في غرفة نوم .. و على سرير فردي .. كان ناعس شخص .. طولو من طول السرير حتى انه مخرج رجليه من جناب السرير حيت ماقادوش ... ماعريضش و مارقيقش .. ظاهر شعرو الاسود لي غير محدد بأي حلاقة .. فقط ذو طول اقرب ل2 سانتيمترات..
كان الصداع و الضجيج ديال الموسيقى الصاخبة داخل من النافذة ديال غرفتو .. جبد الوسادة من تحت راسو و ضغط بيها على ودنيه ... و لكن قدر الصوت يختارق الوساادة و يلقى طريق لوذنو .. ناض جلس فسريرو .. هز عينو فالنافذة و كمشها بسباب هجوم الضوء ليه .. هز حواجبو مربوطين ... خااااسر و ماعاحبو حااال .. دوز يدو على شعرو بعصبية و ناض بخطوات حافية مسرعة للنافذة .. طل على النافذة لي موازية مباشرة لنافذتو .. و بانت ليه ديك الشقراء المزعجة كاتمشي و تجي و كاتغني بغير اهتمام ..نطق بين سنانو بعصبية و قال :"" هاد البرهوووشة هي ليي بقااات ليا فالحساااب .. حيااتي هااانية مابقا لياا غيير صداااعك .. و لكن الهضرة مع خوووتك ""
داز لبس كلاكيطتو و فتح الباب .. و توجه للدروج .. هبط كايجري نيشان داز من الطابق التحتاني نيشان للباب الخارجي .. حتى سمع صوت امو جايا كاتعيط : "" زين العاابدين .. ازيين الاابدين .. فين غادي اولدي ""
رجع فور سماع نداءها .. و جاوبها بملامح واجمة غاضبة و قال :"" انمشي نشوف مع خوت ديك البرهووشة يربيوها شوية راه مرضااتني بصدااعها .. او واش الوااحد فدااارو مامهنيش حتى بساعتين ديال النعاس ""
دارت يد على يد فوق بطنها المتدلية قليلا بفعل الزمان و عوجت بشفايفها و قالت :"" ساعتين ؟! قول من الظهر و انت مغيب ليا تما ... ال6 ديال العشية هاذي .. نوض خرج شوية يضربك البرد .. و خلي عليك البنت شغلها هاذاك .. بلاش ماتجبد المشاكل مع الجيران ماناقصيينش الله يرضي عليك ""
زادت ملامحو وجوم و حدة و قال :"" الواالدة .. راك عاارفة اش كااين بلااش ماتبقااي تحطي الملح فالجرح ... ""
جاوباتو و هي كاتطول يدها توصل لكتفو ...ربتات عليه بحنان و قالت : "" حتى انا ماقلتشاي اولدي .. كولشي بالارزاق .. غاتلقى خدمة تاني .. غير ماتقلقش الله يرضي عليك .. و اجي تشرب كأس اتاي و بدل ساعة باخرى .. ""
جاوبها و قال :"" بلاتي نشوف مع ديك البرهوشة و نرجع ""
خرج و خلاها كاتغوت... هزات يد حطاتها مفرودة فوق راسها و هي كاتقول :"" يا ولدي خلي علييك الجييراان واش حنا مطفرينو .. تزيدنا بالمشااكل حتى هما .. يااا لطييف يااربي مع هااد الولد و شحااال رااسو قاااسح .. يا لطيف ياا لطييف ""
خرج زين العابدين و قطع الطريق الصغير بيناتهم و سرسر للباب الحديدي قدامهم ... و دار يدو بشكل قبضة على جنبو و سند باليد الاخرى على اطار الباب و و رابط الغوبااشة .. نزل يدو من السرسار و حطها على مسطاجو كايلعب فيه بعصبية ... (مالقيتش شي بطل بالمواصفات ديال زين العابدين من غير هذا لي درت .. ناقصو غير الموسطاج عاونو بمخيلتكم 😂 )
داز شاب من عمرو و هز يدو قائل و هو ماشي :"" واااش خباارك ازيين العاابدين ""
هز فيه عينو بملامح خاسرة و قال :"" بيييخيير لا فاتنا كحل الرااس ""
مازادش معاه الشاب كلمة اخرى و كمل طريقو .. تفتح الباب و خرج عندو زياد بملامح بشوشة و قال :"" و فيين اصاحبي .. دخل دخل ""
