قصة زوجي الملتحي

.....:هههههه شوفي شوفي هاديك لي داخلة 

.......:اففففف والله ا غيتة ايلا عيقتي من قبيلة ونتي حاضية الناس واش جينا هنا نشوفو العرض ولا نبرككو فالناس

غيتة:وااا شحال فيك اصحبتي هاد العرض ديال الديفيلي انا راه طلعلي فراسي كنحس براسي مبقيتش حاملة شي حاجة سميتها التصاميم دابا ا ميساء بيني و بينك هاد الدومين درتيه بخاطرك ولا حيت مماك كانت باغاك تكوني مصممة

ميساء:هههن بليدة بجوج ا حبيبة متنسايش بلي فاش كنت صغيرة كنت انا وماما الله ارحمها متابعين الموضة وهدشي لي خلاني نبغيها ونحقق امنية ماما 

غيتة:اوا راك تا دابا مزالة صغيرة 24 عام راه والو

ميساء:احياني العمر دغيا كيطير شوفي ماما و بابا مشاو فعز شبابهم كاعما شبعت منهم(عينيها عمرو دموع)اهىء

غيتة:ميساء صافي احبيبة عاد كنا كنضحكو اش وصلنا لهدشي واش 3 سنين فاتت مبغيتيش تنساي موتهم العمر تسالا وديك الحادثة كانت السبب وا صافي راه غنتقلق منك مسحي دموعك قبل ميتنفخو عينيك راه ايلا شافتك ماما هاكا والله تا ناكل قتلة بسبابك كتحس براسي بلي انا لي بنت ختها ونتي بنتها......ليلى لوليتا

ميساء:هه خالتي غير كتشفق عليا ولا يمكن كتحس بالمسؤولية من بعد موت ختها

غيتة:هيييه ناري و تسمعك منعاودش ليك

ميساء:هههه ضحكتيني الله امسخك شششت صافي هاوما غيبداو

غيتة:هايا ساكتة

سكتو البنات و تابعو عرض الديفيلي لي كان مخصص للقفطان المغربي...بقاو حالين فمهم فالقفاطن اولا نقولو غير ميساء حيت الانسة غيتة مقابلة غير هادي طويلة و ضعيفة وهادي قصيرة و مطبزة تا عصبات ميساء وهي تليعها بقرصة من دكشي دخلاتها سوق راسها

#على_لسان_البطلة_ميساء:

داز العرض كامل وانا ظاهريا كنبان مركزة مع التصاميم المعروضة ولكن كنت مرفوعة تفكرت والديا وتفكرت الحادث لي سرقهم مني جرحي تفتح مرة خرا كيف عرفتو فعمري 24 سنة ولكن كنحس براسي عندة 100 عام هازة هموم الدنيا فوق ضهري مع انني معنديش مشاكيل ولكن انك تكون بلا سند فهاد الحياة اصعب شيء و بالنسبة ليا اكبر هم خصوصا انني كنحس براسي عبىء على خالتي لي جابتني وسكناتني فدارها و حاسباني بنتها ومكتخلب مدير على قبلي ولكن هدشي كلو كنساه ملي كنشوف راجلها وتنحس بيه مباغينيش نكون فديك الدار..كنحس براسي غير مرغوبة هو صراحة عمرو قال شي حاجة ولا سمعتو قال شي حاجة ولكن مجرد احساس خصوصا انه رجل متدين وكلشي عندو بقوانين الدخول و الخروج بالحساب و فاش نكونو ضايرين بالطبلة ممنوع الهضرة ولا الضحك وممنوع الصوت العالي فالدار اولا الضحك كيف كيسميه هو القهقهة هدشي مولفتوش فدارنا واخا 3 سنين وانا عايشة معاهم مزال مولفتش هاد القانون كنحس براسي مسجونة كنت فدارنا بحال الفراشة صوتي و الضحك ديالي ديما فالدار وكلو بسباب ماما و بابا لي كانو بالنسبة ليا الدنيا و ما فيها ولكن فاش خلاوني كنحس راسي بلا فائدة و معندي قيمة واخا خالتي ممخلياش من جهدها ولكن انا والو كنحس بيها غير كتشفق عليا..فيقني من سهوتي تصفيقات الجمهور و تصفيراتهم عليت عيني لقيتهم علنو على المصصم الفائز فهاد العرض بحكم انهم كانو منضمين مسابقة احسن مصمم لسنة 2017 

غيتة:وااو دكشي كان واعر واخا العارضات مسلوتين كون لبست انا دكشي كون واااا تشهرت بفففف 

ميساء:الصمت

غيتة:وااا العمالة كنهضر معاك

ميساء:غيتة هنينا صافي سمعتك نوضي يالاه فحالنا

غيتة:ولكن راه مزال كاين احتفال بالمصمم لي ربح

ميساء(هزيت صاكي ووقفت):الا بغيتي بقاي انا غادة...

ميساء(هزيت صاكي ووقفت):الا بغيتي بقاي انا غادة نمشي غيتة:اففف ديما مخسرة لينا الليلة زيدي تحركي تمينا خارجين و غيتة غادية وتتنكر هاد البنت شحال تتهضر ههه ولكن تنحماق عليها ختي الصغيرة لي معنديش واخا حنا قد قد فالعمر ولكن هي كنحسها طفولية وشفافة لي فقلبها على لسانها...بقينا غاديين وانا كنزرب تا دخلت فشي واحد هزيت عيني باش نعتادر لقيتو واحد خينا الطولة بلا فايدة باينة فيه سكران حيت كلو كيتمايل وشاد واحد المونيكة بجنبو عكرها كاع مجلخ باينة كانو لاعبين خخخ غيتة(فودني):شوفي شوفي فمها بنت الحرام كانت تتبوسو باينة شوفي قميجتو جيهة عنقو ميساء(حابسة الضحكة بزز):شتت هنينا(ضرت عند دوك جوج)سمحوليا كنعتادر الشاب(دايخ كيسد عينيه ويحلهم):ههههه عاااادي هدشي ديييما كيوقع و خصوووصا معايا ديما كديروها سبة مي هااانية عارف راسي تتيز ههههههه ياك احبيبة البنت(كتر منو وتتهضر بتقالة):امممم بزاااف وخصوصا(حطات يديها علة عنقو)دوك الشنيفات امممم بداو تيتباوسو قدامنا وانا و غيتة مبرقين عينينا فيهم عمرنا شفنها هاد المنضر الصراحة ههه تا التلفازة مكنشوفوهش فيها حيت اصلا قليل فين تنتفرجو غير بالتخبية ولا فاش متيكونش راجل خالتي بقينا حاضيينهم تا فقت براسي وجريت ديك البهلة انا جاراها وهي ضايرة جيهتهم غيتة:ويلي ويلي مبقاوش يحشمو ميساء:ههه زيدي المصيبة زيدي خليها هي تا تحمل و تلقا راسها ام عاد تعرف راسها اش دارت غيتة(تقادات معايا فالمشية):و مالها غتحمل من بوسة نتي راك هبيلة الحمل خاصو تطبيق و تكتيك دكشي كبير عليك ميساء(شديتها من شعرها):اهاه ومنين عرفتي وشنو هاد التكتيك بالسلامة فين سمعتي هدشي غيتة:اي وا طلقي طلقي اصحبتي راه ديك النهار بالصدفة قريت واحد الموضوع فالفيس ميساء(طلقتها):اممم الفيس اوا حربش وديريها والله تا خبارك يجيبوها لولين و شتي هادي لي جالس شابع فيها بوسان راه غير تدواز ليلة غيتة:اهاه وباش عرفتيها معرفتي يكون تيبغيها ميساء:هبيلة كون كان كيبغيها ميخليهاش تسكر هادي 1 و تانيا ميبوسهاش بديك الطريقة فالزنقة و اصلا ميتجرأش عليها وميحطش عليها يديه فهمتي غير يشبع منها غيسوسها ونهار يبغي يتزوج غيقلب على وحدة بنت دارهم لي تلعبو مزيان وتفدي فيه القديم وجديد غيتة:اممممم عندك خبرة هاه ميساء:مكلخة را حنا ف 2017 احبيبة و غير لي بغات تغابى عزي راسك وديري القيمة لراسك باش يديروهالك لخرين اما غير الا خليتي واحد مد عليك يديه عمرو يشوف فيك بشوفة زوينة غتكوني بالنسبة ليه بحالك بحال بنات الزنقة غيتة:واخا منديرش معاه علاقة احم احم ؟ ميساء:واخا مديريش معاه علاقة ههه راه غير يحط عليك يديه المرة لولة غيولفها و واحد النهار غتلقاي راسك ام عازبة و داركم مبريين منك تبقاي دوري فالزناقي يضربوك الحيوط وها حياتك ضاعت غيتة:الله احفض الله استر ناري ناري اش وصلنا لهاد الهضرة والله ما يحط عليا ولد المرا يديه لما كان راجلي ميساء(بابتسامة):هكاك الله ارضي عليك وطلقينا راه 10 دالليل هادي غيتة:وا ماشي مشكل اصحبتي نسيتي بلي بابا مسافر ميساء:منسيتش ولكن خالتي خلاتنا نجيو بلا مندموها باش مرة خرا الا بغينا نحضرو لشي عرض تخلينا غيتة(كتشير لطاكسي):واخا الالة هاوا طاكسي ركبنا فالطاكسي وشدينا الطريق للدار وانا و غيتة كتهضرو ونضحكو غيتة هي الوحيدة لي كتخليني فرحانة وكتنسيني فهمي بحماقها وهضرتها العجيبة من بعد مدة وصلنا للدار نزلنا من الطاكسي خلصناه ومشينا كنجريو حلينا الباب كان الضلام فالدار غيتة(بصوت خافت):امكن ماما نعسات ميساء:ولكن هي ممولفاش تنعس دابا غيتة(غوتات):وااااااااااع ميساء:اويلي مالك غتفيقي جيران غيتة(تتنعت بصبعها ورايا):شو..شوفي ضرت بشوية كيبانلي خيال واقف مقابل معانا ركابيا فشلو تا تشعل الضو شوية ما كنت غنطلقها فسروالي كيسحابلي شي جن ولكن لاهما حن ولا راحل خالتي اهىء اهىء غيتة:بابا ياك مسافر اهىء اهىء(بدات تتبكي) ميساء:عمي حن عبد الرحمان(راجل خالتي):بيتكم دابا و الصباح عندي معاكم هضرة غيتة(شافت فيا معجبة):ناااري قفرناها عبد الرحمان:تحركوووووو....

