قضات حاجتها و هي مضاربة مع ذبان وجهها غسلات وجهها و سنانها بالزعفة و خرجات جارة رجليها لقات يونس واقف مكروازي رجليه كايتسناها تخرج باش يدخل غير شافتو و صعرات تاني عليه
لينا: واش شاد لعسة هنا ! شنو خاص نعطيك درهم تفووو على صباح يخخ صباح الشمندر اللاوي فيgورة كيدايرة
يونس: مالكي ! اش درت ليك !
لينا: تدار ليك ان شاء الله قول امين الله يعطيك لحكة و قلة الظفار (طلعاتو و هبطاتو) دابا هادي فورمة داير بحال بوكيمون رجال اخر الزمان
يونس: واش على حساب لبارح ! سمحي ليا راه ماقصدتش
لينا: اييييه بعدا عاد تفكرت لبارح شكون نتا بعدا و اش كاتدير هنا ولات هادي دار الدعارة لي جا كايدخل و كون غير كان شي زين كولو عوج لا لحية مقادة لا فورمة زينة لا حروشية لا ضحيكة سير غبر من قدامي قبل مان......
مشات من حداه وكل شوية كاتضور تخاصم عليه و تصبنو مزيان و هو واقف مطلع حاجب مهبط حاجب مستغرب
يونس: اويلي مال هادي ! كاتدخل و تخرج فالهضرة ياكما الضربة لي فراسها اثرات عليها ! لا لا كون كانت شي حاجة كون قالها لينا الطبيب لا حول ولا قوة الا بالله (نصف ابتسامة) عجيبة غريبة
دخل لطواليط و هضرتها كاتدور فبالو كاتضحكو ، قضا حاجبتو و غسل وجهو و حك سنانو و خلاج من طواليط تكسل حتى طرطقو عضامو و زاد فالطريق داير يديه فجيب سروالو و عينيه نصف مسدودين كايشوف من بين رموشو ، دخل لبيتو رجع مسائيلو لبلاصتهوم و هبط للتحت لقا لينا جالسة حداها خديجة و من الجهة الثانية معاذ و مقابل معاها أمين بفوقيتو مفرق رجليه
يونس: السلام عليكم
خديجة:و عليكم السلام ... كيف بقيتي اولدي
يونس: الحمد لله
معاذ:(ضار شاف فيه) حتى نتا كنتي معاهوم
يونس: اه وي كنا بتلاتة
معاذ: نتا هو خو رانيا !
يونس: وي يونس (سلم عليه)
معاذ: معاذ (بادلو السلام)
لينا: وا داك الكيدار جمع رجليك راه سليبك كايبان
أمين:(جمع رجليه) واش فايقة خاسرة ! خاصك غير معامن
لينا: راه انا لي خاسرة فهمتي كلنة هاه ولا هاه نبدا كانشرط
معاذ: (كايطنز) صافي ا عبيقة غير تكا و ضرب شي جوان يقاد لمورال مع شي دكة
لينا: (قلبات وجهها و عوجات فمها) هاد لفطور مازال ماوجد غاتجيبوه من لبرطقيز
خديجة: لي شافها مايقولش بلي عاد كانت فالسبيطار لبارح
لينا: و مالي كيف جيتك حنا ولاد ليوم
دخل أيوب ولد نجمة اخت راوية لابس سيرفيط كحلة هاز تيلي و خاشي راسو فيه كايتفرج ، دخل لصالون و تقنت فالبيت تجبد و كايتفرج ، طلقات لينا رادارات ديولها و جبدو ليها فاش كايفرج
لينا:(وقفات) هيييييييي كاتفرج ف the good doctor
أيوب:(هز راسو شاف فيها) معايا !
لينا: اه وي واش ا the good doctor
أيوب : سي هو علاش
لينا: اينا حلقة هاديك!
