عروس الملك السابعة الجزء 34

حطات روح الندى يديها بجوج على راسها كتحسس التاج فرحانة ماقداها فرحة ، عيونها كتبري وفمها مبسم 

- عمري نحيدو نبقا نعس بيه صباح وليل

تبسم وقال : يالاه فطري دابا وكولي حتى تشبعي 

حطات يدها على كرشها هازة كتافها وقالت 

- فلحقيقة مابقاش فيا الجوع ومافيا اللي ياكل 

ضحك وقال : كهمك التاج ولا كلامي ... هاكي فطري يالاه 

عطاها كاس دلحليب وبدا هو يفطر ويضحك معاها حتى سالا وتكا حط راسو على فخدها وهي جالسة ، بدات تمشط ليه شعرو بطراف يديها كنشوف فيه مغمض عينيه وقالت 

- شي نهار الى طلعت ليك فراسك غاتلوحني يااك

قال بصوت بارد : بلاصتك فقلبي كبيييرة... بيدك تصغريها وبيدك طيريها.. وبيدك تحافضي عليها ، كلشي بين يديك ونتي تعرفي اللي يسلكك.

روح الندى: خفت شي نهار نفيق نلقا راسي بوحدي ... دايرين بيا شلا دياب سنانهم تبري ودمي بين ضراسهم يسري ... انا ماعندي لا والي لا تالي اللي نلقا يشد بيدي وقت الشدة من غيرك امولاي فهاد الدنيا . 

هز راسو شاف فيها منهد وقال : وعمر يدي تخطا يدك .. من غير الى نتي خطيتيها . 

شد فيديها وتبسم ليها ، تبسمات حتى هي وعنقاتو قالت

- فيك با وفيك مي .. وفيك خويا اللي يخفف همي .

دوز يدو على ضهرها وباسها فخدها وقال

- نتي الشمعة المضوية دنيتي ... والقمرة المونساني فليلتي ... عمرني قلتها لشي حدة وليوم كنقول ليك نتي هيا حبيبتي .

باس يدها وناض مبسم وقف خلاها جالسة فبااصتها ساهيا فيه والكلمة اللخرة اللي قال كتعاود فودنيها بجوج . 

مشا وجا وهي مزال فبلاصتها مصمرة حتى نطق وقال كيلبس فوقيتو ويمسح يديه من الماء

- غنمشي نصلي ... والى بغيتي طريقنا تسلك نوضي توضاي وصلي .. هادي ليلة القدر طلبي فيها نبقاو مجموعين ان شاء الله 

تبسمات وناضت بالزربة قالت : واخا 

خرجات هي وياه من جناحو غادية حداه كتهضر وضحك حانية راسها . ومع الدورة خرج فالامير سيف الدين . حنا راسو شوية وهزو مبسم وقال

- عواشر مبروكة اسيدي 

الملك: علينا وعليك 

شافت فيه روح الندى شوفتها المعهودة بحال ديما ، حاطة نقطة على فمبهت ومهبطة راسها بالجنب كتخزر وتزفر من مناخرها . اما هوا شاف فيها بمص عين وحدرهم ماعاودش شاف فيها ، تلفت لملك لروح الندى وقال رافع راسو 

- سيري لجناح لحريم .. وماتنسايش علاش وصيتك 

حنات راسها وزادت خلفة مع الطريق فرحانة وتقاد فتاجها ، دخلات على الحريم بحال الرعد هازة راسها ونااغخة ريشها ووقفات قدامهم صدماتهم كاملين حتى وقفو كيشوفو فيها ويطلعو ويهبطو .. لباسها وشعرها وشكلها ديال شي وحدة راجعة من جناح الملك ماشي ديال وحدة لاحوها تفطر فالحبس . وعاااد زيد التاج المذهب المرصع بحجر الزمرد

قالت بالجهد هازة حواجبها سمعاتها لكولشي 

روح الندى : سمعووووني من ليوووم كلكم تعيطو ليا لالة روووح الندى 

حلو فامهم كيشوفو فبعضهم .. تربطو لساناتهم وحتى وحدة ما هضرات من غير الزعرة اللي فات لروح الندى نوضاتها معاها ، دارت يدها على جنبها وتقدمات كطلع فيها وتهبط 

- وعلاااش شكون تكوووني بالسلامة ! 

