صباح الالوان الجميلة والراءحة المنعشة ... صباح الهدوء و الطبيعة الخلابة والشمس الساطعة بخيوطها الذهبية
☉🌸سانتوريني 🌸 "اليونان"
من داخل منزل صغير جدا بجدرانه الزرقاء السموية وفراشه الجميل الابيض .. جماله فبساطته مرتب وهادىء كيلعب فيه طفل صغير فالارض ويتكور بوحدو .. شعرو اسود وجميل وخدودو حمراء شاد فيدو لعبة كيعض فيها . تمدات ليه يد امراة هزاتو من الارض وعنقاتو بابتسامة وحنان لصدرها
داتو فيديها عريان لابس غير ليكوشة وهي لابسة كسوة بيضاء طويلة صيفية بلا يدين وشعرها دايرة ليه دفيرة ... يالاه خرجات من الباب لبرا وهي تلقا نصارة واقفين عند طبلتها اللي حاطة حدا الباب مستفة فيها اكسسوارات طبيعية من صنع يديها .. استقبلاتهم بابتسامة كتوريهم اشكال العقد و الحلقات .. كل وحدة مناش مصنوعة وكلهم جايين من خيرات البحر اللي كيرمي على برا .. استغلاتهم حنين فابداع اكسسوارات نساءية و بدات كطبق داكشي اللي كانت كدير فالجزيرة ديالها . استغربو من الاشكال اللي كتصنع بيديها وتبهرو بيهم .. شراو من عندها لبسوها فديم الساعة وقالت نصرانية شقراء بابتسامة
... : نتي زوينة بزااف ... اول مرة نشوفو بشرة ديال شي بنت هاد الشكل ... منين نتي واش من سانتوريني؟
حنين : لا ... من واحد الجزيرة بعيدة متعرفوهاش .. حييت ماشي كلشي عارف فين كاينة
قالت امراة اخرى كبيرة : جمالك خلاب ... العجب ... عيون زرقاء مع بشراء سمراء ! زاءد شعر كحل رطب بهاد الشكل!
....: وي السمورية ديالها هي اللي لفتات انتباهي ! شكلها نحاسي ماشي السمورية اللي مولفين بيها ... هاد اللون نادر .. ماتعرفش تشخصو لا من الابيض ولا من الاسمر
البنت : اووه ... عندكم كوكطيل من الاكلات ... سبق ليا كليت بحالها فالمغرب ...
العجوز : اول مرة ندوق عصير بهاد الشكل .... شنو السر؟
قال اسلام بابتسامة وعنق عنين ويدو فالجيب : السر فاليد اللي كتصنع .
العجوز بابتسامة : ههه هوا هادا راجلك ؟
حنين: دورات يدها على خصرو من اللور : اه ... هوا ... ديما كنصايب شي خاجة جديدة ونعطيها ليه هوا اللول .. الى عجباتو عاد كنحطها للزبناء اللي كيجيو ... وديما كيقول ليا شنو السر كنقول ليه يدي هههه عمرني قلت ليه على السر ديالي هههه باش مايدريش طبلة وينافسني ههه
بدا كلشي كيضحك وحتى هي قالتها بالضحك ...
اسلام : خههه اصلا مانقدرش ... نتي عندك سحر خاص
باسها فحنكها ومشا خلاها جالسة مع السياح كتجمع معاهم وتعاود ليهم قصة حياتها فرحانة كما موالفة دير مع جميع السياح .. اللي داز من تما وجلس كتبقا تعاود ليهم بشغف ومفتاخرة براسها وكيعجبها تعاود قصة حبها معاه ... تحمسات نصرانية للقصة وجبدات مسجل صوت وقالت
... : تبغي نكتب قصتك ... حيت غريبة هاد القصة اللي عندك وخاص كلشي يقراها ماشي غير حنا .
حنين : بغيت كلشي يعرف قصتي ... ماكرهتش الصراحة
... : على هاد الحساب راجلك لاباس عليه بامكانو يشهر ليك القصة بسهولة
حنين : واخا هاكاك ... لاكن سامح فكلشي ودابا بدينا من جديد .... هوا خدام على واحد الاختراع خدا ليه عقلو كامل وكيتسنا يساليه وهوا اللي غادي يطلعو .. واخا كيقول ليا باللي ماعندو مايدري بالحياة اللي كان عايش والرفاهية ... وهوا هاكا مرتاح كتر وباغي يكمل هاكا ... غير كان الحلم ديالو يكمل داك الاختراع ... ماشي غرضو فشي حاجة اخرى او لا لفلوس ... حنا مامحتاجينش لفلوس حيت واخا كانو عندنا مكناش فرحانين ... دابا عندنا شوية شوية من الحاجة .. والمهم هوا اننا مرتاحين فحياتنا وماخصنا والو
... : عاودي ليا قصتك من الاول حتى الاخير ..باغا نسمع كلشي .. حمستيني بزااف نسمعها
حنين : واخا خخهه . بدينا فالجزيرة ديالي فين كنت عايشة تما تعرفت عليه .. كان اول نهار نتلاقاه فيه .كنت فالبحر كنجمع الحجر باش نصايب منو بحال هادشي اللي شريتو مني ...................