جاوبو زين العابدين قائل :"" ماكاين لاش اصاحبي .. جيت غير نقول لك قول لختك تنقص دااك الصدااع .. راه ماناقصش حرييق الرااس ""
ربت على كتفو ضااحك و قال :"" اماالك خااسر .. كنتي نااعس .. دخل تشرب اتاي معانا .. انا غادي نشقفو على راسها راه انا نيت فارعة ليا راسي .. دخل و مسحها فيا ""
رجع زين العابدين التربيتة بخشونة لزياد و قال :"" مرة اخرى اصاحبي .. مهم هضر مع ختك تنقص .. واش نبقى كل مرة جاي ندق عليكم هكا حشوومة .. هضرو معاها شوية اصاحبي ""
تراجع زين العابدين و قال :"" وا هو هذا .. الله يعاون ""
دخل زياد .. و داز زين العابدين متوجه للدارو ... ماجات كرة قااسحة غير فوجهو تلفاتو .. هز راسو ناوي يقتل مول الفعلة ..لقا مجموعة الدراري واقفين كايدورو وجااههم .. تحنى هز الكوورة و هو يضربها برجلو شير بيها حتى طارت للشارع التحت و بقات كاتجري و دار لعند الدراري بنظرات شريرة و محذرة و قال :"" شحال من مرة تبريت من واالديكم ماباقينش تلعبو قدام دااري .. ياااله لحقو موااتكم .. سيرو تحفظو الكسلا .. يااله ""
بقاو واقفين كايخنزرو فييه .. و بحال الى كايدعيو فيه فخااطرهم .. تحنى يهز شيء وهمي يهددهم بيه و هربو .. الا ان واحد فيهم دار و هو كايجري و صرخ قاائل :"" وا سيير الله يعطييك شي مووتة المنحووووووس ""
غير نطقها و حيد كلاكيطتو و تبعو كايجري .. حتى وصلو لآخر الدرب المطل على شاارع عرييض ... مالحقوش و شير عليييه بيها ... و حتى هي ماوصلاتووش ... مشى و تحنى هزها كاينهج و قال :"" هااهي عندك البرهوووش حتى نشدك ""
نطق وااحد من بعض الرجاال الجالسين فالقهوى فالشوكة ديال الدرب و قال :"" واش غاادير راسك فالبرااهش حتى انت .. خليهم يلعبو .. ""
شاف فيه زين العابدين و قال :"" ااه ماشي انت لي تظل تشوط فالشمووشات تقلب على خدمة باش ترجع لدارك ترتاح .. تلقى براهش فاارعين لك رااسك بالصدااع و الغواات .. واا لي عندو شي برهووش يشدو .. مسيينا عالله ""
تم رااجع .. حتى لمح طاكسي وقف .. شاف فالساعة فيدو و رجع شاف فيه .. هبطات بنت منو .. محملة ببعض البلاستيكات و ساكها الصغير بيد طوييلة ... كانت انيقة بلباس رسمي .. سروال توب اسود و قميص حريري ابيض و من فوق سترة بالاسود .. كانت طالقة شعرها القصير الاسود و مرجعاه وراء ودنيها .. سدات الباب و انطالق الطاكسي .. قادت البلاستيكات فيديها و تمات غادية محملة بيهم و بادي عليها التعب .. حتى وقف عليها زين العابدين .. هزات راسها فيه بدهشة .. و عوجات البلاستيكات وراها و ابتاسمت ليه ابتسامة مهتزة و قالت :"" خ...خويا !! ""
دخل زياد للدار كايتنهد.. شاف فيه زيد باستغراب و قال :"" مالك ؟؟ شكون سرسر ؟""
جاوبو زياد و قال :"" هذا زين العابدين كايتشكى تاني من صداع آلاء ""
وقف زيد بصرامة و قال :"" انا غانعرف ليها هاد المرة ""
شدو زياد و قال :"" خليها انا نهضر معاها .. عارفك انت دغيا كاتهنزر فيها ""
جاوبو زيد و قال :"" واش نبقاو هكا ديما تجيب لينا التبرية تحشمنا مع الجيران.. خليها ليا و دخل سوق راسك شوية ""
داز زيد لغرفتها و جلس زياد كايسوط .. دق 2 دقات بالجهد و فتح ... لقاها كاتشطح و تنقز و تغني ... غير شافتو و هي تقلس ... خرجو عينيها و غوتت بعصبية :"" واش بيتي زرييبة تدخل هكا مدرم ؟!""
