وليد:- صافي صافي أسيدنا غادي نجي أنا وجاد فالموعد أيضا ... يارب تلطف
جميلة(كالسة هي وجعفر كيشربو قهوة فالجردة):- فنظرك علاش طلب منا هاد الإجتماع المفاجئ؟
جعفر:- صراحة ماشي عوايدو
جميلة:-ياكما كاينة شي حاجة ؟
جعفر:- بحالاش زعما ؟
جميلة:- معرفت بصح قلبي محسسنني باللي الأمر كيخص ناديا
جعفر:- ماشي بالضرورة وفرضا كان متعلق بيها أنا وياك متأكدين أنه ميقدرش يأذيها
جميلة(حطت كاسها بانفعال):- ههههه يأذيها ليه عمرو البوس أذى شي واحد مباشرة وبشكل شخصي ولا نسيت ؟؟؟؟
جعفر(حط كاسو باش يعتذر):- مقصدتش أجميلة !!
جميلة(وقفت متأثرة كتهدر بقهر):-البوس كيتفنن فقتل الواحد كيضربك فالصميم كيكسرك من الداخل ديالك كيدمرك ذاتيا كيخليك تتوجع طول حياتك تعاني وتنهار كل ليلة وتندم وتتحسر على اللي فارقتو البوس مكيهاجمكش مباشرة كيهاجم اللي حاضنو داخل قلبك ومحافظ عليه اللي تخاف عليه ومتقدرش تفرط فيه اللي متقدرش تكمل حياتك بلا بيه البوس أجعفر كيعيشك فمرار وأسى طول العمر كياخذ منك روحك ويخليك متعذب لا نتا ميت ولا نتا حي هادا البوس اللي عرفتو وعاشرتو أجعفر هادا هوا اللي عاقبني على غلاط مقصدتوش بأنه حرمني من بنتي عمر كااااامل ومزال كندفع الثمن لحد الآن... (ناضت تبكي وخلاتو)
جعفر فخاطرو ومتأثر:- ناري ويكون البوس شام شي ريحة ماشي هيا هاديك ناديا مشات تمشي فيها الى وقعت شي حاجة لياسر أففف ياربي السلامات تتتت
دار يدو على راسو بتعب خصوصا مين تفكر منظر جميلة المنهار ومكان فيدو ميدير إلا أنه يدعي الله ميكون تاحاجة ماللي فبالهم غادي توقع وناض يجر أذيال الخيبة والحسرة يجرب يراضي جميلة المنكسرة واللي ولات مؤخرا أضعف مما يتصوره العقل مختلفة تماما على جميلة الصارمة والقوية اللي كانت
ياسر(فمحل فساتين الأعراس):- لو سمحت ممكن تشوفلي فستان أبيض يكون كلاس
مول المحل:- واش بغيتو لخطوبة ؟
ياسر:- لالا ماشي بالضبط مهم بغيتو يكون أبيض وزوين وتخي سامبل
مول المحل:- أكيد موجود عندنا تفضل معايا نوريك وختار اللي يعجبك فيهم
مريم(كتمسح دموعها وخايفة):- آه بصح هااااادي شحال باش طاحت آخر مرة كانت فالدار لقديمة ويعني متبعة دواها يوميا معرفتش علاش طاحت اليوم
ياسر(تنهد بخوف):- فهمت فهمت منا ل 5 دقايق إلى مجاش الطبيب ديالها غاناخذها للسبيطار
منبقاوش نستناو هنا على والو
ناديا:- عندك الحق عالله يوصل دبا أفففففف .. هاه صونيت الباب
جا الطبيب وطلب منهم كاملين يخرجو برة وراكم عارفين لحظات الإنتظار فهاد الحالات كتفوت كلها قلق وخوف ودعاء من الله عز وجل يحفظ عزيزة وينجيها من أي شيء يخوف من بعد صراع معا الإنتظار خرج الطبيب
الطبيب:- غير تهناو المريضة أجهدت نفسها راني عطيتها يبرة مهدأ غادي تنعس شوية ومين تفيق غاتكون مرتاحة إن شاء الله
مريم(ناضت تجري عندو بلهفة):- يعني راها مزيانة معليها والو ياك أدكتور الله يخليك متخبي عليا والو ؟
