قطع عليا😦 ناري قطع عليا ... صافي هانا جبتها فراسي ... ناااري قطع !!
الطريقة باش هضر معايا كانت معصبة بحال الى طلع ليه الزعاف مني .. صدمني ! وعلاش معيط مللي غيقول ليا هاد جوج كلمات ويقطع ... اففف ، تقلبات عليا العشية وكحلات عليا ... قلبي تقبط وكي ندير دابا ... منقدرش نمشي نهضر معاها وعزت نفسي مابتسمح لي و مغاديش يعاود يرجع ... قطعت الخبل بيديا وبالتفرعين اللي فيا .. واخا حتى الى مشيت عندو برجليا غادي يهز خنافرو ويتكبر عليا ... شنو ندير دابا وانا اللي وحلت راسي بيديا ، جاتني البكية ... تلفت حتى على الدار ... ماعرفت منين ندوز حتى الطريق مابقيت عرفت فين هيا غير غادية كنخمم ودايخة بوحدي .. اللي شافني يسحاب ليه تسطيت ، وصلت لدارنا ماعرفت حتى منين دزت .. هقلي ما معاياش ، طلعت لقيت عندنا الضياف ، خالتي ورجالها وبنتها ، وقفاتني ماما فالباب باش ندخل نسلم عليه وانا مدور فيها بلا منحس
صوفيا : مافياش .. ماباغا نهضر مع حد مايهضر معايا حد
زدت وخليتيها مصدومة ، دخلت لبيتي سديت عليا وجلست نبكي حتى طاب قلبي وطابو عينيا ، عييت نخمم وهقلي كيقول ليا ... صاافي نساي شي حاجة سميتها زين الدين ، منقدرش نساه .. منقدرش وحتى كفاش هضر معايا بقا فيا الحال . بقيت مخشية فالبيت مابغيتش نخرج بمرة ... عياو فيا نخرج ننعشى قلت ليهم مريضة ، ماباغا نشوف حتى واحد ولا نسمع لشي واحد ... صمت ديك الليلة ماكليت ماشربت ... بقيت هاكاك حتى صبح الحال .. حليت عيني وبقيت ففراشي مانضتش
. دخلات عندي ماما طلات عليا قلت ليها وجع الدم وجاتني مخربقة هاد الشهر .. باش متهولش عليا ... خلاتني حيت عارفاني فاش كتجيني مكنحمل نشوف حتى شي كمارة ... مخرجتش النهار كامل ... وحتى زين الدين معيطش النهار كامل ... زيد مهار على نهار رجعو يوماين .. من مور يوماين ولات ربعيام .. حتى دارت السيمانة ... كنمشي ونجي فالدار مكنضحك ما والو . . . حتى الهضرة نقصات عندي ... مع جوايه المغرب جالسة ساعيا فالتلفازة كنتفرج وهي دخل ماما من الزنقة وجات نيشان جلسات حدايا وبدات تسوط .. بقات ساكتة شحال وهي تقول
ماما: ايوا راه جاو فيك الخطاب
بلا مندور قلت ليها : ماخصنيش
ماما : زاش عرفتي شكون بعد؟
صوفيا : يكون يكون حتى البندير ماخصنيش بيه
ماما : حتى يانا داكشي اللي قلت ليهم ... عرفتك ماتبغيش .. واصلا مزوج وعندو ولد شفت
فيها مخرجة عيني : شكون هادا!!!
ماما : خال سارة ، عاد دابا خرجت من تما .. قالت ليا راه هضر معاها خالها عليك ... ايوا قلت ليها لا ميصلاحش .. حتى خوك مابغاش... السيد مزوج و والد .. وانا بنتي عزبة ماعندها مادير بالضرة
صوفيا : خليييني ... بغيتو واخا يكون مزوج 4 ... شتي دابا غير عولي نتزوج .. هنا غنبقى حتى نشرف انا ونتي ومتعاوديش تجيبي ليا شي واحد ولا غنطج من هاد الدار ماتعرفيني فين زدت .. مال هادوك اللي مزوجين السواعدة و واخدينهم هما الثالتات والرابعة حسن مني!!! ...
