عروس الملك السابعة الجزء 30

من تأليف Ghazal trust
2018قصة مُلغاة

محتوى القصة

رواية عروس الملك السابعة , زوجة الملك السابعة

بغات تسلت وهوا يوقف ليها فطريقها وقال 

- بقاي بلاصتك 

هزات نص عينيها فيه وقالت مرعودة
- ماشي يانا اللي حرقتها هي كحزات عند الشمعة بوحدهااا 

غوتات بالجهد العروسة وقالت كتبكي 

- هي اللي دفعااااتي ورمات عليا الشمعة حرقات ليا شعرييي كااامل ااهىء اعىء.... هياااا

بغات طير عليها لعروسة تنتفها بالغدايد والفقصة ديال الشعر اللي مشا ليها وهوا يزعف سيد الملك مخرج عينيه وقال

- سكااات ... خرجي رجعي لجناحك والى عاودتي هزيتي صوتك نقبرك حية .

حنات العروسة راسها وخرجات من البيت بقات روح الندى بوحدخطها اللي كتكمش المنديل فيديها وتلوي فيه بالخلعة . هز راسو وقال 

- شنو دابا؟ اشمن عقاب تبغي لراسك على هاد الشي اللي درتي ؟

هبطات عينيها وقالت : اللي بغيتي 

مد يدو وهز فكها شاف فوجهها وقال : عاجبك الحال مع الاللة ياقوت ؟ 

حركات راسها وقالت : اه بزااف 

تبسم وقال : حسن من جناح لحريم؟ 

حركات راسها وقالت : اه 

شاف فيديها وقال: ديك مزيانة ؟ 

هبطات راسها وقالت : شوية 

شد ليها فيدها بشوية وقال : مغتعاوديش تمدي يدك على شي حاجة ماشي ديالك مرة اخرى ياك 

حركات راسها وقالت بسمة : لا .. منعاودش 

دوز يدو على شعرها كيتغزل فيها بعينيه وقال :

- وتبعدي من طريق لحريم ديالي ياك ؟

شافت فيه كتبوحط وتلوي فعنقها وقالت 

- انا قلت ليها نوضي نقلب على الشمعة .. اا اال الا على المنديل وهي دفعني وناضت عندي ... لقيت المنديل فبلاصتها جالسة عليه وهي توسدات على الطبلة وشدات ليها العافية فشعرها 

هز صبعو وحاجبو وقال بشوية : مكنبغيش اللي يكدب عليا ... كنبغي اللي قاصح.. ويقولها واخا يتحط السيف على عنقو .

رمشات كتمتم وقالت : و . وو.وهي اللي عايراتني ... قالت لي غير تحمل ودفني حية !!! وانا .. وانا نن نرمي عليها الشمعة 

عقد حجبانو ويدة مزال شادة يدها وقال 

- تستاهلي لقطاع لهاد اليدين ... ولاكن غنسمح ليك ... عرفتي علاش؟

حركات راسها معلقة عينيها فيه وقالت : لا

دوز يدو على خدها بشوية وقال : على الضلم اللي ضلمتك لبارح ... كان يحساب ليا مسيفطك شي حد وعدبتك . داكشي علاش ليوم غنسمح ليك حيت تعدبتي لبارح على والو 

تبسمات وقالت كتلوي راسها والمنديل فيديها : غييير ضلمتيني والله 

ضحك وقال كيدوز يدو على راسها : علاش ماقلتيش ليا باللي لخاتم وحل ليك؟ 

روح الندى : ماقدرتش ... وتلف ليا داك الخاتم لاخر 

سيد الملك: لخاتم لاخر حطيتيه فوق حوايجي حدا راسه ونسيتيه ماشي طاح ليك . دابا غاتمشي تدي المنديل للالام لياقوت .. وترجعي عندي صافي؟

تبسمات حانية راسها فرحانة وقالت : واخا 

شد راسها بين يديه وقال : هادشي يبقا سر بيناتنا .. مايعرفو حتى واحد وميشوفو حتى واحد تفاهمنا .

حركات راسها كضحك حشمانة وهوا يبعد هاز راسو وقال مبسم 

- سيري عطيها المنديل .. ورجعي دغيا . 

