في غرفة مظلمة جالسة و شعرها واقف و عينيها منفوخين بالبكا و تحت عينيها ولى في اللون الأسود بقلة النعاس جالسة شاردة كتشوف في نقطة وحدة و عقلها ممعاهاش حتى تحل الباب
حنان: معييتيش (غادية تحل الشرجم)
زينب: حنان خليه و خرجي عافاك بغيت نبقى بوحدي
حنان: حتال امتى ا صاحبتي غير فهميني شهر هذا و نتي سادة على راسك و عاطياها غير لبكا و مكتهضري مع حتى واحد
زينب بالغوات: وا حنان مدرتو والو خليني عليك عافاك 😭 متخلينيش نقول شي حاجة نندم عليها مبغيت نهضر مع حتى واحد
امين داخل: حتى انا
زينب هزات عينيها فيه عامرين دموع فحال إلى كتقول ليه مزيان لي جيتي
امين قرب لعندها و عنقها: توحشتك المشعكة ديالي
زينب: حتى انا توحشتك
امين قابلها معاه و شد وجهها بين ايديه: و دابا الحبيبة ديال خوها غادي تقول لي مالها
زينب: ما مالي والو ا امين
امين: شوفي اوكان إذا مالك حابسة راسك و مكتخرجيش و الماكلة غير إلى بززوها عليك اش هادشي كتديري في راسك
زينب: امين عافاك الله يرحم ليك الوالدين ندير لي بغيتي غير متسولنيش محاساش راسي باغية نهضر
حنان: و حتالاين
امين شاف فيها: خليها على خاطرها قلتي تديري لي بغيت
زينب: اه
امين: لي بغيت لي بغيت
زينب: و صافي أ صاحبي قلت ليك اه
امين: غادي تنوضي تلبسي حوايجك و نخرجو
زينب: امين والله ما قادرة
حنان: اويلي على مقادراش نتي شهر هدا مشفتي الزنقة نوضي تكعدي يالاه
امين: يالاه انا غادي نتسناكم برى
مشات حنان حلات الشراجم و جبدات ليها حوايج و دفعاتها نحو الحمام ذخلات زينب للدوش دوشت و خرجات لبسات حوايجها و نشفات شعرها و خلاتو مطلوق دارت ليها حنان شويا ديال الماكياج يغطي ليها الهالات السوداء لي غطات تحت عينيها
هبطو البنات لقاو امين كيتسناهم هو و علي سلمو على علي و هي تم جايا الباتول
الباتول: بنتي شويا
زينب: الحمد لله ا ماما
الباتول: وا قولي ليا عافا بنتي مالك مع راجلك
زينب: ماما عافاك راني قلت ليك تخاصمنا على شي حاجة و صافي
الباتول: و هاد الخصام مغايساليش
زينب تعصبت: وا الباتول
الباتول: صافي على خاطرك غير متبقايش خالعانا عليك راه نتي لي عندنا
زينب قربات عندها و عنقاتها و باستها: يخليك ليا صافي متخافيش انا بخير
امين: وا يالاه زيدو قدامي
خرجو كاملين من الدار زينب غمضات عينيها من الشعا لي ضارب فيهم شحال مشافت الشمس طلعو للطوموبيل امين سايك و حنان حداه و هي و علي اللور
علي : زينب شويا دابا
زينب: الحمد لله كنحاول نكون مزيان
علي: اش ناوية تديري
زينب: الصمت حطات راسها على الزاجة و رجعو ليها أفكارها لي هادي شهر و هوما يدورو في راسها شهر و هي كتخمم مرة تقول يا ربي نكون عايشة حلم.. مرة تقول كون غير معرفتش..مرة تقول هو اصلا مكانش كيبغيني..كان باغي غير فلوس باه.. ولا يمكن كان باغي يقولها ليا و مقدرش.. و ترجع تنفض راسها من هاد الأفكار لا لا هادشي مكاينش انا سمعت ديك الزعفرانة ديال بنت عمو بوذني كوراه كانت متافقة معاه بففففف راسي غادي يتفركع هاكدا دوزت شهرها كتفكر و تفكر و تعاود ترجع لنفس البلاصة و نفس الاستنتاجات خبا عليها... مصارحهاش... عمرو مابغاها..... مكتهضر مع حد و غير سادة عليها واليديها حارو معاها و معارفينش حتى أساس المشكل قالت ليهم تخاصمنا و صافي 😢
