داز الوقت و نصبو لعيالات العشا تعاونو عليه باش حتى وحدة ماتحسب راسها خدامة عند الثانية و لينا مازال حابسة راسها فبيتها لابسة الفراشة ، صونا تيلي ديالها هزاتو لقات معاذ و جاوبات بسرعة قبل مايقطع
معاذ: افين ا حبيبة
لينا: توحشتك بب
معاذ: حتا انا صافا ازين
لينا: بلا بيك ماكانكونش بيخير (بصوت منار لي فماتسامحينيش 😑) نتا هو حياتي كانبغيك ا معاذ كانبغيك ا شيغي
لينا: والو غير تفدعت فيدي و دابزت مع خو العروسة و دابزت مع أمين سي تو
معاذ: هم واااو هادشي قليل اش طرا و جرا حتى نقصتي ليوم
لينا: اوا يالاه ليوم وصلنا نسخن بلاصتي و نحمي الطرح
معاذ: كيفاش تفدعتي بعدا و لاش دابزتي مع خو العروسة و أمين
لينا: كنت كانتجسس على جيران و شفت واحد تيتيز و لكن بلا لحية 😑 و بكترة الزين لي فيه سخفت و طحت على حجرة و هو جا عتقني و فاش حليت عيني لقيتو عند راسي و كيف شافني تبهر بجمالي (بصوت المغنية أحلام لي كانت ف أراب أيدول) انا جمالي جمال طبيعي غيرانين من الملكة لمهم شافني و عجبتو و هو يقوليا لينا تقبلي تتزوجي بيا و انا نشوف فيه بكل حب و انا نقوليه ... بغيتي تعرف اش غانقوليه !
معاذ: اه اوا قولي
لينا: نهاية الحلقة حتال الحلقة القادمة
معاذ: يخ على حامضة واتي دوي قولي اش طرا ليك شحال فيك ديال لكدوب و شحال من سيناريو كاتألفي فثانية
لينا: اوا شفتي انا موهبة ضائعة
معاذ: وا زمر قولي اش وقع
لينا: وا والو طحت و تفدعت فيدي و بالنسبة لخو لعروسة هو الصحافي العوج لي عفط عليا قطع ليا الصندالة
معاذ: ديال 300 درهم
لينا: اه هاديك باقة مادازتش ليك 😂
معاذ: قولي لاش دابزتي مع أمين 😒
لينا: اوا يا سيدي انا و داك صحافي العوج بدينا كانتسابو كنا علاين نتشامو الكراصن و لكن جا داك أمين خاصم عليا و جرني قدامهوم و سمعني خل ودني و بقا فيا لحال حيتاش هو لي جبدني و خاصم عليا انا
معاذ: واييه درت الساعة باش نقرقبو الناب شوية الدار خاوية بلا بيك
لينا: توحشتيني ياك
معاذ: توحشت نضربك حتى تسيل خنونتك
لينا: ههههههه اش خبار لحيبان ديالك
معاذ: ا a ! اشمن حيبان
لينا: بغيتي الضوسي واخا ماشي موشكيل مريم القاسيمي تولدات ف أكادير و كبرات فأكادير عندها 24 بحالي معلمة فمدرسة المجد البريفي لي حدانا كاتقري الإبتدائي ..قصيرة كاتدير لفولار ...حنطية كاتلبس المستور داخلة سوق راسها عندها خوها صغير صافي و واليديها دافعة للتعليم باش تدوز الإمتحان و نتا داير ليها فتيلي Mon amour و هي دايرة ليك فتيليفون أشكم مبلية بالتواركة بزاف لدرجة الا هضرتي معاه مرة مرة كاتفلت ليها ديك ايفيت ولا يوك ولا جَنَم نزيدك ولا نحبس
معاذ: خدامة مع الإف بي آي
لينا: خدامة مع الإحضي آي نفس الخدمة غير انا خدامة بوحدي و مصادري موثوقة %100
معاذ: تعقد ليا لسان بالصدمة و الله
لينا: عارفة بب i am the best
معاذ: باي حتا لمن بعد حتى نستوعب بعدا
لينا: خود وقتك بب باااي (قطعات)
قطعات المكالمة و على وجهها ابتسامة فخر حاسة براسها دايرة انجاز كبير ، قاطع افكارها صوت الدقان لي فالباب
السعدية: لينا هبطي تتعشاي
لينا: لا مابغيتوش وكلو غير ناسكوم
السعدية: الله يهديك ا بنتي واش غاتجوعي راسك على قبل التخربيق هبطي هبطي
لينا: (ضوراتها فراسها) ايه عندك الحق كرشي اولى (وقفات قدام لمرايا كاتقاد شعرها) اوا صافي يمشيو يخراو نهبط نقسي هي لولا و ندفع كبير اوا شنو مالهوم غايقطعو ليا الضو ولا لما ... نخرج لمهوم جبهة و نجلس
السعدية: اويلي تي تسطيتي كاتهضري بوحدك
لينا: غير سيري انا هابطة اجي بعدا اش درتو لعشا
السعدية: اللحم بالبرقوق و شلاضة دياال الخضرة ديك لي كاتعجبك
لينا: درتو بطاطا فيها مايونيز
السعدية: اه كترتو ليك كاع فيها غير هبطي ا بنيتي
لينا:واخا صافي انا غير نعكر و نهبط
السعدية: ضاروري تعكار بحال الشيخات
لينا: اوففف بدات تاني
هبطات السعدية كاتنكر و بقات لينا فالبيت عاودت العكر القهوي ديالها و دارت الريحة المفضلة عندها la vie est belle و لبسات شربيلها و خرجات هازة راسها عاجبها راسها كاتمشا بتبختر و كاترمش بشوية ... دخلات عندهوم للبيت لقات عائلة لعروسة جالسة و يونس جالس حتى هو ، شاف فلينا و حتى هي شافت فيه و ابتاسمت مجاملة جلسات حدا هند بالتباتة و كاتدير الشوفات بالقياس طالقة زينها و كاتشوف فلي قدامها
لينا: سمحو ليا قبيلة ماتعرفناش بطريقة زوينة انا لينا بنت خالة أمين و نتوما
حسن: انا حسن خو رانيا لكبير و هادي مراتي رقية و هاداك لي فالقنت هاز تيليفون خويا لي صغر مني يونس
لينا: متشرفين
رقية: متشرفين
لينا: و شكون هاد لفنيكيش
رقية: هادا ولدي أنور
لينا: الله يخليه ليك
رقية: اميين
رجعات تبتات دايرة رجل فوق رجل و كاتدوز السكانير غير بالقياس فالصالون كامل .... بعد وقت لابأس به دخلات رانيا هازة طبسيل ديال شلاضة بالخضر و الروز و الخص و الخيار داكشي مشكل و زوين دايرين فيها الطون و المايونيز ... حطاتو فوسط الطبلة و تبعها أمين حط الفراشط و الضحكة واصلة ليه حتال المخيخ ... جلسات رانيا بجانب رقية و جات السعدية و خديجة جلسو فبلايصهوم
ناضت لينا و هي باقة ماحطاتش حتى الدغمة ففمها .... بلعاتها و مشات للكوزينة جابت طبسيل و رجعات لقات بلاصتها جلس فيها أمين و بلاصة وحدة لي بقات حدا يونس
لينا: فين غانجلس ?