هزات راسها فرحانة شافت فيه ومشات بالزربة خرجات كطير راجعة لجناح لاللة ياقوت تعطيها المنديل

دخلات عند لاللة ياقوت لقاتها متكية ففراشها على جنبها ومسرحة رجليها كيدلكوهم ليها الوصيفات . مدات ليها روح الندى المنديل وقالت 

- هاهوا لقيتو 

شداتو لاللة ياقوت وقالت : شنو لقيتي سيدك كيدير؟

جلسات روح الندى فالارض وجمعات رجليها 

- لقيت عندو العروسة

زفرات لاللة ياقوت من مناخرها وقالت : ان شاء الله تكون منها الكاينة ... وتجيب شي ولي العهد ونزفوها ليه عروسة . خاص غير هوا ترشق ليه عليها وتعجبو . ويمكن كانت عاجباه وطلبها 

بلعات روح الندى ريقها وقالت : لعروسة مشات بحالها الاللة ياقوت 

خرجات لاللة ياقوت عينيها وقالت : مشات!!! وعلاش؟ ياكما وقع شي مشكل ؟

روح الندى : من الخفة اللي فيها طاحت بوحدها على الطبلة وشعلات ليها العافية فشعرها كلاتو ليها كااامل وخرجها سيدي دار بناقص

ناضت لاللة ياقوت من بلاصتها جلسات وقالت : كفاااش؟!!! ويييل الشيطان ! هي مشاالت لعروسة!

ضحكات روح الندى وضحكات معاها حتى الوصيفات وقالت 

- كن شفتيها يا لاللة كيف رجعات ههه قرااع ليها الراس رجعات بحال العتروس وريحت الشيااط كتعطي منها ... خرجات كتزطم فجلايلها هههه

عبسات لاللة ياقوت وزمطاتهم كاملات قطعاتها فيهم وقالت

- هادشي مكيضحكش... اري ليا سلهامي دغيااا 

ناضت وقفات لبسات سلهامها وخرجات جرات موراها روح الندى و وحدة من وصيفاتها مشات نيشان لجناح الملك .

كان هوا واقف عاطي بضهرو للباب كيشوف من سرجم طويل . يديه موراه بجوج كيتسناها ترجع حتى تحل الباب وهوا يتبسم رافع راسو .. دوز يدو على صدرو وتلفت حتى كيتصدم بلاللة ياقوت موراه واقفة مبسمة وبجنبها روح الندى حانية راسها . جمع الضحكة وزفر من مناخرو وقال 

- شنو اللي جابك فهاد الوقت ؟

تكلمات وقالت : جيت نطمأن عليك وصافي ... بنفسي ختاريت ليك العروسة وبنفسي جيت نشوف اخرتها معاها ... كي جام دوقي ؟

تبسم بالجنب وقال : مشات بحالها . 

لاللة ياقوت : ويل الشيطان !! وعلاش! اش هاد الريحة كنشم ! 

بدات دور عينيعا فالبيت وهوا يهز حاجبو سول بيه روح الندى واش هي اللي قالت ليها شي حاجة لاكن هبطات روح الندى راسها وحركاتو من القنت حتى للقنت هازة فيه عينيها ووجهها صفر . ضرباتها بنكرة ومسحات السماء بيدها . رجع عبس وقال 

- اشمن ريحة هادي؟

لاللة ياقوت : ريحت لحريق ! 

قال بدم بارد : سيري لبيتك ترتاحي ... راه مكاينة حتى ريحة غير جاب ليك الله ... عيان وباغي نرتاح دابا 

تنهدات كتلوي راسها وقالت : ايوا خليت ليك الراحة . تصبح على خير 

تلفتات دارت وهوا يهز عينيه فروح الندى ويشوف فيها بمعنى ترجع عندو . حنات راسها وتبعات لاللة ياقوت راجعين لجناحها .. وفطريقها عقداتهم لاللة ياقوت وقالت 

- باش تعرفو بللي سيدكم مكيربي الكبدة على حد .. عندو النسا زايد ناقص.. بلا متصدع شي وحدة راسها وتبغيه حيت داكشي اللي مضمرة عليه عمرها توصلو .. حسن ليها تنسا وتشوف لراسها شي حاجة تنفعها .

