صباح جديد على جزيرة إبيزا ، يالاه شرقت الشمس هادي نصف ساعة ... ويالاه قدرت روعة تغمض عينيها حتى إستوطن ضوء الفجر زوايا منزلها بعدما مرت من رحلة تعذيب الذات، من حد حتى الحبوب المنومة لي شربت منهوم ثلاثة ديال الحبات ماقضاولهاش ...
تقيات ثلاثة ديال المرات ... من حد حتى معدتها عاداتها وخاصمتها ... بكات حتى شبعات من حد حتى حوايجها ماكانتش عندها القوة باش تبدلهوم ...
شعرها الأحمر كان منكوش فالسماء والمكياج تخربق فوجهها ولا شكلها بحال شي مهرج منحوس مطرود من السيرك
كانت روعة ناعسا على الكنبة بينما رجليها على الأرض بحرا كانت واضعة راسها على جنب الكنبة وخصرها ...
لكن صوت جرس الباب ضرب بحال شي مطرقة فوق راسها خلاها تفقز واقفة بلخلعة بلاما تشعر ...
فالحظات الأولى ماعرفتش راسها فين ... واش هي فدارها ولا فشي بلاصة أخرى ...لكن الجرس ودقان القوي والمتواصل خلاوها توگد بسيف عليها..
إبتلعت ريقها بخوف وأول شخص جاها على بالها هو جبل ... اكيد جاي باش ينتقم منها ... اكيد هو غادي يقتلها دابا ... غادي يضربها اولا لراسها حتى تسخف ومن بعد غادي يقطع الجثة ديالها ويلوحها فالزبل ...لا لا... غادي يلوح كل طرف فمدينة .... اه وغادي ياكلوها لكلاب
شافت فالأرض وتفكرات ، ماعمرها تنسى نهار لي طيحها على الأرض وهددها فاش رفضات عرضو فإستأجار رحمها ... لكن هاد المرة حياتها إنتهت على يديه بكل تأكيد ...
غمضت عينيها بقوة ثم فتحتهوم وهي كاتنفس بسرعة وبتوتر بحال شي غريق ...
توجهت بسرعة للمطبخ وهزات أكبر موس فمطبخها ثم قربت من الباب بتردد ووضعت يديها على المقبض وهوما كايترعدو ...
حسبت من واحد لثلاثة ثم فتحت الباب بسرعة ووجهت الموس للأمام باش تهجم ...لكن مالقات حتى شئ واحد ...
فين مشى؟...
خرجات من الباب بحذر ولتافتت يمين وشمال وفجأة لاحظت أقدام رجالية بالقرب منها... علات راسها ببطئ وبأعصاب مشدودة فلقات أمامها مباشرة وجه المجرم إيزيك لي قتل هاري بملامح مبهمة وماواضحاش وكانت على وجهو إبتسامة خبيثة كلها مكر ...
كانت صدمة قوية فوق طاقتها وهوى قلبها للقاع حتى أنها مابقاتش كاتحس برجليها .. وكأنهم ماتو ولا هوما فالأصل ماشي دياولها.
مد إيزيك يديه لي كانت مخفية خلف قفاز أسود جلدي ولمس خدها بهدوء ثم قال بصوت غليض:
-وأخيرا لقيتك ألمجرمة ...روعة الخطيب
ثم سحب يديه بسرعة وجبد المسدس عليه كاتم صوت من خلف خصرو أوجهو لراسها مباشرة و طلق رصاصة إستقرت في جمجمتها وطاحت روعة للأرض جثة هامدة
و فنفس الوقت طاحت من فوق الكنبة للأرض وهي كاتلهت وكاتفس بقوة ...
تحسست راسها برعب لكن فاش مالقاتش الدم تأكدت أنه مجرد كابوس لعين
إعتدلت بجلستها على الأرض وتنفست الصعداء باش تهدئ نفسها ....وهي كاتمتم:
- كابوس ... مجرد كابوس ... الحمد لله
مدت يديها مسحت جبينها لي كان مليان بقطرات العرق ثم تكات على الكنبة لي كانت خلفها ، لكن صوت جرس الباب لي ضرب من جديد زرع الرعب فقلبها وناضت بسرعة ...لكن الصوت لي سمعاتو كان نوعا ما مطمئن .
- روعة واش نتي لداخل ؟
قالتها تاليا وهي كادق فالباب وتصوني ...
تنفست روعة الصعداء مسحت وجهها بيديها و عوطت شعرها ثم خدات نفس عميق باش مايبانش توترها و تقدمت بهدوء لعند الباب وفتحاتو...
