عروس الملك السابعة الجزء 16

من تأليف Ghazal trust
2018قصة مُلغاة

محتوى القصة


رواية عروس الملك السابعة , زوجة الملك السابعة

مشات روح الندى كتحبو على رجليهت وتحفر بالعضام ... الفجر كيأدن وهي مزالة كتحفر .. واحد الشوية دفعات بيدها وهي تخرج فالخوا ... بدات تدفع بيديها وتلوح فالرملة وهوا يبدا الضوء كيبان ليها ... خرجات راسها المغبر من الحفرة وهي تلقا راسها فبيت عامر خناشي دالزرع والطحين والعشوب ، خرجات من تما بزز كتجر فرلها وتعفرت معها حتى جلسات فالارض عاد بان ليها راسها باللي الحفرة لاختها فبيت الخزين . بيت كبير مدكس وعامر .. ها الزرع .. ها الروز .. ها الطحين .. العشوب ريحت السمن .. دورات راسها كتنفض فحوايجها وشعرها وتسوط سخفانة .. شدات فواحد الحيط حتى وقفات على رجلها الصحيحة وهي تجر واحد العصا تكات عليها ومشات كتعرج شادة فالحيط .. شافت باب ديال الخشب مسدود وقصداتو بشوية حلاتو وخرجات راسها كطل منو . خرجو عينيها وتحل فمها .. شافت الكشينة ديال القصر الكبيرة والخدم كيطيبو ويوجدة الفطور ويتجاراو ... عاد صرباتها الفيقة باللي رجعات بيها الدورة ديال الحفرة نيشان رماتها فالكشينة ... حيت المطمورة جات مور القصر.. واللور دالقصر عالي حيت جا فجبل نصو السفلي مبني وسط الارض باش يالاه يتوازا لقدام ديالو مع اللور ديالو وتسطح ارضيتو من لداخل ، خشات روح الندى راسها وتخبات مور واحد العشبة مدلية يابسة معلقة حداها كطل ... تحطات السينية قريبة منها فيها فطور سيد الملك بااااااين ومتول .. حطو زعبول مشطون .. وعلى سبامتو عفاو عليييه ورجعوه لكشينتو . ولاكن روح الندى بحال الى حالفة عليه .. غير حط الصينية قريبة منها ورجع عطاها بالضهر كيقطع الفواكه وهي تمد يدها للصينية بشوية وتجبد .
جرات الطبسيل الاول دخلاتو ... جرات الطبسيل التاني دخلاتو بقا ليها البراد ماعرفات كي دير ليه وهي تسمح فيه خلاتو . ربعات رجليها فالارض كتاكل . هادي تنفع هادي ضر وكتسمع فزعبول كيكشكش وحلاقمو خارجين 
زعبول : اش واااا فين الفطوووور!!!! 
- كان هنا السي زعبول!!
زعبول : كااان هناااا وقين مشااااا... ديتيه ؟
- لا مشيت غير نجيب البيدوزة اسي زعبول 
زعبول : الفطوووور بيديا وجدتووو واش بيتو تحمقوني!!! فطور سيدي دابا خاصو يمشي اش ندير انا دروكاا ؟؟؟ فييين الفطووور ؟؟
عمرات روح الندى كرشها حتى شبعات وناضت وقفات كتفتف بجنابها .. لقات واحد الخشبة كبيرة ومشات ليها هزاتها وغطات بيها الحفرة والتراب طرفاتو للجنب . حسات بالباب تحل وهي تحني راسها مور برميل مرقد فيه الزيتون .. شافت عبد دخل هز ما خصو ورجع خرج . . . ناضت من موراها كطل لقات الصدع والدباز على الفطور .. ومن سعدها العبد اللي دخل داز حدا الطباسل المحطوطين فالارض وماردش ليهم البال . وقفات مجنبة ..شوية بانت بيها عبدية كدور حداها .. حتى كتقرب من باب الخنزين وكترجع تبعد .. حتى كتبغي روح الندى تجرها بيدها ومكتلحقهاش وكترجع تخبى ... ولاكن هاد المرة مازكلاتهاش .. شدات ليها فتوبها وجراهتها عندها .. تلفتات عبدية شافتها كاملة حالتها حالة ةالتراب موسخ وجهها وشعرها مغبر مابقا كيبان شعر ... حوايجها حالتهم .. يالاه بغات تغوت وهي وهي تخرج فيها روح الندى عينيها وكتحل فمها باش تسكت .. ماعرفات عبدية باش تبلات ... الخدم ملهيين مع الفطور كيعاودو فيه .. وكن طلعات الحس كان كلشي يدور عندها يعيق بيها وتفرش القضية . وسوسات ليها روح الندى بشوية وقالت 
روح الندى : دخلي .. دخلي بغيتك ضاروري وزمي فمك واجي