روح الندى فهمات المعنى فالسماء . وشكات لا تكون لاللة ياقوت كتمعني عليها .. لاكن رجعات وثالت بينها وبين راسها باللي شلا جاريات و وصيفات كيتمناو يكونو بجنب سيد الملك وماشي غير هي بوحدها . 

رجعو للجناح وجلسو مونسين لاللة ياوقت اللي تقلب ليها الجو وتغير عليها الحال مللي ماصدق والو من داكشي علاش كانت ناوية . حلفات لا نعسات .. وغير متكية وسااهية كل مرة طلب حاجة من الوصيفات ؛ وروح الندى جالسة بخال الى جالسة على الشوك ... حامية فيها البيضة وكتسنى غير امتى تنعس لاللة لياقوت باش تنوض تمشي عند سيد الملك اللي كيتسناها . بقات فير هي مقابلاها فالبيت حاللة عينيها معاها و كل مرة تسوط وتنهد .. ويالاه شافت لاللة ياقوت غمضات عينيها وهي تنوض كتسلت بشوية حتى للباب .. حلاتو بغات تخرج وهي تهز لاللة لياقوت عينيها وقالت دايخة بالنعاس 

- روووح الندااا.. عطيني نشرب . 

عصرات روح الندى عينيها وزيرات على سنانها بغات تندب حناكها . نفضات يديها ورجعات كتزطم فحوايجها عمرات الكاس بالزعفة ومداتو ليها وجلسات بجنبها حاطة يدها على خدها كتسناها ترجع فالنعاس . 

حسات بيها نعسات وهي تنوض تاني كتختل جيهت الباب باغا تخرج .. سبقات رجلها بغات تفوت الباب وهي تسمع 

- رووح النداااا .. سدي عليا السرجم جاني البرد .

رجعات تاني كتغزز سنانها سدات السرجم وجلسات كتمشي وتجي بضهرها وتسنا فلاللة ياقوت ترجع فالنعاس ويشد فيها مزيان 

صبح الحال وصبحات روح الندى ناعسة فبلاصتها عوجة وعليها الوصيفات كيفيقو فيها ويحركوها تنوض 

ناضت مضهشرة بزز منها كتشوف قدامها دايخة . يالاه توكضات وهي تفكر شنو وقع لبارح وميعادها مع سيد الملك اللي غفلات عليه ... اش دير دابا .. هادشي اللي كان نيييت ناقصها غير تخليه سهران الليل كيتسنى ! ومعااامن مع سييييييد الملك ... غادي يقطع راسها هاد المرة مافيها شك . 

ناضت تالفة كتفتف عقلها محاضرش معاها وغير كاتمشي وتجي فبلاصتها معارفة مادير . كتهز لحاجة من بلاصة وتحطها فبلاصة حتى خرجات فيها كبيرة الوصيفات عينيها وقالت 

- تبتي شوية مالك غادا جايا عليا!!! جيبي الورد والخزامة لاللاك غدخل تغسل دابا شوية 

حنات روح الندى راسها ودخلات للحمام وحدات داكشي اللي طلبو منها . دخلو لاللة ياقوت بحال العادة غسلو ليها وخرجها بحال لعروسة لبسوعا وعطروها وزينوها ونزلو معاها للجردة سقات وريداتها بيديها ودوزات صباحها كتسرح فرجليها حتى ودن العصر وهي ترجع للقصر مع وصيفاتها . سولات على سيد الملك حتى حد ماعطاها خبارو واللي سولاتو كيقول ليها مابانش هاد النهار كاع . قررات تمشي تصبح عليه تاني فجناحو ومشات عندو . 

دخلات بوحدها عندو وخلات وصيفاتها فالباب.. لقاتو مزال ففراشو ناعس على ضهرو وصدرو عرياان . طفات الشمعات اللي بقاو شاعلين وقالت 

- مغيدوزش ليك الصيام خاصك تعاود النهار.. العصر هادي وعمرها وقعات ليك !

تلفتات مبسمة وهي تشوفو كيتحرك فبلاصتو .. حل عينيه ومسح على شعرو وناض هاز واحد الحاجب كيحل فعينيه .. تكلم بصوت غليض مبحوح شوية وقال 

- العصر هادي! 

