قصة شيطان في المغرب

من تأليف Shahira Belouchi
2018قصة كاملة

محتوى القصة


رواية شيطان في المغرب

هاهواا جايب لما هاهوا جايب لما هاهوا جايب لما .. غايخويه عليك غايطفيك غاتموت ... هاااهااهااا
.. حل عينيه كيخنزر فيه
راوص (raws ) : واش مازال مابغيتيش دير عقلك .. اووف خليني أ صاحبي نتا عارفني كاره
نيال : هههه وا غا كنشط ليك لمورال و صافي .. ماتكعاش و ماديرش فخاطرك .. هي لي خاسرة ماشي نتا
راوص : صافي خليني فتيقار بعد بغيت نبقى بوحدي
نيال : هوووووو .. لموهيم جيت غير نقوليك عندك اجتماع من هنا ل ... لدابا هاهاها .. غايحتافلو بيك ههههه
راوص : اووف .. باينا غايقتلوني .. 
ناض هز لعصا ديالو و جا غادي و نيال من وراه واقف كيضحك عليه ..
.... دخل لواحد الغرفة كبيرة بزاف .. فيها غير كرسي واحد كيتعتبر كرسي العرش .. كانو متستفين واحد من ورا واحد .. و لي كيسمع سميتو كيزيد خطوات باش يتسلم مهمتو .. بقا كيتسنا حتى سمع سميتو
راوص رقم 087
راوص ( هز عصاه ) : حاضر .. 
مشا لجيهة العرش و ركع برجل وحدة على ركبتو و هبط عصاه
راوص ( كيرجف بلخوف ) : أنا فالخدمة سيدي
مد واحد من الخدم ورقة من الجلد ل الزعيم ديالهم و حل و بدا يقرا و هو معصب
افراين : راااااااااوص ( تزعزع المكان من صوتو )
راوص ( كيرجف بلخلعة ) : نن نن نعاا نعاام أ سيدي
افران : شنوو داكشي درتي لبارح فلعرس
راوص : سيدي .. سيدي أنا ندمان .. مكنتش فوعيي .. عافاك سمحليا .. أنا ننفد لي طلبتوه مني غير ماتقتلونيش
إفراين : هاداك الشغب لي درتي مغايدوزش ليك بالساهل .. و دير فبالك أنه حنا معندناش الحب .. ماعندناااااااش الحب .. وجد راسك غاتحرم من العطلة الصيفية .. و غاتمشي لبلد المغرب .. الى بغيتي نسامحوك خاصك تخرب هاديك لبلاد ... وسوس لناس و خلي ل مزوجين يطلقو و المرضيين يتسخطو و التايب ينحارف و انشر الفساد ... 
راوص : أنا فالخدمة أ سيدي ندير داكشي كامل لي طلبتي .. غير تسقط التهمة لي عليا و ماتعاقبونيش بالنفي
إفراين : سير دابا .. عندك شهرين و صافي ، الى ماقدرتي دير والو ... بلا مانقوليك أش غايوقع ليك
راوص : غاندير كل ما فجهدي باش مانخلي حتى بقعة من ديك الأرض فيها الخير و السلام
افراين : سير دابا
راوص ( ناض و هو مازال كيرجف بالخلعة ) : شكرا سيدي
الخادم : رقم 088
......
مشا دغيا للجناح ديالهم ... لقا نيال جالس كيتسناه .. تلاح فالأرض على ركابيه و بدا يضحك
نيال : اووهوووه رجعتي حي .. و أنا عاد كنت ناوي نوسع لبيت و نلوح حوايجك
راوص : راني خوك زعما ! كنتي كتمنالي لموت
نيال : ههههه من نيتك أ صاحبي ! و الى متي كاع !؟ زعما غانحزن عليك .. ماتنساش أننا شياطين و فقلبنا الششششششررررررر هههه كنتي كتسنا مني نبكي عليك حيث غلطتي و غاتعاقب
راوص : شيطان خبيت نتا .. فرح دابا .. أنا مغانتنفاش .. و لكن عطاوني مهمة .. 
نيال : اووهو .. مهمة
راوص : صيفطوني للمغرب
نيال : المغرب ؟ .. هههههه كايعاودو عليه زوين .. 
راوص : مكيهمنيش .. لموهيم أنا مزال حي
نيال : ايوا استمتع برحلتك .. نقولك كنتمنى ليك حظ سعيد مع المغاربة اولا بلاش ؟
راوص : هاهاها زيدها فراسك .. باي 