أمين: جلسي حدا يونس
بتاسمات ليه بزز و دارو ليها الطريق حتى جلسات حدا يونس و جمعات رجليها عندها و هو مفارق رجليه هاز فورشيط كاياكل بيها ... هزات فورشط و بدات كاتجمع فالبطاطات العامرات بالمايونيز و كاتاكل و شوية تضور للروز لي فيه الطون و تاكلو .... صمت ساد المكان كايتسمع غير صوت التقرقيب مني كاتلاقا الفورشيط مع الطبسيل ... حسات لينا بالإنزعاج و هي تهز راسها شافت لقات راوية كاتشوف فيها بنظرات بحال القرطاس حيتاش مازال ماتسرطات ليها الخدامة هي مك و كاتعجب فالجرأة ديالها حيتاش بعد المشكل هبطات تتعشا معاهوم ... حرك يونس رجليه و هي تقيس لينا فرجليها و هي تبلع بطاطا لي كانت ففمها حيتاش رجليه باردين ... كحزات رجليها هرباتها و هو كذلك و الإنزعاج باين عليهوم بجوج و حد ماسايق لخبار حيتاش هادشي طاري تحت لاناب. كملو شلاضة و هز أمين الطبسيل هو و الفراشط داهوم و جاب طبسيل فيه اللحم و البرقوق داكشي معسل و سخون كايشهي ... حطو فالوسط و موراه رانيا جايبة شبيكة فيها الخبز ... دوزو لخبز بيناتهوم و قطعوه و طاحو فالطبسيل كاياكلو و لينا كاتشوف فيونس بنص عين و كاتشوفو كيفاش كاياكل ماكاين بو قياس ولا ايتيكيت طاح فالطبسيل ماناضش فمو عامر و الدغمة الثانية كايوجد فيها فالطبسيل و كايقطع الخبز باش يوجد الثالثة ، ضورات وجهها و بدات كاتاكل بالتباثة قدام الناس و كاتفادا تشوف فيونس حتى كملو عشاهوم و جابو الديسير هزات لينا غير بانانة كلاتها و ناضت جمعات معاهوم الطبلة و طلعات لبيتها بدلات حوايجها و مسحات لماكياج و تخشات ففراشها و بسرعة نعسات
شرقات الشميسة و بنورها ضوات المدينة و دفات الدنيا و فيقات الناس و لكن لشدة تعب لينا مافاقتش حتى جات السعدية كاتفيقها
السعدية: لينا نوضي ا بنتي
لينا: امممممم
السعدية: نوضي ا بنتي راه غانخرجو
لينا: (مبوقة بالنعاس) فين
السعدية: نضورو فالمدينة
لينا: (حلات عينيها و حكاتهوم) واخا صافي
السعدية: عنداك ماتنوضيش
لينا: لا صافي
خرجات السعدية و تقلبات لينا على الجهة الثانية حالة عينيها كاتستوعب اش طاري ... تنهدات و ناضت وقفات هزات لاطروس ديالها و خرجات لابسة شورط حد الركبة مطراسي فورمتها مع ديباردور ديالو فالموف و شعرها مجموع شفنجة مهملة ... مشات لطواليط بان ليها فيها الضو عرفاتها عامرة و بقات واقفة كاتسنا عينيها منفوخين و مقلوبة بالنعاس ... سمعات لباب تحل و ضارت لقات يونس خارج من الطواليط فازك بالما و مرجع شعرو للخلف بالما و عينيه منفوخين بالنعاس لابس شورط حد الركبة و تيشورت و كلاكيطة فرجليه ... طلعها و هبطها و بسرعة قلب وجهو و مشا ... عوجات هي فمها و دخلات لطواليط قضات حاجتها و غسلات وجهها بصابونتها و حكات سنانها و خرجات فطريقها لغرفتها دازت من حدا بيت مردود بابو بدافع الفضول طلات و هو يبان ليها يونس واقف كايصلي لابس فوقية بيضة ، وساعو عينيها بالدهشة و كملات طريقها
لينا: حتى لكفار ولاو كايصليو عجيبة هادي
دخلات لبيتها و حطات لاطروس ديالها و مشات للفاليزة ديالها جبدات سالوبيط ديال جينز بلا كمام ... حيدات بيجامتها و لبساتو و جبدات صباغتها الحمراء و صبغات يديها و رجليها و جلسات كاتسناها تنشف حتى دخلات عليها السعدية
السعدية: كايصحاب ليا مازال مافقتيش
لينا: لا فقت و لبست و صبغت
السعدية: و معرية لكتاف
لينا: الصهد قتلني بالسيف مانعريهوم ... اجي وجد لفطور
السعدية: غانفطرو برا غانديو داكشي لي خاصنا لواحد الجردة و نجلسو نفطرو تما
لينا: اكيد أمين لي قتارح لفكرة
السعدية: اوا بغا راوية تنسا داكشي لي درتي لبارح
لينا: قولي داكشي لي دار ولدها ماما بليز مافيا لي يتناكر الصباح هادا لمورال طالع خليه طالع
السعدية: هاهيا ساكتة حتى يجي باك هو لي كايعرف ليك
مشات السعدية لفاليزة ديالها جبدات سروال جينز مع قميجة شيبية كبيرة و واسعة ... لبساتهوم مع فولار فالشيبي بين لون عينيها الخضرين ، هزات صباط اسود بلا و خرجات من لبيت ... نشفات للينا الصباغة و ناضت جبدات صندالتها البيضاء و سنيسلة ديالها دارتها فعنقها و مشطات شعرها و جبدات لبوكلي ديالها و بوكلات شعرها بالخف و طلقاتو ... دارت كلوس غوز لمع ليها شفافها و هزات نضاضرها و صاك اسود صغير هزاتو بالصمطة ديالتو الطويلة دارت فيه شي فلوس و بورطابلها و لكلوس و خرجات من لبيت هبطات للأسفل لقات هند جالسة مفركسة و رانيا حتا هي و حداها رقية و ولدها أنور و راجلها حسن ... سلمات عليهوم و جلسات تقابلات مع الدروج و هو يبان ليها يونس هابط مع الدروج لابس تيشورت قهوي مع سروال باج داير سناسل فعنقو و نضاضر فوق راسو ... جا عندهوم سلم عليهوم و لينا اولهوم مع ابتسامة صفراء ...جات السعدية هي و خديجة و امين و راوية و هوما يخرجو
خرجو برا و مشاو جيهة طوموبيلات ... كاينة ديال أمين و بجانبها كاينة طويوطا كورولا كحلة موديغن زوينة ... طلعات راوية فالطويوطا فالقدام جلسات كاتشوف قدامها و تبعاتها رقية و رانيا جلسو لور و مشات خديجة حات الصاك لي فيه الفطور فالكوفر ديال طوموبيلة ولدها و جلسات لقدام ... جرات السعدية لينا و هند جلساتهوم لور فلوطو و بقا برا أمين و يونس و حسن
يونس: انا راه ماعارفش الطريق
أمين: انا عارفها غير تبعني و صافي
يونس: واخا عنداك توضرنا
طلع يونس فبلاصة الشيفور فالطويوطا و حسن لور و ركب أمين فلوطو ديالو و ديماراها و زاد فالطريق هو لي سابق و موراه يونس
لينا: ديال من ديك طويوطا
أمين: ديال يونس
لينا: شكون سولك نتا
أمين: باقة مقلقة مني (كايشوف فيها من لمرايا)
لينا:(قلزات ليه) هاااك
خديجة: زيديه ا بنتي غير عطيه علاش يقلب
أمين: مالي اش درت ليك ا لواليدة
خديجة: تدار ليك ان شاء الله
أمين: لا حول ولا قوة الا بالله
كمل طريقو بإتجاه الجردة لي غادي يجلسو فيها ... بعد مسافة الطريق وصلو بلاصاو لوطو فالباركينك و هبطو كاملين كل واحد اش هز معاه ... ختارو بلاصة مضللة و عامرة خضورة فرشو فيها حصيرة و جلسو كاملين العيالات مكلفين بالفطور و الشباب مجمعين و يونس و لينا بعاد على بعضياتهوم و هي كاتشوف فيه غير من النضاضر بلا مايعيق بيها حد و كاتعبر فيه .... مشا حسن لأقرب باتيسري جاب كرواصون و لgرص و لباgيط و عطاه للعيالات حطو داكشي فالطباسل بجابنب الخبز و الفرماج العسل املو ... فرقو اتاي و كل واحد هاز كاسو تجمعو على لفطور و كلاو حتى شبعو ورجعو لور كل واحد هاز فيديه كاس اتاي
رانيا: مالك فيديك
لينا: غير مفدوعة فيها
السعدية: فكريني باش نمسدها ليك ليوم
لينا: واخا صافي
راوية: قاليا أمين بلي نتوما شلوح
السعدية: اه انا و ختي شلحات من ماسة
راوية: انا شحلة من إيمينتانوت
السعدية: حدا مراكش بلاد الراجل عندي
راوية: ماتزوجتيش بشلح !
