خدات روعة نفس كبير باش تضبط أعصابها وهي واقفا خلف باب مكتب مارتن ، لكن داكشي لي سمعاتو من إيدوارد مابغاش يفارق عقلها كان كايهدد سلالة البارون وسمعت إسم جبل ... اشنو كايعني هادشي كامل واش إيدوارد واحد من العصابة لي باغين يخطفوها .
طردت دوك الأفكار من عقلها ودقت فالباب ثواني وأذن ليها مارتن بالدخول ..كانت كاتحس بالتوتر وهي كاتقرب من المكتب حتى كلست ... علىّ مارتن راسو وشاف فيها بإستنكار ثم قال :
- اش بغيتي ؟! ... ناس راهوم كايتسناوك .
تنهدت روعة ثم خرجات ورقة من حقيبتها وحطتها قدامو على المكتب وردت عليه برسمية :
- سيد مارتن يؤسفني القول أنني غادي نستقل من الخدمة معاك .
شاف فيها مارتن بصدمة وبقا كايرمش علاما استوعب الامر ثم حنا راسو بعدم إهتمام على الاوراق لي كانت على المكتب وقال :
كل مكان كايدور فبالها هو جبل والعصابة لي تابعاها .. هي فالكونتيسا وتحت جناح جبل كاتحس بالأمان وماشي فصالحها أبدا أنها تخرج من الكونتيسا وبالخصوص فوقت متأخر وبوحدها والا مصيرها ماغاديش يسلك بحال هاد المرة وهاد الثعلب شارف باغي يدير ليها لعصا فالرويضا .. كانت غادي تموت بالفقصة وهي كاتشوف فيه كايضحك بهدوء وبدم بارد عكس البركان لي شاعل داخل قلبها .
- نتي لي فيديك الحل دابا ... يا إما غادي تكملي خدمتك معانا وإلا غادي تحطي مليون دولار فمقابل حريتك واخا هو فالحقيقة أنا كانتمنا تبقاي معانا .. صوتك تحفة وحتى شكلك مثير كايجدب حتى اعضم رجال الأعمال إبتداء من أحفاد البارون الأعضم حتى لإيدوارد أليكزاندر .
رد عليها مارتن بحماس باش يقنعها تبقى فخدمتها وقال :
- البارونات بجوج معجبين بيك من سي جبل لخوه صخر بالإضافة لإيدوارد أليكزاندر الصياد الروسي وإيزيك الأسكوتلاندي ...
تسمرت روعة مصدومة ومدهوشة قدام لأسماء لي سمعات !!... جبل كاتعرفو لكن صخر هو نيت لإسم لي سمعات إيدوارد كايهدد فيه غير قبيلة ... ورجعت بذاكرتها للخلف ... غير فالأمس تفكرات فاش قال ليها جبل ، كان عندي خويا سميتو صخر كانلعب معاه لبرويطا لكن خوت جبل كولهوم ماتو وبقات غير تاليا ... أشنو هادشي ؟؟ أشنو هاد تخربيق ؟؟... لكن هادشي كولو كوم وإسم إيزيك لي سمعاتو كوم ثاني ...
إيزيك مسبب كوابيسها كان طول هاد الفترة كايجي حتى للنادي إذن الكوابيس لي كانت كاتجيها ماهي إلا تحذير من الله باش تضرب لفكد فراسها .. أعدائها طول هاد الفترة وهوما محاوطينها وهي أخر من يعلم ... شعرت بالخوف وقلبها بدا كايضرب بقوة ... ماقادراش تصدق شي لي سمعات .. إذن إيدوارد حتى هو من العصابة .. ياكما كان باغي يختاطفها ... لكن بلاتي .. تفكرات تهديدات إيدوارد والإسم لي قال بالحرف .. سليل البارون نسخة جبل صخر مرتجي ...
توسعو عينيها بصدمة فاش قدرات تجمع لپازل فعقلها ... هي كانت قريبة للجحيم لكن صخر مرتجي أنقدها وكان كايهدد إيدوارد ... مازالة مفكرة مزيان فاش غوت إيدوارد وقال فتلفون " غادي تندم على هاد شي لي درتي ... كون متأكد أنني غادي ندير لي فجهدي ياش ندفعك الثمن نتا وكل سلالة البارون ."
رجع تخربق ليها كولشي فعقلها ... علاش تاليا ماعمرها عاودت ليها على خوها من حد حتى جبل قال ليها كان عندي خويا اسمو صخر و"كان" فعل ماضي يعني كان ومابقاش هي فهمت بلي مات ... اااخ اللعنة قنبلة من الأفكار وإنفجرة فراسها بحال السم ونخراتو نخر حتى قاطعها صوت مارتن المستفز وهو كايقول :
-إيميليا بنتي نتي راكي غادي تكوني حمقة إلى فرطتي فخدمتك ... أربع رجال ميليارديريا مستعدين يطيحو عند رجليك فكري ففلوسهوم فكري فالعز لي غاتعيشيه مع كل واحد فيهوم وفكري فالمداخل لي غاتكون عندنا بفضلهوم .. نتي تقدري تقنعيهوم يستتمرو أموالهوم عندنا .
