ياسين: الله يسمعنا خبار الخير فيما كتنطقي سميتي كتكون شي كارثة
زينب: مالك نيتك ناقصة بغيت نمشي للمنارة
ياسين: نغرق طاسيلتك تما و نرجع
زينب😏😏😏: ميمكنش تدير شي حاجة بلا ماتعلق
ياسين: يا ربي الصبر
قلب الطريق للمنارة و شبعت تصاور و صورتو بزز عصبتو حتى قال ليا
ياسين: زيدي قدامي راه غادي نشقلبك هنا و نزيد و نخليك في خاطرو" على آخر ايامك ا ياسين وليتي تابع البراهش"
شدينا الطريق لدار والديا لقيناهم ملقين لينا بالحليب و التمر و الزغاريت كان كلشي سوما و لمياء و الباتول و حنان دوزنا لعشيا طلعت جمعت حوايجي و هما يدخلو عليا ريا و سكينة
ماما: هانتي وجهك منور واتاك الزواج
سوما: وايييه شوفي كانت زوينة ولات غزالة
زينب: لاواه زرافة اش هاد الجير عندكم منين تقديتوه
ماما: اوا الله يمسخك زعما راه هادي عدوزتك خاصك تحشمي منها
زينب كنشوف في سوما: عنداك تديري ليا داكشي ديال تهلاي ليا في ولدي ميخصك معايا حتى خير 😢
سوما: 😂😂😂 نتي راه خاصني نهبط عندو نقوليه يعطيك سلخة الصباح سلخة لعشيا
دوزنا العشية تعشينا و شدينا الطريق للدار لي اول مرة نشوفها ياسين كان مستقر بوحدو كانت عبارة عن duplex لتحت كاين الصالونات ها التقليدي ها العصري و الكوزينة و حمام و غرفة نوم صغيرة و الفوق غرفة مكتب و غرفة رياضة صغيرة و 2 غرف أشار ليا ياسين لوحدة و قال
دخلت لغرفتي حطيت حوايجي و خرجت نكتاشف الدار دخلت لغرفة المكتب يا سلام😍 لقيت عالمي تماك تصاميم كتب و عاد الفيوز خيالي خرجت و اتجهت لغرفة ياسين 😈 حليتها بشويا قلبت بعيني مبانش ليا درت وذني مسمعت والو إذن مكاينش كانت غرفة كبيرة في الأسود رجالية بامتياز تعرفها غرفة ياسين من ريحتو فيها حمام و دريسينغ رووم و بيت مسدود حاولت معاه مبغاش يتحل شويا حتى كنسمع الباب تحل وياسين خارج حاني راسو لاوي عليه فوطة و كيستعد يحيدها و انا نطلق زواكتي قبل مانشوف شي منكر
ياسين تم جاي عندي و داير ايدو في الفوطة:اوا اجي نوريك فاش خدام
قبل ما يكملها انا كنت طرت لبيتي و سورتو أودي وجهي قاصح شي نهار نجيبها في عظامي دخلت دوشت لبست بيجامتي و نشفت شعري و جمعتو جمعة مخربقة و هبطت للكوزينة نشرب لقيت ياسين تم
ياسين: باقي منعستيش
زينب: بغيت نشرب
ياسين: هاكي ها الما و سيري تنعسي قبل ماتديري شي كارثة عوتاني
زينب غادية وكتهضر تحت سنانها: تدار ليك يا المتعجرف
ياسين سمعها كتبركم شدها من دراعها و دورها بالجهد لجيهتو حتى تطلق شعرها قدامو كاع داك الغوات لي كان جامع ليها مشا تكوانصا خرجو عينيه بقى ساهي شحال حتى توكد و قال
ياسين: سيري تنعسي بونوي
مشيت ننعس خليتوا ورايا بونوي سيرو عندو
عند ياسين لي باقي في حالة صدمة
هاد البرهوشة باغا تسكت ليا القلب مكفاهاش مجرجراني وراها في مراكش جات تكمل هنا في الدار اول بنت تحط رجليها في بيتي و أول وحدة تقول ليا متعجرف في وجهي كنت غادي نقجها كون ما شفت داك المنظر الخيالي قدامي تبارك الله شعرها خطف ليا انفاسي كحل بحال الليل حرير و طويل فكراتني في بوكاهونتاس 😍 ياسين جمع راسك اش كتقول متنساش هاد الزواج غير صفقة و متنساش انها مستحيل تبقى معاك إلى عرفت الحقيقة نمشي ننعس احسن
