آلاء و المنحوس الجزء 17

دار شاف فيها .. شافت فيه و قالت :"" كون هاني .. ماهضرناش عليك .. لا انت لا امين .. كانت خرجة بناتو صافي "" 

عوج فمو و قال :"" هادشي علاش مسيفطك انا ليها "" 

جاوباتو :"" ااايواا .. انا راه ماغاديش نبقا فينما نشوفها نجبد ليها كمارتك .. و زايدون عحباتني صحبتها واخا اكبر مني .. و لكن توافقت معاها كون تصاحبت معاها شحال هاذي ظريفة "" 

تبسم زياد و قال :"" و اشنو اخر "" 

طلعات فيه و هبطات و جاوباتو :"" زعما ماعارف والو .. راك كاتظل تهضر معاها .. بعدا كيف دارت حتى ماعاقتش بصوتك "" 

جاوبها :"" ماطاحتش فبالها .. داكشي علاش مادات ماجابت "" 

جاوباتو :"" اوى شوف كيفاش تمحي امين فاسرع وقت و ماتبقاش كاتضحك عليها.. الى مشات حتى عرفات .. غاتكرهك و تطير اي فرصة ممكن تكون ليك "" 

ارتاسم على وجهو الجد و قال :"" انا ماكانضحكش عليها .. انا جدي من جيهتها .. هي لي خلاتني ندير هكا .. و من دابا مستاعد نعاود ليها كولشي "" 

جاوباتو الاء :"" لا .. واايااك ازيااد .. دير لي قلت ليك .. خرج امين من حياتها و بان انت .. اكيد غاتلاحظ التشابه بيناتهم و غاتبغيك "" 

جاوبها :"" على حسابك "" 

جاوباتو :"" على حسابي "" 

جاوبها :"' احنا غانشوفو .. وا نووضي تهزي من حدايا دابا "" 

اليوم الاحد .. صابحة الاء فايقة عاوتاني .. حتى طلات الشمس و هي تنعس .. 

كان زين العابدين كايتفرج فالصالة امو و شيماء مشغولات .. حتى سمع الدقان .. ناض حل .. لقاه زيد ..

نطق زيد و قال :"" سلاام .. غانبرزطك اصاحبي واحد الشوية و تجي تصلح ليا داك البارابول .. يوماين و انا مضارب معاه "" 

جاوبو زين العابدين و قال :"" اشنو بيه .. "" 

جاوبو :"" وا كولشي فبلاصتو ماعرفتش اشنو المشكل .. زيد معايا ضرب طلة الله يرحم باك "" 

جاوبو :"" واخا .. زيد نشوفو "" 

سد الباب و طلع معاه للدارو .. 

دخل زين العابدين كايدور عينيه .. حتى طلعو للسطح .. 

بدا يشرح ليه زيد اشنو المشكل و بدا يقلب بنفسو .. داز شوية الوقت و طلع زياد براد اتاي ..حطو و قال "" اجيو الدراري تشربو اتاي "" 

تجمعو عليه .. جلسو و مد لكل واحد فيهم .. 

قال زيد لاخوه :"" علاش ماعمراتوش ديك الحماارة اش كادير تاني "" 

جاوبو زياد قائل :"" الحمارة صبحات فاايقة ...هاذيك ياله وصل عندها الليل .. "" 

جاوبو زيد و قال :"" هاد القاعدة ... عييت مانخاصم عليها عليها و هي وااالو .. لي فراسها فراسها "" 

جاوبو :"" يام غير الويكاند .. ضبر رااسها حتى انت "" 

جاوبو :"" انت لي خاارج عليها بهاد ضبر راسها "" 

جاوبو :"" وا خلينا دابا من هاد الهضرة .. قولو ليا اش درتو فهادشي "" 

جاوبو زين العابدين :"" هذاك الكابل تعرى .. خاص واحد اخر "" 

جاوبو زياد :"" هي خاصني نخرج نشريه "" 

جاوبو زين العابدين :"" واقلة عندي شي واحد .. انا غانمشي نجيبو ""

جاوبو زيد :"" كمل كاسك بعدا "" 

جاوبو :"" نرجع و نكملو "" 