الطبيب:- يا بنتي مريم هادي أمور مافيها مايتخبا واش إلى كانت في صحة ممزياناش غادي نستنى عاد على صحتها متقلقيش راسك راه غير تعب معا العرس وفالليل غاتكون هيا هاديك لكن ضروري متعبش راسها
ناديا:- أكيد أدكتور شكرا ليك بزاف
مريم:- غاندخل نشوفها ؟
الطبيب:- شوفيها ولكن من الأحسن تخليها ترتاح شوية باش توقف معاك ودير واجبها والله يسخر مقدما
مريم:- ههه الله يبارك فيك غير تفيقلي ماما هاديك الدنيا ومافيها
ياسر:-تفضل أدكتور
دخلت مريم وترمات فحضن عزيزة اللي كانت ناعسة أما ناديا حضنت جدها عيسى باطمئنان وبقاو يدعيو لعزيزة باش تفيق وترجعلهم أحسن من الأول
فاطمة(حالة عينيها فيها ومتأسفة لوضع بنتها):- صافي بلا غوااااات بلا غوووات آآآآآآه آآآآه قلبيييي قلبيييي النفسسس... آآآه النفسسس
أسماء(مخلوعة على مها):- ماما ماما سمحيلي سمحيلي عصبتك ياكي سمحيلي صافي أماما صافي اللي بغيتيها نديرها غي متمرضيش راه معندي حد مغيرك الله يخليك نبوسلك يدك صافي صافي (تبكي وتمسح دموعها)
فاطمة(بمناهدة وبتعب مصطنع):- آآآه أبنتي بغيتي تقتليني ياكي وتهناي أنا مطلبت والو منك غير تحضري بجنبي ونفتخر بيك قدام بونسوان
أسماء(كتبتلع ريقها وحمدت لله على أن الأمور فاتت على خير):- واخا أماما اللي بغييتيها نديرها غير رتاحي نتي نمشي معاك للعرس بصح متبززوش عليا لا خطيب لا خطيبة من دبا نتفاهمو
فاطمة فخاطرها فالأول(ومسخوطة يا مرت ولدي والله خطتك نجحت ونمشي معاها فالخط قبل متقلب):- آه أبنتي منبزوش عليك الله يرضي عليك نوضي وجدي متلبسي راه فيساع يجي الليل وانا غادي نمتد شوية هنا نريح نريح ياك شفتيني عييييت أبنتي آآآآه آآه
أسماء:- صافي رتاحي نمشي نجيبلك كاس ما ونوجد روحي غير تهناي
فاطمة طلت عليها تامشات وهي تضربها بشطحة نتاع النجاح وولات طاحت كاو عايشة الدور السيدة وشتو كيد النسا كيداير وباقي عاد اللعب الكبير مين يعرف جواد باللي جاري موراه
كانت الساعة شي 6 ديال العشية وطبعا هاد الوقت البنات باين فين كتكونو مخشيين غير فالصالون معا لعروسة أما نتوما يا لولاد فأكيد معا العريس وها اللي يسيري الصباط ها اللي يحدد القمجة وها اللي باقي كيقلب على كرافاطا ...
عيسى كان فالدار تاهوا متقاتل معا الكوستيم اللي جابتلو ناديا وعزيزة فالبيت كتلبس الدفينة ديالها وتعدل ففورانتها ومرة مرة تبكيلها شوية وترجع تكمل توجادها وسعيدة معاها كتصبر فيها أسماء بزز منها لقات روحها كتوجد راسها قدام المراية وفاطمة كتطل عليها بفرح من شق الباب أما عريسنا فكان فدارو ياخذ دوش ساخن مننكرش أن ارتباكو كيبين أنه مرعوووب طبيعي كل عريس كيفوت بنفس الحالة ؛ أتبارك الله على مولاي السلطان
هز الميكة ديال كوستيمو وخرج وهو ميت بالضحك على منظرها بلي غولو ديال الشعر وماسك ديال الوجه ودايخة معا ولادها شي خصو صباط شي خصو كرافاطة شي لافيست إلخ...
