تزيرات روح الندا بين يديه .. النفس فصدرها مقطوعة وضهرها مسطح لاسق عليه .. السيف على كرشها مغروس .. و يديها ملوية على يديه . همس فودنها وقال
سيد الملك: فاش نقول تبتي رجليك .. تبتي رجليك ... مانشوفشكش كترجفي عليا ... تعاودي ترخي راسك نيطرو ليك من بين كتافك .
رخاها ودفعها قدامو دايخية .. ماجات فين طلع النفس حتى هجم عليها بالسيف ومالت بضهرها من اللور تقوس ليها .. كانت غطيح فالارض لو مادارش يدو مور ضهرها وتعرض ليها .. حط السيف على رقيتها وهي الروح بالخلعة بغات طلع ليها .. كتشوف عينيه فعينيها ووجهو فوجها ونفسو كتحرك رموشها .. بقا يشوف فيها وهي مقوسة بين يديه .. شعرها مدلي كيمسح الارض وصدرهها بالخلعة كيطلع ويهبط عليه ... تكلم وعينيه فحروفها كتمعن
سيد الملك : حطي السيف ماشي قدك ... هوا سبب هلاكك و اللي غيطير راسك
قالت وصوتها كيترعد ماباغا تحشم ولا تهد
روح الندى: واخا تشرط ليا لحمي كامل مانرجع اللور وانا على يدك نتعلم .. واللي على يد مولاي يتعلم قبل مايوصل الشهر فالسيف يحكم . وانا منك باغا نتعلم
جمع يدو رخاها فالارض حتى جات على ضهرها وقبل متشد فيه وتكمد الدقة نزل بالسيف عليها وخوات ليه بالزربة
سيد الملك: يالاه نوضي تعلمي .. وماهميش الى جات فيك شي دقة ونتي حتى رجليك مامتبتاهم فالارض .. اللي خفيف الرجل على خلاه يعول .. ونتي رجلك خفيفة وهادا مابقا السيف شاد معاك حسيفة .. ماقنعتي بجارية ولا وصيفة .. وجدي راسك لحرب السيوف
هجم بيد وحدة وهي كتنقز من بلاصة لبلاصة ... زير معاها الشغل كتر من لبارح وحسات براسها دخلات فالمعقول . بسيف باش كتهز دقة السيف .. تجري من قنت لقنت وهوا قدامها تابعاه حتى قربات تسخف .. ضرب ليها السيف للمرة الثانية طاح فالارض وشدها من شعرها كامل دورها بين يديه وقلب ليها وجها فالارض .. حط السيف على رقبتها نيشان فوق سميتها .. تبسم تبسيمة بالجنب وقال وهوا كيشرط رقبتها
سيد الملك : روح الندى .... وباغا تولي من السلالة الملكية .. شكون عطاك الحق توشمي فهاد البلاصة ؟
قالت وهي كتشهق والدم نازل على عنقها كيقطر مخنوقة
روح الندى: ماوشمتش امولاي... ... اااه
تبسم وقال : لسانك طويل وخاصو يتنقص منو شوية .
خنقها بالشعر اللي دور على رقبتها حتى شاف الروح بغات طلع من خلقها عاد رخا ليها طاحت فالارض مخنوقة كتكحب ... لاخ السيف لاجنب ووقف مربع يدو قدامها
سيد الملك: باغا تعلمي على يدي ... هادي هي يدي كيجاتك ؟ .
وقفات كتشوف فيه وتكحب مقادراش تنفس .. فشلو ليها رجليها ثاني وهي سخف جيهتو وتعرض ليها بيديه ... رخات يديها وراسها وصدرها كيطلع ويهبط و دقات قلبها مسموعة .. وقف شادها ونسا راسو كيشوف فيها .. هز يدو على صدرها سمع لدقات قلبها اللي غتخرج من بلاصتها .. طلع يدو لرقبتها كيلمس جلدها وطلع لخدودها الوردية مصغر عينيها فيها وبصبعو كيدوز على شفايفها وبصوت خفيت قال سميتها
سيد الملك : روح الندى
هز راسو ساط من مناخرو وهز يدو للسماء شار لعبيدو جاو عندو كيجريو هزوها من يدو .