أصبحنا وأصبح الملك لله عند زينب
فقت بكري عندنا اجتماع مهم في الشركة و خاصني نمشي نراجع شي وراق خديت دوش و لبست كلاص و طالون و درت شويا الماكياج و جمعت شعري و خرجت صاوبت الفطور فطرت و خليت لياسين و خرجت نيشان للشركة
في قاعة الاجتماعات واقفة كنشرح حتى قاطعني ياسين و باينة عليه معصب
ياسين: واش عندك فكرة على السيولة لي ممكن يكلف هاد المشروع
زينب: كنضن انه هدا ماشي اختصاصي خاصنا نشوف مع مدير المالية و لكن من وجهة نظري ان المشروع مربح يعني قدما كلف متأكدة غادي يكون ربح
ياسين: مزيان الواحد يكون واتق في راسو و لكن راه مكيناش ضمانة مغاديش نعتامد على الحدس ديال سيادتكم دير ليا دراسة كاملة على السيولة(موجه كلامو لمدير المالية) الاجتماع سالا
عصبني مكرهتش نتلاح نقجو
ياسين: انسة لحقي عليا للبيرو
دخلت للبيرو معصبة
زينب: موسيو العلوي محتاج شي حاجة
ياسين: اولا سميتي ياسين تانيا علاش متسنتيش نجيو مع بعضياتنا و اش هاد الشعر مالو مطلوق و هاد الزواق لي دايرة في وجهك
زينب مسمقلة مافاهمة والو : انا كان شرطي انه الموظفين في الشركة ميعرفوش اننا مزوجين و تانيا شعري تطلق راسو انا اصلا مكنحملش نطلقو و..
ياسين قاطعها: احسن يالاه جمعيه و نقصي من داك العكر و تفضلي لمكتبك
مشيت لبيرو معصبة شكون هو لي يتحكم فيا ياك قال في الاول كل واحد و حياتو و لكن واخا اسي ياسين نردها ليك في ساعة الخير جات عندي امل"خدامة معايا في القسم"
امل: اناري يا ختي مالو معاك هو عصبي و لكن مكيحتاجش يغوت غير الشوفة فيها الكفاية
زينب: امل قلبي عليا و هو يمشي يلعب انا خدمتي كنديرها وصافي
بقيت خدامة شويا حتى حسيت بالوجع عرفتها خالتي طلبت الاذن و خرجت لانو النهار الأول كتخرجها مني
دخلت للدار بدلت حوايجي لبست بيجامة صحية و درت فوطة صحية و نعست من عادتي مكنشربش الدوا حتى كنحس بياسين كيهضر معايا
ياسين: مالكي ناعسة دابا ياك لاباس
هزيت فيه راسي مقادراش نهضر و الدموع محبوسين في عيني الوجع كيقطع فيا محسيت حتى كان قريب من وجهي نازل على ركابيه و حاط ايدو على جبهتي
مشا و شويا رجع في ايديه كاس ديال الزعتر شربوا ليا بزز رجعني كيف كنت متكية هز ليا التريكو خرجو عينيا و حبستو
زينب: حبس اش كتدير كتستاغل مرضي المتعجرف
ياسين😂😂 : نتي هي ديال سكران و حادي حوايجو ترخفي مغندير والو حط ايديه سخونة على كرشي و بقى كيدير ليا مساج انا غرقت في حوايجي و لكن مقدرتش نحبسو لانو الوجع غادي و كيخفاف حتى نعست حتى كنحس بشي يد كتلعب ليا في شعري حليت عيني بان ليا ياسين
ياسين: نوضي تاكلي شويا
زينب: مافياش بغيت غير ننعس
ياسين : نوضي من الفشوش طلبت ليك بيتزا
انا سمعت بيتزا تحلو عينيا و وقفت مشى الوجع
ياسين:😂😂 يالاه كنتي مريضة زيدي قدامي
زينب شادة طرف في هاد اليد و طرف في اليد الاخرى و كتاكل و تبنن
ياسين:😂😂 برهوشة غير بشويا غادي توحل ليك
زينب كتنضغ: وا متدويش معايا مغاديش توحل ليا