هاد تخربيق كامل لي قال ماهتمتش ليه ... هي لاحت راسها فوسط الجحيم بلاما تحس ودابا كايبتز فيها وباغيها تحط ليه فمقابل حريتها مليون دولار .. منين غاتجيب ليه هاد لمبلغ كامل ؟ ...
تفكرات الكلمات لي قالهوم ليها جبل على الشاطئ " ماعمرك تظهري ضعفك لشي واحد أروعة ... كاينين بعض أنواع البشر عندهوم نفس حاسة الكلب ... إلى شمو ريحة الخوف فيك غادي يهاجموك على الفور ."
شافت فحقيبتها وإبتلعت ريقها بتوتر ... لكن ماعندهاش شي حل أخر ... غادي تخاطر ولي ليها ليها حياتها اصلا دابا تحت حد السيف اي حركة غالطا وغادي طيح وسط الجحيم .. هذا علاش غادي يخصها تدرس خطواتها مزيان .. بسرعة طارت على المسدس ديال جبل لي جابتو معاها ووجهاتو لعند مارتن لي طاح قلبو للأرض بقوة الخلعة والصدمة وبدا غير كايتمتم :
توتر مارتن ومابقاش كايفرق بين ستيلو ولمسطرة ... هز قلم حبر اسود بيدين كايترعشو بالخوف ثم قال وهو كايمضي على الورقة .
- غادي تندمي على هادشي لي كاديري فيه اإيميليا .
نترت من يديه الورقة بسرعة ودارتها فحقيبتها ثم هزات الملف لي كان فيه مليون دولار وحطاتو ليه قبالتو وغوتت وهي حاطا ليه المسدس فوق جبهتو :
- إمضـــــــي..
تهز قلب مارتن بقوة الخلعة ومضى على الملف بالغصب وبسرعة خطفاتو من يديه وحشاتو فحقيبتها ثم تراجعت للخلف وهي موجها مسدسها ... شافت فيه روعة بغضب قاتل ثم زمجرت بغضب وهي كاتنفس بقوة :
-غادي نعطيك نصيحة وكانتمنا تستفد منها ... إلى فكرتي تعترض طريقي ولا تهددني من هنا لفوق .. دير فحسابك أنك ماغاديش تواجهني أنا ... غادي تواجه سلالة البارون كولها .
توجهت للباب وحلتها وخرجات وهي شادة فقلبها لي كان كايضرب بقوة.. وأخيرا قدرت تتنفس وأخيرا خرجت من داك الجو الخانق ... لكن كانت خايفا من العواقب ديال هادشي لي دارت ... واهم حاجة كانت كاتفكر فيها هي كيفاش غادي دير تخرج من الهوتيل بلاما يتبعوها الكاريبي فمدام إيدوارد وصلها أكيد غادي يكون مازال كايتسناها .
تمنات من كل قلبها أن داك الملاك المجهول لي أنقدها من براثين إيدوارد أليكزاندر يرجع ويهزها من وسط هاد الجحيم .
سرداب الكاتيدرائية المهجورة
تمشت أقدام رجالية على طول الممر بخطوات رجولية واثقة بينما يديه لمزينا بساعة فاخرة ومتمسكة بياقة السوميج وكايقاد فيها وعلى وجهو أكبر إبتسامة شيطانية حتى وصل لقرب باب خشبي لونه أحمر ومد يديه باش يدق لكن إنتبه لكم يديه عليه نقطة دم حمراء ويالله شحال شعر بالنشوة ... كانت ديك القطرة برهان ودليل على رجولتو وشراستو الطاغية ... مد يديه وطرق ثلاث طرقات على الباب حتى سمع صوت غليض أذن ليه بالدخول عاد تقدم ودخل .
كانت الغرفة عبارة عن مكتب مجهز بكل أناقة وماناقصاه حتى شي تفصيلة .. الأرضية ديالو كانت عبارة عن سجاد احمر وجدران حليبية منقوشة بزخارف جميلة ذهبية إريستوقراطية ومكتب كبير بُني غامق وطاولة إجتماعات طويلة فالوسط مرصوص على طولها كراسي ذهبية بمقاعد إسفنجية حمراء .. الغرفة كلها كانت مزيج بين اللون الأحمر والذهبي والحليبي .
