رقبة تحت السيف الجزء 47

رياض : خاصنا نتزوجو فأقرب وقت دابا .. ماعندها معنى نبقاو بحال هاكا وسط العاءلة . 

ذهب: لارد 

رياض : خديت الوراق من عند باباك ... انا غنتكلف بكلشي وغدا كلشي غايكون واجد 

قلبات عينيها شافت فيه وضحكات بسخرية وقالت 

ذهب : اصلا نتوما كتبغيو غير مصلاحتي ... وكتفكرو غير فمصلاحتي ... ديرو اللي بغيتو ... واصلا راكم كديرو اللي بغيتو مافهمتش علاش دابا جاي كتقول ليا غنتزوجو!

رياض: باستغراب) وعلاش ماباغاش تعرفي اشنو ناويين نديرو!

ذهب: ومن بعد ... وهانا عرفت اش غيطرا ... واخا سيدي وجد هاد الوراق ... باغي فير نتزوجو ها حنا غنتزوجو 

ناض كيشوف فيها باسى وقال وهوا محني عندها كيشوف فيها 

رياض: نسولك وجاوبيني بصراحة .... واش كتبغيني كما انا كنبغيك ؟ 

دورات وجهها ساكتة مابغاتش تشوف فيه ... عاود كرر السؤال ومجاوباتوش 

رياض: صارحيني ... باش نعرف حيت براكة والله يجعل البراكة ... شحال وانا لاسق فيك صحة كي لمسكة ... الى ماكنتي مرتاحة معايا قوليها وغادي نبعد ونخليك على راحتك ... والله مانعاود نصدع ليك راسك 

ذهب: لا رد 

رياض: حرك راسو بالايجاب ) واخا ابنت عمي ... مللي نتي هاكا مامرتاحاش ..حتى انا غندير حد لهادشي . 

شاف فبنتو ودوز يدو على راسها الصغير وباسها وزاد خارج حتى وصل للباب وهي تقول بتردد

ذهب: كنتي ديرها شحال هااادي ... ماشي حتى درتي ليا بنت عاد جاتك ديرها 

دورات وجهها كتنفخ وهوا يوقف عاطيها بالضهر مبتاسم ... كأنها كتقول ليه ماتخلينيش فنص الطريق .. حتى ولدنا قلب كينبض عاد جاتك تسمح فيا ... تلفت عندها شافها قالبة وجها وهازة خنافرها وضحك وخرج ..

ذهب: مشية بلا رجعة ... مكلخ لاخر يخخ .

دخلات ميساء ام رياض لقات نافخة وهي تبتاسم 

ميساء: مال الزين مكشر .. بااين عليه متأثر

ذهب: عمرك شفتي شي واحد حياتك كاملة وهوا تابعك مامخليكش تنفسي وحتى درتي نتي وياه العجب و ولدتو بنت عاد فاق عليه الضمير و نوا يسمح فيك نتي وبنتك!

ميساء : ريااض!! اويلي مايديرهاش واخا يموت ... مالك معارفاهش! 

ذهب: مابقيت فاهمة فهاد ولدك والو ... خلاني حاملة ومرجعش عندي بمرة ... مالو علاش مقدرش يجي يطل عليا كي وليت ! 

ميساء: وا نتي احبيبة اللي مابغيتيش...نتي كتبيني ليه باللي محاملاش تشوفيه ... علاش بغيتيه يرجع ونتي مطايقاش تشوفي فوجهو . صافي خلاك على خاطرك اش بغيتيه يدير!

دورات ذهب وجهها نافخة وسكتات خلات ميساء مطلعة حاجبها 

ميساء : ايوا ماعرفنا منين نشدوك ياختي! مكيعجبكش العجب ... كما درنا معاك وحلة ... نعسي رتاحي نعسي وعاودي راجعي حساباتك ... انا غنمشي 

ذهب: اسلام كي بقا؟

ميساء: كلشي مجموع لهيه دابا كيتسناو يفيق ... (شافت فالساعة) هادي هي الوقيتة اللي قال الطبيب يقدر يفيق دابا 

ذهب: بغيت نشوفو

ميساء: رتاحي راك عاد ولدتي ... و مايمكنش تخلي البنت بوحدها وتخرجي ... جلسي وانا غنقول ليك اللي كاين .. يالاه هانا مشيت 

خلاتها وخرجات تاجهات جيهت غرفة اسلام الجديدة .. كانو نقلوه من البلوك للبيت مهوي وخلاوه يتنفس طبيعيا بلا اكسيجين ... الكل مجموع حدا الغرفة باغيين يشوفوه الا نضال وعهد ونور اللي خرجو . 