ناديا(تحت الكاصك اللي كيرولي الشعر ووحدة كديرلها بوز صباغة لظفارها وكتهدر):- والله مفهمت دبا علاش تغير البرنامج كنا متافقين من الدار نمشيو جميع لاصال شنو اللي تغير أياسر؟
ياسر(فدارو كيرتب معا العمال اللي معمرين معاه الدار شي أمور ^^):- ياحبيبتي راه
ناديا:- ههههههه واش خلاتنا جارتك بهبالها قال الستاتي قال وبعدا جاوبي جاوبي متخليهش يستنا فيك مسكين
حنان:- تانتي بحالي غادي غير يسكت ههههههه يالاه غانطلع نرد الفوق وبالمرة نطل على عروستنا
ناديا:- غير خلي عليك أنا غانمشي نشوفها لفوق عيشي عيشي معا الشعبي ديالك آختي
طلعت مبعد مساللها كلشي وهي كتضحك على حنان جارتهم وفعايلها ودخلت للبيت اللي كيصاوبو فيها العرايسات وتبارك الله ماشاء الله جات واعرة مريم تبارك الله عليها كانت كأي عروسة أميرة من الأميرات دارولها مشطة ديال العرايسات ورشو عليها السمق اللامع أما المايكاب فكان رهيب جات بكل معنى للكلمة ساحرة كانت الكوافيرة كديرلها آخر اللمسات ديال المشطة
ناديا(مبهورة):- تبارك الله والصلاة عالنبي جيتي واعرة يا مريمتي الحبيبة
مريم(حشمانة ومرتبكة):- الله يبارك فيك أحبيبتي أجي أجي قدامي
ناديا(اقتربت منها وكلست حداها فالكرسي والكوافيرة باقي كتعدل):- يا حبوبتي مخصك والو ياكي ؟
مريم:- لا غير راها شاداني الخلعة وصافي
ناديا:- واشمن خلعة غي ديال العرايسات شوية وغاتفوت
مريم:- واش بصح؟
ناديا:- واه بصح ديها معندي
مريم:- فيناهيا الكسوة البيضة باش نلبسها هنا أحسن؟
ناديا:- راها فاللوطو هي والتكشيطة ديالي غادي نزل نجيبهم وبالمرة نقول للبنات يلبسو فشي بيت لتحت باش منتعطلوش ونمشيو واجدين منا
مريم:- جيتي واعرة بالمايكاب والمشطة الضريفة نارررري غاتحمقي ياسر اليوم
ناديا:- امممممم ماشي قد ما غاتحمقي نتي مولاي السلطان
ناديا:-كوني هانية راه هدرت معايا خالتي سعيدة قاتلك ولدها رضوان اللي فكندا يالاه خلط لبارح وغادي هو يجي يديهم وبالمرة نشوفوه راه سنين بينا وبينو
مريم:- هههههههه تعقلي مين جا يخطبك وهو باقي كيقرا ؟
ناديا:- ناري متفكريينيش كبيت عليه قرعة موناضة ناري على طيش كان فيا
مريم:- هههههههههههه يستاهل هو اللي تعدا على حرمة بيتنا قالك جيت نخطب
ناديا:- والصراحة كان ميتعابش بصح مزال مكان فبالي نتزوج
مريم:- يا ربي بغيت نشوفو مين يشوفك اليوم شنو غايدير ناري ناري
ناديا:- سعداتك نتي غاتبرزي وتشدي الساتيليس من بلاصتك هادا جا هادا مشا ههههههه
مريم:- ومين نعيا أجي كلسي بلاصتي نديرو التور
ناديا:- ههههههههه مجنونة يالاه خليني نجيبلك الكسوة راها 7 ونص تقريبا راه دايرين 9 يجي العريس للدار ونمشيو ديريكت للقاعة
الكوافيرة:- هانا ساليتلها كلشي الله يسخر غانخرج باش نخليكم على راحتكم هنايا
ناديا:- ربي يخليك أختي والله يبارك فيك
مريم:- شكرا أختي بزاف
ناديا:- هاني نازلة أمريم ونجي ....