وعلى ديك الطاولة كان كالس رجل ستيني العمر شايب الرأس وسيم الملامح رغم كبر سنه وطويل القامة أكتافو عريضة ولابس بدلة رسمية فاللون الرمادي الفاتح ومترأس الطاولة بشموخ وبين يديه سيگار كُوهيبا الفاخر لي مصنوع فـ كوبا ، هوڤانا وثمن الحبة الواحدة خيالي .
بينما فالكراسي الثانية كان كالس إيدورد أليكزاندر وحاني راسو وهو كايحس بالشمتة ومابغاتش وسرط ليه كيفاش دارها بيه صخر وفالكراسي الثانيين كالسين بعض الرجال من العصابة ... تقدم إيزيك وهو كايتمشى بعنفون حتى وصل للطاولة وكلس قبالة أليكزاندر لي شاف فيه بنظرات قاتلة بينما بادلو إيزيك بإبتسامة ساخرة شيطانية وقال وهو كايلتافت ببطئ لعند الزعيم ديالو :
- شاهين باشا .. المهمة تمت بنجاح وسيفطت داك الصحافي التافه ومرتو لأعمق قعر في الجحيم .
حس إيدوارد بالغيظ والغضب ومارضاش أن إيزيك يالاه وصل فصبح من إيشبيليا ونجح فمهمتو بينما هو مهمة ساااهلة ولي هي يجيب روعة للمقر بائت بالفشل .... همهم شاهين باشا بتفهم وقال بلغة إسبانية ملتية بحيت أنه واخا عاش تقريبا ثلاثين عام فإسبانيا إلا أن أصولو التركية من الأم و اليونانية من الأب و لغتو اليونانية مازالة معششة فلسانو .
- تمام تبارك الله عليك ماشي بحال شي أغبياء .
غمض أليكزاندر عينيه بغضب لكن حاول يسيطر على نبرة صوتو قدام الزعيم وقال :
- شاهين باشا ... راني قلت ليك بلي داك السافل ديال صخر مرتجى وضع فسيارتي قنبلة وهددني إلى ماحطيتش البنت غادي يفجرها ...
ضحك إيزيك بصوت عالي وقهقه بسخرية ثم قال :
- هوهوووو يا باشا ... هذا باش بدلتيني !! .. لو كنتي خليتيني متكلف بقضية البنت بدل هاد المغفل كنت غادي نجيبهالك بلا مشاكل ...
هجم عليه إيدوارد وجرو من ياقته وزمجر بغضب :
- غادي تسد فمك ولا غادي نهرسو ليك كاتسمع
بغا إيزيك يرد عليه بنفس طريقتو لكن شاهين ضرب على الطبلة بقوة ثم غوت بغضب :
- اللعنة عليكوم كاملين ...
طلق إيدوارد من ياقة إيزيك ورجع كلس فبلاصتو وهو كايتمتم بغيظ لكن إيزيك رد عليه بإستهزاء وهو كايعوط حوايجو وكاينفضهوم بتقزز باش يمحي اثر إيدورد :
- ماتمتلش علينا دور السنفور الصغير لي دايز الماء تحت رجلو بلاما يعيق ... هوما غير جاو وحطو ليك القنبلة بهاد السهولة ... لو ماكنتيش غبي وكاتدرس خططك مزيان كـ..
قاطعو إيدوارد وهو كايقول بوقاحة :
- واش عمرك شفتيني كانخطط لعملياتي ؟؟ .. انا انسان كايتصرف بعشوائية باش نثبت للناس لي كايخططو شحال هوما مثيرين للشفقة فمحاولة السيطرة على الأمور .
قاطع نظراتهوم الشرسة شاهين باشا وهو كايقول بإستهزاء :
- الشجعان فلخر كايموتو بسبب فرط الشجاعة اإيدوارد والعباقرة فلخر كايحماقو بسبب فرط الذكاء اإيزيك ومكايبقاو غير المغفلين هوما لي عايشين وسعداء ...
شافو فيه وبجوج بيهوم وصلهوم المعنى المبطن من كلام شاهين ورجعو شافو فبعضياتهوم بشر بسماوية عيون إيزيك وفيروزية إيدوارد ... بجوج بيهوم كايكرهو بعضياتهوم كره أعمى وواحد كايبغي بيان حسن من لاخر فعيون زعيمهم لكن بجوج بيهوم أقوياء واحد ذكي والثاني شجاع ومتهور ..
قالها إيدوارد بحماس لكن شاهين دار فيه نظرة شيطانية أخرست كلماتو فرد عليه الزعيم وهو كايقول بصوت حديدي :
- أحفاد البارون أنا لي غادي نتكلف بيهوم ولو مارضاش البارون الأعضم يجمع حفادو الأغبياء ويبعدهوم من طريقنا غادي نقطع إتفاقية الهدنة لي دامة عشر سنين وغادي تسيفطهوم للجحيم واحد وراء الثاني ...
