عروس الملك السابعة الجزء 32

من تأليف Ghazal trust
2018قصة مُلغاة

محتوى القصة


رواية عروس الملك السابعة , زوجة الملك السابعة

خرجات روح الندى كطير رجعات لجناح لاللة ياقوت مع آذان صلاة الفجر . دخلات حانية الراس والوصيفات كيطلعو فيها ويهبطو ، عوالة تسمع شي كلمة ولا شي هضرة من عند لاللة ياقوت .. ساعة لقاتها كتصلي ومشات جلسات مركنة كتشوف بعينيها حتى سالات لاللة ياقوت صلاتها وتلفتات عند روح الندى عاقدة حواجبها وقالت 
لاللة ياقوت: فين بقيتي كاع هاد الوقت ؟ 
سكتات روح الندى حانية راسها وقالت 
- غير ف..فففلكشينة 
هزات راسها عندها وهي تشوف الطبعة فعنقها قدها قداش وقالت 
- امم.. لكوزينة ! 
سكتات مارجعاتش هضرات وناضت لفراشها تخشات ونعسات . 
صباح جديد من ايام رمضان ، شدات فيهم لاللة ياوقت روح الندى حداها ماخلاتهاش تحرك ولا تعتب جيهت جناح سيد الملك ، رجعات خاطة عليها منين مادازت وحتى القصر مابقاتش دور فيه بزاف ، عتاكفات فجناح وعطاتها للصلاة والعبادة وربطات حداها روح الندى اللي بغات تخرج وبغات طرطق بالقنطة ومالقات كي دير ودور دور وتسول على الليلة د سبعة وعشرين واش وصلاة ، وهي اللي ماكانتش ماع عارفاها واش كاينة من الاصل كن ماسمعات عبدية وطامو كيهضرو عليها عاد فهمات شنو معناتها . 
سدات لاللة ياقوت القرآن وهي مربعة يديها ومغطية شعرها 
- صدق الله والعضيم (تلفتات) عطيني سلهامي نخرج يضربني الريح شوية 
ناضت روح الندى كطير عطاتها السلهام وجمعات الوقفة كتقاد شعرها وقفطانها الابيض المطروز بالزهري وقالت 
روح الندى : غاتخرجي الاللة؟!!!
أفأفات لاللة ياقوت وقالت : اييه غنخرج .. وتبقاي حدايا ميغيبش عليا خيالك .. عنداك يحسابك نسيت مادرتي ديك الليلة ... مشيتي غبرتي حتى للفجر عاد جيتي .
هبطات روح الندى راسها فرحانة باغا تخرج ، وكما صايمين الناس فالقصر صايمة حتى هي بحالهم.
خرجو غير بجوج غاديين جيهت الباب لكبير اللي كيطل على الجردة لكبيرة حتى كيخرجو فمولاي قاسم داخل بوحدو ، شافهم وهوا بتبسم ووقف حنا راسو شوية وقال 
- لاللة ... كي داز صيامك ؟
لاللة ياقوت : مزيان امولاي قاسم .. ونتا كي داز صيامك 
شاف فروح الندى بنص عين وقال : شوية وكان ... مطلعاتش فيه الشمس واخا قلبت عليها حتى عييت 
تبسمات لاللة ياقوت وقالت : بان ليا واقيلا غلبك
تبسم كيشوف فروح الندى وقال : بزاااف .. كتر كاع من اللي كتخيلي 
لاللة ياقوت : ايوا الله يقبل 
مولاي قاسم : امين 
حركات راسها ودازت كتجر فجلايلها وحداها روح الندى خاطة النقطة على فمها وكتخزر فيه بعينيها ماحاملاه ماقابلاه خرجو بجوجات للجردة وجلسو حدا نافورة كبيرة كيتجمع عليها الحمام وبداو يلوحو بيديهم فالزرع ،شوية تكلمات لاللة ياقوت وقالت 
- بزاف هنا حاطين عليك العين ... ونتي دابا وصيفة تقدري تزوجي .. ماشي وحدة من حريم الملك اللي ممنوع عليهم الزواج 
طاح الزرع من يدين روح الندى وحلات فمها وقالت 
