عروس الملك السابعة الجزء 29

من تأليف Ghazal trust
2018قصة مُلغاة

محتوى القصة


رواية عروس الملك السابعة , زوجة الملك السابعة

.وقفات كتنفخ على صبعها وتبكي بوحدها .. ايه اصلا على سبة وكانو دموعها غيفضحوها لو ماجاش فطريقها اتاي اللي حرقها ، اما سيد الملك بلا ميشعر وقف معاها وشد فيدها الحمراء وقال وهي كتبكي وتعصر دايرة يدها على عينها كتبكي الدم .. تلفت عند الوصيفات اللي واقفين مستفين وقال 
- شنو كتسناو ؟! يالاه عاونوها .
تكلمات لاللة ياقوت من بعد ما فاقت من الصدمة وقالت دايخة 
- ديوها ... اححم.. يالاه ديوها عند الحكيمة تشوف صبعها . 
شداتها وحدة من الوصيفات من ذراعها وبركات عليها حتى غرسات ليها صبعانها فلحمها وجراتها بشوية قدامهم داتها . جلس سيد الملك كيراجع اش دار وبدا يرمش ويدور فوجهو 
- هادي الثانية ديال هاد البنت ... ماتعرف دير والو مافهمتش شنو عجبك فيها 
تبسمات لاللة ياقوت حشمات فبلاصتو وقالت غتخبي تبسيمتها 
- مزالة صغيرة .. يالاه عامها اللول اللي غتصوم فيه 
تعجب وقال كيشوف فيها : هااادي! 
لاللة ياقوت : ااه كتبان تبارك الله .... ولاكن راه مزالة صغيرة .. هادا العام اللول ديالها دالصيام ... عقلها صغير مازال ما نضجات . كنقول نخليها معايا ... راك عارف اولدي كنبغي البنات وكنت نتمنى نولد بنية ... دابا تكبر و تعلم .. مشاء الله زوينة تمنيت كن كانت عندي بنية تشبه ليها 
قلب وجههو وقال : كاين ماحسن منها ... كنتي تشدي اللي عجباتك من جناح الحريم وحتا هما فيهم اللي مزالات صغيرات 
تبسمات لاللة ياقوت وقالت : ايوا كتاب لهاد البنت تبقا معايا ... وبغيتها حيت تضلمات بزاف (سهات قدامها) تضلمات فحياتها وتستاهل تعيش .. لبنات فعمرها كيغلطو بزاف 
شرب زكفة من الكاس وقال كيسرح عينيه 
- ماغلطاتش... هزات يدها على لاللة شامة كانت تستاهل الموت ... وخوات اتاي على مولاي قاسم وحتى هادي كانت تستاهل تعدم فيها ... (تلفت ) عطيتي لهاد البنت كتر من حقها .. صافي عجباتك خليها معاك 
تنهدات لاللة ياقوت وقالت : خليها ... حتى يجي شي حد يتزوجها حسن ليها .
وقف وحط الكاس : اححم ... لعشية مور العشاء وجدو ليا العروسة ... خليت ليك الراحة . 
مشا وخلاها جالسة متبعة ليه العين ساهية كتهضر بينها وبين راسها ... حسن ما تخرجها من فمها وطيح ليه هوا فودنو فاش يحط راسو على المخدة وينعس
- بحالك بحال باك طينة وحدة ... ماتستاهلش بنتي روح الندى .. تستاهل واحد يحميها ويخاف عليها .. ماشي واحد يحرقها ويحرق قلبها . 
دخلات روح الندى للقصر من باب صغير نيشان للكشينة .. يالاه دخلات وهي تنتر كتفها ودفعات الوصيفة وخرجات فيها عينيها وهي كتبكي بالدموع 
- حيدي مني ... ولا غنقتلك بيدي ... السم ديالك الى مشيتي خرجتي فيا غنشربو ليك بيديا سمعتيني .. تففف
دفلات فالارض ومشات كتبكي وتنخصص شادة فيدها. دخلات على زعبول وعبدية للكشينة لقاتهم واقفين واحلين فتوجاد للفطور . تلفتو شافوها كتبكي وهما يقفزو من بلايصهم مخلوعين 
طامو : بسسمم الله الرحمان الرحيم ! 