هزات روح الندى راسها كنقيس تاجها وقالت مبسمة كتقلي ليهم فالسم

حيت سييييدي .. تااااج راسي ...توجني هاد الليلة اميرة

حلو فامهم كاملين من غير الزعرة بوحدها اللي ضحكات وقالت

- يالاه الاللة الاميرة قطعي راسي نشوف واش اميرة بصح ولا شي سلوكية بولادها هادي 

قربات منها روح الندى كتقلدها فالضحكة وقالت 

- ماشي سلوكية يا الحبيبة .. هادي صكوعية ...صكوعية راسك اللي غنطيرو ليك من الجدر ونعطيه للسلوكي بغززو .. بلحق ماشي دابا حتى نشوف ودنيك طراشو مللي تسمعيها بلسان سيدي ... عاااد ديك الساعة نحشو ليك بموس حافي.

تسلات وصيفة من وصيفات لاللة رحمة اللي سيفطاتها تلقط ليها لخبيرات وضرباتها بجريو كتلحت حتى كانت غادي دوز فلاللة شامة االي كدور فالقصر هي وصيفة من وصيفاتها . خرجات فيها عينيها وعرفاتها وصيفة لاللة رحمة وقالت 

- فين يحساب راسك كتجري ؟ ماكتشوفيش؟

هبطات الوصيفة راسها كتلهت وقالت 

- سمحي ليا الاللة سمحي ليا 

زادت كتجري وخلات لاللة شامة واقفة مخرجة عينيها كتتهضر بوحدها 

- مال هادي غادية كتجري... اش كطبخ هي ولاللة رحمة؟

دارت تبعاتها لجناح لاللة رحمة وبلا مادق دخلات ومع الدخلة سمعات الوصيفة كتقول وهي كتلهت 

- ت...تتوجها اميرة 

عقداتهم لاللة شامة وقالت صدماتهم 

-شكون هاادي؟ هضري ...نطقي قبل مانقطع لسانك 

شافت فيها لاللة رحمة وقالت كتنفخ 

- سبع الرواح اللي هي والموت خوت . على ماعاودو ليا شافت الموت ما مرة ماجوج ... ودابا توجها اميرة قالك . 

عرفاتها لاللة شامة علامن كتهضر وخرجات عينيها .

-الجنية ... مانعرف منين خرجات ليا ... حرت ماعرفت اش ندير معاها بنت الحرام... مابغات تفهم ليا . مرةتجيني من الانس مرة من الجن 

حركات لاللة رحمة عينيها للوصيفة خرجات وبقاو فالبيت كيهضرو بجوجات

هزات لاللة رحمة راسها وقالت

- تكون حتى من بني كربون .. وحتى الى كانت جن نخدموها ونشطحوها كيف بغينا .. ونتي شكون ضحك عليك وقالك هادشي

لاللة شامة ؛ بعييييييني شفت ماكدب عليا حد ... كانت عتقتلني ... وزايدون وريني شكون هادي ولا هادا اللي تلاح فالمطمورة وبقا حي .. وبيدينا لحنا عليها كركور ديال الحجر حتى غوتات ... هاديك نحلف عليها حتى جنية وغادي دوزها علينا 

لاللة رحمة ؛ وكتقولي فيها بوجهك حمر ... ماخفتيش ينعس سيد الملك ويشوف ويسمع هادشي االي قلتي

لاللة شامة ؛ لليلة مكاين نعاس

راني عارفة اش كندير ... مولاي مكينعسش نهار سبعة وعشرين حتى كيصلي لفجر 

هزات لاللة رحمة حاجبها وقالت : مزياااان ... قلتي ديك خيتي من الجن ياااك .. ايوا الليلة كيتشدو الجنون ... ويلى ماشديناهاش لليلة سيييير حتى لفوقاش. 

شامة يالاه دابا نيت لجناح مي لاللة شمس الضحى هي اللي تعرف ليها .

حركات لاللة رحمة راسها وخرجو بجوج مشاو نيشان لجناح لاللة شمس الضحى لقاوه مسدود .. سولو العبد اللي تما واقف وقال باللي كاينة لداخل . شافو فبعضهم وعرفوها كدير تما شي حاجة ماشي هي هاديك وهما يدفعو لباب ودخلو

مع الدخلة خرجو عينيهم بجوج وغطاوهم حشمانين . . .ولاكن شكون اللي غيحشم فيهم دابا ؟ واش لاللة شمس الضحى اللي جالسة مربعة رجليها دايرة عقيق فعنقها قدور قداش ولابسة قفطان فيه جميع لوان لحمر ولخضر ولكحل ولصفر ولزرق ... دايرة على راسها زيف محلول خضر وحداها مجمر واقف فوق مولاي حفيض راجلها بات لاللة شامة عرياان كااامل وحال رجليه وعليه شلا خطوط بالحبر فضهرو ورجليه وعلامات فيديه . وموراه جالسة لاللة شمس الضحى كتبخر ليه، جاب الله عاطيهم بالضهر شافوه من اللور. 