ياسين: واخا الالة هاهو ساكت
تعشينا و كل واحد دخل لبيتو ينعس صراحة عجبني اهتمام ياسين و قررت نسامحو على الصباح ومننتاقمش 😇
بعد مرور أسبوع
دازت سيمانة و انا وياسين علاقتنا عادية كتلاقاو في الشركة كنديرو راسنا مكنعرفوش بعضياتنا و في الدار كيجمعنا العشا و حديثنا كلو على الخدمة وخا بعد المرات كنقلبوها صباط 😊
داك النهار يالاه خارجة من الشركة يالاه غادي نركب في ببوشتي لقيت الرويضة مفشوشة 😢 و خرجت باش نشد طاكسي حتى وقف عليا ياسين
ياسين : مالكي واقفة هنا فين ببوشتك
زينب: منسمحش ليك تقول عليها ببوشة انا الوحيدة اللي عندي الحق
ياسين: 😂 دابا فيناهي
زينب: تفشات ليها الرويضة😭😭
ياسين: رانا قلت ليك برهوشة كتبكي على الرويضة طلعي طلعي
ركبت حداه و قلت
زينب: إلى انا برهوشة نتا متعجرف
ياسين: دابا سكتينا غادية للدار
زينب: لا ياك قلت ليك دارنا عارضين علينا
ياسين: بففففف نسيت مع الخدمة عقلي ممعاياش
زينب: وي عارفة محمقك المشروع ديال الألمان و لكن الى بقيتي هاكدا غادي تمرض
ياسين: اممم خايفة عليا
زينب: ها شتي اش قلت ليك ها هما علامات المرض بداو كيبانو فيك
وصلنا للدار يالاه غادية نحل الباب و هو يوفقني ياسين
ياسين: زعما عادي إلى دخلنا بايدينا خاويين
انا عجبني الحال و قلت
زينب: وا غير زيد راه الباتول هادي و الله وماجبتي ليها التقدية من السوق مع الصباح لا فرحات ليك بشي حاجة
ياسين: 😂😂😂 علام دخلي دخلي
حليت الباب دخلت كنغوت وا الباتول فيا الجوع جات ماما عنقاتني
ماما: الله على كبيدتي توحشتك خليتي الدار خاوية
زينب: اححححح الباتول معرفتكش و نتي ضريفة
ماما: اوا الله يحرق طواسلك جاية بعجاجتك غا لي بغا يدير معاك الصواب بحالك بحال باك
زينب: اوا ها الباتول لي كنعرف بيني صباغتك
سلمات ماما على ياسين و دخلنا جلسنا في الصالون نتسناو الحاج العربي يجي جا طرت عنقتو و بست ايديه
بابا: عمارة الدار جات
زينب: يخليك ليا أودي الحاج أما مرتك راه قربلاتها معايا قدام الباب
ماما: زيدي شويا نجري عليك و نخلي غير ولدي ياسين
ياسين: ربي يخليك الحاجة
دخل بابا سلم على ياسين و جلسنا جابت ماما العشاء تعشينا كنهضرو و ياسين مرة مرة كيجاوب بابا سلينا و جمعت طبلة و غسلت الماعن و جيت للصالون قلت
زينب: سيادنا السلام و عليكم صافي الكرش شبعات
ماما: جايباك عندنا غير الماكلة الهيشة
زينب: ماكلتك لا تقاوم الباتول
بابا: جلسي يا هاد البنت راه والله لا مشيتو في هاد الليل باتو معانا و الصباح سيرو
انا في خاطري الله يا لعربي لاش لحلوف
مالقينا مانديرو طلعنا لبيتي
دخل ياسين كيتمنظر و انا مشيت نجيب ليه بيجامة من عند بابا جبتها حطيتها ليه
ياسين: كنتي زوينة فاش كنتي صغيرة و كتبان فيك البراءة
زينب: منديش عليك عارفة راسي قرطاسة
ياسين: تبا لتواضعك شحال كان عندك هنا
زينب: 8 سنين دوز تنعس
ياسين: عندك فكرة اننا غادي نعسو بجوج في بيتك
انا عاد سرات معايا وقلت
زينب: أو من بعد
ياسين: مكاينش فوتوي علاش تنعسي الغزالة غادي تنعسي في الأرض و لا حدايا فوق الناموسية
