كنت كنتسناهم يبداو يطلبو ملي فلوس وكدا يمكن جا هاد نهار ليوم.. لقيتها كتسنى فيا بوحدها وقفت عليها سلام سلام سولتها شنو تما شنو باغيا تقولي ليا ولي مكيتقالش فتيليفوت؟ بقات كتمتم وكتدور فلهضرة شحااال هاد قدات تهضر قالت ليا بلي باها ومها فاش كيدابزو كيعيرها بيا وبلي هو لي مبغانيش نبقى معاهم ماشي مها.. خربقاتني دبصح سولتها علاش أصلا عمري شفتو هاد سيد أنا وسيدة لي رباتني مقالتش ليا هكذا وهيا مغاديش تكدب عليا.. قالتلي صبر وغنشرحلك كيفاش بغيتي ماماك تقولك شي حاجة هيا أصلا معارفاهاش راه لواليدة فاش عرفات بابا كانت أصلا حاملا بيك وفاش تزوجو وعرف بلي نتا ماشي ولدو مقدش يصيفطها ودارهم اصلا بقاو معكسين معاه تا تزوج بيها فاش عرفوها شنو خدامة وصافي قالها تعطيك لختها وهادشي لي دارت.. بقيت كنمنطق هادشي مع داكشي لي عارف قلت ليها شنو ومن بعد علاش كتقوليلي هادشي وخا تكون بصح راه متبدل والو مزالا هيا سيدا لي باعتني غير دبا نقصتي باك من ليستا أصلا كنت حاس بلي مكيشبهلي فوالو.. بقات عليا بديك لهضرة د أنا غير بغيتك تعرف باش متبقاش فدار غفلون ولموت والحياة هادي وماما مريضة إلا كنتي كتفكر بلي غتمشي شي نهار تشوفها خاص هاد نهار يكون ليوم قبل غدا والله حتى باقي فيها لحال من جهتك و.. بقات داويا خليتها حتى كملت ديك لهضرة لي سمعتها 1000 مرة قلت ليها راه هادشب وقع قبل متزادي ومعارفا عليه والو خليك كتشوفي لوالدة ديالك فمقام زوين.. وصلتها لدارهم ورجعت لدار عطيت لبنت ناس سوارتها باركين وهيا تقوليا بلي غادي تسافر مورا رمضان لأول مرة غادي نتناقشو فشي حاجة أنا مبغيتش كيفاش تمشي لبرى بوحدها مالنا ماشي رجال بقات كتطلب وعندي خدمة خاصني نطل عليها وهادشي نتا عارفو من لول مديرش ليا هكدا حلفت عليها إلا مشات غي بلاما ترجع وهيا تبدل لموضوع وبقات كل نهار كدير ليا شي دخلا زوينة وكتبقى تطلب فيا غنمشي 4 يام بلحساب وغنبقى ندوي معاك كل ساعة.. أنا وخا هكداك راه حنين😊 مقديتش نبقى معكس معاها خرج رمضان يوماين سافرنا فيهم رجعنا بدات كتقاد فوراقيها وكدا قالت ليا نخلي ليك طوموبيل مبغيتش غير ديها سدي عليها فدارك أصلا معندي فين نمشي ولمحل غير قريب لدار صافي واحد سيمانة يمكن وهيا تسافر وصلتها لتما وبقيت معاها تا مشات مخليا ليا سوارت د دارها رجعت ليها طوموبيل وسورت دار تا مشات عاد تنادم معايا لحال ديال بصح انا طحت من عيني ولكن صافي دبا مشات ولكن غتكون أخر مرة ولفت ندخل لدار نلقا ماكلتي واجدا واي لعبة حليت عليها فمي بنت ناس كانت دايرا معايا لخاطر دبصح بانت بلاصتها من نهار لول ولكن هانية 4 ايام دوز طايرا وبصح من لخدمة لدار كناكل شي حاجة على برى وكندوييو بزاف خدام وداوي معاها اوا دازت 5 ايام بحال شريب لما قالت ليا بلي عندها خدمة بزاف ومغتبقاش ترجع سو غادي تعطل شويا غتكمل ديك سيمانة قلت ليها هانية بحال 4 بحال 5 بحال 7 غير ديري عقلك وصافي.. لمهم نهار 6 جا عندي داك مول لإمبالا لقاني خدام بقى واقف حدايا حتى ساليت عاد ريحنا فطوموبيلتو قلت ليه لله يسمعنا خبار لخير قالو ليا بلي بقيتي كتجي تسول عليا شحال هادي فين كنتي غابر هاد لوقت كامل؟ فخبارك تزوجت أنا ومريم؟ خونا تصدم قاليا خاص تجيو تعشاو معانا قلت ليه راه مسافرا هاد الأيام.. خونا غادي نطيح من عينو تاهو اللهم نقلب لموضوع يلاه باغي ندوي فشي حاجة أخرى وهو يقوليا ديك لمهم عندي ليك واحد لخدمة زوينة إلا بغيتي والله حتى غادي تصوفي راسك دبصح ونتا حرفتك هادي مكينش بحالك فيها ولكن إلا خدمتي معايا مغاديش تبقى تجي لكراج ديالك.. أنا بلاما نزيد معاه فالهضرة قلت ليه سمح ليا لمحل ديالي معيشني بييخير وخدام على راحة راحتي كيف نجي كيف منجيش كتر من هكدا مكينش شنو هاد لخدمة بعدا واش شي شركة ولا كيفاش؟ قاليا لا غير انا و واحد صحابي بحال وجهك.. باش قاليا ديك فحال وجهك قلت ليه جبس حبس كيفاش بحال وجهي هيا تاهو شي ولد ل*** هدا غير خطيني أنا.. قاليا ديك والله حتى غادي تضيع فرصة مكتعاودش..صافي خونا باليا داوي من نيتو قلت اجي نسمع اش هاد لخدمة قاليا بلي غادي يبقى يجيب طوموبيلات قداام بحال لهيت ديال طوموبيلتو وباغيني نبقى نخدم نقادهم وبعض لمرات نجمعهم قالي بلي يقدر لموطور يجي مفرتك مفهمتش شنو باغين يديرو ولكن قالي بلي غيكريو شي محل كبير نبقى نسد عليا و ناخد راحتي فلخدمة وغادي يبقى يعطيني ديك زوج ولا 3 ديالي فكل بريكول درت معاهم قلت ليه معاك أنا صافي أساط شوف أرا نبصم ليك على شي حاجة عنداك تبدلني.. ولكن راه لخدمة لي نقدر ندير فهاد لمحل لي غادين تخسرو عليه فلوس و وقت نقدر نخدمها غير فلكراج ديالي وبيخير وميخسرو تاحاجا غير هو يزيدوني فلوس راه كيقولك زيد لما زيد دقيق.. قاليا بلاتي نتشاور مع سيد جبد تيليفون عيطليه من ضهرتو باليا خونا مبغاش ليه قلت ليه عطيني ندوي معاه خديت تيلي سلمت على خونا صوتو غليييض قلت ليه راه عندي محل كبيير وفبلاصة زوينة وديالي بوحدي زعما مكين حتى مشكل وقريب ليا لدار دوزان وكلشي فيه غادي نقص عليه بزااف دلخدما ولفلوس داكشي راه ساوي خونا صافي قاليا ديك غير سلعتي راه برانية ومنكدبش علك راه مخصهاش تخرج لزنقا وزربا تاني فاش تحط عندك 48 ساعة حتال 72 خاصها تخرج من عندك وهادشي راه غادي تخلص عليه مزيان جمال راه بقى كيعاود ليا علك بزااف وكتباليا تيقا غادي نديرو قهيوا فليل ولا غدا ونزيد نشرحلك ونتفاهمو صافي؟ صافي ان شاء الله.. عطيتو صاحبو يدوي معاه صافي قطع قاليا بلي غادي يدوز لعندي مورا لمغرب باش نتعشاو مجموعين فدار هاد جمال قلت ليه صافي لله يحفظك.. مبقاتش راشقا ليا على لخدمة واحد لبلاصة فلمحل كانو كيصبغو فيها لمهم هيا بحال لبيت كبيرا وريدو لمهم تما غنبقى نخدم ونخلي لخونا طوموبيلاتو ونخدم معاه غير تما صافي قلت لدراري يخليو ديك لبلاصة خاويا.. وشكوون كيدوز عندي خونا لي كنت خدام معاه شحال هادي تاني هادا ليوم لعالمي ديالي ولا شي لعبة سلمت عليه بقى كيسول فيا فين غابر وديك لهضرة مقلتش ليه على هاد لبلان دخوتنا وهاد لخدمة لحاجة فاش كتبقى تعاودها لبنادم معمرها تصدقلك صافي باركين وهو يفكرني فليلة لي كنت قاديت ليه طوموبيل فيها وأنا نسولو بروجولا واش معمرك سولتي واش لي ضربتي مات ولا شنو وقعليه قاليا إلا سولت نقدر نجبد لراسي صداع ولكن مزال ضاراني خاطري ومن داك نهار مبقيتش كنطلع لطوموبيل وأنا سكران.. لهربة ماشي مبقيتش كنشرب لا لا خونا مغربي خاطيني لحلول نهائية.. لمهم ديك لعشيا تلاقيت بيهم فدار هاد جمال نفس لهضرة أنا كندوي غير على لفلوس راه لمحل ولخدمة ديالي تما قاليا متخافش مغاديش ضيع فدرهم ديالك صافي خوتنا عارفين شنو كيديرو قاليا واحد ليوماين وغادي يجيبو أول طوموبيلا قلت ليهم ان شاء الله تعشينا سولاتني مرات خونا على مريم حيت كيعرفو بعضياتهم من يامات لقرايا وكدا قلت ليها ديك مسافرا غدا غتجي ان شاء الله وجمعت نوضا قلت ليهم غادي نمشي عندي ميدار.. وصلوني لدار ومشاو دخلت تنعيط عليها راه غدا خاص تجي بنت ناس مكتجاوبش معارفش شحال لوقت عندهم ديك ساعة بقيت بارك كنتفرج حتال ديك 2 تنعاود نعيط ليها مكتجاوبش تاني وموالفين كندويو ديك لوقيتا درت واحد نص ساعة زعما وعاودت صونيتلها لقيت تيلي طافي هاد لمرة..
بنت ناس كنصوني ليها باش نسولها واش غتجي غدا وهيا تطفي تيلي كاع شعلت ديال بصح وخا هكداك تنقول يمكن طفا ليها غدا اتشوف شحال من مرة عيطتلها وغادي تعيطلي.. بقات ضاراني خاطري بزز باش داني نعاس لغد ليه فقت مصيفطات والو تيلي مزال طافي معرفتش شنو واقع ليها ولا شنو كتصنع تما ولكن لفار بدا كيلعبلي فدماغي ولكن أنا لي داير هادشي كامل.. مشيت لخدمة ولكن مراشقاليش على لخدمة بارك فوق واحد لكرسي لداخل كان تيبرك عليه لواليد وشاد تيلي فيدي تنسركل كنقول هاهيا غادي تعيط وهوما يدخلو عندي واحد زوج دراري غيكونو صغر مني بشي عام ولا قل سلمو عليا أنا عرفتهم كيقلبو على خدمة حيت من نهار حليت لمحل كيجيو عندي دراري هكدا حفظتهم يلاه غنقوليهم بلي مخاصنيش ولله يسهل ونوريهم شي محل أخر بانو ليا كيدويو بواااحد صواب والأدب فكروني فراسي شحال هادي عرفتهم خوت من هضرتهم وبرانين ومن صغرهم خدامين فهادشي بحالي مقديتش نقول لا وأصلا أنا مشغول بصداعي وعاد هاد لخدمة جديدة نقدر منساليش و كينا لخدمة مزيانة ليهم وليا صافي خرجنا على برى بقيت داوي معاهم وخا ضريفين خاص نوصيهم مخاصنيش مشاكل لمهم يلاه تحركو هوما كيباليا واحد لكاميو كبيير كنشوف بحالو غير ف(fast and furious) تقاد مع لباب دلكراج عاد نزل عندي قاليا سي سعيد هدا؟ صافي أنا تحليت بديك سيدي أه هو هدا قاليا بلي مصيفطني لعندو جمال وداك عشيرو حل لباب كتباليا واحد لمرسديس بنز قديييما مبهدلا شويا لموطور نقي بوحدو وصالون ديالها وكاع لبياس مفرتك تقول كانو كيحاربو بيها قلت ليه واش هادا من نيتو قاليا باغيها فيوماين ولا 3 راه خاصها لخدمة وتصبغ عاد نرجع ليها مصارنها ولبياس راه سيمانة هيا لقليلة.. قاليا أنا غير كنوصل سلعة منك ليه سنيلي غير على هاد لبون و ورينا فين انهبطولك هادشي.. وريتو لبيت نزلو زوج دراري خدامين معاه بداو كينزلو داكشي كنقلب على نمرة خونا وهو يوقف بواحد رونج سلم عليا قاليا مزيان عرفتهم غيكونو وصلو دبا.. بقينا واقفين عليهم حتى نزلو كلشي هبطو طوموبيل دفعوها لداخل لداك لبيت سديت عليها وعلى داكشي ديالها خونا سناليهم على لبون باش تحركو خونا يلاه غندوي معاه وهو يقوليا أجي معايا تحركت معاه لطوموبيل ديالو طلعنا وهو يمدلي ورقة فيها لون لي باغيها تصبغ فيه قلت ليه بعدا راه خاصنا ندويو راه سيمانة ديال لخدمة تما بوحدي غادي نشوف شي واحد فدراري يعاوني قاليا لا لا تافقنا بلي بوحديتك لي غادي تحط يدك فيها فاش غيجيك لبريكول بحال دبا وتكون لخدمة بغيتك تنسا ليا نعاس نعسلك ديك 4 سوايع ونوض دور فلخدمة ديال بصح وراه غادي تخلص مزياان على هادشي وغترتااح مورا كل خدمة ونتا راه جمال بقى كيشكرك ليا وتانا بركت معاك وتستاهل غير لخير.. لمهم خونا صبغني ديال بصح مدلي 5 الاف درهم قاليا هادي ديال صباغا وإلا خصاتك شي حاجة أخرى عيطلي وفلوسك اتاخدها مني تكمل لخدمة صافي؟ دورتها فدماغي صافي نجرب معاهم هاد لمرة ونشوف شحال غيطلعلي منها إلا واش يستاهل ولا لا صافي قلت ليه غندير جهدي ونشوف امتى نكملها وهو يمشي وصيت دراري تاواحد ميقرب لداك لبيت مشيت لدار تغديت فطريقي وأنا راجع خديت كوجاك وداك تخربيق دلوز وكاوكاو وكدا وكانيطات نشد بيهم ستون ميمشيش بالكم بعيد غير نشربهم ونلوح لخاوي لمهم سديت عليا فداك لبيت لمزيكا و لخدمة نتلاها فلخدمة حسن منبقى نتسنى فديك بنت ناس تعيطلي ولا تجي غدا يقدر يكون تيلي ديالها خسر ولا كلشي ممكن حيت أصلا مخليا ليا سوارت ديال دارها وطوموبيل كون مكانت ناويا ترجع مكانتش غتعطيهم ليا لمهم مخرجتش ديك لعشيا تا بغاو دراري يمشيو عاد خرجت سديت لمحل من لداخل وعاود دخلت لخدمة مبغاش يديني نعاس تال ديك 4 دصباح نعست تما وسط واحد طوموبيل فيقوني غير دراري لي خدامين معايا بدقان فلباب حليت ليهم جاو دوك زوج دراري دلبارح سلمو عليا صافي بدلو بداو خدامين رجعت أنا لبيت لخدمتي داير بالي مع تيليفون مريم غادي تجي ليوم لدار وتعيط ليا تا كنسمع دقان فلبيت حليت لقيت داك جمال مول لإمبالا دخلتو سولني كيغادي مع لخدمة قلت ليه مزيان لقيتيني غنخرج نجيب صباغا نزرب نصبغها باش فليل نبدا نركب ليها لبياس وصالون.. خونا صافي جاي غير يشوفني كيغادي عجبو لحال فاش لقاني زربت عليها زعما حمرت ليه وجهو مع صاحبو داني تقدينا صباغا وشي لعب وخديت غدايا ديتو معايا لتما وسديت عليا تاني بقيت كنقول غير نص ساعة ونتغدا نص ساعة ونتغدا وليت مغدي حتال 5 دلعشيا ولكن صافي طوموبيل صبغتها غنخليها منقيصهاش كليت بدلت حوايجي مشيت لدار غادي مبهدل كينا إمكانية د80% نلقا ديك بنت ناس رجعات لدار حليت لباب تنعيط ليا منيتي والو مجاتش دخلت دوشت عاد ريحت تنعيط ليا نمرة طافيا بلااان شي أفكار وسيناريوهات بداو كيطيحو ليا فدماغي ناريي على هاد لحساب كون غير عطيتها براتها قبل ما تمشي باش تانا نتهنا متبقاش محسوبا عليا لمهم ضلام لحال عرفتها مجاياش داك نهار مشيت لدارها قلبتها شبر شبر لقيت بعدا واحد لكتاب فيه شي نماري ضربتو فجيبي بقيت كنقلب ليها فبيتها تحت سرير وسط لحوايج أصلا هانية لمادام لقيت شي فلوس ولكن ماشي شي حااجة لمهم رجعت داكشي كيف كان خرجت مشيت لخدمة طوموبيل مزال خاصها شي ساعتين حليت عليها لبيبان وريحت كنقلب فداك لكتاب بديت تنعيط ليهم تنلقاهم غير شي صحاباتها و شي ناس من عائلتها معارفين عليها والو ومفخبارهمش تا بلي تزوجنا لمهم باليا مطالعلي والو من داكشي صافي غنزيدها غدا إلا مجاتش وكان عندها شي سبب دبصح تا تقطع لحس هكدا غادي نتفارقو خوت مالي على هاد لحالة زعما عندها زوج ريالات غدير ما بغات مزال معارفانيش هادي يمكن راه نبقى معاها 50 عام ومعمري ناخد من عندها درهم برزقي لحمد لله.. بقيت خدام وحااقد ديال بصح إلا شرف يا أعداء لله طوموبيل صافي ان شاء الله غدا غيديها مولاها غير ضايع فهاد لبلاد بهاد لحرفة كون كنت على برى راني أنا مول ميرسيديس دبا ضيعين والله.. خارج بحوايجي مجرتلين دلخدما مع ديك ل10 دليل ناكل شي حاجة على برى كتباليا واحد داسيا واقفا قدام لمحل تنزومي بعينيا كتباليا نيضا تنفس إصطناعي فيها ولا عندي برتوش هنا واقيلا دزت من حداهم مشافونيش مشيت جبت واحد نص دجاجة محمرا بلفرية بالعب ديالها ورجعت لقيتهم مزال خدامين وأنا ندق على خونا فزاجة واش عندكم رخصة ديال هدشي.. واش هادشي فخبار لمخزن؟ خونا قاليا ديك شنو؟ تنطل نشوف شكون هادي لي معاه نارييي سناء بنت عمي لي ساكنين لفوق على بونة كنت انتزوج بيها شداتني لغيرة أنا شنقت عليه جريتو من بلاصتو خونا معرف باش تبلى لقا راسو برى نص بلاصة تاهو حطيت ليه واحد لمسمنا تيقوليا غير نشرحلك أخويا.. وهيا تنزل مها كتجري جراتني قالت ليا برد شنو واقع قلت ليها نسولكم نتوما مبغيتش ختنى يحسابلها كنغير ولا قلت ليهم محل ديال لخدمة هدا ماشي برتوش قالت ليا هدا راه غير خطيبها.. اوا طلعيهم عندك لدار ماشي هنا وكيفاش غير خطيبها مالنا ولينا يهود حنا ولاكيفاش طلقوني عليها عطييوني شي حججرة.. عمي فخبارو هادشي؟ فين هو؟...
