- شوفو لي شكون تكون هاد الحية ... نشرب من دمها بيديها ونوريها تزعم على وطول يدها على حوايج خاصين بيا ، جيبو لي سميتها ومنين هي وشكون تكون داااابا نعرف سهمها .
حناو الوصيفات راسهم وخرجو بالزربة تنشرو فالقصر كيسولو بالسياسة شكون تكون روح الندى.
اما لاللة رحمة رجعات خرجات من جناحها شاعلة ومدرقة على نار شرها مكتبينها لحد . مشات بوجه بارد بحال الى مواقع والو لجناح الامير قاسم ودخلات عليه مبسمة
- لاللة رحمة : بصحت مولاي
تلفت عندها كيمسح شعرو من الماء لابس لباس خفيف وقال معجب
- الله يعطيك الصحة .. شنو جيتي كديري هنا ؟
هزات حاجبها معجبة من جوابو البارد .. وفالحين فاق براسو ورجع قال مبسم
وقف هاز راسو وقال : كنوقف حداك مكنقدرش نشد صيامي راكي عارفة .. رمضان بقات ليه 3 ايام وغترجعي تشوفيني صباح وليل بحال العادة .
- دخلات لاللة ياقوت لبيتها عازة
خنافرها ووقفات عاضة فالصبر . غير دخلات عندها روح الندى وهي تقول ليها
لاللة ياقوت : غتمشي لجناح لحريم
حلات روح الندى عينيها مافاهمى والو وقالت
- شنو؟ فين غنمشي؟
لاللة ياقوت : كيف كتسمعي... يالاه منشوفش خيالك كيدور هنا .
حنات روح الندى راسها وشداتها كبيرة الوصيفات داتها للحمام فركوهت ولبسوها وعطروها ودخلوها على جناح الحريم فين كانو جالسن كل جوج فين كيتعوجو على بعضياتهم ويتجمعو ، غير دخلات عليهم روح الندى مفركسة كتشعل خرجو عينيهم وتقادو فالجلسة مامتيقيمش كحلو بالعمى ، اما هي داخلة هازة خنافرها للسمى وتنفخ فريشها وكتشوف فيهم من لفوق بنص عين دافرة السالف بجوج خيوط زايدين فالابيض والاخضر ولابسة قميص بخياطة مخزانية حسن منهم كاملات وشربيل خضر مطروز بالسقلي الحر بالخلاخل الذهب فرجليها.
كيطلعوها من راسها لرجليها حتى مشات شدات مخدةa جلسات تانية رجليها وجامعة فمها حتى الشوفة عزاتها فيهم ، وقفات كبيرة الوصيفات لوسط وقالت
- الجارية روح الندى رجعات عندكم . مانبغي صدع ولا شكاوي ولا غتباتو كاملات بلا فطور .
خزرات فيهم ورجعات بحالها .يالاه خرجات وهي تنطق وحدة جديدة عاد دخلات معاهم شعرها قهوي و وطول من روح الندى زوينة حتى هي فوجهها . ماعارفاش روح الندى وطينتها وكتشوف راسها هي اللي حسن من كلشي وشطر منهم كاملات وحتى وحدة مادوز قدامها ، وقفات قدام روح الندى مربعة يديها ومعوجة فاالوقفة وقالت كتعوج فحواجبها
- منين جيتي ؟ وشحال فعمرك ...تكلمي يالاه
هزات فيها روح الندى راسها وهي طلعها من رجليها تابعة شعرها من لتحت للفوق ، حققات فيها مزيان وناضت تجبدات وقفات قدامها دايرة يديها على جنبها ، لبنات كيتناخزو ويتغامزو وواجدات للفراجة خصهم غير علاش يشدو الحتيت واحد الشهر بعدا
هزات روح الندى راسها ويدها على جنبها قالت كضحك بالجهد
طارت ليها على شعرها نيشان هبطات ليها راسها وجلسات عليه نتف ما تنتف والمغرب كتأدن .. بداو الجاريات بالغوات والنواح حتى دخلو لوصيفات عليهم فكوهم وجمعوهم بجوج لاحوهم فالحبس دقة وحدة .