سحبت روعة دراعها بتوتر وبعدات لكن تاليا لاحظت دراعها لي كان عليه كدمات زرقين وكأن شي حد ضربها ولا قرصها وكملت وهي كاتقول:
-روعة راكي خلعتيني ، اشنو لي واقع معاك ؟ شوفي يديك كيف مزرقين .. شكون لي ضربك ؟
شافت روعة فيديها بصدمة .. هي مكانتش ملاحظة دوك العلامات على يديها ..مدت يديها وتحسست المكان لكن شعرت بالألم ... و ألم قلبها كان أقوى من ألم جسدها هذا لاش مالاحضتهومش..
شافت روعة فتاليا وفكرات واش غادي تقوليها أن هاد لاطراس ديال خوها جبل فاش شدها من درعانها بقوة وتاهمها بالقتل قبل مادفعو وتهرب !!
حمحمت روعة وقالت بصوت هادي :
- احم ...والو غير دوزت لبارح ليلة صعيبة فلخدمة وتخاصمت أنا وشي بنت خداما معايا ... ورجعت معطلة شويا وكنت عيانا بزاف هدا علاش نعست بلاما نبدل حوايجي وبلاما نمسح المكياج ...
حلت تاليا فمها بغات تهضر وتستفسر أكثر لكن روعة قاطعتها وهي كاتقول ..
-أنا غادي نمشي نبدل هاد الحالة وندوش ...
لكن قبل ماتحرك روعة من بلاصتها لاحظت طبعة على عنق تاليا وكانت واضحة وضوح الشمس أنها أثر لقبلة عميقة ... توترت تاليا فاش لاحظت نظرات روعة وبسرعة مدت يديها طلعت السحاب وخبات عنقها من أثر قبلات رافاييل ...
تنهدت روعة في محاولة تهدأت أعصابها وفكرت ان دوك العلامات ماغادي يكون سببهوم غير هاري لي مات هذا علاش سدات فمها ومابغاتش تعلق على الموضوع وقالت :
- ماغاديش نتعطل
أومأت تاليا بسرعة وخلاتها على راحتها وهي كاتقول:
- واخا خودي راحتك أنا غادي نصوب لفطور على ماتسالي.
تمشات روعة لغرفتها ثم غلقت الباب وتكات عليها لفترة وهي كاتفكر شنو غادي تقول لتاليا؟ ... كيفاش غادي تقولها أن الرجل لي كاتبغيه قتلوه ...أكيد غادي تحماق ؟
حيدت حوايجها ولاحتهوم فالأرض بإهمال ثم وقفت قدام المراية كاتشوف فدرعانها لي كانو مطبوعين بأصابع جبل ونسابت على خدها دمعة سخونة وهي كاتفكر قبلاتو ليها وكاتفكر صوتو وهمساتو وكاتفكر الحظن لي خلا قلبها يظرب بسرعة لكن فاش كاتفكر إتهاماتو ليها ... كايحرقها قلبها بزااف ، ماقدراتش تتصور انه يهددها بداك الشكل وكأنها مجرمة وهي غير بغات دير الخير فختو ياحسرة ...
مسحت دموعها و دخلت تحت الدوش وخلات الماء الساخن ينساب مع كل منحنيات جسمها العاري ... علات راسها وكتمت نفسها وخلات الماء يضرب فوجهها باش تقدر تتوگد شويا .
بينما فالمطبخ كانت تاليا سارحا بخيالها لبعيد حتى فيقها صوت تلفونها لي صونا فجأة .. جبداتو وكان الرقم غريب .. ترددت فالأول لكن رجعت فكرت انه ممكن يكون هاري ... بسرعة فتحت الخط وجاوبت
-الو ... الو
كان فقط الصمت هو المجيب وكملت تاليا وهي كاتقول بوهن .
- هاري ..... هاري حياتي
إعتصر الألم قلب رافاييل وبرك على يديه بقوة حتى برزت عروق يديه الرجولية وهو كايسمع مناداتها بإسم غريمو ... كره راسو فديك اللحظة وفكر يغوت فتلفون ويقولها " هاري صافي مات حيديه من راسك ومن قلبك " لكن ماقدرش يتكلم ورجع غلق الخط وخلاها كاتقول بلهفة :
-هاري ... حياتي عمري ... هاري جاوبني
لكن فاش لاحظت الصمت من جديد عاد إنتبهت أن الخط مفصول ... تنهدت بألم ثم رجعات التلفون لجيبها بإحباط .
خرجت روعة بعد دقائق من الحمام ولبست بيجامة باج ونشفت شعرها المبلول وحطت شويا ديال المكياج باش ترجع الحيوية لي هربت من وجهها وخرجت للمطبخ .
كانت تاليا كاتحط أخر طبسيل ديال الزيتون الأسود على الطبلة وقالت فاش شافت روعة :
-بصحة وراحة .. دابا وليتي كاتشبهي لبنادم
إبتسمت روعة بوهن وقالت:
-قبيلة كنت كانشبه للأشباح؟
ردت عليها تاليا بسخرية حزينة:
-لا كنتي كاتشبهي للزومبي.
