عروس الملك السابعة الجزء 15

من تأليف Ghazal trust
2018قصة مُلغاة

محتوى القصة


رواية عروس الملك السابعة , زوجة الملك السابعة

لاللة ياقوت : مرحبا بولدي ... زارتنا البراكة 
وقف هاز راسو كيشوف لنص عين فروح الندى اللي جالسة كتشوف جيهتو بسمة ... دورات لاللة ياقوت عينيها فروح الندى وقالت 
لاللة ياقوت : سيد الملك اللي دخل!!!!
عاد ضراتها روح الندى الفيقة وناضت وقفات بالزربة كتفتح حانية راسها . 
بصوت بارد قال : روح الندى ... تبعيني 
روح الندى : واخا مولاي 
تبسم فوجه مو وحتى تبسمات ليه ... كتشوف فيه فرحانة وفتاخرة بولدها ... وحسات باللي بينو بين روح الندى شي حاجة ماشي تا لتما ... محمد اصيل المرتضي بالله اللي عمرو نطق بسمية ديال مرى عاين باين ولا عرف حتى سمية من سميات الجواري ديالو ... جاي بوجهو وكيعيط على روح الندى ...
خرجات موراه حانية الراس و..ورجعلت لاللة ياقوت جلسات فبلاصتها كتنهد ... دارت وصيفتها موراها وبدات تمسد ليها كتافها 
الوصيفة : عيانة الاللة؟؟؟
تنهدات لاللة ياقوت وقالت : عياني ولدي وقصوحية راسو ...على الله تكون منو الكاينة هاد المرة ويتزوج ويولد ولاد اللي يخلفو بلاصتو ويهني قلب مو اللي معلق بالليل وبالنهار كتسنى ، خاصو يولد ولادو . يالاه يلحقو يتعلمو ويكبرو ويخلفو باهم ويحكمو من بعدو .. اما الى بقا على هاد الحال ... راه من سعد عمامو وولادهم اللي غيتبدل الحكام ويشدوه هما من بعدو ... وغتسالي سلالة راجلي و ولدي الى ماخلفش وبقا على هاد الحال . العينين عليه .. وكلشي باغيه يبقا على حالو ... حيت عارفين الى ضرب النص فعمرو غادي يبداو يعلمو ولد من ولاد عمامو ويوجدوه يشد الحكام 
الوصيفة : الله يطول فعمر سيدي ونشوفو وريعتو . راه باقي صغير بزاف مزال يالاه ضرب الربع فعمرو ... ان شاء الله يعيش اللي عاش باه وكتر ... ماتفركيش هاكا الاللة راه غير كتمرضي فراسك 
لاللة ياقوت : بان ليا عينو على هاد روح الندى .. وحتى انا بانت ليا متبتة ومربية ...الزين زينة ... غير خاصو يزعم .... وجدوها بيه الليلة عروسة ... العروسة الثالتة ... على الله تحمل هادي ونزفوها ليه . اما جوج عرايسلت لولين موحااال واش كاينة منهم الكاينة ...شهر والزيادة داز على ليلتهم اللي دوزو معاه ...(تنهدات) ومزااال كنتسناو وحدة فيهم تخرج بالكرش .
دخل لجناح كبير وعريض فيه كيتجمع مع المستشارين ديالو . تلفت وخرج عينو فيها وبصوت بحال الرعد قال 
الملك : هزيتي يدك على لاللة شامة اه لا ؟
خرجو عينيها وبدات تمتم وترعد واقفة 
روح الندى : م ممم ..ل .
الملك : ااااه لاااال؟ جاوبيني؟
خلعها ماخلا ليها فين تفكر وهي تبهط راسها كتبكي وترعد 
روح الندى : اه امولاي اه اهىء اهىء اهةء ... وحتى هي طرشاتني 
قرب منها ضارب السنة فالسنة مخرج عينيه وقال تحت سنانو 
الملك : شكون سب لا خر اللول؟ دوي؟ والى كدبتي كنقسم بالله اللي حسن مني ومنك .. حتى نقطع ليك يديك وعينيك محلولين وتعيشي حياتك كاملة بلا يدين ... شهدو فيك 6 دالناس كانو حاصرين ... ودابا جاوبيني 
تخلعات روح الندى وبدات ترعد .. وحلات وماعرفات مادير .. طاحت على قدامو كتبكي وترغب بحال ديما 
روح الندى : عفاك سمح ليا مولاي اهىء اعىء عفاك سمح ليا اخر مرة نعاود اهىء اهىء اهىء .. جلدني 100 جلدة وماتقطعش ليا يديا عفااااك امولاي اهىء اعىء
سد عينيه كيغلي ورجع اللور مخرج عينيه . بصوت غلض عيط على العبيد دخلو كيجريو عندو فالحين
الملك : خرجو عليا هادي ... ولوحوها فالمطمورة .. ومن الجمعة للجمعة لوحو ليها شياطة تاكلها .