أيوب: لحلقة 14
لينا: (خرجات عينيها) خرجات لحلقة و انا مافخباريش (جلسات حداه)
أيوب: يالاه تلاحت غير لبارح فليل
لينا: طلق طلق نتفرجو بجوج
دار تيلي فلوسط و بداو كايتفرجو بجوج و كولشي كايشوف فيها معجب كيفاش دغيا تسيفات و ولات وحداخرا
أمين:(بهمس) مال هادي فايقة خاصها غير معامن
معاذ: نكدتها عليها على الصباح 😂😂
أمين: فاش خليتك معاها فالبيت 😂
كان يونس طالق ودنيه كايتسمع عليهوم و طاحت فودنيه جملة ماكانش كايتوقع يسمعها ، جمع النفس و طلقها و رجع لور كايضور فعينيه. جابو لفطور حطوه و تجمعو عليه اهل الدار اما لينا و أيوب فمزال كايتفرجو خاشيين راسهوم فتيلي مخشعيين
السعدية: اجي ا بنتي تفطري خلي داكشي من بعد
لينا: قريبة تسالي باقة 15 دقيقة صافي
قالت هاد لهضرة و عينيها فتيلي كاتفرج رجعات تخشعات مع المسلسل و خلاتهوم كايهضرو ماسوقاتش ليهوم
لينا:(شافت فيه و وسعات عينيها) هادا لبطل ديال لمسلسل (جلسات حداه) دابا هو شاب عندو مرض التوحد و لكن ذكي بزاااف و بغا يولي طبيب جراح و غادي يدخل لواحد صبيطار و تما غاتبدا لقصة
تخطف اللون من معاذ و أمين و يونس و محمد علي و أيوب حتى رانيا و هند اما لينا مادات ماجابت و حتى امها و خالتها و راوية و نجمة كايشوفو فيها عادي
لينا: مابغيناش نكفتو ياك ا معاذ (كاينغزها أمين حابس الضحكة) شنو نتا مالك كاتنغز فيها شنو باغي تكفت
السعدية: صافي ماغاديش نكفتو غير تهناي
لينا: اوا هاكداك (شربات اتاي) اوا صافي هادشي لي بقا غير التكفات
قلب معاذ وجهو مزير حابس الضحكة و يونس خرج عينيه وجهو حمر حشمان و فنفس لوقت باغي يضحك اما أمين فخرج برا تشتت بالضحك حتى شبع
يونس:(صوتو مزير) انا طالع نبدل احم
خرج برا و طلق ضحكة مجهدة خلا لي مافاهمينش كايتعجبو ، جمعو الطابلة و ناضو لعيالات و واحد بواحد خرجو من الصالون حتى بقات غير لينا كاتنقب فزويتينات، سمعات صوت فالفوق و طلعات ودنيها
يونس: مابانش ليكوم بورطابلي !
راوية: لا شوف ياكما خليتيه فالبيت
دورات لينا وجهها بلا مبالاة و هو يبان ليها محطوط خرجات عينيها و ابتاسمات ، لاحت الزيتون لي فيديها و ناضت لتيلي شعلاتو من جنب لقات فيها صورة ديال يونس لابس كاسكيط مصور على غفلة مبتاسم ، لحسن الحظ مادايرش ليه لكود دخلات لي زابيل ، ابتاسمات بخبث و دارت ليه صيلونص خشاتو فصدرها و طلعات لبيتها لقات هند كاتبدل حوايجها
لينا: لفنون فين درتي ليا تيلي لبارح !
هند: راهوا فداك لقنت باقي فالشارج
مشات لتيلي ديالها حيداتو من الشارج و شعلاتو و مشات كاتجري تخشات فالطواليط، جبدات تيلي ديال يونس و تيلي ديالها و بدات كاتقيد فبورطابلها شي حاجة، غير كملات شغلها و جمعات شفايفها لقدام بإبتسامة، رجعات تيلي ديال يونس لصدرها و ديالها فيدها و خرجات من طواليط لقات معاذ عند لباب
لينا: مالنا مانخافوش ، حسات بيك واقف عند لباب و مابغاتش تخرج
معاذ: شكون هي
لينا: الخرية ا لخريا
طلقات رجليها لريح كاتفرنس قبل مايشدها خوها و رجعات لصالون لي كانو فيه تلفتات يمين و يسار مالقات حد و حطات تيلي فين لقاتو و رجعات لبيتها حطات بورطابلها فوق لفراش و حلات لفاليز ديالها جبدات سروال كحل سليم مزير و ديباردور واسع بيض فيه دوائر بالشيبي، لبساتهوم و حيدات سوتيامات باش مايبانوش تحت ديباردور و هزات مشيطة سرحات بيها شعرها و طلقاتو للقدام ، جبدات صبرديلة كحلة اديداس لبساتها و دارت ايكخون لوجهها على حساب الشمس و رشات ريحة عطرات راسها بيها ، هزات تيلي ديالها دارتو فالجيب و خرجات من لبيت، مشات للجريدة لي فيها لابيسين و طلعات فوق لكرسي كاطلل على لفيلا لي ساكن فيها عماد ، مالقات حد و لكن بقات كاتطل على أمل أنه يبان ، بان ليها خيال غادي جاي فالفيلا و رتاحت نسبيا مني عرفاتو باقي كاين ، خرج الأب ديالو عبد الله لابس سروال جينز و تيشورت كحل داير كاسكيط ، تحنات لينا باش مايشوفهاش و سمعات صوت عماد معاه
عماد: كولشي كاين فطوموبيل
عبد الله: مانسيتو والو ياك !