لاللة ياقوت : اييه العصر ... ومابقا والو للمغرب .. واقيلا نعستي معطل ؟

ناض كيدوز يدو على شعرو وقال : 3 ايام متابعة هادي مكنعس حتى للفجر ... يفوت رمضان ان شاء الله ونعوضو . كي صبحتي؟(باس يدها )

تبسمات : الحمد لله .. الله يرضي عليك ... الفطور ان شاء الله معانا ياك 

حرك راسو وقال : ان شاء الله 

تحركات دازت حدى الطبلة القصيرة فالارض وهي تقيسها حتى تزلع الكاس وقاص توبها . تحنات شداتو وعيطات 

لاللة ياقوت : روووح الندااا ... روح الندااا 

دخلات عندها روح الندى بالزربة ومع الدخلة جات عينها فعين سيد الملك وهي تهبط راسها وقالت

- نعام الاللة ؟ 

لاللة لياقوت : عاونيني ... توبي توسخ ... ميمكنش نخرج بيه هاكا 

روح الندى : نقرطو ليك فالحمام ؟! 

لاللة لياقوت : يالاه زيدي دغيا 

مشات معاها للحمام غلساتها وقرطات ليها الطبعة بالماء وقالت 

- صافي تحيدات الاللة 

لاللة ياقوت : سيري جيبي ليا توب جديد من بيتي نبدل بيه ... خايبة فحقي نخرج هاكا ويشوفوني . 

روح الندى : واخا لاللة . 

خرجات روح الندى دورات عينيها فالبيت مابانش ليها سيد الملك ومشات كطير للباب عند الوصيفات سيفطات وحدة منهم تجيب التوب ورجعات دخلات كدور بشوية فالبيت وتسرح فعينيها قاتلها لفضول قين يكون مشا ؟ واش خرج؟! ولا فشي ركنة وماشافتوش؟ لالا واقيلا خرج . 

تلفتات للطبلة وهزات طرف دالحلوى بالكوك خشاتو ففمها دكساتو وبدات تمضغ واقفة وتهز وتخشي فوجهها على بيدمن يوصل التوب . حسات بالحرارة موراها وهي تلفت بالزربة مخلوعة وفمها عامر كتنضغ لقاتو موراها عريان لابس سروال خفيف واقف مخرج فيها عينيه وكيشوف ليها ففمها وهي مصدومة حصلات حصلة ديال الديب فالزريبة اللي عمر كرشو ووحل فالتقبة


شافت فيه مخلوعة مقادرة تسرط ولا تبزق . بقلت تبررق فيها حتى نطق وقال 

- كتاكلي رمضان! 

حركات راسها بالزربة : اننن..اعععء 

سيد الملك : وشنو هادشي اللي فمك ؟ حجر!

حلات فمها حطات فيدها داكشي كامل وقالت بوجهها حمر

مافطرتش غير دقت ! و.. وفيا الجوع كاع متعشيت لبراح 

تعجب وقال : علاش نتي ماحقش عليك؟! وشكون خلاك بالجوع ؟ واش معارفاش ولا شنو!

روح الندى: غير دقت وصافي جاني الجوع 

سيد الملك : جاك الجوع ونتي تاكلي ! حطي داكشي اللي فيديك هنا (شار بصبعو للطبلة) غاتردي هاد النهار ضاروري فاش يسالي رمضان وتصدقي عليه .. وغتبداي تصومي بحال كلشي ماتفطريش حتى يسالي رمضان .. 

روح الندى : وعلاش!!! 

سيد الملك : كفاش علاش! واش ماوراك حتى واحد ماقراك حد مافهمك حد 

روح الندى : مافهمتش! 

مسح لحيتو وتنهد : سبحان من خلقك!!!! فايقة فتحراميات شي حاجة اخرى والو ... سمعي اش غنقول ليك .. ماغاديش تحطي شي حاجة ففمك .. لا ماء لا طعام حتى يأدن المغرب ... مور المغرب ااجي عندي 

روح الندى : لاللة ياقوت ماخلاتنيش لبارح نخرج ووو

سيد الملك : عارف ماغاتكونش خلاتك ... مهم من دابا ماتاكليش حتى يأدن المغرب ويحطو ليكم تاكلو ... ومور المغرب اجي ... سيري دابا شوفي لاللاك ياقوت . 