المطمورة ... المطمورة اللي وصاتها عليها الشريفة ونبهاتها منها ... نسات روح الندى وصية الشريفة ليها ... باللي اللي طاحت فالمطمورة ماعمرها كترجع حتى كيطلعوها من تما ميتة . عاد تفركات روح الندى وصية الشريفة .. ولاكن حتى فات الفوت و عيات تغوت وتبكي .. الروح بغات اطلع ليها وهي كترغب ... تقلب عطاها بضهرو .. كيسمع غير غواتها غادي وكيتبحبح حتى بحات فخطرة. عينيها خرجو وهي مخرجينها هازينها ... دازت حداها لاللة شامة ووصيفاتها ووقفات كضحك وتشفى فيها .. اما روح روح الندى كاتشوف هنا وهنا بغات تسطى . 
داوها مور القصر لبير غارف مضلم مكيبانش اللخر ديالو ... خشاوها فخنشة وهبطوها كتفركل وتركل وغادية كتقرب من الضلمة حتى حسات براسها طلقو بيها الحبل وجلت نيشان فوق الرملة
خرجات راسها من الخنشةلقات غير الضلام حداها هزات عينها لفوق لقات نقطة ديال الضوء صغيرة اللي كتبان ليها ... بعدات الخنشة عليها وشدات فرجلها المهرسة كتكمدها .. لواو عليها جوج خشبات باش تشد بلاصتها واللي قاصتها ماضرها ما تعكرها . بدات تفتف بيديها فوق الرملة علاش جالسة والمطمورة ديقة عليها يالاه عندها التيساع فين تسرح رجليها بقات تفتف بيديها وهي تهز شي حاجة ماعرفاتها حجرة ولا خشبة ولا قصبة ولا شنو داك العجب.. هزاتها فالسما جيت الضوء وهوا يبان ليها عضم بنادم مقدد ، تخاعات ولاحتو من يديها وغوتات لربي اللي خلقها وبدات ضرب وتبكي فجنابها والصور اللي داير بيها من التراب .. بدات دق وضرب شوية حسات براسها كضرب فبلاصة خاوية . وقفات يديها ورجعات ضربات الصور وهوا يتسمع صوت الدقة ديالها .. ضربات فجوايه اخرين حسلت بالدقة متينة ماشي رهيفة بحال جيهتها الايمن . دارت ليها الطق فالراس وهي تبظل تقلب على العضلم بالزربة والخلعة شاداها وبدات الخبش فالتراب اللي رد عليها الدقة .. خبش يا مات خبش خبش يا مات خبش بالعضام والتراب كيتزلع عليها .. مربعة رجل ومسرحة الرجل المريضة ومقابلة مع الحيط كتحفر . 
طاح الضلام عليها وهي مزال فالحفير كتجبد .. تحفر وتقول ما حفرت .. تخشي يدها لداخل وسط الحفرة وتشوف غرقها فين وصل .. ميتة ميتة الله تحفر قبرها بيديها . 
جالسة لاللة شامة فبيتها مفطحة .. فرحانة باللي دارت وفرحانة بسيد الملك اللي جا من جيهتها ... الوصيفات دايرين بيها وهي مسحة حلى جنب يديها كتاكل فالعنب.. وحدة عند رجليها تمسدهم ليها ووحدة عند كتافها تدلك 
تكلمات الصغيرة فالوصيفات وهي كتقطع ليها التفاح بيديها 
الوصيفة : يمكن الاللة مولاي مابينو وبين ديك البنت حتى حاجة ... كن كانت بيناتهم شي حاجة كاع ميطمرها فالمطمورة ... وهوا عارف كيدايرة والضلمة اللي فيها ... واللي طاح فالمطمورة غنرو ميطلع منها .. كنتي باغا تعرفي واش كيروم ليها ... وكن كان يروم ليها كان يحبسها ماشي يلوحها فالمطمورة 
تكلمات اللي كتمسد رجليها وقالت : هادي هي الوجيبة الاللة ... تقولي باللي مداكش النعاس ونتي حاسة بوحدة مرمية فالمطمورة بسبابك ... قولي باللي ماهنا ليك بال... وسيد الملك غيغرف شحال قلبك كبير وترتاحي لراحة غيرك .
