين جات .. قربها لنيفو شمها كايقلب على مصدر الريحة و كانت هي .. ريحة غريبة .. كاتغلغل فالاعماق بحال شكل فليو و النعناع .. و لكن ماشي ريحتهم .. كانت غريبة بشكل غريب .. كاتخليه يشمها و يرجع يعاود بدون اكتفاء .. استغرب .. منين جاتو هاد النقطة الحمراء لي بريحة غريبة .. ماصدف حتى حاجة بهاد الغرابة فاليوم كامل.. 

و هو كايفكر .. تردخ الباب قدامو و دخلات عائشة لابسة نظارات القرب ديالها .. و هازا قاميجتو الكحلة .. رابطة غوباشتها و قالت :"" هما 2 كلمات .. غانسواك و تجاوبني بلا لف و دوران "" 

قال :"" مالك الوالدة .. اش كاين ؟"" 

جاوبتو و قالت :"" كاتعرف شي شهبة ؟"" 

يتبع