تدخل فالحديث واحد من الرجال شاهين ...كان رجل ضحم بعيون زيتونية وبشرة برونزية غامقة ورأس أصلع عليه بعض الوشم ملونة ممتدة من رأسو حتى لعنقو وقال وهو كايمد ملف فيه صور لشاهين باشا :
- يازعيم ... رجالي إلتقطو هاد الصور وبغيتك تشوفهوم .
فتح شاهين الملف وبدا كايشوف فالصور لي كان فيهوم جبل وروعة كايعومو وسط البحر وصور أخرى وجبل هاز روعة بين يديه وهي حاطة راسها عليه ... علا حاحب واحد وقال بإستهزاء باللغة اليونانية:
-هه لا شئ مثير للإشمأزاز أكثر من رجل واقع في الغرام .
رد عليه باتريك وقال بصوت خشن وغليض:
-مؤخرا حفيد البارون الأعضم مابقاش كايتفارق مع المغنية الفاتنة إيميليا كلارك ويبدو أنه كيف قلتي واقع فغرامها .
مد إيزيك يديه وهز وحدا من الصور وشاف فروعة وكيفاش كانو ملابسها مبلولين ولاسقين على جسمها المثير فعض على شفته السفلية وقال بمكر :
- وكيفاش ماغاديش يتغرم بوحدا بحال هادي ؟!
شاف فيه شاهين بنظرة قاتلة خلات إيزيك يقلب عينيه بملل ثم حط الصورة من يديه وقال :
- مابغيتونيش نعاود ليكوم على المهمة لي درت اليوم .
رد عليه باتريك وهو كايبتاسم بطريقة مقززة :
- بما أنك نتا لي نفدتي ديك المهمة فكانظن أن الرقيب رافاييل غادي يرجع لدارو ليوم وهو كايبكي بحال شي عاهرة هاهاهاها...
شاركوه كاملين الضحك إلى إيدوارد أليكزاندر لي هز كأس ديال الويسكي وقلبو على فمو بغضب وناض خرج بدون إستأذان لكن شاهين باشا حاول مايديهاش فيه وقال بصوتو الحديدي :
- هذا كان درس لأي واحد سولت له نفسه يحشر أنفو فقضيتنا ...
ثم ناض من مكانو وتقدم للباب وخرج ... إلتفت إيزيك لعند باتريك وقال بخبث :
- سمع شنو وقاع اصاحبي .
___________
اflash back
قبل ساعة ونصف / في منزل رافاييل
طبع جورج قبلة حنينة على خد الطفلة "مايسي" ثم غطاها مزيان وشغل الموسيقى لي كاتساعد الأطفال على النوم ثم خرج من الغرفة وغلق الباب بهدوء وإبتسم بمكر .
مشا كايتختل لغرفة النوم ولقى فريدة واقفا قبالة لمراية كاتحط أخر اللمسات ديال المكياج على وجهها الأبيض المستنير حتى تقدم جورج وحضنها من الخلف ... ميل بأصابعو السمراء شعرها الأشقر المصبوغ من على رقبتها ثم طبع قبلة رقيقة خلات الفراشات يلعبو فمعدتها ... كانت رعشة لذيذة خلاتها تغمض عينيها وهمست بصوت رقيق وأنثوي :
- اوووووه حبيبي .
تحنى جورج وهز فريدة بعضلات أكتافو الضخمة وهو فرحان ثم حطها على السرير وطلع من فوقها وهو كايقول بهمس :
- توحشت كل شبر من جسمك ... حرمتيني جوج سيمانات وصريف..
إبتسمت فريدة بدلع وقالت :
- مكانش بيدي ياحبيبي ... بنتك مايسي هي السبب .
ضحك جورج وتحنا عليها كايبوس فعنقها وهو كايقول :
- وأنا كانموت عليك نتي وحبيبت باباها مايسي .
لكن قاطع قبلاتهوم صوت جرس الباب فتأفف جورج وقال بغيظ :
- شكون هاد قليل الأدب لي باغي يضيع عليها نهاري .. هادي شهر وانا هاز تيفو ديال الويداد واليوم لي بغيت نلعب دقان فالباب ... اللعنة هذا مايكون غير لمنحوس ديال خوك .
ضحكت فريدة بسخرية ثم قالت :
-هاهاها ... راه مازال خصك تصبر 10 ايام وحداخرا وخويا عندو ساروت ديالو ... ااه اليوم عيد الفصح عند المسيحيين اكيد غادي يكون شي وليد صغير ... حبيبي راني حطيت شويا ديال الحلوى فالمطبح عطيهوم شويا باش مايرجعوش يصدعونا ..