عبد الرحمان:تحركوووووووو من قداامي طلعنا كنجريو للبيت وحنا كنترعدو دخلت وتبعاتني غيتة سدات للباب وجلسنا فوق الناموسية كنشوفو فبعضياتنا وكنلهتو بحالا كانو تابعينا الشفارة غيتة:شفتيه شفتيه ميساء:كرهتيني فالشوفان شفتو اختي ناااري خلعني غيتة:انا راه كنت على شوية انسخف ليكم تما تا ماما معرت فيناهيا ميساء:كوراه غوت عليها ناري مسكينة سمعات الهضرة بسبابنا رحمة(خالتي دخلات علينا بشوية وسدات الباب بلا حس):ياكو هدشي علاش تافقت معاكم درتكوم بنات كبار بعقلكم وتقت فيكم غيتة:وا ماما راه كيف سالا العرض جينا رحمة:واخا عليك ابنت الحرام نتي حسابك هو لخر داك الزيف لي دايرة فوق راسك صافي حيدتيه ياك لقيتو السيبة ونتي ا ميساء مولات العقل ياك ديك الكسوة المقزبة قتليك متلبسيهاش ضحكتو عليا ياكو وخليتوه يسمعني الهضرة ميساء:سمحيليا ا خالتي رحمة:تا كلمة نعسو دابا و صباح طلبو الله يعاونكم واخا انا خالعني سكاتو معرفتو اش ناوي نعسو دابا و غدا عاد الهضرة(خرجات) غيتة:ناري هاد بابا اعلم الله لاياش تيخطط شتي كون مكانت فراسو شي حاجة كوراه مزال كيسمعنا الهضرة ميساء(عيني عمرو دموع):باينة غيجري عليا اهىء اهىء باسنة هادي هي لخرة ليا اصلا هو متيحملنيش غيتة:اويلي على يجري عليك واش حماقيتي بابا دايرك بحال بنتو مكيفرقش بيني وبينك كيف تيغوت عليك تيغوت عليا مزال نتي راه داير معاك مزيان مفارضش عليك الحجاب و اللبس الطويل شوفي انا ميساء:داك الحجاب لي تتهضري عليه انا مكرهتوش وتنفكر فيه كل نهار ونتي كطرطاي عليه انا بغيتو يديرليك النقاب غيتة:ياك اختي سري انا لي جالسة دايرة فيك راسي نوضي نعسو وعولي غدا غنسمعو خل ودنينا ميساء:محال يجيني النعاس غيتة:غي نوضي نوضي حنا كنطيحو كي البكرات ميساء:هضري على راسك عبد الرحمان(من بيتو):واش غتنعسو و تسكتونا ولا لا كي سمعنا صوتو سقلنا نضت بدلت حويجي ودخلت للطواليط غسلت سناني و غيتة نفس الشيء تخشينا فراشنا و طفيت الضو بقيت تنشوف فالسقف حتى داني النعاس اما غيتة كي طفيت الضو نعسات مسمعتش حسها ■اصبح الصبح و الملك لله■ فقت الصباح على خالتي تتفيقنا رحمة:نوضو نوضو خلاص غيتة(تتكسل):امم وا ماما مزال الحال رحمة:تهزي را 10 هادي وزيدون باباك كيساينكم ميساء(قفزت من بلاصتي):نااري اليوم يجري عليا رحمة:كيفاش يجري عليك تاني ميساء اش هاد الهضرة ميساء:لا ا خالتي زعما رحمة(قاطعاتني):مزيان هاد المدة كاملة حاسبانا برانيين ياك ابنتي الله اكتر خيرك تمات غادة باش تخرج وانا نشدها ووقفت مقابلة معاها ميساء:راه مقصدتش اخالتي ولكن انا راه ماشي بنتو باش يبقى مبرزط راسو معايا يعني مملزومش مني وهادي هي الحقيقة رحمة:عرفتي الا سمع هاد الهضرة والله ن ما غيعجبو الحال راك بنتنا ونتي و غيتة ماكاين فرق بيناتكم المهم سربيو راسكم وهبطو تفطرو وسيرو عندو راه فالصالة كيقرا القرآن وصاني فاش تفطرو تمشيو عندو ميساء:واخا ا خالتي خرجات خالتي من البيت ومشيت انا للدوش غسلت وجهي و غسلت سناني وخرجت لبست توني مستور وجمعت شعري كعكة الفوق وسبقت غيتة هبطت مشيت للكوزينة لقيت خالتي كتحطلنا الفطور جلست تناكل وانا تنفكر فعمي شنو ايقولنا تا جات غيتة لبسات تا هي بحالي حيت غنجلسو قدام عمي وهو مكيعجبوش نكونو لابسين شي لبس مهواش من بعد ما فطرنا نضنا مشينا للصالة لقيناه جالس كيقرا القرآن بصوت عالي و زوين كيخليك تحس بالراحة ونتا كتسمعو...حس بينا وهو يحبس عبد الرحمان:صدق الله العظيم...

عبد الرحمان:صدق الله العظيم غيتة:بابا حنا البارح عبد الرحمان(قاطعها):البارح مبغيتش نتكلم فيه غيتة:هم؟! شافت فيا و شفت فيها مستغربين الا مكانش الموضوع ديال البارح شنو غيكون بففف الله الطف بينا هاد النهار و صافي...بقينا كنسابنوه يهضر وهو كيشوف فينا مرة فيا مرة فغيتة وحنا مرة مرة نشوفو فبعضياتنا تا حن فينا عاد نطق عبد الرحمان:ميساء ميساء:نعام ا عمي عبد الرحمان:سمعي ابنتي اش غنقول وديريه حلقة فودنيك نتي و غيتة راكم بناتي ومعندي فرق بينك وبينها الفرق لي كاين هو نتي عندي منك جوج مسؤوليات لولة نحافض عليك ونحميك و التانية انك امانة عندي امانة من المرحوم و المرحومة وهاد المسؤولية بالنسبة ليا كبيرة ربي رزقني ببنت وحدة ولكن عاود زادني بنت تانية تربية البنات صعيبة صعيب تربي البنت وتكبرها وتحافض عليها حتى توصلها ليد راجلها ودارها تبني حياتها وتستقر وتبني عائلة وتأسس كيان خاص بيها هدشي اكيد غيجيكم تخربيق حيت مهازين لا مسؤولية لا والو ولكن نهار تحطو فنفس الموقف غتفمرو كلامي دكشي علاش جا الوقت لي تحملو فيه المسؤولية وتعرفو بحقها غيتة:كيفاش ا بابا عبد الرحمان:بنتي نتوما كبرتو و وصل الوقت لي تبنيو فيه حياتكم مع ناس جداد يعني انا قررت غنزوجكم ميساء و غيتة:شنووووو عبد الرحمان:كيف سمعتو وحمدو الله انكم مغتفارقوش لاحقاش ازواجكم ان شاء الله خوت ولاد الحاج عيسى صاحبي ولاد واعيين ومتقفين مغيخصكم معاهم حتى خير غيتة:ولكن ا بابا عبد الرحمان(شاف فيها شوفة نارية خلاتنا نحدرو عينينا للارض):انا مجيتش هنا نتشاور معاك ولا معاها انا علمتكم لانني اصلا عطيت للراجل الكلمة و دابا انا قلت لي عندي سيرو لبيتكم تا تجي رحمة تعلمكم بوقت الخطوبة الرسمية نضت انا وغيتة مصدومين من هاد القرار وخصوصا انا كنحس براسي بحالا معرت فين هو معندوش الحق يقرر قرار مصيري بحال هادا هادي حياتي وانا لي نختار الانسان لي نتزوج بيه ونكمل معاه حياتي ماشي هو دخلنا للبيت وانا دايخة معارفة مندير جلست تا كنسمع غيتة كدندن ضرت شفت فيها لقيتها واقفة قدام المراية وتتصلي على النبي غيتة:صلااااااااة و سلاااااااام علىىى رسول الله ويتي ويتي عليا(تتقرص حناكها)سعدات هاد المزغوب بيا جابليه الله نقرة فين يغبر نحاسو اشمن نحاس قولي صدى شوفي الزين(تتلعب بشعرها)و التباتة ناااري حسدتو فهاد اللحظة بقيت كنشوف فهاد المخلوقة لي قدامي منين جاية مجردة من الاحاسيس دغيا كتعيش اللحظة لي شافها قبيلة مصدومة ميقولش دابا هي لي دايرا ليا فيها عروسة هنا ميساء:اربي من اينا كوكب جاية نتي غيتة:اكيد كوكب زمردة هو لي فيه التيتيز خخخخخ ميساء:نااااري كتبانليا فيك شي نتفة آآ لالة العروسة واش تيقتي راسك غيتة:ومالي منتيق راسي عروسة و بسم الله ما شاء الله عليا نعست وفقت لقيت عريس كامل مكمول الزين و لاطاي كلشي كاين(خخخ تحية للستاتي) ميساء:واش تتهضري من نيتك فرحانة بهاد الزواج!!ياك من ديما تتقولي انك متزوجيش بواحد متتبغيهش غيتة:اه هدشي لي كنت تنقول ولكن كيقولك انا اريد و انت تريد و انا يا عبدي افعل ما اريد يعني كلشي ديال الله كلشي بالمكتاب شكون بحالنا ما تعدبنا ما تكرفسنا بالحب نقدرو من بعد ما نتعاشرو معاهم نبغيوهم ميساء:ويلا مبغيناهمش غيتة:متكونيش متشاءمة اصحبتي(سكتات) ميساء:مالكي سكتي غيتة:سمعي سمعي ميساء:مسمعت والو شنو غيتة:شي هدية دايزة ميساء:لا نتي هربليك الفريخ ناضت تتجري حلات السرجم وهو يتسمه الصوت فعلا دايزة شي هدية حلات علينا السراجم وبدات تنقز وتصفق معاهم من تم وهوما يصليو على النبي وهي كتزغرت ليهم الصراحة منضرها قتلني بالضحك نضت وقفت حداها كنطل شحال كيعجبني هاد الجو وخصوصا كنشوف الناس كلشي فرحان معاهم بحال هاد الهبيلة غيتة:داها و داها الدراري الصغار فالزنقة:والله ما خلاها غيتة:داتو و داتو الدراري:والله ما خلاتو غيتة:يويويووووووووووووووي رحمة(من برا):غيتااااااااااااا غيتة(دفعاتني وسدات السراجم):ناري ماما ميساء:ههههههههههههنه اففففف كرشي وااا مي ههههههههه منين نتي منين غيتة:نطلعو للسطح؟ ميساء:ههههههههههههههههههه رحمة(دخلات علينا):بنت الحرام واش باغا باك يصفيهالك صوتك كيتسمع كتر من الطبالة و الغياطة تهزو جمعو الروينة باش نوجدو الناس غدا جايين...

