الله على ريحة البلاد شحال زوينة هاكدة كانت ناديا مغمضة عينيها وتقول وهي واقفة فشرفة الدار ديالهم مبعد موصلو كل واحد فين مشا عزيزة دخلت توجد الشهيوات اللي كتبغي ناديا أما السي عيسى فدخل يصلي ومريم خرجت توصل ابراهيم وتولي لعند ناديا
ابراهيم(واقفين فباب الدار):- وعلى هادي متافقناش الأخت ناديا دبا جات باش تحرمني منك ياكي ؟
مريم:- الله يهديك راني معاك 24 على 24 ساعة وزايدون العادات كتقول أسبوع قبل العرس متشوفنيش وحنا عرسنا باقي عليه يالاه 6 ايام مكاملاش يعني دبا راني دايرة فيك بليزير عاد
خصك تشكرني
ابراهيم :- أيييوة هي دبا ولا خصني نكتب عريضة شكر اللي راني نشوف خطيبتي اللي مبعد
ياسر كالس على الكنبة وداير رجل على رجل وناديا أونفاص ليه لابسة لباس لونو أخضر ناصع نازل حتى للأسفل ومفتوح على شكل في وفيه لي زيكستخاس لاصقين فحمالاتو وفوسط الصدر فيه بروش كبيرر مرصع وكيلمع
كانت كتدور توري لياسر واش عجبو ولالا
ياسر(كيلوح بيديه بالرفض):- تتتت هاد اللون معجبنيش بدليه
ناديا(بتأفف):- أوووف اليوم منخرجوش أنا اللي حمقة دايرة راسي فيك هادا اللباس الخامس اللي كنبدلو ومكيعجبكش اوووف
جات متأففة داخلة لبيتها ولكنو وقف فيساع و استوقفها قبل متدخل وتكا على باب بيتها
ياسر:- صافي أجي أجي عيقت عليك أنا آسف لكن ذوقي هادا هوا شنو نديرلك خصك ترضيه
ناديا(دارت يدها على جنبها):- يا سلام بدل متكولي كلشي كيجي عليك زوين باقي تختار وتخير عليا هنا وياريتو يعجب السي ياسر ميبقاش الخاطر(لوات شنايفها بدلع)
ياسر(قرب منها وهي عدلت وقفتها وبقات تشوف فيه):-فعلا أي حاجة تلبسيها كتجي عليك غير بغيت ندلع عليك اليوم عيد ميلادي وطلباتي مجابة ههههه وصافي هادا اللي لبستيه آخر حاجة جاك تحفة ومباغيكش تبدليه
ياسر ابتسم بشوق ودار يدو مور خصرها وجبدها عندو وبقا شادها من تما ويدو تانية بقا يلعب فواحد الشعرة كانت على وجهها وبقا يبعدها باش تاحاجة متغطي عليه وجهها الناعم
ياسر(يهدر بهمس):- حسيت بشي حااجة كتناديني من الداخل ديالك كتترجاني نقرب منها نحضنها ونحتويها بين قلبي حسيت باحتياجك لي وبقلقك مني ومن مشاعري .. حسيت بكل خلية فيك كتنبض باسمي وباغياني نملكها .. ناديااا ..
