دخلت مريم تقيس وبقات ناديا كتشوف مابين لي موديل ديال تكاشط وقفاطن وهزت فيدها واحد القفطان فاللون الغوزي فونصي ومطرز بالذهبي وفوقيتو فالكحل حزامتها ذهبية
قالت لديك العاملة اللي تما باللي غاتقيس هادا باش توجدولها في حين كانت عاملة أخرى كتعاون مريم باش تقيس لباس العرس
العاملة :- آنسة تفضلي معايا
ناديا:- ميرسي ختي
دخلت تقيسو فواحد الغرفة خاصة بالتبدال جاها زوين بزااف بقات تشوف راسها فالمراية
وابتسمت ابتسامة حزن وخرجت تشوف برا وتوريه لمريم
العاملة:- واووو جا معاك يهبل أختي
ناديا رفعت راسها تشكر العاملة على كلامها الزوين لكن تفاجئت بالخيال اللي شافتو من برا واقف كيشوف فيها حطت فيد العاملة بلا مبالاة حوايجها ومسكت القفطان ملتحت وخرجت تجري تشوف واش داك اللي لمحاتو حقيقي ولا غير كيتهيألها لكن ملقات والو فراغ فديك البلاصة وعرفت أنه فقط تخيلت وضحكت على راسها ببلاهة ورجعت تأسفت من العاملة ولقات مريم
وقفو بجوجهم يشوفو فالمراية فستان مريم كان بذيل طوييل وبكم واحد بالدونتيل وفالصدر محجر بأحجار وردية وكان مناسب في الخصر ولتحت تموجات كتيرة من قماش الفستان نازلة حتى للأسفل كان منظرها روعة بزااااف
ليلى(جاية داخلة من الباب):- تبارك الله تبارك الله على عروستنا الزينة مشاء الله اغزالة ديالنا
ليلى:-كيبالي همة و على هاد الحسبة نديرو جولة هههههه
ناديا طبعا كان عقلها غايب مسمعت تاحرف من الحديث كانت غير تبتسم وتشوف فديك البلاصة وقلبها باغي يخرج من مكانو لا يمكن الخفقات اللي كانت تحس بيهم فقرب ياسر دبا يكونو مجرد تهيؤؤاات دخلت بدلت كسوتها وخرجت تقلب على ماتلبس فالعرس بدون مبالاة
استقرت عينيها على لون ياسر المفضل الأحمر كانت تكشيطة حمرااا
لتحتية بلا يدين أما لفوقية فكان الكحل غالب عليها ومطرزة بالبريوون وفيها وريدات حومر
للحنة أما للتقييل فخدات قفطان فاللون التيركواز سامبل وحزامتو كانت فالغوز فونصي
بيما كانت مريم بدلت وبقات تختار معا ليلى..
ناديا خرجت لبرا معا العاملة للسيارة اللي كراتها باش تحرك بيها فالمغرب وفتحتلها الباب الخلفي وحطت فستان مريم ودوك لحوايج
اللي دات ناديا سدت اللوطو وجات راجعة للداخل تبقى معا مريم وليلى وهي تلتفت على جنب الطريق لوخرا شخص يشبه لياسر وحلت عينيها لا ياسر هاداك دارت يدها على قلبها
لكن كاميونة كبيرة مخلاتهاش تشوف الجانب الآخر مين فاتت ملقات والو فديك البلاصة
شدت راسها وحست بالدوخة ودخلت كلست على الكرسي بسكون تام
مريم(انتبهتلها):- ناديا نتي مزيانة؟
ناديا(تنفست بعمق):- لا والو غير عييت عرفتي غانمشي نجيب شي سيبرادين ملفرماسان نتوما باقيين هنا ياك
مريم:- آه واش نمشي معاك ؟
ناديا:- لالا غير بقاي معا خت راجلك أنا شوية ونرجع
مريم:- أوكي هاني هنا
خرجت ناديا وبقات تتنفس بعمق حست بأنفاسها مخنوقة وقلبها باغي يسكت قطعت الطريق تقلب على فرماسيان سولت مول لقهوة ونعتلها فين بقات تتمشى غير بشوية