دنيا سايبا ولا كيفاش مبقينا نحشمو مبقينا نخافو وقدام لمحل ديالي ولكن غير سمعو ديك فين هو عمي واش هادشي فخبارو ولاو باغين غير يبردو سوق صيفطو خونا بحالو جراتها مها دخلاتها وتانا دخلت كليت داكشي لي تقديت كتحلي شهية فاش كيكون الأدرينالين طالع لمهم عيطت على خونا قلت ليه غدا دوز صباح دي طوموبيل, وخا مزال مكملتهاش قلت ليه هكداك باش منعكزش ونزرب عليها لمهم بديت خدام وأنا نسمع دقان فلباب مشيت حليت لقيتها مرات لعميم جايا واحد طبصيل فيدها مغطي قالت ليا بردتي شويا قلت ليها كتقوليها هكدا بحالا أنا لي مكبر لموضوع راه. قالت ليا صافي سكت سكت هاك تعشا بعدا.. خديتو من عندها دخلت وهيا تبعني جايبالي رفيسة شحااااااال مكليتها وختنى صارعاها غسلت يدي وبارك كناكل وهيا واقفا عليا قالت ليا عمك مسافر غدا غادي يرجع عنداك تقوليه شي حاجة راه مريض ونتا عارفو كيفاش داير و.. واش منيتك شنو فيها ما يتقال معندك مناش تخافي غير هادشي ميتعاودش أنا مسوقيش غير يبعدو على هنا بعدا.. قالت ليا ديك لا اويلي كيفاش مسوقكش بالعكس راك فمقام خوها زعما.. مبقيت عارف ما نقول مديت ليها داكشي لي جابت كليت منو شويا يلاه معشي سديت عليا وبقيت مدابز مع ديك طوموبيل حتال 7 دصباح دوك زوج خوت ولاو كيجيو هوما لولين وأخيرًا كملت ديماريتلها عرفتي فاش تحركات دموع سالو ولات بحال شي عروسة بنتك وتزوجات بعدا هاد ليوماين ديال لعداب ممشاوش غير هكداك بقيت بارك تما كنقلب فطوموبيل لا نكون نسيت شي حاجة حتى جا خونا مع ل10 بقى غير حال فمو قاليا والله تا طلعتي معلم.. عيط على عشيرو جمال مول لإمبالا قال ليه دوز لكراج ديال سعيد وهو يجيب لسيد فلوسو معاك بقينا واقفين تيقلب فطوموبيل شبر شبر تا جا جمال سلمت عليه بركنا فيها ضرب يدو فواحد جيب مدلي فلوس قالي حسب هادو أنا راه وليت خطير فالحساب من يامات ديك 13 لي حسبتها 1000 مرة لمهم خونا عاطيني 5 آلاف درهم ومع مناعسش وعيان ومعالم بيا غير لله خاصني غير معامن نشعل باش كملت لحساب قلت ليه واش كتضحكو عليا ولا كيفاش هادو شنو نخلص بيهم ضو ولا ثمن لماتريال ولا نعاسي وخدمتي راه جات غير جالوقة هنا بربي لا تحركات.. وهو يقوليا أأااا بردااا سعيد برد هادوك فلوس دلمحل ديالك وضو وداكشي لي قلتي ها فلوسك نتا وهو يمدلي زوج بريكات مجموعين بواحد لوريقا فيها 10 الاف درهم عاد برد دم شويا وليت غير ضاحك تفو وريتهم لوجه لخيب ديالي على والو تفرشت معاهم من لبديا قلت ليهم غير سمحولي راه عندي شي مشاكل وهاد ليوماين منعستش جمال وهو يقوليا عارفين لي كاين وراك درتي خدمتك رتاح دبا تكون شي حاجة راه غادي يجي لكاميون حتال هنا بحال داك نهار ويعيط ليك غنعطيه نمرتك.. داوين وهو يوقف الكاميو قدام لمحل تاني طلعوها وتحركو بدلت حوايجي درت دوك لفلوس فجيبي وصيت دراري على لمحل ومشيت لدار وخا مكتوبا شحال فيهم عاودت حسبتهم وقلبتهم واش مزورين ورقة ورقة مبغاش يديني نعاس وخا فيا لموت دلعيا ديك خيتي دارت ليا واحد لقالب فشكل دبا أنا راه مخاسر والو بالعكس ولكن بقى ضارني راسي علاش دارت هكدا ومخليا ليا سوارت دارها وكلشي زعما مبقيت فاهم والو ولكن كنحس بشمتاا ديال بصح كنت بيييخير فخدمتي فصحتي فعيشتي تا خرجاتلي من جنب.. بدلت حوايجي وخرجت تنقلب على شي محامي أنا صافي باغي نطلق هاد لفلوس غنخسرهم