بدا كيفتح عينيه تدريجيا ... شوية بشوية بدات كتزضاح الصورة وصوت الطبيب غادي وكيقرب لمسمعو حتى ستوعب ودور عينيه لقا راسو ناعس على ضهرو 

الطبيب: مسيو اسلام ... كتسمعني ؟!

حرك ليه اسلام راسو ودور وجهو شاف فيه 

الطبيب: على سلامتك ... جرينا ليك عملية على القلب والحمد لله نجحات 100% ... رتاح انا غنخبر عاءلتك تدخل تشوفك 

اسلام: بصوت غليض متعب) لا .... لا ميدخل حتى واحد

صباح جديد ... صبحات غيثة ومروى وميساء فالكلينيك داخلين كيهضرو
مروى : شفتك لبارح مدخلتيش لبيتك !
غيثة : بقينا مجمعين انا وميساء تقريبا اللي كامل .. عاد دخلت لقيتو ناعس ولا داير راسو ناعس مهم ماجبدني ماجبدتو والصباح فقت متلقيتوش . راه مرض .. انا اللي عارفاه .. اللي كولو وهوا كيتقلب وكل شوية ينوض يصلي جوج ركعات ويرجع ينعس
مروى: بسيف ميمرض .. علاه هادشي اللي واقع ليه مع ولادو ساهل!
غيثة : ماعرفت فوقاش غنرتاحو من هادشي عييينا منو اففف
نفرقو كل وحدة فين مشات ... مشات ميساء لغرفة ذهب و مشات غيثة ومروى عند حنين .. صبحو عليها بحوايج جداد ... غسلو ليها وقادو ليها الحالة هي وولدها في حين دخلات ميساء عند ذهب لقاتها مزالة ناعسة ورياض هاز بنتو فيدو كيمشي بيها ويجي .. يالاه دخلات وهوا يقول ليها
رباض: شووو ... غتفيق
ميساء: بصوت خافت ) رضعات؟
رياض: رضعاتها ... باتت فايقة معاها الليل كامل يالاه دابا عاد نعسات
ميساء: خليها ترتاح ... تصالحتو؟
رياض: لا ... واخا زعما بايت هنا ماهضرناش ... بقات ملهية مع البنت وانا كنت مرة مرة كنخرج
ميساء: شنو غتسميوها؟
رياض: ماعرفتش؟
ميساء: نسميوها بَريق .
رياض: غمزها) حسن خلي السمية لمها هي تسميها .. تقدر ماتبغيش اللي يسمي ليها بنتها ... راك عارفة ذهب كي دايرة غتقول ليك انا ولدتها وبنتي نسميها وكدا .. حسن خليها تسمي اللي بغات
ميساء: انا اولدي غير قلت ليك وصافي .. الفرحة اللي خلاتي نقولها
رياض: فهمتك (باس جبهتا) فهميني حتى نتي شنو بغيت نقول ... راها على سبة مكتهز الهضرة لحتى واحد دابا ... ان شاء الله مزال يجيو وحديم تخرين وفضروف حسن من هادي وسمي اللي بغيتي . . . هاكي حطيها فبلاصتها انا غنخرج حتى نرجع
ميساء: اراها ... يا الحبيبة ديالي مو عوينات كتشبه لباباها بنت باباها
ذهب: منين جاتها كتشبه ليه!
تافتو بجوج لقاوها فاقت وكتقاد فالجلسة معبسة
رياض: كتشبه ليييييك ليييك نتي بوووحدو انا غير ضيف .
ميساء: لاالا كتشبه لباباها بااينة
كمشات ذهب فمها قالبة وجهها ورياض كيغمز وينخز ميساء تسكت وهي على نيتها كتهضر .. دخلات مروى كضحك وهي تقول ليها ميساء
ميساء: اجي لمن كتشبه بصراااحة ... واش ماشي لرياض؟
مروى : بابتسامة ) بصح كتشبه فيه ... فكلشي
قالت ذهب وهي كتعوج فمها ودور فودنها
ذهب: انا ماعرفتش ومافهمتش شنو اللي فيها كيشبه ليه !!
مروى : فيها كلشي ... العينين والشعر حتى هوا والنيف والفم ... غير رياض
رياض: حاط يديه على جنابو كيشوف فالبنيتة ) انا بعدا جاتني كتشبه لذهب ومافيها حتى حاجة كتشبه فيا .. شعرها باين رطب وزوين بحال ذهب ..