فواحد الدورة بقات غادية فيها ولاحظت أنها خاوية مافيهاش الناس فجأة خرجت واحد اليد سحبتها و دخلتها لواحد الدريبة صغيرة بزاف وشوية مضلمة
ناديا مرفعتش راسها نهائيا تشوف فحضن من راها وشكون هاد الشخص اللي شادها بجوج يديه وضامها ليه بهاد القوة هادي اكتفت بإغماض عينيها وشم العطر اللي لطالما رافقها فليالي الشوق والحنين اكتفت بسماع نبضاتها كتهتف وتهتف وتهتف بيه اكتفت بروحها اللي حست بيها رجعتلها أحاسيس بزااااف متجرأتش ترفع راسها وصدرها كان يعلو ويهبط وهي حاطة راسها على كتفو وكأنها خايفة ترفع راسها تشوف تلقاه ماشي هوا وتنصدم لكن كانت واثقة من إحساسها اللي لا يمكن يكذب عليها ،
في حين كان كيصارع نفس الأحاسيس وأخيرا هاهيا فحضنو هاوا يشم رائحة عطرها هايا الارتعاشة اللي كيحس بيها كلما كانت قريبة منو فيه دبا ، لسانو مطاوعوش ينطق شحال وهو محضر شنو يقولها مي مقدرش
تزحزحت هيا من بين يديه وهو أفلتها بعدت غير واحد الشوية عليه وأنفاسها باغية تنفجر من صدرها رفعت راسها غير بشوية تشوف فيه بتعب شافت فيه عينيها فعينيه عينيها الزورق اللي بعمق البحر هاهما أسرى لعينيه دبا
شد مرفقيها وبقا يشوف فيها بجوع العاشق الولهان اللي شوقو لحبيبو حمقو
ياسر(بصوت مشتاق):- ت ... توحشتك
ناديا(بصوت هارب):- ش ... شنو جيت دير هنا ؟
ياسر:- توحشتك
ناديا(باختناق):- جميلة وجعفر عارفينك هنا ؟
ياسر:- توحشتك أناديا
ناديا(سكتت وانفجرت):- علاش جاي مورايا أياسر ياك سالينا كلشي لهيه علاياش كتقلب أنا وقعت العقد معا مستر وليد ومغاديش نرجع فقراري
ياسر:- مجيتش على قبل مستر وليد ولا علا شيء من غير أنني توحشتك وشتاقيت نشوفك
ناديا(شدت على راسها وبعدت عليه):- واش مكتفهمش أياسر هادشي اللي كدير غلاط نتا خصك ترجع اليوم لهيه مخصكش تبقا هنا أياسر مخصكش تبقا هنا
ياسر:- مقدرتش نتحمل بعدك أناديا فهميني
ناديا(كلما يقرب كتبعد حتى وصلت للحيط):- ياسر هادشي اللي كديرو غلاط قتلك رجع يعني رجع شنو باغي مني شنووو طردتني من حياتك علاش رجعت تقلب عليا وتابعني فين ما مشيت
ياسر(قرب منها حتى مبقاش بيناتهم فراغ):-وندمت بزاف بزاف راه ماشي بيدي أناديا ماشي بيدي فهميني
ناديا(صافي ضعفت قواها وما تبقى منها غوتتت بيهم):- بعد مني أياسر بعد مني
ياسر(غوت حتى هوا):- لا مغاديش نبعد منك غادي تسمعيني أنا غلطت فاش أصريت عليك ومحترمتش حرية قرارك وزدت فيه مين خرجتك من حياتي بصح نتي أجبرتيني على ذلك
ناديا:- صافي مبغيت نسمع والو دبا عاد دبا عاد جايني ندمان مفكرتش فشعوري طول هاد المدة
مفكرتش شنو غاتكون حياتي بلا بيك آآ جيت روطار بزااااف... بعد من طريقي
ياسر:- مغاديش نبعد
ناديا:- قتلك بعد
ياسر:- لا
ناديا:- افففففففففففف
ياسر:- شوفي انا راه ندمان على كلشي مكانش خصني نتصرف بديك الطريقة معاك