هادا بخيرو وخميرو حسن كاع من هادوك اللي باقيين بلا زواج .
نفخات على وجهي وخرجات خلاني كنهضر بوحدي ... رجعت تلويت فالكاشة .. غنعتاكف فهاد البيت .. وغندير اضراب على الطعام ..يا أما يزوجوني بزين الدين ولا نموت ليهم هنا .
بقيت هاكاك .. ماخرجت ماتحركت .. حسيت براسي جاني الجوع وانا والجوع ماعمرنا تافقنا ... نضت شفت الساعة لقيتها 1 دالليل .. خرجت من البيت وسط الضلام كنتسلت جيهت الكوزينة .. طليت على الصالون بان ليا خويا عاطي وجهو للحيط وكيهضر فالتليفون بشوية ... يعلم الله علامن كاكيدب .. كوراه جالس على شي وحدة عندنا فيلا وبا عندو كاط كاط وانا عندي ميرسيديس وخوتي فالخارج ... وخدام عليها بالحب والغرام وهوا ولد الحرام كل مرة نحصلو جالس مع وحدة فشكل فشي قهوة ، وصلت للكوزينة كنقلب واش خلاو ليا ماناكل ساعة والو . الريح داز من هنا ... غسلات كلشي حتى قطرة دالمرقة ماخلاتها ليا ! زعما راني غضبانة خاص يخليو ليا حقي ... على عائلة كي دايرة ، حليت التلاجة جبدت واحد القرعة دالشكلاط وشديت طرف دالخبز .. بغيت نقول نص خبزة ودهنتها وتهزيت واحد الكاروطونة دالحليب تحت باطي ورجعت قاطعة الحس شادة الخبز فيدي ومعنقة الكارطونة ... دزت حدى البيت دبابا وماما وانا نشوف الضوء مزال شاعل .. قلت نشوف شنو كايقولو باينة الهضرة عليا وماتكون غير عليا ، حطيت ودني كنسمع ولقيتهم نيت داويين فيا ... بقيت مزاحمة مع الباب ومعصرة باش نسمع كلشي وانا نسمع بابا كايقول
بابا: ايوا هضر معايا هاد النهار ... قالك يسكنها بوحدها ... ومايخصها خير معاه ... وكيحلف ويعاود ... قالي تسكن فقنيطرة وعاود ليا المشاكل اللي عندو مع المرى وباغي يطلقها
ماما: انا هاااد بنت الحرام مانكون غير هي اللي كلات مخو
بابا : هء ... باااينة ... راه تكون هضرات معاه وطمعاتو وقالت ليه قابلة داكشي باش جا ... شفتي هاد البنات ديال اليوم ... مافهمتش اش بغاو ! خلات العزارة ومشات لواحد مزوج .
ماما: عنداااك تكون هي اللي قالت ليه طلق المرى .. والله حتى نعلقها
بابا: هوا قالي باللي المرى راها فدار باها ديما جالسة عندهم ... وقاااليا ماشي على قبل صوفيا ولاكن راه هوا اصلا باغي يطلقها ... ولاكن مزال غنسول ونشوف .. الى كانت هي اللي قالت ليه طلقعا واجي تزوجني هاداك هوا النهار اللخر ليها ... اما الى كان عندو المشاكل مع المرى وكان باغي يتفك منها وبغا صوفيا منزيدو غير الخير
ماما: بتعجب ) مكتعرفيهش!!!! بااااز غير جا ولسق عليك .. ونتي حتى نتي سبحان الله طاح حبك عليه
حشمت ... حشماتني .. علاش كتهضر معتيا فالحب علاااش .. علاش كتهضر معايا قدام بابا هاكا .. ماكرهتش نقول ليها هادشي فالوجه ولاكن عندها الزهر حدانا بابا اما كن نضت نطرطق فييها عيني ونقول ليها فردااااااااكت الرمانة مع زين الدين .. دابا يا أنا تزوحيني ليه ولا نفضحكم . حسيت بتسرفيقة هبطات عليا فيقاتني ... لالا ماتسرفقتش غير كنت كنتخيل .