خنزر فيها بدورو و نطر البريزات و رجع شاف فيها :"" شحاال من مرة كانقول نقسي هااد الزمر شحااال .. ماالك على هااد البساالة .. مزياان يبقا بنادم كل مرة جايين يتشكااو من صدااعك .. ""
ميلات وجهها بتهكم و قالت :"" عاوتاني داك ابوشنبات ... جاي يحل علينا فمو .. مالو غير هو لي عايش فهاد الحي ""
هز صبعو فيها بتحذير و قال :"" شوفي ااه .. نقصي الصدااع .. و لا غانحيد ليك هادشي فخطرة ... و الحي راه ماشي غير هو لي ساكن فيه و ماشي غير انت .. داكشي علاش الاحترام واجب على كولشي .. مافيها باس تنقصيه راه حتى حد ماحيدو ليك ""
كانت كاتكلم و نبرة صوتها كاتراجع منين شافتو قشع البلاستيكات وراها .. هز عينو فيها بغضب و قال :"" اش داكشي فالبلاستيك ""
جاوباتو قائلة :"" والو .. غير شي حاجة ديالي ""
خنزر فيها و نطرهم من يديها ... قلبهم و كان كاتحتاوي على مختلف الحاجيات المنزلية ... و تقدية
رجع هز عينو فيها بسهام قاتلة و قال :"" اش هادشي .. شحال من مرة كانقول لك ماتبقايش تجيبي تقدية للدار .. فلوسك صرفيهم على راسك .. انا راجل الدار و انا لي نجيب ليكم .. ماشي نتوما ""
ربتات على كتفو كاتهدن فيه و هي كاتشوف فحواليها و قالت :"" زين العابدين .. تهدن اخويا حتال الدار و نهضرو .. بلاش شوهة الله يرحم والديك ""
هز راسو للسماء و دار بديه فجياب سروال سيرفيت ديالو و تم غادي ... تبسمات و تبعاتو ... نطر البلاستيكات من يديها و تم غادي ...تبسمات اكتر و خشات يديها فدراعو حاوطاتها بدراعها و قالت :"" مالك اليوم طالع ليك الدم تاني ""
جاوبها بعد برهة قليلة و قال :"" السااعة لله ...اصلا امتى ماكانش طالع ليا الدم... لي درنا فيها يدينا تبطل .. تالت خدمة كانتطرد منها فشهر واحد اعيباد الله .. طبت كولشي خدمت فيه و انا اعيباد الله بشواهدي ... واكوون غير كنت شي واحد مافيدو والو مايبقاش فيا الحاال .. و الله حتى حرت و عييييت من هادشي ""
ربتات على كتفو بحنان و قالت :"" ماعليش اولد خالتي .. ماتهزش فبالك ... و ماتضغطش على راسك رخاها الله .. ضروري رزقك محفوظ فشي بلاصة غير ماتستسلمش .. و كيف صرفت انا كيف صرفتي انت .. راك انت وخالتي عائلتي لي عندي و ماعندي غيركم بعد موت ماما الله يرحمها ... و انت فاش كاتغوت عليا هكا باش مانصرفش راك كاتجرحني.. واش انا غريبة عليكم ..""
جاوبها زين العابدين و قال :"" صرفي على راسك بفلوسك ... احمدي الله نحسي مابقاش تابعك حتى انت و لقيتي خدمة تعتقي بيها راسك ""
جاوباتو بملل و قالت :"" هاهو غايبدا يهضر على النحس تاني .. ديما كانقولك لك و نعاود الارزاق بيد الله.. و زايدون علاش كاتهرب .. علاش لي مانصرفش معاك فالدار .. ياك انا اختك ؟ و هي نيت كاتعتابرني غريبة عليكم ..""