عماد: نو كولشي تما
عبد الله: هز معاك هاد شواية انا غانضرب دورة لداخل
مشا عبد الله و مابقاتش لينا سمعات حسو، طلعات راسها بشوية و بان ليها عماد لابس كاسكيط كحلة و شورط حد الركبة رمادي مع ديباردور بيض و كلاطيطة بيضة فرجليه مضارب مع شواية باش يهزها ، بقات كاتطلل عليه بحال لقطيطة و كاتبسبس ليه
لينا: بسسسسسس بسسسسسس
تلفت عماد لمصدر الصوت و شافها ابتاسم و جا عندها
عماد: اهلا زين صافا
لينا: لحمد لله و نتا
عماد: بيخير اوا فين كنتي غاطسة
لينا: والو غير دوران
عماد: كيف بقات يديك شوية!
لينا:(هزات يديها) لا صافي كانحركها دابا واحد لبومادة دارتها ليا ماما واعرة
عماد: هي خارجة
لينا: وي غاديين لعين فيتال
عماد: كنا تما لبارح زوين داك لمنظر
لينا: شنو خارج ولا غير الدار
عماد: غاديين فحالنا
لينا:(بصدمة) كيفاش دغيااا
عماد: ههههه راه جوج سيمانات و حنا هنا ، غادين لمراكش و من بعد أكادير
أمين: عرفتي شنو انا و لواليدة و معاذ و خالتي و هند و لينا و رانيا و عصام نمشيو فطوموبيل ديالي و يونس و خالتي راوية و محمد علي ورقية و ولدها انور و نجمة و أيوب فطوموبيل
حسن: و انا خشيوني فالكوفر ههههههه
يونس: ههههه جي نتا فطاكسي
راوية: اوا صافي يالاه بلا ماضيعو لوقت اكتر
هزو داكشي لي غادي يفرشو بعض من الماكلة و خرجو ، مشا حسن سبقهوم باش يشد طاكسي و تفرقو هوما على التقسيم لي دار ليهوم يونس و أمين و ركبو واخا مزاحمين الا انهم صبرو باش يدوزو وقيتة زوينة
وصلو للوجهة ديالهوم و بلاصاو لوطو هبطو هزو داكشي لي جابو و بقاو غاديين وسط الشجر و الربيع و المناظر الزوينة ، لينا غادة و حداها معاذ كايهضر معاها خالقين جو غير بوحدهوم و يونس لور مراقب كولشي هاز السوارت فيديه كايلعب بيهوم ، شافو خالو و جا حداه
محمد علي: امالك طايح عليك الظيم
يونس: لا والو
محمد علي: شفتي ديك لبنت
يونس: شكون !
محمد علي: هاديك لي صابغة شعرها بالصفر نسيت سميتها
يونس: لينا ! (بتعجب) مالها ?
محمد علي: كيجاتك ?
يونس: عادية مابيهاش
محمد علي: حماقيتي نتا اولد ختي ! فين باقي غاتلقا شي بنت بحال هاكداك الفورمة عندها زوينة و بوكوصة قاية و ضريفة شوف غير عويناتها كيف دايرين
يونس: و لاش كاتقوليا هادشي (كايعبر بيده) شنو باغيني نتزوج بيها ولا شنو
محمد علي: ههههه لا راه بغيتها لراسي انا بغيت غير رأيك
يونس:(وقف) شناهوا !?
محمد علي:(ضار شاف فيه) مالك ! جاتك عجب !
يونس: الدرية راه صغر منك ا خالي الله يهديك
محمد علي:و من بعد الى عجبتها و عجباتني السن ماشي موشكيل
يونس:(كايهز يديه) نتا راك حماقيتي الدرية عندها يالاه شي 23 ولا 24 و طامع فيها ! سير شوف ليك شوحد دقك فالعمر راك فايتها ب 20 عام ! عرفتي شناهيا 20 عام مايجمعها غير لفم بدل ساعة بوحداخرا اخالي سير سير
محمد علي: مالك ا صاحبي انا غير سولتك و شعلتي و زايدون الى بغيتها بصح لزواج راه ماغاديش ناخد رأيك مالك والدها و ناسيها سولناك و ندمتينا
زاد محمد علي و خلا يونس واقف كايشوف فخالو بغضب ، عض شفتو السفلية بعصبية و طلق النفس ، دار يديه فجيبو و تحرك تابعهوم.