الوجهة الى ==> المغرب

وااا سييييييري قيليني عليك أ سعيدة السحارة .. راه الى شديتك غانخسر معاك
سعيدة : واا عووك عووك الناس هاد لمرا جايا حتى لداري و كاتعايرني .. وا الحافيييظ الله .. ناويا تقتلني شهدو يا ناس
أسماء : زيدي أ صاحبتي صافي بلا شوهة
منال : واش مشفتيهاش كتبلى عليا .. حايدي طلقي مني ( حايدات جلابتها و لاحتها فوق طروطوار ) 
أسماء ( هزات الجلابة ) أويلي يا منال غاتجمعي علينا جوقة .. رجوع الله راها غير كتستافزك باش تجمع شهود عليك
منال ( طارت على سعيدة خرجاتها من مور باب دارها و لاحتها فالأرض و بقات كتشتف عليها ... ها لعضان و ها لقميش و ها لقجان ) : عااااا .. تعاودي يا لكلبة تحلوني على راجلي ! تعاودي تحلوني علييييه ! دويييي يا لبايرة .. غانخسرليك داك لوجه لي فرحانة بيه .. شهدي على روحك
سعيدة ( كتغوت تحت منها ) : واااا .. واااااا رجلي .. وااااااا يديي .. طلقي مني المصوفجة ... عتقووني غا تقتلنيي .. وااك وااك أ عباد الله ناويا تصفييها ليا هاد الهايشة .. عتقوووني الناس
.... وصل راوص و جابو زهرو حدا لمضاربة ( أكيد مكايبانش و حتى شي حد مكايشوفو )
راوص ( رجع جوج خطوات لور و هو مخرج عينيه و مزال مدوخ ) : اش هادشي ... نااااري .. اوااااه .. اوووه ناري غاتقتلها ..
منال ( عضتها من حنكها خلاتليها سنان مطراسيين ) : هادي باش وقتما شفتي راسك فلمرايا تتفكريني يا لكلبة .. ( وقفات جمعات شعرها بلاستيك و شافت ف أسماء ) .. أري ليا نتي جلابتي .. 
لبساتها و ضربات سعيدة بركلة و مشات و صاحبتها أسماء من وراها كتجري و حادرة راسها حشمانة من ناس لي كتحنزز 
... راوص شاف ف سعيدة كتوجع ... و فجيران لي عاد دابا جاو كيعاونوها باش تنوض .. معرفت فين كانو منين كانت تاكل لعصا .. 
راوص تفعفع و معرف اشمن وجهة يشد .. شدو لفضول و تبع منال و أسماء يكتاشف شكون هوما و اش كايديرو و شنو لي خلا منال تسلخ سعيدة بلعصا ..
راوص : ولايني مهمة و اشمن مهمة ... أكييد مغانملش هنا .. 
هز عصاه و مشا كيجري تابعهم ..
... وصلات منال و اسماء حدا واحد الجردة .. جلسو فواحد لقنت و جلس حداهم راوص كيشوف فيهم و يتصنت ( و اكيد كيف سبقلي ذكرت انه حتى شي حد مكايشوفو )
منال : لكلبة جهلتني
اسماء : تهدني أ صاحبتي
راوص ( طاحت فبالو فكرة انه يشعل بيناتهم العافية باش يزيد يتفرج فمضاربة خرا )
أسماء : وا حتى داك راجلك خاصك تخرجيليه دوك لعينين من بلاصتهم .. غير مبلك فيهم و لي دازت ميزكلهاش
منال ( خنزرات فيها ) : كتقلبي عليا نتي فهاد اللحظة .. ينعل والديك
اسماء : منال جمعي راسك ماتعايريليش با و مي .. و انا قتليك غا الحقيقة لي مكتقبليهاش
منال ( ناضت و طلعات جلالتها حتى لخصرها و بدات تخنزر ) : واش كمال كيهز فيك لعين !
اسماء : ايوا غانكدب عليك اختي الى قتليك لا
منال ( جبداتها من شعر ) : حتى نتي يا صاحبتي لكلبة لغذارة كادوريلي براجل
اسماء : اي طلقيني .. يهديك الله اشمن ندور بيه .. راه هو لي عينو زايغة و انا و اللهما كنعبرو .. و باش تعرفيني باغيالك الخير غادي نتعاون معاك حتى يولي خاتم فيديك .. و معمرو يشوف ف غيرك و يدير غير كلامك
منال ( طلقات منها و طلعات حاجب و هبطات لاخر ) : اش تماك ! هدري
اسماء : اووف حشومة عليك راسي كيحرقني .. واش ان صاحبتك ولا عدوتك .. مالني غانبغيلك الشر
راوص : علاياش ناويا هادي .. 
منال : هدري يا لمGملة
اسماء : بغيت غير نقولك انه عندي دواك
منال : اتيني بيه
اسماء : غايرجع يقول غا اه .. و لي بغيتيها يحضرهالك .. و معمرو يهز لعين ف غيرك
راوص : بابابابابابا .. كاع هادشي ..
منال : هدري غاندفنك فهاد جردة
اسماء : وا صافي .. لموهيم واحد الشوافة خطيييييرة .. دقة ب بطلة .. كلشي كايشكرها .. و سيدك كمال غايرجع خاتم ف صبعك
منال : شناواا ! شوافة ! باغاني نشدو بسحور ؟ لا يا ختي .. راجلي كنبغيه و مانبغيش نضرو
اسماء : يا لهبيلة غير سمعيني .. راه مغايأتر عليه فوالو .. لمهم زيدي نمشيو لدارك و نهدرو مزيان ف هادشي .. انا قتلني ناموس فهاد لبلاصة
منال ( طلعات فيها و هبطت ) : زيدي
راوص ( ناض كيضحك و حك يديه مع بعضهم ) : والايني هاد نسا مكايسواوش و خطار .. زيدو الأستاذات زيدو .. راه نتوما لي شيطانات و خاصني دروس من عندكم ..

وصلو لدار منال حلات لباب د برا و جلسو غا تماك ف طبلة لي محطوطة فجريدة ديال دار .. تحت واحد الدالية دلعنب .. سرحو رجليهم
اسماء : وا ديريلنا كاس اتاي
منال ( عقدات شال على راسها و شافت فيها ) : تكلمي فلمعقول ..
.. جا راوص جلس حداهم و ربع رجليه و يدا يتصنط
اسماء : مالكي ا صاحبتي مزروبة .. شوفي الى نويتي و بغيتي راجلك يتقاد .. و زعمتي نوريك شوافة .. ضمني من دابا انه غايكون خاتم فيديك و مضربي حساب ل وااالو
منال : لا أختي .. انا واخا تشوفيني عيشورية و لكن حتى لهاذشي لا .. نخاف
اسماء : اويلي على لهبيبة قاتلك تخاف .. لي يشوفك فوق سعدية قبيلا كتشتفي عليها يقول هادي باطرونة كبيرة و موالفة بشوافات .. خصوصا منين حايدتي جلابة
منال : باغاني نخسر مع ( كلام فاحش )
أسماء : وا دابا لاش كتخسري معايا لهدرة
راوص : نووضي نوضي .. قوليلها غانجمع و نطوي و خلي راجلك يخونك و ماتقوليلهاش على شوافة حتى تبوسلك رجليك
اسماء : عرفتي شنو ! انا غانمشي ن ( كلام فاحش ) من هنا و خليه يخونك و يجيب عليك ضرة كاع .. مالي انا على لقرع نمشط ليه راسو
راوص : هاكاك مزيان عبرتي عليها
منال ( طلعات فيها و هبطات ) : هي ناويا نخرج دواصاك لي فالأرشيف
اسماء : شش ششمن دواصا عاوتاني اووف
راوص :اشمن دواصا لي خرجولنا من جنب
منال ( طلعات حاجب و هبطات لاخر ) : ايوا بلا مانفكر ختي
اسماء : وا صافي ا منال مالك دابا ا صاحبتي .. واش انا جايبالك همزة صحيحة تخليك تبقاي ديما تتفكريني و دعي معايا طول حياتك و نتي جالسا تتكبري على نعمة .. وا بزاف
منال : فين جات هاد شوافة
اسماء ( ضحكات حتى بانو ضروس لي معندهاش ) : هي صافي ناويا و عازما
منال : ايوا نشوفو فين غايخرجنا هاد (كلام فاحش ) ديالك
.. فهاد اللحظة وصل كمال راجل منال و قلبو الموضوع
اسماء : ههه لموهيم ا حبيبة انا نخليك دابا نمشي نشوف خطيبي 
منال : رجعي غذا
اسماء : اه اه ضروري باش ندويو فالموضوع .. سلام سي كمال لاباس
كمال ( شاف فيها و مص شفايفو .. عاد توgد و عاق بلي مرتو كتشوف فيه ) : مرحبا .. اه بغيت نقول لاباس بيخير .. جلسي تغداي معانا
منال ( مخنزرة ) : لاا ماغاتغذاش .. راك سمعتيها قالت غاتمشي تشوف خااااطيييييبهااااااا
كمال : اه .. ايوا الله يقبل .. بغيت نقول بسلامة .. هانا داخل
منال ( بقات متبعالو لعين و حاطا يديها على جنبها و مخنزرة .. حتى دخل .. شافت ف اسماء و جراتها لباب نتاع برا ) : سمعيني .. مع 3 من ورا لغذا نتلاقاو حدا مول سيبير .. ليوم نفضيها
اسماء : ماشي قلنا تالغذا
منال : قتليك ليوم نفضيها هي ليوم
اسماء : ايوا صافي الله يعاون .. جيبي معاك لفلوس
منال : سيري
راوص : مسكين بقا فيا هاد كويميل