ماما: كيفاش ماكتعرفيهش ؟ وعلاش هاداك بالضبط
بابا: ششش ... خليها تهضر .. نعرفو شنو كاين ... هضر ابنتي ..راه بغينا ليك غير الخير ... قولي لينا الصراحة وشنو بينك وبين داك السيد
بقيت ساكتة شحال وانا نطق كنفيبري كي نوكيا بيل
صوفيا : هوا شافني فالعرس د عماد .. عمرو هضر معايا حتى لواحد النهار قالي بغا يهضر مع با .. سولتو وقالي باغي ... باغي ... (بلعت ريقي) باغي
ماما: باغي يبغبغ .. بغبغاء !
صوفيا: باغي يتزوج بيا
بابا: ايوا .. زيدي كملي
صوفيا: قالي مزوج وعندو ولد و .و .ووو .. ووو يطلق
ماما: ماتكوني غير نتي اللي بغيتي تفرقيه على مرتو
شفت فيها باغا نبكي وكنحلف: والله ...
ماما: بحدة ) سكتيييي ... بان ليك غير الراجل مزوج مشيتي عندو ... على قلت الرجال !!! هااا... بان ليك غير هاداك ؟ كبر منك وبولادو وتركيتو باغا دخلي عليهم نتي كي الفياضان ... راه غادي يتزوجك ويجيب عليك المرى بحااال اللي بغا يدير دابا على مرتو
بابا: واش بغيتيه؟
شفت فيه بنص كنحرك راسي بالايجاب وخايفة .. ماحسيت غير بالصندالة جات فيا ارض جو الطول فالعرض طبعات ليا وجهي
ماما: ينعل وااااالديك ... بلا حشمة بلا حيا ...
ماهليتهاش تكمل ونضت كنهرنط كي الحمار ونبكي وخرجت فيهم طول وعرض وكنحك فالدقة اللي عطاتني .. خبزي وحليبي فيدي وكشاكشي خارجة .
صوفيا : ياااا اما نتزوج بييه ولا نتااااااحر ... نتاااااحر مااااع ونتهنا .. شنووو فيها راااهم مزوجين 10 وانا مااااالغيت حتى وااااحد يا أما زين الدين ولا بلاااااش ... شي نهار تلقاوني ميتة
خرجت خليت ماما خالة فمها وبا شاد فراسو
ماما: زين الدين يا بنت الحرام ... زنزن يااامك يا قليلت الترابي
سدو ليا الشهية .. الله ياخد فيهم الحق .. سديت عليا فبيتي وربعيت رجلي كنخمم .. بدا التيليفون كيصوني ليا .. جريت عندو هزيت وانا محنية على ركابي مزال حتى ماقدايت الجلسة جاوبت
صوفيا : الو
زين : الو حبي ...
حبي!! ها العار راه اللي فيا كافيني متكملش عليا حتى نتا مافيا اللي يتحاب وهادشي مراصيش ومزاكل ونزيد نغرق كتر ما انا غارقة ... صبر حتى نتلاسقو وارا ما نتحابو اهىء اهىءاهىءاهىء
زين : لا حتى واحد ما غيقولها ليها ... داكشي بيناتنا واصلا هما مابغيينهاش تعرف وباغين نعاود نتزوج مرة اخرى ... خصوصا فاش قلت ليهم عليك بغاوك وغدا غتجي ختي الكبيرة وخواتاتي لخرين عندكم للدار باش يهضرو مع ماماك ... وانا غنعاود نعيط لباك نهضر معاه
صوفيا: وشنو فيها الى عرفات مرتك دابا ؟
زين : لا مابغيتهاش تعرف ... ماتعرفي شنو يقول ليها راسها .. خلي حتى نتزوجو بعدا ... بغيتها تشلل فاش تعرف .. اما دابا تقدر دير شي حاجة ماشي هي هاديك
صوفيا : وعنداك شي واحد يوصلها ليها
زين : مكاينش اللي غيوصلها ليها ... واش حنا براهش! خوتي كبار بعقلهم ماشي ديال هادشي وزايدون هما بغاوك ليا وكيدفعوني نتزوج .. واصلا ماباغينهاش تعرف حتى نديك لداري وضرب راسها ديك الساعة مع الحيط ... الى كانت كتسنى نمشي نرغبها كما موالفة انا غنوريها الرغيب كي داير
صوفيا : والة مابغاوش دارنا
زين : ان شاء الله غايبغيو ... قبلي غير نتي ... وعائلتي غدا غايجيو عندكم وباباك على حسابي
صوفيا: واخا ... شوووف .. عنداك تخستب ليك راسك لاسقة فيك ! ولا بغيت نطلق على مرتك !