مشا اسلام جبد ولدو من السطل وهبط بيه فالدروج قالو على كرشو وكيعض فيه من ضهرو والولد كيفركل ويغوت ويضحك ... هبطوه معاه للبحر ودخل بيه فالماء ملبس ليه جيلي صغير وشادو من يده كيجرو بشوية ويعلمو السباحة .. في حين حنين جالسة كتشوف فيه من الاعلى ساهية بابتسامة وكتحكي قصتها للسياح اللي مركزين معاها بكل احاسيسهم حتى بدا الضلام كيطيح وشعل ليهم اسلام الضوء ومشا جلس معاهم فالطبلة ملبس لولدو شورط خفيف وتيشورط خفيفة بحالو ... كما العادة وكما مولفين يجلوس يتجمعو مع السياح ويقرقبو الناب مع اي واحد جلس عند حنين فطاولاتها الانيقة اللي كضل تزوق فيها وتقاد . بقا اسلام حتى كيسمع ويضحك على المعودات ديالها بحال ديما اكأنه اول مرة يسمعهم وهي راه كضل تعاود خبيرها لاي واحد داز من تما
حنين : دابا خوا وخوه توام ههه واا حمقوني ماعرفتش راسي معامن .. مرة يكون ضريف مرة يجبدني من شعري ... حتى حصلتو خخهه
العجوز : ههههخهه
اسلام : هههههههههه حمقة ولاهيلا حمقة .... ماقادراش تنسا
البنت : بحماس ) ايوا كملي كملي .اب اب هههه
حنين : ماتقوليش لي كملي ولا اب كنكرها 😤 هضري معايا عطيني رايك
البنت : ههههههههه صافي هانا ساكتة
حنين: لا متسكتيش ولمن نعاود انا .. عطيني رأيك
اسلام: قبل كل شي بعدا .. صايبي لينا شي طويجين من يديداتك ... راه فينا الجوع ... وعطي للناس حتا هما يدوقو كويجناتك اللي تعلمتي
العجوز : اوووه .. الاكل المغربي في اليونان 😍
اسلام: مع طباخية زانديانية هههه
حنين : ههههه هي اللوللة نصايب 3 ديال الطواجن ونكملو القصة هاد الليلة
ناضت فرحانة دخلات لكوزينتها الصغيرة المتولة وبدات فالتحضير .. لحق عليها اسلام صايب براد ديال اتاي بالضحك والتقشاب هوا وياها وخرجو حطو للناس ورجع عندها كيعاونها بحال العادة ... تفكات جميع العقد ... تطلق وتعود على ديك الحياة .. السلم والامان والحب وكل مرة وجوه جديدة كتزورهم .. حتى من ولدو ولف الناس من كل الاجناس والوجوه اللي كتبدل فكل مرة .
دازت ليلتهم مع السياح ليلة جملية تحت الاضواء الخافتة والجو الهادىء .. بايتة حنين كتحكي الليلة كاملة حتى صبح الحال ... شي نعس شي مشا رجع للاوتيل .. بقات غير هي والبنت اللي شادة الة تسجيل . اما حتى اسلام دخل للبيت نعس هوا ولدو طاحو طيحة وحدة .
سلات القصة اخيرا وتسجلات كاملة .. وسهات النصرانية فعيون حنين وقالت
...:القصة ديال حبكم زوينة بزااااف .. ومتأكدة الى نشرتها غادي تنجح .. انا متأكدة ... وكنواعدك هاد النجاح غيرجع ليك نتي واول نسخة غادي نجيبها ليك برجلي حتى لعندك تقرايها .
* تحضيرات لحفل زفاف رياض وذهب مستمرة ... كلشي كيجري من لقنت لقنت كيوجدو ويقولو ماوجدناش ... من بعد الازمات اللي مرات عليهم قررو يفرحو شوية بهاد العرس اللي مكانش اصلا غادي يكون لو لا اصرار ذهب على رياض يديرو ليها الى بغا انها تسامحو ، وكان ليها اللي بغات ورجعات على خاطرها كما الاول .. تلهات مع الحفل ومع التوجاد ديالو .