دخلات منال و سدات لباب و هي كتشمشم بنيفها ريحة غريبة .. وسوس ليها راوص عاوتاني
راوص : هاد ريحة ديال لعيالات . و راه ماشي ديالك أ لالة مولاتي . إلا ماجبدتيش معاه صداع دابا راك ما مرا ما والو
منال : وصلنا حتى لهادشي أ با كمال ! واخا ...بردي أ منال بردي .. شهيق زفير شهيق زفير
راوص : وا نوضي شمري على دراعك أشمن بردي .. لعيالات لحرات ماكايسكتوش على هادشي و يدوزوه بساهل
دازت منال و عفطات على راوص حتى خرجو عينيه .. 
منال ( وقفات و تلفتات و بقات كدور فعينيها ) : بسم الله الرحمان الرحيم .. ريحة جنون .. ( دفلات ف صدرها )
راوص : وااااااااا مي رجلي .. ماكاين حتى شي جن قدك
منال : لا لا خاصني نبخر و ندير شي تفوسيخة .. لعين قاصتنا من نهار تحولنا لهاد لحومة
راوص : سيري الله يغبرليك شقف
منال : اويلي امنال مالك رجعتي تفكري هاكاك .. فف .. أعوذ بالله من الشيطان الرجيم .. أعود بالله من الشيطان الرجيم
راوص : لاااااااااا
.... طار راوص من دار منال و كمال حتى لقا راصو فواحد القهوة جالس بين جوج ديال لي كوبل و هو مزال مدوخ حتى تلاح فوق منو صاك
فاتي : سميير ماديرش ليا هاكاك اهئ اهئ .. دابا اشنو دنبي انا الى تقت فيك و مشيت معاك و عطيتك كل ما عندي
سمير : حبيبة واش أنا قتليك غانتخلى عليك .. نتي كنتي عارفة ان اي جوج كايكونو بوحدهم ف شي بلاصة ضروري مايكون شيطان تالتهم و يغر بيهم .. نتي عارفة بنادم ضعيف و شيطان ولد لحرام دغيا وسوس لينا و غلطنا .. و لكن ماتخافيش معمري نتخلا عليك ا حبيبة
راوص : اشنوو !! فين عمري كنت معاكم يا لكذاب بن لكذاب ! نتا كليتي ليها لحلوة و باغي توحلها فيا ! هاد بنادم صعييب إتفو
فاتي : ماتقوليش شيطان أ سمير .. نتا من لول قنعتيني نمشي معاك غا على داكشي و غاراضك كنت شايفاه ف عينيك .. و لكن حيت كنبغيك و قلت كيبغيني .. ماتوقعتش غاتزعم تالديك الدرجة .. و لكن للأسف نتا مكتبغيني ماوااالو
راوص : هاهوا بان لي يقول لحق
سمير : وا صافي ا حبيبة نعلي شيطان راه غير نتوظف نجي لداركم هي لولة
راوص : أش درت أنا أعباد الله أش درت اااااوو
فاتي : إهئ اهئ خليني عليك أ سمير راه شيطان هو بنادم
راوص : أجي نبوسلك داك راس
فاتي : خلص خلينا نمشيو
سمير : ايوا ضحكي خليني نشوف ضحيكة و مسحي دموعك
فاتي : مافياش
سمير : ضحكي أ حبيبة عافاك
فاتي ( ابتاسمات ) : هاني
سميرة : مواح عليك الحب .. خليك هنا نخلص و نجي
فاتي : اوك
راوص : بااازلك يا ختي .. دغيا قدر يقنعك و ضحكتيلو 
شويا صونا تيليفون ديال سمير ...
شافت فاتي يمين و شمال و هزاتو لقاتو كاتب حبيبة 1
راوص : عوووك عوووك على حبيبة 1 .. سيد مرقمهم .. ها لي قلنا
فاتي ( مسحات دموعها و جاوبات ) : ألوو وييي شكون معايا
لبنت : شكون نتي
فاتي : كيفاش شكون انا أ حبيبة ! راك نتي لي مصونيا ل راجلي ... سمحيلي دقيقة ( غطات تيليفون بيديها شويا ) ملك حبييبة لبسي دغيت حوايجك هاهوا بابا قرب يخرج من دوش باش نخرجو ... الوو وي .. فين كنا ؟ اه .. واش كتعرفي راجلي أ حبيبة ؟
لبنت : الله ياخد فيكم الحق اهئ اهئ ( قطعات )
فاتي ( ابتاسمات و الشر فعينيها و رجعات لبورطابل لبلاصتو دغيا )
راوص : والايني مكتحشميش .. انا مزال عاد كنفكر اش نقوليك ديري و نتي سبقتيني
سمير : حبيبة صافي شويا دابا !
فاتي : وي لحبيب ديالي
راوص : عايريه اش لحبيب ديالي . سبيه .. نوضي ديري ليه فضيحة فلقهوة .. نوضي رجعي كرامتك 
سمير ( هز بورطابلو و لباكيا ديال لكارو ) : ايوا يالاه
حط يدو عل كتفها و هزات صاكها من على راوص و خرجو
راوص : اجي تسناي ! فين لفضيحة لي قتليك ديري .. شوهيه شوهيه
فاتي : حبيبي ان شاء الله منين غانتزوجو فين غانسكنو
سمير : فين مابغات حبيبتي
فاتي : ممممم .. بغيت دار كبييرة و تكون مفرشة عصري و بلدي اخر موديل
سمير : جاتك أ لالة
راوص : باش جاتها و نتا ماخدام ما ردام .. تسناي يحقق ليك هادشي حتى ل 2050
فاتي : و لكن ايمتى غاتخدم
سمير : نهار الإتنين ان شاء الله غايجاوبوني عل داك لبوسط
فاتي : هييم .. واخا أ حبي .. 
سمير : طاااااكسي .. يالاه حبيبة سيري نتي و تهلاي فراسك
فاتي : مغاتمشيش معايا
سمير : عندي شي غاراض مع واحد صاحبي .. حتى ل ليل و نهدرو
فاتي : اوك بسلامة
سمير : كنبيغك كنبغييك
فاتي ( ابتاسمات ليه و طلعات و مشات )
سمير : اووف الحمد لله دازت على خير
راوص : وا فييق من لقلبة لي كيتسناك مانعاودوش ليك .. هادا غا الهدوء ما قبل العاصفة