فتح زين العابدين فمو متنهد و كأن هم دنيا على كتافو و قال :"" انت مافهمتيش .. انت بنت خالتي و اختي ...وا شفتي كون كنتي ختي نيت من مي و با لا خليتك حطيتي سانتيم واحد ... انا الراجل فالدار و ماانرضاش العيلات يصرفو فيها ... راك شفتي اش درت للواليدة منين حصلتها كاتطرز لجيران بالفلوس .. و لا نسااي هادشي ماغاتفهميهش حيت انت مراة "
ضحكات و هي كاتأمل ملامحو الغاضبة و قالت :"" عرفتي اولد خالتي اشنو كايعجبني فيك ... هو هاد النفخة ديالك ... و النفس الحارة لي فيك ... ""
نصف ابتسامة سااخرة كانت مرسومة على وجهو .. لوح براسو و قال :"" دخلي .. دخلي لداركم ... اوديييي ""
دخل زين للكوزينة و حط التقدية و طلع لبيتو المتواجد فالطابق العلوي ... في حين بنت خالتو دخلات للصالة .. حيدات صباطها و توجهات لخالتها باست حنكها و جلسات حداها .. مدات رجليها و مددات ظهرها ... خشات خالتها عائشة الوسادة و راها و قالت :"" ماتكايش على الحيط ابنتي الله يرضي عليك .. عييتي .. نسخن ليك الغديوة ديالك ؟""
جاوبتها قائلة :"" لا اخالتي .. كوبي ليا غير كأس اتاي ... ضرني راسي هاد النهاار ""
هزات عائشة البراد كاتكب و قالت :"" شربي اتاي و تكاي ليك شوية احبيبة .. ""
جاوبتها :"" داكشي لي غاندير اخالتي ""
دخل زين العابدين لحمام الموجود فطابق العلوي .. غسل وجهو ... و حلق اللحية لي نمات فهاد الايام باهمال .. و خدا مقص شذب بيه الموسطاج ديالو .. دوز صبعو عليه كايقادو من جناب و هو كايتفحص اي زغبة فالتة ... دار دوش خفيف و داز لغرفتو .. لبس سيرفيت سوداء بخطوط بيضاء فالجناب و هبط .. زين العابدين ماكانش من الشباب لي كايهتمو بمظهرهم ... شاب ماشي من جيلو ... همو كلو فكيفاش يهز دارو و يبني مستقبلو ... و هادشي مخليه يهمل راسو او بالاصح غير مهتم من الاصل .. الشيء لي كايخلي شكلو شكل شخص قديم الطراز ... بحال شاب ديال السبعينات و التمانينات خاااصة بداك الموسطاج ..
جلس حدا بنت خالتو و قال :"" كبي كبي معاك ""
هزات عائشة راسها فيه و قالت :"" برد .. منين كنت نعيط ليك فين كنتي؟! ""
ميل فمو و ياله غاينوض و شداتو بنت خالتو قائلة : "" جلس جلس .. انا نعمرو لخويا ""
رجع جلس و هي ناضت كاتجري للكوزينة ..
شافت فيه امو و قالت :"" حسنتي و دوشتي .. كون غير مشيتي للحمام اوليدي كمد عظيماتك ماقهراتكش برودية الدووش ""
دقات امو فالطابلة و قالت .. :"" برا و الباس عليك اوليدي ""
رجعات هازة البرااد و حطاتو قدامو و رجعات للكوزينة جابت ليه مقيلة .. فيها بيض مقلي بزيت الزيتون و حطاتو ليه ..
تبسم و قال :"" الله يرضي علييك اشيماء .. اش ندير بلا بيك ""
ضحكات و قالت :""بصحتك .. غيير بقا لينا على خااطرك ""
نطقات عائشة و هي كاتشوف فيهم بحنان و قالت :"" الله يسمح ليها تورية .. كون مارضعاتك فصغرك مع شيماء كوراني شحااال هاذي زوجتكم و وولادكم معمرين علييا الدار ""
جمعات شيماء ضحكتها و هز زين العابدين وجهو فامو بوجوم و فمو عاامر و كل كلمة كايخرجها كايشتت عليهم .. و قال :"" دابا مالقيتي الواليدة امتى توحليها ليا غير دابا ""