السعدية: لا ختي تزوجات بشلح من بلادنا و انا تزوجت بمراكشي
راوية: خلطتو الدم لا لا ياختي خاص الشلح ياخد شلحة مانتخلطوش معاهوم
خديجة: و اش فيها عادي الا تخلطو العرب مع الشلوح كلنا باشار و بحال بحال
راوية: حنا رباونا بلي الشلح ياحخد شلحة و العربي ياخد عربية .... كون ماكانش أمين شلح ماكانش غايدي بنتي
خديجة: (تقرسات) انا كنت باغة ليه بنت من لبلاد مستورة و جالسة فدارها تقابل راجلها تسمع الهضرة و لكن المكاتيب
راوية: ايييه المكاتيب
قلبات راوية وجهها و خديجة كذلك و تكهرب الجو بيناتهوم و أمين و رانيا كايشوفو فبعضياتهوم خايفين لا يتقلب كولشي و العائلة تقلبها صباط و مابقا لا زواج لا عرس
كملو فطورهوم و جمعو داكشي رجعوه لكوفر ديال لوطو و مشاو كايتساراو على رجليهوم حسن و مراتو و ولدو و معاهوم راوية و خديجة و السعدية و هند غادين بوحدهوم و أمين و رانيا غادمجمعين سابقين و لينا دايرة لكيت و غادة بوحدها و يونس بعيد عليهوم كايهضر فتيلي .... دخلو لسوق و تلفو لعيالات مع الحوايج و التوابات و الأواني المنزلية و كل حانوت كايدوزو فيه نص ساعة عاد يخرجو و لموشكيلة ماكايشريو والو غير كايعدبو مول الحانوت على والو ، عياو الشباب بهاد الحالة لي دايرين امهاتهم و مشا أمين عند خديجة باش يهضر معاها
أمين: الواليدة شوفي انا و الدراري نمشيو لشي كافي حتى تساليو نتوما صافي
خديجة: واخا صافي فاش نساليو غانعيط عليك
لينا: حتا انا غادية طابو ليا رجلي
هند: حتا انا
خديجة: دي معاك لبنات يرتاحو شوية
السعدية: عندك باش تخلصي (جبدات بزطامها)
لينا: اه عندي بلا ماتعطيني
أمين: انا معاها اخالتي و نخليها تخلص!! لا لا
السعدية: اوا صافي اولدي يالاه سيرو و رض ليها لبال
جر أمين رانيا و داها و تبعاتو لينا و هند ... بسرعة غبرو مابقاوش كايبانو لسعدية و خديجة و شد أمين فيد رانيا و غادي كايهضر معاها و يوشوش ليها فودنيها و هي حشمانة حتى سمع صوت راجل
يونس: (جا حداه) خليو مسافة بيناتكوم و صافي راه الزنقة هادي
أمين: هاحنا غير بقا على خاطرك
بعد أمين شوية على رانيا و بقا شاد ليها فيديها و لينا مراقبة لوضع من الخلف و كاتشوف فكل واحد مدة من الزمن و الموطور لي فعقلها كايفكر و كايخمم ... وصلو لواحد لكافي نقية و زوينة فيها لكليمة دخلو لداخل و كل واحد شد بلاصة و لسوء الحظ ديال لينا جات حدا أمين لي مخاصمة معاه... قلبات وجهها بإنزعاج و عينيها محولين حتى هوما و هي تحس بيد ضوراتها عنقاتها ضورات وجهها بسرعة و لقاتو أمين و هو يخشيها فصدرو
أمين: باقة مقلقة مني
لينا:(عوجات فمها) الصممت
أمين: واصافي لي فات مات
لينا: الصمت
أمين: ناري راسك شحال قاصح ياختي
لينا: الصمت
أمين:صافي سمحي ليا (باس ليها راسها) و الله مانعاود
لينا: الصمت
أمين: صافي صافي فهمت ضاروري من شي حاجة باش تسمحي ليا
وقف و دارو ليه الطريق و خرج تحت أنظار يونس و هو يقرب من ختو
يونس: ديما كايدير معاها هاكدا
رانيا: اه راه كبرو مع بعضياتهوم دايرين بخال لخوت
يونس: زعما ماغرتيش
رانيا: نو عادي ماشي برانيا و بحال خوها و بليس هي فشكل عقلها ماشي فدرارو ماكاتسوقش كاع لداكشي و زايدون انا كانتيق فأمين
يونس: هاد الزمان راسك ماتيقيش فيه لمهم رضي لبال و صافي
رانيا: واناري واخا صافي صافي
جا السرباي وقف عليهوم هاز ورقة و ستيلو باش ياخذ طلباتهوم
السرباي: السلام عليكوم اش حب الخاطر
يونس: نص نص كبيرة
هند: عصير ليمون
رانيا: عصير بنان
لينا: كافي كخيم
مشا السرباي بعد ما أخذ طلباتهوم و كل واحد فاش تلاها حتى دخل أمين هاز كرطونة بيضة ديال لباتسيري ... رجع لبلاصتو و جلس حداها و حل ليها لكرطونة ... شافت غير بنص عين اش كاين فالبواطة و هي تقلب وجهها دايرة فيها عزة نفسي مابتسمحليش
حط ليها لكارطونة قدامها فيها حلاوي ديال لاكريم اشكال و انواع و دار عند رانيا كايهضر معاها و نص عينو مع لينا ... صبرات حتى عيات و هي تهز حلوى ديال الشكلاط عضات منها و حطاتها ... شافها أمين و ضار عندها
أمين:(بصوت خافت) صافي تصالحنا
لينا: (شافت فيه) تعاود باقي مانعقلش عليك
أمين: مانعاودش ماتخافيش (باسها فجبهتها)
ترسمات ابتسامة على وجه أمين و ضار عند رانيا و لقا يونس كايشوف فيه بنظرات مامفهومينش ... بتاسم ليه و كمل هضرتو مع رانيا ، جا السرباي حط ليهوم داكشي لي طلبو ... شاف أمين بلب كولشي كونسوما ماعادا هو و وقف السرباي
أمين: جيب ليا نص نص كبيرة
لينا: عرفتي شنو جيب ليا كلاص تشهيتو
سرباي: شحال من بوول !
لينا: بغيت خمسة جوج شوكولا و وحدة فانيلا و وحدة بيسطاش و وحدة فريز
هند: يععع اش هاد شلاضة
لينا: ماشي سوقك ... جيب ليا عافاك هادشي
مشا السرباي و هزات لينا الكرطونة حطاتها فوسط الطابلة باش كولشي يهز منها و هزات هي لحلوى لي بدات منها و كاتدوز بيها لقهوة ... بعد دقائق جا لاكلاص و لكافي و حطهوم ..خدات هي لاكلاص ديالها و شدات المعلقة بدات كاتخلط بيها كاع النكهات مع بعضياتهوم و كاتاكل و مرة مرة كاتشوف فيونس و كاتضور شلا افكار فبالها و فاش كايشوفها كاتبتاسم ليه و هو كذلك.
عيطات ليهوم السعدية حيتاش كملو الدوران ديالهوم فالسوق و ناضو ... جا عندهوم السرباي و تقدم يونس باش يخلص
عطات لفلوس لسرباي و خرجات سبقاتهوم ... خلص يونس و خرج داز من حدا لينا شافت فيه و قلبات عينيها و هو سبقهوم ماتسنا حد ... خرجو كاملين و زادو فالطريق رانيا و أمين شاديين فبعضياتهوم كايهضرو و لينا دايرة لكيت مامسوقاش... بسرعة لحقو على يونس و ولاو غاديين معاه فنفس الخط
أمين: رانيا سيري نتي و هند سبقوني ها انا جاي
مشات رانيا مع هند بلا مايسولوه علاش و مشا هو عند يونس
أمين: مالك ا صاحبي مع لينا
يونس: ماماليش
أمين: اوا الى مامالكش زيد باش نحلو هاد الحريرة لي بيناتكوم
يونس: والله مافيا لي يدوي معاها غير خليني
أمين: على وجهي غير اجي معايا
بالكشايف باش جرو عندها و هي مستغربة مطلعة حاجب مهبطة حاجب
أمين: دابا نتوما بجوج عايشين فدار وحدة ماجاتش تبقاو مخاصمين على التخربيق
لينا: على التخربيق !!! (طلعات حواجبها) قطع ليا صندالتي كاتسوا 300 درهم من غوتشي و حتى سمحي ليا كايقولها بالنفس و كاتقول التخربيق 😡
يونس: حتى نتي تعفرتي ماعرفت اش حاسبة فراسك و نتي دايرة كيف البوطة
لينا: لهلا يحييك انا بوطة يا وجه المحكة من برا هالا هالا و جوا يعلم الله
يونس: أمين على وجهك جيت عندها انا ماغانبقاش نسمع فالهضرة و ساكت
أمين: لعنو الشيطان راه غير سوء تفاهم
لينا:(قالبة وجهها مربعة يديها) يقوليا سمحي ليا بطريقة زوينة و ننساو هادشي
أمين: واخا هاهوا غايقولها
يونس: سمحي ليا
لينا: (شافت فيه) اوكي
يونس: و هي ماغاتقولهاش !!!
أمين: لينااااا
لينا: سمح ليا 😒
أمين: تسالمو
كل واحد فيهوم قالب وجهو و حد ماراضي يتنازل و لكن لينا باش تبين حسن نيتها مدات يديها و بقات كاتشوف فيه .... هبط كواريه و مد يديه سلم عليها
أمين: اوا على السلامة اوففف توم اند جيري على قبل صندالة هادشي طاري
لينا: ماشي اي صندالة
أمين: صندالة غوتشي و ب 300 درهم هههههه زيدو قدامي
مشاو لحقو على لوخرين و أمين كايحاول يخلق جو باش دغيا يتداخلو مع بعضياتهوم و ينساو الخلاف لي بيناتهوم
لحقو بسرعة على رانيا و هند و دخلو فالسوق كايقلبو على امهاتهم و تزاحمو مع الباشار ... رجعات لينا للور مقابلة يونس و كاتدرس تحركاتو ... شافتو اش كايدير و دارت ضحكة شريرة و مشات حداه
لينا: ماخليتيش أمين و ختك يقربو من بعضياتهوم و يهضر ليها فودنيها و نتا فالمقابل الدرية لي دازت من حداك كاتغمز ليها و تلوح ليها كلمة زوينة
يونس:(نصف ابتسامة) حاضياني !