شد سمير طاكسي أخرا و طلع معاه راوص ... وصلو للمكان المقصود .. هبط قاد قاميجتو و صاط ريحة ف فمو و رجعها لجيب و مشا جيهة واحد الكراسا فلبحر لقا لحبيبة تانية جالسة تماك على نار و كتبكي ..
سمير ( نقز حداها ) : عييو لحب .. توحشتك موووووت مووت
أسماء ( ضرباتو بصاكها ) : الغدار الخاين تفو تفو .. نتا مزوج و ضاحك علينا انا و عائلتي .. صدقتي مزوج و كتوهمني بالحب .. الله ياخد فيك الحق يا ولد لحرام يا ولد ( كلام فاحش )
راوص : أوااااااه .. تي واش هادي الأستاذة ديال قبيلا ولا غلطت .. ايوا شوفيلك ناويا تقاد راجل صاحبتها و نسات خيرها دايو غيرها هاهاها .. هادشي زين
سمير : تهدني انا مفاهم والو .. ايي .. ايي حبسي ناس كتشوف .. اويلي أ حبي مالك اشمن زواج
اسماء : مزوج و وااااااالد مزاال .. أ بو ملك .. دوي يا شماتة يا لغذار ! أنا لي تايقة فيك صدقتي كتلعب على جوج جوايه .. و يعلم الله اش مزال مخبي
سمير : أ حبيبة اشمن زواج كنحلف ليك بلي راني مزال سيليباطير
اسماء : بغيت نقول غير نتي لي عندي و مزال ما مزوج كنحلف ليك .. و باش غانتزوج و انا مزال لا خدمة لا جوج .. واليديك عطاوك ليا بزز و غادي نوض انا نتزوج .. فكري بعقلك و قوليلي منين جبتي هاد لكلام
اسماء ( خنزرات فيه ) : عيطتليك هادي نص ساعة باش نقوليك راني وصلت .. و جاوباتني واحد خيتي قاتلي هي مراتك و عندكم بنت .. و بقات تقول ملك لبسي حوايجك قبل ما يخرج باباك من دوووش
سمير : هههه شكون هادو ! واش باين فيا مدوش !؟ راني 5 ايام ما غسلت حالتي هاكي شميني
اسماء : اوووف بعدني
راوص : خوينز مع راسك هاكاك نبغيك
اسماء ( جلسات و بدات تغبن ) : صافي خليني .. وا قوليا شكون هاديك
سمير : احبيبة انا كنت مع صاحبي فلقهوة و خرجنا و نسيت لبورطابل عاد رجعت جبتو .. داكشي لاش تعطلت .. غاتكون غا شي بايرة جاوبات عليه من طابلة لي كانت حدانا . كانو فيها واحد لكمايات الله يعفو عليهم و ملي دخلنا انا و صاحبي و هوما يكركرو بداك صوت لمبحبح ديالهم باش نمشيو نسلمو عليهم و يقديو فينا الغراض .. و لكن احبي انا ماشي من داك نوع .. و هادوك اصلا كيبغيو صحاب لعاقا و انا مالقيت تا باش نخلص قهوتي
اسماء : هييم هييم
راوص : تبارك الله عليك كداب محترف و ألفتي فيلم
سمير : ايوا ضحكي أ حبيبة مالك كاعية
اسماء : خسرليا نهار .. أنا غانوض نمشي دابا راني دايرة مع صاحبتي 3 و نتا تعطلتي .. 
سمير : تسناي شويا مزال ما شبعت منك زعما
أسماء : لا لا خاصني نمشي .. موضوع مهم
سمير : واخا حبيبة واش نشدلك طاكسي !
أسماء : لا بلاش .. بسلامة حتى ل ليل
سمير : بسلامة حبي .. اووف
راوص : بسلامة أ لكديديب لغديدير خرجتي راسك .. نمشي نشوف شغايديرو عند شوافة