زينب: لا هادي لا ديك نتا لي غادي تنعس في الأرض هادي راه ناموسيتي سنين و انا كنعس عليها و الله لا كانت ليك
بقينا مني منك حتى نطق ياسين بصوت عيان و ابتسامة
ياسين: صافي صافي غادي نعس في الأرض معنديش الطاقة باش نضارب معاك
فرشت ليه و نعس لكن مكانش الغطا بزاف و كان البرد حسيت بيه غادي يلعقها و لكن مقدرتش نقول ليه طلع فوق الناموسية
أصبحنا وأصبح الملك لله فقنا فطرنا و ودعنا واليديا و خرجنا في اتجاه الشركة حتى قربنا و طلبت من ياسين يحطني قبل من الشركة و هو مبغاش دبر راسو دخلنا و استأنفت العمل داز النهار عادي خرجت قلت نطلع نشوف المتعجرف واش كاين نمشي معاه حيت باقي مصاوبت ببوشتي ملقيتوش خرجت شديت طاكسي وصلت للدار طلعت بان ليا بيت ياسين فيه شويا ديال الضوء مموالفاش ليه يجي بكري دخلت لبيتي لبست بيجامتي و خرجت باش نصاوب العشا قلت نشوف ياسين واش يبغي ياكل شي حاجة حليت الباب بان ليا ناعس و الوراق مشتتين حداه غريبة قربت حداه لقيتو سخون ووجهو احمر و كيترعد تخلعت
نوضتو بزز دخلتو عمرت البينوار بالماء بارد حيدت ليه التريكو لي لابس و جلستو في البينوار و خرجت نجيب ليه ملابس داخلية و سروال و حطيت ليه فوطة و قلت
زينب: ياسين عافاك وكد معايا خليك شويا في الما و خرج و حاول تلبس حوايجك هاهما حطيتهم ليك
ياسين: و لبسيهم ليا نتي اش كتديري
زينب: اوا الله يمسخني انا لي دايرة فيك راسي
ياسين: هه صافي غير خرجي
خرجت جبدت ليه تريكو سخون خرج و عاونتو يلبسو و ديتو لبلاصتو لبستو تقاشر فيهم الما و الخل غطيتو مزيان خليتوا ينعس و خرجت نصاوب الصوبة رجعت لقيتو باقي ناعس
زينب: ياسين نوض تاكل شويا باش تاخد دوا
ياسين: مقادش عليه خليني نعس راه غدا عندي الخدمة
زينب: ههههه مقدرتش نخاصم عليك حيت حتى فحالك في جميع حالاتي كنفكر في الخدمة و لكن نوض تهز تاكل راه خاصك تشرب الدوا
ناض وكلتو بزز عطيتو الدوا و رجع نعس جمعت هادوك الوراق لقيتهم ديال الألمان ديتهم للمكتب و جلست نراجع فيهم شي ساعة و رجعت نطل عليه لقيت الحرارة باقا مرتفعة هبطت جبت الماء و الثلج و فوطة و بديت ندير ليه كمادات على راسو و هو ناعس و كيهتهت
ياسين: بوكاهونتاستي متبقايش طلقي شعرك طلقيه غير قدامي وواخا تعرفي الحقيقة متخلينيش
زينب:😂😂😂😂😂😂😂 لا كان خاصني نصورك فيديو ياسين العلوي المتعجرف بشحمه و لحمه مزعوط في الرسوم واااااااع كرشي مبقيتش قادة نحبس وينو شحال كتبان كيوت و نتا مريض " كنلعب في شعرو"
أصبحنا وأصبح الملك لله فقت و لقيت راسي فوق ناموسية ياسين و هو داخل للدريسينغ رووم كيلبس حوايجو نضت قافزة وقفت قدامو
زينب: ياسين حماقيتي لا شفتك كتلبس فين غادي
ياسين: صباح الخير رجعي نعسي شويا باقي الحال
زينب: وا فين غادي راك باقي مريض
ياسين: عندي خدمة ضرورية نتي عارفة الاجتماع ديال الألمان غدا
زينب: و هاد الخدمة ماشي ممكن تخدمها هنا
ياسين: ممكن و لكن خاصني مساعدة
زينب: انا نعاونك غير خليك هنا
ياسين: اممم راني قلت ليك كتخافي عليا
