رقبة تحت السيف الجزء 41

هبطات راسها كتغوت وتبكي حتى دخلات اوليفرا لقاتها طايحة وهزاتها بشوية للفراش كتقلب ليها رجليها .. حطاتها ونزلات كدردك فالدروج عند اسلام؛ لقاتو فالجردة وقفزاتو بالخلعة من بلاصتو

اوليفرا: طاااحت طاااحت ... نينا طاحت فالحمام

اسلام: بفزع ) كفاش!

طلع كيطير عندها لبيت النعاس لقلعا كتعوج فبلاصتها شادة ضهرها .. جلس حداها و شد ليها فيديها تالف ماعرف اش يقول 

اسلام: مالكي شنو قع ليك شنو كيضرك؟ كفاش وقع ليك .. اوليفرا عيطي دااابا للطبيبة تجي سربي 

هز ليها الغطا كيقلب بين رجليها ويشوف .. مالقا والو وحط يدو على كرشها 

اسلام: فين طحتي ؟ علاااش انينا نايضة علااااش .. علاااش متسنايش نجي انا ولا اوليفرا (تلفت عندها وخرج عينيه فيها) فييين كنتي نتي؟؟؟؟ علااااش تخليها بوحدها وتنوض من بلاصتها 

اوليرفرا : كنت غير...

اسلام : واااا ماتحركيش من حدااااها ... بقاي لاسقة حداها ... توقع ليها شي حاجة ندبحك 

بلعات اوليفرا ريقها وهبطات راسها . وصلات الطبيبة كتجري ودخلات عندها فحصاتها وقالت 

الطبيبة: الحمد لله ... ما وقع للجنين حتى شي حاجة ... غير تقصحات وصافي ... دابا خصها ضاروري تلزم لفراش حتى تفوت 4 اشهر على الاقل

اسلام : بجدية) صافي ... هنا غتبقا متنوضش من بلاصتها 

الطبيبة: خليت ليكم الراحة 

خرجات وخرجات من موراها اوليفرا خلات اسلام بوحدو مع نينا شاد فيها

اسلام: شفتي... شفتي اش كان غيوقع ... قلت ليك الحبيبة ديالي بقاي ناعسة ... علاش نضتي علاش

نينا : بغيت نمشي طواليط 

اسلام: انا نديك لطواليط .. ولا اوليفرا ... (تنهد) كانت غتوقع شي كارتة 

نينا: اسلام نسولك 

اسلام: سولي احبيبة ديالي 

نينا : قريت فالانترنت هادشي اللي كنديرو حرام ... واش حرام 

فيقاتو من القلبة وحل عينيه ساكت مالقا مايقول ... بقا كيرمش وقال ليا

اسلام: خاصنا غير العقد ... نتزجو على الطريقة الاسلامية... ساهلة .. غير توقفي شوية على رجليك تمشي معايا للمغرب ... منها ترتاحي شوية ومنها نتزوجو تما ... صافي 

نينا: ولاكن حرام تقرب ليا دابا 

اسلام: وحنا اصلا راه بحال الى مزوجين 

نينا: واخا هاكاك ... باش ربي مايعاقبناش ماخصناش نبقاو نعسو بجوج ... ماتعرف هادشي اللي كيوثع لينا من هاد الحرام اللي كنديرو .

اسلام: واخا اللي بغيتي ... صافي منقربش ليك ... منها نيت ترتاحي 

.صافي بقيتي على خاطرك؟

حركات راسها بالايجاب وابتاسمات ... دوز يدو على وجها وباس ليها يديها وقال

اسلام: رتاحي نتي .. انا عندي مايدار دابا ... مزال خاصني نصايب ليك لوراق حيت ماعندك حتى ورقة ... وحتى الكنية ماعندكش ... باش نتزوجو خاص تكون عندك كارط ناسيونال بحال كلشي .

