عروس الملك السابعة الجزء 22

خرجات عبدية راسها من بيت الماء كطل ودور فعينيها .. السكاااات 

الحس مقطوع حتى دبانة مكتزتزن . بدات تشير بيديها موراه وخرجات 

عبدية : خرجي خرجي دغيا . مكاين حد سربي راسك .

خرجات موراها روح الندى... ولاكن روح الندى وحدا اخراااا... سبقات رجلها ليمنية ... سمراء مخشية فيها بلغة .. لابسة سروال ابيض قصير مطروز بالخضر وقفطان قصير شوية ابيض مطروز .. محزمة بحزام ودابرة الشمار داير مور ضهرها جامع ليها لكمام .. يديها سمراء مابقاتش بيضاء .. وحتى وجهها رجع سمر وبداو يبانو فيه غير السنان والعبنين كيبريو .. غلضات لحجبان بالكحل وجمعات شعرها لوانو على راسها ودارت زيف . الطلية اللي طلات لحمها بالفاخر والقهوى والزبدة بدلاتها من راسها لرجليها .. اللي شافها يحلف عببها حتى عبيدة من لعبيد وعمرها كانت سميتها روح الندى... رجعات بحالها بحال طامو وعبدية... واخا ضعيفة عليهم شوية .. المهم صدرها عامر وحتى مسعودة اللي لاسقة فيها اللور مهزوزة قاضية الغراض... كتبان وازنة وقادة بقدود . 

وصلو للكشينة ويالاه بغاو يدوزو من حدا بابها باش يمشيو ينعسو مع العبيد فجناحهم حتى كتخرج فيهم وصيفة من الوصيفات ديال لاللة شمس الضحى .. تغلعات وخلعاتهم حتى هما معاها .. اش كدير فهاد الليل فالكشينة ؟ وعلاش هازة السينية فيها اتاي ودايرة بيها الفاكية . نخزات روح الندى طامو وهي تنطق

طامو : فااين ماشيا بهاد السينية فهاد الليل؟ حنا اللي كنتسخرو واللي بغيتوها نجيبونا حتى لعندكم 

قالت الوصيفة كدخل وتخرج فالهضرة : ك..ك.كنت كنقلب على شب وحدة اللي تسخر نيت ...كلشي ناعس حتى حد مافايق 

.جيت ناخد شي كاس داللويزة لاللة ساعة تصادفت مع عبد جا عندي قالي راه سيدي طلب اتاي...صايبتو ليه وغادية بيه عندو ..(ضحكات)ههيي ودابا فاش جيتو مزيان تديوه ليه ونمشي نشوف لاللة 

عطات السينية لعبدية ومشات حانية الراس كدور فعينيها .. بقاو متبعين ليها العين حتى غبرات شاكين فيها .. تلفتات روح الندى وخرجات عينيها 

روح الندى : ااري ديك السينية لهنا .. هادي دايرة السبة بلعاني باش امشي عندو فهاد الليل. ياك بغا اتاي.. انا نديه ليه يجغددو . . . والله لانعس ولا شافو هاد الليلة 

طيرات السينية من يدين طامو وهزات البراد عمرات واحد الكاس عطاتو ليها وقالت 

روح الندى : دوقي واش هادا اتاي هوا هاداك ولا غانديه ليه يخويه لبا على راسي ؟

هزات طامو الكاس داقت وقالت : هوا هاداك ... اححح بنين .. (هلطات على الكاس شرباتو )

روح الندى : ااح بنين! 

. هانا غنوريه البنة فين كاينة . 

شات يدها فشونها ( صدرها ) جبدات كموسة صغيرة ديال الميكة فيها غبرة خضراء حلاتها وبدات تهز ودردر فالبراد .

عبدية : شهادشي !!! ويلي هبلتي! 

روح الندى : انا هاد الطلية اللي درت كاملة غير باش نرجع حقي اللي شتفو ليا عليه .. ماشي باش نتسخر عليهم .. ودابا تسووخري لور خاليني ندوز .