ضحكت روعة بسخرية وكلسات مع الطبلة ومدت ليها تاليا كأس ديال أتاي فقالت روعة لتاليا وهي كاتشوف فيها بترجي :
- إلى سمحتي أتاليا مديلي الأنسولين من الثلاجة لي موراك .
إستغربت تاليا من سلوك روعة المهدب ، فعادتا وبسبب العشرة والمعرفة ديالها الطويلة معاها كانت غاتقولها بصريح العبارة وبهاد الطريقة"الكلام الفاحش تگعدي جيبيلي لانسولين من ثلاجة " لكن اليوم هي مأدبة معاها بزاف وهادئة كثر من لقياس...
ناضت تاليا وحلات الثلاجة ومدتلها الأنسولين ورجعت كلست وتسناتها حتى سالات من حقن نفسها بيه وهزات روعة كأس ديال أتاي فيديها وعاد قالت تاليا باش ترضي فضولها القاتل :
حطت روعة الكأس من يديها على الطبلة بهدوء ثم رسمت إبتسامة مزيفة على وجهها وقالت:
-فالحقيقة أنا گاع مامشيتش للڤيلة ... خديت الرقم ديال هاري من عند عصام وعيطتلو هو جا عندي للنادي لي كانخدم فيه
أومأت تاليا براسها بتفهم وقالت :
-ايوا واش عطاك السي دي .
حمحمت روعة بتوتر ثم قالت بعد صمت :
-تاليا .....هاري غير كان كايكدب عليك .. نتي كنتي باغيا تفرقي عليه بسبب خوك وهو ماستحملش وكان باغي يصارح سي جبل بجدية علاقتو معاكي ... هدا علاش قالك بأنه عندو صور عليك باش تبقاي غير ليه بوحدو.
تصدمات تاليا فكلام روعة، يعني واش هي تستاهل منو يعدبها ويبكيها بديك الطرقة المبتدلة ...شافت تاليا فروعة بحزن وقالت:
- مكانش عليه يدير بحال هاد التصرف ... هو عارفني كانبغيه وأنا بغيت نتفرق عليه غير حيت خفت عليه من خويا جبل ... خفت لايأديه بسببي إلى عرف بعلاقتنا ... روعة أنا مانقدرش نستحمل إلى وقاعتليه شي حاجة أنا ممكن نموت فيها ... هدا علاش زطمت على قلبي وقررت نتفرق عليه ولكن هو الوحيد لي كايخلي قلبي ينبض أنا بسببو كانحس براسي عايشا اختي روعة ...
حمدت الله روعة فاش ماقالتلهاش الحقيقة ، كانت عندها شكوك أن تاليا ماتقدرش تستحمل خبر قتل هاري ، ودابا هي أكدتلها أنها عملت الصواب ...
لكن لي حز فقلبها ومارضاتش بيه ، هو أن جبل كون عرف بلي ختو عندها علاقة مع هاري كان غادي ينوض الدنيا وچلسها ولكن هي بالنسبة ليه مجرد عاهرة رخيصة ممكن يستأجر رحمها بفولسو فالوقت لي بغا...
ختو حرام عليها وبنات ناس مكاين مشكل ... ولكن هذا هو الرجل الشرقي والعربي عامة...كايبالغ فنظرته الملائكية للمرأة وكايخرجها من تكوينها البشري المعقول والمقبول لكن عند أول زلة ليها كايدفعها من إرتفاع شاهق حتى الطيح للأرض جثة ثم يلقبها بالعاهرة ...
إبتلعت روعة ريقها بتوتر وقالت بعدما رجعت للواقع لي كايجبرها على تأليف المزيد من الكذب :
- فاش طلاقيتو لبارح ... قالي بأنه جاتو شي فرصة عمل فأمريكا وملي نتي قررتي تخلاي عليه هو قبل العرض غير باش يقدر ينساك ... هو سافر لبارح ... كانت طيارتو مع 3 ديال صبح . أوصاني نقولك بأنه كايبغيك بزاف وماعمرو غادي ينساك حتى يموت وطلب مني نقولك ماتنسايهش وخليه ذكرى جميلة فقلبك.
غمضت روعة عينيها بحزن فاش لمحت دموع تاليا فعينيها ... هاري فعلا سافر لبارح مع 3 لكن ماشي لأمريكا بل للسماء ...
ناضت روعة بتعب وقربت من تاليا وعنقتها وخلاتها تبكي فحضنها وهي كاطبطب على ظهرها بحنان وكاتمنى فخاطرها ماتفرش كدبتها ...
-غادي تنسايه احبيبتي ... غادي تنسايه
قالتها روعة بصوت هادئ فهزت تاليا راسها وبعدات من حظن روعة وهي كاتمسح فدموعها وقالت باش تبدل الموضوع لأنه فعلا كايألم قلبها :
- خلينا نفطرو ..جاني جوع...
