خارجة آلاء بسطلها ديال الزبل كاتخبط فرجليها و تسب كيف عادتها ..
آلاء : انا الاء الجمال و الاناقة كانمشي للبركاصة نلوح الزبل .. كيفاش غانتقدم فحياتي و خوتي براسهم ما مادايرينش ليا قيمة .. و لكن غانتطور و يوليو يقلبو عليا للدواء و مايلقاونيش .. البغااال...
هزات عينيها بغير اهتمام و هي تقلس و تخبات فخوية ديال دار دازت عليها .. كان زين العابدين واقف كايتكلم مع الشاب ..
عضات على شفايفها و قالت :"" ناري هاهو .. غايتلاقاو كيف عادتهم فصلاة العشاء..و انا خاصني نتأكد انه مايوصلش مصيبة ديال الصباح لخوتي .. نمشي نهضر معاه ؟ الى هضرت غادي تحل ليه و يهز عليا خنافرو للسماء و انا مستحيييل نعطيه فرصة ""
بان ليها جاي و هي تبدا تشطح بالسطل فيديها ماعرفت تبقا تابتة مخبية و لا دير راسها غادية .. حتى كايبان ليها موطور 103 فييه 2 جايين طايرين بالخرشاش .. خطفو ساك البيسي من يد زين العابدين .. لي غوت " وااااهيااا ... شد شد شد "" و جرا تابعهم مضارب مع كلاكيطتو لي تقلاتو .. كولشي ولاد الدرب انتابهو و بداو يجريو على امل يلحقوه ..
داز الموطور فاتجاه ألاء لي حالا فمها فلي وقع .. غير وصلو حداها ماحسات حتى هزات الطارو بالجهد فطريقهم دخلو فيه .. جاهم نيشان فالكمارة ... تشتت و طار الزبل فالسماء .. طاح الموطور بروايضو كايضورو و دوك الجوج ماعرفو اش وقع و منين نزل عليهم داك الطارو و زبل الحووت .. تجمعو الجقلة و هي تعلق آلاء لدارها .. دخلات و هي تزدح الباب و تكات عليه مخرجة عينيها كاتعض ظفارها.. هزات راسها لقات خوها قدامها و قال :"" مالك انت ؟ اش هاد الصداع برا ""
جاوباتو و عينيها خارجين :" ها .. ا .. واحد الشفارة ..شفرو ولد الجيران و شدووهم .. ""
جرها و قال :"" حيدي خليني نشوف اش وااقع ""
شداتو و قالت :"" لا .. لا .. ""
تحل باب الدار بالساروت و دخل زياد كايضحك ..
خرج زيد شوية و كايشوف فالجوقة مجموعين و باااينة بلي كايغيزو ليهم .. رجع شاف فزياد و قال :"" اش واقع ""
ضحك زياد و قال :"" مافخبااركش؟ .. سول اختك هههههه ""
كانت الاء من الداخل كاتزاوغ فيه يسكت .. غير دار عندها و هي تزم فمها و سولها :"" اش دخلك انت فهادشي .. اصلا غير ديك الخبطة ديال الباب لي درتي و عينيك لي كايضورو باينة من الطياارة درتي شي فعلة ""
تخبات ورى زياد لي كايضحك و قال :"" شوف الطارو ""
طل زيد و رجع شاف فيهم و قال :"" مالو تشخشخ هكاك .. تي اش درتي البنت ""