وصلوا قدام واحد الكافي حدا البحر هبطو و جلسو و زينب تقابلت مع البحر بحال إلى كتشكي عليه كلشي كيحاول يهضر معاها يضحكها و والو مكيناش معاهم
في نفس البلاصة داخل ياسين و ايمن و مروان بعد مبززو على سي ياسين يخرج معاهم كانو ذاخلين لمحها ووقف
مشاو الدراري و خلاوه كيشوف فيها من الزاج كيشوف في بوكاهونتاستو لي شهر مشافها كيشوف فيها جالسة معاهم و لكن عينيها كيشوفو بعيد و تفكيرها مكينش و عقلها غايب و كتشوف في نقطة وحدة شاف شعرها مطلوق و تفكر نهار لي تطلق قدامو اول مرة تفكر ريحتو و ملمسو مني كان كيلعب فيه باش تنعس توحشو شاف عينيها نيفها فمها اش لابسة تفحصها و كانو اول و آخر مرة غادي يشوفها توحشها مكرهش يخشيها في حضنو بقى ساهي فيها حتى تفكر انها عمرها تسمح ليه عاد حدر راسو و خرج
نرجعو فين جالسة زينب و الآخرين وقفو عليهم ايمن و مروان
ايمن و مروان: السلام و عليكم
الكل ما عدى زينب: و عليكم السلام
ايمن: زينب صافا
زينب شافت فيه و قلبات وجهها مجاوباتوش عرفها كتلومو حتى هو حيتاش كان عارف بقاو جالسين كيحاولو معاها تهضر ووالو حتى شافوها ناضت الكل شاف فيها
زينب: مالكم غادية نهبط للبحر شويا مغنهربش متخافوش
مشات و خلات الكل متبعها بالعين
حنان: لا حنا ضروري نلقاو حل نحطوها أمام الأمر الواقع و نجيبو ياسين نحطوه قدامها
ايمن: أودي خاصنا نحطوهم بجوج أمام الأمر الواقع واقيلا
حنان: كيفاش
مروان: ياسين كان معانا و فاش شافها مبغاش يجي حيت عارف ردة فعلها و قالك خليها على خاطرها
حنان: وا موصيبة مع هاد الجوج ريوسهم قصح من الحجر
امين: خليهم يمكن مع الوقت تتصلح أمورهم
ايمن: هادو ما ديال وقت
حنان ابتسمت بشر: هادو ديال شي خطة فاعلة تاركة من دماغي 😈
في فيلا العلوي
كان ياسين و باه و سوما في المكتب
سوما: ولدي لاباس عليك شهر هذا ماجيتي امدرا قدرتي تحل مشكلتك مع زينب
ياسين: دخلي سوق راسك متستفسريش و زيدون اش باقا كتديري هنا قودي
احلام: ياسين انا
ياسين:✋ متزيدي حتى كلمة كمارتك منشوفهاش
احلام غرغرو عينيها و تمات غادية و هو يشدها زير على دراعها و دورها عندو
ياسين : اجي لهنا منين عرفتي نتي أمر الصفقة
احلام: ماشي مهم
ياسين صهل حتى زعزع الحيوط ديال القصر : هضررررري 😡
احلام: 😭😭 قالها ليا مراد
ياسين: وداك الز..... منين عرف ولايني حسابو معايا حتى نسالي ليه( خرج)
نمشيو عند العصابة الشريرة 😈 لي وصلات عندهم لمياء
لمياء: اهلا تجمعتو الكوارث فين زينب
حنان: داها امين للدار جلسي باش نهضرو
ايمن: يالاه غير طلقينا اشنو الخطة
حنان: نخطفوهم
لمياء: 😂😂
ايمن:🤦🏻♂🤦🏻♂🤦🏻♂🤦🏻♂
مروان: هادي راه خرجوا عليها الأفلام
علي: كون غير بقيتي ساكتة
حنان: وا راه مكاين حتى حل آخر خاصهم يتواجهو
لمياء: كي غنديرو نخرجو هاديك الأميرة من الدار
حنان: حالها ساهل و هادي مهمتك دابا نشرح ليك كيفاش