قالت اللي كتمسد كتافها : بصح الاللة شامة ... وتحني عند رجليك وطلب السماحة منك قدام مولاي ... ونتي بقلبك لكبير سمحي ليها وتربحي تيقة مولاي وقلبو . حنا غير ملينا عليك الري .. واللي ريحيك ديريه 
سهات لاللة شامة فكلاكهم كدورها فراسها .. عندهم الحق ... اش فيطلع ليها من هاد الرمية اللي رمات الجارية فالمطمورية ... هادي هي الوجيبة تبين قلبها لكبير لسيد المالك وتعمر عينيه المعمية من جيهتها ... جمعات النوضة وقالت 
لاللة : شامة ... وجدو ليا لباسي وعطوري ... الليلة نزور سيدي فجناحو

تقادات لاللة شامة ولبسات احسن ما عندها ... تعطرات وخرجات كتمتختر طالقة سوالفها تابعينها وصيفاتها . وصلات لجناح سيد الملك ووقفات قدام عبد تحنى ليها براسها ... قالت ليه بسمة 
لاللة شامة: بغيت نشوف مولاي سيدي محمد اصيل ... قول ليه لاللة شامة بغات تشوفك .. وعندها ليك كلام مهم 
دق العبد ودخل وبقات هي فالباب كتسنى فالرد ... خرج عندها ودار ليها طريق محني الراس .. دخلات كتجر فجلايلها لقاتو كيكبر ومتاجه جيهت القبلة كيصلي .. الريحة والجو اللي فبيتو هادي كيرخي العضام والعود اللي طالق نادر كيتطلق غير بيتو هوا . بقات واقفة فبلاصتها مبسمة وهوا بلباس كحل قدامها كيصلي ... حتى صلى وسالات وناض وقف ودار عندها مربع يديه عاقظ حجبانو 
لاللة شامة : الله يقبل امولاي 
الملك : امين ... شنو جابك عندي فهاد الليل ؟ 
طيحات على راسها الضين وبدات فالتبوحيج والبهتان 
لاللة شامة : مدانيش النعاس امولاي ولا غمض ليا جفن 
طلع حاجبو قبل ماتكمل وقال : ومن بعدي؟
لاللة شامة : كنتفكر البنت اللي ترمات فالمطمورة كيطير نعاسي ... منقدرش نعس انا على فراشي ومرى اخرى مرمية بسبابي ... انا جيت نقول ليك مسامحة ليها امولاي .. واخا طولات يدها عليا مسامحاها .. غير تجي طلب السماحة مني وتحنى عند رجليا قدام اللي ضرباتني وشتماتني قدامهم 
الملك : واخا تسمحي نتي انا مسامحش ... سيري تنعسي حتى للصباح 
قربات منو باغا تبكي وقالت : عفاك امولاي راه النعاس مابغاش يجيني... انا اللي تضربت وانا مسامحة فحقي.. تجي تطلب من السماحة وترجع اعتابري قدام الوصيفات والخدم . مانتهناش وانا رامية مرى مسكينة فمطمورة 
عقد حجبانو وقال : هادا قانون ماشي جات عليك تسمحي والى ماجاتش على كانتك ماتسمحيش .. اللي مد يدو على العاءلة الملكية راه يتعاقب بلا زيادة فالهضرة ... ودابا مللي نتي باغا تسمحي ... سيري حتى للصباح ويكون خير . 