عليها لمهم نرتاح أنا مع خاطري لقيت واحد خونا فاش دخلت عندو بدا كيبرد فيا ولعايب حجتو معاه ومتزربش وإن بعض ظن إتم.. أنا وليت شاك فيها بايتا معاه هادشي علاش كيدافع عليها إنهم يفسدون أخلاقنا يا أبا جعفر هادو مبغاوش تبقى عندنا نفس ولغيرة كاع واقيلا خارج كنقلب على شي واحد أخر يكون شريير نعتولي وااحد لمحامية يا خوتي حجبانها بحال نصف مثلت معرفتها باش مقاداهم باغي نطلق اه مرحبا أسيدي نتا لول يلاه كنشرح ليها وهو يصوني تيليفوني نمرة برانيا عرفتها هيا لي معيطا ولا شي خبار عليها قلت لختنى سمحيلي واحد دقيقة خرجت على برى حيت عارف راسي غادي نخصر لهضرة خرجت على برى جاوبتها يلاه غنبدا نسب قالت ليا سعيد غير سمحلي والله عارفا بلي مدرت فيها ما يصلاح غير. مخليتهاش تكمل بلاما تزربي عليا بالهضرة أنا دبا قدام لبيرو دلمحامي كيف تجي كيف ما تجيش تلاقينا خوت هاحنا غنتفارقو براهش.. بدات عليا بديك لهضرة ديال لخدمة وأنا ماشي لخاطري و.. بنت ناس مقلتش ليك أنا خدمي قلتي بغيت شي حاجة وملقيتيهاش عمري قلت ليك عطيني شي درهم أصلا كنت عارف كينا شي حاجة اويلي سيدة زوج سيمانات قالت ليك نتزوجو ولهضرة زوينة وداك تق*** كلو ليوم غنديرو ليه حل صافي مخاصنيش أنا بهادشي.. صافي تطلق لسان وتعبير رتاحيت راه شحال من نهار وأنا كنتسنا ديك ساعة باش نقي ليها ودنيها.. بدات كتبكي وانا راه كنبغيك وديك لهضرة لي كندوب معاها أنا ولكن كتبقى روناتها معايا على لأقل كنتي تعيطي قولي ليا راه غنتعطل نحس بيك راه دايرا ليا قيمة ماشي صافي وقتما عيطتليه راه معندو ميدير شنو زعما أنا كادر هنا ولا شبغيت نكون أنا.. بقات كتقوليا غير صبر حتى نجي غدا صافي هاد لخدمة لي غديرلنا هكدا مبقاش خاصني بيها أنا صافي برد ونعل شيطان كيوسوس ليك بشي حوايج مكاينينش ولكن غدا نجي رجع لخدمتك ولا لدار رتاح غدا أنا جايا.. بنت ناس كتعرف كيفاش تبردني قلت ليها غدا غتجي عاد غنهضرو لهضرة مسالاتش هنا وقطعت معاودتش دخلت لتما رجعت لدار ننعس دبا عاد لواحد يقدر ينعس وهو مرتاح بقيت ناعس من نص دنهار حتال نص ليل وفيقني غير لعطش شربت بقيت نرجع لقيتها معيطالي تاني فاش كنت ناعس مع ديك ل5 عيطتلها وهيا تجاوب سولتها شنو تما قالت ليا والو غير كنت كنجمع حوايجي وبغيت نسولك واش باغي شي حاجة نجيبها ليك معايا.. عرفتي واحد لعنيبا كين لداخل حبستو باش مينطقش راه منوضينها معاها زعما قلت ليها بقاولنا غير لكادويات إمتى غادي تجي بعدا؟ قالتلي باقي ليها شي 6 سوايع وغتمشي لمطار هضرة تجيب هضرة وداير بالي مع هضرتي راه مقلق زعما راه ناوي صداع أنا فاش تجي لهنا باغي ندير معاها حل باش هادشي ميتعاودش لمهم قطعت عليها ورجعت نكمل نعاسي لغد ليه يلاه مشيت لعند لحلاق ولحمام رجعت لدار بارك قدام تلفازا وهو يصوني تيلي ومع بعيد عليا فشارج غادي وكنقول يمكن هيا ولا لخدمة إلا كانو خوتنا دبا غادي يحنسروني منقدرش نمشي أصلا غير لبارح باش طلقت ليهم طوموبيل ومنقدرش نقول لا تاني راه فلوس تما.. لقيتها غير مرات سيد لي مربيني نسيتها أنا كاع بدات داويا معايا زوين كان كيحسابلي غتطلبني على شي حاجة سيدة بالعكس قالت ليا بلي قريب غادي تزوج ودبا غتمشي تبقى فدار ختها ولا منعرف لمهم باغيا تعطيني سوارت د دار ديال لواليد وجابتها فوقيتا مقودا أصلا مبقيتش حامل داك لكرا..