- هااه!!! و ولاكن ممنوع الزواج حتى يتزوج مولاي هوا اللول
تبسمات لاللة ياقوت وقالت : ممنوع الدخلة .. اما الزواج الى بغيتي تزوجي علاش لا ... ونخليو الدخلة حتى يتغير الحكام . 
هبطات روح الندى راسها باغا تبكي وقالت
- وشكون اللي حاط عينو عليا دابا؟
تلفتات لاللة ياقوت وقالت : كتعرفي التعامل ديالي معاك كيف داير ... بعيد على التعامل ديالي مع وصيفاتي ، واخا كتغلطي كنسمح ليك ونجي جيهتك ونتي عارفة هادشي ... اللي غنقول ليك هوا خاصك تزوجي ... حيت الى ماتزوجتيش غادي يطراو بزاف ديال المشاكل . شفت عين مولاي قاسم كيف كتشوف فيك ... ومولاي قاسم خاطب لاللة رحمة هادي سنين ومزوج بيها قدام كاع الناس خاص غير يتغير لحكام . هادشي علاش حتا نتي
غادي تخطبي بحالك بحال قرناتك . 
شافت فيها روح الندى باغا تبكي وقالت : مابغيتش ننن
سكتاتها لاللة ياقوت بكلامها وهي كدور وجهها وقالت
- سيري جيبي ليا غطا نديرو على كتافي تحرك البرد 
ناضت روح الندى سارطة غصة فقلبها . غير قلبات الدورة وهي تكمل طريقها كاتبكي وتشهق ودخلات كتمسخ فخناينها حتى وقفها الامير قاسم وهي تهز راسها فيه بعينيها حومر وبدات تمسح باش دوز . 
شاف فيها مبسم وقرب ليها قال 
- شكون بكا ليك هاد العوينات؟؟ 
سكتات معبسة مجاوباتوش حانية راسها بالجنب وكتخزر بنص عين ، زعم وحط يدو على فكها هزو عندو وقال مبسم
- علاش كتبكي ؟ شكون بكاك نبكيه الدم قدامك . 
فهاد الوقيتة نيت كانت جايا لاللة رحمة بوصيفاتها كتكسول بشوية عليها ناوية تشوف الامير قاسم خطيبها فجناحو اللي دازت حداه روح الندى .
مع الدورة ديالها مع الحيط وهي تقشعو شاد ليها ففكها مبسم وبصبعو مسح دمعتها . تبخرات في ساع ضحكتها وخرجو عينيها وعبسات كتشوف فيهم هي ووصيفاتها المصدومات بحالها . قبل حتى ماترمش وقف عليها الامير سيف الدين ناشط بحال العادة وقال 
- صيام مقبول الاللة رحمة 
مجاوباتوش ودغيا قلبات الدورة ساخطة خلاتو مصمر واقف .. تعجب وهوا يدور وجهو جيهت روح الندى وشاف ما شافت لاللة رحمة .. خرجو عينيه حتى هوا وزاد خلفة جيهتهم
بعدات روح الندى وجهها بالزربة وبدات تمسح راسها وهبطات راسها وزادت قدامهم بجوج ماهضرات مع حد . 
خلاتهم واقفين وخلات اللمير سيف الدين مبدل عليه الجو وحتى النشاط اللي كان فيه تخروض وعقدهم كيشوف فالامير قاسم وقال 
- بان لي مابقاتش عينك فلاللة رحمة ولا غير جاب ليا الله 
هز الامير قاسم راسو عالي وقال 
- وبان لي وليتي كدخل لفضول ولا غير جاب ليا الله ؟!
مشات روح الندى كتبكي ناوية تشكي وداوها رجليها نيشان لجناح سيد الملك وتلاحت على الباب كدق بالجهد زطمات فالعبد والحراس . ودفعات الباب راسها ودخلات لقاتو واقف عاقد غوباشتو ناوي يخلي دار اللي كيدق عليه هاكاك .. ولاكن روح الندى دغيا تلاحت عليه وعطاتها للبكا والشهيق ونساو راسهم كاع صايمين . بدات تبكي ماقدراش تهضر ولا تنطق فحضانو مستقيم فالوقفة ويدو على راسها وشعرها 
سيد الملك : شنو وقع ؟ علاش كتبكي هاكا اشنو كاين ؟