نطقات شيماء كذلك بتذمر و هي كاتضرب يد فيد بالفقصة :"" خالتي .. واش دابا هادي هضرة تبقاي كل مرة تقوليها و تعاوديها.. حنا خوت و كلها و عندو نصيبو .. فهمي هادشي راك غير كاتحرجينا .. ""
جاوباتهم بخيبة و هي كاتخنزر و معوجة فمها و قالت :"" صافي صافي و انتوما خاصكم غير علاياش .. تريكة المصااعير ... انا غانوض لبيتي .. ""
ناضت عائشة دخلات لغرفتها .. شافت شيماء فزين العابدين و قالت :"" ماتديش على خالتي راه مرة مرة كايفلتو ليها ""
كمل زين العابدين ماكلتو و قال:"" غاتوريني فيها .. الله يسمح ليا و لكن الوالدة انا لي حافظها راه شويطينة كاتطيب فيا على المهل ...و كاتلمح ليا غير بالريط .. باغياني نتزوج داكشي علاش كاتجبد الموضوع مرة مرة .. و هي عاارفاني ماغاديش نبغي داكشي علاش ماقداتش تقولها نيشان""ضحكات شيماء و قالت :"" اوى 27 عام .. هذا هو الوقت ..اش كاتسنى ""
جاوبها زين العابدين :"" و تكون حتى 40 ... غير بيني و بينك دابا كون تقدم ليك واحد بموصافاتي غاتقبلي بيه .. انا بعدا ماغانعطيكش ليه ... مشومر ماخدامش و محااال واش يلقاها .. لي دار فيها يدو ماكاتصدقش الله يستر كولشي مصائب الدنيا كايجيو حتال عندي و يطيحو فوق راسي ..لعنة النحس ملازماني حتال اخر يوم فعمري .. هاد الساعة خليني غير فمشاكيلي .. اما الزوااج ... الى ما استاقريتش بخدمة رسمية ماغاديش نوحل راسي فييه و نغرق كتر ماني غارق ""
ضرباتو على كتفو بمرح و قالت :"" تا مالك هوكا سلبي .. حيد منك ديك الهضرة ديال منحوس .. داكشي راه غير هضرة .. ""
هز فيها حااجبو و قالت بتراجع :"" صافي واخا واخا... يمكن نيت تابعك "النحس" و لكن ماتخليش هاد الافكار تقيدك .. راه فوق هادشي كولو كاين الله .. كاينين بنات الناس لي يصبرو معاك حتى توقف على رجليك .. راه حتى حال ماكايدوم و ماعرفنا اش مكتااب لينا .. ""
جاوبها قائل :"" هادشي كان زمااان اشيماء .. الحال تبدل و كل حااجة بشرووطها .. و مابغيتش نكرفس معايا بنات النااس .. اللهم بناقص .. ""
خرجات شيماء كاتندب قائلة :"" اويلي على بناقص ""
هز راسو مخرج عينيه بانفعال قال :"" هاااااا انت حصلتتتي ..شحاال من مرة الواالدة كانقول لك حيدي منك هاد القاعدة ""
جاوباتو بقليل من الحرج و تلعتم :"" و... على انت لقيت... معاك شي حل من غير هذا ؟ انت ماكاتعطينيش راس الخيط ... كاين شي واحد كايدير بناقص من الزواج ؟""
جاوبها قائل :"" ايه .. انا .. و بلا ماتبداي الوالدة بديك الكاسيكة تاني راه ماعندي خاطر ""
جاوباتو بانفعال :"" و على انت ايمتا كاان عندك الخااطر .. ااه ؟ تي شوفي ليك الولد اش كايقوول و مبررررد اعيباد الله .. باغي تفقصني ""
جاوبها بدورو قائل :"" الواالدة بدلي ساعة باخرى .. هاادشي كنتي تفكري فيه منيين كنتي تمشي عند السحاارة ... و اكبر متضرر من فعايلك هو انا ..و بلا ماتندبي دابا و تغوتي لي وقع راه وقع و نساي عليا داك الموضوع .. انا ماعندي حل لهادشي لي فيه .. من غير رحمة سيدي ربي""
جاوباتو ببعض من التردد قائلة :"" ك.. كاين الحل اوليدي .. هو نلقاو وحدة من دوك البيلسانات .. راه هي لي غاتبطل ليك هاادشي ""
حمر فيها عينو و قال :"" الواالدة .. بااقي ماابغيتي تووبي .. واش غانقتلو بنادم الوالدة ؟ ""