هزيت الحلوى سديت عليها فالفران ... مشات ليها ماما بغات تقطع منها وانا نصعر وهي ترجع اللور كتسب فيا مخلاتش ليا .. المهم ماقرباتش للحلوى .. بقيت جالسة فالكوزينة ماخرجتش .. عساسة على حلوياتي اللي غنحط للناس فاش يدخلو
بقيت عساسة على واحد الكرسي فالباب دالكوزينة وكنقي فكاوكاو باش نحمرو ونكورو مع الشكلاط ... اللي دخل كنوض معاه واخا يكون داخل يشرب ... فيا البولة وحابساها خفت نخرج ونرجع لقا البرد كيسوط فالطاوات ... شنو ندير نبقا هارجة داخلة بكيكاتي خايفة عليهم! شفت حتى عييت ونضت هزيتهم بتلاثة دخلتهم لبيت النعاس حطيتهم مغطيين .. وحدة عادية بالشكلاط و وحدة فالتفاح واللوز والكركاع والتمر من لفوق معسلة و وحدة بديسير بارد ... انا ومشهية ندوق وجامعة يدي عندي . رجعت للكوزينة كملت على داك الكاوكاو ودرت ليه الشكلاط حطيتو فكويغطات يبرد فالثلاجة ومشيت لبست جلابتي نيشان لواحد باتيسري شريت ليكاطو سواري من فلووووووسي ... حتى واحد ماعطاني شي ريال كلشي خرج من جيبي ... ها بيتبان ها لحلوى ها الكاطو .. كنوجد ونقول شي ماوجدتو . دخلت داكشي كامل لبيتي وماما كسايقة ليا خبار اش كندير ... كتشوفني غير كنعجن ونخبز وتخنزر فيا بحال الى سارقة ليها راجلها ليها ! دخلت للدوج بالزربة خويت عليا الماء ولبست بيجامة نقية فاغوز وجمعت شعري عادي ومشيت جبدت عينيا بالقلام كحل وريسيل ودرت ريحة . سمعت الدقان ونضت كنجري خبيت ماما فالكوزيتة كتعمر اتاي وتصايب القهوى .. واخا هاكاك مارضاتش تبقى جالسة ماتحط والو للناس وهي ديجا مناسبة معاهم .. بزز منها ابتاسمات واخا مكراهتش تقجني ، فتحت الباب وبداو يدخلو وحدة مور وحدة ! وناري واش هاد زين الدين مسيفطهم يخطبو ولا يتبراو مني! خمسة دالعيالات تبارك الله كل وحدة تقول ليا ماعرفتي والو فالطول والعرض ! استقبلتهم فالصالة وجلست معاهم دايرة فيها مافراسي والو زعما .. كنضحك ونهضر عادي ودايرة فيها متبتة ومرزنة وناشرة زيني ... ماكرهتش كن كانت قدامي شي مرايا نشوف راسي كيفاش كنضحك وكفاش كنهضر .. واخدة جميع الاحتياطات ديال الرزانة والتباتة ... شوية دخلات ماما بواحد القميص خفيف ومحيدة الفولار .. مع مقطعة شعرها كي الولد .. سلمات عليهم كاملين .. داخلة هي اللخرة بحال الى جايين يخطبوها هيا! حدها قرساتني ففخدي نكحز وانا نوض درت بناقص ... مشيت للكوزينة وبديت نجيب ونحط ليهم ... اشمنك يا مسمن .. اشمنك يا رزيزة (شريتها طالعة) اش منك يا بغرييير و حرشة وكاطو وحلويات سواغي ... عاد بديت نحط ليهم فكيكاتي بثلاثة والكاو كاو بالشكلاط ... ماما بقات غير حالة فمها ... اول مرة فالتاريخ ويشهد عليا هاد النهار .. صوفيا وجدات هادشي كامل بوحدها وبفلوسها وفرحانة من الفوق .. انا هي ميمونة اللي كيغنيو عليها .. بغريييير والحرشااا هي فطوور وغدااا .. ميونا لذة هياااااا ... لهلا يخطيني عليا وصافي وتبااارك الله عليا .