بانت ليهو بلاصة مضللة بالشجر و حداهوم لما غادي بارد يروي العطشان و كايسقي الشجر ، فرشو تحت شجرة كبيرة و جلسو يرتاحو
معاذ: كيبقات يديك
لينا: صافي دابا كانحركها مابقيتش مقصحة كيف لول
معاذ: اوا على سلامتك ا زين
لينا: واش غاتبقا هنا حتال للعرس
معاذ: اه خليت للواليد شهادة طبية يدفعها ليهوم و هو نهار لخميس غايكون هنا هو و سمر
أمين: غاندهن واحد لبوماد ، لمهم لبارح راه جاو لبوليس فليل فاش نعستي و قلت ليهوم انا و يونس نفس الهضرة لي تافقنا عليها الى جاب الله رجعو و سولوك عنداك تفضحينا
لينا: واخا بغيت نشريها لوالديه مي على قبل زواجك غانستر لقضية
أمين: وا هو الا جيتي تشوفي راه من حقو يشك فينا ختو غادي تتزوج بيا و انا وياك غاديين معانقين جايين معانقين
لينا: كاينة واحد لحاجة سميتها الحوار كايديروهوم الناس لي بعقلهوم
أمين: لمهم لي وقع وقع و هو ماكانش قاصد يضربك
لينا: كاتدافع عليه 😡
أمين: لا ههههه انا غير قلت لي كاين لمهم سكتي دابا ها حسن غايركب
طلع حسن فطوموبيل و رجعو منين جاو، بلاصاو لوطو و هبطو تمشاو على رجليهوم فوق التراب و الربيع و الخضورة ، تضور يمين تلقا ناس جالسين و تضور يسار تلقا تاني الناس جالسين فوق الربيع مستمتعين بالجو، وصلو عندهوم لقاوهوم منشورين فوق الربيع و العيالات مجمعات نساو خلافاتهوم و استمتعو بالأجواء، وقفات لينا على معاذ لي هاز تيلي كايتكونيكطا مسند على شجرة و بقات كاطلل عليه ، درات قعدة القرفساء و حطات يديها فوق كتفو شافها و جمع تيلي بسرعة و توتر
لينا:(بهمس) ايمتا ناوي تعرفها على ماما
معاذ: شكون هادي
لينا: لالة مريم هيهيهي
معاذ: بغيت نعرف كيفاش عرفتيها
لينا: عندي مصادر ديولي حبي (شدات ليه خدودو) ويتيك على الزين ديالي ، نموت فهاد اللحية
معاذ: تي جمعي راسك راه حنا فالزنقة
لينا: سكت ولا غانضرب ليك شي بوسة تكون طويلة بحال لبولة لي طلقت داك النهار 😁
مشات لينا كاتضحك و مانتابهاتش ليونس لكان مراقبهوم من بعيد مخشي فوسط الشجر و الربيع كايكمي ، شافها بعدات عليهوم و لاح لكارو و عفط عليه و ساط الدخان بعصبية عض شفتو السفلية بعصبية و دار يديه فجيب سروال جينز و مشا تبعها و الاف الأفكار فبالو و اهمها هي لاش تابعها !! ولاش باغيها تسمح ليه !! ولاش كاتعامل مع معاذ هاكداك و بهاداك لقرب و أمين و مها ماكايقولو ليها والو ! واش ممكن يكون خطيبها ، بعد هاالفكرة الأخيرة حس بغصة فقلبو و جمع النفس و طلقها مرعودة . وقف وسط الربيع كايشوف فيها و هي كاتهضر فالتيليفون ، عيا مايحاول يتسمع عليها و والو مالقط حتى حرف كملات لمكالمة و كملات لمشي ديالها بجانب الجدول ديال لماء و شابكة يديها مور ضهرها و ساهية غادة ، جمع النفس و طلقها حاول يتصرف عادي و تمشا حداها و قرب حدا ودنيها و قال
يونس: بس بس
تخلعات لينا و بعدات كانت غادي تطيح فالما كون ماشدوها يديه و جرها عندو
يونس:(بمزاح) رضي بالك
لينا: (بعصبية) طلق مني ماتشدش فيا
طلق منها قادات حوايجها و دارت فيه شوفة كاتطيح لما فالركابي و ضربات فيه و زادت، مايأسش و تبعها يديه فجيبو و ابتسامة خفيفة مزينة ملامحو
يونس: كاتفرجي ف game of thrones
لينا: و نتا سوقك ديها فوجهك لي داير كيف الخبزة المرgومة