ناديا:- قتلك مبغاية نسمع تا حاجة علاش كتصدع راسك وتصدعني
ياسر:- بسيف عليك تسمعيني
ناديا(حمرت عينيها فيه):- لا مبسيفش
ياسر:-اففف عرفتي نقدر نختطفك دبا وتاشي حد ميعرف عليك والو
ناديا(ضحكت بسيف):-يا سلام باقي نتا نتا متبدلش مغرور
باستو من خدو وودعاتو وجات ماشية التفتت موراها ولقاتو متكي على الحيط بعفويتو وكيبتسم ليها بشكلو اللي كيهبل معرفتش علاش حست بأنها باغية ت... :
ولات لعندو تجري وترمات فحضنووو وهو ستقبلها بحضن واسع دفنها فييييه
إحساس رائع عاشوه بجوجهم ودعاتو بعدة التفاتات وبايبايات محسبتهمش والله من كترتهم ومشات رجعت للوطو ركبت ومشات وهي طايرة مالفرحةة من كل اللي وقع معاها وكتشوف فصوالح اللي موراها وفرحت أنه غايحضر للعرس وأهم شيء أنها فالليل غاتشوفو ياااااا سلام
وصلت لعند باب الدار وبقات تزمر باللوطو وتزمر وتزمر دارت حالة حتى خرجت عزيزة ومريم وليلى يشاركوها الفرحة
خرجو لباس العرس المغلف بغلاف خاص باش ميتخسرش ودخلوه بالزغارت وناديا هزت حوايجها ودخلت لغدا اللي جابتلهم تاهوا ومشات تجري عند جدها عيسى عنقاتوو بعمق
ناديا(جبدت من الصاك لكبير شكارة أخرى):- وهادي لخالتي عزيزة تكشيطة تاعلة فاركة وعلى قياسك ويلا معجباتكش راه درت معا مول المحل نرجعهالو وتختاري حاجة أخرى
عزيزة:- يا بنتي الحبيبة بزاف عليك هادشي
ناديا:- مبزاف موالو راه نتوما عائلتي زعما ، بصحتك أخالتي
عزيزة(سلمت عليها بفرح):- روحي الله يحن عليك أبنتي
ناديا:- آآآآمين يارب ويالاه نتغداو راه جعت وجوعنا ليلى تاهيا
ليلى:- واه كاينة ههههه
مريم:- يالاه دقايق ويوجد كلشي ليلى زيدي للصالون
ليلى:- ويلي على زيدي للصالون كولي زيدي للكوزينة راه ولينا عائلة وحدة يالاه دخلو نعاونكم
ونتي أناديا رتاحي شوية راه تكوني تهلكتي أنا غانعاونهم بلاصتك
ناديا:- لهلا يخطيك ختي ليلى
طلعت داك الدروج كتجري وكأنها باغية تستفرد بلحظاتها معا ياسر ومباغياش تاشي ازعاج باش تستجع كلشي اللي عاشتو ،حطت الحوايج دياولها على الكنبة وترمات على سريرها
فالدار اللي كان فيها ياسر كان تاهوا مرتبك بزاف حبيبتو جاية عندو كان لابس سروال جينز ومفوقو تريكو بيديه جاي لاصق على الجسم بلون رمادي كان كيوت بزاف المنظر ديالو
وكان مجهز طابلة بالورود والشموع الحمراء وكيطل من السرجم وكل مرة يشووف فالساعة حتى وصلت أميرتو وخرج يستقبلها كانت هازة فيدها قابصة شوكولا فتحلها الباب ودخلت شد عليها ديك القابصة وحطها على الطابلة وشد سوارت اللوطو حطهم على المنضدة وعاونها باش تحيد جاكيط الفورير بطريقة رقيقة بزاف وقلب كل واحد فيهم كيخفق بقوة
ياسر(من موراها كيحيد الجاكيط):- نوعي المفضل
ناديا(نزلت فقط راسها من جيهتو بلا مادور بحركة مغرية):- شنو هوا؟
ياسر(همس فودنها):- نينا ريتشي
ناديا(شافت فيه بعيونها الفاتنة):- اممم