إبتسمت روعة بوهن ورجعات لبلاصتها لكن فين هي هاد الشهية لي غادي تخليها تاكل ... شربات من كأسها ديال أتاي ثم شافت فتاليا لي كانت كاتحاول تخفي حزنها فالأكل وقالت بتردد فاش تفكرت المنظر ديل جبل وهو كلو دمايات :
- تاليا ... واش جبل بيخير؟
علات تاليا راسها وشافت فيها بملامح حزينة وقالت:
-ماعرفتش ،.. مابقيتش شفتو من لبارح فاليل ... فصبح سولت لالة تيماء عليه وقالتلي أنه مارجعش لڤيلة كونتيسا من الليل..
هزت روعة راسها بتفهم وفكرت أنه أكيد غادي يكون ناعس فالطبيب بعد كل الدم لي نزفو ... شعرت بالألم فقلبها عليه رغم إتهماتو الباطلة ليها إلا أنها عادراه وماقادراش تلومو وأي واحد كان فبلاصتو غادي يأول نفس شئ فدماغو عليها . هي اخر شخص شاف هاري معاه وأكيد كل أصابع الإتهام غادي تتوجه ليها هي.
فمكان مابعيدش بزاف على ڤيلا كونتيسا هو فقط على بعد شارعين ... وفداخل مبنى عالي وبالضبط فوسط منزل فخم وكبيير ، الإطلالة ديالو على البحر وكلو زجاج بينما الأتات فخم وكلاسيكي وغالب عليه اللون الأسود والأبيض ...
كان جبل ناعس على سرير ناعم دائري الشكل ولونه أبيض ...بينما أنامل رقيقة أنثوية مطلية بطلاء أظافر في اللون الباج كاتمسح العرق من على جبينه بكل هدوء ورقة وجمال .
تململ جبل بإنزعاج فاش شعر بلمساتها وفتح عينيه ببطئ لكن فجأة طار على ديك اليد لي كانت فوق جبينو بقوة وقال بصوت مخيف:
-روعـــة ..
-جبــل
لكن فاش سمع داك الصوت الناعم وفتح عينيه مزيان سحب يديه وحط راسو على الوسادة بإستياء
ظهرت إبتسامة أنثوية رقيقة على وجه البنت وقالت بمزاح:
-ياريت كون كنت روعة اسي البارون غير باش مانشوفش نظرة الإستياء فوجهك ملي شفتيني
إبتسم جبل بسخرية وهو كايتفكر عيون روعة الشمسية وقال:
-واش قيمة السماء الى مكانتش الشمس لي تنورها ... عينيها عسلين بحال الشمس فوقت الغروب
ضربت البنت على يد جبل بخفة وقالت:
-عندك زهر ملي قلتي عينيها عسلين أما كون عتابرتها إنهانة منك ليا ... لكن غلاوة العسل على قلبي كبير وبسبب الرموش الكثيفة ولعيون العسلية أنا قدامك اليوم أسيرة
إستقام جبل و چلس وهو كايتفحص زوايا الغرفة بعيونو الزمردية ثم قال بتسائل :
- ماتقوليليش أنورسين أنني ناعس على سرير أسد مالك
إبتسمت نورسين بسخرية وقالت:
-كون شفتي شحال تشكى وتذمر من النعاس على الكنبة ضطريت نديرليه المساج لضهرو جوج مرات ملي فاق ...
قهقه جبل بسخرية وهو كايقول:
- يستاهل ...
ناضت نورسين وقالت وهي كاتقرب من الباب :
-الدكتور ياسين وسي دون ماركيز والرقيب رافاييل ديمورو على برا كالسين مع أسد إلى كنتي كاتحس براسك شويا مزيان خرج نفطرو مجموعين وإلا ماقديتيش نجيبلك لفطور لعندك.
رد عليها جبل بلهجة ساخرة:
- في الحقيقة ماكرهتش ناكل غير هنا ولكن خفت لايشوفك اسد مدخلالي الصينية ويحسابلو جايبالي الفطور الرومانسي الصباحي ... لا لا ماعنديش إستعداد ندابز على صبح ولا نعطي تبريرات لراجل كايغير من لحوايج لي كاتلبسيهوم امدام نورسين ...
ضحكت نورسين بسخرية وقالت:
-اشنو كاتوقع من واحد متملك نرجيسي ....
عقد جبل حواجبو بإستفهام وقال:
-متملك نرجيسي؟؟؟؟
قربات لعندو بسرعة ودارت صبعها على فمها وقالت:
-شووو عنداك يسمعك .... هو مكايبغينيش نلقبو بالمتملك النرجيسي وبالخصوص إلى سمعها من شي واحد غيري ....ولكن أش غاندير مع شبلي الصغير كايغير عليا بزااف.