ياسر توقف على لكلام مقدرش يكمل جملة أخرى فحين هي كانت غارقة فكلامو وفعينيه
حسو وكأنهم تحت تأثير شي منوم وكانت عندهم سوية رغبة جامحة فأنهم يتقاربو كاع داك القرب ناديا غمضت عينيها بهدوء وياسر نزل بشفتيه وقبلها قبلة هادئة وعميقة ورقيقة أيضا
زلزلت قلب كل واحد فيهم وخلاتهم يرتابكو بعد ياسر شوية عليها وفتحت عينيها وشافت فيه
بدموع نزلت معرفتش سببها مسحلها دموعها بلطف وضمها لصدرو برقة تحولت لضغط وكأنه كان باغي يدخلها جوات قلبو ويخبيها فيه ويشبع من تواجده قدامو وكأنه كان عندو إحساس مسبق بأنها غاتبعد عليه
وطبعا كالعادة اللحظات الجميلة لابد ماتدخل فيها جميلة وجعفر ويخربوها
ناديا(بعدت بخجل على ياسر اللي كان باقي شادها ومباغيش يطلق منها):- تليفونك ؟
ياسر:- حممم ميكونو غير دوك جوج هما اللي كيحرمو اللحظات تسناي... ألو وي جعفر وصلتو
وي راحنا خارجين ... تتت واه صافي مسافة الطريق نكونو عندكم.. باي(زفر بهيام)
أمممم ماي ليدز أنخليك تكملي زينتك قبل ميقلبو حفلة العيد ميلاد عندنا هنا فالدار هههه
ناديا اكتفت بابتسامة خجل ودخلت في حين هو كان قريبة يرقص من الفرح معرفش علاش
دخلت سدت الباب ديال بيتها وبقات مسندة عليها مرتبكة كترجف خايفة جسمها كلو مقشعر
تكاكا ياسر بالوقت ووقف يعدل قاميجتو وهو مبتسم فتح باب بيتو وارتبك كيفاش يرجع يشوف فعينيها ولا كيفاش يواجهها منعرف هادشي اللي وقع بيناتهم جا فجأة لكن مخصوش يتكرر أآنسة ناديا سمعتي هاكا كان شي صوت داخلها كيهدر وهي مغمضة عينيها كتحاول تسد السنسلة من مورا عنقها وكتحارب هاد الأفكارر حتى قاطعها ياسر بصوتو
ياسر:- محتاجة شي مساعدة ؟
بلاما ترد عليه تقدم هو منها ووقف موراها وبقات تشوف فيه غير من المراية اللي أونفاص ليهم ومرتبكة بزاف هو مبغاش يزيد يدقق ولا يزيد فإحراجها أصلا تاهو بغا يتهرب من نفس الشي
ياسر:- نمشيو ؟
ناديا:- أ.. أهاه
ياسر(شافها خرجت):- نسيتي حقيبة يدك
ناديا(شدتها منو بارتباك):-آه وي ميرسي
شافت فيه بضياع معرفتش علاش حست أنها لو تعنقو غادي تقدر تتوازن مي مستحيل تدير هاكا صافي ناديا تشتت فكريا وطول السهرة وهيا ساهية وجميلة غير حاطة عينها عليها وكتشوف فياسر اللي كيتهرب منها
جميلة(بمكر):- نتوما بجوج ماكوش عاجبيني
ياسر وناديا (فخطرة بارتباك):- علاش مالنا ؟
شافو فبعضاتهم وفيساع نتاقلو لجميلة اللي غمزت لجعفر اللي كان غير كيتبسم
طبعا ياسر كان يعترف بلانديريكت للحمقة ديال ناديا اللي غاصت فمعاني الكلمات مي داء التوسويس اللي فيها عمرو ميخليها تعيش اللحظة بقات تفكر فأنها كيتهيألها كاع هادشي وأنها مجرد أغنية في حين كان ياسر كل لحظة يشوف فيها باش تقرا عينيه لكن شكون يشوف وينتبه لا وقالتو سيلينديون كنت عيناي اللي أرى بهما ياخالتي سيلينديون هاد ختنا ناديا خصك تجيها ديريكت راه مكتفهمش بالإِشارة عموما منخسرش الأجواء على أنغام سيلينديون دخلو للدار وهما فحالة هيمان كبيييرة وكان مالأفضل كل واحد ينقشع لبيتو وإلا غادي توقع شي سنفرة غير محمودة احم بحم توما علاش كتسولوني راه بحالي بحالكم غي كنشوف بعيني :)
ياسر(حط السوارت فبلاصتهم):-وأخيرا وصلنا
ناديا(حيدت الكعب ديالها):- كانت سهرة زوينة بزاف
ياسر(كتعجبو مين دير هاد الحركة ابتسم وجا أمامها):- اممم فعلا
ناديا:- للمرة العاشرة عيد ميلاد سعيد وكل عام وانتا بخير
ياسر:- وللمرة المليون كل عام وانتي معايا نحتافلو بيه سوا
ناديا:- هههه