ياسر(شاف فالطابلة):- ياريت يعجبك هاد المرة تنظيمي ومتخربيهش كي المرة اللي دازت
ناديا(بدلع):- هههه غير متقلقنيش غايبقا كما هو عليه
ياسر:- وبديتي تشرطي من دبا تفضلي كلسي (سحبلها الكرسي)
ناديا:- امممم كيبالي الطابلة تشهي نتا وجدت هادشي حسب معلوماتي أنت والطبخ مكتلقاوش
ياسر:- دبرت راسي ... أ اففف كتعرفي أن هاد اللون كيقتلني
ناديا(حشمانة):- بدينا فقلة لحيا غاتكلس بأدبك ولا نوض نمشي
ياسر:- ومالكي داخلة كي الزوبعة راني غي نعبر يابردي
ناديا:- وحكيلي كيفاش تاجعفر وجميلة خلاوك تجي للمغرب مع أنني سمعتهم رافضين قدومك لهنا بأي شكل كان
ياسر:- ولكن هادا ياسر إلى بغيت شي حاجة راه نديرها وربي كبير
ياسر:- وصافي صافي مالك قريبة ديريني فجمعية حقوق النسوان هانا نجاوبك ألالة ميكون غي خاطرك
ناديا:- وجاوب
ياسر:- وي توحشتك
ناديا:- هادا الجواب
ياسر:- وعلى قد السؤال
ناديا:- ياربي مين تسولك حبيبتك واش توحشتها المفروض تسمعها مووشح ديال الكلام الرومانسي غزل اممم حاجة زوينة ماشي تجاوبها على قد السؤال بحالي راك تهدر معا مول الحانوت
ياسر:- ههههههههه
ناديا:- مالك تضحك؟
ياسر:-كنضحك على انفعالك واووو كتكوني مبهرة حتى فعصبيتك
ناديا(وقفت دور فالشقة باش تتفاداه):- نوض نستكشف أحسنلي
بقات كتشوف فالشقة وفالصور الأثرية المعلقة
ناديا:- استأجرتها ؟
ياسر:- تتت دارنا لقديمة
ناديا:- أأأه يعني سبقلك جيت هنا
ياسر(وقف حداها):- جيت بحكم الأصول مرة أو جوج خلينا من هادشي واجي نوريك أهم حاجة عندي فهاد الدار كلها
شدها من يدها وسحبها لواحد الغرفة كانت عبارة على صالون بأثاث فرنسي قديم بصح باقي مقاوم الزمن وفواحد الركن كان بيانو كبير باللون الأسود كلس ياسر على الكرسي اللي قدام البيانو وكلس حداه ناديا ، رفع الغطاء وبانو الأوتار ديالو وبدا ياسر
يعزف بهدوء معزوفة مشهورة
river flowers in your
لحظاااات راااااااااائعة بزاف لا توصف بكلمة ناديا كانت مشدودة بعزف ياسر وبتركيزو فكل نغمة وفعيشو معا اللحن وانسجامو وكأنه كيخرج منو ماشي من البيانو وطريقتو باش كيمرر أصابعو على الأوتار كانت مذهلة وساحرة بهدوئها الرقيق كان فكل لحظة كيشوف فيها ياسر ويبتسم ويتابع انغماسو فهاد المقطوعة اللي كانت مفضلة من مفضلاتو وذهلت فيها ناديا
انتهى منها وتمنات لوكان بقا عاد يعزف ويعزف باش هي تبقا فعالم الأحلام اللي طاررت ليه
يااااه ناديا جامي عاشت هاد المشاعر ولا ياسر حتى هو كان ينطق كل كلمة وقلبو مأخوذ بيها وكيهتف باسمها وبعشقها وبغرامها من أول يوم عرفها فيه مبعد ممسح دموعها وطبع قبلة على عيونها خداها مابين أضلعو وكأنه كيغرسها فيه باش متبعدش ديك الساعة مكانت تاشي كلمة تقدر توصف الإحساس اللي كيحسوه بجوجهم أو تجي فمكانتو احساس فوق التصور شعور بالهذيان بالهوس بالجنون باللاوعي بأن كلشي إيجابي وأن الدنيا كلها كطير فوق السما شعووور مستحيل نقدر نعبر عنو ..