جلست بلا حشمة بلا حيا حداهم .. باش نيت نسمع ماما اش كتقول لا تزبلها وتخرج ليا على مستقبالي ويمشي ليا كلشي فالزيرو ، هضرات وحدة فيهم وقالت
السيدة : تبارك الله عليك اصوفيا
قلت ليها حشامة وعارجبني راسي : ربي يخليك احبيبة
ماما غير كتشوف فيها بضحكة صفرة ومكمشة دوك القنانف .
السيدة : ايوا حنا جينا طالبين فبنتك الاللة فتيحة لزين الدين خويا
حدرات راسها ماما حشمانة وانا كذلك وقالت ليها
ماما : ايوا مرحبا بيكم ... ولاكن ابنتي راكي عارفة .. خوك راه مزوج ... ايوا كي غايدير لصوفيا ؟
هضرات وحدة اخرى : لااالا .. مامزوج ما والو ... حتى هاداك يسميوه الناس زواج ! واش اللي تمشي تسكن عند واليديها وتخلي راجلها وماطيب ليه حتاااا وكان ترشق ليها .. يا 11 دالليل يا 12 ! هادي مرى هادي ! باغا ديرو تحت السباط وكلمتها هي اللي تمشي .. ماتحتارم راجلها ما توقرو ... يا حسرة كلشي موفر ليها وماخاصها حتى خير ! عاءلتها تعرض عليهم وعاءلت راجلها ماتحملهم ما تقبلهم يمشيو عندها ! لالاااا هادي غير تبقى عند واليديها ومها اللي مضسراها وخدامة تزيد فبنتها للعافية .. هاوا غادي يخليها ليهم فمرة مشيا بلا رجعة ... مي الله يرحمها اللي كان يدير ليها الخاطر و صبارو على قباها مشااات عند الله ... مكاين اللي يقول ليها سير رجعها ولا يحلفو ويخليه يجيبها ... هي مافراسهاااش كان كيرجعها على وجه مي مسكينة .. رااااها كتسناه يمشي يرغبها ... غايطلق الزمر حنا ماحملناها ما قبلناها على هاد الفعايل ديالها وبغينا نزوجو خونا يعيش حياتو ... الشرع عطاه 4 علاش يبقا صابر لوحدة سايط ليها الريح فمخها
بقات ماما غير ساكتة كتسمع .. كلهم كيهضرو ويعاودو ليها وهي ساكتة ..شوية قالت
ماما : ايوا دابا نفرضو تزوجات ... غتبقا ديك مرتو تحكر عليها ودير ليها المشاكل
هضرات وحدة : حنااا عاارفينها كي دايرة ... معندها مادير وحررر بش تقرب جيهتها ... راني عندها على سبة ... نكررها فالجواج و مايجي منو ... دابا زين الدين قالك من صوفيا نخلاق ... يبيع اللي وراه واللي قادمو
وحدة اخرى : زعما زين الدين ماشي شي واحد اللي يدير حالة على شي بنت ويبقا لاسقها وتابعها باش يتزوج بيها ... راه ما جا عندنا قالها لينا وقالنا نجيو حتى وصلات فيه للعضم ... (ضحكات) السيد غيتسطى اخللتي خبينا نضربو الكحل فالابيض ومايكون غير خاطرك
بدات ماما كضحك وانا تزنكت .. واحد الراس كيقول ليا نمشي نحيد من حداهم نحشم على وجهي وواحد الراس شادني خايفة ماما تعورها
شفت فيها دايرة لهز راسي زعما : ايوا الى كان ولد الناس ويعطيني حقي ويقدر قيمتي علاش لا