لينا: لا غير شفت لبنت لي دازت من حداك كاتبقا تفرنس و بغيت نعرف اش طاري
يونس: هاديك سميتها المغازلة و غير لبنات الزوينات لي كاياخدوها و هي حاجة مهمة فحياة لبنات و صحية حيتاش كاتنشطهوم و كاتخليهوم فرحانات و بكلمة وحدة يقدرو يدوزو نهار كامل ضاحكات و لكن هادشي غير للبنات الزوينات
لينا: شنو زعما انا خايية
يونس: ماقلتش هاكداك نتي لي قلتيها
لينا: شنو زعما حيتاش مالاح ليا حتى واحد كلمة زوينة راه انا خايبة !
يونس: ممكن
لينا: و الى بينت ليك بلي راه فساعة يقدر 50 واحد يلوح ليا كلمة زوينة
يونس: غانتأكدو بلي نتي زوينة
لينا: واخا صافي
يونس: نبداو دابا !
لينا: دابا معانا لافامي و الى شاف أمين شي واحد لاح شي هضرة غاتنوض مدابزة
يونس: نخليوها لليل !
لينا: ليل مزيان
يونس: اوا صافي مشات
لينا: اديوس اميgو
يونس:(شدها) اجي فين غادة
لينا:(شافت فيديه) شنو !
يونس: علاش قبيلة ماخليتينيش نخلص !
لينا:(حيدات يديها من يديه) كانظن بلي راه قلت ليك قبيلة علاش
يونس: صاحبك هانية يخلص عليك و انا لا
لينا:(ابتسامة سخرية) ماكانتصاحبش
زادت و خلاتو متبعها بعينيه و داير نص ابتسامة
يونس: دابا نشوفو واش غاتصاحبي ولا لا
لينا غادة فالطريق و شلا أفكار كايضورو فبالها و ابتسامة غامضة على شفافها .... شافت العيالات و مشات عندهوم
السعدية: على السلامة فاش جيتو
لينا: كي عيطتو خرجنا من لكافي
حسن: وا غبرتو بغيت نلحق عليكوم لقيتكوم مشيتو
أمين: ههههه كنا غاديين بشوية غير مع الزحام مابناش ليك
يونس: شنو دابا غانمشيو نتغداو
راوية: اه نمشيو نتغداو و نرجعو للفيلا عندنا شلا مانوجدو
رانيا: علاش !
راوية: خالتك جاية هي ولادها و حتى خالك و من بعد جاي عمك و ولادو و عمتك حتى هي
رانيا: ياك تافقنا خالتي تجي هي و وولادها و لباقي حتى يقرب لعرس
خديجة: و المصروف ! شكون غادي يصرف داك الضبع ديال ولدي هو لي غايحط دم جوفو تاني
السعدية: ياك قال ليك دايرين فيفتي فيفتي
لينا:(من موراهو) ماضنيتش بلي دايرين فيفتي فيفتي مني جاو ماشفت حتى ريال جبدوه هوما ولا عيطات ليه ديك خراوية و قالت ليه هاك
خديجة: ياك حتى نتي رضيتي لبال شوفي ا بنتي لينا جيبي ليا لخبيرة و بحلاوتك صافي
لينا: أمين ماغاديش يعطيني راس الخيط حيتاش عارفني ماغاديش نسكت ليه لمهم الخبار نجيبها من قنت تاني
خديجة: لمهم نتي ديري لي بغيتي غير جيبي ليا لخبار و بتضويرتك و دير خراوية كيفما سميتيها خبارها يجيبوها التاليين
مشاو لأقرب مطعم جلسو فيه و طلبو الشواء ... حطو ليهوم الماكلة الطبلة عامرة من الطرف تال الطرف طاحو فداكشي عميين ... كلاو و شبعو و جا وقت الخلاص ناض أمين باش يخلص و شدو يونس
يونس: غير خليك انا غانخلص
أمين: لا لا والله ماتخلص
يونس: بلا حلوف غير سير دابا نوبتي
أمين: و الله ماغاتخلص كولشي عليا واه كانلعبو هنا
سبق أمين مشا لاكيس و ناضت خديجة غادي طرطق
خديجة: شفتي المسخوط يحلف و يعاود يحلف بغا الراجل يخلص يخليه لاش خاشي راسو وسط الزحام
السعدية: اوا اش نقولك اختي ولدك باش يبين راسو قدام نسيبتو باش يكبر فعينها
خديجة: وا منين جايب لفلوس منيييين كايتقطع و يكريدي
هند: راه كان جامع شي فلوس
خديجة: ماشي شي حاجة كتيرة راه هاز كريدي بزبالة دياال لفلوس غادي يسيفطني نيشان للقبر
لينا: غير تسناي ا خالتي اقسم بالله الا غادي يحطو معاه حتى هوما الفلوس غير تسناي.
رجعو لجردة فين كانو محملين ببلاستيكات و مشاو لوطو ديالهوم ركبو و رجعو للفيلا. وصلو ليها و هبطو محملين دخلو للفيلا و كل مجموعة مشات لبيتها أمين مع حسن و يونس و راوية مع رقية و رانيا و لينا مع امها و خالتها و هند .... خلات لينا كولشي حتى طلعو لبيوتهم و مشات هي للجردة ... مشات لسور طلعات فوق الكرسي و بقات كاطل على الجيران و لسوءالحظ مالقات حد تما و سكات فالفيلا الثانية الشيء لي كايدل على غياب اهل الدار ... بالتخبية جا يونس للجردة فيديه باكية ديال لكارو و بريكا ساف لينا و تيبس فبلاصتو ... دار بسرعة باش يمشي قبل ماتشوف و لكن فات الحال حيتاش سمعات صوت خطوات و ضارت
مشات بطريقة بطيئة و عينيها متبتين عليه بحال الا كاتحداه ... ضورات وجهها و دخلات للفيلا وههو شعل الكارو ديالو و بدا كايكمي بسرعة باش مايحصلش ... كمل لكارو ديالو و لاحو و ساط الدخان ... جبد من جيبو تريدنت بدا كاينضغ فيها و مشا لبلاصة لي كانت فيها لينا ... وقف على صباع رجليه و طل لقا عماد واقف لابس سروال جينز و تيشورت كايهضر فالتيلي
يونس: مال هادي كانت كاتطل عليه هادي هي ماكاتسوق لرجال بففف
وقف مقاد و دخل لدار بعدما مشات من فمو ريحة لكارو و طلع لبيتو حيد صباطو و لبس الكلاكيطة و مشا لطواليط توضا و رجع للبيت صلا الضهر و العصر.
دخلات لينا للبيت لقات مها جالسة عند لفاليزة كاتعاود تستف الحوايج لابسة بيجامة طويلة مستورة مع زيف حياتي جامعة بيه شعرها و خديجة جالسة فوق الفراش لابسة بيجامة بسروالها جامعة شعرها فزيف عاقداه جامعة يديها عند حجرها و هند باقة بحوايجها مجبدة فوق الفراش
السعدية: اجي ابنتي نمسد ليك شوية ديك ليد
دخلات لينا و جلسات بجانب السعدية و عطاتها يديها ... حيدات ليها الفاصمة و جبدات دهنة و بدات كاتماسي ليها و لينا كاتعوج بحر الآلام.
دوزو العشية غير فالفيلا كل واحد فاش ملهي حد ماخرج ... طاح الظلام و صلا يونس المغرب و هبط للتحت لقاهوم مجموعين على كاسكروط ... شاف فلينا و دار ليها براسو باش تبعو بلا مايعيق بيهوم حد
سبقها هو لجردة و هي بلا مايعيق حد خرجات مشات لجردة لقاتو جالس كايكمي
لينا: شنو بغيتي
يونس: شنو مابقيناش خارجين!
لينا: اه سي سي خارجين مي الى شافونا خارجين بجوج غادي يعيقو
يونس: انا غادي نسبقك و بعد نص ساعة تبعيني غادي تلقايني فالشارع لوخر كانتسناك فلوطو
لينا: لوطو مادرنا بيها
يونس: صافي بلا طوموبيل ... عطيني نمرتك باش نبقاو على اتصال
لينا: جبد قيد
جبد يونس تيلي و قيد نمرتها و مشات هي رجعات جلسات ... بعد ربع ساعة تبعها يونس وقف عليهوم
يونس: لواليدة هاني خارج
راوية: واخا اولدي سير الله يرضي عليك
مشا يونس و بقات لينا جالسة حمات فيها لبيضة بغات تنوض ... دازت ربع ساعة و هي جالسة على اعصابها ... صبرات حتى عيات و قربات من السعدية و وشوشات ليها فودنيها
لينا: (طاحت ليها فكرة فبالها) الى مشات معانا رانيا نمشي معاك
رانيا: اييه نمشي معاكوم ياك اماما
راوية: الى كانت لبنت معاكوم سيرو بوحدكوم لااا
أمين: اوا نوضو نمشيو
ناض أمين خرج برا تبعاتو لينا بزربة باش طبق خطتها
لينا: أمينووووو
أمين: اش كاين 😒
لينا: دابا غانخرج غير انا و نتا و رانيا يااك
أمين: اوا حاجة باينة هادي
لينا: اش بان ليك تاخد نتا و رانيا شوية ديال الخصوصية
أمين: بحالاش!