عند منال
وجدات طبلة و مشات كدق على كمال ف لبيت لي دايرها بيرو .. ملي جا .. دوش و دخل ليها و من تماك ما تسمع حسو ...
هاد المكتب مكيخلي حد يدخليه من غيرو .. و نهار كتبغي منال طرفها و تمسح منها الغبرة كيبقى واقف عليها حتى تسالي و يخرج من وراها و يسد بساروت .. 
بقات كدق و تعيط ليه و لكن مكايجوابها حد .. سمعات لباب كيصوني و مشات تحل
منال : هادي نتي ! اش جابك دابا مزال لحال ؟ ياك قلنا حتى ل 3 و زايدون مزال ماتغدينا
اسماء : وا غا خليها على الله و صافي .. كنت دايرا على داك لمزغوب د سمير يغديني .. و لكن خسر ليا لمورال و زدت و خليتو .. مافيا لي يهدر فهادشي من بعد .. حطيتي ولا مزال فيا جوع ( دخلات ديريكت للكوزينة )
راوص : هاحنا جينا أ أستاذة
منال ( زدحات لباب و تبعاتها ) : راني درت غا بحساب جوج ماشي 10
اسماء : ناري يا ختي مالك كتقرززي .. خليني راني كارهة ( بدات تاكل و ماداتهاش ف منال )
منال : صبري نمشي نعيط لكمال و كولي تاكلي جغديد و لحم لعبيد
راوص : يييعععع اش هاد دعوة عندكم
يالاه جات منال تخرج من لكوزينة و هو يدخل كمال لابس حوايجو د لخروج
منال : أ فين غادي جلس تغذى ! و زايدون من صباح و انا نعيط ليك مالك مكنتي تجاوب
كمال : حبيبة ديالي كنت داير لكيت سمحيلي مسمعتكش .. و غير كولي بصحة انا شبعان ( دوز يدو على كرشو ) .. اووه ختي اسماء نتي هنا .. مرحبا بيك
اسماء ( جاوباتو و فمها عامر ) : الله يبارك فيك
منال : كمااال ! جلس تتغذى كيفاش شبعان ؟ ايمتى كليتي
كمال : حتى نجي ا حبيبة .. راني مزروب دابا .. يالاه بسلامة عليكم
.. مشا و بقات منال متبعاليه لعين حتى خرج و هي معصبة
منال : هاد راجل مخبي عليا شي حاجة .. و انا نطير أو نزل ضروري نعرفها
اسماء : اش مخبي زعما
منال (جرات كرسي و جلسات حداها ) : ماشي ديك لبيت رجع ساكن فيها كتر من دارو ! و مكانشوفوش اصلا بزاف كتر ماكاتشوفو ديك لبيت .. 
اسماء : يعني هاد لبيت فيها إن هههمم .. اكيد مخبي فيها شي سر
منال : و ضروري نعرفو
راوص : ايوا اش كتسناي ! سيري حلي لباب و قلبيها قنت ب قنت
منال : خاصني نحل ديك لباب و نقلب لبيت قنت ب قنت .. واخا مانع عليا نقرب جيهتها و لكن انا ضروري نعرف اش مخبي .. ياخوفي يكون لي فبالي ..
اسماء : شنو فبالك
منال : زعما يكون كيتفرج ف دوك المواقع ديال لعرا و تسلكيط .. 
اسماء : هيييييم يقدر ، منال !! اجي لهنا .. مايكونش راجلك سمعنا منين كنا ندويو على شوافة .. ؟ و خاف ياكل ماكلتك
منال : شنو ! لا لا مانظنش
اسماء : ايوا الله و علم كل شيء ممكن
منال : زيدي معايا نحل ديك لبيت نشوف اشنو لي فيها و شاغل عليا .. ديك ساعة عاد لهدرة
اسماء : زيدي ا لالة نحلوها
راوص : ايوا دابا عاد غانكتاشفو اش مخبي علينا هاد راس طارو د كويميل

منال : صبري نجيب شي موس نشوف واش غايحلها
أسماء ( هازا فيديها لخبز و كدوي بفمها عامر ) : أجيبي تونوفيس ( تورنوفيس )
منال : اه عندك لحق .. صبري ندير لكرسي راه لفوق فلبلاكار
اسماء : انا غانتسناك حدا لباب السرية ههه
منال ( من بعدما جبدات لفاليزا ديال لبريكول لي فيها المعدات ) : حايدي حايدي ليوم نعرف اش مخبي عليا
.. بدات كتحاول تحل فلباب و تعافر معاها و لكن والو
اسماء : هادشي يبالي موحال واش خدام .. هرسيها
منال : واش نتي مسطية كيفاش نهرسها باغا تخرجي عليا
اسماء : ايوا اش غانديرو كايبالي موحال واش تتحل
منال : صبري انا غانحاول مرة خرا على ربي ...
.. بقات كادفع فيها و دخل داك تورنوفيس و تعاود .. عصباتها و ضرباتها بجهد و هي تتحل
منال : اوووف و أخيرا
اسماء : ويلي شوفي لخشب راكي هرستيها
راوص : قوليلو دخلو شفارة ل دار و هنينا
منال : ايلا مالقيت والو فلبيت نقوليه دخلو عليا شفارة .. و غانعطيك ذهبي خبيه عندك
اسماء : لا لا أختي ماقادة على مسؤولية
منال : صافي سكتينا ماشي وقتو .. اجي قلبي معايا متخلي حتى قنت
.. بداو كيقلبو لبيرو كامل .. مخلاو حتى قنت مدازوش عليه
اسماء ( جلسات فواحد لكرسي ) : اووف .. أ والو أختي والو .. يمكن كيدخل هنا غا باش يتهنا من صداعك
منال ( حطات يديها على خصرها و بدات تشوف فلحيطان ) : شماتة خدا معاه ل PC .. باينا هو لي فيه لبلان
اسماء : ايوا خلينا نخرجو من هنا هاد لبيت كتجيب لغمة
منال : صبري بلاتي نقلب فهاد لمجر .. حتى هو نهرس باباه مابغاش يتحل
اسماء : ايوا حليه انا عييت و فيا نعااااس ( بدات كتفوه )
منال ( بقات كضرب فيه ب تورنوفيس حتى هرساتو ) : اوووف
اسماء : اش تماك ؟ ياكما تصاور صحاباتو
منال :مكاين والو .. غا وراق دلخدمة .. زبل اووف .. شغايكون كايدير فهاد للبيت
اسماء : راه هاد لمرة غير ضلمتيه 
منال : لا قلبي مامهنينيش
راوص ( كايدور فلبيت و يقلب حتى هو .. ) : قلبي من ورا هاد طابلويات
منال : اه بلاتي نسيت هاد طابلويات ماقلبت وراهم
اسماء : هههههه ضحكتيني .. تي مالو هاد راجلك زعما يكون عندو كوفر مخبيه من ورا طابلو ... داير فيه لفلوس و دهوبات هههه حايدي حايدي عليا راه خيالك واسع ...
منال ( كاتحايد طابلويات و تشوف من وراهم ) : تفو مكان والو ..
اسماء : ايوا داكشي لي قتليك .. يالاه نخرجو ..
راوص ( كيدوي مع راسو ) : شغايكون هاداك بنادم مخبي .. اووف خاصني نعرف باش نجبدليهم صداع .. ( هز عينو و شاف الخزانة الطويلة .. فيها غير جوج بيبان ... و بانتليه من لداخل انها خاوية ) : سيري دفعي ديك الخزانة
منال ( حتى جاو خارجين ) : اسماء بلاتي وقفي .. ( ضارت شافت ف الخزانة ) : هاديك ماحركتهاش
اسماء : اويلي واش نتي بعقلك ! لاش غاتحركيها
منال ( مشات قاصدا الخزانة بلا ماتجاوبها .. دفعاتها بشويا و هو يبان ليها باب لاصق فلحيط .. ) : بااااب ؟؟
اسماء : ديالمن هاد لباب واايلي .. حليه نشوفو
منال ( حطات ودنيها على لباب ) : هادي دار لي ملاصقة معااااناا !! كنسمع ف حنان كتهدر لداخل مع شي حد
اسماء : حنان الجارة ديالك لي مكتصرطش ليك ؟ 
منال ( حلات لباب بجهد و هي تخرج ف بيت نعاس ديال دار لي ملاصقين معاهم .. و بالضبط فبيت نعاس ديال حنان لي خدامة مغنية فواحد لبار سوقي ) : أشهاااااادشي كنشوف !!!
حنان ( لاحت تيليفون من يديها ) : مناال !! ( هربات و سدات عليها فطواليط )
منال : عوووك عوووك أ عباد الله ليوم نقتلهم .. حايدو عنداك تشديني
اسماء ( تخلطات عليها الصدمة و الضحك و الاستغراب فنفس الوقت ) : أويلي سيد باني باب هههههه 
راوص : والايني هادي فلتات ليا .. صدقو ف هاد الأرض حتى رجال ب كيدهم .. و أنا لي كان كيحسابليا غا نسا لي أستاذات .. هاذا من ليوم لفوق نعيط ليه غا دكتور كمال