كتكون كاعي ودنيا كحلا فعينيك وبلاما تحس كلشي كيتبدل بشويا بشويا ها سيدة غادي تعطيني سوارت ديال دار لي كبرت فيها فاش هزيت صاكي وخرجت منها كنت كنقول مع راسي عمري مغادي نرجع ليها وهانا راجع ليه و ولات ديالي سيد لي كنت كنقول مغاديش يخلي ليا تا باش نقي سناني ولا هو لي معاملني لمحل لي خدام فيه ودار هو ماشي لخاطرو كلشي من لواليدة ولكن لمهم يمكن هادشي علاش بغاني نتعلم ديك لحرفة ونخرج من لقراية حيت كان عارف بلي غادي يخلي ليا لمحل ديالو.. لمهم قلت ليها امتى نجي ناخد سوارت قالت ليا دبا إلا بغيتي لقيتيني جامعا حوايجي وكنتسنا راجل ختي باش يوصلني.. هزيت جاكيط ديالي ومشيت لعندها لقيتها باركا قالت ليا نعمرلك شي كاس د أتاي؟ قلت ليها غير رتاحي مداتلي سوارت صافي مكاملاش زوج دقايق وقف داك راجل ختها هزيت معاهم حوايجها خرجتهم لطوموبيل وتحركو مشاو.. رجعت لدار سيدة مداتش معاها شي حاجة من غير حوايجها مخليا قراعي دلما عامرين فتلاجة وكلشي فيها لحم دجاج خضرا معرفتش واش صواب ولا هيا مكانتش معولا غادي تخرج دبا لمهم لواليد كان مهلي فدار.. سديتها ورجعت لدار لي كاري ديك ساعة بديت كنجمع فلفراش ولحوايج أصلا شهر غادي يسالي بعد غدا مكين لاش نبقى تما وخا ربيت لكبدة على دوك ربعا دلحيوط دوزت فيهم وقيتا خيبل وزوينا راه ديك أول دار كتهز مسؤليتها وتكون راجل فيها كتكون عندها واحد لمعزا فشكل ولكن هانية غنمشي غير لدار لي كبرت فيها.. كنجمع فلحوايج حتى سمعت دقان وماشي دقان دناس بعقلهم كتطبل فلباب بحالا عرفتها ديك بنت ناس رجعات مشيت حليت لقيتها هيا وباليزاتها زربات عليا عنقاتني ديك لبوسا ديال راه غير داير ليك خارطك ومزال شاعل ومقلق دخلات حوايجها ضوبل ديال داكشي لي داتو معاها وداك لعجب تقييل جايبا معاها برج إيفل تما ولا منعرف لمهم يلاه غتبدا تبدل حوايجها وهيا تسولني علاش كتجمع فلفراش قلت ليها أنا غنتحول لدار أخرى ونتي غتمشي لدارك حتى نشوفو واش غادي نتفارقو خوت ولا غادي نبقاو مجرجرين فلمحاكم وداك صداع.. عرفتي بحالا صرفقتها كيحساب ليها واش نسيت بوكيمون أنا زعما.. جريت واحد لكراسي حطيتو ليها بركي ا مريم فين كنتي وعلاش طفيتي عليا تيليفون؟ بغات تبردني بديك دبا واش مدايرش فيا تقة.. ولكن طاحت معامن طاحت راه داكرة عندي مكتزكل حتى شب حاجة فلبلاصة سكتها شوفي نتي كون مكنتش دايرها فيك تقة كنت انخليك تمشي لبلاد أخرى ونصارى ولكن نتي طلعتي برهوشة نعيطلك 100 مرة وتطفي عليا تيليفون وخا نكون صاحبك مغاديش تزعمي ديريها.. والله ما كينا شي حاجة راه تيلي طفالي ديك ليوماين وفينما كنبغي نعيطلك كيخرجلي شي بلان ولا كيكون لوقت معطل هنا وغادي نلقاك ناعس وفاش قديت راه عيطتلك من نمرة صاحبتي عرفتي شنو جبد نمرة وعيط ليها سولها أنا مغندويش.. عرفتي فاش كتكون منوضها مع شي واحد وكتقوليه شنو داير ليك وكتغوت تا كتقول أنا مالي على هادشي ريحت فوق واحد لكرسي ودرت رجل فوق رجل مالني على هاد لحالة غادي نبح على تاشي لعبة وبنت ناس من زهرها طاحت فيا أنا حنين وخا نتعصب لمهم خداتلي تيلي أنا مزال عندي صولد دوزات لأبيل لديك نمرة قدامي كنشوف بنص عين فتيلي جاوباتها ديك صاحبتها بداو داوين على لخدمة مجبداتش ليها سيرتي أنا كاع لمهم قطعات أنا مزال شاك حلات واحد لباليزا جبداتلي شي وراق بلفرونسي وأنا صطل متقوب فيها قالت ليا شوف تاريخ بغيتيني نقراليك ولا ديهم لشي واحد كيعرف والله تا بزز باش بعت شي أسهم كانو عندي و واحد دار صغيرة.. محدها داويا وأنا كنتحل بدات كتوريني تصاور وكدا بزز باش سكتات قالت ليا صافي تقتي دبا؟ بقيت تنخمم أول مرة و أخر مرة يوقع هادشي صافي قنعاتني بنت ناس دخلات لبيت وأنا بقيت كنجمع فدوك لحوايج.. خرجاتلي شي كادويات قالت ليا أجي تشوف شنو جبتلك أنا غنموت ونشوف شنو جايبا ولكن زعما يلاه كنت شاعل معاها خاص ندير شويا دلقيمة لراسي ونتعفر تانا.. غادي لعندها وكنقوليها غير عدبتي راسك والله.. باركين كنتغداو بيض وماطيشا طبعا راه هوما لي بقاو فتلاجة مبقيتش كنبرك فدار بزاف فاش مشات لقيت راسي كنعاود ليها كلشي لخدمة دار حتى من داك لبلان لي طرالي مع مريم وداك لي خاطبها .. مشينا لدارها وعاد لدار دلواليد بقينا فيها ديك لعشيا وبتنا فيها بقيت كندور فدار لبيت لي كنت كنعس فيه تا حاجا ما تبدلات غير مالين دار مشاو وبقيت فيها غير أنا.. لغد ليه مفيقني تيليفون مع 9 دصباح جاوبتو لقيتو خونا مول لكاميو قاليا بلي واقف حدا لمحل قلت ليه تسناني أنا جاي عندك وقطعت وخا لازمنا وضوء لبست حوايجي وخرجت نهار معرفتش كيفاش غادي يخرج مشيت لعندو لقيتو مزال كيتسنى