عروس الملك السابعة الجزء 19

وكان ليها داكشي اللي بغات وطلبات . 

جاب ليها حولي ميت جراتو معاها فالحفرة كدفع فيه حتى للمطمورة ولاحتو فوق الحجر ورجعات بحالها عند طامو وعبدية اللي واقفين عساسين فبيت الخزين .. اما زعبول خلاهم ومشا لكشينتو باش حد مايرد لبال لغيابو ويتبعو يشوف اش بغا يدير .. اما عبدية وطامو دارو براسهم كيخملو بيت الخزين وبأمر من وعبول بلعاني باش ميشوشوش عليهم الخدم ويبغيو يعرفو اش كيصنعو فبيت الخزين . 

رجعات روح الندى عندهم سخفانة كتلهت .. خرجات يديها جروها من تما وتكات ليهم فالارض

روح الندى : شحفت .. عطيني نشرب .. ناري ماوصلت داك الحولي لتما حتى غفر ليا ربي الدنوب ... ناري ميمتي سخفت اش بغاو عندي الله ينتاقم منهم .. يا ربي وريهم ليا كيموتو قدامو ياااربي 

ربعات طامو يديها وقالت : ايوا لاللة روح الندى ها نتي خرجتي من المطمورة وها نتي صافي مشيتي عند الله ... فين غنديوك دابا؟ 

عبدية: علاه مالها ناوية تبقى هنا!!! غاتخرج ونقلبو ليها على شي كروسة تخرج فيها مع السلعة اللي كتخرج من هنا ... صافي متبقا ليها فين تزيد 

خرجات روح الندى عينيها وقالت : شكوون قال ليكم انا باغا نخرج من هنا!... انا هنا غنبقا حتى نتاقم من داك سيدكم اللي رما عليا الحجر ... ياك حكم عليا نبقا تما بجوعي حتى نموت .. علاش رجع فالحكام ورما عليا الحجر ... بغا يصفيها ليا ... (غرغرو عينيها) انا اللي كانت السويفة فيدي باش نقتلو ونسالي معاه .. وماقدرتش وختاريت نموت ولا نقتلو ونبقا موراه كسدة بلا روح ... كن غير درت شي حاجة بعدا باش يقتلني ويرمي عليا الحجر . . . لحمد لله ياااربي اللي فيقاتني ديك الحجرة باش فلقوني قبل ماكبو عليا داك كركور ديال حجر... كنت ناعسة بحال شي مشة مسكينة حتى جات فيا الحجرة خلعااتني .. انا بغيت ربي يخلعهم ويسكت ليهم القلب كما خلعوني اهىء اهىء .. بغيت ربي ينتاقم منهم واحد واحد كما تعداو عليا 

طامو : ايوا هانتي كتاب ليك عمر جديد ... خرجي عيشي حياتك اش بغيتي 

عبدية : هه ! علاه هي مسطية؟ !! هي قالت باااغا تنتاااقم .. ومن من ؟ من سيد الملك وطولو وعرضو وقدو وقامتو .... اللي ماعمر الدبانة زنزنات قدامو 

طامو: ياك دعيتي فيه ينتاقم منو سيدي ربي ... ايوا صافي اش بغيتي مزال؟

روح الندى : ما نخرج من هنا حتى نبرد جنوني فيه ... هوا وديك شمِّيطة د بنت ... انا بغيت ربي ينتاقم منهم شر انتقام ... عزيتو كتر من راسي فاللخر رما عليا الحجر. انا كنهز بيه وهوا كيطيح بيا ... هلد القلب اللي داير فيا هاد الحالة غادي نجبد باباه ونقطعو طراف طراف ونعطيه لزعبول يشويه . . . هاد القلب اللي دلني وخلاني نتعلق فين نتفلق ومكانجيبها فحد ... كنجيبها غير فعضامي غادي نخنق والديه ... غير بلاتي نزطم على قلبي وتشوفو شنو ندير فيه 