نزلت عند البنات وقاتلهم بااش يلبسو فشي بيت فالصالون ويوجدو راسهم باش يمشيو واجدين وهاداك مكان البنات فجو الضحك واللعب هزو صيكانهم وتكاشطهم ودخلو لواحد البيت سمحولهم صحاب الصالون يكلسو فيها أماا ناديا توجهت لسيارتها وقبل متفتحها صونا تليفونها
ناديا:- ألو خالتي عزيزة وي هاني معاك ... آه سالينا باقي غير نلبسو ونجيو للدار وفينكم نتوما باقيين فالدار آه واش جا رضوان عنددكم ولا مزال راه 8 خصكم تكونو فالقاعة .. وصافي حنا قولي ساعة تقريبا نكونو فالدار نستناو دار العريس... صافي وجديهملي فصينية فالكوزينة باش نقدمهم مين يجيو أوك بسلامة كوليلي حقا كيبقيتي مزيانة ياك مراكيش عيانة ... إيوا لاباس عليك يالاه أخالتي ندخل الكسوة لمريم باش تلبس ونتلاقاو فلاصال .. سلمي عليها وخا بسلامة أشوووفي متنسايش أخالتي تعطي لجدي كنينتو ديال الليل راه باينة يكون نساها .. عطيتيهالو الله يخليك لينا أخالتي متنساي حد صافي وخا يالاه بسلامة .. أمين
طبعا لاحظتو شحال من مرة قالت ناديا بسلامة هادا حالنا وهل يخفى الحال هههههه كنقولو بسلامة 10 مرات وحنا مازلنا قيد الحديث المهم طلعت ناديا كسوتها وكسوة مريم وعاونتها باش تلبس وشعلتلها كليماتيزور باش متعرقش وبدات هي تلبس وتعدل روحها
فالخاريج
ففيلا البوس
جميلة وجعفر وجاد ووليد كالسين فغرفة كيستناو الإذن باش يدخلو عند البوس
جميلة كانت قلقة بزاف وقلبها محسسها باللي كاينة شي حاجة سيئة غادي توقع جعفر بجنبها كيحاول يطمنها بعينيه وهو بدورو متوتر وقلق من اللي غادي يكولو البوس أما وليد وجاد فكانو على جنب شي كيشوف فشي وينتظرو الأوامر مبعد مدة طويلة ديال الإنتظار أخيرا جا الفرج
الحارس:- البوس كيستناكم تفضلو للمكتب
دخلو كاملين مرتبكين وشي كيشوف فشي مفاهمين والو وقفو عند مكتبو بريبة وخوف وقلق وهو عاطيهم بالظهر واقف كيكمي السيكار ديالو حتى دار عندهم وعطاهم إشارة يكلسو على طاولة الإجتماعات كلسو وهما مرعوبين باقي كيشوفو فيه حتى تقدم بصمت وكلس فمكانو على الطاولة مترأسها وجميلة جعفر شي أونفاص لشي وكذا الحال معا جاد ووليد
البوس:- أنا جمعتكم اليوم باش نبلغكم بآخر التطورات فعملية السلاح اللي غايجينا من المكسيك والشحنة المتبقية من المخدرات
وليد:- حسب معلوماتي أن الشحنة وصلت للميناء بسلام
البوس:-هاديك الشحنة الأولى باقي آخر شحنة وعليها اللي نايض القلق باش توصل لهنا من نفس الطريق الموضوع صعيب خصوصا أن العينين مفتوحة علينا هاد الفترة لذلك قررت ناخذها للمكسيك وتجي معا السلاح
جاد:-ولكن هادي راها مغامرة كبيرة يقدر نخسرو فيها
البوس:- أنا عارف شنو كندير نخسرو القليل حسن من نخسرو الكمية كلها ومتنساش راها غادي تدخل للمغرب عن طريق البحر يعني فيها إشكاليات
جعفر:- سمحلي نسول دبا علاش منجيبوش شحنة المخدرات ديريكت للمغرب مين جاية على البحر
البوس:- يا ذكاءك وخفر السواحل فين سهيت عليهم معليناش و الجمارك مين يقلبو الشحنة راه رقابينا طير فيها