ضحك جبل بسخرية على طفولية نورسين واخا فعمرها 31 سنة لكن طريقتها وشخصيتها من نهار لي تعرف عليها وهي طفولية ، ثم إستقام من فوق السرير وقال وهو كايشوف راسو لابس بيجامة حريرية رجالية فاللون الأزرق غامق فتوقع أنها ديال أسد و قال:
- الالة الله يدومها محبة والله يطول العشرة حتى نشوفو وليداتكوم
ردت عليه نورسين وهي كاتحل الباب :
-ياربي أمين ... نخليك تبدل حوايجك على خاطرك ...حوايجك راني صبنتهوم مزيان ونشفتهوم وحددتهوم ...غادي تلقاهوم فلماريو الباب الوسطاني
رد عليها جبل وهو كايتوجه للماريو :
-شكرا امدام نورسين لهلا يخطيك
-العفو هذا واجب
لبس جبل حوايجو وهو كايشعر بالجسم ديالو تعبان ثم تقدم أمام المراية وهو كايغلق أزرار السوميج الأبيض كان شعرو الأسود مبعثر على جبينه بشكل مثير وعيونو الزمردية كاتلمع بالشر ...
شاف فلمراية وميل راسو .... تحسس الضمادة الصغيرة لي كانت فالمأخرة ديال راسو و تفكر روعة كيفاش دفعاتو للأرض ولي وقاع فليلة الأمس وموت هاري بديك الطريقة الوحشية... وكره راسو حيت تاق فوحدا بحالها وخلا قلبو ينبض على قبلها .
عقد حواجبو بغضب وهو كايشوف فلمراية وزمجر بصوت شيطاني خشن:
- ياويلك مني ياروعة ... ياويلك وتكوني متورطة مع الكاريبي ... غادي نسحب روحك بصبعي الصغير وغادي ندفنك فقاع الأرض .
هز السترة ديالو ودارها فوق كتافو ثم حل الباب وخرج ... تمشى فالممر الصغير وهو كايسمع اصوات وتمتمات حتى طل عليهوم بشكلو المثير بحال شي مودل معلق سترته خلف ضهرو وشادها بصبعو السبابة وداير يديه فجيب سروالو .. وكايشوف فيهوم كانو ملتفين على طاولة الأكل بينما نورسين فالمطبخ كاتوصل الأكل للطبلة وترجع .
ضار شاف فيه أسد فاش تحسس وجودو وظهرت إبتسامة جانبية خبيثة على وجهو وقال:
- يا أهلين بإبليس
قلب جبل عينيه بغيظ وكلس فجنبو... وكان يلقى فديك اللحظة لي كناه بهاد اللقب البغيظ كان غادي يعلق مشنقتو بيديه ويعدمو ... اش كاتعني الشيطان السوري؟؟ ... علاه هو شيطان؟؟ ..
لكن هاد الإسم البغيظ إنتشر كالنار في الهشيم وكلشي ولا ملقبو بالشيطان السوري حتى إلا سولتي شي حد من معارفو ياغايناديه البارون أو الشيطان السوري وهو كايكرهوم بجوج حيت سميتو وااضحة وباينة ومتكونة من ثلاث حروف ...جـ بـ ل واش صعيبة زعما .؟!
تجمعو الأصدقاء على طبلة الفطور وجلست معاهوم حتى نورسين دردشو وحكاو شوية وتناقشو فموضوع قتل هاري لكن رافاييل طول الوقت وهو سرحان فخيالو وكايتعصب غير كايتفكر صوتها وهي كاتنادي بإسم هاري ... لو كانت ناداتو هو بنفس الطريقة وبنفس الهمسة مكانش غادي يحس براسو حتى يوقف عندها وياخدها فحضنو ... بقا ساهي حتى سحباتو نورسين لي عمرت ليه كأسو بالقهوة وهي كاتقول :
-كول أرافاييل مالك ساهي؟؟
تنحنح رافاييل بتوتر وبالخصوص فاش هز عينيه ولقا جبل كايشوف فيه بحدة ويحسابو بلي عرف بموضوع تاليا لي باسها بسيف عليها فالأمس .. لكن مكانش عارف أن جبل حتى هو مكانش فهاد العالم بل كان كايفكر فالبنت لي سحبت كل خلية من عقلو وسرقات قلبو وفلخر غدراتو ...
-جبل هاديك البنت لي طلبتي مني نتبعها لبارح ... واش كاتعرفها ؟ يعني واش شفتي وجهها؟ ... واش عندها علاقة مع الكاريبي؟
قالها رافايل وهو كايمسح شفايفو بمنديل احمر بتوتر فوضع جبل الشوكة من يديه وشاف فرافاييل ببرود بعدما فكر شويا ثم قال:
- لا مكانعرفهاش , ماقدرتش نشوف وجهها ولكن فاش شفتها خارجا من الفيلة كاتجري شكيت فأمرها.