تقلب عطاها بالضهر ومشات هي تعرضات لحوايج جداد فالباب ودخلاتهم للالة ياقوت لبساتهم وخرجات من جناح سيد الملك رجعات لجناحها وجلسات كتقرى فالقرأن بجنبها روح الندى جالسة متحركاتش حتى قرب يأدن المغرب عاد ناضت وقفات وقالت 

لاللة ياقوت : جبدة لي قفطاني لخضر ... قربات تأدن وغيكون الفطور وجد 

ناضت معاها روح الندى وجدو ليها حوايجها ولبسوها وقادو ليها ونزلو معاها بشوية دايرة التاج على راسها كتجر فجلايلها . وصلو لجناح وسط القصر كبير و وااسع فيه طبلة لوسط مدورة كبيييييرة وسطها طبلة وحدا اخرى من الخشب فوق منها كدور بشوية بحال الرحى مستفة فيها الماكلة واللي بغا شي حاجة يدور الطبلة اللي صغر شوية من الطبلة لكبيرة دايرين بيها شلا عبيد وشلا خدم مستطرة بكاع اللي تشهاه النفس .. كانت العاءلة الملكية كاملة حاضرة ودايرة بالطبلة من غير جوج ديال الكراسة واحد حدا واحد اللي خاويين بيناتهم . تقدامات لاللة ياقوت بشوية كتمختر غادية لبلاصتها ووصيفاتها موراها .. غير وصلات ليها وتقابلات معاهم وهي تهز لاللة شامة راسها هي ولاللة شمس الضحى وشافو روح الندى قدامهم حية صحة سلام ماعليها حتى خبشة ... بلعكس .. منورة ومبهجة بحوايج نقية كضوي ودافرة سالفها للجنب . واقفة وكتشوف فيهم لنص عين مكمشة فمها كي النقطة .


تصدمو !

تبهطو ! 

ماعرفوها منين خرجات ليهم .. بقاو غير حاليين فامهم ويبرقو بعينيهم .. شافو فبعضياتهم ورجعو شافو فيها . . وحتى اللسان اللي ينطق ويسول تلوا ليهم وماصلاح ليهم كي يديرو ينوضو من تما والنفار كينفر بلحن حضور سيد الملك اللي دخل عليهم فديك الوقيتة . كلشي وقف ليه ، اما لالياتي خواو بيهم الركابي ومشات بيهم الارض وجات .. بزز منهم وقفهم واخا ماقدروش . 

شاف سيد الملك مبسم بنص عين فروح الندى اللي واقفة بجنب لاللة ياقوت ..بين الكرسي ديالها والكرسي ديالو من اللور . 

جلس بلباسو الفخم والتاج على راسو لابس الخضر. الهمة والشان والنخوة والتيهان . 

قال المغرب الله وأكبر وحتى حد ما مد يديه ... حتى مدها سيد الملك هوا اللول هز تمرة فطر بيها عاد كلشي مد يديه وبداو يفطرو .

كانت عين الامير سيف الدين والامير قاسم كتسابق على روح الندى .. حتى واحد ما قدر يهبط عينو عليها .. وعلى شوييييية يكشفهم الملك كن ما قلبو الشوفة . 

هزات لاللة لياقوت يديها لوصيفاتها وتسلو من تما بيناتهم روح الندى مشاو يفطرو حتى هما . حضرو الغنايات بعدما فرقو صيامهم وبدا يدندنو ليهم ويطربو مسمعهم . وغير سالا الملك فطورو وجمع يدو .. كلشي جمعو يديهم حتى هما وحتا واحد مايزيد لقمة من موراه . 

ناض وناضو معاه ولاد عمو وعمامو يصليو صلاة التراويح فالرحبة لكبيرة خارجة على لقصر مع الشعب . طلع فوق العود ديالو وتبعوه حراسو و الامراء ولاد عاءلتو وخرج ، وحتى النساء تجمعو فمسجد القصر كاملات ومنهم لاللة ياقوت ولاللة شمس الضحى اللي بزز منهم مشاو يصليو ومقدروش يخرجو من الجماعة . 

اما روح الندى سمحات فالوصيفات ومشات كطير عند طامو وعبدية وزعبول تخشات وسطهم فالكشينة فين مفرشين فالارض كيفطرو وجلسات هادي تنفع هادي الضر حتى تنفخات كرشها وتقالت وهي تنوض قالت 

- نمشي قبل ماتسول عليا لاللة ياقوت 

جراتها طامو من يدها وقالت : لالاك راه كتصلي التراويح مزاااال متسالي 

روح الندى : هي نمشي قبل لا تسالي

عبدية : فين ماشيا؟

روح الندى : عندي مانقضي .. حتى نرجع .