وليد:- أنا معاك أنها تجي ديريكت للمكسيك ومبعد ماتوصل معا السلاح نشوفو كينديرو ناخذوها للمغرب أكيد الطريق القديمة مزال ديالنا يعني غير نلحلو شوية الزيرويات ووكلشي فالجيب
البوس:- هادي مهمتكم ديرو اتصالاتكم خص الأسبوع الجاي يكون كلشي واصل ومتباع فبلايصو حسب العادة زبنائنا مغاديش يستناو بزاف ولذلك خلال يومين تكون نتا وجاد فالمغرب تستناو الشحنات وتتصرفو فيهم ،وبخصوص البنت اللي راها تما مترحموهاش خصنا نفطموها على خدمتنا باش تقنع الزبائن وتدخل للمجال يكفي تضياع الوقت
جميلة(ارتبكت وكحت):- ممماشي قلت حتى تت ترجع من المغرب؟
البوس(بنظرة قاسحة):-عاد سمعنا صوتك أجميلة.. آه قلت لكن أقوالي كتتجدد حسب كل مايستدعيه التغيير وباش تكوني على علم احنا راحنا مراقبين من يومين اكتشفو رجالي أجهزة تنصت عنكبوتية هنا فالفيلا وكذلك عندكم أجعفر والغريب فالأمر أنهم ملقاو والو فالشقة اللي كانو فيها ناديا وياسر.. تابعت القضية بنفسي ولقيت بأن الولد اللي معاها خصو يتحط تحت المراقبة 24 ساعة على 24
جعفر:- يااااسر لا يمكن يكون داير شي حاجة غلاط راه تربيتنا زعما وسنين وهو معانا فالدومين يجي تالدبا ويخونا مستحيل
وليد:- الوقت يتبدل يقدر يكونو شراوه وباعنا
جعفر:- ماشي أخلاقيات ياسر هادي
جاد:- حنا مكناقشوش أخلاق ومشاعر مدام البوس قال خصو يتراقب يعني يتراقب
البوس:- هنيو راسكم راه راقبتو ولقيتو كيدخل لمكتب البوليس بزاف فالمغرب ممكن شي حد فيكم يشرحلي شنو اللي ياخذ مواطن من الجالية يدخل لمكتب شرطة مرتين ثلاثة وميبقاش تا 10 دقايق ؟
جميلة(خايفة):-شنو كتقصد لالا ميمكنش ؟
البوس(غير مبالي):- وليد عندك مهمتين تستلم الشحنات و تصفي العميل
جميلة(دفعت الكرسي بعنف ووقفت):- لا ميمكنش منسمحلكش ياسر لا يمكن يكون ضدنا وزايدون نتا قلت غير شك يقدر يكون كاينة شي حاجة سولته بعدا عرفت جوابو راك غير ضالمووو ياسر لا يمكن يدير شي حاجة تأذينا راه معانا من سنين ومعمرو خاننا
جعفر(بقا يشوف فيها وعرفها غادي تنهار):- سيدنا إلى سمحت خلينا نتأكدو من صحة هاد الشكوك وإلى كانت صحيحة نواعدك أنه غانصفيه على يدي
جميلة(كتبكي):- جعفر شنو كتقول لايمكن يوقع هادشي لالالا اهئ
البوس(كيشوف بتأثر فجميلة):- كلمتي صدرت غادي يمشي وليد وجاد ويتأكدو من هاد الشكوك وايلا فعلا صدق بايعنا وخاين راه باين شنو هو مصيرو
وليد:- الإهتمام بالشحنات غايخصو جوج أسابيع عالأقل من موراها غادي نكثف مراقبتي ليه ونواعدك غاتسمع غير الأخبار الطيبة
البوس:- وهو كذلك ممكن تتفضلو دبا ونتي أجميلة خليك شوية
ناضو كلهم إلا جعفر بتردد خرج برا المكتب وعينيه فجميلة باغي يجيبها معاه مي صعب
جميلة:- نتا أناني دايما مكتفكر إلا فراسك وفمصالحك أنا علاش راني مصدومة فيك تعودت على قلبك الكحل (جات تخرج وشدها ميدها) ... طلقني متلمسنيش كنكرهك
البوس:- لحد الآن راني داير فوجه العشرة إلى مشيتي تاتدخلتي فأمر الولد غادي نسا أنني عرفتك فيوم واللي يمليه عليا ضميري غادي نفذو فيك قبل منو
جميلة:- ميشقاش تهددني وأنا لا يمكن نسمحلك تأذيها ولا تأذي ياسر
البوس:- متتحداينيش أجميلة ولا غادي نعتبرك فكفتو