رحمة(دخلات علينا):بنت الحراك واش باغا باك يصفيهالك صوتك كيتسمع كتر من الطبالة ة الغياطة تهزو جمعو الروينة باش نوجدو الناس غدا جايين عندنا(خرجات) غيتة:ياااي غدا غنشوف راجلي ميساء(شيرت عليها بصندالة):شوية ديري الولاد الله امسخك غيتة:يخخ على معقدة ميساء:غيتااا غيتة:غيتة غيتة واش غير انا لي كاينة فهاد الدار انا غنطلع للسطح نشوف الهدية عندمن خرجات غيتة من البيت وتكيت انا فوق الناموسية كنفكر فكلامها واخا هبيلة ولكن عندها ما تقول درتها فيد الله ونضت هبطت عند خالتي نعاونها تا جات غيتة جايبة الخبار بلي الهدية عند جيران فالزنقة لي ورانا بقينا من حاجة لحاجة وجدات خالتي الغدا تغدينا وطلعنا للبيت طحنا نعسنا تال العصر نضنا تاني وجدنا مع خالتي شي حلاوي هي تتورينا شنو ندبرو وحنا غير كنكورو تم تا جرات علينا ملقينا منديرو طلعنا جلسنا فالسطح مجمعين ميساء:اففف هاد العطلة طولات غيتة:اااه حنا كنقراو نسيت شوفي من الخير انني غنتزوج باش منكملش فديك الرسة ديال المصممين ميساء:كيفاش واش غتحبسي غيتة:اه غنولي ربة بيت ميساء:عطيك الدل قريتي باش تزوجي وتربي البز معندك هدف معندك رغبة انك تحققي ذاتك وتكون عندك شخصية مستقلة غيتة:شوفي ا حبيبة انا راسي ماشي ديال القراية نتي عارفة مزيان بلي انا كان الحلم ديالي ندير المسرح ونولي ممتلة مشهورة ولكن بابا مبغاش وباش منبقاش جالسة درت نفس الشعبة لي ختاريتي منها نتوانسو ومنها نعمر وقتي ميساء:امممم اوا على خاطرك غيتة:اكيد شوفي شوفي ميساء:ناري بديتي تاني انا غنهبط فحالي غيتة:وا اجي ا صحبتي ميساء:لااااا هبطت لتحت طليت على خالتي لقيتها سالات وتتستف الحلوى فالسطيلات كملنا وجات غيتة تتجري عرفت عمي جا ههه غير من ديك الهبطة فعلا صونا حلات ليه جلسنا مجموعين شوية هوما تيهضرو على الزواج و المستقبل و الصبر وانا حاضية غيتة لي مركزة معاهم ضحكاتني حيت اول مرة نشوفها مركزة وتتصنت فالقراية عمرها دارتها عبد الرحمان:الصبر ابنتي الصبر هو اساس اي علاقة زوجية صبري وخلي املك فالله كبير وخليك.ديما مولات العقل صوني دارك وراجلك متهجريش دارك غضبي فبيتك و اسراركم تبقى بينك وبينو ميعرفها حد باش ميستاغلها حد و حد ميدخل فيكم غيتة:بابا فاش خدامين رحمة:حشمي عبد الرحمان:خليها ا رحمة من حقها تعرف هوما ابنتي عندهم شركة معروفة هنا فالرباط شركة تقريبا ديال التصاميم بحال دكشي لي كتقراو(شفت فيه وتحلو عينيا وليت انا مركزة معاه)كيصممو اللباس الخاص بالمحجبات غيتة:وشحال فعمرهم عبد الرحمان:عماد 29 عام و عثمان 30 غيتة:امممم وشكون راجلي انا عماد ولا عثمان عبد الرحمان مزال معرفناشحيت باقيين متشاوفتو غدا ان شاء الله وتعرفي شكون راجلك و الله اعينو عليك ابنتي و على هبالك رحمة حطيلنا العشا باش نشرب الدوا و نعس ناضت خالتي وتبعتها للكوزينة رحمة:شفتي جنية مبقاتش تحشم ولكن بيني وبينك كان فيا الفضول ودكشي لي كنت باغا نسول عليه سولاتو هي هههه ميساء:ههه تا انا ا خالتي بنتك زعمات ولكن عمي الحمد لله كان دايرليها الخاطر رحمة:اييه ابنتي وعلى حنا شحال عندنا منكم غتخويو علينا الدار البارح بفمو قالي البنات غيخليو بلاصتهم غيتة(جات عندنا):اش تتوشوشو رحمة:والو هزي الخبز ديه غيتة:هايا غادة حطينا العشا تعشينا وجمعنا الطبلة وكل واحد مشا لبيتو معرفتش علاش حاسة براسي مرتاحة وممخلوعاش مع انني حياتي تقررات و تحسمات انني غنتزوج انسان مكنعرفو وعمري شفتو معارفة لا طبعو ولا شخصيتو كيف دايرة افكار كتيرة كتجول فبالي وخاطري حاولت نتخلص منها ونعس...

●اصبح الصبح و الملك لله● فقت اليوم راسي اول مرة بلا متفيقني خالتي ههه هزيت تيليفوني شفت الساعة لقيتها 8:30 العجب ضرت شفت فغيتة لقيتها مفرشخة كالعادة نضت دخل للدوش غسلت وجهي وقضيت حاجتي وخرجت بدلت حويجي وهبطت لتحت لقيت السقيل خالتي مزالة مفاقت دخلت للكوزينة عمرت اتاي وجبدت المسمن سخنتو و حطيت شي حليوات من دكشي لي وجدات خالتي فالطبلة وجلست باش نفطر تا وقفات عليا خالتي رحمة:ديك الحلوى للناس لاش جبدتيها ميساء:وا خالتي تشهيتها البارح مدقتهاش رحمة:اوا تا يجيو الناس ودوقيها معاهم ميساء:وا خالتي عافاك رحمة:اخر مرة تهزي لا نتي لا ديك الحلوفة(هزات السطيلة)وهاد الحلوى غنغبرها كنعرفكم نتوما اجي بعدا اش فيقك دابا ميساء:والو ضرباتني الفيقة ونضت رحمة:مزيان نطلع نفيق لاخرا خاصكم تمشيو للحمام رميساء:بلاش اخالتي ندوشو غير فالدار رحمة:لا الحمام حسن باش يطلع عليكم السر مشات خالتي تفيق غيتة وانا بقيت جالسة تا هبطو بجوج فطرنا بتلاتة حيت عمي كيخرج يصلي الفجر ومن تم كيمشي للمحل ديالو حيت هو تاجر كيبيع التواب...سالينا فطورنا ونضنا جمعنا حويجنا ومشينا للحمام انا وغيتة والطريق كاملة لي لقاتها تقولها تخطبت تا وصلنا للحمام الطيابة:اهلا اهلا بلاليات البنات غيتة:خالتي زهرة كيدايرة زهرة الطيابة:لاباس ابنتي ميسا كيدايرة ميساء{ففف مكنحملش تقولي ميسا ديما لايحة ديك الهمزة}:لاباس الحمد لله حيدنا حويجنا درناهم فالصاك وهزينا السطولة ودخلنا للبيت الوسطاني ما سخون ما بارد لقينا شي بنات الحومة كاينين تما بقاو كيشوفو فينا ويلوحو الهضرة البنت1:يختي اففف حسيت براسي تخنقت دغيا تغممات علينا الدنيا البنت2:تا انا بحالك والله بففف شي حاجة دخلات علينا غيتة(نقزات):اييه احبيبة هدوك غير الملائكة دخلو وشياطنكم معحبهم الحال البنت3:غيتة لاباس غيتة:لااااباس ونتي البنت3:الحمد لله احبيبة بقات غيتة ودوك البنات كيشوفو فبعضياتهم ويضربو المعاني وانا بديت فالغسيل يمكن الخروج لي مكيخليناش عمي نخرجو ونعاشرو جيران هو لي خلا بنات الحومة يكرهونا وخصوصا انا مزال غيتة تتقول السلام اما انا مكنزعمش على بنادم خصوصا الا مكنعرفوش دازت مدة وحنا فالحمام غسلنا وحكينا تا قربنا نطيرو الجلدة شللنا حالتنا وخرجنا وخلينا البنات تما شادين النميمة جينا وراهم وخرجنا قبل منهم بفف معرت اش كيصنعو رجعنا للدار لقينا خالتي جمعات الدنيا ردات الدار كتشعل بقات تتزغرت فاش شافتنا وسيفطاتنا للبيت نيشان لقيناها حاطلنا جوج قفاطن هزيناهم وبدينا كنضحكو انا هزيت قفطان بيض ايفازي و سفيفة رقيقة و غيتة قفطان غوز تقريبا نفس الفصالة وقفنا قدام المراية وحنا كنشوفو فبعضياتنا تا دخلات عندنا خالتي رحمة(عينيها مغرغرين):عجبوكم غيتة:اه ا ماما زوينين بزااف امتى وجدتيهم لينا رحمة(جات عندي):موجدتش ابنتي كنت مخبياهم ليكم هدا ا ميساء ديال مماك لبساتو نهار حا يخطبها باباك(شافت فغيتة)وهداك ا غيتة ديالي تا انا لبستو فخطوبتي ديما كنت كنتمنى انا وختي نشوفوكم لابسينهم وهاوا جا النهار لي نفرح فيه بيكم ونشوفكم عريسات الحمد لله ميساء:اهىء اهىء متصوريش اخالتي شحال تمنيت ماما تكون معايا هاد النهار حاسة براسي محتاجاها بزاف اهىء اهىء رحمة(عنقاتني):اكيد هي معاك ابنتي وفرحانة ليك وانا مكتحسبينيش مماك ميساء(عنقتها):ربي لي عالم بمعزتك اخالتي غيتة:وااااع غتبكيوني..

وصل الوقت فاش غيجيو الناس وكان كلشي واجد حنا لبسنا وجلسنا فالبيت و خالتي وعمي لتحت كيساينو الناس غيتة:واش حيت زوينة فولاري مقاد ؟ ميساء:جيتي غزالة سرعتي المكياج فين تعلمتي تصاوبيه غيتة:الله اخلف على الفيسبوك هههه تانتي جيتي فنة سعداتك طالقة شعرك عرفتي التاج كيجاكو المكياج مع انه خفيف ولكن جاك زوين حيت مكديريهش بزااف ميساء:فخبارك حاسة براسي معيقة بهاد التاج نحيدو حسن غيتة:والله يا مك وتحيديه تا نحيد ليك راسك واش من قبيلة وانا نقاد من هنا و من هنا وتجي ضربي ليا كلشي ف الزيرو ميساء:افففف منك بقينا جالسين مرة نتناكرو مرة نتجمعو تا سمعنا الصونيط حسيت بقلبي غيسكت معرفتش علاش واش خلعة ولا فرحة غيتة:ناري جاو غنخرج نطل ميساء:خرجي خرجي عالله تلاقاي بعمي فالباب يصدقك محشمك قدام زوج المستقبل غيتة:فمك لاحسو كلب ميساء:هي ايلا تبتي للارض بقينا جالسين شحال تا جات خالتي عيطاتلينا باش نزلو هبطنا معاها دخلنا للكوزينة انا هزيت طبسيل د الحلوى و غيتة هزات بلاطو د العصير و مشينا للصالون سمعنا الهضرة شوية دخلت حادرة راسي وحاسة بحناكي غيطرطقو لقينا السلام و ردو علينا عبد الرحمان:جلسو ابنياتي حدايا الحاج عيسى:تبارك الله ما شاء الله الله احجبهم ربيتي وعرفتي اش تربي ا سي عبد الرحمان عبد الرحمان:الحمد لله كلو بفضل الله وتاهوما كانو نعم البنين عمرهوم خيبو ضني فيهم ولا خلاو شي واحد ينعت فيا بالخايب الحاج عيسى:الله يا ودي الكتاب باين من عنوانو و الحشمة لي فيهم تبارك الله اولا الالة فاطنة(مراتو) فاطنة:لا لا الحق يتقال جوهرات عندك فالدار الحاج و غيوليو فداري بحال بنياتي مرزقنيش الله بالبنات وهوما غيكونو بناتي عبد الرحمان:ان شاء الله لهلا يحاشمنا الحاج عيسى:اوا اسيادنا خير البر عاجله بالحق نعتادر اول خاجة على عثمان راه مقدرش يجي بحكم الخدمة راك عارف هو و عماد لي هازين الحمل وخاص ضروري واحد فيهم يكون وخصوصا اليوم كاينة شي خدمة ضرورية عبد الرحمان:ماشي مشكل وجهك كافي وحضورك مشرفنا فاطنة(تتهمس فودن ولدها):فين لي عجباتك اولدي عماد:الواليدة نتي عارفاني باغي بنت سي الحاج غيتة راه فايت هضرنا فهدشي فاطنة:ههه واخا واخا(ضارت عند راجلها)غيتة لعماد و ميساء لعثمان الحاج عيسى:مرحبا سي عبد الرحمان اه بعدا فين لالة رحمة تحي تحضرنا عبد الرحمان:رحمة ا رحمة خلي دكشي و اجي رحمة(جات عندنا):هاني سمحوليا عبد الرحمان:جلسي ا رحمة الحاج عيسى:سي عبد الرحمان نتا عارفني مزيان حنا عشرة ديال العمر ولادي كبرو قدام عينيك وعارفهم مزيان مكاين لاش نشكرهم ليك و ولادي كبرتهم ووصل وقت يديرو ديورهم ويكونو اسرتهم وانا و فاطنة ملقيناش ما حسن من بنتك غيتة و ميساء بنت سي مصطفى يكونو كنايني وماوات حفادي اش قلتي عبد الرحمان:اسيديانا منزيدك غير مبروك وبناتي تربية يدي وانا و مصطفى كنا خوت دكشي علاش بنتو هي بنتي ومصلاحتها كتهمني بحال غيتة وكتر وانا منطمن عليهم الا مع عماد و عثمان رجال ديال الصح و المعقول اولا البنات ميساء و غيتة(حدرو عينيهم):الصمت فاطنة:ههه السكوت علامة الرضا الحاج عيسى:نقراو الفاتحة....