حركات راسها وقالت

نينا: واخا 

اسلام: تبغي ترجعي على كنيتي؟ 

نينا: بحماس .) اه نرجع 

اسلام: صافي .. غنديرك على كنيتي 

باس يدها وناض خلاها متكية ونزل لتحت جمع كاع اللي خدامين فالفيلا كيصعر 

اسلام: اش كدير الصابونة فالارض فالحمام عندي؟؟؟

وااقفة كتسنط عليه من الباب وهوا لداخل كيهضر فالتيلي
رياض : مهم ماكرهتش نتشاوفو ... الى كان عندك شي وقت ندوز عليك ... اوك . يالاه لقيتني داخل ندوش ونجي عندك ... باي تهلاي ليا فراسك
سمعاتو قطع الحس وسمعات الباب تحل ديال الدوش وحلات الباب بشوية دخلات على صبعان رجليها ... تسنطات على الباب سمعات الماء مطلوق ومشات للتيليفون هزاتو ودخلات كتقلب فيه شافت النمرة الاخيرة اللي هضر معاهت وسيفطات مسج فيها " سمحي ليا منقدرش نجي ... خاطيبتي بغات تخرج وغنخرجها "
فالحين وصلها مسج " خطيبتك !!! علاش نتا خاطب؟"
- " وي ... مجاتش فرصة باش نقولهت ليك ... واش عندك مشكل نكون خاطب؟"
-" نو بلعكس ... حنا اصلا اصدقاء .. غير مكانش كيحساب ليا "
-" مهم كنت ناوي نخرج ... مي بغيت نطلبك واحد الطلب "
-" وي قول"
-" بغيتك تعيطي ليا من دابا شوية وقولي ليا راه زعما عارض عليك خطيبك حتى نتي ومتقدريش تخرجي ... حيت خطيبتي غتكون حدايا كتسمعك وبغيتها ضن انك مخطوبة حيت مغيارة وكتغير منك بزاف .. غير باش ترتاح من جيهتك وصافي راكي عارفة البنات ...وبلوكيني بلعاني فالتيليفون حتى نتاصل بيك انا .. الى ماتاصلتش عرفي تيلي عند خطيبتي ... راه مريضة مسكينة والطبيب قالنا مابقاش ليها بزاف وتموت... داكشي علاش كندير ليها خاطرها "
-" اوكي ماشي مشكل .... الله يشافيها مسكينة "
-" مهم انا واخا نقول ليك اللي قلت ماتديش عليا حيت غنكون معاها ... نتي قولي هادشي اللي قلت ليك وبلوكيني فمرة حتى تمشي ونعيط ليك "
-"اوك كون هاني"
مسحات المساجات كاملين وحطات التيلي كدعي فيه وفيها وخارجة كتسلت
ذهب: يااااربي تسمح لي ياربي .. يا ربي باقا باغا نعيش وكنفايل على راسي الله يعطيهم شي موصيبة ضرب باباهم بجوج.. الله يعطيك يا رياض شي زلقة باش تشد الارض فاخر ايامي وليت مريضة وايامي معدودوة تفووووو