زينب: صافي كنضن بريتي سير للخدمة بسلامة
ياسين: 😂😂 برهوشة فين الوراق لي كانو هنا
زينب: راه حطيتهم في المكتب نهبط نصاوب الفطور
هبطت صاوبت الفطور جا ياسين فطرنا و جلسنا نناقشو المشروع
ياسين: بفففف عييت معارفش اشنو كيدور في راس الألمان و زيد هاد الشركة المنافسة معرفتش منين خرجات كنا 3 و لينا 4 كيفاش حتى دخلات و في وقت زعما تقدر تلحق مشروعها ممرتاحش ليها
زينب: اجي اشنو قلتي ليا سميتها هاد الشركة
ياسين: the black
زينب: هاد السمية فايتة سمعتها فشي بلاصة
هزيت تيليفوني بالزربة كنقلب على l conversation مع علي و انا نخرج عيني
زينب: لا ميمكنش
ياسين: اشنو لي ميمكنش
زينب: هاد كان خدام فيها علي و خرج لأنهم مكانوش خدامين قانونيا
ياسين: كيفاش شرحي ليا كتر
زينب: هما مكيعتامدوش على مشاريعهم و المهندسين كيخليوهم مجرد ديكور و سمية لمشاريع كيتنسبو ليهم ماشي ديالهم داكشي لي خلا علي يخرج من تما
ياسين: و منين كيجيبو المشاريع
زينب: كيشفرو مشاريع المنافسين ديالهم بطريقة ذكية و يقدموها هما الأولين باش المنافس يتصدم و مايبقى عندو ميدير
ياسين: و لكن شكون غادي يعطيهم مشروعنا
زينب: حنا باقي معرفناش واش حنا المستهدفين ولى شركة اخرى و لكن هما راه مكيهمهم لا مشروع لا والو كيهموهم غير لفلوس بعدما كيربحو المنافسة كيبيعو المشروع بمهنديسو لشركة اخرى او كيكونو أعداء كيخلصوهم غير باش يضيعو مجهود الشركة
ياسين: هادو راه خاصهم الحبس كيفاش ساكتين عليهم
زينب: لأنهم مكيديروش شي حاجة لي ماشي قانونية و كيتحركو بطريقة ذكية
ياسين: لنفترض انه حنا هما المستهدفين شكون عندو مصلحة يضرنا
زينب: ياسين اكيد عارف اشناهي مجموعة شركات العلوي أكبر شركة في البلاد و حتى خارجه انا مفهمتش علاش الألمان علاش مختاروش نيشان و مدامهم دارو منافسة فاكيد اي واحد غادي يبغي يعرف مشروعكم و غادي تكونو اول المستهدفين و زيد شركة بحجمكم ميمكنش ميكونش عندها أعداء
ياسين: و في نظرك اشنو الحل
زينب: شكون شاف المشروع من غيرك
ياسين : حتى واحد كنت البارح غادي نصيفطو للمهندس و لكن مرضت
زينب: اوكي فيها خير دابا متصايفط حتى حاجة و المراجعة خليه يراجعو قبل ربع ساعه من الاجتماع غدا و مريضنا معندو باس و هكدا نكونو قطعنا الشك باليقين
ياسين: اممم مراتي الذكية
انا غير قال ديك مراتي مركت و رجعت مود التبرهيش و ضربتو بمخدة و عاودني وبقينا مني منك دقة فيه و عشرة فيا حتى طيحني و جا فوقي هاديك اللقطة ديال المسلسلات
زينب: غزيت فيك نتا لي كتعافر معايا وبالنسبة لهاد ل position لي معاجبنيش ستدوم طويلا ولا كيفاش
زاد هبط حتال حدا وذني و قال
ياسين: انا عاجباني
و هز عينيه تفيكساو مع عيني و قلبي كيضرب بجهد و صدري كيطلع و يهبط وليت حمرا و كنترعد من الداخل و هو كيقرب سر سر سر صونا تيليفون اووووووف الحمد لله سير الي صونيتي بغيت ليك الرضا انقدتني من المنكر ناض ياسين جاوب
ياسين: الو
السكرتيرة: موسيو العلوي المهندس كيقول انه باقي لحد الان متوصلش بالمشروع