جاوبو و قال :"" صافي ... احنا هنا نتسناوك "" 

ناض زين العابدين هابط .. ياله غايتوجه للباب و دارت ليه "باقية ناعسة " طااانن فراسو .. قرب بخطوات متسللة .. حتى قرب لغرفتها .. و هو يتراجع و قال :"" غاندخل على الدرية لبيتها و ناعسة .. اش هاااد التبرهيش.. *رجع شاف فالبيت و كمل * و لكن خاصني ضرووري ناخد ليها من شعرها *هز يظيه للسماء و قال* يااربي انت عالي و عالم مافي نيتي ..عمري تعديك حدوودك ياربي و لكن راني مظطر .. اللهم سهلها ياربي و لهلا تحشمني "" 

قرب شوية شوية .. غمض عينو كمشها .. و ورك فالبواني لي كان مردود بالشوية .. طل من ورى شفارو بالشوية بلا مايحل عينو .. و لحسن الحظ كانت مغطية و ماكان حتى شي منظر مخل .. دخل شوية بالشوية و هو وااخد حذرو .. حتى قرب لوجهها .. بان ليه شعرها مجموعو قال :"" تفوووو على زهر "" 

مد يدو بمحاولة يائسة .. جر 2 زغبات .. نجح انه يفكهم من الربطة .. و لكن غير جا ينطرهم و هي تحل عينيها ..

حلات عينيها و خرجو عينيه .. جمع يديه و تبتو رجليه .. حلات فمها و قال :"" صافي هاذي للخرا ليك ازين العابدين "" و استغرب منين سمعها قالت :"" اوووبا .. بوهاسيو ؟ ""(اوبا .. اش كادير ؟) 

قرم حجبانو كايتصلغى .. كانت حالة عينيها بلونهم الطبيعي ..و لكن حمرين و مشقلبين بالنعاس .. رجعات قالت :"' سااارااانهييييه ... كورييغوو ...نورل وياسو ..*غوتااات * شييييكيووووو جووولكيييييييه "" 

(كاانبغييك ... داكشي علاش... و على قبلك .. غااانحميييييك ) (هاد الجملة هي الراعي الرسمي للدرامات الكورية 😂)

زين العابدين فهم بلي كانت مشقلبة بالنعااس و بقا مصندل فبلاصتو كايتفرج فالفيلم الكوري و كايتنسى امتى ترجع تنعس باش يقطف من شعرها .. غير غوتت ماعرف باش تبلى .. و علق بلا مايشوف وراه .. 

و رجعات الاء كاتهضر و دارت للجهة الاخرى كملات فيلمها مع نام جو هيوك .. (عارفاكم مامقشبلين تالعبة فهاد السميات 😂 مهم الكيبوبرز عارفيني علامن داوية 😂) 

خرج زين العابدين كايجري .. طلع لبيتو .. كايبقشش على الكابل و كايفكر مع راسو :"" مصيييبة هااذي .. على زغبة غادي نتشوه اعيباد الله .. داخل على بنت لقلب بيتها .. واااش هااد الفعااايل ازين العاابدين موالفين ليك .. الله يلعنو زهر تفووو .. *هز راسو مصدوم* عنداك تعقل على هاذشي منين تفييق .. ناااري اش درت .. صغووعيتي غاتلووحني فمالا يحمد عقباااه .. "" 

ناض هاز الكابل .. و هبط و رجع لعند الدراري ... 

داز الوقت ... حلات الاء عينيها و هما باقيين كايتلصقو .. لبسات فرجليها و خرجات من غرفتها .. 

لقات زيد متكي فالمرح كايتفرج .. 

شاف فيها و قال :"" صبااح الخييير الخفاشة .. باقي الحال "" 

تفوهت و جلسات مادا رجليها و رجعات براسها لور .. 