مشات هبطات لتحت تركنات كتخمم . شوية بان ليها نازل كيهضر فالتيلي وهزات واحد المجلة بالزربة شداتها وتكات على ضهرها حالاها بالمقلوب كتشوفيها وعقبها وودنيها مع رياض اللي نازل كيهضر فالتيلي
رياض: اممم ... صافي ماشي مشكل ... كن قلتي ليا من اللول مخطوبة ! ... صافي هانية الله يكمل عليك بالخير .
قطع ونزل جلس مقابل معاه كيخمم وكل شوية يشوف فالساعة ... وهي كل شوية طل عليه من المجلة وتخبي عينيها ... هز راسو فيها وقال باستغراب
رياض : حتى لفين قريتي ا ذهب؟
ذهب: باستغراب ) علاش؟ راه عندي الدكتورة !!!
رياض: ديك الهزة اللي دايرة للمجلة مايديرها حتى الكلب .
نتابهات للمجلة وشافت فيه بارتباك كتمكم .
ذهب: ط.. ف.. .وو .. ككنت كنجرب نقرا بالمقلوب ...(وقفات مخرجة عينيها) مالك حاضيني ماالك... سوووقك !
لاحت المجلة وطلعات كتنكر وكل شوية دور تشوفيه وتنكر وهوا كيضحك عليها بسخرية .. دخل عهد كيجبد فلحيتو وحمام يديه مكفضين باينة عوال على شي حاجة
عهد: ولدي رياض.... تمشي لكلومبيا؟
رياض : باستغراب) علاش؟ ياك لاباس؟
عهد: كيصلحو المنجم و واحلين تما فشي مشكل ... مكاينش من غيرك اللي يمشي ... سلام مريض خاصني نبقا حداه العملية ديالو قربات ... والسفر ديالي غياخد بزاف ديال الوقت تما
رياض: وقف) نمشي علاش لا ... شحال نقدر نبقا تما كاع ؟
عهد: على حسب ... المنجم راك عارفو كي داير خاصو الوقت واللي يوقف عليه .... داك الانفجار ريب كلشي
رياض: صافي .. انا جالس جالس نمشي غدا ان شاء الله
رتب على كتفو : الله يرضي عليك اولدي ... كي غادي مع ذهب مزيان شوية؟
رياض: مسلكين ... مرة دير عقلها مرة يتلف ليها
عهد: زير ... زير السمطة شوية .. راه بحالها بحال مها الى مزيرتيهاش تركب عليك .
رياض : يكون خير ان شاء الله ههه
عهد: يالاه تهلا ... نعول عليك
رياض: كن هاني
مشا عهد وطلع رياض لبيتو ... جبد الشوانط لكبار ديالو وبدا يستف فحوايجو ؟ خرجات ذهب من بيتها كتلوي فيديها ودازت حدا بيتو لقات الباب محلول ... طلات وهي تشوفو كيجمع فالحوايج
خرجات عينيها وتكات على الحيط كتهضر بوحدها
ذهب: ويلي!!! فين ناوي يهاجر!!! يكما عاق بيا وبغا يمشي بحالو ... !!! لالا صافي عاااق بيا ... ويييلي اش درت ... كنطييييير كنطيييير من المقلة ... اش داني نهز ليه شي تيليفون ... باينة بنت الحرام قالت ليه شي كلمة خلاتو يعيق بيا ... تفوووو تفووو تقوووو على ديلمي انا وتفكيري ... يا ربي واش انا بعقلي ولا مالي ... واش داني لبوطايلو ... هاهوا غيطج مني انا وطيراني فمرة كاااع ... هننننههنن
خرج حصلها لاسقة مع الحيط كتهرنن وهوا يقفزها
رياض: مالك واقفة هنا ياك لاباس؟!
ذهب: بارتباك ) كك .ككك كنت بغيت .. بغيت غير نقول ليك...راه... راني مسافرة .
هز حاجبو: سبحان الله ... جايا تقوليها ليا انا !!! بيزاغ! .... ايوا فين مسافرة
ذهب: كدور فعينيها ) ل ... لل.... اجي مانلقاش عندك شي باليزة خاوية؟!
رياض: علاش !!! ماقدوكش الباليزات اللي فهاد القصر!!! .... دوماج لقيتينس عمرتهم حيت غدا غادي بكلومبيا
ذهب: بدهشة ) اااااه ... حتى نتا !!! سبحااااان الله حتى انا لقيتيني غادية غدا .... توحشك كلومبيا وبغيت نمشي ليها شي يامات .
رياض: امم ... مزيان . بلا شك حتى نتي غادية غدا على ما كنضن ياك
ذهب: هيييهيهي .. سبحان الله جيتي فيها ...
رياض: سبحااااان الله .
ذهب: ونتا علاش غادي مسافر؟
رياض: عندي مايدار .. وسيادتكم علاش مسافرة؟
ذهب: حيت سيادتكم عندو مايدار .. هيهيهيهي (جمعات الضحكة ) دخول الصحة هادا ... ونتا مالك نسافر ولا نجلس اش دخلك فحياتي ... بشار كي داير
عوجات فمها وزادت خلاتو واقف هاز حاجبو فيها .
نزلات لتحت وهي تلاقا مع مها ووقفاتها
ذهب : ماما ... انا مسافرة مع رياض لكلومبيا غدا
غيثة : منين خرج هاد السفر بالزربة؟!!! كي درتي ليه ومعامن تشاورتي .. حساب ليك غتبقاي ديري اللي بغيتي بحال من قبل
يالاه جات تهضر وهوا يدوز عهد من موراها عاقد حجبانو وخاطب غيثة قاءلا
عهد: قلت رياض اللي غيمشي .. اللي فات الباب مايلوم غير راسو
طلع وهي تلفت غيثة عند ذهب
غيثة: سمعتيه ... يالاه شدي الارض .. ويلى كنتي مرة سيري قولي ليه علاش