جاوباتو قائلة :"" اعوووذ بالله اولدي ماشي هاادشي لي قصدت .. را ماشي ضروري نقتلوها راه الى تزوجتي بيها راه غاتحفظك من نحسك و ترجع بشر عادي بحال ايها النااس ""
وقف و زاد انفعالو قائل :" براكة الواالدة من هااد الخراايف فين غانلقا هااد بنادمة لي كاتهضري عليها متيقا لياا كلاام السحاارات المشعوداات لي ماكايعرفو لا الله لا رحمتو .. من الاحسن ليك الوالدة تكووني نسيتي طريقهم و لا والله العظيم لا بقيتي شفتي كمارتي واخا يوقع لي يوقع .. ""
توترات ...قربات ليه و هي كاتشد دراعو بيديها و قالت :"" صافي اولدي .. صافي خاطرك غير ماتقلقش ليا .. تبت شحاال هاذي و الله اولدي مابقيت قربت لديك الطريق .. لدابا كانطلب الله يغفر ليا .. كفاية غير كانتعذب و انا كانشوف ولدي مامهنيش فحياتو ... و الله اولدي الى ندمت حتى ندم الشيب فراسي ""
ربت على يديها و كانت لانت ملامحو و قال :"" صافي الوالدة الله يلعن الشيطان .. داك الموضوع نسايه .. مكتاب الله كايتصرف .. ماتديريش فبالك .. كفاية المصيبة لي طاحت فوق راسي كانخرج منها كيف البغل .. ""
ضحكو شيماء و عائشة.. و هو اكتفى بابتسامة مرحة .. قبل راسها و قال :"" انا خارج ... خاص شي حاجة ""
جاوباتو امو و قالت :"" سلامتك احبيبي ""
جاوبها و هو ماشي :"" ياله الله يعاون ""
بعد خروجو شافت شيماء فخالتها و قالت :"" و الله اخالتي ماكايهنا بالك حتى كاتصعريه و طلعي قروونو مسكين .. خلي السيد عليك واش بغيتي طججيه ""
خنزرات فيها عائشة و قالت :"" سكتي انت .. ابلاتي على والديك نظل نقول ليك واش تحت راسو .. عمرك عطيتيني راس الخيط حتى انت .. احياااني عليكم نتووما دوك الجوووج .. فاش كاتجمعو و تبقاو ليا على التوشويش ... على انا ماشي امكم .. من المفروض انا لي تجيو تشاورو معايا و تشكاو عليا ""
جاوباتها شيماء و هي كاتشوف فيها بنصف عين و قالت :"" و على اخالتي انت كاتخلي لينا كيفاش .. غير كانهضرو معااك كاتندميينا ""
دارت عائشة يدها فجنبها و قالت :"" يااك ابنتي .. يااك .. ايااه سري .. سري انا لي كانبغي غير مصالحتكم و راحتكم ""
حدرات يدعا و هي كاتصطاانع الحزن و البكاء .. و دخلات لغرفتها .. ضحكات شيماء و تبعاتها قائلة :"" اجي لهنا .. كاتمتلي عليا تاني ...تقلقتي ؟ .. هههه اجي لهناا ""
جالسة مربعة رجليها و هازا البورطابل فيديها و كتاكل ... خرج زياد من غرفتو مبدل و قال :"" انا خارج نتقهوى مع الدراري ""
هز زيد راسو و و سد الكومبيوتر ديالو و قال :"" انا خارج معاك ""
خرج زياد و وقف زيد قدام الاء .. شاف فيها و قال :"" هاديك اااه ""
جاوباتو بهمهمة بدون ماتهز راسها ... تنهد و قرب ليها نطر الهاتف من يدها و شاف فيه .. كانت كاتصفح واحد من المواقع الاجتماعية .. دق بقبضتو فوق راسها و قال :"" انا كانهضر معاك و انت كاتهضري ليا مع الشينوا ""
رجعات نطراتو من يدو عاقدة حواجبها و قالت :"" هادو كوريين ماشي شينوا .. راك استاذ ا الاستاذ ماغانبقاش نصححها ليك كل مرة .. ""
جاوبها و هو غادي :"" ياله غسلي الماعن و ديري العشاء ""
وقفات صاحت منفعلة :"" واا لا لا .. حشوومة عل..""
قبل ماتكملها دار خنزر فيها و هي تسكت رابطة حواجبها بغضب .. هز يدو و دوز صبعو على ودنيه بتهذيذ صامت و خرج ..