عبدية : ههه ويلاااا قدرتي ... نتي كتشوفيه كيتلفو ليك الرجلين ماكترعفي فين تحطيهم 

روح الندى: غير مزال مازطمت على قلبي . . . غير بلاتي .. غنجمع كاااع داك كركور الحجر اللي رما عليا ونخطو على قلبي باش مانبقاش نحس

طامو : وااانوضي ... يااتي نوووضي عندك الزهر ... غيحسابهم متي ومكاين اللي يسول عليك .. خرجي عيشي برا بعيييد على الصدع غلدي غير تزيدي تمرضي راسك ... وزايدون والله وحصلتي مكاين اللي يعتقك ... باغيينها فيك والى شدوك يسلخو ليك الجلدة عالعضم 

روح الندى : بت نبت هنا ... والله داكشي اللي داز عليا وتكرفيص اللي تكرفصت حتى نعيشو ليهم عاد نمشب بحالي 

عبدية: التكرفيص نتي بغيتيه ماجابك لهنا حد 

روح الندى: وحتى انا من هنا منخرج ... والله لا تهناو 

طامو : ها العار فوتينا عليك .. الى نتي عندك سبعة دالرواح حنا عندنا غير وحدة للوحدة .. الى شدنا ولا عاق بينا شي حد معاونينك نباتو مانصبحو ... حتى الزهر ماعندنا كيف الناس 

بدات تبوحط : يييياك اطاامو ياااك ... هادي هي روح الندى حبيبتي غزالتي كرموصتي... وليت دابا بافيين تفكو مني .. واخا ماقلتو عيب ... انا اللي حاسباكم بحال خواتاتي وكنقول ماعندي حد من غيرهم ... بوحدي فهاد الدنيا ... ماعرفت لا منين جيت ولا فين نمشي ... شحااال لبستي ليا فقفاطني نتي ياعبدية؟ وشحال خديتي فشرابلي نتي يا طامو .. وكنبات نخبر ليكم الليل كامل ومكنعس حتى نسالي ليكم الحكاية باش متبقاوش معلقين . . . صااافي سخيتو بيا ... صافي درتو بلاصتكم ... تمشي روح الندى تمووت شكون حاشاها ليها ... روح الندى المسكينة اللي كتبغيكم وما عندها حد من غيركم .. واخا صافي الله يرحم الواليدين ... الله يزوجكم ويعطيكم التريكة وتعيشو حسن مني ... والله يرميني فشي قبر ونتهنا من هاد العيشة. 

ناضت وقفات كتبكي وتشكي وطامو وعبدية كيسمعو ليها وشادين زيوف راسهم على نيافهم كيسمعو ويبكيو .. مشات روح الندى جيهت الباب وقالت 

روح الندى: انا غنخرج .. صافي غنخرج ونقول ليهم بااقا حية قتلوني ... قتلوني عييت بغيت نموت .

وصلات للباب كتشوف بنص عين فيهم وتسنى فيهم يجيو عندها .. جاو عندها كيبكيو بجوج عنقوها وقالت 

طامو: المسامحة ... الى درنا ليك شي حاجة سمحي لينا وحتى حنا سامحين ليك ... والله عزييزة علينا ومابغيناش تكموتي فكعااانة علينا 

خرجات عينيها وهزات واحد الشطابة ديال الدوم ونزلات عليهم للراس 

روح الندى: ياااااك ... باغيينها فيا يا بناات الحراااام هااااا ... هااااك شدي ..شدي يا المجراااابة نتي وياااها ... على نيتي كنعنق فييكم حساب ليا ماسخيتوش بيا ... ساعة حتى نتوما نيييت خاصني ننتاقم منكم يا الكافرات بالله ... (هزات يديها ) ابييوااا ساااامعو ... سمعو ... ياااااربي طول ليا فعمري وشافي ليا رجلي بالزربة باش نشتف على بنات الحرااام ... بااااربي نتاقم ليا ... 