عبدية : منييين كتخرجي لينا اختي .. عار ربي فرقينا عليك كنا غنموتو فطريقك ... ها العار فرقينا خلينا نعيشو 
ماهضراتش روح الندى وعنقاتهم بجوج كتبكي وتنخصص .. تخلو عينيهم كيشوفو فبعضياتهم وهما يعنقوها كيدوزو يديهم على راسها 
- طامو مالك احبيبتي تاني مالك ؟ شكون دار ليك شي حاجة ؟ 
عبدية: الله يا ربي غير فهمييينا ونتي غطيحي بالبكا 
هزات راسها وقالت : سيدي غيديوه ليه عروووسااا اهىء اهىء اهىء..جيت عندكم تعاونوني ياك انا ختكم 
رجعو باللور بجوج مخلوعات .. غير سمعو كلمة تعاونوني دارت بيه الدنيا وتفكرو السيف اللي داز على عنقهم بجوج
حطات عبدية يدها على فمها كترغب 
- ااالعار اختي فرقينا عليك .. ااالعار شوفي شنو وقع لينا بمسبت الخاتم اللي تلف ... نتي كتعرفي تخرجي راسك حنا اللي غتمشيو فيها أبديا ... خلينا حيين واش بغيتي تقتلينا عاد تهناي 
بدات تبكي وتبوحط : ياك ختكم انا ماشي حراام عليكم ... ياك نسيتو خيري .. نسييييتي فاش كنتي تلاقاي براهيم فالسطح ونلهي ليك انا دريس ..
سدات ليها عبدية فمها وبدات دور فعينيها لايكون شي حد سمعهم 
عبدية: صااافي شششش.. صافي سكتي ها حجر العافية ... عار سيدي ربي سكتي 
طامو : زيدي .. زيدي لبيت لخزين فضحتييينا 
دخلوها كيتسلو لبيت الخزين وسدو الباب 
روح الندى : غادي تعاونوني يااك ... انا حبيبتكم .. نسيتو فاش كنتو تلبسو ليا حوايجي وطلعو للسطح تشبعو بوسان و...
ضربات طامو فخادها وعبدية كتنقز حداعا وتندب ويسكتوها 
- صااافي ششششش... صااافي سكتي ...ياك حتا حنا فكيناك شحال من مرة وشحال من زبلة ... ااش داك لسيد الحاكم نتي كااع بان ليك غير هوا !!! مال كرشك كبيبيرة مالك ! راك فتبقاي لا خبزة لا نصها سيد الحاكم عمرووو يتلفت ليك .. واش عااارفااه شكوون ولا كضحكي على راسك هااه!
روح الندى : ونتوما مالكم سوقكم !
طامو : لا والله ماسوقنا عومي بحرك غير فرقينا عليك.. يالاه نمشيو بحالنا ا عبدية
روح الندى : لااا زعما غير بغيت نقول ... زعماكين هاداك سوقي نضبر راسي غير عاونوني نعرف شكون هادي (عقدات حجبانها وغزات سنانها) شكوووون هادي اللي غايدوه ليه .. ماعندي كي ندير وقالو لي مانوصلش لحريم نبقا حدا لاللة ياقوت ... علاه مافراسكمش! وليت وصيفة ديالها 
طامو : خرجات عينيها) هاااه!! بسم الله الرحمان الرحيم كي درتي بين ليلة ونهار رجعتي وصيفة ام الحاكم ! ياك كنتي محبوسة فجناحو !