جلسات كاتغبن و قالت :"" الله يعطيك شي غباارة .. خدامتكم انا.. تفووو الله يخليها عيشة معاكم ""
سالات حديتها مع صديقتها الكورية و دازت لواتساب و دوزات نمرة صديقتها .. تسنات شوية و جاوبتها :"" اشنو بغيتي تاني ""
جاوبت الاء قائلة :"" اجي تباتي عندي ""
جاوبتها قائلة :"" نبات عندك و لا نطيب فبلاصتك العشاء ؟ ""
مطت صديقتها شفايفها و ضيقت عيونها فالجهة الاخرى و قالت :"" انا لي كانعرفك المعجاازة المخمووجة خلااها خووك .. ""
شهقات بغير تصديق وقفات مقوسة ظهرها مستعدة ترد الاهانة و قالت :"" ياااك الpااابوا الpااااكا ... كايتعايريني بمعيوور خووتي .. على اساس انت الحادغة ديال الحاادغاات حتى انت مخمووجة .. ""
جاوباتها صديقتها فالمقابل و قالت :"" لا اختي انا الى نضت نشقا كانديرو على حقو و طريقو ماشي كانخشي التشطيبة تحت الزربية و نجفف غير الوسط بلا جناب و نخشي طباسل خاويين فالتلاجة ""
مطت آلاء شفايفها و قالت :"" ممكن نديرو على حقو و طريقو حتى انا .. غير كاننتاقم منهم حيت كايفرضو عليا ندير كولشي .. انا ماكانحملش لي يقول ليا ندير شي حاجة ""
جاوبتها صديقتها ملوحة براسها و قالت :"" انت البنت وسط 2 خووت .. راه عاادي تكوني انت لي كاطيبي ليهم و تجمعي الدار .. غايقابلو هما الدار و خداميهم .. تي كووني تخمي شوية لغييرك .. عرفتي كون كنت فبلاصة شي واحد فيهم .. كون شخال هاذي جبدت ليك البلابز ديال عينيك ""
عوجات آلاء فمها و دارت يدها فجنبها و قالت :"" اوى بحسبك اصحيبيتي عشييرتي ""
ضحكات صديقتها فالمقابل :"" و سيري طيبي عشاتك .. و غدا طرغيني بكري ماتبقايش تعطلي .. اجي اجي نسييييت حقا.. راه عندنا فرض منزلي فالمات لمك غدا خاصنا نجيبوه ""
خرجو عينين آلاء و قالت :"" عاودي اش قلتي .. فاااش ؟؟ و لمك يالله قايلاها ""
جاوبتها قائلة بملل :"" فالمااات .. سيمانة باش عالمهم و حيت انا و يااك نابغات كانجيو حتال الدقيقة ال90 و نبداو نتفتفو .. و عاد عرفت اصلا ""
جاوبت آلاء و هي كاتستنجد بدون امل :"" العاااااار ... ""
و هنا فتحات صديقتها فمها بملل و كتردد معاها كلامها في نفس الوقت و كأنها معتادة على سمااع كاسيطتها ..
آلاء :"" كيف غاندير نخرج و انا مشغولة بين جميع الدار و الطيااب .. الحياة صعيبة على لي ماعندهومش مواتهم .. عافاك .. عتقي صاحبتك و لي كتبتيه حطيه فورقة اخرى ..العاااااار .. ديري الخير .. تلقاايه ""
ما إن انتهت من وصلتها الاشهارية جاوبتها صديقتها و قالت :"" صافي صافي .. اصلا كنت معولة نصايبو معايا مكاين لاش تطربيني بكسيطتك المكرجة ...غانشوف شكون يسيفطو ليا ... هههه واخا القسم كولو كايدي تخرتاح واحد هههه غير سيري عالله ""
جمعات ضحكتها فالمقابل و جاوبتها :"" ياله .. كوجو (اغربي عن وجهي )""
و قطعات .. شافت فالطابلة قدامهاة.. جمعات الضحكة و تنهدت بحال الى هازة هم الدنيا و ناضت كاتجمعها و خوتها ماسلموش من وصلة من السبان و الاهانات الغير منتهية ...
خرج من باب دارو و سد الباب و راه .. خشا سوارتو فجيبو و هز يدو كايصلح بيها موسطاجو .. فهي عادة فيه كلما خرج من الدار ..
تمشا بيد فجيب سروالو ... و الاخرى طالقها ... و فالاخر وصل .. وصل للقهوى مابعيداش على الحي فقط ب2 احياء .. دخل و كيف العادة .. ولاد الحي مجموعين فالقهوة .. زيد و زياد بالإضافة ل4 الشباب آخرين .. سلم باليد و جر كرسي من الطابلة جنبهم و جلس .. نطق واحد من الشباب و قال :"" عااش من شاافك اصاحبي فين غبرتي ""
شير زين العابدين للسرباي و طلب كأس اتاي من بلاصتو و رجع شاف فالدراري و قال :"" ماغابر فين .. غير مع الوقت و صافي ""
رشف زياد من فنجان قهوتو و قال :"" وا الوقت حنا غااع معاها و لكن ماغبراتناش كيف كاتغبرك انت ""
ضحك زين العابدين ضحكة جانبية و قال "" منين كايكون مجموع عليك الضو و الماء .. الصير ديال الدار و دوايات الوالدة .. المشي و المجي النهار و ماطال خدام اكتر من خدمة .. و كاتطرد من خدمتك بلا سبب مباشر غير نحس ...و كولشي مشاكل الدنيا كايطيحو فوق راسك من دوون الناس ... *دار شاف فالدار المقابلة لقهوة و كمل كلامو بنبرة خافتة * و البنت لي حاط عليها عينك سنين هادي ماتقدرش تقدم ليها حيت مامتوفراش فيك الشروط *رجع شاف فيهم * مانضنش الوقت دارت معاكم المزيان قدما دايراه معايا ..