بدون شعور ناديا حملت راسها على أطراف أصابعها وباست ياسر فخدو بهدوء شديد وبرومانسية أيضاااا وهو لحظتها سمح لأحاسيسو تنطلق غمض عينيه وعاش اللحظة
ناديا:- تصبح على خير
ياسر:- آآآآه بون نوي أ.. منسيتي والو؟
ناديا:- شنو
ياسر(شافها معنقة جاكيطو):- والو غير بغيت نقولك أحلام سعيدة
ناديا(ابتسمت):- آه حتى نتا أحلام سعيدة
دخلت لبيتها وكلست على منضدتها وهي معنقة الجاكيطا عاد حيدتها وضمتها لحضنها وبقات تشم ريحتها هزتها وحطتها على سريرها جنب وسادتها وحيدت المايكاب وهي كل لحظة كتتبتسم ببلاهة مين تتفكر اللي وقع فالليلة كلها بدلت ملابسها بلباس النوم وفردت شعرها وطفات الضو خلات غير ديال الأباجورة واستلقات جنب الجاكيطا اللي بقات تحسس على عنقها بيديها غمضت عينيها بعنف وجبدت لعندها ديك الجاكيطا وبقات معنقاها ونعسست بإحساس زويييين بزاف
كان يشاركها فيه ياسر كان واقف فالشرفة ممصدقش شنو وقع تلقائيا خرج من الغرفة ديالو ومشا لغرفتها فتح الباب غير بشوية ولقاها معنقة جاكيطو بشكل طفولي كيضحك اقترب من سريرها وهز الغطاء وغطاها بيه ونزل لمستواها ووباس راسها بلطافة
نفس الإبتسامة ترسمت على شفافها حاليا لكن معا دمعة حارقة مشات لحقيبتها الكبيرة فتحت جيبها الأمامي وجبدت ديك الجاكيطا وضحكت مين تفكرت أنها لقاتها صدفة مابين أغراضها محيت نهار جمعتهم باش تخرج من الدار رجوعا للفيلا كانت متيقنة أنها محطتهاش ضمن أغراضها لكن تشاء الصدف مالا يكون بالحسبان وهادشي فرحها بزاف أقلو تشم عطرو وتحس بيه قربها ضمتها لحضنها ورجعتها لبلاصتها وهي باقية كتسد فالحقيبة :
مريم(من الباب شافتها تمسح دموعها):- نقدر ندخل؟
ناديا:- آه دخلي احبيبتي واش عاد تستأذني مني
مريم:- امم يعني قلت تكوني فلحظة خاصة كدة ولا كدة منقتاحموهاش
ناديا:- امم أبشري ياختي شنو من مور هاد المقدمة الزينة
مريم:- نعاونك حكيلي ما سر النغنغة اللي نتي فيها فين سافرتي وشنو حكية الرصيد البنكي والإكسسوارات والملابس الغالية امممم ممكن تشرحيلي من أين لكِ هذا ؟
ناديا(ابتلعت ريقها):- خدمة أمريم خدمة
مريم:- عرفت خدمة مي أشمن خدمة اللي فغضون شهور قليلة تخليك فهاد العز كلو
وزايدون علاش مباغياش تقولينا فين سافرتي ؟
ناديا:- ودبا تعرفي الفترة االجاية
مريم:- لا قوليلي دبا من يوم خرجتي مالحبس وحالك مشقلب سفير على عفير وغامضة بزاااف
قوليلي أنا ختك مغاديش نآذيك غي بغيت نطمن
ناديا :- طمني راه كلشي فالسليم كنت مسافرة لأمريكا صافي تهنيتي وراه وارد جدا نستقر هنا وخصك تباركيلي غادي نولي وجه إعلامي لواحد الشركة مي تكتمي على الأمر حاليا ولا لحتى لبراهيم متقوليش
مريم:- وجه إعلامي مرة وحدة أوووو كيدرتيلها العفرييييتة ياحليلي يعني نبقاو نشوفوك فالتلفزة والمجلات الله الله هاتي تعنيقة وبوسة هاتي فرحتلك احبيبة ديالي والله تستاهلي وشتي ربي عوضك خير على كل سنين الوجع اللي تمحنتي فيها
ناديا:- آه الحمد لله
مريم:- لكن باقي محكيتيلي سر الحزن اللي فعينيك ؟
ناديا مردتش عليها وبقات ساكتة وكتشوف فالأرض
مريم:- كتبغي شي حد ؟
ناديا(حلت عينيها برعب فمريم وولات تنفست بعنف):- ماشي حب ماشي حب وإنما غير ولف وصافي
مريم:- حكيلي حكيلي أنا نقولك واش حب ولا ولف نتي أصلا حمقة فهاد الأمور ماشي جديدة عليك
ناديا:- شنو نحكيلك؟
مريم:- ندوشتي متمهبليشي عليا نطقي مطلعيهاليش