الحاج عيسى:نقراو الفاتحة هزينا كفوفنا نقراو الفاتحة وانا غصة خانقاني و الدموع على طرف عيني واش حتى لهاد الدرجة انا منحوسة ههه تخطبت بلا منشوف هاد الانسان لي غنكمل معاه حياتي تربطت بيه وانا جاهلة علية كل التفاصيل شكلو؛طبعو؛شخصيتو كلشي...شفت فغيتة وشفت الفرحة لي فعينيها و النظرات لي كتبادل بينها وبين عماد لي منزلش عينو عليها مكرهتش تا انا نعيش هاد اللحظة فخطوبتي ولكن كنضن معنديش الحق فهاد الحياة معندي حق فوالو من غير انني نرضى بالوضع لي انا فيه ونسكت كالعادة دازت الليلة وانا ساهية مركزتش معاهم شنو تيقولو وكلما توجهات ليا شي كلمة كنرد بالابتسامة فقط الشيء لي فسروه بانني حشمانة... داز الوقت وتعشينا وودعنا الناس على اساس ان الاسبوع الماجي يكون العقد و تركاب الخواتم اكيد مكينش شي حاجة سميتها عرس و انما فقط الطلبة وقراءة القرآن فالدار وصافي طلعت للبيت انا وغيتة بدلنا علينا ونزلنا عاونا خالتي فجميع تعاونا وسالينا دغيا وكل واحد رجع لبيتو..وقفت قدام المراية وانا كنشوف فراسي شنو ناقصني حتى نحس بنقص فأهم ليلة فحياتي غيتة(تتشوف فيا):ميساء مالكي من صباح ونتي ساكتة مموالفاش ليك ميساء(مشيت جلست حداها):غنسولك و جاوبيني بصراحة غيتة(باستغراب):سولي ميساء:من 3 سنين هادي و دخلت لحياتكم وللدار واش حياتكم تبدلات؟يعني واش تبدلات للاسوأ ولا للاحسن غيتة:اش تتخربقي ميساء:غيتة تنحس براسي منحوسة و بزاااف والديا ماتو فنهار واحد وخلاوني(ابتسامة سخرية)حتى الانساء لي تقرر زواجي منو تخطبت ليه بلا ميحضر واش ممنحقيش دوز خطوبتي عادي بحالي بحال كاع البنات غيتة:اويلي اش هاد الهضرة تاني ميساء وليتي هاد الايام حساسة بزااف و زيدون علاش تتربطي شي بشي السيد عندو خدمتو وهو الكبير اكيد مدارهاش بلعاني وشفتي عمي عيسى كيف اعتادر حيدي منك هاد الوساويس راك غتمرضي راسك هاكا حاولي تعيشي حياتك(شدات يدي)ميساء نتي راك ختي حبيبتي مجيتك لهاد الدار دخلات لينا الفرحة نتي راك عارفة بابا كيف داير قبل متجي راه كنت مكنعتبش هاد للبيت غير للماكلة ونرجع نسد عليا ونتي من نهار جيتي وانا وياك طالعين هابطين فالدروج واخا بلى فايدة ههه المهم دايرين الحس ميساء:ههه قولي الصداع اجي بعدا اش دوك النظرات بينك وبين عماد قبيلة لي شافكم يقول بيناتكم شب حاجة ولا تتعرفو بعضياتكم قبل غيتة:ههه عماد الالة شفتو مرة وحدة عند بابا فالمحل كنت مشيت نجيب شي فلوس لماما اوا لقيتو تما وبقا تيشوف فيا احح على دوك العوينات حب من اول نظرة ههه شفتي الطولة و التكلضيمة كيف دايرة و الضحيكة يا سلام ميساء:ههه حمقة اجي معمرك شفتي خوه غيتة:عثمان لا غير سامعة بيه من بابا واحد النهار كان كيشكرو وكيقول لماما كون كان عندي ولد كون تمنيتو يخرج بحال عثمان اخلاق و خلق ميساء:امممم دابا نشوفو محال يحضر تا نهار العقد يسني باه بلاصتو غيتة:ناري بغيتي دخلي ضرة عل خالتي فاطنة خههههه ميساء:كلشي ممكن ههههه رحمة(دخلات علينا):شششت واش مكتقاداوش راه عبد الرحمان ناعس غيتة:واخا الالة رحمة سمحيلينا صدعنا ليك زمانك رحمة:الله اقلل حياك نعسو وطفيو الضو عليا خلاص راه 2د الليل هادي واه خرجات خالتي وخلاتنا تنضحكو طفبنا الضو وتخشينا فالفراش وبقينا مجمعين كنوشوشو تا طلع النهار عاد نعسنا...

★ نهار جديد فقت تنتكسل ونتجبد حاسة براسي جنابي طابو عليا تسرحت حتى جات يدي بلاصة غيتة لقيتها خاوية حليت عيني فعلا مكايناش هزيت تيليفوني باش نشوف الساعة بانلي ميساج من غيتة<<حبيبتي صباح الخير انا و ماما خرجنا مع بابا نقضيو شي شغل تا نجيو ونقولك موااح>>حطيت التيلي من يدي وعاودت تكسلت اممم يا سلام اول مرة نفيق مع 11 خالتي ديما مصبحة عليا مع 10 نضت مشيت للدوش قضيت حاجتي و غسلت وجي وخرجت كنت غنبدل حويجي ولكن مدام عمي مكاينش مكاين لاش كنت لابسة كسيوة د النعاسفوق الركبة شوية ونص كم فالغوز وفيها هيلو كيتي خخخ مشيت للمراية طلقت شعري ودرت بوندو فالغوز ولبست بانطوفتي وهبطت للكوزينة لقيت الفطور فوق الطبلة هممم يالاه جلست باش ناكل وانا نسمع السونيط نضت نسيت راسي اش لابسة ومشيت حليت الباب😳ما هذا صباح التتيز لقيت واحد الشاب اش غنقول ما شاء الله طول اييه و عرض ايييه والنور على وجهو يااااي واللحية لي كتحمقني وااو لابس سروال دجين وتيشورت بيض و صبادري فالبيض بقيت نبحلق فيه تا فيقني بصوتو شفت فيه بانلي حادر عينيه الشاب:السلام و عليكم ميساء:وعليكم السلام اش حب الخاطر الشاب(مزال حادر عينيه للارض):واش كاين سي عبد الرحمان مشيت عندو للمحل ملقيتوش ميساء:ل يالاه جيت نجاوبو وهو يوقف عمي و خالتي و غيتة لي بقات تتشوف فالولد وتشوف فيا وتفرنس اما عمي طلعني وهبطني عاد عقت براسي وتفكرت شنو لابسة ضربتها بجرية للبيت وغيتة و خالتي ورايا ميساء:ناري ناري ناري ويلي على حالة نسيت راسي اليوم عمي يطير ليا راسي صافي هاد لخرة ليا غيتة:هههههههههه ناري شتي شحال زوين رحمة:كوني تحشمي المجحومة ميساء اش وقفك مع السيد بهاد اللباس ميساء:والله اخالتي تا نسيت راسي اش لابسة يالاه حيت نفطر وهو يجي ونضت حليت مرديتش البال رحمة:هايهاي على بالسلامة يالاه فقتي مزيان تبارك الله غيتة:خائنة شي يفيق مع النبوري شي يصبح خامر رحمة:شوفو متخرجوش من هنا تا يمشي السيد راه دخل هو و عبد الرحمان للصالة انا نمشي نرد الغدا يطيب مشات خالتي وبقيت انا غادة حاية فالبيت وكنفكر فيه فاش كان كيهضر معايا وعينيه فالارض عاد عرفت علاش الدري حشم وانا محشمتش ميساء:اففف شنو يكون كيقول عليا دابا غيتة:التتيز ياك ههههه ميساء:غيتة الله اخليك لما هنيني غيتة:هايا ساكتة بالحق غير فهاد الموضوع عارفاني منقدرش نسكت اجي تشوفي شنو تقدينا هههه كنوجدو لزواحنا خليتك ناعسة حيت وجودك بحال عدمو كون مشيتي معانا كون ما خديتي والو ولكن شوفي والله تا تهليت فيك من دو بياس تال صباغة الضفار ميساء:من بعد من بعد(جبدت بيجامة مستورة لبستها) غيتة:لاش بدلتي راه باقي السيد ممشا تا يمشي وبدلي عبد الرحمان(دخل عندنا):ميساء ميساء:نعام ا عمي عبد الرحمان:هبطي ابنتي هضري مع خطيبك ميساء(مصدومة داك التتيز خطيبي انا):ها؟؟ عبد الرحمان:واش مكتسمعيش ابنتي نزلي عند خطيبك بغا يهضر معاك ميساء:وا..واخا واخا ا عمي عبد الرحمان:يالله الله ارضي عليك(خرج) ضرت عند غيتة لقيتها مصدومة شفنا فبعضياتنا ونطقنا فنفس الوقت غيتة و ميساء؛عثمااان غيتة:ناري والله ما طاحتليا فالبال هههههههههه زهقاتليا ميساء:دابا شنو ندير لا لا هدشي فشكل غيتة:بسم الله عليك ابنتي توكضي وهبطي هضري مع السيد هبطي هاكا راك غزالة(تدفعني)سيري سيري دغيا هبطت للتحت وانا حاسة براسي كنترعد كلي معرفتش علاش ولكن هاد السيد شي حاجة جدباتني ليه ميمكنش بهاد السرعة هادي ننجادب ليه ممكن يكون اعجاب مبدئيا الشكل مقبول...مقبول؟والله مكنحشم دكشي كامل ومقبول ااففف...وصلت للصالة دخلت كان جالس وعمي مشفتش فيه كاع دغيا حدرت راسي ومشيت حدا عمي عبد الرحمان:بنتي ميساء ها عثمان خطيبك جا بغا يهضر معاك غنخليكم تهضرو على راحتكم انا غير هنا فالصالون الا حتاحيتو شي حاجة ولدي مرحبا بيك مرة خرا عثمان(بصوت رجولي):بارك الله وفيك ا عمي خرج عمي وبقيت انا وكحل العفطة الراس فالراس كنحس بقلبي كيضرب بجهد بحالا كنت تنجري داك الصمت زاد وترني بقينا تقريبا شي 10 دقايق هكاك حتى نطق هو ....