وقفات روح الندى مخرجة عينيها وبدات تكفض على يديها وناضت
روح الندى : كما حرمتي عليا الفطور بغيت ربي يحرم عيشتك ..😏 والله حنى نقطعك طراف كما حرمتيها عليا
يالاه نقزات عليها وهوا ينقز عبد من مور حديد الباب حلو وقال
- روح الندى ..زيدي قدامي
دارت عندو ويديها فالشعر وقالت كتبوحط وتهرنن
- هي اللي جبداتني والله ما انا
العبد : سيدي باغيك فجناحو نوضي تكعدي
ناضت وقفات بالزربة و قالت : وغير بشوية هضر معايا انا مااااشي عبدة عندك (تلفتات ) سمعتييييي ولا نعاود ليك شنو قاال .... سييييييد الملك بغاني فجناحو نفطر معاه .. ونتي فطري مع هاد الحيوط وداك السالف الى منتفتو ليك زغبة بزغبة ها وجهي .. حتى نرجع
خرجات كتجمع فشعرها وتنفض حوايجها عارفة راسها غتمشي تغسل وتقاد وتلبس عاد دخل عندو
وصلات لجناح سيد الملك بلا خبار حتى واحد من غير لوصيفات اللي دارو بيها ولبسوها وعطروها ، دخلات لجناحو مبسمة بقفطان زرق دايرة حلقات فودنها و خيط الجوهر فعنقها ، مكحلة لعوينات وتحت القميص لابسة شبكة خارجة من الكمام وكتبان مشبكة على صدرها لمعري تحت القفطان . دورات عينيها شافت الطبلة فيها الفطور والملك كيصلي لابس لازرق حتا هوا بسفيفة دايرة على العنق الوساع على صدرو ، سلم وناض وقف مبسم تلفت عندها وهي حانية راسها حشمانة وفرحانة ، مشا عندنا ودور يدو على نصها قربها ليه وباس جبهتها وقال
- تعطلتي
شافت فيه كدور راسها وخصلة من شعرها وقالت: كنت فالحمام
تبسم وقال: بالصحة ... اجي تفطري معايا
روح الندى: مافطرتيش مع الجماعة ؟
الملك: بغيت نفطر معاك نتي .. جلسي
جلسات جامعة رجليها وجلس حداها مبسم كيوزنها بعينيه
- كيجي معاك الازرق .
تبسمات وقالت : نتا كيجي معاك كلشي
تبسم وقال: فرقي صيامك
هز تمرة عطاها ليها لفمها وهز كاس دالحليب قربو ليها لفمها ... شدات فيدو بشوية كتشرب حتى روات حلقها وبعدات فمها شوية ، نزلات قطرة دالحليب من شفاتها التحتانية على صدرها هنا سرح بعينيه فيها وقال
- فليلة من ليال الوحدة
....هاز راسي وكنرسم وجهك فالسما..عينيك نجوم كتلمع ... و شفايفك كوكب تايه ... وجهك قمرة منورة بضحكة جميلة منسمة . . . عليا من السماء قطرتي .. وليوم نزلتي وحدايا جلستي .. دخلتي قلبي وفيه سكنتي ... مادقيتي ماشاورتي ... شنو اللي ماعندش غيرك خلاني نعشقك نتي؟
حنات راسها مبسمة وخدودها محمرة .. عمرفحياتها تهداها كلام بحال هدا ... ومن لسان لحبيب خلاا عينيها يغرغرو مسكينة وماحسات براسها حتى عنقاتو ونزلات دمعة على خدها ... هنا عرفات راسها بللي روحها تربطات لروحو .. وماتفرحها حتى حاجة فالدنيا من غير وجودو ، حسات براسها تولدات من جديد ... بقلب كيدق باغي يعيش بجنبو ، عقلها خوا من كلشي وعمرو حبيب ومالك القلب .
ضكات كتمضغ حاطة يدها على فمها ومانواتش يمد يديه لصندوق صغير حاطو فوق الطبلة ويجبد منو تاج رقيق صغير من الذهب وحجر الزمرد الاخضر وبيدو حاطو ليها على راسها وقال
- هادي هدية مني ليك على صيامك اللول اللي مافطرتي حتى نهار فيه واجب عليك حتى لهاد النهار . نبغي نشفو ديما على راسك فاش نبغيك تجي عندي ... والليلة ليلة القدر .. كنطلب ربي يحفضك وينجيك ... وكنتمنى ماتغلطيش ان شاء الله وتبقاي بعيدة على شري وغضبي .. ونشوفك ديما قمرة مضوية حياتي .
عروس الملك السابعة الجزء 33
محتوى القصة
شافت فيهم لاللة ياقوت مخرجة عينيها من الصدمة ووقفات هي والانير سيف الدين مبهوطين .
يتبع
التنقل بين الأجزاء