مشات زربانة هازة السينية وخلاتو طامو كتشرب فالكاس اللي فيديها وعبدية واقفة حاطة يدخا على حنكها غير كتشوف . وصلات للباب الكبير ديالو بالسنية وهز عبد واقغة الوسط طويل وعامر عرا على طويجنات صغار شاف اش فيهم وسدهم عاد خوا ليها الطريق وفتحو ليها الحراس الباب دخلات كتجمع النفس وطلقها 

مادا بيا نحط اجزاء كتيرة مي مزيرة الغالب الله .. وشي بنات زعما واخا كنعيا نقولها ونعاودها راه العواشر هادي جري عليا نجري عليك ماباغيينش يفهموها بحال الى بغيتو نبدا من السمطة للتحت تاني واقيلا مكتجيش معايا الهصرة الزوينة والضرافة🤔

باش منخليكمش معلقين . حيت انا ماعنديش الوقت الكافي . باش نحط بزاف . دونك بلا منبقى نقطر عليكم جزء ولا جزءين بما انني لغيت فكرة النهاية مع العيد وشفت باللي مزال القصة فيها مايتقال . والى لاحضتو القافية بااح مشات حيت الوقت باش نسق ونلاقي ونخدم مخي مكاينش حاليا وكنقول المهم نحط سواء بقافية اولا بلاش . 

غنوقف القصة هنا حتى لبعد العيد وكنواعدكم وعد حر غنعوضكم بأجزاء كتيرة إلى بقيينا حيين ان شاء الله . 

عواشر مباركة وعيد سعيد مسبقا مغانتشاوفوش حتى لبعد لعيد . لاكن حاملة فجعبتي الكتير من المفاجأت فهاد القصة وباغا نوفييها حقها ونعطي وقت لأدق التفاصيل اللي لحد الأن ماعطيتهمش اهمية . ومزال غتوضح شحال من حاجة .

من هي روح الندى؟ (كاين اللي كيقول من عاءلة الملك؟ ) ممكن تكون من عاءلتو 

اشنو سبب اختافءها وسطهم _ الموت الجماعي وكيفية نجاتها منو ..

من السبب فموت واليديها . (لن تتوقعو من يكووون) صدمة كبيرة ومزال غتشوفو روح الندى وحدة اخرى بشخصية اخرى . 

كفاش ماعارفاش شكون هي ؟ واش ماعاقلاش؟ لانها كانت فسن اللي ممكن تعقل على نفسها منين هي ومنين جات ؟ (ما السبب ) 

مزال غنشوفو وجه اخر للملك . (كاين اللي كيقول عليه ماشي دكي . مكلخ .. ولا مكيفهمهاش طايرة ) عيدو النضر فهاد القضية من جديد . وكاتقارنوش العهد ديالنا هادا مع ديالهم هما . 

كيد النسا غيبدى ببراعة تامة لان عندنا الكتير من النسوة . 

واش كتنجح لاللة شمي الضحى بسحرها الاسود وتوصل لداكشي اللي بغات ؟ واش غيتطلق سراح الشعب المحكوم عليه بعدم لمس انثى . كيف ؟ 

اشنو قصة لاللة ياقوت وشنو المخبي موراه (علاش نفاوها ؟ ) اكيد كاين سبب مقنع . + قصتها غتعاود تكرر مع روح الندى من جديد.. وداكشي اللي عاشتو غترجع تشوفو كيتطبق على روح الندى بطريقة اخرى . 

الكثيير من الاحداث اللي وقفنا عليها هنا .. ومزال من موراهم احداث اخرى ... شخيصات اخرى . . . ومن اهمهم كرسي العرش واش غيبقا فيد الملك بالرغم انه ماعندوش اولاد ولا غيتطبق القانون عليه واخا ملك وتسلبو منو السلطة . وهنا فين غيبان الذكاء ديالو كملك . 

نلتقي بعد العيد . غنتوحشكم  😘😘