ياسين: وي عارف قوليه حتال غدا و غادي يكون عندو الوقت الكافي فين يراجعو قبل الاجتماع
السكرتيرة: داكوغ موسيو
قطع ياسين و كنسمع صوتو كيغوت عليا اشمن وجه نشوف فيه دابا لا لا لا لا لا منخرجش حتى دخل عليا
ياسين: امالكي
زينب: مماليش اش بغيتي
ياسين: لبسي حوايجك يالاه نتغداو برا
انا سمعت الماكلة ضحكت حتال الضرسة الآخرة و نضت كنجري من بلاصتي
ياسين خارج كيضحك : راه كنقوليك برهوشة
لبست حوايجي و خرجنا توجهنا لواحد المطعم حدا البحر كلينا و حلقمت ياسين باش نهبطو للبحر ومشينا
في مكان آخر
المهندس: الو موسيو
الشخص: امدرا اشنو درتو
المهندس: والو موسيو العلوي مصيفطتش ليا المشروع و قال ليا حتال غدا و نقدر نراجعو قدامو
الشخص بالغوات: كيفااااااش اش هاد الق........ صدق مطور و لكن ميمكنش هاد المشروع يكون ديالو ميمكنش سمعني غادي تعلم the black ينسحبو من الاجتماع و نتا دير راسك مريض طيح من الدروج تهرس دير كسيدة مكيهمنيش المهم تخلي موسيو العلوي بشانو و مرشانو يدخل للاجتماع بوحدو
المهندس: اوكي موسيو
نرجعو عند زينب و ياسين لي قلبوها صباط و داخلين للدار
زينب: و نتا مالك كرشي هادي
ياسين: غاتذخلي قدامي و لا غادي نشقلبك من البالكون واش من نيتك ضريتي نص كيلو ديال الكلاص بوحدك و بغا تزيديك و زايداها باغية تشري السقاطة معدة هاديك و لا بوبيل
زينب: ماشي سوقك المتعجرف السقرام
وطلعت لبيتي كنصوط و نضرب رجلي مع الأرض و ردخت الباب على الجهد حتى كنسمع ياسين من برا
ياسين: هرسيه حتى نجي نهرس ليك الايدين و الرجلين
بففففففف المتعجرف لاخر ضروري يخسرها خرجنا ضحكنا و لعبنا و جا حتال الآخر و حيد ليا ولادي 🍨🍭🍫
عند ياسين لي داخل لبيتو كيضحك
ياسين: والله الى البرهوشة قالت ليك باغية تضرب كيلو ديال الكلاص و تزيد عليه الشكلاط و الفانيد كتقلب على اللفاعي ماشي غير الحناش اودي لي يشوفها كيفاش كتحول قدام الخدمة ميشوفكش قدام الكلاص 😂😂
داكشي لي درت خرجت لقيت ياسين كيتسناني لابس و مانتك و ريحتو سابقاه و خرجنا توجهنا لمكان الاجتماع
في قاعة الاجتماعات كاينين 2 شركات المنافسة لينا و الألمان و المفاجأة كان معاهم الشخص اللي تلاقيت معاه في مراكش شافني و سلم عليا بعينيه "ويلي عقل عليا" رديت ليه السلام و جلست عرفنا بلي شركة the black انساحبت من المنافسة إذن شكنا كان في محلو و شركتنا كانت هي المستهدفة بدى الاجتماع و كل واحد من الشركتين قدم مشروعو بإتقان جا دوري ونضت كنترعد خايفة شاف فيا ياسين كيطمئني بعينيه تفكرت كلامو في السيارة
" ياسين: متخافيش و إلى حسيتي براسك توترتي شوفي فيا نساي انه كاين شي واحد في القاعة اوكي انا معاك إلى شفتك توترتي نتدخل " خديت نفس و بديت بشرح المشروع بكل تقة و كنتفكر كيفاش كان ياسين البارح كيشرح ليا و متحمس كنزيد نتحمس حتى انا كل شويا يسولني واحد و انا كنجاوب و مرة مرة يتدخل ياسين سالينا الاجتماع حسيت براسي درت إنجاز لاني شفت الرضى في وجه الألمان قال أحد المستثمرين موجه كلامو لياسين
المستثمر: MR alaoui you're a perfect team Work