ناديا(تنهدت بعمق ومبعد ابتسمت):- سميتو ياسر وو كان خدام معايا و كنا عايشين معا بع.. قصدي جيران يعني أونفاص ليا الباب عند الباب ويعني توالفنا بعضياتنا محيت مغربي بحالي و متغرب بحالي المهم كنا نديرو بزاف الحوايج معا بعضياتنا نتسوقو بجوج ناكلو بجوج نخدمو بجوج يعني كان شخص رائع بزاف معايا وكنت مين نمرض يهتم بيا ويتهلا فيا اممم صحيح كان أغلب الأوقات كيعصبني ويخرجني على طوعي ويستفزني لاحقاش متعجرف وأناني ومتسلط ويبغي غير راسووو ويبغي كلمتو اللي تكون وعنييييييييييييييد (بانفعال تنفست وبتعب كملت)برغم كل هادا برغم كل شي شتاقيتلو بزاف (نزلو جوج دمعات من عينيها)
ناديا(شافت فيها باستغراب):- طبعا كيتهيألك ماشي معنى توحشتو أنني كنبغيه تتتت غير ولفتو وصافي ودبا يكون رتاح مني خصوصا مبعد المخاصمة اللي وقعت بيناتنا مؤخرا
مريم:- هادا هو اللي قلتيلي فالتليفون أنك غلطتي غلطة كبيرة متقدريش تصحييها ؟
ناديا:- تماما أنا نعترف زودتها بزاف وكترت الملح مي تاهوا ستافزني لأقصى الحدود
وانا منحكيلكش عليا عطيتو علاش يعاود
مريم:- آه ولكن هادشي أثر على علاقتكم
ناديا:- صحيح مي كنا كنا غادي نتفارقو هادي هيا الحياة
مريم:- واش كتناقضيني ولا كتناقضي راسك نتي راكي توحشتيه وكان تلقاي تشوفيه دبا أو تكلميه وترجعو كيف كنتو وأحسن لكن عنادك وراسك القاصح يستحيل يخليوك ديريها وتعتاذري
ناديا(وقفت بعنفوان):- نعتذر ياكما حماقيتي هو اللي خصو يعتذر مني محيت دخل فخصوصياتي
مريم:- نقدر نعرف شنو هيا هاد الخصوصيات؟
ناديا:- هو مبغانيش نخدم معا هاد الشركة الإعلامية بمعنى أصح مبغانيش نتعامل معا مولاها مستر وليد وللحقيقة الراجل مشفت منو إلا الزينة ومهلي فيا بزااااف
مريم:- ولكن ميمكنش ياسر يتعكس على شي شخص ويقولك متقربيش منو إلى مكانش شايف فالأمر حوايج نتي مشايفاهمش
ناديا:- لا راكي غالطة هو ماشي هاكدة هو بغاني نتمشى على هواه هو يختارلي فين نمشي ومعامن نخدم ووشا ندير وده بعدو ميحلمش بيها مزال متخلقش على وجه الأرض اللي يمشيني على هواه
ناديا:- مسكين مسكين نتي كاع مكتعرفيهش وكتقولي مسكين هي أنا اللي ظالماه
مريم:- ناديا أنا ختك وعارفاك ماللي كنا صغار وكنعرف راسك شحال قاسح يعني ولو على حساب قلبك متخليش شي حد يمشي كلمتو عليك لكن شوفي معايا علاش متاخديهاش ببساطة
وتشوفي الموضوع من منظورو هوا
ناديا(تنهدت بتعب):- حاولت مي ملقيت جواب وحاليا منقدرش نسمح للشكوك تدخل لحياتي صافي أنا ختاريت نخدم معا ديك الشركة ووقعت معاهم عقد سنوي
مريم:-اممم فهمت طيب سؤال دبا هو عمرو آذاك بشي حاجة ؟
ناديا:- لا أبدا
مريم:- عمرو قالك مديريش شي حاجة إلا وكانت فمصلحتك
ناديا:- لا أبدا
مريم:- عمرو فكر فراسو قبل ميفكر فيك
ناديا(تفكرت مهماتهم كان ديما يحميها هي الأولى قبل منو):- .. لالا أبدا
مريم:-إذن ؟
ناديا:- برغم ذلك منعتذرش منو أبدا أبدا أبدا
مريم:- فكري شوية بعقلك باش متندميش والإعتذار مابين أي جوج عندهم مشاعر ولفية كيما سميتها لبعضياتهم الإعتذار بالنسبة ليهم ماشي طياحة من القيادة ولا شيء سيء بالعكس هي مبادرة كتمتن العلاقة وماشي مهم شكون يبدي لأنهم كيان واحد
مشات مريم معا عزيزة وبقات ناديا كتشوف فالمراية وتفكر فكلام مريم وفنقطة وحدة محددة
إلى جا عندها ياسر شنو دير غمضت عينيها بعمق وقالت نعنقو بدون وعي آه نعقنو محيت توحشتو ونعاتبو اللي متمسكش بيا ومأصرش نبقا معاه ومن فوقها طردني من دارو بمنتهى البشاعة واه نلومو على كاع هادشي ونقولو توحشتو وتوحشت تفاصيلو عجرفتو وحتى عصبيتو
أفففف البعد شحال خايب وصعيب ...