لينا: بحال متلا تخرجو نتوما بجوج و انا نمشي نتسارا بوحدي حتى نبغيو نرجعو و نتلاقاو !
أمين: ايييه حتى هادي فكرة زوينة شوفي بلا ماتفرشي ديكور قدامهوم
لينا: صافي ماتخافش 😉
تسناو رانيا حتى جات عندهوم و مشاو مجموعين على رجليهوم و شوية بشوية بدات كاتملص منهوم و كاترجع بلور حتى خلاتهوم بوحدهوم و قلبات الطريق للبلاصة فين غاتلاقا مع يونس
صونا ليها تيلي و هي فطريق جاوبات بسرعة حيتاش عرفات غايكون غير يونس
يونس: الو فينك!
لينا: هاني فالطريق تسنا شوية
يونس: ماحملتش هاد لوقفة ديال لاروب
لينا: اوا صافي سير فحالك و نرجع انا فحالي
يونس: صافي صافي غير سربي
قطعات عليه بلا ماتجاوبو و زربات اكتر فالمشية حتى وصلات لشارع ... بان ليها واقف متكي على حيط مربع يديه و عاقد حجبانو ... قطعات الشانطي و وقفات عليه
يونس: هادا هو لوقت لي درنا
لينا: و مالي لخاطري راه ماما ماخلاتنيش نخرج على شحال و راه أمين و ختك معامن خرجت و تفكيت منهوم بالكشايف
يونس: واخا صافي صافي
لينا: لفين دابا!
يونس: نبداو و او لا لا
لينا: واخا سير سبقني نتا و طلق ودني و هانتا شفتي مادايرة مكياج مادايرة ريحة مامزيرة على حتى حاجة لابسة غير سالوبيط
يونس: 50 واحد ف ساعة
لينا:(دفاعتو) سير سير
سبقها بخطوات قليلة كأنو مامعاهاش ... طلقو رجليهوم فالطريق و هي غادة عادية بلا تعواج بلا حركات كاتثير الإنتباه ... دازت من حدا مجموعة من الشباب كاتكون من ستة ديال الدراري و بداو كايلوحو كليمات كل واحد من جيهة ... ماسوقاتش ليهوم و زادت ... بعدو من حداهوم و قربات من يونس
لينا: ها 6 ديال الناس
يونس: حسبتهوم
رجعات لور و ماحدهوم كايتمشاو و هي كاتسمع لهضرة كل مرة واحد يلوح هضرة شكل و يونس راض لبال لايبسل عليها شي واحد و يتمادا ... دخلو فالزحام و لي شافها كايتغزل بجمالها ... قربات تكمل ساعة و هي يالاه جمعات 49 بقا ليها شخص واحد و تربح الشرط ... وصلو لبلاصة شبه خالية فيها كافي ريسطو و وقفو
يونس: بقات خمسة دقايق و تخسري
لينا: كيفما جا 49 غايجي داك واحد و هادشي ا زماكور بلا زواق بلا تزيار بلا حركات يعني غادة عادية و بنادم ماخلانيش
يونس: بقات تلاتة ديال الدقايق
ضورات لينا راسها يمسن و يسار لقات الدنيا خالية غير الكافي لي عامرة بالباشار صافي عرفات راسها صافي خسرات ... فجأة خرج عماد من لكافي هاز تيلي شافها و جا عندها ماعرفاتش راسها حتى وقف عليها
عماد: لينا صافا
لينا: عماااد (بفرحة)😄
عماد: اش هاد الزين تاني
لينا: (شافت فيونس) ربحتك ربحتك هههههههه
عماد: اش ربحتي
لينا: والو .... سير الله ينجحك الله ينقي طريقك من الشوك سير الله يزوجك و يحضرني فعرسك
عماد: (بمزاح) ماتبغيش تكوني نتي هي لعروسة هههههه
لينا: اييييه علاش لا مي دير الحية و نقبل
عماد: ماتخافيش غادي تنوض هههههه اش كاتديري هنا بعدا
لينا: والو خرجت ندور شوية انا و هادا
عماد: ماشي هادا هو لي وقف علينا داك النهار
لينا: لا لا هاداك ولد خالتي هادا خو العروسة لي حاضرين لعرسهوم
عماد: ااااااه هادا هو ريحة احم فالصندالة
لينا: (تزنكات) هيهيهي بسلامة
عماد: (عاق باش قال) احم لمهم تعطلت خاصني نمشي
سبقات لينا و هي محرجة و يونس تابعها كايشوف فيها بنظرات مامفهومينش
يونس:كيفاش ريحة احم فالصندالة
لينا: لا والو هيهيهي
يونس: و مال لونك مخطوف
لينا: لا والو غير كاتخايل
يونس: سبيتيني قدامو ياك
لينا: هو تقنيا ماشي سبيتك غير متل قلتو سي تو
يونس: لي هو !
لينا: اجي نجلسو هنا ... الجو زوين ياك (جلسات فوق كرسي فالزنقة)
يونس:(جلس) غير قولي
لينا: (شافت فيه) قلت ليه ريحة داكشي فالصندالة
يونس: شناهوا داكشي !
لينا: (كاتضور عينيها وجهها حمر) بلا ماتخليني نقولها حشومة
يونس: (خرج عينيه) نوضي نوضي
لينا: علاش !
يونس: ختي و أمين جاو هنا
ناض و شد ليها فيديها و جرها تخباو مور شجرة و أمين و رانيا جايين فالزنقة مشاديين ليدين كايضحكو
لينا: لاش مخبيين
يونس: (بهمس) شششششش
لينا: ماتسكتنيش ا زماكور
يونس: (سد فمها بيديه) وا هنينا يخخخ
لينا:(كاتخرج لسانها و كاتعمر ليه يديه بالدفال) ممممممممم
يونس: ياااعك (حيد يديه من على فمها)
لينا: وا أمييييييييييي
قبل ماتكمل الغوتة ديالها ... دور يونس يديه على عنقها و قربها ليه و حط شفافو على شفافها سدهوم ليها باش ماتغوتش ... بكترة الصدمة خرجات عينيها و تيبسات فبلاصتها و قلبها كايضرب بجهد بحال الى كاتجري حسات بالسخونية طالعة معاها ... استوعبت اخيرا اش وقع و حطات يديها على صدرو كاتدفع فيه و هو لاصق عليها يد مضورها على راسها و يد على ضهرها مقربها ليه باش ماتلقاش كيفاش تتحرك و بعينيه مراقب أمين و رانيا
أمين:(وقف) سمعتي شي صوت
رانيا: لااا علاش ماكاتشوفش بوحدنا فالشارع
أمين: غير كانتخايل ههههه اوا فين خليناها
كملو طريقهوم و يونس باقي شاد لينا فديك لابوزيسيون و عيات ماتدفع فيه و لكن بدون أي نتيجة ... شاف أمين و رانيا ضارو عاد طلقها .... غير طلقها و هي تطير عليه كاتضرب و كاتنتف
خرجات من مور الشجرة وجهها حمر و عينيها مغرغرين بالدموع و الصمطة طايحة ليها من على كتفها حيتاش كانت كاتضربو ... بانت ليها طوموبيل جاية فالزنقة و وقفات كاتقاد حوايجها ... هزات راسها لقات طوموبيل واقفات حداهوم و هبط منها جوج بوليسيين ... طاح ليها الما فالركابي و قلبها بدا كايضرب بجهد مخلوعة بالبيان ... فلحظة صفارت و مشا منها اللون ... وقفو عليها لبوليس و هي صفرة و لكن كاتظاهر بالقوة
الشرطي: اش كاتديري هنا
لينا: a ! لا والو
مشا لبوليسي لوخر قلب من مور الشجرة لي كانت مخبية فيها و لقا يونس واقف كاينهج ... شافهوم يونس و هو يكحل بالعما عرف راسو قفرها
الشرطي: هاي هاي هاي دايرين لينا الدعارة بالعلالي
لينا: لا و الله ماهكداك فهمتي غلط
الشرطي2: و اش غادي نفهمو a! نتي خارجة كاتقادي حوايجك و هو واقف سخفان كاتضحكي علينا !!! لاكارط ناسيونال
لينا: اويلي على لكوميسارية 😱 و الله ماكنا كانديرو شي حاجة و الله الا باقة بنت انا بالله و الشرع معاك
الشرطي: راه كاع نتوما بنات (جرهوم) كاتعطيو لور للحبيب و لقدام للنصيب زيدي يا ل *****
لينا: (كاتبكي) و الله الى غير من عائلتي و جايين نحضرو عرس ختو و ولد خالتي اقسم بالله 😭😭 و الله الا انا داخلة سوق راسي
الشرطي: بنات الناس فديورهوم فهاد الوقت ماشي مخبيين مور الشجر مع الرجال زيدي قدامي (جرها) جر نتا هاداك خينا
الشرطي2: ها حنا غانمشيو لكوميساريا و نعيطو على عائلاتكوم و نشوفو هادشي واش صحيح ولا لا
يونس: خليها هي و ديني انا راه بجوج كبر من 18 عام
الشرطي: شنو نتا غاتوريني خدمتي !