خرجات بببجامة كتقلب على بنتها وشكون يكون هازها ومشات مع الكولوارات كتسول .. تلاقات مع سلام جاي زربان ووقفاتو
عمض عينو وهوا كيذكر الطفولة ديالها كي دازت ... تذكر شحال من مرة غضب وحزراتو هي .. وباقا كما هي فعينيه شحال ما كبرات .. كتبقا فعينيه بنية صغيرة والوحيدة وسط ولادو ... كما مولف يقبل اعتاذرها قبلو حتى هاد المرة واخا طول اعتاذرها ماجاش وتسناه بزاف لاكن ماطولش عليها باش يقبلو ...
دارت ليها باي باي ودخلات كتعيط على اسلام .. لقاتو كيبدل حوايجو يهبط للبحر وخاطباتو بفرحة نسات اش وقع الصباح .. وحتى رد عليها بندم مللي شافها ماهزاتش فخاطرها منو ، تلفت عندها وعنقها قاءلا
اسلام: انشوف ... ولد بيننا ! عنوانو زوين ... نقصرو عليه هاد الليلة (باس جبهتها ) غادي نهبط عندي شي شغل نقضيه
حنين: صافي
اسلام: ردي لبال لملك .. راه فالسطل كيلعب
حنين: واخا .
خرج خلاها فالبيت .. داز على ولدو باسو من راسو ومشا .
بقات كدور من هنا لهنا وتبيع وتعصر وطيب حتى طاح الضلام وهوا يجي عندها دري صغير كيجري
الطفل: تكلمي دغيا تكلمي .. تكلمي راه اسلام لتحت طاح
سمعات طاح وهي ضرب فحناكها وهزات ولدها ونزلات مع الدروج كطير حتى للرملة وضرباتها كعطة وحدة بالخلعة .. لاكن الدهشة هي فاش شافت الشاطىء مزين والناس لابسين ومقادين والطبالي مستفين والورد مشتت والاضواء شاعلة ... قربات وهي تلقاه واقف لابس قميجة بيضاء واسعة محلولة من الصدر وسروال ابيض واسع وحفيان كيشوف فيها من بعيد بابتسامة ... جراتها مرا زعرة دارت ليها الورد على راسها وقالت
...: سيري عندو ... ليوم عرسك
حنين دارت بيها الدنيا ... كتشوف كلشي واقف فالجناب وقدامها طريق مفرشو بالورد كتادي لطبلة بيضاء مزوقة وفيها حلوة كبيييرة ... هزو عليها جيرانها ملك كيبوسوه ويضحكو معاه ومشات هي فرحانة عند اسلام بخطوات بضيءة وعنيها كيلمعو وتشوف فالناس اللي فرحانين ليها .. وصلات عندو وهبطات راسها دايرة يدها على خدها .. تارترات ومسحات دموعها وعنقاتو بقوة كتبكي وهوا كيمسح ليها وجهها ... عطاها الموس ليدها وقطع معاها الحلوة .. تطلقات الموسيقى وكلشي تخلط كيشطح وحتى هيا دخلات الوسط كتنقز فرحانة وترجع عندو تجرو وتبدا دور بيه .
العروسة واجدة .. القصر مزين .. الحضور كلشي حاضر .. عرس مغربي اسطوري بحال جميع عراسات ال سقراط . كلشي لابسين وكلشي مخلط رجال ونسا ... خرجو لاللة لعروسة بالزغاريت نازلين بيها فالدروج وكلشي واقف كلشي جاهز وكلشي كيتسنى يشوف العروسة ذهب بنت عهد سقراط ولد نضال سقراط ومن لا يعرفهم ... الهمة والشان والجاه هوا اللي معروف عليهم .
نزلو لعروسة درجة بدرجة ورياض شاد فيها بلباس تقليدي.. جبادور ابيض وسلهام .. وهي تكشيطة بيضاء و راسها مغطي ... حتى لاخر درجة وعرا ليها وجهها بابتسامة .. قرب باس ليها جبهتها فرحان وخلاها ركبوها فالعمارية وزادو بيها تحت اغنية " الف هنية وهنية " ومن لفوق واقفة غيثة لابسة تكشيطة فالاخضر ودايرة شال على راسها وحداها عهد بكوستيم بلو مارين كيتفرج
غيثة : البنت دغيا كبرات ...