شادت فيها عبدية كترغب وقالت : لالالالا صااافي ..صافي انا مزاااوكة سكتي... والله العضيييم الى كنبغيييوك ومساخيينش بيك ... والله .. وياااك نتي اللي باغا تموتي 

كمشات روح الندى فمها تحت قنانفها وقالت 

روح الندى : الحاجة اللي عمري كدبت فيها هي نهار قلت لدريس سمح ليهم ليهم راه غير هبيلات .. والله يا عبدية الى هبيلات وسبقتو الهبال ... حرررام واش عندكم العقل باش تفكرو .. غير سارحين كي النعاج فهاد الدنيا 

طامو : كتحك فخدها ) ااححح .. حرام عليك .. مالك على هاد الشحطة ..احح 

روح الندى: ايوا سمعووو مزيياااان وعطيوني ودنيكم المخرششة ... شتي الى مشيت حتى خرجت مع هاد الباب.. غادي نقول ليهوووم نتوما اللي خرجتوني من الحفرة وجبتوني لهنا ... ايوا حيدوووها ليا من فمي يالاه .. ياك ميتة ميتة .. اوا امشيو تونسوني فالروضة . 

خرجات طامو عينيها مخلوعة : هااا !!! العااار واش تسالينا ... هادا خيرنا ؟

روح الندى: خدمتي عقلك دابا؟!!! وخيري انا نسيتوه ؟ غير كيطيح عليه الضلام صافي كتنساو عليه ! باااز ... سمعو ... غاتمشو تجيبو ليا زلافة دالحموم مطحون والقهوى مطحونة وزبدة بلدية ... حوايج جداد كيشعلو وشمار وزيف ابيض نقي . وقبل بعدا جيبو ليا مناكل ... هادشي خليوه حتى يتنصص الليل علد جيبوه .. غنجلس هنا ماغانمشي فين حتى ينعس كلشي

عبدية : ربي قولي لي علاش ناوية ها العار 

روح الندى : اللي ناوية عليه مغانقولوش ليك ... غاتشوفيه بمومو دعينك

خرجو بجوج كيتسلو خلاوها بوحدها متكية على خنشة طويلة قهوية كتسنط لعضامها .. مرة تغمض عينيها مرة تحلهم .

فجوايه المطمورة كدور لاللة ياقوت هي و وصيفاتها .. وصلات للمطمورة لقات جوج من العبيد واقفين عليها .. هادا حالهم .. نهار يتلاح فيها شي حد ما يتحركو من تما حتى يتيقنو بالموت ديالو . حناو الراس لاللة ياقوت و بقات هي كطلع وتهبط فيهم وقالت 

لاللة ياقوت : اشنو جات لاللة شمس الضحى ولاللة شامة كيدرو هنا ؟ تكلم وقول ليا اللي كاين 

قال العبد كيترعد .. مقادرش يكدب .. وخايف يكدب ويكون عقابو مضوبل

العبد : جات رامات الحجر فالمطمورة 

تحلو عينين لاللة ياقوت وقالت : الحجر؟!!! لحتو الحجر على الولية اللي طمرها سيدكم هنا !!! 

العبد : حنا ما رميناش الاللة ... هي اللي رمات حجرة ... غوتات الولية ونزلات عليها بالحجر الكبير حتى تقطع صوتها .

لاللة ياقوت : وهادشي كامل وقع وساكتين!! 

دورات وجهها راجعة زعفانة .. هازة قفطانها الازرق موبرة المطروز وموراها وصيفاتها . مشات نيشان لجناح لاللة شمس الضحى حتى دخلات عليها لقاتها هي وبنتها جالسين .. غير دخلات وهما ينوضو وقفو وحناو ليها الراس .. خرجات عينيها واقفة هازة راسها وقالت 

لاللة ياقوت : شكون عطاكم الحق ترميو بالحجر فوق المعدومة ؟ 

تصدمو وبقاو ساكتين كيشوفو فبعضياتهم تحت العينين .. 