ضار عطاها بالضهر و قلبو ضارو كأن صخرة كبيرة محطوطة عليه عارف فصميم قلبو أنها كاتعجبو حيتاش فيها لموصفات ديال لبنت لي باغي و بشقاوتها و لسانها لماضي و مشاكلها قدرات تدير بلاصة فقلبو و تخليه يعجب بيها ، بملامح حزينة تمشا و هو اش عندو مايدير كون كان مصاحب معاها معاذ كون حاول يفارقهوم و لكن هوما مخطوبين و العائلة داخلة فهادشي ، مشا بهمو جلس فوق حجرة منطقة خالية من الناس و كاع ديك الإبتسامة لي كانت على وجهو تبخرات. حس بيد تحطات فوق كتفو و ضار شاف لينا مبتاسمة ليه و ملامحها كاتبان بريئة و جميلة
لينا: امالك ا ساط دغيا قلبتيها زي ألوان و رضيتيها رحلة سالوني
يونس:(حيد يدها من فوق كتفو و قلب وجهو) دابا يشوفنا معاذ و يفهم غلط
لينا:(جلسات حداه) و من بعد الا شافنا و الا فهم غلط
يونس: غادي يتشرا ليك صداع معاه
لينا: معاذ هههههه الا بغاني نفضحو هو صحيبتو يحل فمو
يونس:(شاف فيها بدهشة) كيفاش !!! واش كايخونك
لينا:وا لخراااا وا لخمامااااج (ضرباتو فراس) واش عندك هنا عقل ولا بعر وا معاذ ماشي خطيبي وا خوياا ا سي لخرا
يونس: هااااااااااا (حل عينيه بصدمة)
لينا: وا هيا ناري على دمدومة (عيباتو) هااااااا بقرة صافي
يونس:(شاف فيها بعيون بريئة و ابتسامة لطيفة) الا بغيتي
لينا: (قلزات ليه) هااك لبعابع لا تصاحبت معاك
يونس: (بحيرة) و علاش ! شنو ماعاجبكش انا !
لينا: ماشي قاضية ماعاجبنيش انا ماكنحملش داكشي التصاحيب غير تبرهيش انا نقولك اش كايطرا جوج كايتلاقاو كايتعارفو من بعد كايرتاحو لبعضياتهوم و كايتصاحبو يا اما واحد كايتفلا على لوخر ولا بجوج كايتفلاو على بعضياتهوم ولا بصح باغيين بعضياتهوم و هادي قليل فاش كاتكون لمهم بعد شهر شهراين كايبانو لمشاكيل و لصداعات و لغيرة ولا الدري كايقلب على الصداعات حيتاش مالقاش لي بغا فالبنت او كاتعطيه لبنت لي بغا و كايسوسها و كاتجي للكروبات تفرع لينا راسنا و دابا الى تصاحبنا انا حالة غادنكونو فهاد التلاتة لي ذكرت
يونس: انا ماغانتفلاش عليك الوغ ماشي لولا و نتي ماشي من لماركة لي تتفلاي على بنادم الوغ حتى التانية لا و بقات التالتة
لينا: يعني بصح باغيين بعضياتهوم (وقفات) اوا احنيني الى بصح ابدري باغي لبنت ماكاين لاش يخيط بيها الدروبا و الشوارع حتى يفصلو جلابة و كاع الناس يشفوها معاه و تبقا تكدب على دارهوم و تتخبع من ديبار يكون كولشي معقول ربي راضي و واليديها راضيين فهمتي ا كوليخو
يونس:(وقف كايشوف فيها) هممم دابا نتي كاتقولي ليا اجي خطبني من عند بااا
لينا: ها ها ها مسكين حتى نكون مذلولة باش نقولها ليك انا ا ساط غير شرحت ليك و صافي اما حتى الا جيتي كاع مانقبل عليك الكماي و زايدون نتا باقي مبرهش فعقلك و باغي تتصاحب يعني جامي تجي تخطب
زادت و خلاتو واقف كايضور هضرتها فراسو و كايشوف فيها . وصلات عندهو لقاتهوم هازين نص خبزة فيهوم دجاج محمر مع شوية ديال الدغميرة و كاس مونادا و كاياكلو ، وقفات على مها و بدات كاطبل فراس السعدية
لينا: اتيكا تيكا لالة اتيكا تيكا ا سيدي اتيكا تيكا لالة اتيكا تيكا ا سيدي
السعدية: مابقيتيش تحشمي ا لهيشة جلسي تاكلي تاكلي فيه السم
لينا:(جلسات حدا معاذ) عارفاك غير كاتضحكي
السعدية: شدي خبزتك
عطاتها نص خبزة و كاس مونادا هاواي و بدات كاتاكل بالجهالة لفم معمراه حتال للحد و تزيد تمدغ و تعض من الخبزة ، شافتها نجمة كيفاش كاتدير و نغزات ختها
نجمة:(بلهجة امازيغية) شوفي ديك لبنت كيفاش كاتاكول
راوية:غير لهيوش لي كاينين سبحان الله شوفي كيف عمرات فمها ناري وحلات ليها شوفي لهيه لايجيبو سبتها علينا