عبدية : هاي هاي هاي على لمرى رجعات تصووووم ..ايييه!

سمحات فيهم روح الندى ومشات لجناح الملك كتفرفر ، وقفها العبد فالباب ماخلاهاش دخل وقال 

- سيدي مكاينش دابا سيري حتى يجي 

روح الندى : غنتسناه هنا .

وقفات فالجنب كتسنا فرحاانة باش غير يرجع تخبرو باللي ماكلات ماشربات حتى قال الله وأكبر. 

عيات تسنا حتا طابت بالوقيف . شافتو تعطل وماعلابالهاش بصلاة التراويح وهي تهز جلايلها وتمات راجعة بحالها .

مع الدورة خرجات فلاللة شامة ووصيفاتها كيدورو فالقصر .. غير شافتها وهي تزفر وخرجات فيها عينيها وقالت 

لاللة شامة : شكوون نتي .. من الانس ولا من الجن 

هزات روح الندى خنافرها وقالت : بغيتي تعفرفي؟ انا من الجن ... والى ماخويتيش طريقي غنشلل فيك النص ... مابغيتش نحمقك ونخرج ليك كل ليلة ... عارفاك نتي ومك اللي رميتو لحجر فالمطمورة .. ولاكن كن كنت بنادم كن صفيتوها ليا . ودابا مللي عرفتي شكون نكون .. خوي ساحتي دااابا قبل مانهز يدي عليك ونعوج ليك الفك 

حلات روح الندى عينيها خلعاتها وهزات يديها فالسماء بحال الى بغات تشيرها وخي تهرررب لاللة شامة بوصيفاتها ماعاوداتش دارت موراها بحال الى عمرها كانت واقفة تما .. تيقات روح الندى وكان قلبها غيسكت بالخلعة .

اما روح الندى وقفات هازة راسها كضحك وترجع تهبطو حتى للارض شادة كرشها بالضحك حتى شبعات وكملات طريقها كل شوية تهز بالضحك راجعة لجناح لاللة ياقوت . 

وصلات عندها وتركنات حداه وخلات تاني الملك فجناحو كيتسناها .

تحط العشاء وماحطاتوش ففمها . 

تحط السحور وحتى هوا مادازش مع حلقها .. الوصيفات كلاو وعمروها وهي كتشوف فيهم وتشها ماكرهاتش ولاكن مشا عقلها مع كلام الملك اللي شداتو بالمقلوب وقال ليها ماتاكلي حتى تأذن المغرب . 

وداكشي نيت اللي دارت ، باتت بالجوع الليل كامل . وبات الملك فايق كيقرا فالقرأن حتى أدن الفجر وصلى ونعس . 

اليوم الثاني داز بحال اللول . روح الندى مركنة وعينيها داخلين .. بغات تاكل وتشرب و ماقادراش .. جاها الصيام صعييب سخسخها وحتى لاللة ياقوت ميكات عليها ، فخاطرها كتقول يمكن مشات عليها الدم وصايمة ومزال ما مولفا داكشي علاش غير مسهوتة حتى الهضرة مقادرة تخرجهها . 

وجدات الطبلة دالفطور تاني وسط القصر وكلشي تجمع عليها ، ودخل الملك عليهم بحال العادة لقا السلام وجلس بلاصتو . دور عينيه عليها مابانتش ليه .. وكل شوية دخل عليهم وصيفة كيهز راسو ويقول هيا . ومقابلين معاه جالسة لاللة شامة ولاللة شكس الضحى حانيين الراس والشهية مسدودة .. باينة حكات ليها على ماجرا بيها وتيقو باللي روح الندى ماشي من الانس وانما هي جنية . 

شاف الملك حتى عيا بعينيه حرام واش بان ليه خيال روح الندى .. علاش كاع وصيفات مو لاللة ياقوت حاضرات الا هي ؟ لاكن هاد المرة بقات روح الندى مع الوصيفات لخرين فجناح اخر فيه طبلات قصار مفرقين كل طبلة مجمعين عليها شوية شوية من النسى والبنات . جالسة مربعة رجليها كتسنى فوقاش يأدن باش تحط وجهها فالميدة ، فمها نشف وراسها تقال .