..حتى نطق هو عثمان:ميساء لاباس عليك ميساء{ياااه سميتي شحال زوينة من فمو احم ويلي يا ميساء مالك وليتي مبهللة}:لاباس الحمد لله ونتا عثمان:الحمد لله هاد الساعة اول حاجة انا جيت باش نعتادر على البارح حيت محضرتش لخطوبتنا ولكن الخدمة كانت شي حاجة ضرورية ميمكنش تأجل سمحيليا ميساء(عليت عيني وشفت فيه):ماشي مشكل وخصوصا ملي جيتي تال هنا باش تعتادر عثمان:كنضن ا ميساء عارفة عليا كلشي ويلا كانت شي خاجة باغا تعرفيها مرحبا ميساء{اففف مالو تيهضر بهاد الجدية ومغوبش}:لا لا مكاين والو حاليا عثمان:مزيان انا عندي شي شروك الا قبلتي بيهم ا ميساء ميساء(باستغراب):شرووط!! عثمان:اه هو الصراحة ماشي شرط كتر ما هو طلب انا بغيتك ديري الحجاب بما انك غتكوني مرتي يعني راك غتكوني شرفي وعرضي متاخديش هاد الطلب بشي نضرة خايبة انا بغيتك تعرفي بلي الزواج تبادل اراء يعني الا معجباتكش فيا شي حاجة قولي الا قدرت نبدلها غنبدلها ويلا مقدرتش كنواعدك انني غندير لي فجهدي زيادة على انك غتكوني مرتاحة معايا فدارك غنسكنو فدارنا بوخدنا واخا والديا قالولكم امكن بلي غنسكنو معاهم ولكن انا عندي داري وكنبغي نكون على راحتي حتى مراتي نفس الشيء مبغيها تكون مرتاحة تلبس لي بغات دير لي بغات تفيق وقت ما بغات حريتها الشخصية منبغيهاش تكون مقيدة ولا انها مجرد احساس بأنها فدارها ومعندهاش حق دير شحال من حاجة اش قلتي الصراحة من بعد هدشي لي قال كلامو ريحني وبزااف كنت رافدة الهم لقضية السكن مع دارهم الحمد لله ملي جات منو من خلال كلامو انسان متفهم وواعي كيهضر بعقلانية وطريقتو زوينة بزااف زيادة على الحجاب انا معنديش فيه مشكل كنت كنفكر نديرو وربي جاب السبب جاوبتو وانا مطمأنة ومرتاحة لكل كلمة قالها ميساء:موافقة و الحجاب من غدا نديرو عثمان(بنفس الجدية مكاين لا ابتسامة لا والو):مزيان كنضن تافقنا خليتليك الراحة هاد الساعة ناض باش يمشي ووقفت كنشوف فيه حتى بانلي وقف وهو يضور عندي ورجع تال عندي وقف قدامي وليت بحال شي بخوشة قدام طولتو و الدليل انه حنا لعندي وهمس فودني الشيء لي وترني بزااف عثمان:نسيت حاجة خرا عافاك متبقايش تحلي الباب ونتي بداك اللباس تفوووووووو فكرني ولد الحرام خرج وخلاني كنتغدد طلعت للفوق كنتنتر دخلت للبيت وخبطت الباب غيتة:هرسيه اختي ميساء:نااااري شحال حاس براسو غيتة:هههه اوا اختي بالسيف راه الزين و الطولة تبارك الله ما شاء الله عرفتي جيتو مع بعضياتكم والله هو حروفو كحلين وسميمر الرجوولة وااع مكيتشابهش هو وعماد معرفت علاش اجي اش قلتو ميساء:قالي ندير الحجاب غيتة:اممم حاحة متوقعة ونتي اصلا كنتي تتفكري فيه اذا مكينش مشكل ميساء:دكشي قتلو موافقة ة نزيدك غيتة:شنو ميساء:غنسكنو فدار بوحدنا غيتة:اوااااه كيفاش زعما غيفرقونا ولكن ماشي مشكل خالتي فاطنة باينة فيها ضريفة غنتوانس انا وياها ميساء:اففف غيتة:مالك تتسوطي علينا ميساء:فاش كان غادي قاليا متبقايش تحلي الباب ونتي بداك الباس غيتة:ههههه الحكام من دابا اجي باش حسيتي فاش شفتيه عجبك؟ ميساء(نطقت بدون شعور):هو غير عجبني وسكتي غيتة:ههههههههههههههههه الله الله سريعة الاحساس صافي طحتي ميساء(شيرت عليها بمخدة):طيحي فبير غيتة:الله انجيني اهتي باقا باغا نتزوج وندير وليداتي ونربيهم ونزوجهم ونشوف حفادي ميساء:و تزوجيهم غيتة:اييه علاش لا وا اجي اجي تشوفي شنو شريت ليا وليك ناضت غيتة وبدات توريني دكشي لي شرات مسخوطة ما خلات تا حاجة مشراتهاش لي شوميز دو نوي غير المعريين واحد ينسيك فلاخر بقيت كنشوف فدكشي الصراحة عجبني الحال وبديت تنحس براسي عروسة ههه بديت نتخير ونتعزل تا فرقنا دكشي وكل وحدة دات حويجها للبلاكار ديالها وهبطنا عند خالتي جمعنا معاها شوية تا وصل الغدا....

داز اسبوع فتوجاد خالتي و عمي ما خلاوش من جهدهم كلشي وحدوه لا من لباسنا انا و غيتة مفرقوش بيناتنا وحسسوني فعلا بلي انا وسط والديا...عثمان من ديك النهار مشفتوش حسيت براسي توحشتو بزااف بالحق ما بقا والو اليوم غنشوفو...انا دابا فالصالون انا و غيتة كنوجدو راسنا لليلة العمر ديالنا وكنتمنى انها دوز على خير وقررت باش نبرز بحجابي واخا العيالات بوحدهم و الرجال بوحدهم ولكن اكيد غنتلاقاو ملي نبغيو نعقدو غيتة:ميساء غديري لاصيغ؟ ميساء:اه ضروري ولكن لتحت لا منقدرش عليها غيتة:لا اصلا منديروهاش تم خايبة لديك البلاصة ميساء:اه بلاش نيت غيتة(للكوافورة)؛صافي اختي غير بداي لينا جات الكوافورة هي والبنت بي معاها وحدة شداتني انا ووحدة شدات غيتة بقاو ينتفو فينا تا طيبونا وبعد دازو لشي لاخر ماسالينا تا غفرلينا الله الدنوب و الحمد لله اننا بوحدنا فالصالون ممعانا حد بحكم ما عندنا لا عائلة لا والو تا عمي عبد الرحمان هو الوحيد لي عند والديه والله ارحمهم...بقينا جالسين من بعد ما لبسنا اللبسة لي غنبرزو بيها(البنات هاد التفاصيل منعرفش ليهم معنديش تجربة ههه نتزوج ونعرف😂)من بعد ما سالينا سمعنا صوت الطموبيلات وقفو قدام الصالون و الكلاكسون نزلات لينا الكوافورة الطرحة على وجهنا وخرجنا بانليا خطيبي واقف حدا طموبيلتو و عماد حتى هو و معاهم شي عيالات وبنات باينة من عائلتهم جا عندي عثمان قبطني من يدي وداني للطموبيل وحليا الباب القدام ركبت وتحنا عندي كيقاد ليا جلايلي وهو يهمس ليا فودني عثمان:ما شاء الله مشا وخلاني قلبي غيخرج من بلاصتو كلامو قليل ولا كتير كيدخل لقلبي بحال العسل وتنحس بيه بكلامو بحالا تنكون عطشانة وهو تيرويني الكل ركب وتاجهنا للدار لقينا البنية قدام دارنا كبيرة بزااف مكانش فراسي بلي كاينة شي بنية شفت فيه باستغراب وهو فهمني عثمان:نتوما العيالات كتبغيو تبقاو على خاطركم دكشي علاش وصيت الدراري يبنيو البنية على برا اححح ا قلبي واش سمعتوه هدا حرام واش بنادم هدا راه ملاك واش تال هاد الدرجة متفهم وعندو الخاطر كنحس براسي محظوظة بيه كيف وصلنا للدار حليا الباب عاوتاني ومدليا يديه شديتها ونزلت وبداو الزغاريت العيالات اكيد غير جيران بداو كيصليو على النبي ويزغرتو دخلنا لداخل وهو عثمان و عماد معانا تا وصلونا للبلاصة فين غنجلسو جلسنا وهزو الطرحة على وجهنا شفت فيه وجات عيني فعينو لقيتو داير ابتسامة على طرف فمو وحنا عليا باسليا راسي ونفس الشيء دار عماد وخرجو عاد دخلو العيالات وبداو يطبلو ويغنيو والبنات كيشطحو و شي وحدينات غير تيتعوجو وانا وغيتة كنشوفو فيهم ونضحكو وعلى مافهمت من غيتة بلي هادو من عائلة عثمان و عماد بنات خالاتو و عماتو و عمامو تبارك الله شحال عندهم دالبنات ولكن باينة فيهم بعكاكات كنهضر على دوك لي جالسين مستفين ومتحركوش غير تيشوفو ويدورو فعينيهم دازت الاجواء زوينة بزااف ووصل وقت العقد جات خالتي و خالتي فاطنة خرجونا من الصالة للصالون كان جالس تما عمي و عمي عيسى و عثمان و عماد و العدول جلسات غيتة و عماد هوما لولين سولهم العدول وسناو من بعد ما كان صداقهم واحد القدر ديال الفلوس حيت عمي رفض انه يطلب شي حاجة...من بعد جات نوبتي وجلست انا وعثمان نفس الشيء سولنا ونفس الشيء بالنسبة للصداق...سنينا وتعالات الزغاريت عنقاتني خالتي و خالتي فاطنة ومشيت بست لعمي يديه ونفس الشيء بالنسبة لعمي عيسى.....رجعنا للصالة فين جالسين الناس وجات النقاشة نقشاتلينا انا وغيتة كل وحدة والنقش لي اختارت....وصل وقت العشا وحطو للناس يتعشاو لا للرجال ولا للعيالات اما حنا طلعاتنا خالتي لببتنا باش نبقاو على راحتنا....

من بعد ما تعشينا رجعنا نزلنا لتحت ودخلو العرسان باش نتصورو جلس حدايا عثمان وحط يدو على كتفي معنقني واخا ممبتاسمش ومبايناش الضحكة ديالو ولكن فنفس الوقت ممغوبش ههه خليط هاد الانسان فشكل ونفس الشيء عماد لي جالس حدا غيتة وتيهضر ليها فودنيها وهي تتفرنس تصورنا بربعة بينا ومن بعد تصورنا كل تنائي بوحدو وتصورنا مع العائلة و آخر حاجة بقيت تنتصور انا وغيتة درنا الحماق وصل وقت الوداع حسيت بالدنوع فعينيا وانا كنشوف خالتي واقفة فالباب عينيها شلال وتتبكي تفكرت ماما وبديت نبكي وغيتة حتى هي تا جات عندنا خالتي عنقاتنا بجوج وكتوصي فينا وخالتي فاطنة هي لي تتجاوبها وطمنها اما حنا غير كنتنخصو من بعد جا عمي مسكين تا هو بكا اول مرة نشوف دموعو عنقني وباسليا راسي وهمس فودني عبد الرحمان:انا راضي عليك ابنتي الله افرحك متصوروش هاد الجملة شنو دارت فيا شفت فيه وتلاحيت عليه عنقتو بجهد وحتى هو حتى جاو عثمان و عماد كل واحد قبط عروستو تسالمتا مع باقي العائلة وخرجنا باش نركبو فالطموبيل انا وعثمان وهو يوقف دار عند خالتي فاطنة عثمان:اه الواليدة انا راه غنمشي لداري واخا فاطنة:كيفاش واش مغتمشيوش معانا للدار عماد:الواليدة خليه نتي عارفاه كيرتاح فدارو و زيدون هانا وغيتة غاديين معاكم ولا مكافيينش فاطنة(بضحكة صفرة):كافيين لي بغيتو حسيت بخالتي فاطنة بقا فيها الحال ولكن معجبنيش الحال حيت كيسحابلي واش هوما عارفين هدشي ماشي تال دابا ركبنا وشدينا الطريق بقيت ساكتة بلى منهضر حتى هضر هو عثمان:واش نتي بيخير ميساء:الحمد لله عثمان:الصمت بقيت ساكتة حتى عييت وانا نهضر لي ليها ليها ميساء:ممكن نسولك عثمان:اكيد شنو ميساء:واش عائلتك مكانوش عارفين بلي غنعيشو فدار بوحدنا عثمان:الصراحة لا حيت قلت انهم عارفيني كنبغي نبقى على راحتي الدار قليل فين كنمشي عندهم اغلبية كنجلس فداري يعني عادي راهم مولفين ميساء:اممم واخا عثمان:ها حنا وصلنا نزل عثمان وجا جيهتي حليا الباب نزلت طلعت عيني كنا قدام عمارة كبيرة هزيت راسي كنشوف حتى ضرني عنقي تا جا عثمان هاز باليزتي فيدو سد الطموبيل وشدني من يدي وبقا غادي بيا دخلنا وقفنا قدام لاسانسور وطلعنا للدار كان بابنا بوحدو فديك الطبقة يعني كل طبقة فيها شقة وحدة وفعلا تستاهل لان فاش حل الباب كانت الدار كبيرة بزاف لدرجة ان فيها جوج طبقات كانت مفرشة بطريقة زوينة عثمان:مرحبا بيك فدارك ميساء(بابتسامة):شكرا عثمان:الدار فرشتها قبل من الخطبة يعني الا معجباتكش شي حاجة غير قوليهالي ونديك تختاري لي يريحك ميساء:لا لا دوقك زوين بزاف عثمان:باقي مشفتي والو متحكميش(قبطني من يدي)اجي نوريك دارك باش تعرفي عليها جرني عثمان من يدي بحال شي بنيتة صغيرة يدخلني لهاد البيت ويديني لهادا وانا مديتها فوالو قد ما بقيت حاضياه هو ولكن لي فهمت ان الطبقة لي لتحت كلها صالونات وفيها كوزينة وحمام عاد طلعنا الفوق كانو 3د البيوت ديال النعاس جوج تقريبا قد قد و واحد كبير كان هو بيتنا دخلني ليه وبدا يوريني بلاصة الريسينغ و الدوش و الماريو فين ندير حويجي واي حاجة ممكن نحتاجها عجباتني الدار بزااف و عجباتني معاملتو كتر اكيد غتقولو باقي الحال باش نحكم ولكن الطمأنينة لي حاسة بيها هاد اللحظة مخلياني مرتااااااحة بزااف فيقني من شرودي صوت عثمان:ميساءهانتي خودي راحتك انا غنمشي نجيب ما ناكلو حيت الصراحة متعشيتش مزيان نتي فيك جوع؟ ميساء{الصراحة شبعانة ولكن ناكل مع راجلي ههه لا الصراحة نخاف نضيع}:اه عثمان:واخا خودي راحتك مغنتعطلش عليك....