تبسمات روح الندى وقالت : داكشي ديال الله ... غبت وفقت لقيت راسي وصيفة .. سبحاان الله 
طامو : التسلييييم .. التسلييييم 
روح الندى : دابا راه رجعت وصيفة ... وشييييييي نهاااار ..شييييي نهااااااار نرجع اميرة ماشي بعيييييد 
سدات ليها عبدية فمها : سكتي .. الحيوووط كيسمعو ها العار سكتي ... واخا تحلمي بعينين محلولين 
روح الندى : وشكون قااال غنرجع وصيفة ام سيدي ... شي نهااااار نرجع اميييرة ونبرعكم .. نتوما غير عاونوني شوييييكيك وصافي ..غير شوييييكيك . غدا رمضان وسيدي ماعندو مايدخل ولا يخرج . نتهناو بعدا واحد الشهر ... ولاكن دابا مانتهنى حتى نبعد هاد العروسة المتعوسة من طريقو . . . مع العشاء كنكون مزالة فجناح لاللة ياقوت ... كي غندير نعرف وانا منقدرش ندوز جناح الحريم ... وريوني فير شكون فيهم وصاااافي . وياك غادي يغسلو ليها ضاروري ... جيبو ليا الحناء والحريكة الخضراء وكريكيبة ديال خنيزة انا مزاوكة 
طامو : هيييه! وماحشوماش عليك!
روح الندى : راه غنرجع اميرة ونحبسك ... هاني علمت ليك ... جيبي داكشي ... عطيني شوية ديال الطحين نخشي فيه يدي راه حرقني اتاي 
خشات روح الندى يدها فالطحين وزكات الامور مع عبدية وطامو وطلعات نيشان راجعة لجناح لاللة ياقوت .. وفطرقها خرجات فالامير سيف الدين ... وقفات مهبطة راسها شوية وعاقدة حواجبها وهوا قدامها كيشوف فيها مبسم . قرب منها شوية وقال 
الامير سيف الدين: شنو سميتك ؟ 
بعدات خطوة للور وهربات وجهها للجنب عابسة .. تبسم وقال 
- راسك قاصح! وباينة فيك صليبة ... شنو سماك الله 
قرب وشد ففكها بشوية ... بعدات للور خايفة وهي ضربها بجرية هربات خلاتو واقف متبع ليها العين . هز صبعو طرطقو فالسماء وحضر فالحين عبد من عبيدو اللي تابعينو من اللور . حنار راسو وقال 
- نعام امولاي؟
الامير قاسم : شوف شكون تكون هاد البنية ... واش من حريم سيد الملك ولا وصيفة من الوصيفات . نبغي نعرف شكون هي قبل ما تعاشا العشية . 
العبد : هي اللولة امولاي .
وصلات روح الندى سخفانة لجناح لاللة ياقوت ، دخلات كتلهج وقلبها غيسكت ووقفات فالطرف مكمدة يدها بطرف ديال التوب ابيض . تلفتات عندها لاللة ياقوت اللي جالسة حدى السرجم كتمنضر فالطبيعة والخضورية
- كي بقات يدك ؟ 
روح الندى: الحمد لله بردات شوية
لاللة ياقوت : تبقاي تبتي شوية 
تلفتات كتنهد جيهت الجردة وقالت : شكون تعرف تغني تغني ليا 
سكتات روح الندى حانية الراس كتسنى شكون تنطق ، ساعة حتى وحدة ماهضرات فيهم . تلفتات لاللة ياقوت نيشان عند روح الندى وقالت
- كتعرفي نتي
حركات روح الندى راسها بزز 
لاللة ياقوت : جلسي قدامي ودندني ليا شوية 
جلسات روح الندى وجمعات نفسها ، بدات تغني وكل شوية يتلف ليها المزيان وتسكت كتكحب 
-روح الندى : احم.. ماعرفت مالي هاد النهار .. مشا ليا الكلام وتلف ليا العبار 
لاللة ياقوت : ماعليكش... صوتك زوين تبارك الله . غانوض نتكا شوية ومانبغيكش تحركي من حدايا 
ناضت لاللة ياقوت وتكات ففراشها .. وجلسات حداها روح الندى ماتململاتش من حداها

ملاحظة: كاينين بزاف دالامراء ماغلطت فحتى واحد سيف الدين بوحدو وقويسم بوحدو . قيدو هادي عندكم سيف الدين اللي تزلل على روح الندى فاش كانت فالساحة كتعلم السيف بالليل وقويسم اللي تسلقو بيضاتو . عقلو على هاد الجوج غنشوفوهم بزاف.. 
قويسم خاطب لاللة رحمة .. وسيف الدين حر طليق .