زادت وخلاتها واقفة حاللة فمها ... مشا السفر ومشات هي كفتة .. يعلم الله علاش غادي وشحال غيبقا تما ... وشنو غتجلس دير هي بين الحيوط .. لاخروج لا دخول ومنين ما دازت تلاقا مع باها ... الجو مكهرب وكئيب ... كي غادير وسط منهم ورياض اللي عندو الحق يخرجها مكاينش ... حتى الخروج دابا حلف ليها عليهم وماتقدرش تزطك برا الباب .. يكفي الضوسي ديالها المحروق اللي عند باها .
طلعات للبيت وجلسات كتعض فصبعانها وتغزز ... حمات فيها البيضة وناضت مشات لبيت امها .. يالاه بغات دق عليها ترغبها وهي تسمع
غيثة : خليها تمشي ... ياك مرتو خليها تمشي معاه ... على الله تولفو شوية
عهد: غتلهيه على الخدمة ... هوا كيدير ليها الخاطر كتر من القياس .. غينسا علاش سيفطتو ويبقا مقابل طلباتها اللي مكاتساليش
غيثة: وراها بغات تاكل جنابها .. بغات تمشي وربي كبير .. وحتى رياض تلقاه باغي يديها معاه
عهد: خليها تشد الارض شوية .. ماشي اي حاجة بغاتها تلقاها .. تعلم الصبر شوية
بقات واقفة حاللة فمها وكلمة مرتو كتعاود فودنيها ... بقات مصمرة وبدون شعور ترسمات ابتسامة على شفايفها وتحلو عينيها .. مشات لبيتها كتجري سدات عليها وماحسات براسها حتى لقات راسها كتنقز فرحانة .. شوية وهي تجمع الضحكة ودارت يدها على جنبها وقالت
ذهب : كفاش مرتو؟! من امتى؟! فين كنت انا باش زوجوني ليه!!! .. . اجي معامن تشاورو ؟؟؟ وعلاش مقالوش ليا والو ... شنو واقع! علاش مقالوش ليا راه رياض راجلي!! اححم زعما مزوجني . لالا زعما زوجوني بلاخباري! علاش حتى حد مقالي وكيتصرفو معايا عادي! علاش رياض مابين ليا والو ... وعلاش كيهضر مع وحدة اخرى .. اش هاد التخربيق ...(هزات خنافرها) وزايدون زوجوني صافي يخليوني مني لراجلي.. احم زعما مني لهادا اللي تزوجني!
خرجات من بيتها مشات لبيتو ودخلات عليه لقاتو واقف عريان كيبدل حوايجو .. حتى كان غيهبط السروال ورجعو طلعو بالزربة وخرج عينيه فيها
رياض: شحال من مرة كنقول ليك دقي عاد دخلي .. ماشغليش الى شي مرة لقيتني عريان
ماعارتوش انتباه وقالت ينرفزة: مابقيتش مسافرة ....عرفتي علاش؟ حيت مابقاوش الرجال فهاد الدار .. كاينين غير الشمايت ...
هز حاجبو وقال: زمي فمك ... عرفي اش كنقولي ولا نوريك الشمايت اش كيسواو
ذهب: حيت الرجال فيهم النفس ... نتا كاع مافيك النفس
اندافع جيهتها يغضب وغوت : غتجمعي فمك ولا نهرسو ليك ... هاد الهضرة قوليها على البراهش اللي بحالك
ذهب: بتحدي) على الاقل دوك البراهش فيهم النفس ... ماشي بحالك
من غدايد السفر اللي ماداهاش معاه وطلع مزوج بيها ومزال باها يتحكم فيها بدات تدخل وتخرج فالهضرة .. مابغاتش تقوليه باللي عرفات باش يبقا كبرياءها عالي فالسماء ومابغاتش تقوليه يقوم بالواجبات ديالو كزوج مللي هوا مزوج بيها ويديها معاه ... ماعرفاتش كفاش تعبر وهوا فهمها بالمقلوب وهز يدو جمع معاها للحنك وخرج عينيه
رياض:يالاه سيري عند باك تشكاي ليه ... وقوليه ها علاش ضربني
بقات شادة حنكها مصدومة مامتيثاش..تجننات وهي تهز واحد الكاس طويل بحال الفاز وبغات ضربو بيه .. بقاو دفعني ندفعك وهي كتبكي وتصعر حتى طاح الفاز فالارض تهرس وجمع ليها يديها لسقها مع الحيط وقال
رياض: علاياش كتقلبي دابا؟ شنو بغيتي؟

يتبع