سلمت عليه وعلى دراري لي معاه وحتى دراري لي خدامين معايا قلت لخونا متنزل والو بلاتي عيطت على جمال سلام سلام قلت ليه راه مزال مكملتش حتى يوماين ديال راحة ومريم يلاه رجعات وعندي بزااف ميدار.. قاليا صافي خليهم يحطو داكشي بعدا سد عليه وخود راحتك غير دير زربا فدماغك راك شفتي لبريكول لول كيفاش داز وفلوسك خديتيها فلبلاصة هاد لخدمة راه بحال جوكير تقدر تبرك مورا لبريكول نهار ولا يوماين وتقدر ترتاح شهر يعني غير صبر وغادي ترتاح.. خونا صافي قنعني قطعت معاه نزلنا طوموبيل مكرفصا كتر من لولا صدا ومبوريا 100% جايبينها من شي لافيراي لمهم خوتنا بزربا دخلو طوموبيل وسلعتها سنيتلهم على لبون ومشاو سورت عليها تما خديت فلوس دلكراج من عند دراري دوك زوج خوت كيخدموو ومعقولين بقيت واقف معاهم شويا عاد تحركت لدار لقيت ختنا مزال ناعسا يا وييحي هادي هيا شوهة إلا كانت ماتت بصح تنغوت عليها وا مريم وااا بنت ناس والو صبع متحركش حطيت ليها واحد تصرفيقة وتي نوضي راه ل11 هادي وهيا تفيق تصرفيقا هنا على وزن قبلة لأميرة نائمة عندهم لمهم قالت ليا عيانا من سفر غير فطر وخلي ليا يحساب ليها واش موجد لفطور وكنفيق فيا مزال غالطا مسكينا دخلت دوشت وخديت راحتي فدوش راه غادي نضرب يوماين ولا 3 تاني مغاديش يقيص فيهم لما لحمي.. تنسمع دقان كنتسناها تنوض تحل لباب والو بقا دقان تا لبست بالخف وخرجت.. لقيت لواليدة قالت ليا صباح الخير جاوبتها ب وعليكم سلام معرفتش شنو نقول أصلا معرفتش كيفاش عرفاتني تما ديك ساعة بقينا واقفين عند لباب كتسولني كيفاش داير كنجاوبها عادي قالتلي سمعت بلي تزوجتي مكرهتش نشوف مرات ولدي إلا كانت فدار.. يلاه غنطلق ليها لكاسيطا ديال ديما تا معرفتش باش تبليت بنت ناس خرجاتلي من تحت يدي خاالتي تانا كنت باغا نشوفك جراتها دخلاتها مبغيتش نبرك معاهم مباغيش نعيش دور لواليدة ماتت شحال هادي قلت لمريم راه عندي خدمة أنا يمكن نتعطل بقاي هنا حتى نجي لعندك.. خليتهم وخرجت تا وصلت للكاراج وتنادم معايا لحال ديك سيدة كتموت على درهم عنداك غير تبروفيتي فديك بنت ناس وتاهيا ساخين عليها فلوسها عيطت ليها باش نوصيها قالت ليا راه مشات قبيلا واحد ساعة وغندوز لعندك راه عرضاتنا نتغداو لعندهم يلاه غنبدا نسب تنشوف فلبيت لي فيه طوموبيل كيباليا محلول طليت مكينا لا طوموبيل لا بياسها غمضت عينيا أنا يااا ربي نكون غير كنحلم..
لما بركلي فركابي شي حاجة ماشي ديالك تخليها فبلاصة ترجع متلقاهاش بقيت تنتأكد واش بصح قطعت على مريم فلبلاصة.. خارج تنجري نشوف فين مشات نسول دراري لي خدامين على برى سولتهم قالو ليا بلي مول لكاميون رجع هو ودوك دراري هزو داكشي كامل لي حطوه فصباح.. رتاحيت ومرتاحيتش فنفس لوقت زعما يكونو سرقوهم ديك ياعة عيطت على جمال قلت ليه شنو وقع واش فخبارهم هادشي قاليا لا متخليهمش يديو شي حاجة.. كيفاش واش كتضحك راه قلت ليك دااوهم.. بقى تيقوليا لا وصافي غادي تغرمها وماشي رجولة وأنا هانية سيد لي معايا لي غادي يقدر يديكلاري بهادشي.. قاليا صبر نشوف معاه شنو غادي نديرو وقطع عرفتي واااحد شعلا شعلت على دراري لي خدامين معايا كيفاش أنا مكاينش وتخليو بنادم يدخل يخرج طوموبيل كنتو غير تعيطو عليا.. بقاو كيبردو فيا ونغرموها مجموعين وديك لهضرة دراري طلعو فشكل تا عيط عليا جمال تاني وكيموت بضحك فرحت حيت عرفتو كان غير كيضحك ولكن مبلان موالو بديك شمتة بديت كنسب فيه أشمن رجولة هادي بعيدا على هاد طلعة راه مخاصكمش تاخدوها من لمحل ديالي بلا علمي أنا ديكور هنا ولا كيفاش مخاصنيش أنا كاع بهاد لخدمة اخويا.. خونا ولا هو لي كيرغب قاليا بلي كان خاصهم يديوها حتال من بعد دبا غادي يجيبو ليا وحدة أخرى باغينها هيا لولا.. بقيت داوي معاه شي نص ساعة بردني بهضرتو وهيا توقف مريم كتصونيلي تاهيا تفكينا من موصيبة هايا لأخرى جات قطعت على خونا قلت لدراري حلو عينيكم شويا أنا زعما كنقول كين نتوما بحالا كين أنا.. طلعت مع ديك بنت ناس قبيلا لقاتني مشغول بسكتة لقلبية لي كانت غادي تجيني بديت تنقي ليها ودنيها شكون قال ليك غادي نمشي معاك أنا بغيتي تمشي سيري عندهم بوحدك أنا حالف عمري ما نحط رجلي فديك دار.. وصافي شكون قاليك غادي تحط رجلك عندهم هوما غادين يجيو لعندنا لدار وصافي متخلينيش نبان برهوشة وماماك لله يعمرها دار والله وهضرتها فشكااال خاص تبرك معاها سيدة كتحلم بنهار لي غادي تبرك معاها أصحابي صافي لي غلب يعف كاع كنغلطو سمحلها.. بنت ناس مسكتاتش والو عيت معاها وانا نقمعها تي غادخلي سوق راسك شغلي أنا عارفو بغيتي تغداي معاهم ولا تشوفيهم سيري أصلا من نهارك