عبدية دارت بيها الدنيا ... ماعرفات ترجع اللور ولا تزيد القدام .. بدات تمتم وتمسح يديها فجلايلها مخلوعة حتى قفزها زعبول 
زعبول : اش تدوري حدايا هناااا ؟؟؟ درتي ليا بودوااخ .. جيييبي الشيبة نيشبو البراااد 
قالت وهي كتفتف : هي اللولة .. الشيبة ... هي اللولة 
مشات كتجري لبيت الخزين .. قفطانها قصير وسروالها المفضفض ليموني مكمش من لتحت ورجليها غلاض كل رجل يا رجل .. دخلات وسدات الباب وشافت فروح الندى وقالت مخرجة عينيها 
عبدية : بسسسسسسم الله الرحماااان الرحييييم ... اش كديري هنا!!! شكون جابك لهنا ؟ كي درتي طلعتي من المطمورة 
روح الندى : شوووو... شدي فيا لانطيح وسكتي لا تفصحينا ... شوفي حالتي كي دايرة وماعندي كي ندير نخرج من هنا ... بغيت نغسل هاد الحالة ونفك شعري عاونيني 
ضربات عبدية فخادها وقال : ااااش خصك العريااان ... الحناني يا مولاي ... انا بغيييت غير نعرف اش دخلك لهنا 
روح الندى : وراه المطمووورة قريييبة من هنا . بقيت نحفر حتى خرجت فهاد البيت ... وسيري دابا جيبي ليا مانلبس ونفك حالتي (كتنض) شوفي كي وليت .. غيرجع فيا القمل ...عاونيني انا غنمشي نجلس فديك الركنة حتى تجي . وسيفطي ليا طامو... (بتبوحيط) ماحشومااش عليك ... انا مرمية ف المطمورة ونتوما كضربو فمسمن وبغرير (نزلات عليها للكتف ) تلكلو فيه السم وجغديد يجغدد ليكم المصارن . الكافرات دغيا نسيتوني. . ساعة ربي طول ليا فالعمر باش نجي نشوف اش كديرو من مور موتي ... كتسرطو وتزردو ماقدرتو حتى تحزنو عليا .
عبدية : والله الى حزنا ربي اللي عالم ... بقات بلاصتك الزغبية وبانية ماتموتي حتى تسيفطي النص للقبر والنص يخرج يضرب بالحجر... ماشي نسى سيدي كاملين مرضو بالكرش خنقو لينا المجرى وطلع الوسخ مابغا يهبط .. ومشات لاللة شامة بغات دخل بيت الماء وهي تلقا ديك الحالة هاكاك وخرجات .. بقات تغوت تحسرات مالقات فين ديرهم . بغات طرطق .. مشاو معاها وصيفاتها مور القصر ... يالاه جلسات وهي طلع معاها عقرب بواحد القرصة حتى غوتات لربي اللي خلقها ... هزوها سخفانة وكن ما عتقوها كن دا مول الامانة امانتو 
روح الندى : غزاا فيها الله .. لاهيا لا دوك المسيميمات اللي مزاحمين معايا ... انا بغيت مسارنهم يتشركو و ديك لالاك نتي شامة بغيت ليها السم يجري فعرقها وتشد الفراش ... بقلت تشفا فيا بنت الحراااام... والله لابقات فيها غير بلاتي 
عبدية : وشنو ندير دابا؟ وييلي نسيت الشيبة 
مشات كتجري كتقلب على الشيبة .. جمعاتها ورجعات مخلوعة عند روح الندى 
عبدية : غنمشي 
روح الندى : سيري وشوفي كي ديري تخرجينس من هنا .. نفك هاد الحالة 
قالت عبدية بالفرحة : علااه مافراسكش !!!!! 
ردات عليها روح الندى بالفرحة : لا مافراسييييش!!! 
عبدية : ربي ربي مافرااااسك!
نزلات عليها روح الندى : منين غتجي فراسي وانا مخشية فالمطمورة منين؟
عبدية : راه لاللة شامة قالت لسيدي باللي مسااااامحاك وغير يطلعوك وطلبي منها السماااحة وصافي ترجعي ... قالت ليه تركع ليا ونسامحها ... فرحي يا الصكعة ههه 
كمشات روح الندى فمها كي النقطة كتشوف فعبدية فرحاانة ... خلاتها حتى سالات وهي تخرج عينيها 
روح الندى : لهلااااا يحييي الزماان حتى نهبط عند رجليها ... نعيش حياتي كاملة مطمرة ومانحنييييش عندها .. هه .. ايواااا صاااافي نحني ليها هادشي اللي بقا ... سيري عيطي على طامو ... ولا عرفتي بلاش ... ملي قالت ليك نحني ليها ... بلاتي انا غنوريها نحني كي دايرة
يتبع


التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.