رجع قال :"" اشنو .. غاتكملي نعاسك هنا "" 

ناضت جلسات كاتفوه و قالت :"" باقي ماشبعت نعاس ... شحال فالساعة ؟"" 

جاوبها :"" 3 و نصف هاذي "" 

رجعات سولاتو :"" فين زياد ؟"" 

جاوبها :"" ياله خرج هو و زين العابدين "" 

جاوباتو :"" كيفاش ياله خرج .. على كان هنا ؟"" 

جاوبها :"" اه.. صاوب لينا البارابول و تغدا معانا .. "" 

جاوباتو بملل :"" اااه "" 

ياله حدرات راسها و هي دير طااان .. عوجات راسها و ضيقات عينيها .. جاها شي تشاش .. كانت كاتشوفو قدامها واقف و عينيه خارجين مصدوم .. جلسات مقادة و مركزة كاتحاول تذكر و تسترجع ذاكرتها ..و تاكد واش كان حلم او حقيقة .. شافت فخوها .. بغات تسولو و لكن كيفاش غادير و هو غادي يدخلو الشك فبلاصتها و توحل معاه .. ناضت من بلاصتها نيشان للكوزينة تقلب علاياش تاكل و هي باقية كاتفكر فحلمها ... 

اليوم الاتنين .. 6 العشية ...جاية هي و هدى بطابلياتهم محلولين و الساكادو فالظهر ... كانو راجعين من الليسي كايتحتتو كيف عادتهم .. 

كانت الاء شادة فدراع هذى و كاتعاود ليها .. 

الاء :"" شوفي فيا .. انا راه شبه متأكدة .. بلي نيييت ابوشنبات كاان فبيتي .. و كان واقف كايشووف فيا "" 

ضحكات هذى غير مصدقة و قالت :"" راك غير كاتخربقي .. راه واخا نشوفها بعيني مانتيقها .. هذاك بالظبط عمرتي شفتو كايتبسل على شي وحدة و لا قلل ترابيه على شي وحدة .. داخل سووق راسو و ولد النااس .. مانضنش يدخل عليك حتال البيت ... و الى دخل اش غايبغي غااع يدير و خووتك ب2 كاينين فالدار .. لعني الشيطان .. راه غير تخايل ليك و انت اصلا نعاسك مصطي اكتر منك .. كاتحلي عينيك تخرجيهم و تبداي تبرولي كيف الحمقة هههه "" 

عوجات الاء فمها .. و قالت مصرة :"" يااا واللهما نتأتر بكلامك .. راااني شفتووو شفتووو .. واخا نعاسي مفشكل و لكن كانعقل بعض المرات .. و انا متأكدة شفتو .. هذاك رااه منحرف كايضرب غير من التحت .. شحال من فقيه جاامع حصلو فيه الفعايل .. المظاهر خدااعة ابنتي .. و اصلا ماشي اول مرة كايتصرف تصرف غريب تجاهي .. داك النهار تبعني فالسوق .. وقفتو و بقا يحنزز فيا .. و فنفس النهار حصلو كايطل عليا من الشرجم و انا كانبدل .. و فالاخر دخل عليا لقلب بيتي .. "" 

جاوبتها هذى :"" غرييييب .. وا الى كنتي اختي متأكدة هكا .. قوليها لخوتك .. ماتسكتيش "" 

جاوبتها :"" اويييلي على نقولها .. حمااقيتي ...و الله حتى يعلقني زيد و يربطني مع الترية .. ما مرة ما الف شدني و تحلف عليا هكا حرفيا *و الله و نحصل شي حد كايتبسل عليك يا حتى نعلقك * اختي هذاك العحل مامعاه لعب .. و مانقدرش نقولها حتال لاخر .. غايرجعو لومة عليا و على لبسي .. "" 

جاوبتها هذى :"" اوى اش غاديري ؟"" 

جاوبتها :"" اش غاندير .. غاندير التقلية "" 

ضحكات هذى و هي كاتضربها على سدرها بالضحك .. شدات الاء سدرها .. خنزرات فهدى و نزلات عليها بشكارتها كاتفوت :"" وا جمعي معاااغلك يا هااد المصيببة مااال مك ؟"" 

بعدات عليها هدى و هي كاتضحك .. ضارت الاء بغير اهتمام و هي تلمحو .. دارت بالزربة عند هدى .. جراتها لعندها و قالت :"" ها هو لمك ورانا تاني .. وا قولي ليا كانحلم ؟"" 

يتبع