واكتفى ياسر اللي استجمع شوية من تبعثرو وتشتتو فيها ناض وحملها ما بين يديه دارت يدها على عنقو برقة وبقات مركزة فعينيه مكتحسسش بالوجود إلا بيه هو خداها لبيتو ووضعها على السرير واستلقى بجانبها كان بيناتهم مساحة بسيطة فقط كيشوف فيها وكتشوف فيه حطت يدها فوسط ديك المساحة وهو مسكها وجرها لحضنو توسدت يدو ووجهها كان قريب من وجهو
بقا كيلعب بخصلات شعرها في حين هيا غمضت عينيها وتعمقت بوجهها فصدرو بعفوية
ياسر:- طول الفترة اللي عشناها بجوج والفترة اللي تباعدنا فيها كان هادا حلمي الوحيد
أنني نعسك على حضني ونلعب فشعرك حتى تنعسي ونحس بخفقات قلبك تخفق فقلبي أنا
ونستشعر مشاعرك و نستطعم أنفاسك اللي كدوبني ناديا شوفي فيا؟؟
ناديا(هزت راسها بتثاقل العاشقين):- هممم
ياسر(عض على شنايفو):- يا إلهي عرفتي منقدرش نقاوم عينيك عينيك فيهم سحر شرقي على غربي مقدرتش نستوعبهم كلشي فيك مبهر
بقا يتصفح وجهها بنهم ومقدرش يقاوم سحرها طبع قبلة على جنب شفتيها وهو مغمض عينيه
وحتى هيا تاهت بديك القبلة الهادئة مبعد حط يدو على راسها وجبدها لعندو بهدوء تتوسد من جديد حضنو ويديها على ظهرو وهو محتاويها بيديه بجوج مباغيها تبعد ولا تفارقو
ياسر(ارتعش وابتسم وزاد ضغطو عليها وعرف أنه كيألمها لكن مطلقهاش):- ياروحي أنا
ناديا:- شكرا على لمعزوفة وعلى الكلمات اللي قتهملي
ياسر:- لا شكر بينا إحساسي هو إحساسكِ احبيبتي
ناديا:- م.. مكنتش نعرف بأنك كتعزف على البيانو
ياسر:- وهانتي سجلي معلومة بياسر ههه
ناديا:- وعدني
ياسر:- بشنو نواعدك أعمري
ناديا:-بأنك عمرو متبعد عليا من تاني
ياسر:- أصلا حتى لو بغيت منقدرش نبعد عليك كوني مطمنة
ابتسمت بخجل ودفنت راسها فحضنو بقات تلعب بأطراف أصابعها على صدرو حتى لاحظت وجود ندبة لأول مرة تنتبهلها انتفضت مفزوعة
ناديا:- ياسر مناش صابتك هادي؟
ياسر(حط يدو على يدها فوق صدرو وحاول يهديها):- حاجة قديمة طمني مكتوجعنيش
ناديا(رجعت لجلستها):- أفف ريحتني
ياسر:- كتخافي عليا ؟
ناديا:- أكيد أياسر راه راه وجودك هو وجودي فهاد الدنيا
ياسر:- الله الله على الكلمات الجميلة عاد بداو كيبانو زيدي زيدي اشجيني يا نور عيني
ناديا(زعفت بدلع):- متضحكش عليا راه كنهدر بصح
ياسر(كيعيبها بدلع):- وصافي غي بغيت نسمع عاد
ناديا:- محيت طماع
ياسر(تكعد وولا هوا قريب منها وهي راسها على الوسادة):- اممم حسبني طمااع وباغي من حبك زيادة حسبني طماع وباغي انعيشو بسعادة أنا ونتا الحب اللي بينا يزيد أنا ونتا واللي يحسدنا يتعاادا .....
ذابت ناديا فكلماتو المستوحاة من أغنية حاتم عمور حسبني طماع ^^ وسرحت فملامحو
وفالإحساس اللي كيوصلها منو واللي غرق كل تفاصيلها فيه بقاو كيهدرو معا بعضياتهم بزاف
ناديا:- ههههه هي ديما مزيدة ساعة ومنقصة ساعة حسب مصالحها طبعا وغي سكت دبا تكون موجدالي موششح طويل عريض على هاد التعطيلة مي محسيناش براسنا هههه كاع
ياسر:- عمري منعست هاكدة كأنه أغمي علي
ناديا:- وقيلة داك العصير فيه شي حاجة تاني
ياسر:- لا يكفي أنني نحاصرك بين ذراعي حتى ذوبي ومتبقاش تعرفي القبلة مين جات
ناديا:- واثق من راسك
ياسر:- تجربي
ناديا(بغنج):-نفضل نأجل التجريب باش نضمنو اللقاء مرة تانية وإلا مريم غاتحبسني فالدار ههههه
مشات تقلب على كعبها فالغرفة لبساتو وشافت فالسرير بابتسامة جنون وخرجت للبهو كان ياسر كيراقبها من تما ورابط يديه ولاوي شنايفو حزين لأن قطعة منو غاتبعد عليه
اتجهت عندو ناديا مبتسمة على حركة وجهو وترمات فحضنو
ياسر:- إذن خليني ندير للي فراسي وفخلال أيام غاتكوني ملكي
ناديا:- كيفاش؟؟
ياسر(هز حقيبتها وتليفونها):-دبا خليني نوصلك للدار وغايكون لينا حديث مطول
ناديا بدون استيعاب لبست جاكيطها وشدت عليه صاكها و التليفون قفل الباب ديال الدار ومشا فين وقفت اللوطو ديالها فتحهالها طلعت وركب هو فمكان السائق وبقا يصوك
السارقة الجزء 32
محتوى القصة
التنقل بين الأجزاء