زادت تخبات ورى خوها لي كايضحك و قال :"" جاي من راس الدرب ..حتى شفت واحد 2 غفلو زين العابدين و طيرو ليه بيسي من يدو .. نيشان ماجاو غير فالطارو لي هزات ختك طيحاتكم كاو كيتركلو فالارض .. ماعرفو داك الزبل من اشمن جايح نزل عليهم ..ههههههه تا بربي حتى طيراااتو ليا .. دارت فعلتها و علقت هههه مالك هربتي ؟""
جاوباتو و قالت :"" غايعقلو عليا ..يتلقاو ليا فشي درب ماكايخرجش ""
ضحك زياد و قال :"" على هما شافوك .. راك درتي لبوهم التشاش و و ريحة الزبل شقلبات ليهم الطباسل و على داك عرتم الدجاج لي دايرين ليهم دابا .. موحال يعقلو حتى على سمياتهم هههههه مسخووطة الوالدييين .. ضربي و تعلقي .. ""
زيد :"" ههههههههه زيد نشوفو اش وقع ""
جاوبت الاء و قالت :"" لا ... لا بلاش .. اش بغينا فيهم ""
خرج زيد و خلاها كاتهضر .. اما زياد كايشوف فيها و يضحك .. خنزرات فيه و ضرباتو على كتفو و قالت :"' كاتضحك ..عاجبك الحال ""
جاوبها و قال :"" وا انت لي خلطتيهم بسطل شكون قالها ليك .. ديريها و من بعد تبركي ترعدي ""
جاوباتو و قالت :"" ماحسيت براسي حتى ضربتهم بالسطل .. كانو غايرزيو الدري مسكين فبيسيه .. 4 سنين و هو غادي جاي بيه .. ""
ضحك و جرها مخرجها و قال :"" اختي الظرافات .. اوى اجي نديرو يدينا مع ولاد الدرب باش مانتسماوش خارجين من الجمااعة ""
جرها بالزز منها و خرجها و هي مخبية وراه .. لقاو زيد كايفك و كايقول براكة عليهم .. اما زين العابدين لقا فيمن يبرد غدايدو... بارك على البوطيات .. هاذي تنفع هاذي تضر حتى ناض .. و قال :"" يااله هوضو على سلامتكم .. و باقي دودو بهاد السيكتوور .. ها ولاد الحومة غااع عقلو على واالديكم .. براهش قلال الترااابي ""
ناضو البراهش هربانين زحفا .. و كلها يلغي بلغاه و شي طايعاود لشي اش وقع ..
قال زيد لزين :" واا على طرحة عطيتيهم اصاحبي ..""
جاوبو زين و هو كاينفض حوابحو و يقادهم و قال :"" ماماين غير لي يصعرك .. وا كاتكون هاني حتى يخرجو ليك البراهش من شي قنت .. يستااهلو .. كانو باغين يطغو البيسي صدقو داخلين فطارو دزبل و زادوها بطرحة العصا ""
بعدما كمل جملتو وقف زياد و اختو مخشية وراه كانطل .. شاف فيها زين العابدين لبرهة كايطلع و ينزل و قال :"" ماااعلييكش ....""
شافت فيه بنصف عين و ماجاوبتش .. ضحك زياد و قال :"" اختي الرجوولة ""
خنزرات فيه و قالت :"" احتارم راسك اشمن رجوولة ""
وقفات شيماء كاتشوف فالروينة و الناس لي بظاو يتفرقو .. ماحتاجتش دكاء باش تعرف خوها طايح فمصيبة اخرى .. قالت السلام و كلهم ردوه عليها ..و كملات :"" اش وقع ازين العابدين ""
جاوبها و قال :"" والو شي براهش سخن عليهم راسهم بغاو يطيرو ليا هاد البيسي ديال الدري .. و لكن جاب الله جات الدرية ...""