عثمان:واخا خودي راحتك مغنتعطلش عليك ميساء:واخا خرج عثمان وبقيت متبعة ليه العين تا غبر وانا قلبي حاسة بيه غيسكت بالفرحة وبهاد المعاملة كنحس بيه حنين بزاف..نضت كنشوف البيت مزيان حيت محققتش فيه ههه من بعد مشيت هزيت باليزتي حليتها معرفت منلبس معرفتش واش هاد الزواج غيكون حقيقي وكامل ولا غتكون شي مفاجأة كتسناني درتها فيد الله هزيت شوميز فالبيض مع دوبياس ديالو فالبيض و مشبكين وهزيت الفوطة و التخربيق ديالي ودخلت للدوش دوشت مغسلتش شعري حيت مكاين لاش نضيعو دوشت دغيا وتوضيت عاد مشيت كاع الكريمات طليتهم لراسي الله اخلف على غيتة اما انا خلاتها هي كون مشيت كاعما ناخد هدشي ساليت ولبست دوبياس و شوميز فوق منهم وطلقت شعري وتقابلت مع المراية الصراحة عجبني راسي واخا حشمت من داك اللبس حيت كلو مفضوح خرجت من البيت دغيا هزيت العباية لبستها ودرت الزيف على راسي وهبطت للدار لتحت باش نشوفها تا سمعت التقرقيب فالكوزينة مشيت بشوية لقيت عثمان كيحط شي بلاستيكات فوق الطبلة شافني وهو يطلعني من رجلي تال راسي عثمان:ارتاحيتي شوية ميساء:اه الدوش ريحني عثمان:بصحتك اجي تاكلي ميساء:الا بغيتي سير دوش عاد ناكلو انا نتسناك عثمان:اممم واخا مشا عثمان ومشيت كنبقشش فالميكات لقيتو جايب شحال من حاجة بيتزا و الدجاج محمر و لي سوندويش ديال الكفتة وشي ساشيات فيهم الفريت بقيت غيى كنشوف واش غياكل هدشي كامل!!عاد الموناضة و الخبز بديت كنقاد دكشي فالطباسل وجلست كنتسناه حتى بانلي نازل وهاز الفوطة كينشف راسو كان لابس تيشورت كحل مزير عليه وسروال غري جاو معاه فنين الله الله على التيتيز ديالي بقيت حالة فيه فمي تا جا كحز الكرسي لي حدايا وحلس بجنبي عثمان:تعطلت عليك ميساء:لا اجي علاش جايب هدشي كامل عثمان:الصراحة معرفتش نتي شنو كيعجبك مسولتكش قبل منمشي دكشي علاش جبت هدشي لي عجبك كوليه ولي معحبكش خليه فالتلاجة ليا مغيضيعش ميساء:هه واخا بدينا كناكلو حسيت بالشهية تفتحاتليا بحالا معرت شحال مكليت ولكن محسيتش براسي حيت حاضياه غير هو كيفاش كياكل وكيفاش تيتحرك وهو مرة مرة كيحطليا ويقوليا كولي حتى ناض عثمان:الحمد لله ميساء:شبعتي عثمان:اه الحمد لله انا نغسل ونجي نعاونك تجمعي هدشي ميساء:لا معليش ماشي شي حاجة انا نجمع هدشي دغيا غير سير ارتاح عثمان:واخا مشا عثمان وضرت انا جمعت الطبلة مغسلت الميعنات فاش كلينا ودكشي لي شاط درتو فبواطات وحطيتو فالتلاجة ساليت وطلعت البيت مع دخلت لقيت...

..دخلت لقيت عثمان كيفرش الصلايات فالارض ولابس الفوقية كانت كحلة جاتو فناااااااا😍تشوكيت اللحية و الفوقية الله يا ربي كيجا واش هدا بصح راجلي ديالي بوحدي ههه كالعادة بقيت ساهية فيه تا فيقني صوتو عثمان:ميساء آجي موضية ياك ميساء:اه عثمان:نصليو جوج ركعات باش ربي يبارك لنا فهاد الزواج ياك ميساء:اه عثمان:واخا اجي مورايا مشيت موراه وقلبي تيضرب واحد الفرحة حسيت بيها فهاد اللحظة لا توصف واقفة موراه وهو متخشع وكيقيم الصلاة عمري تصورت انني ممكن نتزوج انسان بحالو حقيقة كان عندي حلم بحال اي بنت انني نبغي الانسان لي نتزوج بيه قبل ولكن لي مكتبو ليك الله هو لي غيكون حنا كنتمناو ولكن ربي راسملينا حياتنا حسن من لي كنتمناوها حنا...صليت ورا عثمان وانا لحمي مبورش عليا بطريقة تجويدو للآيات ولا صوتو الرجولي لي كلو رزانة و تبات كيحسسني بالامان التام مكنتش متوقعة ان زواجي التقليدي غيكون بهاد السهولة وهاد الشكل هدا كملنا الصلا وسلمنا وحمدت ربي على نعمة الزوج الصالح بينما عثمان ضار عندي وحط يدو على راسي وهو كيردد الدعاء وانا حاضية تقاسيم وجهو وشفايفو لي كيعطيو لكا حرف حقو و تغوبيشتو واخا ممعصبش يمكن طبع فيه انه يبقى هاكا واخا لحد الآن مشفتش ابتسامتو ولا ضحكتو ولكن اكيد قريب غنشوفها... عثمان:اللهم امين ميساء:امين عثمان(تقاد فالجلسة قبالتي):ميساء حنا دابا زوج و زوجة يعني من هنا للقدام علاقتنا ان شاء الله غتكون ابدية وانا عاهدت الله و والديك و والديا انني غنديرك فعينيا ونصونك ونحافض عليك ونكون ليك نعم الزوج عمرك تخصي من شي حاجة وعمرك تحشمي مني لي خصاتك طلبيها مني انا راجلك ونتي مرتي علاقتنا غتكون مبنية على الثقة و الاحترام نتي بنت زوينة و متخلقة انا مجيتش وقبلت انك تكوني زوجة ليا الا من بعد ما عرفت انك بنت الحاج عبد الرحمان البنت لي تتكون مع غيتة وتتكون ديما هادية و تابتة فمشيتها وشكلها كتبان مرزنة ميساء(معجبة):فايت شفتيني قبل عثمان:اه مرة كنت دايز من حدا داركم كنت جاي من المحل ديال عمك و المرة الثانية شفتك ونتي واقفة فالمحطة نتي و غيتة ميساء:و و عثمان:و شنو ميساء لي فبالك قوليه انا جلست معاك هاد الجلسة باش نحطو كلشي و اي سؤال ولا استفسار انا موجود ميساء:زعما قبلتي تزوج بيا واخا شفتيني وشفتي لبسي يعني نتا عثمان(قاطعني):انسان ملتزم ياك ميساء(درتلو اشارة براسي):اه عثمان:ملتزم اه ولكن ماشي متزمت كاين فرق و الانسان ممعصومش على الخطأ و مدام قبلت انك تكوني زوجة ليا الا وكانت عندي تقة انك انسانة طيبة و خلوقة و المظهر ماشي معيار كنعتامدو فأحكامي و اكبر دليل انني فاش اقتارحت عليك الحجاب كان جوابك واضح انك قابلة يعني نتي كانت عندك رغبة فيه اولا؟ ميساء:اه بصح عثمان:مزيان الالة باقي عندك شي سؤال آخر ميساء:اه واش معمرك فكرتي فالزواج من قبل يعني نتا 30 سنة غتكون كانت عندك تجربة عثمان:صدقيني الا قتليك لا عمرها كانت عندي لاحقاش كان اهتمامي هو الخدمة واخا الوالدة كانت ديما معايا بهاد الموضوع ولكن كنت ديما كنأجلو حتى للنهار لي وصل المكتاب وقرر ربي انني نتزوج ورزقني ببنيتة بحالك ميساء:بنيتة ههه عثمان:اكيد نتي دابا ماشي غير مراتي نتي مراتي و بنتي و ختي و امي اممم و حبيبتي ميساء(قلبي غيسكت):كيفاش....

ميساء:كيفاش عثمان(رسم ابتسامة على وجهو):من بعد وتعرفي ميساء(ساهية فابتسامتولي اخيرا شفتها و شحال كتحمق😍):الصمت عثمان:فين مشيتي ميساء:هم لا لا والو اممم بقا سؤال واحد و امكن طلب عثمان:لي هو؟ ميساء:واش ممكن نكمل قرايتي فمجال التصميم عثمان:اكيد علاش لا قرايتك مغنحرمكش منها ويلا بغيتي ممكن تخدمي معانا فشركتنا تكون عندك تجربة وفنفس الوقت نستافدو خبرتك ميساء:ولكن انا مزال معنديش الخبرة يعني عاد غنكون قدام التطبيق ونتوما معروفين عثمان:ماشي مشكل انا ديما معاك و اي حاجة معرفتيهاش غنعاونك فيها شحال بقالك باش تكملي ميساء:هدا عامي لخر عثمان:بالنجاح ان شاء الله (هزلي يدي و باسها)مستعدة؟ ميساء:لاياش؟! عثمان؛لحياتنا الزوجية انا ا ميساء جلستك دابا و هضرت معاك باش ترتاحي لا فدارك ولا فالهضرة معايا ميساء(جاوبت بزربة):لا انا ارتاحيت و بزااف ناض عثمان قرب لعندي وشدني من كتافي ووقفني مقابلة معاه بقيت كنشوف فيه وهو كذلك حتى حشمت وحدرت عيني حسيت بيدو كتقرب ناحيتي حيدلي الزيف على شعري وخلاه طاح فالارض وطلقلي شعري وودوز يدو على راسي وباسلي راسي ومن بعد(........) ★اصبح الصبح و الملك لله★ فقت صباح تنتكسل من بعد ليلة و اروع ليلة مع راجلي حبيبياه هاد الكلمة وليت كنحسها واخا مقلتهاش ولكن فعلا كنحس بلي وليت كنبغيه ايام قليلة باش عرفتو ولكن المعاملة الطيبة ديال غناتني على انني نشك او ندير الحذر ديالي منو بالعكس كلشي فيه زوين خلقو و اخلاق الحمد لله لي ربي رزقني بيه...ضرت جيهتو كان باقي ناعس شفت شوفة مطولة ومكنشبعش من الشوفة فيه وفشكلو لي كيجذبي ليه فكل لحظة من بعد مدة نضت من فراشي دخلت للدوش دوشت من بعد خرجت لبست بيجامة طويلة ومستورة وتقابلت مع المراية باش نشف شعري وانا نتفكر فاش جا عثمان اول مرة عندنا و شافني بديك البيجامة وشوف دابا شنو لابسة فداري ومع راجلي مشيت نيشان للبلاكار جبدت بيجامة حد الركبة وبلى كتاف فاللون ازرق بارد لبستها و نشفت شعري خليتو مطلوق ودرت قلم فوق عيني وغلوز غوز شفت فالمراية عجبني راسي عاد هبطت لتحت نوجد الفطور واخا باقة عيانة ولكن ماشي مشكل هبطت وقاديت كلشي فوق الطبلة بشوية عليا يالاه بغيت نطلع نفيق عثمان وهو يدخل للكوزينة شافني وطلعني وهبطني خفتو ميعجبوش لبسي ولا شي حاجة ولكن الابتسامة لي كنشوفها تاني مرة ريحاتني عثمان(جا عندي باسلي راسي):صباح الخير مراتي الغزالة علاش وجدتي الفطور كنت ناوي نخرجو نفطرو على برا.. 