تأفف جورج وخرج وهو كاينكر حتى دخل للمطبخ وهز شبكة صغيرة فيها الحلوى والسكاكر وخرج وهو كايتمتم .
- انا ابدا مانخليش بنتي مايسي تمشي دق على عباد الله فديور على قبل الحلوى .
تقدم للباب وحلها لكن تفاجئ بهيأت رجل طويل القامة لابس معطف أسود وقبعة كلاسيكية على راسو ولابس فيديه قفازات جلدية سوداء وعلى وجهو إبتسامة شيطانية مثيرة فعقد جورج حواجبو بإستنكار وقال :
- عفوا اسيدي .. اش حب الخاطر ؟؟ واش جيتي على قبل رافاييل ؟ .
إبتسم خلف قبعته الكلاسيكية إبتسامة خبيثة وقال :
- لا ماجيتش على قبل الرقيب رافاييل ... بغيتك نتا اسي جورج ... جيت باش نبلغك تحية خاصة نتا وزوجتك فريدة ديمورو .
عقد جورج حواجبو بإستنكار وبدا كايفكر ثم قال :
- تحية ... خاصة ... ااه واش كاتقصد على قبل بنتنا !؟
توسعت إبتسامتو حتى عيونو لمعة بلمحة شيطانية وكأنه مجرم سفاح متعطش للدماء ... خرج يديه لي كان خافيها فجيب بنطالو وكان هاز مسدس مع كاتم صوت ووجهو لجبهة جورج لي توسعو عيونو بصدمة وبدا كايقول بصوت بالكاد مسموع :
- نـ نتا واحد.... من المافيا !!
بانت أسنانو البيضاء بإبتسامة لعينة وقال :
- بينغووو ... أصبت في الإجابة ... جيت باش نبارك ليك بزيادة ديال الكتكوتة مايسي ... تتربا فعز دار الأيتام انشاء الله ....
- تؤ تؤ تؤ ... من نهار لي فكرتي فيه تكتب داك المقال الغبي علينا ... كان عليك تفكر بالعقل .. لكن دابا فات الفوت ونتا غادي دفع الثمن على كل حرف سخيف كتبتيه ... علاما يجي الدور على نسيبك الغبي ... ودابا باي باي الصحافي الممتاز .
توسعو عيون جورج وفلمحة بصر ضغط إيزيك على الزناد وإنطلقت رصاصة إخترقت رأس جورج وأردته قتيلا مرمي على الأرض .
نظف إيزيك فوقة مسدسو بيديه ثم رجعو لجيب معطفو وتحنى جر جثة جورج ودخلها للداخل وسد الباب مخلي أثار ديال السحب الدم فالأرض وفهاد الأثناء سمع صوت فريدة وهي كاتقول :
- حبيبي ... شكون لي دق فالباب ؟؟
لكنها ماسمعاتش الإجابة ... شعرت فريدة بقلبها كايتعصر بقوة فناضت من على السرير ولبست بينوار فاللون الأبيض وخرجات من الغرفة وهي كاتحس بقلبها كايضرب بقوة وماعرفتش علاش ... لكن وهي فالممر تقطع الضوء على الدار كاملة وأصبح الضلام هو المسيطر .
تسارعت دقات قلب فريدة وبدات كاتشوف حولها بخوف فهي مكانت قادرا تشوف حتى حاجة من غير الضلام ... بدات كاتحسس طريقها بريبة وكاتقول بصوت مسموع :
- جورج ... حياتي راك عارفني كانخاف من الظلام ... باراكا من هاد اللعب الباسل وشعل الضوء .
رد عليها داك الصوت المخيف :
- ماتعييش راسك الغزالة ... شويا وغادي تلحقي عليه .
تراجعت فريدة للخلف فاش ظهر أمامها شبح جسم رجل طويل لابس كولشي فالأسود وتسارعت دقات قلبها بالخوف .. كل مكان كايشغل بالها فديك اللحظة هي بنتها مايسي ... تحسست طاولة حداها حتى لقات مزهرية وهزاتها بسرعة ثم ضربت بيها إيزيك لكن لحس الحظ ماجاتش فيه وبدات كاتجري ...
تبعها إيزيك بسرعة لكنها بسقاتو وحلت باب غرفة مايسي وسدات الباب بالقفل .. كانت كاضور وسط الغرفة ديال الطفلة وكاتقلب على اي حاجة تقدر تحمي بيها نفسها وبنتها حتى لمحت مراية صغيرة معلقة فالحيط فهزتها ولتختها فالأرض حتى بقوة حتى تهرسات وهزات طرف مسنن فيديها لكن إنتفض جسمها بخوف فاش سمعات صوت إيزيك وهو كايصفر بإستمتاع خلف الباب وكايقول بصوتو الشيطاني :
-فريدة يافريدة ... قلوبنا كاتوزن فقط 21 غرام بحال وزن طائر صغير ولا قالب شوكولاطة لكن شحال من مرة غادي نعيشو باش نضحيو بـ 21 غرام فداء خسارة واجهتنا ..