هز وجهها لقاه فازك دموع وبدا يمسح ليها بشوية وقال 
- غير بشوية عليك ... قولي شنو كاين وبلا متبكي 
شافت فيه كتشهق وقالت 
- ب.ب هء هء بغااا غا غات خىء دددد... 
شدها جلسها وجلس حداها متكي على ركابيه وقال 
- بشوية عليك ... خلي ترتاحي وعاد هضري 
روح الندى : ل لللاللة ياقوت ب. بعاات تزوجني اهىء اهىء 
هز راسو كيزفر من مناخرو مخرجين عينيه .. ماهضرش وبقا كيدورها فراسو واحد الشوية ورجع شاف فيها وقال 
- بيمن؟
شافت فيه كتبكي وقالت : مانعرف ..قالت لي خاصني نتزوج 
وقف هاز راسو كيدوز لسانو على شفاهو ويعض فيهم ... تلفت ليها وقال 
- مقالتش ليك لمن 
حركات راسها حانياه كتنخصص وهوا يمشي شد فيدها وقفها عنقها لصدرو وقال 
- شششش...بلا بكا ... مكاينش اللي يزوجك بزز منك . (هز ليها راسها) فين غبرتي هاد الوقت كامل
روح الندى: لاللة ياقوت مكتخلينيش نمشي شي بلاصة من ديك الليلة 
تبسم وقال : غتمشي تغسلي وجهك ونساي الزواج ... هادشي هادا مامنو والو 
روح الندى : عنداك تزوجني لشي حد خاايفة
سيد الملك: مغتزوجكش ... حطي فراسك ديما بللي انا اللي كنحكم هنا وعلى هاد البلاد كاملة من مشرقها لمغربها ... واللي بغيتو انا هوا اللي يكون .
روح الندى : مغنتزوجش؟
تبسم وقال : لا هه... سيري رجعي لبلاصتك راحنا صايمين زعما . 
ضحكات كتمسح وجهها وبعدات منو ومشات خرجات ، لا عباية كحلة على كتافو كحلة وخرج كينفخ لجناح لاللة ياقوت ، دخل لداخل ووقف كيسرح عينيه فبيتها بلا ميحرك راسو ورجع خرج وقف فالباب عاطي بضهرو لوصيفات اللي فالباب والعبيد الحانيين الراس قال رافع راسو وقال 
- فين مشات لاللة ياقوت؟
تكلمات وحدة من الوصيفة وقالت 
- فالجردة أمولاي
زاد خلفة للجردة نيشان وخرج كيقلب بعينيه حتى شافها جالسة وحداها مولاي سيف الدين 
كيهضر معاها 
مولاي سيف الدين : من زمان كنت ناوي نهضر ليك على الوصيفة اللي عندك ... الصغيرة فيهم اللي سميتها روح الندى 
تبسمات لاللة ياقوت وقالت : مرحبا 
مولاي سيف الدين : ناوي نخطب وصيفتك ونرشمها حتى يتغير لحكام ...
سيد الملك : حكامي مراجعش فيه حتى يتزاد عندي الولد . والوصيفة قبل كانت جارية عندي وماعطيتش حق باش ترجع وصيفة ولليلة قبل مايصبح الحال غترجع لجناح الحريم 
تلفتو قدامهم لقاوه واقف هاز راسو كيشوف فيهم بجوج معبس وكيزفر من مناخرو

يتبع

التنقل بين الأجزاء

صفحة القصة
سيتم تشغيل صندوق التعليقات بعد لحظات
معظم التعليقات تم إخفاءها بواسطة الفيسبوك، نحاول بكل الوسائل المتاحة إستعادتها في أقرب وقت ممكن.