نقزو فالبلاصة هوا تلاح كيستر راسو وقلب المجمر على لاللة شمس الضحى شواها طارت من بلاصتها بشراوطها كتغوت نفضات كولشي بدات طير وتنزل بالجمر اللي طار عليها حرق ليها رجليها وكوا الزربية .. تشتتو البخور وتقلبات الدنيا بحال الى تنفضات الارض وقلبات كلشي . 

كاااع داكشي اللي خدمات لاللة شمس الضحى تمسح بالماء بسبب الدخلة اللي دارت ليها بنتها ولااللة رحمة اللي غير شافوها تقربلات ومابقا ليهم وجهه وهما يخرجو فالبلاصة كيولولو ويضربو فحناكهم غاديين تالفين فدروب القصر ماعرفو فين يمشي .. داخاو وبغاو غير يبعدو من تما شدات لاللة رحمة فحناكها وبدات تولول

- ويييل الشيطان باشمن وجه نشوف فعمي وانا شفتو عريان 

ضربات لاللة شامة فخادها وقالت : واااش نقوووول انا اللي با .. ماخصنييييش نشوووفو اويييييييي حييي على شوهتي وفين مدرمين كي البقر ... كي غندير نهز فيه العين من هنا لفوق وهوا عارفين شفتو خرزتو كي دايرة وجالس يبخر ومي جالسة عليه بخرتك ببجرجيلة يطير الملك فليلة ... ياللي جاي بعجاجتو طير محمد اصيل يجلس مولاي حفيض بلاصتو .

وناااااري اش درنا قلبنا ليهم الليلة غادي نعواجو كاملين 

لاللة رحمة؛ نااااري لاالة شمس الضحى تقلب عليها المجمر حرقها ... نااااري منقدرش معاود نشوف جيهتها ... والموصيبة شنو نديرو دابا وخاصنا نسربيو قبل لا يودن لفجر ... ولاللة شمس الضحى تحرقات ويلى ضهرنا عندها نقولو ليها خدمي لينا غادي تخدمنا حنا نيت ولا تمسخنا 

لاللة شامة: هففف(كتخمم) عرفتي عندي وواحد لكتاب ديال مي كنت هزيتو ليها بلاخبارها فيه كلشي ... حنا اللي غنخدمو راسنا اصلا تعلمت من عند مي بزااف وهي بداك الكتاب كانت تخدم لعجب ويصدق ليها 

لاللة رحمة : وايالاه سربي اش كنتسناو 

مشاو كيجريو لجناح لاالة شامة وجبدو لكتاب من تحت الناموسية ، سقطو لباب من لداخل بصندوق كبير جره حداه وجلسو عند لكتاب وراقو راشية مكتوب بحبر كحل كيشوفو ويقلبو 

لاللة رحمة : هادشي كامل رموز مافهمت والو 

-لاللة شامة ؛ انا كنفهم ... شششششزووو هاهي لقيتها .. كفاش نبعد لجن لعاشق ونحكم فيه

لاللة رحمة : ونييت هي من داك النوع .. جن عاشق ماخلات حتى راجل 

لاللة شامة ؛ خاصنا نضلمو لبيت ... ونشعلو فيه 7 دشمعات وخاصنا دم عود يكون كحل ماعندوش خوه وبقا بوحدو من سلالتو نهديو دمو هدية . والى كانت كتبان لينا هاد جنية خاصنا سبعة دزغبات من شعرها و لا ضفارها .

لاللة رحمة : الدفار ما عندنا منين نجيبوهم .. غنجيبو شعرها... اما لعود الاصيل كاين واحد هوا ديال سيدي ... خاصنا دمو

هزات لاللة شامة راسهت وقالت

- بصح ... كاين غير لعود ديالو وخاصنا دمو ... وشعرها انا عارفو كيف نجيبو . جيبي نتي غير الدم .

يتبع

وجدو راسكم الجديد قااادم ومابقا قد ما فات يسالي الجزء الاول وندخلو فالجزء الثاني .
الجزء الثاني قنبوولة مشحححححر على الجزء الاول اما الثالث فلنننننن يخطر ببالكم اشنو غيوقع فيه لانه اااااكثثثثر جزء كنتسنى نوصل ليه وفيه غتعرفو على شخصية اححححححح واش نقول ليكم . المهم ماتخلعوش ابطالنا مغيتبدلوش طبعا لاكن عندي ليكم مفاااجأة فالجزء الثالت اول مرة نديرها فقصصي ومتحمممممسسسسة 😍😍😍😍