- شكون نتا .. اش بغيتي مني :
غوتت بيها فريدة بخوف فإبتسم إيزيك ورد عليها بهدوء
- أنا عارف ... عااارف مزيان أن قلبك ماغاديش يستحمل الموت ديال راجلك ... هذا علاش خليني نختاصر عليك الأمر ونوفر عليك ألم القلب ...
بسرعة صوب إيزيك المسدس ناحية مقبض الباب ثم طلق رصاصة هرسات القفل ودفع الباب برجليه بقوة ... تخلعات فريدة ومشات كاتجري وقفت عند سرير الطفلة مايسي وكاتنفس بقوة وخوف وهي موجهة قطعة الزاج ناحية إيزيك ويديها كايترعدو بخوف .. منظرها كان مضحك ومسلي بالنسبة لإيزيك فتقدم عندها ببطئ وهي تراجعت وتلسقت أكثر مع السرير ديال بنتها وقالت بصوت متحشرج :
- اشـ شكون نتا ... حنا فاش أديناك
- مكاينش لي غادي يعتقك من بين يدي اليوم افريدة حتى ملاك الموت .
إستمر إيزيك على نظرتو الشيطانية المستفزة وهو كايقرب منها شي لي خلا فريدة تخاف كثر وهجمات عليه بشقف الزاج وهي كاتغوت بقوة باغيا الضربو لكن إيزيك تخطى الضربة بمهارة ولوالها يديها وضربها براسو لوجهها حتى خرج الدم من نيفها وطاحت فالأرض .
- اااه اللعنة عليك العاهرة .
بقا إيزيك كايشتم ويسب فيها وهي كاتغوت وكاتحاول توصل للشفقة ديال الزاج لكن إيزيك ضرب الشقفة برجليه لبعيد ثم قرب من السرير وشدها من شعرها وعلى راسها ولتخها مع لارض باش تقطع لحس وماتبقاش تغوت ..
تحنى عند مايسي لي كانت كاتبكي بإستمرار بسبب صرخة فريدة لي فيقتها و تحنى باش يهز البنت لكن فريدة إنقضت على رجل إيزيك وعضاتو بقوة حتى غوت بألم وجمع معاها بركلة لوجهها حتى سال دمها ...
كان كايحس بالغضب القاتل وهو كايدلك مكان العضة فرجليه ... تقدم لعند النافدة ثم طل منها وتفحص الحديقة الخلفية بعينيه ولحسن حظو الدار ديال رافاييل كانت جايا فمكان فيه منازل بعاد على بعضهوم ومحاوطاهوم غابة كبيرة ... رجع لعند فريدة ثم هزها بغضب لكنها تمسكت يكتفو وقالت بصوت مخنوق بالبكاء :
- كانترجات ... كانترجاك ماتأديش بنتي .. ماتأديهاش هي مازالة صغيرة ...
بقا كايشوف فيها بغضب للحظات لكن دموعها المقهورة مستحيل يأثرو على قلب إبليس ... لاح فريدة من الطابق الثالث حتى إستقرت فالأرض جثة هامدة وراسها لي جا على حجرة كبيرة تطاير منو الدم وتسلل من الحجرة حتى للأرض ..
نفض إيزيك قفازات يديه السوداء بتقزز ثم قرب من سرير الطفلة مايسي لي كانت كاتبكي بقوة وكأنها شعرت بموت أمها وكأنها حست بلي مابقاتش غادي دوق من حليب أمها ومابقاتش غادي تستنشق رائحة صدرها وحضنها الحنين .. كانت كاتبكي وكاتفركل ... حتى أن دميعات صغار تسلسل من عيونها البريئة وكأنها حبات اللؤلؤ .
هز إيزيك مخدة كانت على الكنبة وحطها وقرب من السرير من يديه باش يحطها على وجهها ويخنقها .. حس فلحظة أن يديه تشللت ولا مابقاتش جزء من جسمو .. ماقدرش يقتل بنت صغيرة بحرا عمرها تقريبا أربع أسابيع ... تنهد بغضب ولاح الوسادة على لأرض وهي كايشتم ففريدة لي تسببت ليه فعضة مؤلمة ... لكن مع ذلك حاول من جديد .. صوب المسدس ناحية وجهها باش يسكت صوتها المزعج لي كايعصبو لكن مع ذلك ماقدرش وهو كايشوف يديداتها صغيورين ورجيلاتها وفمها الصغير ودموعها الرقيقة .