حلات عينيها وعضامها مهدودين ... لقات راسها فجناح النسى والوصيفات بيها دايرين .. كما دخلوها سخافة لبارح عاوظو دخلوها ليوم قدام الحاضرين ... كلشي فجناح النسى واقفين كيسولو مصدومين ، مال هادي كل ليلة تجي سخفانة ويديها مدلين؟ شكون عرف هاد الموصيبة اللي دخلات عليهم جديدة اش كدير .. من غير لوصيفات السمرات بجوج هما اللي عافرفين . يبقاو عساسين الليل يتسناو سيد الملك يسالي معاها النزال . عاد يسدو باب الجناح فخطرة وحدة ، جلسات شادة فجنابها دايخة
روح الندى : عنقي كيوزوز ليا .. عنقي مجروح
عبسات الوصيفة نجمة وقالت
- اش بينك وبين سيدي ؟ كل ليلة تتهازي بالسيف نتي وياه ؟
طلعات روح الندى فيها حاجبها وقالت
- كيعلمني نحارب.. حيت الحرب الماجية غيديني معاه
نجمة : ومالقا غيرك مرة اللي يدي معاه ؟ فين كتعرفيه وشنو بينك وبينك؟ تكلمي ولا نهبطك فين تكمدي عضامك
الهضرة وقفات للوصيفة نجمة فالحلق ... شافت تا عيات وخرجات خلاتها مع الوصيفة اللي كتشبه ليها فالغلض والسمورية . نعتات ليهم روح الندى شي عشوب كتفهم فيهم هما اللي يخففو جرحها ويهدوه عليها . كمدو ليها بيه وطاحت نعسات نعسة وحدة بحال الى عمرها شافت النعاس .
خرجات الوصيفة من البيت اللي بابابو نازل بالهدب وبدات تصفق بيديها على الجواري اللي واقفين واكلهم الفضول باغيين يعرفو روح الندا اش صرى ليها .
صباح التواب والقفاطن . . . والشرابل والمضام .. صبحو الجاريات كاملات فجردة موردة جيهت جناحهم جالسات ... دايرين بكم ديال التواب كيتعزلو ويتخيرو .. والوصيفات عليهم واقفات . خرجات روح الندى من جناح النسى بقفان خفيف وشعرها مدفور راسها ملفوف . بجنبها العروسة المنحوسة اللي خرجات على شحال من عريس وعروسة فالليلة المنحوسة . غادية حداها روح الندى كتسب وقدلمهم وصيفة كل شوية دور تخرج فيهم عينيها
روح الندى : ماتعرفي تسقمي حتى كلمة . بقا ليك غير الغنى يال البكمة
عوجات عليها الجارية فمها وهي كتلعب فشعرها الاصفر وقالت
- انا بعدا دخلت مولاي معززة مكرمة بصيفتي عروسة مرسمة ... كيت اللي يبات مع الجنون يحضر ويرجع كامل مشرط كيقطر
ضحكات روح الندى حتى تسدو عينيها وقالت
روح الندى : كن تعرفي الجنون معامن نبات يسكت لقلب يا قبيحت البنات ... كدب عليك راسك وقالك صافي دكيتي لوتاد . ههه ساعة خرجتي فليلتك كتجري فجلايلك يا مسكينة ... عروسة الملك قالك ... ضراني الدرسة مافيا اللي يعصر الحامض معاك .. عصريه بوحديك يا البهيمة .
زادت روح الندى وخلات الشهبة فحوايجها كترطا .. خرجوهم حتى هما للجردة فين مجموعات البنات على التواب... سمعات روح الندى صوت مخافيش عليها لوسط كيهضر ويضحك .. دخلات بين البنات وهي تلقا التاجر دريس جايب توابو وجالس يعرضهم على البنات .. خرجو عينيها وتسرط لسانها وبقات واقفة فبلاصتها كتمتم خايفة فرشها ويقول عليها مرتو وهاربة . تلفت كيقلب بعينيه بحال الى جاين عندها ما غرضو لا فتواب ولا فخياطة .. شافها ومشا عندها نيشان كيزطم فالشراوط وقال
دريس : نديديتي ... توحشتك امراتي
جراتو من عنقو هبطاتو للارض وعينيها كيدورو لايكون سمعو شي حد .. جاب الله كلشي ملهي مع التواب حتى حد ما رد ليها البال . بدات تمتم وترعد جاراها من حوايجو مقوسة ليه ضهرو بيد وحدة وقالت وهي عينيها فالتين
روح الندى : يعطيك الصدا فمسارنك ماتعرف تنعس ما تعرف تهدى م... م تخرى ما تشد القعدة . اش جابك عندي يا وجه الويل يا فرشة الشربيل يا خانز الفم يا الشارف يا الهبيل
حل فمو فيها فرحان وقال : توحشتك من نهار غبرتي عليا ما نعسو عينيا ولا برد قلبي كما باردين عليا يديا ورجليا .