منال ( كدق بجهد فلباب د طواليط ) : حلي أ هاديك لكلبة خطافة رجال .. يا خانزة البيطان .. حلي يا لكلبة ليوم أخرتك على يدي
حنان ( كدوي من ورا لباب ) : أش بغيتي عندي سيري غانعيط ليك لبوليس نقوليهم مهجمة عليا
منال : أنا لي غانعيط لجد بوكم لكلب ل بوليس و نلوحكم لسيلول يا لخاينين يا لمسخين .. بغيت غا نعرف من ايمتى هادشي من ايمتى يا ولاد لكلب .. ( بدات كدق بجهد و تلوح لكراسا ديال لاصال أ مونجي على لباب باش يتهرس )
راوص : هاكاك زيدي زيدي .. عنداك تخليها تفلت من بين يديك
أسماء : منال الله يهديك أ ويلي كلشي كايتحل بلعقل ... خرجي نتي أ ديك لمعفونة خلينا نهدرو
حنان : مخارجاش سيرو خرجو من داري .. عووووووووك عووك أ عباد الله تهجمو عليا فداري بغاو يقتلوني
منال : يا ويلي يا ويييييلي على ولاد لحرااااام ( ضربات لباب بجهد حتى تهرس .. و خرجاتها من شعرها مجرجراها فالأرض ) : ليووووووم تموووتي ليووووم ننتاقم ل كرامتي ... هاااااع ( عضتها ف ضراعها و وجها )
اسماء : حايدي حايدي انا نربيهالك ( تلاحت عليها بلقميش و نتيف )
راوص : هاكاك .. زيدو زيدو .. عضوو .. نتفوو .. نياهاهاهاها .. 
....
عويشة ( كدق فلباب ) : اويلي اش هاد صداع لداخل .. مال هادو مابغاو يحلو ... أحلووو هاد لباب .. ■ دق دق دق ■
حنان : عتقووووووني أ عباد الله عتقوني .. اااااااااااااااي ... بعدو مني المصوفجات .. اااااااااااااا ... عتقوني الناااس غادي يقتلوني
اسماء ( عضاتها و ناضت ) : اووووف .. كلبة هادي كلبة ... ( سمعات لباب كايدقو بجهد ) : مناااال ! أ مناااال
منال : سكتييييي خليني نقتل مها
اسماء : وا شي حد كيدق فلباب ... فففف 
منال ( كاعما داتها فيها )
مشات اسماء تشوف شكون و غير حلات لباب دخلات عويشة فحال شي عاصفة لاحت صاكها و بدات تقلب فدار و تشوف صداع منين جاي
عويشة : اش هادشي ا ويلي !؟؟؟ منين جاي هاد صداع
اسماء : أ أ .. خالتي عويشة على سلامة
عويشة : أجي هنا أديك سفريطة !! أش واقع هنا
اسماء : إحم خالتي عويشة .. راااه .. راا غيير
عويشة ( سمعات صداع جاي من بيت لبيرو و مشات تجري .. بانليها لباب و دخلات ليه لقات راسها فدار خرا ... تبعات صداع و لغوات و هي تبان ليها منال فوق من جارتها و قتلاتها قميش و شعوراتهم شادين ريزو لسما .. و مع منال كردة .. ايوا خليكم تتخايلو الموقف ) : أوييييلييي على لعروسة لي عطاني الله ( بقات تضرب ف فخادها ) : أش هادشي يا هاد لبنت .... حايدي من فوق لمرا واش بغيتي تقتليها و نبقاو نجيبوليك القفة
منال ( سمعات صوت عكوزتها و جمعات لوقفة تحنات على يديها باستها و كاتقاد فشعرها فحايلا مكانت دير والو ) : خالتي عويشة لاباس
عويشة : الله يمسخك .. سيري الله يمسخك .. أش هاد لحالة
منال ( جلسات فوق لكرسي و كتشوف ف حنان كتحاول تجمع لوقفة بزز و حوايجها كاع مقطعين ) : أاااا إهئ اهئ .. خااالتي عوييشة شفتي الحالة لي وصلني ليها ولدك
عويشة : اش دخل ولدي لهاد تصوفيج لي نتي فيه
... ناضت حنان كتجر يديها و تحنات على يد عويشة باستها 
حنان : خالتي عويشة كيدايرا مع صحيحة !
عويشة ( خنزرات فيهم ) : تخافو ماتحشمو .. سيرو الله يمسخكم و الله يتبعكم لبلا .. ( شارت بيديها ل أسماء ) : تكعدي نتي جيبيلي لما .. نشفتولي ريقي الله يعطيكم موصيبة
حنان : شفتي شفتي اهئ اهئ .. شفتي مرات ولدك أش دارت فيا أ خالتي .. تهجمات عليا فداري و سلخاتني
منال ( دفلات عليها ) : مزال لهدرة من بعد يا ديك لكلبة بنت لبيران
عويشة : سكتونا .. شوفي فيا نتي ! اش واقع هنا و لاش ضربتي سيدة
منال : واش اخالتي ماشفتيش لباب لي دخلتي منو !! ملاحظتيهش زعما ! راه ولدك لخاين لغدار هو لي بناه و كيخوني مع هاد لبيريمي شياطة .. و انا كيسحابليا كيدخل لبيرو يسد عليه باش يخدم .. و كانقول رااااجلي حبيبي مسكين هالك راسو فلخدمة برا و دار .. صدق كيجي لبيت ناعس تانية و كيخوني مع هاد لكلبة .. و اللهما نسمح ليه اهئ اهئ
عويشة : هاذا ولدي كمال لي دار هاكاك !!!
اسماء : هاكي أ خالتي لما
عويشة : حايديه عليا .. شوفي فيا نتي و جاوبيني ؟؟ واش ولدي كمال لي دار ديك لباب ولا كانت ديجا
منال : و الله يعطينا موصيبة أ خالتي مكانت اهئ اهئ .. ولدك كيخوني
حنان ( هبطات راسها )
عويشة : هادشي بصح أ ديك صفريطة !! .. دوييي
حنان ( هربات تخبات من ورا لباب ) : اه بصح .. هو كايجي غا يحايد لعيا عندي و يفوج و يمشي .. مكانديرو والو كنحلف ليك
عويشة ( وقفات و شافت فمنال ) : زيدي تبعييني .. حتى يجي كمال و تماك عاد لهدرة
منال ( خنزرات ف حنان و تحلفات ليها بيديها ) : هانا أ خالتي
راوص : اييوا صااااااافي .. كملات :/