شاف فيها .. سكت شوية و رجع قال :"" اه .. الاء .. كانت هازة طارو .. و ضرباتهم بيه طاحو و غيزنا ليهم ""
شافت فيه شيماء بصدمة .. و رجعت شافت فالاء و هي تبدى تضحك و دايرة يدها على فمها .. و قالت :"" مايمكنش .. واش نييت درتييهااهههه عفرييييعتة ""
جاوبت الاء ضاحكة و قالت :"" اختي ماجات لابسنطيحة لا شجااعة لا والو .. راه غير يدي خفيفة .. ماكانعقل حتى كايفوت الفوت ... ""
ضحكات شيماء و قالت :"" و اللهما هكا و لا واالو هههه ""
زيد :"" اودي اختي شيماء غير كايبان ليك .. هاد الخفة ديالها راه ممكن تطيح فشي مصيبة تكون بوحدها ماتلقا ليها تخريجة ""
جاوبو هاد المرة زين العابدين و قال :"" بالصح .. ضروري خاصها تعرف كيفاش تتصرف و امتى تتصرف .. الوقت خياابت ""
و شاف فيها بنصف عين .. فهمات هضرتو و بركات تضور فعينيها بين خوتها و بينو هو .. و تعض على شفايفها .. و اخيرا نطقات شيماء و قالت :"" هاد الزبل ماخاصوش يبقا دايع هكا فالطريق ""
شاف زيد فاختو نطق و قال :"" و بما انك الالة شتتي هادشي .. انت لي غاتجمعيه .. ياله مانلقا حتى حاجة قدام الدار ""
شهقات حالة فمها و قالت :"" دابا شنااهوا .. من هاد العمل البطوولي لي كانستاهل عليه وسام .. نوض نجمع الزبل من الزنقة .. ماحشمتيش ؟!""
دوز زياد يدو على وجها و قال :"" عااد قلتي ليا احتارم راسك حيت قلت ليك رجولة .. فين مشات الانوتة ""
ضربات يدو و قالت :"" كل حاجة بوقتها .. و انا ماغانجمعش هاد الزبل ""
زيد :"" لا احبيبة غاتجمعيهم ""
شافت فزياد و قالت :"" ماما عتقني ""
نطق زين العابدين و شيماء فنفس الوقت و قالو مستغربين :"" ماما ؟!!!""
ياله غاتحل فمها تشرح و هو يسدو ليها و هو كايضحك بتوتر و قال :"" ماتديوش عليها .. برهوشة كاتخربق ""
شاف فشيماء لي كاتكبت ضحكتها ... و تحلف حتى يندم الاء على شوهتو قدام شيماء ..
نطق زياد دغيا و قال :"" لا غاتجمعو هاادي .. راه غير كاتهضر ""
خنزرات فبه الاء و خمج وجهها حدر عينيها و هو كايضحك لشيماء ..
نطق زين العابدين و قال :"" غايجمعووه ب2 ""
ياله غاتخنزر فزين العابدين و تفكرات بلي هو ماشي من خوتها .. و عاد قابلها بشوفة .. شوفة مامؤلوفاش ليها .. غريبة عليها .. تراجعت و دورات وجهها كاتفقص ..
نطق زيد و قال :"" و انا نرجع لشغالي .. ""
دخل زيد و زياد و معاهم الاء .. و دخلو البقية حتى هما لدارهم ..
من بعد شوية خرجات الاء هازة شطابة و بالة و لقات شيماء ياله غاتجمع حتى هي و قالت ليها ..
شيماء :"" غير دخلي احبيبة انا نجمعو بالخف ""
جاوبتها الاء و قالت :"" كنت نديرها قد فمك .. كون ماكان داك البغل حاضيني من السطح .. بلا ماتهزي عينيك ""
ضحكات شيماء و قالت :"" هههه اوى غير ديري راسك غادي تديري يديك و صافي هههه""
تحنات الاء و قالت:"" ماشي لديك الدرجة .. راه دغيا نجمعووه .. ""
جمعوه فبلاصة وحدة و خرج عندهم زين العابدين هاز بلاستيكة للزبل يجمعوه فيها .. هزاتو شيماء و رماتو وسط البلاستيكة لي هازها .. جات نوبة الاء تلوح لي جمعات هي .. هزات عينيها فيه .. تقابلو ب2 لتانية و قالت :"" تعادلنا ماكاتسالني ماكانتسالك ""
ابتاسم باستغراب و قال :"" مافهمتش ""
حدرات عينبهت دايرة راسها كاتكب فالبلاستيكة و قالت :"" داكشي لي وقع الصباح .. عتقتينا و دابا عتقتك .. دابا ماكاتسالني والو يعني ماغاتقولهاش لخوتي .. "
جاوبها و قال :"" ماكنتش ناوي نقول شي حاجة .. بينك و بين خوتك ""
هزات عينيها فيه و قالت :"" واااو .. فرق كبير بين الصبااح و دابا ""
قاطعتهم شيماء لي رمات الباقي فالبلاستيكة و قالت :"" صافي سالينا ""
جاوب زين العابدين و قال :"" ياله دخلو .. انا غانلوحو ""
دخلات شيماء و هو مشا يلوحو .. هزات الاء شغلها و رجعات للدار ..