تبادل أسد النظرات مع نورسين وغمض عينيه وفتحهوم بمعنى "مكاين لاش تهظري " هوما بجوج شافو جبل فاش كان شاد روعة وكايغوت عليها لكن استغربو فاش نكر الأمر وكأنه كايحاول يغطي عليها
تنهد دون ماركيز وقال:
-من نهار لي قالي عصام انك كلفتي هاري باش يكون جاسوس عند الكاريبي كنت متاكد أنه مستحيل يبقى عايش وسطهوم ... هاهو مسكين مات بلا مانستافدو حنا ولا يستافد هو حتى حاجة .
ضاقت عيون جبل بآسى وتنهد بعدما وضع كأس القهوة على الطبلة وقال:
- هاري مكانش يستاحق موتة بحال هاديك... كان رجل شريف كايقلب على العدالة ... والموت ديالو ماغاديش يمشى سدى غادي نكملو الطريق وماغاديش نرضخو ولا نستسلمو حتى نشفو جماعة الكاريبي على حبل المشنقة.
وافقوه كاملين الراي فأكيد هاري ماضحاش بحياتو باش هوما يخافو ويتراجعو للخلف بسبب موتو ...
قال أسد بصوتو الرجولي بعدما تنحنح:
- احم ...ماعرفتش علاش ماخديتوش من عند هاري السي دي لي قال عليه لرفاييل؟ ، كنتو معاه بجوج داخل الڤيلة وكان كايضور حداكوم ...
شاف جبل فدون ماركيز فاش تفكر اللحظة لي كان فيها هاري متمسك بيد روعة وطالعين للغرفة ، وماقدرش يقول أن على هاد السبب مابغاش يقتاحم عليه الخلوة .. فكر جبل فديك اللحظة أنه فلحضة الإشتباك غادي يتسلل لغرفة هاري وياخد منو السي دي خلال إنشغال رجال إيزيك فالإشتباك لكن الأمور سارت عكس التيار وجبل إنصاب بجرح غائر فراسو فاش نفد من مسدسه الرصاص وضطر يقاتل بيديه .. لكن فاش لقى فرصة باش يتسلل للطابق الثاني ماترددش وطلع لكن كان فات لفوت وهاري كان مقتول .
قالت نورسين بأسف وهي كاتشوف فيهوم:
-السي دي كان ممكن ينهى هاد الصراع كامل ولكن دابا هاري مات ودا السر ديالو معاه للقبر.
فكر جبل فكلام نورسين مزيان ثم قال بعد صمت مقاطع حديثهوم :
- صحيح ان هاري مات ، لكن السر ديالو مازال عايش ، وبما أن الكاريبي قتلوه فهذا كايعني أنهم عاقو بيه وموضوع السي دي فراسهوم ... دابا كاين إحتمالين ... ياإما قتلوه وخداو السي دي وحرقو المعلومات لي فيه ... ويا إما هوما براسهوم ماعارفينش فين هو وكايقلبو عليه ...
شاف فيه رافاييل وإبتسم بعدما إكتملت الفكرة فراسو وقال :
- وحنا خصنا نسبقوهوم للسي دي
رد عليهوم اسد بحماس:
-تماما ...لكن فين كاضنو أنه غادي يكون مخبيه
شاف فيهوم الدكتور ياسين وقال:
- واخا أنا ماعندي دخل فهادشي ولكن من خلال هادشي لي سمعت منكوم فأنا كانضن أنه مخبيه فالڤيلة بلازا لي ناض فيها صداع ...
عارضو الدون ماركيز وقال:
- لا كون كان مخبيه فالڤيلة كانو غادي يلقاوه الكاريبي ...عاقل فاش دخلنا للغرفة لي كانت فيها الجثة ديالو كانت مقلوبة سفاها على علاها وهذا دليل على أن الغرفة تم تفتيشها مزيان ...
رد عليهوم رافاييل وهو كايقول:
- الغرفة مافيها حتى حاجة حتى رجالي فتشوها مزيان وكاع السيديات لي كانو فالغرفة كانو مجرد اغاني روك وبلاك ميتال وأفلام وشي تخربيق ماعندو حتى علاقة بالسي دي المطلوب .
مرت لحظات صمت وروعة ماقدرتش تغادر عقل جبل حتى انها تسببت ليه فحريق الراس وهو كايتفكر يديهوم لي كانو متشابكين ... غمض عينيه بقوة ثم حلهوم وشاف فرافاييل و قال بتردد:
- مازال ماعرفتوش شكون المجرم لي قتل هاري .؟
شاف فيه رافاييل وقال بهدوء:
- راهوم باينين الكاريبي
رد عليه جبل بإصرار:
-ايه عرفت ولكن شكون فيهوم بالضبط؟
شافو فيه كاملين بتعجب من فضوله الغريب فجاوبو رافاييل وهو كايشبك أصابع يديه فوق الطبلة.:
- حاليا الجثة ديال هاري مازالة فمستودع الأموات .. والسبب الموت ديالو هي الرصاصة لي إخترقت راسو وأنهت الموضوع ، بالإضافة لأربع رصاصات فالصدر ورصاصة فالبطن والمجموع هو 6 رصاصات ...