ندبات على حنكها وقالت تحت سنانها كتولول : يعطيك العما ... يعطي العما يا وجه الغمة ما تمشي فضو ولا فالضلمة ..عينيك بيغتهم يتفقصو ليك وانا بصبعي غانحبدهم ليك ... سكت يعطيك الخلا والجلا شي ركلة دلبغل ياوجه النحس ... كيدرتي دخلتي كي درتي
وقفات عليها الوصيفة معبسة : هزي التوب طليقي الطرح ... راه غنجمعو هادشي وشدي الصف مع البنات يشد ليكم العبار باش يبدا يخيط .
شافت فيها روح الندى كترعد وهزات توب من الارض مشافتو كاع كي داير وقالت
روح الندى : واخا .. واخا صافي خزيت هادا
تلفتات عند دريس وقالت كتزاوك بعويناتها
روح الندى : لعار عليك متفضحنيش ... سكت ..سكت من بعد ونهضرو .(مشات كتهرنرن) الله يعطيك الدود ينوض فقزيبتك متقدر تجلس ما تقدر توقف .. يعطيك الباسر يا ربي فاش طحت .. ياربي فكني من هاد الشحمة .. هاد لحم الراس .. هاظ الكرداسة .
وقفات مور الجواري كل شوية طل من موراهم وتشوفيه كل شويةيدور عندها ويفرنس .. حطات يدها على راسها ماكرهاتش تقجو عتى يخرجو عينيه .
وصلات نوبتها هي التالية .. اما البنات كملين دازو وعطاو عبارهم و دخلو . وقفات حداه والوصيفة عاسة عليها من لبعيد كتسناها تسالي باش دخلها للكشينة تعلم . دريس كيدور بيها وهي واقفة على اعصابها طتمد ليه يديها
روح الندى : الكافر هوا هاداك اللي بين رجليك ... سيدك الكافر تقول عليه كافر!
داخ زعبول وبدا يسرط فالريق : لا لكافر هوا انا شكون قال عليه كافر !
روح الندى : مزيااان تباارك الله تقادو لكتاف! وليتي تقول عليه كافر ! حضي ماكلتك ولا نشريها ليك معاه يعلق من كراوعك .. مزيااان تبارك الله
تحنى زعبول على داكشي اللي قدامو ماقدرش يهز الراس و حداه روح الندى مخرجة عينيها و مكمشة فمها كي النقطة .. اما عبدية تصدمات فيها كفاش دغيا قلبات القفة على زعبول .. بدات ضرب فحناكها مصدومة وروح الندى كتخرج فيها عينيها باش متفيقش زعبول من القلبة ويسمعها المنقي خيارها .
تسلات من الكشينة والفباب صادفات طامو هازة الصينية فيها اتاي ملقم وحلوى بلدية .
روح الندى : سيري تسنطي ليها ... انا ندي الصينية ونجي .
طيرات ليها الصينية من يديها ومشات كتسلت وتقلب منين تخرج حتى طاحت فالباب وسمعات صوت السيوفة كيتقرقبو .. حطات الصينية فالجنبد مع واحد القنت وفكات الفرة اللي مولية على شعرها وطلقاتو وبدات تقاد فقفطانها المفتوح من الجناب حتى لركابيها .. هزات الصينية ومشات بمشية مجردة هازة راسها فالسماء حتى للجلسة ديال الملك وولاد عمو .. كان جالس الوسط فاتح رجليه .. لابس الحكل جاي معاه كيفتن .. دايرين بيه ولاد عمو مع جنابو كيتفرجو معاه . قربات روح الندى كتمشى ببلغتها فوق الربيع حتى وصلات عندهم وهي تحني راسها سلمات .. هز حاجبو كيطلع ويهبط فيها ومع الهزة دعينيها شافت الامير قاسم كيخزر فيها .. بداو الكيسان يقرقبو ليها والخلعة شاداها وقربات تحط الصينة ساعا تعكلات فسالفها وهي تزلع قدامها راسها سابقها ومشا لبراد نيشان رحجر الامير قاسم صلق ليه بيضاتو
عروس الملك السابعة الجزء التاسع
محتوى القصة
التنقل بين الأجزاء