رجع إيزيك المسدس لخصرو بهدوء وهو كايشوف فالبنت كاتبكي وماقدرش يصبر مد يديه بتردد وهز مايسي غير بشوية وكأنه هاز قطعة أثرية قديمة وخايف يهرسها ثم حطها على صدرو وبدا كايطبطب على ضهرها الصغير لكنها ماسكتاتش حتى لمح رضاعة صغيرة جنب سريرها فيها شويا ديال الحليب فهز الرضاعة وتكى على السرير بمؤخرتو وحشى الرضاعة ففم مايسي الصغير لكنها مابغاتش تشرب الحليب وإستمرت بالبكاء ...
تأفف إيزيك بإنزعاج ثم بدا كايدور بيها فالغرفة وكايهز ويراري بيها حتى عيات مايسي بالبكاء وغفات بين يديه ونعسات ... شاف فيها إيزيك وإبتسم بهدوء ثم تحسس خدها بإصبعو السبابة تحت القفاز وهمس :
- ياخسارة باباك مات ... مسكين ماكانش غادي يفلت مقال بحال هذا ... إمرأة قتلت زوجها ثم إنتحرت وتركت طفلتها الصغيرة تبكي وسط سريرها الصغير .... اللعنة مكانعرفش نعبر .. يمكن كون كان باباك كان غادي يعطي لهاد المقال عنوان صاروخي ومثير للجدل ..
حطها بهدوء على السرير ثم غطاها مزيان وطبع قبلة صغيرة على جبينها الصغير وقال :
- تصبحين على واقع أجمل يا صغيرة ... ماتخافيش مازال كاين خالك ولكن حتى هو ماتفرحيش بيه بزاف ... يمكن أفضل مكان ليك هو دار الأيتام الكتكوتة ... باي باي مايسي.
خرج إيزيك وهو كايصفر بشفايفو لأغنية من الثرات الإسكتلاندي القديم حتى وصل للطابق السفلي ولقى جثة جورج غارقة فدمها ... إبتسم بخبث وقال :
- بينغوووو ... إنتهت المهمة ... هاهاها .
ضحك بصوتو المقزز وفتح الباب وخرج ثم إلتفت للحديقة الخلفية وتمشى حتى وصل لجثة فريدة وإنحنا أمامها ... وضع إصبع السبابة على الوريد في عنقها لكن مكان حتى شي دليل لدقات قلبها فتوسعت إبتسامتو الشيطانية وجبد المسدس وحيد منو كاتم الصوت ثم حطولها تحتح يديها وتمتم بخبث :
- عيب عليك ترتاكبي جريمة ثم تنتحري يا فريدة .
إستقام فوقفتو وخرج من المنزل بمرة ثم ركب فسيارتو وشغل موسيقى صاخبة وكسيرا بأقسى سرعة وهو متوجه للكاتيدرائية المهجورة ببرود .
العودة الى الواقع .
- نتا جن أصاحبي .
قهقه باتريك بأعلى صوتو وضحك حتى إيزيك وهو كايشرب من كأس الويسكي لي كانو فيه بعض قطع الثلج ثم شاف فباتريك بإبتسامة عريضة وقال :
- باتريك ... عندي ليك واحد الخدمة .
رفع باتريك حواجبو بفضول وقال :
- باتريك عزيز عليه يخدم لحباب .. ويوم ليا ويوم عليك .. طلب أش بغيتي ؟.
إبتسم إيزيك بخبث وقال بصوت منخفض وهو كايشوف فالباب ثم رجع شاف فيه وقال :
- بغيتك نتا لي تخطف إيميليا كلارك
تنهد باتريك ورجع بضهرو للخلف وقال بتردد :
- ولكن الزعيم كلف إيدوارد أليكزاندر بهاد المهمة اإيزيك.
دار فيه إيزيك نظرة قاتلة وقال:
- هداك الإنسان الفاشل ماغادي يقدر يدير حتى حاجة ... وفكر فيها إلا نجحتي فمهمة خطف البنت نتا غادي طلع كراد فعيون الزعيم ... وغادي يولي يعول عليك نتا ورجالك أكثر ... اش بان ليك تضرب لحديد ماحدو سخون ؟.
همهم باتريك ثم قال بعد تفكير عميق :
- هممم ... فكرة زوينة ولكن فقتاش .
إبتسم إيزيك بحماس وقال :
- اليوم كان من المفروض داك الفاشل يخطف البنت لكن ماقدرش ... واليوم نتا لي غادي تمشي تجيبها بطريقتك الخطيرة ... غادي تخطفها من وسط الهوتيل لي كاتغني فيه .
قاطع كلامو إشعار لرسالة فجبد إيزيك تلفون من جيبو وفتح الرسالة وعلى الفور ظهرت إبتسامة خطيرة على وجه إيزيك ومد التلفون لباتريك وهو كايقول .
- شوف هاد الڤيديو .