رجعو لدار و سدات عويشة ديك لباب ... قادات منال حالتها و وجدات لعكوزتها اتاي هي و اسماء
اسماء : اش غانديرو دابا أ صاحبتي ف داك لبلان .. راك عارفة عكوزتك منين كاتجي كتسكن هنا و ماكاتقلع حتى تكرهكم ف عيشتكم
منال : ااف ماتزيديش تنكدي عليا الله يخليك .. و لكن مغانساش داك لموضوع و الله حتى نوري والديه
اسماء : لموهيم عطيني غا لوقت لي تكوني فيه هي هاديك و نمشيو
منال : من بعد من بعد تا نشوف هاد عويشة واش غاتنفعني و تجي من جيهتي هاد لمرة ولا غاتفقصني و دافع على ولدها كيف موالفة
اسماء : أ ختي بازليك معاها
منال : هاكي هاكي سيري حطيليها فطبلة غاتبدا تنgر علينا عاوتاني تقوليك كنهدرو فيها
اسماء : هانا غانمشي نجلس معاها حتى تجي ..
.. مرحبا بيك الحاجة عويشة
عويشة : ماحاجاشايت .. من صباح و نتوما توشوشو بوحدكم الستوتات .. شكنتو تقولو ..
اسماء : والو يا خالتي غا كنا نوجدو ليك ف كاس اتاي نرضو بيه الراس
عويشة ( ضيقات عينيها و شافت فيها ) : هييم .. ايوا الله يمسخكم
اسماء : الله يسمح ليك أخالتي
منال : مرحبا ا خالتي عويشة
عويشة ( دورات وجها جيهة سرجم و جمعات يديها و هي كتخنزر ) : يخليكم بلخلا .. وقتما نجي نفوج سويعة نلقا صداع
منال : و علاه أ خالتي أنا أش درت ! راه ولدك لي عينو زاايغة و فاقصني .. و هانتي شفتي بعينيك
عويشة : ايوا كون كنتي لالة و مولاتي .. كون مشافش جيهة خرا
منال ( مدات ليها لكاس د اتاي ) : ففف ... اش خاصني ندير واه ! راه مامخلياش من جهدي .. دار ديما نقية و ديما مطيبة ليه شهيوات .. حالتي دائما مقاداها و دايما كيشم فيا ريحة زوينة .. راه ولدك لي مكيسواش ا خالتي 
عويشة : نوضي يا ديك لبهلة لعوجة .. اهم حاجة ماموفراهاش ليه و كتهدري
منال : اشمن حاجة ! 
عويشة : على لولاد .. فيناهوما هاد لولاد ! اش كتسناي مزال ؟ 
منال : وا خالتي حنا باقيين مزال مكنفكروش فلولاد .. باغيين نعيشو حياتنا
عويشة : ايوا تسناي تعيشي حياتك .. راه هاداك ولدي و انا عارفاه .. خارج لباه .. و لكن انا كنت لالة و مولاتي و ولدت ليه واحد مور واحد .. 6 د دراري و بنت .. ماخليتش ليه فين يزيكزاكي
منال : وا الله يهديك أ خالتي عويشة .. ديك لهدرة كانت زمان ماشي دابا .. دابا واخا يكون عندو 20 ولد راه يخرج يحول فعينيه فلعيالات .. لي فيه شي لولة مكاتحايدش منو بلولاد
عويشة : وا نوضي يا لهبيلة شحال قدني نبقى نعلم فيك .. خليك بوهالية مدرمة حتى يدخل عليك ذرة .. و قولي عويشة قالت
منال : وا صافي أ خالتي نساي علينا هاد لهدرة .. شربي و كولي لحلوة .. انا لي صايبتها
عويشة ( عوجات فمها ) : ههم باينا على حالتها
اسماء : خالتي عويشة خليت ليك راحة ( حطات لكاس و ناضت ) : انا نوض نمشي لدارنا راه من صباح و انا على برا
عويشة : و كتقوليها بوجهك حمر .. الله يمسخك .. بنات دارهم كاينوضو على نبوري يخملو و ينفضو و يصبنو و يطيبو .. و يغديو واليديهم و يقابلوهم .. ماشي ملي يفيقو و هوما يطوطحو ف زناقي
اسماء : دابا هادو هوما بنات دارهم ! ايوا الله يسمح ليك أ خالتي و صافي
عويشة : كون جيتي بنتي و نوريك
اسماء : ايوا الحمد لله ماجيتش بنتك أ خالتي عويشة .. يالاه بسلامة عليكم
منال : تسناي نجي معاك لباب
عويشة ( عوجات فمها و دورات وجها لشرجم عاوتاني ) : اه سيرو تخابرو سيرو
منال ( كدوي مع اسماء بشوية ) : ففف الله يصبرني .. 
خرجو لجردة كيدويو على قضية الشوافة و ايمتى يتلاقاو .. و خلاو عويشة فصالون كادور فعينيها و تشوف واش زادو شي حاجة جديدة ف دار
راوص ( هز لحلوة من طبلة و بدا ياكل و يتبنن ) : ههم هادشي زين عندهم .. 
عويشة ( ضارت بزربة جيهة طبلة و هو يبانليها راجل جالس داير عليه سلهام و شاد فيدو ليسرا عصا و عندو قرون ف جبهتو صغار و عينيه حمرين ) : تتت .. شش شهااااادشي ! الله يا ربي .. الله يا ربيييي
راوص ( شاف فيها و فمو عامر و بقا مبقلل فعينيه مصدوم كتر منها ) : اويلي كاتشوفيني أ شارفة !
عويشة : منااااااااااااااال 
غوتات و سخفات