ياسين موحال واش سمعوا كان ساهي فيا: thank you
تافقو المستثمرين و خدينا المشروع انا كنت غادية نطير بالفرحة و استأذنت نمشي للحمام مشيت فرحانة وصلت غير سديت الباب و جلست ننقز و نعاود حسيت بفرحة اول مرة نحسها غسلت وجهي كنت باقية متوترة و تميت خارجة حتى تلاقيت بالكاوري ديال مراكش
الكاوري: طلاقينا مجددا مدام العلوي مبروك عليكم
زينب "اويلي نسيت هدا عارفني مزوجة بياسين لانو شافو معايا في مراكش و زيد سمعني كنقول سميتو في التيليفون " : وي صدفة زوينة الصراحة مي واش ممكن نطلب منك واحد الطلب
الكاوري: وي بطبيعة الحال تفضلي
زينب: القضية ديال أنني مدام العلوي بغيتها تبقى بيناتنا انا في الخدمة زينب زينب الناجي
مروان باستغراب: مروان الرامي مغربي %100 ما مخلط ما مدرر ( كيهضر و يدير ليا حركات بايديه )
انا تفكرت داكشي لي قلت لحنان مركت حبست الضحكة حتى عييت و طلقتها 😂😂😂😂😂
زينب: متشرفين موسيو الرامي
مروان: عندي شرط باش نقبل الطلب ديالك
زينب: وي تفضل
مروان و ماد ليا ايديه: اصدقاء
سلمت عليه و قلت
زينب: اصدقاء
مروان: اه و سميتي مروان ماشي موسيو الرامي 😉
في هاد الاتناء كان ياسين كيقلب عليا شافني شادة لحديث و فرحانة و تم جاي في اتجاهنا معصب
ياسين😡😡: مدام زينب إلى ساليتي الضحك ممكن نمشيو
مروان: مبروك العمل موسيو العلوي
ياسين: الله يبارك فيك موسيو الرامي نتمناو نكونو قد المسؤولية زينب مشينا
جرني من ايدي و خرجنا في اتجاه السيارة
في مكان آخر
الشخص معصب😡😡: كيفااااااش خدا المشروع لا ميمكنش
السكرتيرة: تهدن ا موسيو
الشخص: متقوليش ليا تهدن كيفااااااش دار ليها زعما العلوي المتكبر ناض و قدم مشروعو بنفسو
السكريترة: لا ا موسيو جاتنا معلومات انه دخلات معاه شي مهندسة معانا في الشركة
الشخص: شكون هاد الق...... صيفطي ليا ملفها و قطع
عند زينب
طلعنا لطوموبيل و انا كنفكر في هاد المتعجرف لي حدايا كيفاش كيتغير ميجازو بحال الليل و النهار زعما راه ربحنا منافسة قدها قداش خاصو على الأقل يشكرني متعجرف تفكرت المهندس و الشركة لي نساحبات و قررت نهضر معاه
زينب: فاش كتفكر
ياسين: بزااااف ديال الحوايج كان عندك الصح كنا حنا المستهدفين
زينب: اوا اش ناوي
ياسين: معرفتش نبدى بعدا بداك المهندس
زينب: مكنضنش المهندس يوصلك لشي حاجة حدو يعطيك سمية ديال the black
ياسين: اشنو بان ليك ننبش موراهم زعما
زينب: هما شركة معروفة بالسرية التامة للعملاء دياولها بفففف كون كان غير علي مزال خدام تما يقدر يعاونا
ياسين: دابا نتي بلاما تشغلي بالك انا غادي نتكفل بيهم و لكن داك المهندس خاصني نتفاهم معاه
زينب: من الأحسن تجري عليه و صافي باش ميكبرش الموضوع و يكترو الإشاعات أن موظفين الشركة ماشي كفئ
ياسين تبسم: اوكي يكون خير ان شاء الله 😊
وصلنا للشركة و دخلت لقسمي سولوني كيفاش حتى دخلت بلاصة المهندس لآخر اخترعت ليهم قصة من نسج خيالي و كملت خدمتي و خرجت شويا بكري حيت في الليل كاين احتفال
صفقة زواج من متعجرف الجزء الثالث
محتوى القصة
التنقل بين الأجزاء