يونس: شحال بغيتو
الشرطي: (شنق على يونس) شنو غاترشيني
يونس: شحال بغيتو
الشرطي2: (وقف حداه) 500 درهم للواحد
يونس: واخا مي عطيني لاكارط هي لولا
عطاه البوليسي لاكارط و خشاها فجيبو و جبد بزطامو ... جبد منها 1000 درهم و عطاها ليهوم و لينا واقفة كاتبكي و كاترعد
الشرطي: نعاود نحصلكوم باقي مانعقلش عليكوم يالاه **** من هنا
مشا يونس شد فلينا لي سخفانة بالبكا كاتحس بقلبها غادي يخرج من بلاصتو ... جرها و هي غادية مرفوعة كاتنخصص ... تحركات لوطو ديال لبوليس و مشاو فحالهوم و وقف شاف فلينا و و حط يديه على وجهها
بدات كاتشهق بصوت عالي و كاتنخصص و وجهها عامر دموع ... بقات فيه و جرها عنقها دور يديه عليها و حاكمها مزيان
يونس: ششش ماتخافيش ماوقع والو راه مشاو ... يخخخ كون غير ماتخبيناش اللهم يحصلنا أمين على هاد لبروسي ديال 1000 درهم (بهمس فودنيها) ششششش ماتخافيش راه مشاو
بالتدريج بدات كاتكالما و مابقاتش كاتشهق و هو معنقها مزير عليها كايحاول يحسسها بالأمان ... بسباب الهضرة لي كايهمس ليها فودنيها تكالمات و حبسات البكاء و التنواح
يونس:(شاف فيها) دابا مزيان
حركات راسها بالإيجاب
يونس: وجهك ولا حمر ..غاتمشي لديك لقهوة تغسلي وجهك و تخرجي انا كانتسناك صافي !
حركات راسها بالإيجاب
يونس: يالا سيري
بقا واقف كايتسناها و هي مشات للكافي دخلات لطواليط غسلات وجهها و شافت راسها فالمرايا و بجات كاتكالمي راسها و كاتقنع راسها بلي البوليس مشاو ... بعد لحظات خرجات لقاتو واقف هاز كارو كايكمي فيه كايخوي سمو فالكارو و كايتحسر على 1000 درهم لي مشات ليه ... مشات عندو وقفات حداه و طربات الطم
يونس: دابا حسن !
لينا: (بصوت مبحوح) اه
يونس: وا دغيا تخلعتي ااااي
لينا: مولف يوقفو عليك البوليس ياك
يونس: لا كاندير الإحتياطات ديولي ... بقات فيا ديك 1000 درهم كون غير درنا بعدا شي حاجة باش نعطيها ليهوم
لينا:( عقدات حجبانها) شي حاجة بحالاش
يونس: لا والو هههه (ساط الدخان)
لينا:(حدرات راسها و حمارو حناكها) لاش .. لاش بس.. (تزيرات) بستيني قبيلة
يونس: ههههه حيتاش كنتي كاتغوتي داكشي علاش ... مابغيتكش تباني كدابة قدام ختي و أمين و يقدرو يقولو بلي بيناتنا شي حاجة و يخاصمو عليك فهمتي !! ماشي بغيت نبوسك اصلا هاديك ماشي بوسة غير حطي فمي على فمك
يونس:(لاح لكارو و زطم عليه) انا مكبوت !! كون كنت مكبوت كون قبيلة قستك حتى شبعت و شبعت فيك بوسان انا درت قبيلة هاكداك غير باش تسدي فمك و كيفما قلت ليك غير حطيت فمي على فمك سي تو ... واش حسيتي بلساني قاصك واش عمرك فمك بالدفال
لينا:الصمت (مدورة وجهها حشمانة)
يونس: بيان سيغ لااا حيتاش غير حطيت فمي على فمك و يدي غير حكمتك بيهوم سي تو ماقصتك لا فصدرك لا فشي قنت تاني .... بقاي تعرفي اش كاتقولي ا لينا انا ماشي مكبوت فهمتي
بقات لينا قالبة وجهها مربعة يديها و هو مقابل معاها كايخاصم و لكن مامعليش صوتو
يونس: عيطي على أمين ... بغيت نرجع فحالي
جبدات تيلي ديالها عيطات على أمين قاليها فين كاين و قطعات
لينا: هاني مشيت
يونس: اجي لهنا فين غادية
لينا: سوقك !
يونس: اييه ا بنتي نستاهل انا لي حمار حاط بروسي ديال 1000 درهم على والو
مشا و خلاها واقفة مفقوسة ... شافتو دار مع الدورة و مشا فطريقها للجردة لي كانو جالسين فيها فالصباح
مشات مغبنة طالع ليها الدم على لفضيحة لي طرات ليها هاد النهار و تأكدات بلي هي ميغناطيس ديال الكوارث و الزبايل ... غادة و ماعارفاش الطريق كاتلفت يمين و يسار و كاتقلب جنابها مضهشرة ... ضربات طريق على رجليها و مسافة لابأس بها ... بدات الطريق كاتخوا و الناس كايرجعو لديورهوم و هي مازال كاتضور كاتقلب شافت حتى عيات و دوزات نمرة ديال أمين و سمعات "حسابكم غير كاف لإجراء هذه المكالمة المرجو تعبئة رصيدكم في أقرب وقت"
لينا: فااااااك واش انا الزهر جا و كوز عندي ها واحد باسني ها لبوليس وقفو علينا ها انا توضرت يخخخ عليك ا لينا يخخخخ
شمكار: مال زين غضبان
تمشات و ماتكلماتش باقي تزيزنات ... شافها دجاجة بكامونها و تبعها كايتلاوح ماهاز حتى راسو
شمكار: اجي يا زين نهضرو شوية
تزادو نبضاتها و الخلعة بدات كاتطلع معاها و اللون تاني مشا منها غادة فطريق مجهولة ماعارفة طريق الجردة من طريق السوق من طريق الفيلا غير غادة و الخلعة حاكماها ... كبر الشمكار خطواتو حيتاش خاف تهرب عليه و لحق عليها بسرعة ... شدها من يديها و جرها عندو و ماد شلاقمو باغي يبوسها ... غمض عينيه و شلاقمو باقيين خارجين باش يبوسها و هي تجيه ضربة للوجه حل عينيه لقا يونس واقف خبا لينا موراه ... جمع بونية و عطاها لشمكار للوجه ... شنق عليه و قرب ليه
يونس: شنو حكرتي عليها هم ! يالاه ترجل و حكر عليا انا
شمكار:(لسانو تقيل) وا تا خليني عليك
لاحو يونس للأض خلاو مقلوب من الشراب و من الضربة ... شد فيد لينا و زاد بيها و هي مزال مصدومة ماعارفة ماتقدم ماتوخر و لون مشا منها فخطرة ولا وجهها صفر كيف الخرقوم ... مني ماهضراتش عرف بلي شي حاجة ماشي تال هيه بيها و هي غير الى قاصها كاتغوت و هو دابا شاد ليها فيديها و مادوات ماتكلمات... ضار شاف فيها لقاها حالة فمها و كارتجف كلها و الدمعة محجرة فعينها ... وقف و وقفها قدامو و بدا كايطرش فيها بالخف باش تفيق من الصدمة
حسات بأنفاسو حدا وجهها و بدا قلبها كايضرب عاد بدات كاتسوعب
لينا: يونس 😨 شدني واحد الشمكار كان باغي يبوسني واحد الشمكار كان هنا
يونس: الشمكار مشا فحالو ماتخافيش انا معاك
لينا: (فشلانة) بغيت نرجع لدار عييت
يونس: بالسيف ماتعياي و نتي نهار كامل غير زبايل و ماشاكيل شوفي غير هاد لخرجة ديالي انا وياك شحال من حاجة طرات فيها
لينا:(نترات يديها من بين يديه) ديني عند أمين
يونس: أمين حداك و نتي من صباح و نتي ضوري عليه
تمشات بخطوات بطيئة و ماعرفاتش اش واقع حيتاش عقلها توقف بالخلعة فاش شدها الشمكار ... ضارو مع الضورة و لقاو أمين جالس فالجردة مع رانيا ... مشاو عندو وقفو عليه و تصدم
أمين: شكاتديرو بجوج
يونس: غير تلاقيتها بالطريق و جبتها عندك
رانيا: يالاه نمشيو راه مشا لحال
رجعو للفيلا بربعة و لينا مخلوعة من جنابها و ساهية بعد هاد لخرجة مابقاتش طبيعية... دخلو للفيلا و مشات هي نيشان لبيتها بدلات حوايجها و تخشات فالفراش بلا ماتدوي مع حد ... ناضت باش تتبعها السعدية و شدها أمين