-لي قتلو بديك الطريقة باينا فيه شخص متدرب مزيان وقلبو ميت ...
قالتها نورسين وهي كاتشوف فيهوم فرد عليها رافاييل وهو كايوافقها الرأي :
-فعلا مكاينش من غيرو إيزيك هو لي قتلو لأن جوج رجال لي كانو مقتولين حدا هاري كانو من رجال إيزيك والرصاص لي كان داخل أجسامهوم من مسدس "الماغنوم" ديال هاري أما الرصاص لي تضرب ييه هاري حسب الطب الشرعي فكان من مسدس "ديسرت إيجل" وهو مسدس من صنع جيش الدفاع الإسرائيلي وكايتصنع فقط فأمريكا وإسرائيل وماشي من الساهل الحصول عليه وثمنو غالي .
تنهد أسد وقال :
-يعني وقاع بين رجال إيزيك وهاري إشتباك بالرصاص
رد عليه رافاييل وقال:
-تماما .. الكلب إيزيك هو لي قتل هاري .
تنهد جبل بتعب وغمض عينيه لثواني باش يستجمع أفكارو . يعني روعة ماقتلاتوش! ... ولكن اشنو علاقتها بيه ؟... وعلاش كانت مع هاري فالغرفة ؟ ... وعلاش ماقتلوهاش حتى هي كون مكانش عندها يد فالموضوع ...؟
إلا إذا كانت متعاونة معاهوم وهي بطريقتها غرات هاري لي كان سكران بجسمها وحركاتها المايعة وهادشي تم تحت أنظارو غير باش تستفرد بيه فغرفتو باش تسمح لإيزيك يقتل هاري بلا مايثير الشبهات ...
هاذي نظرية أخرى ... روعة ماقتلاتش هاري لكن هذا مكايعنيش أنها بريئة فنظر جبل أكيد عندها علاقة مع الكاريبي ، وهو غادي يكشف هاد السر .
قاطع أفكارو أسد وهو كايقول بصوت عميق وحازم:
- حنا دابا غادي يخصنا نخدمو على السي دي ونلقاوه بأي طريقة كانت
لمعت فذهن جبل روعة ... هي أخر وحدا شافتو وأكيد هي عندها معلومات تقدر تفيدهوم ... قاطع أفكارو رافاييل لي قال بتسائل :
-تفكرت ...جبل فين هو التسجيل لي صورتي بالكاميرة ؟؟... اكيد غادي ينفعنا ... عطيه لي نشوفو .
تنحنح جبل بتوتر ... وشاف فدون ماركيز بنظرة كاتعني " دوي ترعف " ثم قال وهو كايتصنع الثبات
-ااه التسجيل ... مع الأسف نسيت ماشعلتش الكاميرة فاش دخلت لڤيلا بلازا ..
توسعو عيون رافاييل بصدمة وشاف فيه دون ماركيز بإستنكار ... التسجيل راه عندو وهو عطاه الكاميرة قبل مايبدا الإشتباك إذن علاش كاينكر :
-مستحيل أصاحبي فين كان عقلك فييين
قالها رافاييل بحدة لكن دون ماركيز تدخل وقال باش ينقد الموقف :
- فالحقيقية أنا نسيت ماسارجيتش باطري ديال الكاميرة هذا علاش حتى وصلنا ولقيناها طافيا ومكانش عندنا كيف نديرو .
تنهد رافاييل بغضب وابتسم جبل ابتسامة رضى وهو كايشوف فخالو لي غطا عليه الكدبة بكدبة وحداخرا لكن ملامح داوود كانت كاتعني ... "غادي تعاودلي كولشي غير بلاتي عليك ."
-جبل واش نتا عارف شي حاجة ؟
قالتها نورسين وهي كاتشوف فيه بشك فرد عليها جبل بسرعة بعدما إستوعب سؤالها:
- اشنو غادي نعرف كثر منكوم أمدام نورسين؟
جاوباتو نورسين بصوت هادئ وملئ بالمكر؟
- ماعرفتش !...شوف نتا .
شاف فيها أسد ودار فيها نظرة كاتعني " سكتي " فتنحنحت نورسين وقالت وهي كاتمد يديها لكأس جبل:
-طبيعي سبعة ديال الغرزات لي درتليك الحمد لله ملي ماتهرستليكش الجمجمة ديال راسك لأن الجرح كان عميق بزاف وضطريت نغرزليك من الداخل ومن الخارج يعني راه عندك 14 غرزة فراسك ضاروري غادي تألم ... ولكن كيفاش حتى ضربتي راسك هاد الضربة كلها ؟
قلب جبل عينيه بملل من كترة الهضرة لي فياسين ولبس السترة ديالو وهو كايحاول يتجاهلو فكمل ياسين الثرثرة ديال أي طبيب كاتهمو صحة المريض وقال:
-اه قبل مانسا راني كتبت لسي دون ماركيز شي مسكنات ديال الألم...واش شريتيهوم اسي داوود ؟.