حنات راسها وكانت مزالة ناوية تجبد معاه الهضرة ... ساعة عطاها بالضهر كيمسح يديه ناوي ينعس . تبسمات وقالت
لاللة شامة : خليت ليك الراحة امولاي .. سمح ليا الى جيتك فوقت ماشي هوا هداك وقلقت راحتك 
تسلات بشوية وخرجات مشا .. وبقا هوا واقف قدام المراية كيشوف فراس ويتفكر صورة روح الندى وبكاها " مطمورة لااا المطمورة لاااا اهىء اهىء المطمورة لاااا اااااهىء اهىء سمح ليا امولاي سمح ليا "
غمض عينيه وتنهد .. ورجع تفكر نهار حكم عليها ب 100 جلدة وبدات تاني كطيح قدام رجليه وتبكي " عفاااك سمح ليا اخر مرة .. عفاك انولاي منعاودش اااعىء اهىء اهىء اااهىء " 
هز حجبانو ماباغيش يفكر فدامشي ولاكن عقلو كيسرح بيه بلا هواه .. تفكر فاش طيحات الزغبة وحصلها فبيتو كتبقشش .. مالقات ماتقول وتحنى على ركابيها كتبكي وتشهق ... تنهد وداق عليه صدرو وخرج من بيتو لابس جبادور حكلة وبلغة كحلة .. مشا لبيت امو ويالاه وصل للباب تنفر فالنفار حتى قفزات مو من بلاصتها وهي ناوية تكى تنعس وطالقة شعرها الحكل قدها فالطول ولابسة لباس خفيف .. جرات الفوقية بالزربة لبساتها وناضت وقفات .. دخل عليها باينة على وجهو مهموم .. شافت فيه وقالت 
لاللة ياقوت : شنو اللي جاب سيد الملك عندي فهاد الوقت ؟ 
قرب منها وقال : جيت نهضر معاك شوية الى جات على خاطرك 
تبسمات وقالت : مرحبا بيك فاي وقت . متحتاج عراضة . . . نوض من نومي ونسمع ليك ... جلس وقول ليا شنو اللي شاطن بالك؟ شنو اللي طير نعاسك؟
جلس بجنبها ساهي وقال : كي كنجيك فحكامي؟ ضالم؟ لا حقاني؟
لاللة شامة : الحق يتقال .. حقاني ... عندك كي العدو كي الصديق ... واخا يكون يصديقك تحكم عليه . واخا تقطع وتحزن عليه .. فحكامك مكتغش اولدي
سيد الملك : بعد المرات كنقول يمكن ضلمت .
لاللة شامة : شكون اللي ضلمني امولاي؟
تنهد وقال : البنت اللي كانت معاك هنا الصباح ... لحتها فالمطمورة 
تصدمات لاللة شامة ودارت يدها على فمها : المطمورة !!! علاش اش دارت؟
سيد الملك: هزات يدها على لاللة شامة وطولات لسانها 
لاللة ياقوت : هزات يدها !!!
سيد الملك : واش هاد الحكام باش حكمت عليها مناسب ليها ولا كن خففت شوية عليها ولحتها فالحبس حسن ليها؟
فكرات لاللة شامة وقالت : ماشي اول مرة ترمي شي حد فالمطمورة...وعمر المطمورة شهدات انها سرطات شي حد مضلوم ... اللي كيدير علاش اللي كيتلاح فيها ... وتهز يدها على وحدة من لالياتها هادا خوا عقابها 
سيد الملك : ودابا شوية جات عندي لجناحي لاللة شامة ... قالت مسامحاها غير اجي طلب السماحة منها 
لاللة شامة : مزيااان ... حتى هادا حل ... ولاكن اولدي شفتك كبرتي الشان لهاظ البنت ! شكون هي ؟ واش كتعجبك؟
عقد حجبانو وقال : كتعجبني بحالها بحال غيرها ... زوينة ... كتغني زوين.. صوتها كيعجبني .. وحتى خفة رجلها كتعجبني .... كتجيني حنينة واخا شرانية ... واللي عجبني فيها كتر ... هوا تعطي راسها للموس باش مبقا انا حي ... قالت الى مت انا فتموت تا هيا 
تبسمات لاللة ياقوت وقالت: وانا كنقول . اول مرة تهضر على شي مرى فحياتك ... الى شفتي راسك مامتااحش طلعها من تما حسن ... رضي نفسك هاد المرة وماترضيس القانون 
بقا ساكت معبس ورجع قال : الى هي طلبات السماحة من لاللة شامة مرحبا

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.