تعاشات العشية وروح الندى فجناح لاللة ياقوت بوحدها كدور من قنت لقنت .. مرة تبكي حدى السرجم مرة تسها حتى فاقت لاللة ياقوت وعيطات عليها 
- روح الندى ... اجي عاونيني نوض نتوضا نصلي. 
عوناتها روح التدى ودارت عليها توبها ودخلات لدار لوضوء توضاء . 
صلاة وسالات وناضت قادات راسها وقالت
- عطيني سلهامي ... نمشي نشوف ولدي .
ناضت روح الندى بالزربة عطاتها السلهام ووقفات واجدة حاللة عينيها باغا تخرج حتى كتوقفعا لاللة ياقوت وقالت 
- بقاي هنا حتى نجي .. ماعندك علاش تمشي ... قادي حالتك مابغيش وصيفتي نشوفها حالتها حالة . 
خرجات لاللة ياقوت وخلات روح الندى واقفة مبندة كتبكي بوحدها 
-علاش مادينيش علاااش اااهىء اهىء اهىء ... 
مشات لاللة ياقوت فجنابها جوج وصيفات ، دخلات لجناح سيد الملك كتجر فسلهامها ... ومع الدخلة صرباتها ريحت الند والعود والروايح العطرة .. لقات البيت مضوي شموع والفراش ابيض جديد كيشعل مطروز بالخضر وهوا اقف شعرو كحل كيبري باينة يالاه غاسل . لابس الحكل بحال العادة .. سروال طويل وفوقية قصيرة واسعة عليه بتوب شفاف محلول من الصدر . اللي شاف لباسو كيقول يعطي الصحة للخياط اللي كيخيط ليه .. لخياط ديالو بوحدو خاص بيه . يتفنن ليه فالفصالة وينسق ليه اللوان .. وعارفو عزيز عليه التاويل والخدمة المتقونة والعبار مجبد مزايد مناقص .
تلفت عندها مبسم كيدهن يديه وقال 
- اشنو جابك فهاد الوقت ما موالفاش ليك ؟ 
لاللة ياقوت : قلت نجي نطل عليك ... ونشوف العروسة الجديدة كيف عاملة ... على الله تكون منها الكاينة 
سيد الملك: تكون نشاء الله ... كن بقيتي فجناحك علاش طلعتي حتى لهنا 
لاللة ياقوت : جيت نشوفك ... (كدور عينيها فالجناح) بغيت نقول ليك .. راه عطيتهم الوصف ديال العروسة ... ودابا راه كيوجدوها ليك .. على دوقي
تبسم وقال: جلسي ... مزال ماتعشيتي؟ 
لاللة ياقوت : ههه كنتسنى عراضتك 
تبسم و وشار بيدو للطبقة وقال : مرحبا 
جلسات بجنبو غير هي وياه الراس فالراس كتعشى معاه ... مد يدو لحبة دالعنب وهي تقشع الخاتم المذهب فصبعو الصغير وقالت 
- بدلتي الخاتم ؟
شاف فصبعو وحرك يدو : لا هوا نفسو
لاللة ياقوت : قلت غاتكون بدلتيه !
سيد الملك : غيتعطل مايوجد .. وليوم ختمت بيه بزاف ... ماشي مشكل . 
هزات راسها وتنهدات : اممم .. مزيان . وخاتم باك الله يرحمو جا قدك؟
حرك يدو ليمنية وشاف فصبع لباس لخواتم وقال 
- هوا هاداك ... عاد ناوي نحطو حيت رجع مزير على صبعي شوية . 
لاللة ياقوت : خاصك خاتم ليك .. ديالك من غير داك الواحد اللي فيدك باش كتختم 
سيد الملك : ان شاء الله 
وصلات روح الندى للكشينة كتسلت ... بدلات حالتها بقفطان كرونة مطروز بالمذهب حتى هوا محلول من الجناب مع شريب ديال الصم .. طلقات شعرها وضفرات جناب جبهتها للور ودارت خيط ريح رقيق مذهب على جبهتها فيه نجمة فالكرونة .. تزينات فالحلي فودنيها وعنقها ويديها وجلت عويناتها بالكحول اللي شافها يقول اميرة . غادية حسي مسي كتسلت و النبالات ديال الذهب بجوج فرجليها .من نهار خرجات من جناحو ماحيداتهم . 