ايمن: و لكن ياسين راه متدارش بيه
حنان: إذن علموه و إلى مبغاش ديرو ليه منوم و جيبوه بزز
مروان: 😂😂😂 آخرتي غادي نتزوج بهبيلة
علي: و فين غادي تديوهم
حنان: خاص تكون بلاصة بعيدة غير لخلا و القيفار باش متهربش زينب
ايمن شاف في لمياء و هي كذلك و قالو بجوج في دقة:laya
حنان: اشنو
ايمن: هادي دار عندنا خارج المدينة على البحر
مروان: أو اش هاد السمية العجيبة
لمياء: اول أحرف اسماءنا و حرف لقبنا
حنان: على حتى ايمن كنيتو العلوي
ايمن ابتسم: لا كنيتي انواري
حنان: مممم متشرفين دابا اش درنا متافقين
مدات ايديها وسط الطبلة و حط مروان ايديه فوق ايديها من بعد علي و لمياء و ايمن و هزوهم الفوق
الكل: متافقين
في بيتها جالسة من بعد ما خوات همها قدام البحر ونفس الأفكار في بالها و كاع الأسئلة ملقاتش ليهم جواب عارفة الأجوبة كلها عندو بوحدو و لكن مقادراش تواجهو مقادراش تنسى انه خبى عليها حتى تحل الباب و ذخل باها
العربي عنقها و جلس حداها: اش خبار عمارة داري اليوم
زينب: مزيان أبابا سمح ليا عذبتكم معايا
العربي: يالهبيلة راك بنتي إلى مهزاتكش الأرض نهزك فوق راسي
زينب دارت باست ليه راسو: الله يخليك ليا
العربي: و دابا عاودي ليا اشنو المشكل مع راجلك
زينب: الصمت و حابسة البكية
العربي: واش دار ليك شي حاجة قبيحة
زينب: الصمت
العربي: واش حصلتيه كيفسد
زينب: لا
العربي:كيقمر كيشرب
زينب: لا
العربي: مكايعاملكش مزيان عمرو هز عليك ايديه
زينب: ياسين بعيد كل البعد على هادشي
العربي: إذن ولد الناس و يستاهل فرصة أخرى سمعيني ابنتي راه حنا ماشي ملائكة و الانسان خطاء بطبعو و ادا كان ربي سبحانه وتعالى كيسامح عبدو شكون حنا لي منسامحوش عطيه فرصة صلحو سوء التفاهم لي بيناتكم حسن ما تبقاي معذبة راسك و معذباه
زينب غير كتسمع و دموعها على خدها هبط باها باس جبينها و خرج خلاها كتدور في هضرتو في ذماغها حتى نعسات
مراد: قولي لديك البرهوشة ديال بنتك تخرجوا من دماغها مكاينش غا هو
فوزية: نحاول معاها
مراد: دبري لراسك انا خارج
أصبحنا وأصبح الملك لله
عند زينب لي دخلو عليها البنات حنان و لمياء لقاوها حالة عينيها و كتخمم دورات راسها شافتهم و رجعات كيف كانت
لمياء: اوه القطة شفتك اليوم شفتيني و مخرجتيش نيابك و جريتي عليا
زينب: الصمت مجاوباتهاش غير مخنزرة فيها 😏
حنان: زينب اشنو ناوية تديري
زينب: فاش اش غندير
لمياء: زعما بغات تقوليك اش غتديري مع ياسين
زينب: متجبديش ليا سميتو
لمياء: زدتي فيه حتى نتي اوكي خبينا عليك الالة حنا منسواوش و لكن واش ماشي من حقو تسمعيه معطيتيه حتى فرصة يشرح ليك
زينب كتغوت: فيناهو هدا لي غانسمع ليه فيناهو 😭
حنان: اوا باز لكمارتك
لمياء: سمعتيها اش قالت باز ليك كتسولي فيناهو على ماشي 15 يوم و هو كيجي و مكتبغيش تشوفيه واخا هكداك ميأسش و بقى يوميا غادي جاي... هداك لي كتقولي فيناهو ماشي ديك السيمانة من الصباح و هو قدام داركم و بات في الليل في العتبة حيت نتي حلفتي على داركم ميذخلوهش...هداك لي كتقولي فيناهو خليتيه يفقد الأمل حتى في شوفتك و سماحتك و التاجئ للشراب باش يدوخ