أدنات المغرب .. ونزلات روح الندى عنية سبقات بالماء هوا اللول ودخلات فالماكلة طول وعرض ماهزاتش راسها . بقاو الوصيفات يضحكو بيناتهم ويتغامزو عليها .. حاسدينها و غايرين من زينها وكيقلبو غير على الوجيبة فين يتشفاو فيها . كل وحدة تغمز لخرى .. لا اللي معاها فالطبلة ولا اللي بعادات فطبالي اخرين ، عيقو بالضحك والغميز وهي مجايبة للدنيا خبار كتبان ليها غير الماكلة قدامها هاد الساعة ، ودنيها مسدودين وعينيها عامرين غير بالشباكية والتمر والحريرة .. يد الملوي ويد فبغرير وفمها فالزلافة .. تشربها بلة معلقة وتخبطها مع الطبلة كتلس جناب فمها وتقول لكبيرة الوصيفات

روح الندى : زيييديني 

كبيرة الوصيفات : هادي التالتة ماشبعتيش؟

روح الندى : غير زيديني باقي فيا الجوح 

نطقات وحدة من البعيد كطل وضحك وقالت

- زيديها لا تنوض تاكلنا ههههه 

ناضو لبنات كاملين كيقهقهو ويضحكو .. اما هي جمعات يديها مارضاتش وبدات تخزر فيهم وناضت كتسوط وتمتم 

روح الندى : غير حتى نرجع اميؤة وتشوفو شني ندير فيكم . 

خرجات باغا تبكي مارضاتش .. كلشي خلاتو كيضحط ويهضر عليها .. تحماو ومالقات شكون يجي من جيهتها ، اش دارت ليهم وعلاش هاد السم اللي كيغلي فقلوبهم من جيهتها . ومنهم حتى وصيفات السحيحيرات حتى هما .. ولاكن هادو ضحكو غير بشوية حيت خايفين تشيرهم ولا تعوج فيهم شي ضلعة ، ولاكن كانت انس ولاجن .. حالفينها فيها وباغيين فيها الخدمة . 

مشات كتبكي ومسح فمها مع حناكها غادية لجناح لاللة ياقوت حتى كتهرج فيها عبدية هازة فيديها الصينية ووقفاتها شادة فيها 

عبدية : امااالكي تاني شكون بكاك .

هزات خنافرها كتمسح وجهها وتشهق وقالت 

- لهلا يحيي الزمان حتى يضحكو عليا ... غير بلاتي والله فديك الزرمومية اللي عايراتني لا خليتها . 

عبدية : دابا شنو وقع ليك؟ واش فطرتي؟

روح الندى : مزال مكملتش

عبدية : زيدي نعطيك تفطري زيدي .. راه الخير موجود وغير مكفح . 

داتها عبدية الكوزينة وزرداتها حتى تقلات مابقاتش قادرة طلع النفس ولا توقف على رجليها ، تكات مدلية راسها وحداها الصينية كل شوية تنقب منها حيت عارفة راسها ماتزيد حتى ضغمة الى وصلات العشاء . عند بالها تاكل حد المغرب وصافي تحبس ، داكشي علاش قالت اللهم نعمرها مزياان باش مايوقع ليها كما وقع ليوم وتسخف بالجوع . 

تنفخاات وبدات تلهت .. وماجمعات يديها حتى طير زعبول الصينية من حداها وقال


- واااش بيتي تموتي!!! برااكة عليييك فين بيتي تزيدي

روح الندى: ااي.. امي.. غير خليها حدايا شوية . 

زعبول : نوضي سرحي رجليك راك تقلتي 

بعد الصينية وخلاها مجبدة .. شوية وهي تخرج عينيها وناضت شادة جنبها مشات لجناح الملك ، ساعة وقع ليها ما وقع لبارح وتسنات حتى عيات ورجعات هاضمة داكشي اللي كلات بالجبدة اللي ضربات من الكشينة حتى لجناحو . 

تركنات فجناح لاللة ياقوت تاني وسدات فمها ماكلات حتى ضغمة . 