أمين: غير خليها راه عيات مسكينة
السعدية: تساريتو مزيان
أمين: تسارينا حتى طابو لينا الرجلين
🌞صباح جديد 🌞
فاقت لينا عضامها مدكدكين ماقادراش تتحرك ... حكات عينيها و ضوراتهوم فالبيت لقات لبيت باقي مظلم و لقات السعدية خديجة وهند باقيين ناعسيين ... رجعات تجبدات كاتشوف فالسقف و كاترجع ذاكرتها لأحداث لبارح ... تفكرات لبوليس و شداتها الرعدة و تفكرات بلي على بونت كانت غادي تتشوه مع عائلتها... تفكرات الشمكار و غطات وجهها بيديها كاتحاول تطرد هاد الأفكار ... تذكرات البوسة لي عطاها يونس باش يسكتها و حمارو خدودها من الخجل ... حطات صبعها على شفافها كاتحسسهوم و كاتحس بنفس الإحساس مني باسها فراه اول قبلة ليها هي هادي ... ظهرات ابتسامة خفيفة على شفافها و دغيا جمعاتها و قالت فخاطرها
لينا: مانكدبش هو ظريف و لكن متكبر و حاس براسو و ماغاديش تنسا ليا بلي ماما و أمين خاصمو عليا على قبلو و تشوهت قدام عائلتو و قطع ليا صندالتي و لكن راه حط لبارح 1000 درهم باش يفكني راه التمن ديال الصندالة مضروب ف 3 زائد 100 درهم يعني تلاتة دياال الصندالات زائد غدا مخير ليا و ندير 10 دراهم كونيكسيون و صولد باش ندوي ... اويلي اش كانقول لمهم غادي نرجع الصرف و صافي اصلا هو كايكمي و حاس براسو يعني الشروط مامتحققينش و لكن راه حتى عماد ماعندوش اللحية و عاجبك اللحية غاتنوض مع الوقت ماشي بحال الكارو و التكبر اوووف وليت غير كانخرا فالهضرة
ناضت باش تطرد هاد الأفكار و بانت البيجامة لي لابسة ... ديباردور مزير عليها مع شورط حدو الركبة من توب شفاف شوية عامرة وريدات بالغوز ... هزات لاطروس ديالها و خرجات بشوية من لبيت مشات لدوش قضات حاجتها و غسلات وجهها بصابونتها و حكات سنانها و جبدات مشطة مشطات شعرها و جمعاتو على شكل كعكة مهملة و خلات خصلات خارجين من الجناب ... خرجات من الدوش رجعات لبيتهوم لقاتهوم باقيين خامرين ... رجعات لاطروس لبلاصتو و هزات تيلي شافت الساعة لقاتها يالاه 8 ديال الصباح ... خرجات من لبيت كاتسلت لقات كولشي باقي ناعس ... هبطات للتحت و مشات لجردة لقات يونس فايق كايدير سبور لابس سروال كيطمة رمادي و ديباردور ديالها رمادي من لاكوست مزير عليه بارز عضلاتو بشدة و فرجليه صبرديلة اديداس ... وقفات كاتشوف فيه طايح كايلعب طراكسيون فوق طابي حاطها فالجردة ... ضارت باش ترجع و هو يهضر
سمعات حركة فالفيلا لي حداهوم و طلعات فوق الكرسي كاتطل و بان ليها عماد كايعوم فلابيسين لابس غير شورط ... تحلو عينيها و هي كاتشوف فيه كايعوم كيف الحوتة و ماراضاش لبال بلي الديباردور طلع و جاكيط حتى هي طلعات و كايبان الشورط مزير على طرمتها ... شافها يونس و تزير كايحاول يشتت النظر ديالو و لكن عينو كاترجع تشوف تما بلا هواه ... بدا كايلعن الشيطان و كايضور راسو و هي واقفة كاتطل ولا على بالها ... ناض يونس بغا يخرج من الجردة و ضارت لينا شافتو
لينا: فين غادي
يونس: ندوش (حادر راسو)
لينا: لمهم بغيت نقولك شكرا لبارح عاونتيني (كاتلعب بصباعها متوترة) كنت معصبة لبارح خفت يجيونا لكوميساريا و قلت ليك مكبوت سمح ليا و بسبابي حطيتي 1000 درهم (هبطات من الكورسي) و واخا عاملتك خايب جيتي عاونتيني باقي
جاية جيهتو كاتقرب كاتشوف فيه و هو حادر راسو كايسمع ليها ماشافت حجرة كاينة فالأرض كبيرة و ماجات فين تكمل هضرتها حتى تعكلات و غوتات ... هز يونس راسو شافها غادي تطيح و تلقا ليها بسرعة شدها و لكن هو ماشادش التوازن ديالو و طاح على ضهرو و هي فوق وجهها حدا وجهو و يديه فظهرها
أنفاسو كايضربو فوجهها لمدى قربهوم من بعضهوم و هي مخرجة عينيها بالصدمة و قلبها كايضرب بجهد ... تداركت الموقف و ناضت من فوقو وجهها حمر كاتحك شعرها مضورة وجهها ... ناض هو كايسوس فحوايجو و ماشافش فيها بمرة
يونس: نتي اكتر وحدة شفتها كاتعرض للمصائب مني كاتفيق حتى كاتنعس
لينا: عادي ولفت هاد الزماكور
يونس: (شاف فيها) شناهيا هاد الزماكور
لينا: زمر زائد باكور هي زماكور هادا مصطلح خاص بيا ماعندكش الحق تستعملو
يونس: هههههههههههه مصطلح جديد هادا
لينا: لمهم شكرا على لبارح
يونس: عادي غير ماتقوليها لحد و صافي
لينا: صم بكم عمي 😁
مشا يونس و خلاها هي فالجردة ... دخل مع لفيلا كايصفر غادي فإتجاه الطواليط و بان ليه أمين جاي جيهتو باينة فيه كاعي
يونس: صباح لخير
عقد أمين حجبانو و شنق على يونس من الديباردور ديالو و يونس مافاهم والو
يونس: مالك ا صاحبي
أمين: بعد من لينا 😡 فهمتي
يونس: طلق مني و دوي و اصلا لينا مبعد منها
أمين: عليها قبيلة منعسها فوقك 😡 (زاد شنق عليه و قرب وجهو من وجه يونس) شنو باغي منها ماكفاوكش لبنات لي عندك بقات ليك غير هي
يونس:(شنق على أمين) و نتا سوقك اش بينك و بينها
أمين: هاديك بنت خالتي بحال ختي بعد منها لا والله مايعجبك حال
يونس: بنت خالتك كاتضحك عليا (صغر عينيه) لأول و لآخر مرة غادي نقولها مابيني و بينها والو و زايدون ديك لبنت ماشي لماركة لي كاتعجبني فهمتي
لينا: مالكوم !
دورو وجههم شافو فيها بجوج
أمين: قولي ليا واش دار ليك شي حاجة ا لينا !! غير هضري ماتخافيش
لينا: لا مادار ليا والو راه قاليك انا ماشي لماركة لي كاتعجبو
أمين: و لاش قبيلة كنتي فوقو فالجردة !! اش هادشي ا لينا
لينا: غير فهمتي غلط غير طحت و شدني و فلتات ليه رجليه و طاح هو و طحت فوقو هادا ماكان (قربات حداهوم) دابا الى شافكوم شي واحد هاكدا غاينوض الصداع (حيدات يدين أمين من حوايج يونس) أجي معايا
حيد يونس يديه من أمين و بقا كايشوف فيه بحقد و أمين كذلك ... شدات لينا فأمين و طلعاتو للفوق و جلسو فالصالون
لينا: مالك !
أمين: شفتكوم قبيلة و كايصحاب ليا بيناتكوم شي علاقة
لينا: من نيتك ا لحمق واش يالاه لباحر نتا صالحتينا و دابا كاتقول علاقة حماقيتي و بليس راك عارفني كيف دايرة داكشي ماكانفكرش فيه بمرة
أمين:(عنقها) راه مابغيتش لي يتفلا عليك ا لينا و غير عطي لداك يونس بالتيساع راه بو بنات
أمين: هاكداك نبغيك (شاف فيها و باسها فجبهتها) شنو بان ليك نخرجو نفطرو فالزنقة
لينا: واخا تسنا نمشي نلبس
أمين: واحد شوية نلقاك لتحت صافي !