جميلة(مسحت دموعها بيدها):- عن إذنك
خرجت تتعثر فرجيلها مقادراش تهزهم حاسة روحها بغات تنهار غير تسدت الباب موراها لقات جعفر كي الرحمة يتسناها
جميلة:- خذني منا أجعفر خذني منا
جعفر سندها وخرج بيها من ديك الفيلا ومسكتتش من البكا حت وصلو فيلتهم
جميلة:- اهئ قتهالك أجعفر قتلك بغا يكويها بغا يقتلها يا جعفر اهئ اهئ
جعفر:- دبا علاه مسبقة البلا قبل ميوقع راه قال شكوك يعني غادي عاد يديرو تحقيقات ويشوفو
جميلة:-وليه فين عمرو خلا شي حد وخا عليه غير شكوك فين عاد يتأكد اااااه ياجعفر أنا لايمكن نسمحلو ينفذ فيها حكم الإعدام هادا ويصفي ياسر راها غادي تموووت روحها فيه يا جعفر اهئ
جعفر(شدها من ذراعها باش تهدا):- عفاك أجميلة تهدني راه بهاد الحالة مغادي نستافدو والو
بحركة تلقائية خداها فحضنو وهي ترمات بحال شي طفلة صغيرة ضاعت منها شي حاجة عزيزة عليها بقا كيمسحلها فشعرها حتى هدات وطلعت لبيتها بصمت
نوليو لأجواء العرس جميلة جابتلنا الغمة :)
هاكا خلاوه ماليه بالبسمة والسر عليه أغنية من التراث الشعبي هههههههههه
شحال زوين فاش كتكوني توجدي روحك تحضري لشي عرس كل حاجة ديريها كيكون عندها طعم خاص وفشكل وحتى المنظر فاش تصاوبو البنات ولبسو قفاطنهم وتكاشطهم زيادة على الشعورات والمايكاب واجتماعهم ككوكبة صغيرة ديال الشابات كان روووعة وأكيد غايلوعو قلوب شباب اللي غايحضرو فالعرس هههههه ... مريم في الكسوة البيضة كانت برانسيس خيالية جات زوييينة ومسرارة وطاح عليها السر دارولها طرحة البيضة فوق راسها ناديا كانت لابسة تكشيطها الكحلة واللي فيها وريدات حومر والحزامة فالذهبي وكانت لابسة نعالة طالو فالذهبي والصاك حتى هو فالذهبي لميع والمايكاب كان دخاني على خوخي أما شعرها دارتلو مشطة أنيقة ومرولي بشكل رائع حنان كانت لابسة قفطان فالأخضر فونصي وتحيتة ديالو وردية باردة وشعرها شداتو على جنب لبنى كانت لابسة تكشيطة فاللون الأزرق غامق وتحيتيها فالأصفر وشعرها خلاتو مطلوق أما هناء فكانت لابسة قفطان كرونة أحمر غامق وشعرها تاهيا خلاتو مطلوق و رباب كانت لابسة تكشيطة فاللون البنفسجي غامق وتحتيتو بنفسجي بارد وكانت دايرة شال فنفس اللون و رجاء كانت لابسة قفطان بلا يدين فاللون الذهبي كانو البنات روعة في الجمال وحنان لبنى وهناء جيران من الحومة لقديمة أما رباب ورجاء من عائلة مريم من بعيد ... خرجو بالصلاة والسلام البنات ركبو لعروسة خلف فاللوطو فالخلف وكانو هما شي 5 إضافة ل مريم و ناديا السائقة ديالهم وتخيلو معايا الزحام مع ذلك والله محسو تابشي عذاب بالعكس ناديا مبعد متكلفت بالحساب كلو ديالها وديال مريم والبنات وكملت معا صحاب الصالون ركبت اللوطو وطلقتلهم الشعبي على فور جهد الصوت وهاتك يا كلاكصون وزغارت وتصفاق وحيوح جووو رائع لحظات لا تنسى عاشوها البنات فديك اللحظة وحتى العروسة فرحت بيه نشطوهالها وصلو هاكدك للدار ودخلو بالصلاة والسلام وكلسو العروسة فالصالة وجابولها عصير وملفاي باش تنهج وتسند روحها
ليلى:- تبارك الله تبارك الله على لالة أسماء ياخيري جيتي تهبلي بالزين