هضرات وحدة اخرى : ولاكن حتى نتي عطيه حقوقو .. وقدري قيمتو ... الى بغيتي تعيشي مرتاحة تهلاااااي فراجلك ... علاه دابا هادي كن كانت عارفة بقيمتو كان غيفكر يتزوج ! عمرو يفكر يديرها ... ايوا حتى نتي تهلاي فيه وهوا راه ميخصك معاه حتى خير ... وراه شااارب عقلو ماشي دري صغير عاد غيبدا زوج طلق زوج طلق ويبدى فالتبرهيش ... بغا وحدة اللي يكمل معاها حياتو ... ساعة طاح طيحة وحدة على كبرو هههه عمر الحب ماختار بين الصغير ولا الكبير
جاتني الضحكة وبقيت كنضحك حاطة يدي على فمو ... رتاحيت لخواتاتو ... باينين فيهم ضحوكيات و مغانلقاش معاهم مشكل واخا كايبانو مجبدات وملمطات وقادات بشغالاتهم ... كيجي مني ويجيو من خوهم ... كيشكروني ويشكرو فخوهم ... باينة فايكون زين الدين كيفور كي الغلاي دابا ويتسنى فيهم يردو عليه ... شفتو ماعيطش ليا ههه يكون سخف!
بقينا نتجمعو حتى قنعو ماما وقالت : ايوا بنتي وحدة اللي بقات ... خااصنا نفرحو بيها ... يدير ليها دارها فين تسكن بوحدها ومايدخلش عليها الضرة ... يبقا منو ليها حتى يفك حريرتو معاها ... المهم بنتي تبقا بعيدة على المشاكل ... مانبغيش يجيها الصهد من جيهت مرتو
هضرات وحدة: غير تهناي .. تقرب ليا نحش لباباها الركابي ولا عاليك .
ماما : يدير ليها عرسها ... حتى حنا بغينا نديرو لعرس لبنتنا ونفرحو بيها ... راه غتزوج و أول مرة ... نبغيو حتى حنا نفرحو بيها
وحدة اخرى : ماكرهنااااش حتى حنا شي عراسية ... حتى عرسو اللول النص فينا ماحضرتش ومارتاحيناش لديك العاءلة الله يستر وماشطحنا ما غنينا بحال الى جارينا بزز منا . على وجه الواليدة الله يرحمها وصافي
هضرة وحدة اخرى : شتي زين الدين ... هوا اللي السكر ديال العاءلة ... يتهلا فالبراني حسبلاك مرتو
احح خارجة من فمك بحال العسل ، شفت فماما وعبست باش تسكت باااركة من الشروط بغا تهرب الناس يطجو ... غتبقا تهضر حتى تزبلها ويهزو علينا نضرة خايبة .. هما مساكن غير كيضحكو فرحانين ويلبيو فالطلبات ... بغات هاد مي تخرج عليا مافيهاش .. غنقز عليها سكت ليها فمها بشي طرف ديال الحرشة كبير .
بقيت نشوف فيها وهي كتخزر فيا بمعنى خليني نهضر .. جلست كنرجف حتى قلبو الموضوع وداز كلشي فسلام وناضو فرحانين كيسلمو عليا وعلى ماما ، خرجو وسديت موراهم الباب ورجعت غنطير بالفرحة كنشطح ومشيت تلاحيت على ماما بست ليها راسها وهي دفعني
ماما : حيدي عليااا .. هاحنا غانشوفو التللية ديالك معاه ... عمرك تجي تشكي عليا ولا تغضبي عندي .. الى دار ليك شي حاجة سيري رمي راسك فالبحر راه غير قريب بيك تما (قنيطرة) ماتجيش تبكي عليا
أحببته أبيض الشعر الجزء الرابع
محتوى القصة
التنقل بين الأجزاء