دخلات و نيشان غسلات يديها و دخلات للصالة جلسات .. لقات خوها موجد الغوتي .. جلسات تاكل و هو جالس حداها باقي خدام ... هبط زياد من السطح و جلس معاهم .. شاف فختو و قال :"" شحال من مرو كانقول لمك ماتقوليش ليا ماما قدام النااس ""
جاوباتو و هي كتاكل و قالت :"" عادي عادي .. راك ماما اصلا ""
نزل عليها للقرفادة و قال :"" انا جداااك ""
جاوباتو و قالت :"" حتى جدة مزيانة ""
نزل عليها تاني و قال :"" قدام النااس انا خووك""
جاوباتو و قالت :"" و على انت شي حاجة من غير خويا ؟""
جاوبها و قال :"" اه .. فهميها لراسك .. انا خوك و انت كاتعيطي ليا ماما ""
جاوباتو و قالت :"" يحصل ليك الشرف نعيط ليك ماما و زايدون مالك على هاد العياقة ماسمعنا حد ""
ضرب على يدو و قال :" الاا .. سمعووونا لمك سمعووووونا ""
شافت فيه باستغراب مرجعة راسها لور .. قربات ليه و قالت :"" شكوون لي سمعونا ""
جاوبها بفقصة و قال :"' هادوك لي ماكانش خااصهم يسمعووها سمعوووها لمك ..""
شافت فجنابها و قالت :"" باسم الله الرحمن الرحيم .. اخويا علامن كاتهضر .. شحال من مرة كانقول ليك ماتبقاش شاد تيلي فالحمام و تنسا راسك تما راك غاتشير .. هانتا تشيرتي دابا اش غانديرو فيك اه .. ""
شاف فيها زياد و قال :"" الاء راه غانشقلب مك ""
قدمات ليه دقنها و قالت بتهديد :"" ماتجبدش مي على فمك ""
خمج ليها وجهها و قال :"" مك كانت مي قبل ماتزادي البرهووشة ""
جاوباتو بغيظ و قالت :"" انا مااشي برهووشة .. البرهوش هو انت لي داير فيا راسك ""
زياد :"" اذا كاتعتارفي بلي انت برهوشة ""
هزات عينيها كاتدورها فراسها شوية و رجعات قالت ليه :"" على الاقل انا جات معايا و باقية صغيرة .. كيتك انت لي قدك بولادهم باقي تناغر مع ختك الصغيرة .. دابا من الاخر اشنو درت ليك حتى تغاودتي معايا دابا ""
جاوبها و قال :"" وااااااالو .. مادرتي وااالو غير ضيعتي عليا حتى داك 0.0001 فالمية من الامل لي كنت منشيت بيه ""
جاوبت و رجعات كتاكل و قالت :"" ماعليش .. غايتزاد 0 اخر و تسنى لعل الفرج قريب ""
جاوبها و قال:" تشهيت نهز شي طوبيس و نخبط مك بيه ""
جاوبت و قالت :"" اوى حرررررربش تحط صبعك عليا ""
شاف فيها .. حط صبعو فحنكها و هي تطير عليه ..