طلات بشوية مع واحد الحيط وهي تبان ليها طامو وعبدية واقفين فالضلمة مضوين بالشمعة . غير شافوها بداو يشيرو ليها بيديهم بالزربة . وقفات عليهم كتشالي بشعرها وقالت بشوية
روح الندى : طحنتي كلشي كما قلت ليك 
عبدية : طحنت كوولشي .. واللي غاديا عروسة راه سبقاتك جيتي معطلة يا المنحوسة ... دوشات وسالات وراها عند الشريفة كتسرح ليها الطريق 
خرجات روح الندى عينيها بغات تندب وجاتها البكية بغات تقج عبدية
- علاااااش مادرتوهمش فالصينية اللي دخلات معاها للحمااام ! كانت غتشد فيها ريحت خنيزة وواحا يغسلوها بالعسل ما تحيد منها الريحة .... علاااااش مللي شفتوني تعطلت ما بدلتوش زلافة الحنة ديالها بهادشي اهننننهنمن حشوومة عليكم والله واش بغيتوطرطقو ليا مرارتي هاااه .. واش بغيتو تقتلوني 
طامو : راه شلاااا عرايسات كيوجدو هاد الليلة وكيتسناو سيدي يخرج باش يدخلو هما ... راه سيفطونا عند لاللة رحمة نوجدوها تاني لمولاي قاسم وشحال وحنا نوجدو فاللخر سيفط لعبد ديالو عندها قالها راه عيان يعني بلا متجي عندو . وداكشي اللي سمعاتو لينا من فقصتها عمرنا سمعناه 
روح الندى : واني مالي ومال خبيركم ... ماشغليش لا فرحمة لا فبرمة ااااه ياربي. 
دارت مفقوسة غادية وهي تمد ليها طامو الزلافة وقالت 
- وهاد الحنة اللي خرودناها !
روح الندى : شربوووها ..اااختتتتفو
مشات خلاتهم وقفات 
عبدية : الزغبية جاها الغرام وهي صغيرة ... اااح ايما وغرام الصغر كيحمق مولاه . هي فالاصل بلا عقل وزاد كملها 
طامو : نسيتي يامنا فاش كنا قدها ... ياك كنا كي لهبيلات فاش تغرمنا وكنا نباتو الليالي نبكيو حتى يقول لفجر الله أكبر
طلعات روح الندى كتنخصص فالدروج هازة جلايلها .. وفباب الجناح تلاقات لاللة ياقوت راجعة . عبسات فيها وقالت 
لاللة ياقوت : فين كنتي ؟!
حنات روح الندى راسها والدموع كتسيل على خدودها وقالت 
مشيت نبدل الاللة كما قلتي ليا 
لاللة ياقوت : سيري جيبي ليا منديلي طاح ليا فجناح سيدك .. يالاه سربي دغيا

هزات روح الندى راسها بالزربة وقالت 
- واخا لاللة 
مشات كطير مشافتش موراها كاع كتقول ياربي فوقاش نوصل.. وصلات لجناح سيد الملك كتلهج وعينيها معلقين غتموت ودخل عندو .. حبسوها حتى دخل العابد عند سيد الملك شاورو عاد سمح ليها وفتحو ليها البيبان . دخلات معلقة عينيها لقات راسها وسط البيت مزين بالشموع ومعطر منكه بالعود .. سرحات عينيها حاللة فمها كتشوف حتى طاحت عينها على العروسة جالسة فطرف السرير لابسة لباس بلدي مطروز وشعرها محلول شهب حد لكتاف . مزينة بالحلي ومكحلة لعوينات . الزين زينة منكدبوش .. وحريمو كاملات زينات وحدة تعاند لخرى . ولاكن روح الندى غير شافتها وهي تكحل بالعمى وزادت سوكات بسم الحية فاش شافتو جالس بجنبها حدا الطبلة كيشرب اتاي . عضات روح الندى فالصبر وقالت حانية الراس 
- سيفطاتني لاللة ياقوت ندي ليها منديلها اللي طاح هنا 
هز حاجبو فيها كيوزنها من راسها لرجليها وقال
- هزي المنديل دغيا وسيري 
قربات حانية راسها وجامعة يديها مها كتقلب فالارض بعينيها وتمشي وتجي فبلاصتها . 