قلبات نجمة و راوية وجههوم اكنهم ماكانوش كايشوفو فيها اما لينا فدوزات دغمة بلا ماتندغها مزيان و وحلات ليها، بدا كايضربها معاذ فضهرها و هي عاد باش ماكاتزيد تخنق ، كولشي شاف جيهتها و هي مخنوقة ... جا حداهوم امين مخلوع عطاوها لما شرباتو و كايضربوها فضهرها عاد باش دازت الدغمة حتى ولات حمرة كيف ماطيشة
معاذ: كولشي غير بشوية عليك لماكلة ماغاتهربش
السعدية: الله يا بنتي الله من موصيبة لموصيبة مافهمتش اش هادشي واش تابعة ولا عين ولا حسد
لينا: (بصوت مبحوح) انا بيخير بلا ماتتخلعي
أمين: اجي نعسي هنايا راه مضلل
ناضت و حلقها كايضرها حيتاش تجرح ليها شوية مشات حدا أمين نعسات فوق مانطة مفرشينها تما
رانيا: قولي ليا اخالتي كيفاش لينا و أمين خوت بالرضاعة (شافت فيونس بعتاب) راه يالاه قالها ليا
خديجة: اوا شنو نقولك ا بنتي فاش ولدت أمين و ولا عندو عام مرضت و دخلت لسبيطار ديك ساعة كانت السعدية يالاه ولدات لينا و قابلاتو و بدات كاترضع فيه هادا ماكان
لينا:(مغمضة عينيها) شاد معايا الزحام من الصغر
أمين: ها ها ها شكون سوق ليك ا بنتي
خديجة: خاصنا نهضرو مع تريتور على حساب لعرس
رانيا: الحنة غاتكون نهار السبت و الحد العرس ياك
السعدية: ان شاء الله
راوية: خاصنا تريتور الفريع راه بنت الهلالي لي غادي تتزوج
لينا:(بهمس) و من بعد الى من طاسيلة الهلالي انا شخصيا ماعمرني ماسمعت بيكوم (نغزها معاذ باش تسكت) ااايييي راه قصحتيني يا الدحش
خنزر فيها و سكت كايسوف فالعيالات كايهضرو، تغدا كولشي و ناضو باش يتمشاو شوية و يكتاشفو المكان بقا يونس مجبد حيتاش عيا هو ولاد نجمة اخت راوية أيوب و عصام و معاه حتى معاذ متكي.
مشاو لعيالات تابعين الما و الخضورة و أمين غادي مع محمد علي عينو على رانيا لي ماكاتخليهاش مها تتفرق معاها ، شافتو لينا و فهمات مالو و مشات عند هند جراتها بلا ماتشرح ليها و مشات عند راوية
لينا: سلام خالتي
راوية: و عليكم السلام
لينا: ممكن تتمشى معايا رانيا شوية مع كيف شفتي هي و هند لي تقريبا قدي
راوية:ايييه واخا و لكن ماتبعدوش
لينا: واخا صافي
قلبات لينا الطريق و هند شاداها من يد و رانيا من يد
لينا: واش نتي ماغاديش تحني على داك لمسكين و تعطيه وقيت
رانيا: اش ندير راه ماما شاداني حداها ماكاتخلينيش نتحرك قالت ليا حتى نديرو العقد و نمشي معاه
لينا: غايبقا يتسنا مسكين تال جمعة اصلا الحد غادي يديك فخطرة شحال كاع بقا وايني على ام عندك
رانيا: وا صافي بلا ماتفقسيني
هند: اوا انا لاش جاراني
لينا: باش تشوفك و تقبل تخليها تمشي معايا فهمتي (طلقات منها) اوا دابا سيري فحالك دgي خلي لحيبان مع بعضياتهوم
تلفتات هند لقات أمين جاي مرجع يديه لور كايلعب بالسوارت كايبان زوين بشورط و تيشورت ، مشات هند و بقات لينا واقفة دايرة يديها على جنبها كاتهزز
مشا عند رانيا شد ليها فيديها و بقاو غاديين كايهضرو بعاد على راوية ، بقات لينا غادية بوحدها كاتمنضر فالناس لي مخيمين تما و فالخضورة و الريح كايضربها لوجهها كايرض روح ، حسات بشي واحد موراها و تلفتات لقاتو محمد علي جاي جيتها مبتاسم ، بادلاتو الإبتسامة الشيء لي خلاه يزعم و يزيد يقرب ليها، مد يديه سلم عليها و سلمات عليه بدورها
محمد علي: سمحي ليا الى برزطتك
لينا: لا عادي
سكتو بجوج كل واحد كايشوف فجيهة حيتاش ماعندهومش فاش يهضرو ، كايستمع غير خرير الما و حفيف الأشجار ... اخيرا جمع محمد علي بعض من الشجاعة و كسر الصوت بقولو
محمد علي: كاتفكري فالزواج !