شد باتريك التلفون من عند إيزيك وشغل الڤيديو لي كان فيه ... عقد حواجبو بإستهجان وقال بسخرية :
- البارونات مقاتلين ... لعجب !!.
تكى إيزيك على ظهر كرسيه بعنفوان وقال :
- جوج خوت أعداء ... واحد مكايحمل الثاني مقاتلين على بنت ... شفتي جبل كيف كايضرب خوه صخر بلا رحمة وكأنه العدو ديالو هادي هي لفرصة ديالك اباتريك .
رفع باتريك عينيه وشاف فإيزيك ثم قال بصوتو الخشن:
- وشنو من المفروض ندير أنا ؟؟
إبتسم إيزيك بمكر ورد عليه بصوت وكأنه فحيح أفاعي سامة وقال :
ضحك باتريك بخبث وقال بصوتو المخيف وهو كايشوف فالتيليفون :
- إعتبر البنت عندك اليوم اإيزيك... غادي نجيبها ليك حتى لبين يديك ودير فيها لي بغيتي ...
___________
نهاية الجزء الأول .
أخيرا سالينا الجزء الأول من رواية بارون وإن شاء الله لقائنا الجديد غادي يكون في الجزء الثاني .
والله بغيت نختاصر بعض الأحداث باش نكتفي غير بجزء واحد فالبارون ... لكن الأفكار لي عندي مازال خصها المزييييد من الفصول والمزييد من الوقت . هذا علاش قررت ندير الجزء الثاني ان شاء الله .
لحد الأن مازال موضوع السيدي مبهم ... ومازال حتى شي واحد مالقاه ..؟؟
جريمة قتل وقعات فمنزل الرقيب رافاييل .. كيفاش غادي تكون ردت فعلو فاش غادي يرجع لدارو بعد يوم عمل شاق ويلقى اختو وراجلها مقتولين بطريقة وحشية .؟؟
صخر الشخصية الجديدة حاملة بزاف ديال الأسرار لي غادي تشكل عائق فطريق اختو تاليا بسبب سر الصور مع هاري ... وعلاقة جبل بختو غادي تكون على حد شفرة بعدما يكتشف الحقيقة على لسان أخر شخص ممكن يتوقعو ؟؟.
تاليا ورافاييل أشنو غادي يكون مصيرهوم ... واش غادي تقدر تبادل رافاييل نفس الشعور ولا رافاييل غادي يغرق فدوامة الإكتأب بعد موت ختو ويهمل مشاعرو تجاهها ولا غادي يصبح أكثر قوة وينتقم لختو . ؟؟
ضهور شخصية جديدة ولي ها البارون الأعضم وأولادو الكبار وأحفادو ... يعني اعمااام جبل والعائلة لكبيرة !!
شاهين باشا صبرو قرب ينفد ولو مالتازمش البارون الأعضم بإتفاقية الهدنة لي دامة عشر سنوات ولو ماجمعش أحفادو من طريق عصابتو ... غادي يعلن عليه الحرب لأن صبرو بدأ في النفاد .!؟
الدكتور ياسين وماضيه مع جريمة القتل لي رتاكبها وعلاقتو بأسية واش غادي تستمر ؟؟
صوفي وعصام أشنو غادي يوقاع بيناتهوم .. واشنو غادي تكون ردة فعل الدون ماركيز فاش غادي يكتاشف أن بنتو مارجعتش لفالينسيا عند مها بل مشات لدار روعة ... وروعة ماعندهاش دراية بأن صوفي بنت الدون ماركيز ... وعصام ماعارفش بلي راها هربات من المطار !!
أسد ونورسين كيفاش غادي يتعاملو مع الأحداث الجديدة لي غادي توقاع بين الأبطال ديال البارون.!!
إيدوارد أليكزاندر واش غادي يصبر لتدخل إيزيك وباتريك فمهمتو ولا غادي يدير شي حماقة بسبب تهورو .!!؟
وماضي روعة مع جهاد واش غادي يتفتح ولا غادي يبقى بين طيات الماضي ... ومرض ام روعة واش غادي تشافا منو ولا غادي توقاع شي حاجة تغير الموازين ؟؟...
وفالأخير واش غادي ترجع المياه لمجاريها وترجع روعة لعائلتها فالمغرب ..؟؟ ولا جبل غادي يكون عندو رأي أخر ويجبرها ترتكب نفس الخطئ لي بسببو حاولت تنتحر بعدما اكتشفت حملها ..
هادشي كولو إن شاء الله غادي نكتاشفوه فالجزء الثاني ديال رواية البارون .
هادي ماشي مجرد نهاية ... هادي بداية لحياة وأحداث جديدة .
بارون الجزء 39 جريمة قتل
محتوى القصة
التنقل بين الأجزاء