تنهد واحد من الشباب و ضربو على كتفو بخشونة و قال :"" اشتي اصاحبي ماكاين لي خارج عليك قد هاد السلبية ديالك .. اشتي نتا و سمح ليا عليها كلمة وااا نكدي اصاحبي و درامي و قاااانط من حياتك .. راه كولشي كايعاني اصاحبي راه ماشي غير بوحدك راه غير ماكيبانوش ليك .. و ا منين عقلت عليك و انت غير كاتنهد و تذمر ""
نطق زيد و قال :"" عندو الحق كولشي بمشاكلو ... توكل على الله و خطبها ماعرفتي الخير فين كاين ""
نطق زين العابدين و قال :"" الهضرة ساااهلة .. فين غانسكنها و اش غانوكلها و الى رزقنا الله بشي ولد باش نقريه و اش غانوكلو و اش غانلبسو... اللهم نتكمش اخويا .. هادشي ماشي ديالي .. باركة عليا غير نبقا نقلب على خدمة و ننلقى المصايب ""
جاوبو واحد من الشباب قائل :"" قول اعوذ بالله من الشيطان الرجيم .. عهدنا بيك كاتعرف الله و راضي بحكمو .. اش هاد الكلام ا صاحبي ""
تنهد زين العابدين و و دوز يدو على وجهو و قال :"" اعوذ بالله من الشيطان الرجيم ""
جا السرباي و حط كأسو د الشاي .. شكرو و ما إن هزو .. حتى تشقق فيدو و تهرس .. تكب فيدو و على فخضو .. حرقو ووقف معصب كايشتم و يسوس ..
ناضو لي من حداه كايسوسو الزاج و يرددو ماوقع باس .. نطق زياد قبل مايتكلم زين العابدين و قال :"" عارفك اش غاتقول .. كان ممكن توقع لاي واحد فينا بلا ماتدير لينا فيلم تاني""
رجع دوك زوج كلمات ليه و قال :"" غانمشي نبدل و نرجع ""
نطق واحد من الشباب و قال :"" الى اذن العشاء قبل ماتجي غاتلقانا فالجامع ""
مشا خرج و هو كايشتم فخاطرو حتى لمحها ... جايا بفستانها الاسود الطويل و فولارها ... حادرة راسها و ساكها فكتفها و حاضنة كتبها ... بخطواتها السريعة .. مرت من جنبو بحال الطيف ... بدون ماتنتابه ليه .. وقف تبعها بعينو حتى قطعات الشارع للدارها .. حلات الباب بالساروت و دخلت .. تنهد تنهيدة رخيمة كاره لي ماهو فيه ... بنت متدينة خلوقة ... جميلة خَلْقاً و خُلُقاً ... شابة طالبة و طموحة .. بنت عائلۃ متدينۃ ذات صمعة جيدة ... كان من ديما مراقبها .. من اول ما تحولو لهاد الحي 6 سنين هادي ... ماكاتبانش فالحي بزاف ... من النوع لي كايخرج للضرورة فقط .. حتى انه حافظ اوقات خروجها و دخولها ... و اليوم لي كاتخرج فيه للحمام ... آسرو جمالها و الطريقة باش كاتمشي حاذرة راسها ... عمرو لمح شي حد زعم عليها .. اولا تجبدات بسوء ... هادشي مريحو و مطمنو من جيهتها .. و لكن مخوفو فنفس الوقت .. كيفما كايشوفها الزوجة المستقبلية المتالية و المرأة المناسبة تكون ام ولادو .. غايكون غيرو كذلك .. خايف يتقدم ليها شي حد من غيرو و تطير من يديه .. و هادشي مسهرو و داير ليه قلق فوق همو الباقي ... كمل طريقو لدارو حتى وصل .. حل الباب .. لقا شيماء متكية فالبهو و كاتفرج .. و امو كاتطيب فالكوزينة ..
خرجات امو لعندو منين سمعات الباب تحل و قالت :"" مالك اولدي رجعتي دغيا ؟ ""
آلاء و المنحوس الجزء الثالث
محتوى القصة
التنقل بين الأجزاء