أسماء(محاملاش المشية):- شكرا تانتي جيتي واووو
أسماء كانت لابسة تكشيطة فاللون الأخضر غامق والقهوى والتحتي ديالها كان أصفر وشعرها سرحاتو ودارتو ذيل حصان والمايكاب وصباط طالون مناسب للتكشيطة وصاك صغير جات زوينة بزاف وخا ملامح وجهها مكانتش راضية نهائيا أنهم بززو عليها المشية أما ليلى فكانت لابسة تكشيطة رمادية و فيها لحمر والتحتي ديالها زرق وكانت دايرة شال خفيف مشبك فلون التكشيطة ومايكاب جات زوينة تاهيا
كانت الساعة شي 9 تماما والبنات بداو حصص الشطيح والرديح فالدر بعدا حتى بداو يسمعو كلاكصونات اللواطاااا هنا مريم شدت يد ناديا اللي كانت واقفة بجنبها بخوف وقلق
ناديا ربتت على يدها بطمأنينة باش متقلقش وابتسمت فوجهها برااااحة ودارتلها الشال من تاني على وجهها ودخلو دار العريس بالصلاة والسلام اللي كانو صحاب ابراهيم اللي خدامين معاه فالسربيس وولاد العائلة وتما مين شافو البنات منقولكمش المشاعر بقات كتسوى فرنك ودخل ابراهيم وجا وقف حدا مريم بحرج والكل كيصفق ويزغرت حنان مدت صينية نتاع الحليب والتمر لناديا وقبل ابراهيم هز الطرحة على وجه ملاكو مريم اللي حمقاتو بجمالها وروعتها باسها فجبهتها وهي نزلت عينيها خجلا منو
قدمتلهم الحليب والتمر وكل واحد شرب للتاني فلحظة خجولة مضحكة وفنفس الوقت رائعة مبعد متصورو شوية فالدار معا بعضياتهم خرجو لعروسة ولعريس وركبهم جواد فاللوطو اللي عدلهالهم بالورد والزواوق بينما البنات والحضور انتاشرو شي ركب معا ناديا شي ركب معا ليلى لكن قبل جرا هاد الحديث الصغير بين ليلى وناديا
خرجت هازة طرف تكشيطها وصاكها دايراه تحت باطها وكتجرب تتصل فالتليفون مكيردش حاولت وحاولت لكنو مكيردش تشغل بالها عليه وحتارت بقات تتمشى شوية فالجردة ديال القاعة وتحاول تصوني والو وقالت ترجع وهو يتلقالها رضوان كي الجن
ناديا(دايرة يدها على قلبها):- أوف رضوان خلعتني
رضوان:- سمحيلي أناديا مقصدتش مي بغيت فيساع نجي نهدر معاك جوج كلمات قبل متمشي
ناديا:- وي رضوان كنسمعك شنو بغيت تقول
رضوان:- بغيت نتزوج بيك
ناديا(نخلعت وخرجت فيه عينيها):- رضوااان رضواان خليني حشمانة من خالتي عزيزة وشايفة فوجه العشرة ديالنا راه قتلك زمااان يا رحمان قبل متمشي لكندا حنا منليقوش نكون إلا خوت فرجااءا نسا عليك هاد القصة وشوف حياتك معا بنت الحلال اللي تستاهلك
رضوان(ببؤس):- هادي آخر كلمة عندك وفكري أناديا عفاك ونعطيك الوقت اللي بغيتي
ناديا(جاية تتمشى):- بلاما نفكر هادا قراري من شحال هادي فديرلي خاطري ونتا الله يلاقيك ببنت الحلال اللي تليق بيك
رضوان(نزل راسو الأرض):- اللي بغيتي أناديا كالك كلو يجي بالمدابزة إلا الزواج كيجي بالخاطر
ناديا:- ربي يفرحك عن إذنك
ناديا فيساع بغات تسربي رضوان وتتخلص منو لأن قلبها وعقلها مشطون على ياسر اللي مكيجاوبش فتليفونو وخافت يكونو اللي تعرضولو رجعو تاني هددوه ولا دارو فيه شي عجب معرفت مدير حست بالضياع لقات راسها رجعت لبيت العروس والعريس وبقات واقفة عند الباب وكتشوف فالسما
السارقة الجزء 37
محتوى القصة
التنقل بين الأجزاء