لاللة ياقوت : ماسمعتكش فالحكام باللي خاص الحجر يترما عليها وتقطع نفسها وتطلع روحها ... علاش خالفتو الحكام ؟ ... ومعامن تشاورتو ؟

هزات لاللة شامة راسها خايفة وقالت : شش ششكون كدب عليك الاللة ياقوت ؟

زعفات لاللة ياقوت وقالت : وفوجهي كتكدبي عليا !!! وجدي راسك ... نوبتك وصلات .. والمطمورة كتسنا فيك . . . ونتي عارفة مكاينش اللي يفكك من يدين سيدك ... عمر حكامو تخالف ... واللي غيديرو فيك اليوم على هادشي اللي درتي غيقلب العاءلة سفاها على علاها . 

بغات تدور تمشي وهي تجري عندها لاللة شامة شدات فيديها كتبكي وتطلب 

لاللة شامة : لااا .. لا الاللة ياقوت ... سمعيني بعدا عاد حكمي عليا ... 

لاللة ياقوت : هادشي اللي درتي مافيه مايتسمع ... بسبابك غادي ترون العاءلة 

قربات لاللة شمس الضحى وقالت : سمعينا بعدا ونتي تحكمي ... غير سمعي السبب علاش درنا هادشي .

هزات راسها لاللة ياقوت نافخة وبدات لاللة شامة كتحكي ليها وتبكي .. عاودات ليها كل ما جرى ليها على الليلة المشؤومة .. على شنو شافت وشنو عاشت . على الخنقة اللي تخنقات والموت اللي عليها طلات . بدات تبكي وتشكي وترغب وتزاوك فلاللة شامة على الله تسمع ليها وتستر فضيحتها.

سمعات لاللة ياقوت حكاية لاللة شامة من اولها لتاليها .. و واخا هاكاك خزرات فيها وماجاوباتهاش دورات وجهها وخرجات غادية لجناح الملك فالطبقة الفوقانية .. طلعات عندو ومشات فاتجاه جناح المجلس فين مولف يجتامع بمستشارينو . 

قبل ما توصل للباب تلاقاتو خارج من تما هاز خنافرو بحال العادة .. تبسم فوجهها وشد ليها فيديعا بجوج قدام وصيفاتها المهبطين الراس 

لاللة ياقوت : لباس اولدي؟ كيف غادي مع شغلاتك 

تبسم وقال : الحمد لله ... غ.ادي نمشي نشوف السيوف اللي تصنعات جديدة ... تمشي معايا 

تبسمات وقالت : علاش لا (تلفتات عند الوصفات) سيرو نتوما .

مشاو الوصيفات وبقات غير لاللة ياقوت و ولدها .. تمشات بجنبو وكتفكر باش تبدا ليه الهضرة .. اشنو تقول ليه وكفاش تفسر ليه ... والى تعصب كفاش تصرف معاه. بقات ساكتة كتخمم وهوا كيعاود عليها على حوال البلاد وكي غادية وكفاش خدامين وهما خارجين مع باب القصر وغادين كيتمشاو على رجليهم هابطين مع الغابة ديال القصر اللي داير بيها الصور الكبير وجامع لداخل كلشي .فدروج رقاق نازلين حتى وصلو لساحة كبيرة ديال الحدادة ... ها اللي كيحدد .. ها اللي كيدوب .. ها اللي كيدق ويزدح .. كلشي وقف حناو الراس ليهم حتى دخلو مع باب كبير بني مفرق بحال الغار من لداخل فيه شلا طرقات وشلا بيبان . . . وصلو لبلاصة السيوف المعلقين جداد وجلس يوريهم ليا بعينيه بالسميات .. اما هي مشطونة مكتفكر لا فسيف .. ولا فدرع . واحد الشوية ومنو راسو قال 

سيد الملك : تقدري تقولي للخدم ولا العبيد يعطيو للمعدومة تاكل .

تلفتات معجبة : تاكل؟! ياك حكمتي عليها تموت بالجوع 

سيد الملك : تراجعت . . . عطويها تاكل 

بلعات لاللة ياقوت ريقها وقالت : تكون ماتت ... راه العطش والجوع والخلعة غيصفيوها ليها 

سيد الملك : لا كنضن بااقا حية 

لاللة : ياقوت ... احمم.. سمع اولدي نقولك ... المعدومة اللي طمرتي....

يتبع