هز عينيه فذهب لقاها كدوز يدها على شعرها وتعوج عاجبها الحال وزاد كمل المدح كيطلع ليها المعنويات وهي كتهز فبلاصتها وتنفخ
رياض: العوينات مجبدين بحال ماماها وشفارها كتار ... فمها زوين بحال ماماها ... غطلع فوطو كوبي دماماها
قالت ذهب بتكبر : اصلا انا هاك كنت فاش كنت صغيرة ... الى شفتو تصاوري يحسابكم غير بنتي
رياض: وي بصح ... انا شفتهم .. كتشبه ليك بزاف
دورات وجهها كتجبد عاجبها الحال وخرج هوا راشقة ليه واخا عارف بنتو كتشبه ليه ومحطوطة طبق الاصل .. المهم بعدا جا فصفها وخلاها على خاطرها .
هز راسو اسلام كيحاول يجلس واخا الطاقة مكيناش .. كيحاول يتحرك واخا صعيب عليه وخطر على صحتو ... حاول لاكن فاش لقا راسو كيضغط على نفسو تراجع وترخا .. دخل عندو الطبيب يفحص حالتو وهوا يسولو
اسلام : مدام حنين سقراط مزيانة؟
الطبيب: مزيانة وحتى البيبي مزيان
اسلام: كتقدر تمشا ؟
الطبيب: كتقدر حيت الولادة طبيعية
اسلام: بغيت نشوفها هي وولدي دابا
الطبيب: واخا ...
خرج الطبيب خلا اسلام ساعب فالسق وكل شوية يشوف جيهت كتفو ويلمس الضمادة ... شوية تحل عليه الباب ودخلات حنين مصدومة هازة فيديها ملك ... مافهمات فاش شافتو مسطع على السرير .. باقت كدور فعينها وتقرب وقالت
حنين: اسلام!!! شنو هادشي ؟ شنو وقع ! مالك شنو وقع ليك!
اسلام: اجي .. قربي وجلسي هنا حدايا انا بيخير ماعندك مناش تخافي
حنين: وعلاش ناعس هنايا؟ علاش شنو اللي وقع
جلسات شاة ولدها حداه وهوا كيبتاسم ويشوف فيه ويدوز يدو على راسو بلمعة فعنيه وقال
اسلام : درت عملية على القلب ... ودابا مزيان وغنرجع حسن من اللول ... غنرجع ليك نتي وولدي
حنين: ولاكن انا مافراسيش هادشي!
اسلام: مقالوش ليك باش متخلعيش ... كتبغيني ياك ؟
شافت فيه بابتسامة حب وحركات راسها بالايجاب
اسلام: مستعدة تعيشي معايا على الحلوة والمرة ياك
حنين : نعيش معاك حتى فالزنقة ... المهم نكون معاك
باس يدها وقربها عندو باس جبهتها وفمها وبدا كيداعب ولدو بصبعو ...طولات معاه كيضحكو فرحانين وتقدم ليهم الغدا فالغرفة بجوج .. تغداو فجو اسري جميل وهادىء و ولدهم بيناتهم مرة يبكي مرة ينعس .. مرة تهزو حنين مرة يشدو اسلام .. دوزو النهار بيناتهم حتى تعاشات العشية وهزات ولدها فيديها
اسلام: سيري رتاحي ... وتهلاي فيه
حنين: ماكرهتش نبقا معاك
اسلام: غادي نبرا وهانا معاك حياتي كلها
باس يدها بشغف وباست جبهتو بحب وخرجات تحت انضاره هازة ولدها لبيتها .. دخلات وني تلقا واليديها بملابسهم العادية و اوليفرا فالبيت ... غوتات بالفرحة و كانت غطير من شدة فرحهها .. حطات ولدها وعنقات واليديها كتبكي بالفرحة وتبوس فيهم وتعاود ... هزات ولدها بشوية كتوريه ليهم وتهضر معاهم بلغتها وهما كيدمعو بالفرحة وهزوه فرحانين بيه ... جلسات وسطهم كتعنق مها ودور تعنق باها ... بدات تعاود ليهم على ولادتها وعلى راسها وعلى ولدها واوليفرا كتشوف فيهم بابتسامة مربعة يديها ... شوية تحل للباب ودخلات فرملية كتسول
الفرملية : اوليفرا؟ شكون هي اوليفرا؟
ناضت وقفات : هي انا ؟!
الفرملية: مسيو اسلام بغاك دابا
حركات راسها وخرجات خلات حنين ملهية كتعاود قصة حياتها لواليديها .
بعد نصف ساعة رجعات للغرفة ودخلات لقاتها مزالة كتعاود وضحك فرحانة ... تلفتات حنين وقالت
حنين: فاش بغاك ؟
اوليفرا : والو .. غير رتاحي نتي وتهلاي فالبيبي هادشي اللي بغا

يتبع