منال : هادي خالتي عويشة لي غوتات !!!
أسماء : اويلي جري جري نشوفو مالها
دخلو كيجريو لقاوها مجبدة فوق سداري سخفانة و راوص تخبى فلماريو و بقا يطل ب شوية
راوص : اش هادشي وقع .. كيدارت شافتني هاد شارفة
منال : اويلي مالها .. خالتي عويشة فيقي .. اسماء جيبي ليها لما دغيا
عويشة ( بدات كتحل عينيها بشوية ) : جج جن جن .. كان هنا جن .. ميييي ( بدات تبكي ) : واااا مي جن جن
منال : اويلي أ خالتي اشمن جن يهديك الله 
اسماء : هاكي عطيها لما 
عويشة : اهئ اهئ بعدوني خليوني نمشي لداري
منال ( بدات تشوف ف أسماء بتعجب و استغراب )
اسماء : دابا غا تهدني أ خالتي و قولي لينا اش شفتي
عويشة : ش ششفتو شفتو .. منين خرجتو جا هو جلس .. جلس هنا هنا ف ديك لبلاصة فين واقفة نتي ( كاتشير لأسماء ) : هز و بقا ياكل فلحلوى
اسماء ( جات وقفات حدا منال و بدات تشوف فلبلاصة ) : تما تما بصح ؟
عويشة : واش غاتكدبوني يا جيفات .. حايدو من قدامي خليوني نمشي لداري
منال : رجوع الله أ خالتي راك مرا كبيرة و عاقلة زعما .. ماتوقعتش منك هادشي
عويشة ( مارضاتش ) : أجي نتي كيفاش هاد لهدرة
منال : ياك كتقولي أ خالتي بلي مكاتخافي من والو .. و دابا غااا تخايليك شي خيال و باغا تهربي
عويشة : صافي حايدي من قدامي .. يمكن حيث مناعساش مزيان .. نوض نغسل وجهي .. حايدو
أسماء ( جلسات ) : هاد عدوزتك شرفات و غاتشرفنا معاها .. و زايدون لاش شديتيها ! السبة جات حتى لعندك باش تمشي فحالها و نتي شادا فيها ب يديك و سنانك
منال : الهبيلة ماتنسايش بلي مكاين من غيرها لي غايقد على داك جغل د ولدها .. ماتنسايش بلي خاني مع ديك لكبالة و مو شاهدة
اسماء :هييم زعما متأكدة غاتجي فصفك .. 
منال : راني عارفاها حرباية .. نتهلا فيها ف هاد سويعات قبل ما يجي ولدها و نشوف واش غايقضيولي شي نفع
أسماء : ايوا أ ختي بيناتكم .. مين تكوني واجدة صونيلي باش نمشيو عند ( و غمزاتها )
منال : صافي صافي سيري تبقى تسمعنا ديرلينا عرس
اسماء : ايوا هاني مشيت
منال : تسناي نخرج معاك لباب
اسماء : بلاش خليك مع ديك شارفة د عويشة .. بسلامة و عليك بصبر
منال : بسلامة يا ختي
عويشة ( خارجة كتمسح وجها و تجر فرجليها ) : مشات ديك صاحبتك لبايرة
منال : اه ا خالتي مشات .. كيبقيتي شويا دابا
عويشة : لاباس .. هانا داخلة ل بيتكم ننعس 
منال : اه دخلي رتاحي و حتى ل ليل و نفيقك تعشاي
عويشة : لا فيقيني منين يوذن باش نصلي ...
منال : واخا أ خالتي .. لموهيم هانا غانخرج دابا نمشي نتقدى للعشا
عويشة : سيري ..
راوص ( طل على منال حتى خرجات و بدا كيفكر بصوت مرتفع ) : اووف دابا هاد شارفة صدقات كتشوفني .. مصيبة كحلة صافي .. ضروري خاصني نعرف اشنو لي كايخليها تشوفني .. ففف عنداك غا نكون غلطت ف شي حاجة .. ( وقف مستقيم فحال لخشبة ) : نااريي لااا ! لحلوة .. تفو كيدارت مشات من بالي بلي ايلا كليت الحلويات غايرجعو يشوفوني هاد البني أدم . ففففف أ راوص شهاد لمشكيلة .. دابا خاصني نتسنى ساعة عاد يمشي المفعول ديال السكر
عويشة ( حلات لبلاكار بزربة و بدات كضرب فيه ب شطابة ) : موووت الجن .. مووت الجن موووت موووت ... الله ينعل مك يا جن لخانز .. مابانتليك غا دار ولدي تجي تسكن فيها .. انا غانوريك معامن طحتي .. هاااك لمك
راوص ( مخبي راسو بيديه ) : اييبي اييي ايبي سيري بعدي مني الشارفة .. ااااي بعدي انا مآديتكش .. متآدينيش غاتندمي .. اااااي بعدي مني .. عتقوني
عويشة : مكان لي يعتقك من بين يدي يا جن لخانز .. 
راوص : ان راه ماشي جن بعدي مني

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.