زينب غير كتسمع و عينيها عامرين دموع 😢😢
حنان: مسكين ياسين 😢
لمياء: سمعي ا زينب هو خويا و نتي صاحبتي واخا صداقتنا مدتها قصيرة و لكن كاين ناس مكتحتاجيش وقت باش يدخلو هنا❤ و غانقوليك مكاينش شي راجل يدير معاك بحال هكدا إلى مكنتيش كتعني ليه الكتير و سيرتو إلى جات من ياسين راه خويا و كنعرفو... و انا إلى مصارحتكش حيت كنشوف ممنحقيش خاصك تسمعي من عندو هو يا تقتانعي بهضرتو يا لا
زينب كتسمع شويا طرطقات بالبكا و تلاحت في حضن لمياء مخبية و كتردد كلمة وحدة في الداخل ديالها "توحشتو..توحشتو"😭😭😭 لمياء خلاتها على خاطرها شويا هزاتها قابلتها معاها شوفي فيا نوضي غادي تدوشي و ندي ختي لواحد البلاصة غاتعجبك بزااف
زينب: مفياش و الله
لمياء: واشتي ها الفشوش لي مبغيتش يالاه مبغيت حتى اعتراض انا غادي نعيط لايمن نقولها ليه
غمزات حنان و خرجات دوزات نمرة ايمن
لمياء: الو
ايمن: صافي كلشي هو هداك
لمياء: وي كلشي تمام عندكم
ايمن: هاحنا مازال واحلين مع هاد الزين الصافي ديال خوك يالاه حتال من بعد و نهضرو
عند الدراري
ياسين خارج من الدوش: اش كنتو كتقولو
ايمن فشل: مروان دوي نتا انا جاني شلل نصفي
مروان: انا غانشنق راسي ياسين ركز معانا من الصباح و حنا داويين مسمعتي والو من داكشي كامل
زينب خرجات من الدوش لبسات حوايجها عبارة عن سروال و قبية و خلات شعرها على راحتو من بعد مانشفاتو دارت بارفانها و نظاظر و خرجات عند حنان و لمياء خرجوا لقاو ايمن و مروان كيتسناوهم طلعو للطوموبيل سلمو و شدو الطريق زينب حطات راسها على الزاج و قررات متفكر في والو بقاو غاديين شويا وقفهم ايمن في ماكدو 🍔🍟 و تغداو عاد كملو الطريق كانت شويا طويلة وباينة خارجة المدينة و لكن زينب مهتماتش غير مقابلة الطريق و الناس و البحر و مع ذلك كتفكر في ياسين وصلو حدا واحد الدار على البحر منظر روعة و الدار حتى هي نزلوا حل ايمن الباب دخلات زينب هي الأولى حتى كتسمع الباب وراها كيتسورت دارت جيهتو لقات حتى واحد مكاين و الباب مسدود قربات حداه و بدات كتحل لكن مبغاش طلقات الحلوق
زينب: هادوك سليعفانات حلو الباب اش هاد اللعب الباسل دق دق دق
دارت تشوف شي بلاصة منين تخرج جات عينيها في عينيه اه هو لي شهر مشافتوش.. هو لي توحشاتو و توحشت ريحتو... لعبو معاها... حضنو... قبلاتو... توحشات تشوفو خدام داك المنظر لي كيخرجها عن شعورها...و توحشات تتغزل فيه في خاطرها...قلبها قفز عينيها عمرو بالدموع باغا تمشي و تلاح في حضنو باغا تقوليه شحال كتبغيه ولكن في راسها 1000 سؤال كيخبطو معارفا ماتقدم و لا ما توخر
و في المقابل ديالها هو لي ممصدقش انها قدامو ممصدقش انو كيشوفها عينيها.. فمها... شعرها...كلها توحشها توحش شقاوتها...تبرهيشها...صوتها...كلامها.. ريحتها باغي يمشي يشدها يوزع قبلاتو على وجهها باغي يخبيها في حضنو حتى
يتأكد انها عمرها تخليه ممستعدش يخسرها تاني باغي يدير اي حاجة باش تبقى معاه بقى ساهي في عينيها حتى فيقو صوتها لي توحشو