لينا: واخا 😋
مشات لبيتها و الهضرة ديال يونس كاتعاود فراسها بقا فيها لحال شوية ماشي حيتاش كاتبغيه مي حيتاش بدات كاتحس بالإنجذاب ناحيتو و هي ماعايقاش ... حلات لفاليز و جبدات سروال جينز فيه تقاطع مع تيشورت كحل فيه كتبة فالوسط ... لبساتهوم و مشطات شعرها و طلقاتو ... هزات نضاضرها دارتهوم فوق راسها و جبدات صبرديلة بيضة لبساتها فرجليها ... هزات صاكها و دارت فيه تيلي و لفلوس و خرجات من لبيت ... دايزة مع لكولوار حاجرة راسها كاتخمم فنفس الوقت خرج يونس من الدوش لابس شورط من لتحت و لفوق عريان ... هزات راسها و لكن فات لفوت تصاطحت معاه و ضور يديه بسرعة على خصرها شدها قبل ماتطيح ..حطات يديها على صدرو و حبسات النفس ديالها و عينيها على وجهو و شوية عبطو لصدرو المزغب ... رجعات بلور و هو حيد يديه و ضور عينيه دخل يديه فالجيب و هي عضات شفتها السفلية بسبب التوتر ديالها و خدات نفس و بدات كاتضور فعينيها بالإحراج
يونس: sorry
قال هاد الكلمة و زاد فحالو طلع للفوق و هي هبطات للتحت مرفوعة لقات أمين جالس كايتسنا فيها لابس سروال جينز و تيشورت بيض و نضاضر فوق راسو و صبرديلة فرجيله ... شافها و ناض عندها
أمين: زين مشينا
حركات راسها بالإيجاب و خرجو برا لفيلا و هي متوترة كاتشوف فيديها و كاتفكر صدرو العريان فيه زغب خفيف كحل عطاه جمالية و رجولة اكثر ... حل أمين لباب ديال لوطو طلع و طلعات حداه لينا ساهية ... ديمارا لوطو و شاف فيها
أمين: بسست فين مشا لعقل
لينا: (بدون شعور) مع الزغب
أمين: شناهوا!
لينا: a !!(شافت فيه)
أمين: وافين عقلك ياتا فاش كاتفكري
لينا: والو والو 😅
أمين: اش مشهية تاكلي
لينا: لي كان ماعنديش موشكيل
أمين: هي تفطري بالبيصارة
لينا: يااااع حرام عليك هادا فطور دابا
أمين: اوا نتي لي قلتي لي كان
لينا: صافي صافي دينا لشي كافي نفطرو
أمين: واخا يا لالا
لينا: أمينوكس بغيت نسولك
أمين: سولي ا زين
لينا: فايت ليك بستي رانيا
أمين: هههههه اش هاد السؤال
لينا: وا غير سولتك بيني و بينك ماتخافش صم بكم عمي
أمين: عرفتي فاش كاتقولي ديك صم بكم عمي كانعرف بلي راه غادي تخرج الهضرة مي با كغاف نقول لختي الصغيرة (جر ليها خدها) راكي عارفة شحال هادي ماكانتش كاتبغي مي فاش تخطبنا كانغفلها و كانسرق شي بوسات
أمين: حتى تزوجي و تعرفي كيفاش (حرك راسو يمين و يسار) نتي صافي تسوطيتي
وصلو للكافي ... بلاصة لوطو و هبطو دخلو ... جلسو و هزو لموني ... ختارت لينا داكشي لي بغات و أمين حتى هو و قالوه للسرباي... بعد دقائق جاب السرباي جوج كيسان كافي كخيم مع بتي بان و شي حلاوي ... بداو كايفطرو و كايجمعو دغيا نسات لينا يونس و المواقف لي تحطات معاه فيه مي باقة حالفة حتى نتتاقم منو
كملو فطورهوم و ناضو ... خلص أمين و بدا كايصوني تيلي ديال لينا شافتو جاوبت بسرعة
لينا: الوو
السعدية: فينك يا هاد لبنت
لينا: انا مع أمين خرجنا نفطرو فالزنقة
السعدية: ديك الساعة علمني باش مانتخلعش عليك
لينا: كنتي ناعسة اماما صافي ماطرا والو
السعدية: دابا غاتجيو ?!
لينا: لا مازال غانتمشاو شوية عاد غانجيو
السعدية: واخا صافي
لينا: يالاه بسلامة (قطعات)
أمين: مالها! (كايتمشاو)
لينا: واقلة كيصحاب ليها هربت 😂
أمين: اوا فين نمشيو ا انسة حب لملوك
لينا: فينما بغيتي ا سي كعب الغزال
أمين: (خيب سيفتو) كعب الغزال من نيتك 😑
لينا: مالو كعب الغزال ماشي راجل
أمين: اودي يا ودي الرجلة عندك راحت ف كلام فاحش
لينا: ههههههه اجي كاين شي محل هنا كايدير التاتواج !
أمين:(شاف فيها بنص عين) علاش كاتسولي
لينا: بغيت ندير تاتواج شي فراشة فيدي ولا فعنقي
أمين: لا حول ولا قوة الا بالله نتي سيييغ تسوطيتي زيدي قدامي
لينا:(شادة كرشها و مزيرة على تاعها) وا غادي نبووول غادي نطلقها ليك هنايا ناري ماقدراش نصبر
أمين: سيري يا لفضيحة سيري بولي ... قلبي على شي قهوة قريبة
لينا: واخا يالاه سير نتا شوية و نلحق عليك
عطاتو بالضهر كاتجري و كاتضحك الضحكة واصلة ليها تال لودن حيتاش تفكات منو ... ضارت شافت لقاتو سبقها و هي تطلق رجليها لريح مشات للبلاصة لي شافت (من بعد و تعرفو) .
بعد ربع ساعة خرجات من شاحنة متوسطة فالحجم هازة بلاصتيكة كحلة و كاتفرنس غير بوحدها ... بقات تابعة الطريق لي جات معاها حتى لقات أمين واقف مكروازي رجليه متكي على حيط ... مشات عندو وقفات عليه تحطات عليه كيف لباطل
لينا:هاني جيت 😁
أمين: تجيك فالراس فين تعطلتي 😠
لينا: واه مانبولوش عرفتي كانت طويلة بحال سور الصين العظيم كانقول دابا تسالي و هي مازال حتى كاتقرب تسالي و كاتجهد تاني كيف الرشاشة
لينا: بان ليا واحد لحانوت كايبيع سوتيامات و مشيت شريت شي تلاتة واعرين من لبونج كايهزو الصدر تشوفهوم
أمين:(دفعها من راسها) زيدي قدامي هادشي لبقا ليا نشوف غير سوتيامات ديولك
لينا: حتى الألوان لي ختاريت واعرين ... واحد حمر و واحد كحل و واحد غوز حمقوني
أمين: زيدي لوطو مابقات خرجة معاك
لينا: لاواه صافي صافي 😅
أمين: لا لا و الله مانتساراو زيدي قدامي
دور يديه على قرفادتها و غادي دافعها من تما و هي كاتطلب فيه وهو داير فيها مامسوقش ... وصلو لوطو ركبها و دار ركب و ديمارا فإتجاه الفيلا
رجعو للفيلا دخلو بجوج كايضحكو ... أمين مضور يديه على عنق لينا و هي مضورة يديها على ضهرو ... غير دخلو سكت كولشي ، شافو فالصالون لمفتوح لقاو راوية و ولادها جالسين كايفطرو و السعدية خديجة و هند جالسين حتى هوما
يونس:(ساهي كايلعب بالسوارت و ودنيه معاهوم) ان شاء الله
راوية: وا رانيا فينو هاد الصاك
رانيا:(هابطة مع الدروج) هاني جاية تسناي
بعد لحظات دخلات رانيا هازة الصاك... عطاتو لراوية و حلات هاد الأخيرة و جبدات لبزطام من لداخل ديال الصاك فواحد جيب سري فالداخل مخبي ... حلات لبزطام جبدات منو 500 درهم و عطاتها ليونس و جمعات الصاك و لبزطام بسرعة و هي كاتشوف بنص عين فخديجة لي كاتضور راسها يمين و يسار
يونس: اش غانجيب دابا
راوية: اجي معايا نقوليك
ناضت راوية و بان جسمها الممتلئ فديك البيجامة لي لابسة ... طلعات للفوق و تبعها يونس
خديجة:أمين اجي معايا
ناضت خديجة طلعات لبيتها و تبعها أمين و سدات عليهوم
أمين: اجي على اش وصاني لوليد ! و غانمشي تال مولاي يعقوب !
خديجة:(بهمس) ماوصاك على والو غير بغيتك ليوم تغبر ماتبانش سير حتى العشية عاد رجع
الحب ليس بالكلمات الجزء الثاني
محتوى القصة
التنقل بين الأجزاء