عزيزة(كتعيط تاني):- ناااااااديا
ناديا:- هاني جايةةة أففف منك أياسر أففف
ياسر:- وأخيرا تجمعنا من بعد سنوات
جواد:- الله ياودي ينعل بو الخدمة اللي تجلينا كيما هاكدا
ياسر:- مي هانت أجواد أخويا مبقا إلا القليل ونقضيو على راس الحربة
جواد:- أمين أمين مي كيبالي الغربة جات معاك ولالا أبراهيم؟(غمز)
ابراهيم:- قتهالو فالمطار قتلو تبوكصت وقيلة حنا اللي مشينا فيها
ياسر:- ههه زعما راك عاد على وش جواز وكتكول هاكا ونتا أزينهم باقي شباب تقول كاع مامزوجش ولا حتى أب باينة ليلى دايرة عليك حظر التجول بالحق كيراها دايرة توحشتها تاهيا مسكينة
جواد:- هي لباس عليها بصح هاد ليامات منيش كاع نشوفها إلا صدفة
ياسر(عقد حواجبو مستغرب):- كيفاش صدفة؟
جواد:- سول هاد الغول اللي حداك صباح وماطال وهي كتجريلو توجدلو حوايج العرس وهو مبند غادي جاي عند مريمتو
ياسر:- هههههههههههههههه
ابراهيم:- داخلنا عليك بالله هاداك وجهك ولا قفاك علاه شكون جرالك فعرسك ماشي أنا وياسر شتنا النجوم فعز الظهر بسبابك
جواد:- الله يكتر خيرك بصح نتا جريت علا حساب ختك ليلى أما وكان جات عليا متعرفنيش
لكن دبا أنا من حقي نطالب بمراتي أه وليت منشوفهاش إلا صدفة ولا مخليالي مساج فالواتساب هاني جاية الحبيب هاني غادية الحبيب
ياسر:- ههههههههههه وزواج التكلونوجيا أصاحبي ههههه
ابراهيم:- باركة متضحك نتايا واجي عاوني
ياسر:- هههههههه فاش ؟
ابراهيم(هجم على جواد وقجو قجة وحدة):- فهاد بوراس بغيت نقص كرسي من كراسا العرسسسس اليوم نتحي عليك ونتا باش غادي ندي الدفوع ويالااه
ياسر(شاد على كرشو وهابل بضحك):- هههههههههههههههههههههه
وصافي صافي راك تقتلو بصح ميجوزلكش تا فذبيحة
جواد(ميت بضحك وكيكح):- وناري أصاحبي درتها بصح بغيت تاحي عليا ياك ونتا باش دافع عليا باقي تحلل وتحرم وخا دبا يجيك يوم
ابراهيم:- آآآآه على سيرة اليوم واش مباغيش تسمع آخر أخبار الجووو ديالك أمسيو ياسر
مريم:- ليلى ههه واحد المجنونة تاهيا كاع مسالية وعلى بالك غدا غاتجي للمحل حتا هيا وتما فرصة تعرفي عليها قبل العرس أما راجلها الله يعمرها سلعة خدام تاهوا فالبوليس بصح قسم التحقيقات ماشي بحال ابراهيم وصحاب من الصغر عاد
السارقة الجزء 31
محتوى القصة
التنقل بين الأجزاء