لينا:(بصدمة) هااااا !!!
محمد علي: صدمتك ياك (كايحك مؤخرة راسو) ماتديش عليا
لينا:(وقفات) واش يونس لي سيفطك
محمد علي:(بتعجب) لا علاش غايسيفطني
لينا: (بعصبية) بلا تبهليل شوف قوليه انا ماغاديش نتصاحب معاه غير يهنينا و حتى الزواج ماكانفكرش فيه لا معاه هو لا مع غيرو
محمد علي: يونس بغا يتصاحب معاك !
لينا: بلا ماتدير راسك مافخبارك والو انا هضرتي قلتها ماباغاش نتزوج من دابا لا معاه لا مع غيرو
زادت و خلات محمد علي مافاهم والو كايحاول يربط الأفكار و يستنتج
بعد مسارية دامت ساعة وسط الربيع و الأشجار و الخضورة رجعو كامين لنقطة لبداية لقاو معاذ ناعس مسرح رجل طاوي رجل داير ذراعو فوق وجهو على حساب الضو و من الجهة الثانية يونس جالس متكي على شجرة داير لكيت ساهي و حداه ولاد خالتو الصغير عصام ناعس و الكبير أيوب هاز تيلي كايتفرج فمسلسل ، جاو بلا مايديرو الصداع على حساب لي ناعسين و جلسو رجليهوم كايزدحو بكترة المشي ، شخص واحد لي كان مكشر و مامفهومش حالو هو محمد علي لي كل شوية يتنهد بحال الا هاز جبل فوق ظهرو و كايشوف فيونس و يحولها للينا و هو لي عجباتو لينا من اول لحظة شافها بغاها تكون ليه ماعرفش علاش و لكن عجباتو واخا كاين اختلاف السن إلا ان القلب ماكايشاورش دخلات خاطرو فلحظات و بجمالها سحراتو و كان معول يتعرف عليها اكثر باش يجي يخطبها و لكن كولشي تبخر فاش عرف بلي يونس عينو فيها و مايقدرش يتقارن مع ولد خوه لي اوسم منو و اصغر منو واخا هو عندو الفلوس و لكن الوسامة عندو على قد الحال واخا مهلي فراسو و الشباب طار مشا ، تلف ماعرف مايدير و خصوصا فاش عرف رأي لينا فالزواج فقد الأمل فخطرة.
تعاشت العشية بعدما قضاو يوم جميل محمل بذكريات عمرهوم ينساوها ، هزو داكشي لي جابو و رجعو فحالهوم للفيلا دخلو مهدودين ماقادرينش يتحركو ، سبق أمين لدوش هو لول و تبعو معاذ وقفات لينا كاتسنا حدا دوش باش تدخل و لقات يونس موراها هاز حتى هو مسائيلو باش يدخل
لينا:(حيدات ليه يديه) وماتقيسنيش ا زماكور منين كاتفهم 😡 راه مافيا لي يتسنا
يونس:نتي ا زين غاتعطلي (جر خصلة من شعرها) شوفي غير شعرك قداك غادي تتعطلي فيه
لينا:(ضرباتو فيديه) بعد من شعري ا لباشار
يونس:(تحنا شوية و قرب لوجهها) ماتبقايش تعقدي حجبانك (سرح ليها حجبانها بصبعو و ابتاسم) كاتجي هاكدا زوينة
تصمرات فبلاصتها و حسات بالسخونية فخدودها و دغيا حمارو ليها و قلبها بدا كايضرب بجهد ، شاف خدودها لي حمارو و حط يديه على فكها قربها بيه اكتر و دوز وجهو من حدا وجهها و لهيب انفاسو كايضربو فحنكها اما قلبها بكترة ماكايضرب قالت دابا غايسكت ، دوخها بالحركة لي دار، حسات بلحيتو كاتدقها فخدها ، حسات بشفافو تحطو على خدها لي ولا سخون ، غمضات عينيها و قلبها حسات بيه قرب يخرج من بلاصتو، حيد شفافو من على خدها من بعد القبلة و مشا لحدا ودنيها رجع خصلة مور ودنيها و باسها فيهاة ، تسمعات ديك القبلة فجميع أنحاء جسمها وهي مازال مخدرة ماقادراش تحل عينيها ولا تتحرك تدفعو عارفة هادشي خطأ و لكن ماقادراش تبعدو عليها شلها بقبلاتو السخان ، ابتاسم ابتسامة حنينة وهمس فودنها