كديري غير لي فراسك.. صافي مزادتش كلمة مشينا نيشان لدار لي كاري تنجمع شي حوايج باش عشيا غادي نشوف لي يدي ليا هادشي كامل لدار لواليد صافي خاص نعطي لمولات دار سوارتها لمهم عارف ديك بنت ناس غادي تسكت حتى تعيا وغادي تجي تجقرني تاني باش نمشيو نتغداو معاهم وبصح واحد شويا وهيا توقف بدات داويا تاني غلبات عليا ضحكة أنا صافي زعما حفظتها لهاد درجة بهاد زربة, تيليفونها مسكتش قالتلي راه لواليدة ديالك هادي غيكونو واقفين عند لباب نوض لله يحفظك معرفتش باش نجاوبها متخلينيش نبان برهوشة.. بنت ناس كتقطع فلقلب شفت حتى عيت ونضت تحركنا لعندهم غير دخلنا لدار وهوما يوقفو عند لباب بحالا محقين علينا حليت عليهم لباب ديك سلام سلام جاين كاملين إلا باهم أصلا محاملش نشوفو داك سيد مدخلش ليا لخاطري من صغري عاد زيد فاش عرفتو ماشي لواليد وهو لي قاليها تعطيني لمهم بركنا مجموعين فصالون لواليدة كتسول فيا كيفاش داير وكيفاش غادي مع لخدمة وديك لهضرة تنجاوبها عادي بحال أي مرا فزنقا غادي تسولني وغادي نجاوبها.. جايبين كسكسو وماشي أي كسكسو أنا قليل فين كناكلو ولكن ديك لقصرية من أروع ما كليت راه حسيت بحنان الأم دموع كانو غادين ينزلو.. مريم بحالا كتقرالي دماغي قالت ليها لله يعطيك صحة خاصك تجي تبقاي معانا سعيد راه كرشو لي حاكماه زوج قصريات بحال هادي غادي يدير تصويرتك فبزطامو.. عرفتي كون ما معانا هاد ولاد ناس كنت نحط ليها شي مسمنة لوجها على ود ديك لهضرة.. ختنى لأخرى عجبهاا لحال قالت ليها الله أودي شحال عندي منو وقتما تبغي عيطي ليا نطيب ليكم ما حسن.. داير براسي مكنسمعهمش وخا بارك حداهم تندوي مع ختي ديك لبكاية بنت ناس ديما عينيها مغرغرين مفهمت فيها والو أنا لمهم داوي معاها على لقراية وكدا ديك لهضرة ديال شيبانين قراي ولقراية زوينة تنصحها زعما لمهم دراري خرجو يلاه غنوض نخرج حتى أنا وهيا تشدني مريم قالت ليا ريح واحد زوج دقايق وناضت خرجات وتبعوها لبنات بقيت غير أنا ولواليدة سيدة معارفاش شنو تقول كتسول فيا كيفاش داير وعلى لخدمة لعاشر مرة وأنا نعاونها قلت ليها عندك شي حاجة تقوليها ليا ولا نمشي زربان باغي نجيب شي فراش.. قالت ليا لهضرة لي باغيا نقولك راك عارفها غير سير أولدي قضي غرضك لله ي.. سيدة ولات تحشم تعاود داك لموال أنا بدات كتبقى فيا وكنقول ياكما زدت فيه لمهم خليتهم مع مريم تما ومشيت شفت واحد سيد عندو هوندا كبيرا باش هزينا دوك لحوايج دقة وحدة سيد كبير شويا فلعمر وضرييف من داك نوع لي مزال شاد فشباب ولمزيكا ولخواتم فليد وتيبغييييي يدوي مع بنادم لمهم تنخرجو فداك لفراش ودااوي مع خونا تيعاود ليا على شباب ولحرب وديك لهضرة ديالهم نزلنا كلشي طلعناه لتما دقة وحدة بزز هزاتهم قلت ليه واحد دقيقة غير نعطي لمولات دار سوارتها ونرجع ساكنا غير تما مشيت لعند ختنى لقيتها كتسنى فيا مديت ليها سوارتها دار خليتها حسن من داكشي لي لقيتها عليه وهيا عارفا هادشي معندها ما تقول طلعت أنا وسيد غادين جات نوبتي فلهضرة تنعاود ليه على لبلان ديال ناس لي رباوني و لواليدة خونا بقى داوي معايا طريق كاملا قاليا هانتا شفتي لموت غير قريبة لوالدين ماتو ولكن لله عطاك فرصة اخرى شكون بحالك دبا إلا سمحتيلها نتا على داكشي وعاملتيها مزيان شكون قدك نتا قدام الله.. لهضرة لي قالها ليا وطريقة كيفاش وصلها ليا معمري شي واحد دارها سيد تحكرو إلا شفتيه ولكن دماغو هربان بسنوات ضوئية وصلنا كنزلو داكشي داكشي عاد كتباليا لواليدة خارجا قالت ليا نعاونك؟ محسيتش براسي حتى تبسمت ليها غير رتاحي غادي نهبطوهم بشويا بشويا أصلا ماشي بزاف حسيت بيها فرحات تحركات هيا مشات بقيت أنا وداك سيد خدامين بشويا وداوي معايا كيهربني فاش كيخصر لهضرة دخلنا داك لفراش خلصتو بغا يمشي شديتو يشرب شي حاجة بعدا أصلا كانو معمرين أتاي صافي شربناه ومشا تراه تشهيت نربطو فدار نديرو لواليد بالخاطر ولا بلا خاطرو لمهم تنقادو فداكشي تما وهو يعيط ليا جمال قلت ليه لله يسمعنا خبار لخير كيقوليا جمع شويا ديال لحوايج غادي ندوز نهزك غدا غنسافرو كيحساب ليا غير كيضحك عليا تاني قاليا لا داوي بصح بغيتك تطلع معايا لسجلماسة شي خدمة تما وغادي نعاونك بزربا نرجعو.. فلول كيحساب ليا واش لشي بلاد أخرى قلت ليه خويا طرح كبر عليا واقيلا غير شوفو شي واحد أخر.. عاد شرحلي بلي كينا غير عندنا وغادي تكون فلوس غير شي نهار ديال لخدمة وغادي يبقى يعاوني حتى نجيو بزوج قلت ليه سمحلي واحد شويا ونعيطلك نقولك شنو كين وقطعت غيبداو يجرجرو فيا من مدينة لمدينة هادو...
اسم على مسمى الجزء الثالث
محتوى القصة
التنقل بين الأجزاء