....كنت ناوي نخرجو نفطرو على برا ميساء:معليش عثمان:واخا منضيعش فطور مراتي باين هدشي كيشهي ميساء:هه كديرليا الخاطر هدشي كلو كان فالتلاجة غير قاديت فالطبلة عثمان:اوا شكون قادو ماشي نتي متقادش راسو اه ميساء جلسي بغيت نهضر معاك فشي حاجة ميساء(جلست):نعام عثمان:نتي عارفة بلي الخدمة كلشي عليا دكشي علش بغيت نقولك على السفر غنأجلوه بينما رصيت كلشي و يرجع عماد نخليه هو ونمشيو حنا اش بانليك ميساء:اه معنديش مشكل اصلا حنا قربنا نرجعو للقراية عثمان:امتى ميساء:السيمانة الماجية عثمان:ان شاء الله انا غنبقا نديك ونجيبك واخا ميساء(بابتسامة):واخا فطرنا فجو زوين ارتاحيت مع عثمان بزااف خصوصا كلامو لي كيخليني مطمنة ومحسسني انني مع راجل ديال بصح كملنا الفطورو هضر عثمان:ميساء تقدري تخرجي؟ ميساء:فين عثمان:نتغداو على برا واش قادة تمشاي ميساء:اه مزيانة الحمد لله عثمان:واخا(ناض كيجمع الطباسل) ميساء:شنو كدير خلي دكشي عثمان(مشا حط دكشي فوق البوطاجي وجا عندي شدني من يدي وبقا جارني للصالون):نتيظابا غترتاحي وانا غنجمع دكشي دغيا غنديرة غير ف لاماشين البارح نسيت موريتهالك وخليتك غسلتيهم ميساء:ولكن نتا عثمان:ميساء حلسي رتاحي قبل الزواج راه كنت كندير هدشي يعني عادي ونتي راك بنادم باقا عيانة انا مجايبكش خدامة ميساء:لي بغيتي مشا عثمان للكوزينة خلاني غير كنشوف فيه مزال ممصدقاش بلي هاد السيد راجلي كنحس براسي كنحلم تنهد تنهيدة من القلب وطلبت ربي يدوم هاد الهدوء و هاد التفاهم منقدرش نتحمل توقع شي حاجة حيت غتكون صدمة بالنسبة ليا مبغيتش نخسر عثمان بقيت ساهية فأفكاري تا وقف عليا عثمان:نمشيو نلبسو باش نخرجو ميساء:باقي الحال عثمان:12:30 هادي صبحنا ناعسين اول مرة(بابتسامة) نضت وطلعت انا وياه للفوق دخل هو للدريسينغ وهو يعيطليا مشيت عندو لقيتو واقف قدام البلاكار وقفت حداه وهو يدورني تصدمت كان بلاكار على قدو بالالبسة الحجابية و الفولارات و كلشي لي نقدر نحتاج بقيت غير تنشوف عثمان:هادو كادو مني ليك ميساء(ضرت عندو عنقتو بجهد وعيني مغرغرين):شكرا بزااف ا عثمان شكرا عثمان:هدا واجب فرحت حيت عجبوك ميساء:متصورش شحال عثمان:يالاه لبسي عليك باش ندوزو النهار بجوج اول خرجة لينا غير قال هاد الكلمة وغمزني قلبي يا ربي غادي يسكت اففف اش هدشي....

اختاريت كسوة طويلة فالاسود مع شال غرونة وصباط عالي شوية لبست الكسوة وتقابلت مع المراية عجباتني بزاف كانت ايفازي من الفوق مزيرة ومن لتحت مطلوقة وبالكمام من بعد جمعت شعري كعكة ودرت مكياج خفيف قلم كحل وعكر حمر ماط وشوية الفاغاجو عاد بديت نقاد فالشال باقا مكنعرفش نصاوب شدات عصريين و زويين ولكن درتو على راسي ودرت شوكة حدا رقبتي والباقي درتو على كتافي لبست الصباط بقيت كنشوف فالمراية جاني راسي مبدلة بزااف حيت عمري فكرت انني غنلبس هاد الستيل فاش كنت كنفكر فالحجاب كنت ديما كنتخيل راسي دايراه ولابسة جليليبة و بليغة ههه...هزيت بزطام كبير شوية فلون الشال درت فيه تليفوني وخرجت عند عثمان لقيتو لابس سروال الدجين وتيشورت كحل وسبرديلة فنفس اللون مطلع شعرو الفوق باقي فازك شوية كان واقف قدام المراية كيدير ساعتو فيدو هز الريحة رشها وشافني من المرية وضار عندي عثمان(جا وقف قدامي):ما شاء الله عليك جيتي زوينة بزاف ميساء:بصح عثمان:اه ولكن كاين مشكل واحد ميساء(باستغراب):شنو هو عثمان(قرب عندي وطبع قبلة على شفايفي):هو هدا ميساء(مصدومة ومفاهمة والو):هم ؟ عثمان:العكر ديريه فدارك ولراجلك واخا مساينش جوابي وجرني من يدي السوارت وهبطنا لتحت اصلا مكانش عندي جواب تخرست براكة غير العرس لي نايض لداخل عندي مابين قلبي وعقلي تا المشية تلفات عليا كون مشدني من يدي...هبطنا لتحت مشينا للباركينغ وصلنا للطموبيل لي كانت من نوع 407 كحلة حلي الباب ركبت عاد جا ركب هو عثمان(قربليا):بلاتي نصاوبليك السمطة ميساء:واخا عثمان(من بعد ما سالا):فين بغيتي نمشيو اول حاجة ميساء:نمشيو للبحر عثمان:هي لولا كيعجبك الحوت ميساء(بابتسامة):اه عثمان:اوكي غنوصيو عليه ونمشيو نتمشاو فالبحر شوية خدينا الوجهة ديالنا الطريق كاملةو عثمان كيفتح معايا مواضيع سواء على حياتي الشخصية او قرايتي او طفولتي كأنه كيحاول يخليني مرتاحة ومطلوقة معاه وفعلا هاد المرحلة انا فتها حيت اصلا هو ماشي انسان متعصب يعني كيخدم عقلو واخا مزال مجربت عصبيتو ولكن رزانتو فالكلام و الحوار كافي يببنلي انه انسان ممكن نتناقش معاه بعقلانية وصلنا للبحر وهبطنا قبطني من يدي وبقا جارني معاه والدنيا كانت عامرة لي دزنا من حداه كيشوف فينا وخصوصا البنات لي كانو بلباس مقزب اللحم غير مشتت شفت فعثمان بانلي حادر راسو انا لي عينيا تيلعبو توجهنا للمطعم لي تما استقبلنا واحد الشخص؛مرحبا بسي عثمان عثمان:الله ابارك فيك ا عصام شوفي وجدلنا الغدا من هنا لساعة واخا ديرلنا الحوت ونوعو عاد دكشي لاخر راك عارف عصام:على الراس والعين كون هاني كمل معاه الهضرة ولاحضت ان طول الحوار داك عصام مشافش جيهتي كاع ومحاولش تا يشوف عجبني الحال وحسيت بهيبة عثمان فهاد اللحظة خصوصا طريقة الهضرة ديالو مع هاد عصام كمل معاه وتاجهنا لجيهة البحر وصلنا للرملة وحيدنا من رجلينا يد شادة بيها صباطي ويد قابطني منها عثمان عجبني الحال بزاااااااف حسسني بلي انا حاجة مهمة فحياتو عمري ظنيت ان الزواج التقليدي ممكن يكون بهاد الروعة اكيد ربي كبير وكون غير انسان مزيان وقلبك بيض ربي غيرزقك من اوسع ابوابو بأي حاجة تمنيتها اولا متمنيتيهاش وصلنا لواحد الصخرة جلسنا فيها كان الجو زوين بزااف الشميشة باردة مكاينش شي صهد بالعكس عثمان:عجبك الحال ا ميساء ميساء:بزاف ميسحابليش نتا هاكا عثمان:كيفاش هاكا !!...