زينب: حل ليا الباب بغيت نمشي فحالي
ياسين: زينب سمعيني و ديك الساعة إلى بغيتي تمشي انا نوصلك
زينب معفرة : مبغيت نسمع والو
ياسين: لا غادي تسمعيني
زينب: مبغيتش بزز
ياسين غوت لانو حس ان هادي هي آخر فرصة و ميقدرش يضيعها لازم تسمعو: اه بزز بزز غتسمعي
زينب حتى هي بالغوات : اش غادي نسمع الكدوب نتا كدبتي عليا
زينب قلبها غيخرج من بلاصتو بالفرحة و الصدمة مقالت حتى كلمة
ياسين: خبيت حيت خفت تمشي و تخليني بحالها
زينب تحت سنانها: اياه كاينة وحدة أخرى اللهم زد و بارك
ياسين سمعها تبسم: حتى و نتي معصبة مغيارة زينب عطيني فرصة سمعيني ماخاسرة والو اجي معايا
مد ايديه و بقى كيتسنى ردها هي كانت مترددة بقات مدة كتشوف في ايديه ممدودة ليها عاد مدات ايديها شدات فيه حسات بالضوء ضربها و ارتعشت عرفت انو قلبها مالكو هاد الراجل لي قدامها
ياسين غير قبطات ايديه بغا يطير بالفرحة مكرهش يطير عليها يخشيها في صدرو و لكن دابا خاصو يهضر خاصو يقربها منو اكتر جمع كاع قوتو باش يصارحها و يخرج داكشي لي في قلبو ❤
جرها خرجها من الباب اللوراني لي مقابل مع البحر و داها لواحد الجلسة تماك جلسها و جلس حداها شد ايديها و بقى كيتأمل فيها شحال عاد خدا نفس طويييل و خرجو
ياسين: كانت في عمري 7 سنين نهار فقت واحد الصباح و لقيت حركة غير عادية في الفيلا و كأي دري صغير اول حاجة غيديرها هي يقلب على ماماه بقيت كنقلب و نعيط ليها و الخدمات كيشوفو فيا باسى حتى شدني السي العلوي من ايدي و قال جوج كلمات " متقلبش بزاف مك مشات" انا سمعت كلمة مشات متيقتش ايمن دموعو عمرات عينيه قدامي خرجت من الفيلا في اتجاه واحد الملحق في الجردة سديت عليا و آلاف ديال الأسئلة كتدور في دماغي علاش مشات و فين و كيفاش خلاتني علاش مداتنيش معاها حتى كنسمع السي العلوي كيغوت " متبقاش تجبد سميتها في داري و هو خليه تما دابا يعيى و يخرج" عرفتو كيدوي مع ايمن كرهتو و ممكن حملتو مسؤولية خروجها من الدار بقيت ساد عليا سيمانة كنضرب اخماس في اسداس في دماغي و نتفكر جميع اللحظات جمعاتني معاها كان ايمن الوحيد لي كيدخل عندي كيجيب ليا الماكلة و يبقى معايا شويا تأكدت انو فعلا مشات قررت نخرج اول محطيت رجلي برا جا عندي ولد عمي قال ليا
"ماماك مبقاتش كتبغيك مشات و خلاتك قالتها ليا ماما" انا عارفو كيقول الحقيقة و لكن متحملتش نسمعها من فم شي واحد جاتني قاصحة دفعتو حتى طاح الأرض و ضربتو جا ايمن وقف حدايا حتى جات مو ضرباتنا انا و ايمن و قالت " بزاف عليك تضرب ولدي إلى كانت مك معرفاتش تربيك و سمحات فيك انا نعود فيك التربية مزيان تبارك الله " ووجهات هضرتها لايمن و قالت " ونتا اولد الزنقة عنداك يحساب ليك راك من هاد العائلة راه غير لقطاتك ديك الملقطة يعلم الله منين جابتك لا أصل لا مفصل " بقات كتغوت حتى جات سوما شداتنا عندها و سمعتها كتقول ليها " معندكش الحق تضربيهم" داتنا للبيت و بدلات لينا و عطاتنا ناكلو و حاولات توقف معانا و تبعدنا على الجو لي كان مكهرب في الفيلا