شاف فيه داوود وقال وهو كاينوض من بلاصتو:
- اه راهوم فالسيارة .. خليني نوصلك أولد ختي ..ماخصكش تسوڨ السيارة ونتا فهاد الحالة .
بغا جبل يعتارض حيت هو متشوق بل يحترق شوقا باش يمشي يشوف روعة لكن فاش لاحظ نظرات نورسين المتشككة في مصداقيته قال وهو كايغلق زراير الكوستيم بصوتو الرجولي الجاد:
- واخا لي بغيتي..
وكمل وهو كايقول فنفسو "غير صبري عليا اروعتي علاما نتفك من هاد المجموعة الفضولية وغادي نجيليك الغزالة ديالي.."
قرب جبل من أسد وصافح يديه بإمتنان وهو كايقول :
- شكرا بزاف على الإستضافة أسي أسد مالك ...
رد عليه أسد وهو كايبتاسم برزانة :
- العفو هذا واجد اصاحبي
رد عليه بإبتسامة ثم وضار عند نورسين باش يشكرها وقال :
-مدام نورسين سمحيلي إلا عدبتك.
إبتسمت نورسين وقالت وهي كاطبطب بخفة على كتفو :
- نتا غير برالينا وعدابك راحة اسي حبل .
ضرب ناقوس الغيرة فقلب أسد و سحب يديها لي كانت كاطبطب على كتفو وشاف فيها بمعنى " غادي نقطعليك يديك إلا عاودتي حطيتيهوم على شي حد من غيري" فسحبت نورسين يديها بإحراج ، وإبتسم جبل فاش فهم غيرة جبل الواضحة منو ... اكيد ماغاديش يسرقليه مرتو مالو على هاد الغيرة كاملة .
خرجو كاملين من منزل أسد ونورسين ومشا كل واحد لشغالو لكن أسد ماتسرطاتلوووش وبدا يضور فدار وينكر
-أسد حبيبي راه جبل صديقنا بجوج مايستاهلش تغير منو .
علاش مايغيرش منو وهو كاينافسو فالجمال والرجولة بالإضافة لوسامتو ولعيونو الزمردية الزايغة والمايعة وهو كايعرف جبل مزيان رجل نسونجي وفينما كانت شي بنت زوينة كايتسلط عليها ومكايتفكش معاها حتى ياخد داكشي لي بغا .. بالإضافة أنه عندو سلاح اللسان كايعرف يغازل لبنات ويشدليهوم الخاطر وحتى شي وحدا مكاتقدر تقاوم سحرو عليها .
- مانعاودش نشوفك كاتصرفي معاه بديك الطريقة ولا غايكون عندي معاك مشكل كبير.
ضارت شافت فيه وقالت بسخرية قارسة:
- اشنو ياكما عاود غادي تهجرني 9 سنين وحداخرا ...
شاف فيها أسد بغضب حيت فكراتو فالماضي لي كايكره سيرتو فناض بغضب وقال بصوت مخيف:
-أنا غادي نمشي ندوش
تنهدت نورسين فاش حست بيه تقرس من سخريتها فقالت وهي كاتحاول تغطي على كلامها :
- أسد .. حبيبي ... ماتقلقش مني
تجاهلها أسد وكمل طريقو فحطت نورسين داكشي لي كان فيديها وتبعاتو وهي كاتناديه بصوت ناعم:
- اساااااد حبيب قلب ننور... ماتقلقش مني يا شبلي الصغييير ...
ضار شاف فيها أسد بغيض ودخل للغرفة وحيد التيشرت لي كان لابس فظهرت عضلاتو الرجولية ووشم القلب الأسود أسفل بطنو ...
لحقت عليه نورسين للغرفة وغير شافتو وهو عاري الصدر إبتسمت بمكر وعضت على شفتها السفلية وقالت بصوت رقيق:
ضحك جبل على حركاتها وتحنى بسرعة هزها من الأرض حتى غوتت بسبب سرعته ومن بعد ضحكات فاش قال بصوتو الرجولي وهو مدخلها للحمام .
-رتبي مشاعري لي بعثرتيهوم بجمالك هوما اللولين وعاد فكري فالدار ...
وطبع قبلة عميييقة على عنقها قبل مايغلق باب الحمام موراه برجليه ... حطها على الأرض ثم قرب منها وبدا كايفك ملابسها من على جسمها ويطبع قبلاتو الرجولية على شفايفها وكل شبر من جسمها.. اووووو 19+ ( استغفر الله العضيم 🙅)
بارون الجزء 24 ياويلك مني ياروعة
محتوى القصة
التنقل بين الأجزاء