يونس: كاتكوني أجمل فاش كايحمارو خدودك بالحشمة
سمع حدا باب الدوش التقرقيق و عرف بلي غادي يخرج معاذ من تما ، بلا مايشوف فيها داز من حداها و خلاها واقفة متيبسة عينيها مغمضين و قلبها كايضرب بجهد حاسة بيه غادي يسكت
بقات واقفة مصمرة ماعارفة راسها من رجليها ماعمر شي واحد تجرأ و قرب ليها ماعمرها ماسمحات لشي واحد يقيسها فما بالك بأنه يبوسها ماشي مرة بل جوووج ، حسات بلي قلبها غادي يسكت ليها و قشعريرة شدتها من راسها حتال اصبعها الصغير لي فرجليها احساس جديد عليها ماعمرها ماتذوقاتو ، هزات يديها حطاتها على قلبها و بدات كاتحسس نبضو بلا ماتحس وقف عليها معاذ لابس شورط حد الركبة اسود و تيشورت و كايمسح شعرو الفازك بالفوطة و جار كلاكيطة فرجليه ، طل عليها لقاها مغمضة عينيها و حناكها حميميرين
معاذ: واااا العماالة وااا درب السلطان
ضربها بيديه بالمزاح حتى تزعزعات من بلاصتها و خرجات من داك التخشع لي كانت فيه و لاحظت بلي يونس ماكاينش و معاذ خارج من الدوش عاد سرات معاها بلي سبقها و دخل
لينا: (بعصبية) ولد الكلبة و الله يا ديلمك لا بقات فيك
معاذ: ا مالكي ياتا
لينا: ولد ال**** دخل لدوش سبقني و انا لحمي كولو كايقرص فيا
معاذ: اوا مني ماكايهركش راه لاباس الا غير القريص راه هانية (دور يديه على قرفادتها) زيدي قدامي حالتك مابقاتش عاجباني نتي
لينا:(بإرتباك) ما...م..مم... مالي ... ع..علاش
معاذ: وليتب كاتديري غير زبلة ولا جوج فالنهار مابقيتيش كاتديريهوم بزاف كنتي دايرة كيف البغريرة كاتطلعي من موصيبة و طيحي فوحداخرا
لينا: هههههه اوا اش غاتدير كل نهار و باراكتو 😅
معاذ: اجي فين مشاو هادو!
لينا: خليتهوم كايديرو كاسكروط
معاذ: اححح حتى انا فيا الجوع سمعي معدتي كاتغرغر
لينا: حتى انا يخخخخ حتى داك سوندويتش ماكليتوش باقي
معاذ: فين غاتبولي الدوش عامر غير حبسيها حتى يخرج يونس
لينا: لا بالعماااااااا و الله مانحبسها غانطلقها فالجردة و نكب الما و حد ماغايعيق
معاذ:(طلقها) ماتتعطليش
غير حيد يديه عليها و ضرباتها بجرية تال لكوزينة دارت شوية دياال لحلبة فالما باش تطلق و مشات كاتجري للماكانة ديال لما سداتها و رجعات للبيت جلسات معاهوم كأنها مادارت والو
معاذ: صافي طلقتيها !
لينا: اه صافي (ابتاسمات) دابا رتاحيت 😁
هزات بتي بان عضاتها و جغمات من كاس اتاي كاتاكل و كاتضور عينيها بكل براءة كاتسنا تسمع الخبار لي غادي تفرحها، بعد لحظات شافو كاملين فالباب بان ليهوم يونس لاوي عليه فوطه من لتحت وجهو عامر رغوة و شعرو حتى هو و شوية من صدرو كايشوف بزز سباب الشومبوان ، غير شافهوم فديك الحالة و كولهوم ضحكو و اولهم لينا
يونس: ها ها ها ضحكو ضحكو وا من الصباح و انا نعيط حد ماسوق ليا
راوية: ويلي يا ولدي اش هاد لحالة هابط بيها 😂😂
يونس: تقطع عليا لما و انا كاندوش باش غانشلل دابا 😠
حسن: خاصك تشوف راسك و الله الا لموت ديال الضحك 😂😂
أمين: واقلة لما مشا تسنا شوية و غادي يرجع 😂😂😂
يونس: شنو دابا غانبقا هاكدا عامر رغوة
معاذ: تسنا حتى تكرم الرغوة 😂😂😂 وا ناري على منظر وا مي كرشي
الحب ليس بالكلمات الجزء الرابع
محتوى القصة
التنقل بين الأجزاء