زينب بصوت رقيق: و سوما فين كنتو كتعرفوها
ياسين: سوما بنت خال بابا و ديما كانت كتجي عندنا
زينب: اه كمل
ياسين: نهار على نهار ايمن بدا كيتأقلم مع الوضع و لكن انا لا مقدرتش تلقيت جوج صدمات و انا باقي صغير من جهة ماما لي مشات و خلاتني و من جهة ايمن لي ماشي خويا وليت عدواني بزاف و منعزل مكنهضر مع حد قولي مكندير الثقة في حد و كنتعصب دغيا خاصني غير معامن كانو الدراري لي معايا في المدرسة معودين ليهم واليديهم على قصتي انا و ايمن غير كيشوفونا كيلوحو الهضرة انا كنولي بحال القنبلة مكينش في ديك المدرسة لي مكلاش من عندي العصا صغير كان و لا كبير حتى ولى كلشي كيتشكى أولياء الأمور أساتذة مدير و اقتارحو على السي العلوي يديني لطبيب نفسي مبغيتش تدخلات سوما و اقترحات تدخلني للبوكس على الأقل نفرغ طاقتي تماك و نعرف كيفاش نضبط اعصابي و فعلا داكشي لي كان
تزوج بابا بسوما مهتميتش الصراحة و مكان عندي حتى مانع حيت كانت هي الوحيدة لي كنتعامل معاها في ديك الدار هي و ايمن كنت مقرر نعيش غير لراسي و لايمن حتى تزادت عندنا لمياء 😊 كانت الفرحة ديال الدار و ممكن هي الوحيدة لي كنت كنتبسم ليها قرينا و كبرنا انا ديما مبعد على الناس و مكنهضر مع حد كان تعاملي مع ايمن فقط واخا تفرقنا في سن 17 و كل واحد اختار تخصص هو مشا لهوسو التصوير والرسم و انا اختاريت الهندسة لمجرد الاختيار و صافي يعني كنت كنقرى غير هكداك بدون هدف
زينب ابتسمت: هادي تاني نقطة مشتركة بيني و بينك
ياسين ابتسم: و اشناهي الأولى
زينب: الخدمة
ياسين: مازال نلقاو نقط مشتركة بيناتنا و إلى مكانتش نكونوها ههه
زينب: هههه كمل ليا
ياسين: وصلنا لسن 20 قرر ايمن انه يستقر بوحدو انا عجباتني الفكرة لانو بطبيعة الحال كنسكن معاه في الاول كان اعتراض و لكن من بعد خرجنا و بنينا الدار لي وسط الغابة كانت أول حاجة غادي ندير ليها التصميم و استقرينا الصراحة من تما محطيت رجلي في هاديك الفيلا عامين كنت كنقرى الوقت لي قالها ليا مخي حياتي كانت بوكس و كومبات وسهير مع ايمن كان كيجرني بزز
زينب: اممم بزز تيقتك
ياسين: هههه غير تيقي حتال واحد النهار عيط ليا السي العلوي و قاليك غادي نستسلم منصب نائب مجلس الإدارة في الشركة كان يحساب ليه غادي يرجعني لعندو و نولي انسان عادي و نتخلط مع الناس و لكن تجري الرياح بما لا تشتهي السفن تحولت لوحش ديال الخدمة حتى انا مكنتش عارف راسي عندي هاد الإدمان ديال الخدمة من سن 22 و انا دافن راسي في الخدمة و بنيت احلام و بديت نحققها وحدة وحدة كنت ناجح في خدمتي و لكن ماشي في حياتي الشخصية لانو كنت ديما ساد على راسي لدرجة حتى ايمن و لمياء وليت كنشوفهم من 4 أشهر ل 4 أشهر استقريت بوحدي عمرني درت شي علاقة مع شي بنت واخا تكون عابرة الخوف من أنني ندخل شي واحد جديد لحياتي و فكرة انه ممكن يمشي و يخليني خلاتني ديما مبعد بقدر الإمكان على بنادم حتال نهار بنتي في حياتي 😍
صفقة زواج من متعجرف الجزء العاشر (الفصل الثاني)
محتوى القصة
يتبع
التنقل بين الأجزاء