ناض سيد الملك ووقف ومشا عند العروسة وقف قدامها كيشوف فيها . هز التوب الشفاف على وجهها بشوية ورفع راسها عندو كيشوف فيها . شوية تلفت لقا روح الندى واقفة حداه وكتشوف فلعروسة مخرجة عينيها فلعروسة بالدموع دايزين .. نسات راسها ورجع وجهها حمر وصدرها تزير كيطل وينزل . عقد سيد الملك حواجبو وشاف فيها مطلع واحد الحاجب عاد فاقت وبدات ترعد وتمتم وتقلب بعينيها 
- واقيلا طاح غير هنا .. قالت لي مانمشي حتى نديه ليها .. مكتنعس حتى تحطو عند راسها . . . يكون غير هنا 
تكلم وقال : جلسات لهييييه ماشي هنا 
هبطات روح الندى راسها ومشات جيهت الطبلة فين نعت ليها ووقفات بالجنب ساهية فيهم ودمعتها على خدها نازلة .. شافتو قرب ليها وهي تبدا ترعد فشفايفها يابسة فبلاصتها .. دور وجهها قبل مايوصل للعروسة المبسمة عاجبها الحال وكتسنى غير روح الندى تخرج من اتما وقال
- لقيتيه؟
توكضات من الصمكة اللي ضرباتها ومشات جيهتو كتقلب ودور بشوية و تشوف فيه بجنب عينيها 
روح الندى : قالت لي طاح ليها هنا حدا السرير ... يمكن فين جالسة ... (شارت بعينيها عند لعروسة )
رجع سيد الملك للور فعينيه تبسيمة خفيفة وهوا كيشوف العافية فعينيها ماكرهاتش تحرق بيها العروسة .. تنهد وقلب وجهو غادي جيت الحمام رافع راسو وقال
- الى مالقيتيهش حتى لغدا . 
يالاه دخل للحمام وهي دفع لعروسة بالجهد وقالت
- حيدي .. حيدي من هنا .. نوضي نقلب على المنديل .. نوووضي
(كدفع وتخربق ليها حوايجها)
وقفات العروسة مخرجة عينيها وقالت 
- حتا قلنا متي وتهنينا منك .. اش جابك ... سيد الملك ديالي ... ومن هاد الليلة مايبقا لا ليك لا لغيرك ودابا خرجي من هنا بلا مديري السبة بالمنديل 
غرغرو عرينين روح الندى وبغات تموت وهي دفعها جيهت واحد الطبلة مزينة بالشمع وقالت 
والله ماتحلمي بيييه اهىء اهىء .. والله شفتيه والله حتى نقتلك .
العروسة : هه! جربي قتليني يالاه ... شكون اللي عروسة انا ولا نتي دابا! غايخرج ويخرجك من هنا .. ومايجي فين يصبح الحال حتى نصبح حاملة وندفنك حية ديك الساعة 
ماشعراتش روح الندى حتى هزات واحد الشمعة ولاحتها عليها شدات ليها فشعرها كلاتو ليها وهي ترجع اللور كتفتف مخلوعة خلات العروسة طتغوت وتنقز فبلاصتها . هزات المنديل اللي كان قدامها تالف ومن الصباح وهوا يشير ليها ودايرة راسها ماشافتوش وبغات تهرب حتى تلاقات بسيد الملك خارج زربان سمع الغوات وقالت كتفتف 
- لقيتو صافي .. غانديه 
تلفت جيهت العروسة لقاها كتنقز ورجع خزر فروح النظى وهي تحل عينيها مخلوعة ومشات كتجري جيهت العروسة كضربها بالمخدة وطفي العافية 
- روح الندى : مسكينة .. مسكينة بغات .. ببببغات توقف باش نقلب . علععغلى المنديل وهي تشبط ليها الشمعة فشعرها .. صافي ..هاهيا طفيتها .. لاللة كتسناني

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.