3 ايام وروح الندى كتصوم من المغرب للمغرب وهاد النهار ماعتباتش جناح الوصيفات ومشات للكشينة سخفاانة كتلهت جلسات فالارض كتسنا تأدن باش تبدا . غير قابت الله واكبر وهي تهبط هبطة وحدة على الماكلة . تاكل ماتبع وكل ساعة تعطي زلافتها لوعبول يعمرها ليها حتى خوات لبرمة 

- زعبول : مابقا مانزييدك .. صافي خوات .. ااربي السلامة بقا ليك تاكلينا 

روح الندى : رااه البرمة باقي فيها 

زعبول : نعطيها ليك نتي والى طلب شي حد فطبلة الملك الزيادة اش ندير ليه ؟ نحطك ليه ؟

بدات بالتبوحيط : ياااك ازعيبيلة ديالي عزيتي فيا قطرة !

عبدية : شربي لحسوة حتى هي زوينة ... راه لحريرة كترت فيها الكرافس غادي دوخك واش كزال مادختي

طامو : زيدها شوية ازبول راه موحال واش يطلبو باقي الزيادة .. عطيها راه عامها اللول فالصيام 

ضحك زعبول ومشا للبرمة عمر ليها زلافتها حتى للفم وقال 

- ايييه ..تباارك الله .. على هادي نزيدك جووج 

عبدية : اااباالركة عليهااا وييييلي حي شربات 4 وصربات صينية دبغرير والملوي وكملات بشبمة دالشباكية وغراف ديال اللبن فيين غتزيد!

روح الندى : لا غير زيدني .. كيجيني الجوع 

عمر ليها زعبول الميدة من اللول وبقات ضرب حتى تقلبو عينيها .. حتى رجعات تكرع وتخرج الماكلة مع التكريعة ..كرشها وصلات لفمها اللي شافها يحلف عندها سبع شهور ومزالة تنقب وتعمر . 

تزير عليها القفطان وسرحات رجليها سخفانة وبدات تعرق . عاودات ليها طامو السبولة وقالت

- غتموتي يا ربي السلامة وشوفي كيفاش كتعرقي ... نوضي دوشي باش تخفافي 

قالت روح الندى كتلهج : حتى تمشي عليا الدم 

ضربات عبدية وطامو حناكهم وقالو فدقة 
- ويييلي حي !! وكتصومي!!

روح الندى : ايوا شنو ... ومن المغرب للمغرب بحالكم 

قبل ماتكمل كلامها وقف عليها عبد الملك وقال بشوية وهي مسهوطة فوق الزربية 

- سيدي بغاك فجناحو دابا تكلمي .

مدات يديها بجوج لطامو وعبدية اللي واقفين مبهوطين وقالت 

- عطيني نشرب قبل لا تودن لعشا..

هبطات على غراف دالماء ودات فيديها بغريرة وطرف دالحلوى قدو قداش ضرباتهم فالطريق وكتمشى بزز وتلهج لابسة قفطان واسع بخياطة مخزانية بحال العباية فالحمر قصير شوية تحت الركبة وخلاخل رجليها كيشعلو لابسة شربيل حمر وكتجر فيه بزز حتى لجناح الملك وهي تنفض يديها وسرطات ماكلتها وتكرعات عاد دخلات عندو .

لقاتو راكع كيسلم .. جمع السجادة وناض تلفت عندها مبسم لقاها واقفة وجهها حمر كتشهق ودور فعينيها باغا تشرب . 

تكلم وقال : زيدي لهنا 

مشات عندو بزز بحال الى طالعة فالعقبة ووقفات قدامو فرحانة وقالت 

- صمت 3 ايام والله ماكليت 

تبسم وقال : ماعندي مانتسالك ... كليتي بزاف واقلة؟

روح الندى : باش ميجيننيش الجوع من دابا حتى للمغرب دغدا 

تعجب كيضحك : قدامك العشاء والصحور كولي فهادو حتى تشبعي ! 

روح الندى : قلتي ليا ناكل غير فالمغرب

حل عينيه وقال : كتاكلي من المغرب للمغرب ! غاتسخفي ! جلسي بعدا 

شد ليها فيديها جلسها فالارض وتحنى على رجليه حداها 

روح الندى : لا راه غير تمشي عليا حق الشهر وندوش ويحيد مني العيا

يتبع..



التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.