عثمان:كيفاش هاكا ميساء:اول مرة شفتك جيتيني انسان عصبي عندك نيشان نيشان خصوصا انك مكضحكش قليل فين كتبتاسم قلت غتكون قليل الصبر ومعندك خاطر عثمان(ضحك):ههه ياك الالة ودابا شنو تغيرات نظرتك ليا ولا مزال ميساء:تغيرات بزااف البنت(وقفات علينا لابسة دوبياس فالكحل وهازة تيلي فيدها وموجهة كلامها لعثمان):عافاك ممكن تصورني انا وصحبتي عثمان(شاف فيا):هايا المدام ديالي تصورك ا آنسة البنت(معجبهاش الحال طلعات فيا وهبطات):امم واخا انا كي الهبيلة كنشوف فيهم تا دارلي عثمان اشارة زعما نوضي عاد مشيت صورتها هي وصحبتها وعطيتها التيلي خداتو من عندي ما قاتلي حتى شكرا البرهوشة لخرا يخخ شحال مقزدرة باينة حطات عليه العين رجعت عند عثمان لي كان حاضي الفيلم وانا معصبة عثمان:صورتيهم ميساء:اه و مقاتلي حتى شكرا عثمان:هدشي علاش معصبة ميساء:انا؟لا ممعصباش عثمان(قرصني فحناكي):عليها الحنيكات حمرين بقينا جالسين مجمعين شحال د الوقت وزدت وطدت علاقتي بعثمان وليت كنحس براسي قريبة منو بزاف يعني مكاينش شي حد بيني وبينو وممكن انني نهضر فأي حاجة وانا مطمئنة..جاني جوع وقلتهالو نضنا مشينا للمطعم لقينا كلشي واجد والطبلة كتشهي جلسنا كلينا على خاطرنا وتجمعنا تا جبد عثمان تيليفونو وصورني ودرنا السيلفي بجوج جينا مواتيين الصراحة خخخ...كملنا غدانا ونضنا تمشينا شوية تاني تا حسيت براسي عييت وقتلو باش نمشيو للدار ودكشي لي درنا ركبنا فالطموبيل ومشينا للدار غير وصلنا يالاه غيحل الباب وهو يصوني تيليفونو جبدو جاوب عثمان:الو الواليدة لاباس عليك.....الحمد لله حنا مزيانين....اه العشا الصراحة حنا يالاه دخلنا من برا و ميساء واقيلة عيات ميساء(هضرت من بعد ما فهمت انها بغاتنا نتعشاو معاهم):لا لا ماشي مشكل الا كانت عارضانا للعشا نمشيو عثمان:متأكدة؟؟ ميساء:اه عثمان:واخا الواليدة ها حنا جايين...بسلامة....ياك قلتي عيانة ميساء:واخا عيانة حشومة نردو العراضة فوجه خالتي مجاتش عثمان(باسليا راسي):واخا يالاه رجعنا هبطنا ومشينا نيشان لدارهم وصلنا وجبد السوارت حل الباب مع دخلنا سمعنا صوت الهراج و الهضرة بزااف باينة كاين شي حد آخر من غيرنا اكيد ماشي غيتة و عماد لاحقاش مسافرين من البارح...دخلنا لداخل ويدي فيد عثمان مع العلم ان دار عثمان جوج طبقات و والديه جالسين فالطبقة لي لتحت اولا على ود الدروج لي مكيقدوش عليهم وثانيا ان الفوق ولا ديال عماد وغيثة دخلنا للدار لقينا الدنيا عامرة مكنعرف حتى حد من دوك العيالات و البنات ليجالسين عاد شي جوج وليدات صغار تيتجاراو تم بقيت قابطة فعثمان لي قال السلام بصوتو الرجولي عاد كلشي ردلنا البال وهي تخرج خالتي فاطنة من الكوزينة فاطنة:مرحبا بولدي ومرات ولدي مرحبا بيكم(سلمات عليا) ميساء:الله يبارك فيك اخالتي عثمان:الواليدة مقلتيش ليا العائلة مجموعة هنا فاطنة:اوا مكاينش البراني اولدي راه غير خوالاتك بجوج ورجالهم شديتهم مخليتهمش يمشيو شحال هادي متشاوفنا خديجة(خالة عثمان):ياك ما مبغيتيناش ا عثمان عثمان(خنزر فيها):الواليدة عارفاني معنديش مع الصداع نسرين(بنت خالتو):كيفاش الصداع ياكما كتهضر على ولادي نورهان(بنت خالتو تا هي):لالا باينة العروسة لي غتصدع راه قالك كانت عيانة قبل ميجيو عثمان(شاف فخالتو):جمعي بناتك وقولهم يسدو فمهم شوية واخا وبالناقص من هاد العشا الله اعاونكم عمي عيسى(هبط من الفوق):مالن على هاد الصداع اش كاين خديجة:اوا ولدك اسي عثمان سولو معرت مالو محاملناش وملي تزوج زاد كمل مبقا كاع تيحتارم عيسى:ولديالله اهديك اش عندك مع خالتك بغيت غير نفهم عثمان:معندي والو غير معنديش مع الصداع ودابا غنمشي لداري نرتاح تا تكونو بوحدكم وغنجي انا ومرتي الله اعاونكم جرني عثمان وخرجنا وانا مفاهمة والو مالو معندوشمع خوالاتو وعلاش تعصب ملي شافهم بقيت ساكتة ومحاولتش نجبد معاه الموضوع...

وصلنا للدار مشا عثمان نيشان للصالون بقيت واقفة كنشوف فيه معرفت مندير فلخر خليتو وطلعت للبيت بدلت حويجي وهبطت لعندو لقيتو باقي جالس جلست حداه بلا صوت تا دار شاف فيا عثمان:قربي حدايا نضت مشيت جلست حداه وهو يقبطلي يدي باسها وشاف فيا عثمان:سمحيليا ا ميساء تعصبت قبيلة ميساء:علاش كتعتادر مني نتا مدرتيلي والو ولكن واخا نعرف السبب لي خلاك تعصب من خالتك وبناتها عثمان:هديك خالتي معنديش معاها من صغري مكنحملهاش الا ممشاتش معاك فالخراب مدير والو ملي كنت صغير كنت كنسمعها كتحرض الواليدة على الواليد كتعمرلها راسها و الواليدة الله اهديها كتسمع لكل كلمة كتقولها حيت هي ختها الكبيرة وكتحتارمها وكون ما الواليد انسان مزيان وعارف شنو كاين كون راها مطلقة دابا بحالها ميساء:اه هي مطلقة عثمان:متعمريش راسك بهدشي و العائلة من الاحسن تفادايهم حيت فيهم غير الخواض وملي كيتجمعو تيبداو يبانو على بعضياتهم نتي خليك بعيدة عليهم حتى الا تجمعتي معاهم ردي البال لكلامك حيت ممكن يقلبوه ويقولوك حاجة مقلتيهاش ميساء:اه فهمت عثمان:يالاه نطلعو لفوق طلعنا الفوق دخل عثمان بدل حويجو وخرج جلسنا ففراشنا بقينا كنتعاودو حتى تحول الكلام لحويج خرين ههه ★اصبح الصبح و الملك لله★ فقت اليوم ناشطة كيف ديما الحمد لله كالعادة وجدت راسي وهبطت نوجد الفطور وطلعت فيقت عثمان ميساء(تنحرك فيه):عثمان نوض راه 11 هادي عثمان(ساد عينيه وجرني فوق صدرو):غير شوية ميساء:وراه مشا الحال وزيدون بغيت نفطر انا وراجلي حبيبي هيه(تا قلتها ع شهقت مولفة نقولها غير فخاطري) عثمان(حل عينيه بجهد):عاودي شنو قلتي ميساء:والو نوض تفطر عثمان(زاد زير عليا)؛والله ما نطلقك تا تعاوديها ميساء:افف قلت بغيت نفطر مع راجلي حبيبي فيها شي مشكل عثمان(باسني):بالعكس مافيها تا مشكل تا انا بغيت نفطر مع مراتي حبيبتي سبقيني انا ندوش ونجي نضت من حداه بلا منجاوبو هبطت دغيا لتحت حاسة بحناكي غيطرطقو بقيت واقفة تنش عليا البرد تا سمعت الصونيط فالباب مشيت لحت عليا العباية و الشال وحليت لقيت خالتي فاطنة ميساء:خالتي مرحبا بيك دخلي فاطنة:الله ابارك فيك ياكما فيقتكم ميساء:لا اخالتي فايقين فاطنة:اممم عثمان(هابط من الفوق وكينشف راسو بالفوطة):الواليدة(باسليها راسها)نهار كبير هدا جيتي بوحدك مجاش معاك الواليد فاطنة(جلسات وحيدات الدرة على راسها):لا مجاش عجباتك الشوهة لي درتيلي البارح حشمتيني قدام خواتاتي دوي عثمان(جالس لوا الفوطة على عنقو وحاط يديه على ركابو وشابكهم وتيشوف قدامو):كنتي تفكري فيها قبل متعيطيلي وهوما كاينين عارفاني معنديش معاهم فاطنة:مالهم قاتلين ليك الروح(شافت فيا)ونتي ا ميساء معرفتيش تقوليليه على وجه ميمتك وديريليه عقلو ميساء(بتوتر)؛انا م عثمان(قاطعني):ميساء معندها تا دخل فهدشي خليها بعدة على داك التخلويض ديال خوتاتك نهار يكونو عندك متجمعينيش انا ومرتي بيهم حيت ليدرتو البارح غنعاودو مرة خرا فاطنة(وقفات):اييه ياك اولدي سري وليتي ترد عليا الهضرة وطيح كلمتي للارض ياك ميساء:خالتي غير بالخاطر فاطنة:ما خلا فيها خاطر نهار يدير القيمة القيمة لمو عاد يديرها لخوتاتو(خرجات وزدحات الباب) ميساء:مكنتيش تهضر معاها هكاك عثمان:تا تهدن ونمشي عندها انا عارفهم عمروليها راسها دكشي علاش غير صبح الصباح جات عندي ميساء:عرفتي من رايي تمشي تاخد بخاطرها قدامهم حيت كتبقا مك لي ولداتك وكبراتك عثمان(تنهد):واخا نفطرو ونمشي عندها غنخليك بوحدك الا مشينا بجوج غيشدونا للغدا وانا مكنبغيش نتقابل معاهم ميساء:لا مموافقاكش نمشيو بجوج باش متاخدش مني موقف تا انا ويعمرولها راسها عليا ويلا شدونا للغدا ما فيها باش ساعة دغيا دوز وقولها باش العيالات ياكلو بوحدهم و الرجال بوحدهم كنضن هدا حل مزيان اش بانليك عثمان(بابتسامة):الواليد اختار وعرف اش ختار الله اخليك ليا ويكملك بعقلك....

فطرت انا و عثمان سالينا هو مشا للصالون شعل التلفازة وجلس يتفرج وانا بقيت تنجمع الكوزينة ساليت ومشيت عندو قتلو باش نطلعو نوجدو راسنا دكشي لي درنا لبسنا حويجنا وتاجهنا لعندهم كالعادة مع الدخلة د الباب كيتسع الهراج شفت فعثمان بانليا مخنزر دخلنا عليهم كانت خالتي فاطنة جالسة وخوتاتها وبناتهم ضايرين بيها شافونا وهوما يسكتو زيرت على يد عثمان وهو يمشي عند مو باسليها راسها ويديها عثمان:ميمتي الحبيبة فاطنة(عجبها الحال ومبغاتش تبين):الله يرضي عليك ميساء(مشيت تا انا بستليها راسها):خالتي متبقايش تقلقي على ولدك نتي ميمتو وهو كبدتك مغتسخايش بيه ياك فاطنة:وعلى ابنتي كاين لي يسخا بكبدتو فرحتوني ملي جيتو وكبرتو بيا الله يكبر ييكم ومغتمشيو تا تغداو معانا الله ارضي عليك اولدي ديرليا خاطري عثمان:واخا الالة غير هو انا و الوليد غنتغداو مع الرجال بوحدنا خديجة:اممم مراضيش بينا ولا كيفاش فاطنة:ختي خديجة بلا متبداو خليه على خاطرو صافي اولدي لي بغيتي باك راه مشا للمحل ديال عم ميساء عثمان:غندي معايا ميساء نسرين:هههههه اوا صافي ديرليها المينوط وجرها معاك بففف خديجة:الله يا وليدي تقول غي نتا لي تزوجتي عثمان(تنهد بجهد):اللهم طولك يا روح ميساء(قربت عندو وكنهضر بشوية):حبيبي غير سير نتا انا غنكون مزيانة هنا وزيدون مماك معايا فاطنة:اه اولدي مرتك امانة عندي متخافش عليها عثمان:واخا(باسليا راسي)يالاه انا مشيت ميساء:بسلامة فاطنة:جلسي ابنتي جلسي جلست معاهم وهما بقاو ساكتين كيحنزو فيا ويطلعو ويهبطو فاطنة:فطرتي ابنتي ولا نجييليك تفطري نورهان:اوا لاواه اخالتي بقا ليك غير تغسلي ليها رجليها مالها معندهاش يديها ولا النعمة مكايناش فدار عثمان فاطنة:ديها فراسك نتي مرات ولدي نفششها كيف بغيت انا متأكدة هي لي جابتو ولدي وانا عارفاه ميحملش يجي ونتوما كاينين خديجة:ياك اختي ومالنا قاتلين ليه شي روح اوا عشنا وشفنا ملي الولد ولا يسمع كلام مرتو وينخل كلام مو فعلا عثمان مكدبش عندهم اسلوب خاص باش يعمرو راس بنادم ويقلبوه عليك هاد خديجة هي وبناتها لفعات ولكن علاش خالتو لخرا ساكتةومتتهضرش من بعد الكلمة لي قالت خديجة شفت فخالتي ليقتها تزيرات ميساء:لالا ا خالتي عثمان ملي خرجتي وهو معصب مبغاكش تمشي مقلقة وملي اقتارحت عليه باذ نجيو مرفضش نورهان(تتعوج):امممم...

#يتبع