عهد: وولدات وتزوجات
غيثة: ههه مهم بولد عمها اللي يصونها وكيبغيها ويموت عليها .. ماعطيتيهاش للبراني
عهد: داكشي علاش مرتاح من جيهتها
غيثة: يالاه نهبطو ... واخا ماعزيزش عليك الاختلاط .. المهم كون حاضر وعلى قبل بنتك ...صبرتي كمل على صبرك
ذهب: عيطت ليه فالتيليفون .. جاوباتني حنين ... قالت ليا عايشين مزيانين . وقالت مابغاش يهضر مع حتى واحد فينا .. حتى انا متبززتش عليها تقول ليه يجي
رياض: الله يدير شي تاويل ديال الخير وصافي تنهد وشد ليها فيدها . غمز لمو تنوض تصور معا وغمز باه ينوض عمو "عهد " يتصور معاهم .. نوضوه بزز منو واخا مابغاش فاللول .. لاكن دار الخاطر وناض جلس حدا ذهب وجلسات العاءلة كاملة فالجناب ... خوات الساحة وتطلقات موسيقى هادىءة ... مع الفلاش ديال الكاميرا فالبرزة الي مقابلة مع باب القصر .. كلشي تصدم .. كلشي تدهش .. العاءلة كلها وقفات وبينا فيهم رياض وذهب ..تصدمو بشوفة أسلام هوا داخل مع الباب .. لابس سروال توب ازرق داكن وقميجة بيضاء .. وفيدو ولدو هازو ملبس ليه كوستيم صغير وبابينو .. وشاد بيدو فيد حنين اللي عينيها كيبريو بالفرحة لابسة قفطان سامبل احمر وطالقة شعرها . تقدمو وسط السجادة الحمراء قدام دهشة الحضور ... حتى من عهد ماوقعهاش ... وصلو عندهم وقال بارتباك وهوا كيشوف فيهم
أسلام : مبروك
نقض عليه سلام التوأم ديالو بالحضن وباداو اسلام نفس الحضن حتى بدات غيثة وذهب ومروى كيبكيو .. هزات عليه حنين الولد وبدات كتسلم .. من نهار تزاد ملك مشافوه .. من ديك الساعة حتى لدابا .. حتى شد راسو وولا كيفرز بين الوجوه .. بدا العناق من واحد لواحد .. عنقاتو ذهب بقوة كتبكي وعنقو رياض فرحان برجوعو .. سلم على الكل وداز لغيثة اللي واقفة بزز غاطيح من طولها .. ماقدرش يشوف ليها فوجهها ونزل نيشان على رجليها كيبكي حتى طاحت على ركابيها كتبوس فيه وتعنق ... اجواء جد مأثرة خلات كولشي يبكي الا واحد اللي خلاتو يضحك بزز منو واخا تخنق .. هوا سلام اللي واقف حدا حنين وملك كيتجبد عندو بغا يمشي عندو كيجر ليه فحوايجو وكيقول
ملك : بابا. بابا
هزو سلام عندو باسو وبدا كيشوف فيه ويضحك معاه ..
وقف اسلام شاد فغيثة وقفها معاه وعنقها بقوة كيبكيو بجوج . باس راسها ويديها وهي تهز فيه عينيه وات ليه فيدو وتلفتات عند عهد شدات ليه فيدو وجراتو عندها ، قبطات يديهم بجوج جمعاتهم .. اسلام ماقدرش يهز عينو فباه حتى حط الاب يدو على كتفو عاد دار اسلام عنقو وقال
اسلام : سمح ليا الواليد
عهد : بابتسامة .. المسامحة ... نسا اللي فات .. واجي نبداو صفحة جديدة
تعانقو بقوة .. كلشي فرح للصلح للي تم بيناتهم .. تلفت اسلام عند حنين وقال
اسلام: فين ملك .. جيبيه يشوفو يشوفو الواليد
جابو سلام هازو و ملك حدو شاف اسلام وهوا بمد يديه عندو بغا يمشي عندو .. هزو اسلام كيضحك معاه ..شوية وهوا يشوف عاوتاتي فسلام ومد يديه عندو ... هزو سلام كيضحك وعاود مد يديه عند باه مشا عندو ... وهاد المرة حل عينيه بجوج فيهم وهوا يبدا يبكي ليهم مابغا يمشي عند حتى واحد فيه وهرب عند حنين هزاتو كتسكت فيه
رجع العرس للنشاط والفرحة ورجعات الغاءلة تجمعات من جديد كما كانت وحسن .. ومشا الخوت جلسو فطبلة وحدة عاصرين على بريق و ملك .. هازينهم ومجلسبن سلام حدا اسلام وخلاو البزاوز كيبرققو فيهم مافهمو والو .
ومشات خبيرتي من ساطة لساط وتفكيت انا من أل سقراط
#النهاية
اجي بلاتي .
غزال : بريق ..ملك ... اعلنكما زوجا وزوجة .. بواتكم ومواتكم شاهدين على هاد الزواج .. ومن هنا نقوليك ... ها باك .. ها عمك ... علمهم باش ماتبقاش تغلط . يالله السلام وعليكم
رقبة تحت السيف الجزء 49 و الأخير
محتوى القصة
التنقل بين الأجزاء