زيد كان حداهم .. حط البيسي من يدو سدو و دار يدو بين عينيه لي غمضهم .. و هاذي حركة كايظيرها ديما منين كايندم على شي حاجة .. و الحاجة لي نادم عليها حاليا هي كونو اخ هاد 2 مصائب ذات افواه ...
وقت العشاء ..
جالس زين العابدين كايتعشا مع امو و اختو و كايدردشو ..
قالت شيماء:"" اوى اشتي .. ها هما 3 الخدامي عيطو ليك فخطرة .. و انت تظل تبرغم و تشكا من النحس ""
جاوبها و قال :"" حتى لدابا باقي مافهمت كيفاش هاد النهاار خرج بنتائج مزيانة بحال هاذي .. خدمة و بركة ديال الفلوس واخا علاين يمشي ليا بيسي ديال الدري ""
جاوباتو عائشة و قالت :"" وا حمد الله و سكت .. ""
جاوبها قائل :"" اللهم لك الحمد .. ""
كانت الاء فبيتها متكية سهرانة مع الدراما الكورية كيف عادتها حتى دخل زياد .. سد الباب و تكا حداها فالسرير ..
بقا لمدة ساكت و قال :"" شيماء .. كيف كاتجيك ""
كان السكات فالمقابل .. هز عينو شاف فيها لقاها حالة فمها فجونغ سوك .. عطاها بقبضتو لقلقولتها حتى شظاتها و قالت :"" واااا اااي الحمااار درتي ليا ارتجاج .. اش باغي ""
جاوبها :"" واش انا كانهضر معاك و انت حالة فمك فالشينوا ""
دارت يد على يد فوق خصرها و دورات وجها معوجة ملامحها و قات :"" هاااهي سييرة الشينواا لي ماكاتقاااضااش... اش بغيتي اخويا ... ""
زياد :"" قلت ليك شيماء ... شنو رأيك فيها ""
جاوباتو :"" شكون شيماء .. بنت جيران ""
جاوبها :"" اه ""
جاوباتو :"" كيف كاتجيني .. ضريفة و زوينة .. ماكانعرفهاش مزيانة .. ببناتنا غير الصواب صافي ""
شاف فيها و قال :"" غانطلبك طليبة ""
جاوباتو :"" اشنو هي ؟ ""
جاوبها :""تصاحبي معاها .. و تقربي ليها ""
طفات البيسي و شافت فيه خارجين عينيها :"" هااااا هادشي علاش ناويين تزيدو طبقة ... بيتذااكرووو من وراااياااا ""
جمعها معاها بتسمقيبة للراس و قال :"" هاديك اه .. هنينا خلينا نهضرو بحدية شوية ""
رجعات لبلاصتها و قالت :"" مزعووط فيها ؟""
جاوبها و قال :"" كاتعجبني من شحال هاذي و بغيتها للزواج .. اش بان ليك انت ؟""
سكتات شوية كاتفكر و قالت :"" ماعرفتش اخويا انت ادرى .. راه انت لي غاتزوج ""
جاوبها و قال :"" واييه و لكن .. كيف كاتجيك شخصيتها واش مناسبة ليا كيف كانشوفها انا ؟""
جاوباتو و قالت :"" انا ماكانعرفهاش و حتى انت .. و بنادم ماكاتعرفو حتى كاتعاشرو .. ""
جاوبها و قال :"" اوى داكشي علاش قلت ليك حاولي تقربي ليها تصاحبي معاها .. و من بعد حطيني ليها فالصورة ""
عاودت جلسات قدامو و قالت :"" اشناهو دابا فاخر ايامي غانولي مرسول الحب .. ندي خبارك و نجيب خبارها .. هاد الحزاق ماشي الستيل ديالي ""
آلاء و المنحوس الجزء الثامن
محتوى القصة
التنقل بين الأجزاء